Yaa ne Mesi wã maasem la Wẽnnaam na n fãag sakdbã
Yaa ne Mesi wã maasem la Wẽnnaam na n fãag sakdbã
“Wa fãa sẽn kiid a Ãdem pʋgẽ wã, woto me, fãa na n paama vɩɩm Kirist pʋgẽ.”—1 KOR. 15:22.
1, 2. a) A Ãnder ne a Filip sẽn wa n yã a Zezi wã, bõe la b yeel-yã? b) Bõe n kɩt tɩ d tõe n yeel tɩ d tara kaset wʋsg sẽn wilgd t’a Zezi sɩd yaa Mesi wã, n yɩɩd pipi kiris-nebã?
DAAR a ye, a Ãnder yeela a ba-biig a Pɩɛɛr woto: “Tõnd yãa Mesi” wã. A ra kɩsa sɩd tɩ Nazarɛt dao a Zezi yaa ned ning Wẽnnaam sẽn yãkã. A Filip me ra kɩsa sɩd ne rẽ, hal tɩ kɩt t’a gẽes a zoa a Natanayɛll n yeel-a woto: “Tõnd yãa Nazarɛt dao a Zezi sẽn yaa a Zozɛf biigã. Yaa bãmb yell la b sẽn da gʋls a Moiiz tõogã ne Wẽnnaam no-rɛɛsdbã sɛbã pʋsã.”—Zã 1:40, 41, 45.
2 Rẽ yĩnga yãmb me kɩsa sɩd t’a Zezi la Mesi ning a Zeova sẽn yãke, n na n tũnug ne yẽ n fãag ãdem-biisã bɩ? (Heb. 2:10) Rũndã-rũndã, tõnd tara kaset wʋsg n yɩɩd pipi kiris-nebã. Wẽnnaam Gomdã togsda yɛl wʋsg a Zezi rogmã, a vɩɩmã, a kũumã la a vʋʋgrã zugu, la yel-kãens fãa wilgda vẽeneg t’a sɩd yaa Kiristã. (Karm-y Zã 20:30, 31.) Biiblã wilga tʋʋm a taab a Zezi sẽn yaa Mesi wã sẽn da na n wa tʋm a vʋʋgrã poore. (Zã 6:40; Karm-y 1 Korẽnt dãmb 15:22.) Biiblã maasem yĩnga, y me tõe n yeelame tɩ y “yãa Mesi” wã. La bɩ d reng n ges bũmb ning sẽn sõng a Zezi pipi karen-biisã tɩ b bãng tɩ yẽ la Mesi wã.
B wilga Mesi wã sẽn na n yɩ ned ningã bilf-bilfu
3, 4. a) Bõe n kɩt t’a Zezi pipi karen-biisã tõog n bãng t’a sɩd yaa Mesi wã? b) Bõe yĩng tɩ y tõe n yeel tɩ yaa a Zezi a ye bal zug la bãngr-goam nins b sẽn togs Mesi wã zugã ra tõe n pidsi?
3 Bõe n kɩt t’a Zezi pipi karen-biisã tõog n bãng vẽeneg t’a yaa Mesi wã? A Zeova vẽnega a no-rɛɛsdbã bilf-bilf tɩ b togs yɛl sẽn da na n wa kɩt tɩ b bãng Mesi wã. Biibl mit a yembr yeelame tɩ yɩɩ wa bũmb b sẽn naan pees-peese, tɩ b na n tigim a peesã n sig taab n bãng a sẽn yaa a soaba. Tags-y n ges-y wa peesã sẽn na n be neb toor-toor nengẽ. B yaool n pa mi taab ye. Ned kam fãa talla a pɛɛg n wa rɩgl ro-yɛng pʋgẽ. B sã n sig peesã taab tɩ bũmbã leb a zĩigẽ kɛpɩ, yaa vẽeneg tɩ y na n yeelame tɩ ned n wilgd b ned kam fãa a sẽn segd n maan a pɛɛgã to-to. Bãngr-goam toɛy-toɛyã b sẽn togs Mesi wã zugã me wõnda peesã, tɩ b sã n da sig-ba, bɩ b na n bãng Mesi wã vẽenega.
4 Yaa vẽeneg tɩ b pa tõe n yeel tɩ bãngr-gom-kãensã fãa sẽn pids nin-yɛng zugã yaa segb ye. Bɩ bõe? Bãngd a yembr yeelame tɩ d sɩd pa tol n tõe n tags tɩ yɩɩ segb ye. A paasame tɩ “yaa bũmb sẽn pa tõe menga,” la tɩ “ãdem-biisã sẽn be tẽng zugã tɛka, yaa a Zezi a ye bal zug la bãngr-gom-kãensã fãa ra tõe n pidsi.”
5, 6. a) Na n sɩnga wãn tɩ b wa sãam a Sʋɩtãana? b) Wãn-wãn la Wẽnnaam vẽneg “yagengã” sẽn na n yɩ ned ningã?
5 Bãngr-goam nins b sẽn togs Mesi wã zugã fãa yita “sãmbg” bɩ yell sẽn solg pʋgẽ, t’a pidsgã pak ãndũniyã gilli. (Kol. 1:26, 27; Sɩng. 3:15) Yel-soalgdgã pʋgẽ, a Zeova wilgame tɩ b na n sãama a Sʋɩtãan b sẽn boond tɩ “wag-kʋdrã,” sẽn kẽes ãdem-biisã fãa yel-wẽnã la kũumã yembdẽ wã. (Wil. 12:9) Wãn to la b na n sãam-a? A Zeova togsame tɩ “yageng” la pag na n doge, t’a wa pogl a Sʋɩtãan zugã. “Yagen-kãng” na n bedsa waafã zugu, n kɩt tɩ sẽn wa-a ne wẽn-kɩɩsgã, bãasã la kũumã fãa meneme. La Wẽnnaam na n basame t’a Sʋɩtãan reng n maan pagã “yagengã” bũmbu. B maka rẽ ne a na-kãsenkãar poglgo.
6 A Zeova wilga “yagengã” sẽn na n yɩ ned ningã bilf-bilfu. Wẽnnaam pʋlma a Abrahaam woto: “Yaa fo yagengã maasem yĩng la dũniyã buud fãa na n paam barka.” (Sɩng. 22:18, NW ) A Moiiz pĩnd n togsame tɩ yagengã na n yɩɩ “no-rɛɛs” sẽn yɩɩd yẽ. (Tõo. 18:18, 19) B wa n wilga a Davɩɩd tɩ Mesi wã na n yɩɩ a yagenga, la t’a na n deega a naamã n soog wakat fãa yĩnga. No-rɛɛsdb wʋsg wilgame tɩ sɩd na n yɩɩ woto.—2 Sãm. 7:12, 16; Zer. 23:5, 6.
Bũmb nins sẽn wilgd t’a Zezi la Mesi wã
7. B sẽn yeel t’a Zezi yii Wẽnnaam “pagã” nengẽ wã võor yaa bõe?
7 Wẽnnaam yãka malɛk a ye a malɛgsã sull b sẽn boond t’a pagã sʋka, n tʋm-a tẽngã zug t’a wa yɩ “yageng” ning a sẽn da kãab tɩ watame wã. Malɛg-kãng yɩɩ a biigã, a sẽn deng n naan a soab pipi wã. Wẽnnaam bi-ribl-yendã ra segd n sak n ‘basa ziir’ ning a sẽn da tar saasẽ wã, tɩ b rog-a tẽngã zug ka, t’a yɩ ninsaal sẽn pa tar yel-wẽnde. (Fil. 2:5-7, NW; Zã 1:14) Sẽn yaa vʋʋsem sõngã n da na n “bui” a Maari t’a rɩk pʋgã, b ra segd n boola biig ning a sẽn na n dogã tɩ “Wẽnnaam Biiga.”—Luk 1:35.
8. Bõe yĩng tɩ d yetẽ t’a Zezi sẽn deeg lisg yʋʋmd ningã pidsa gomd b sẽn da togs Mesi wã zugu?
8 Bãngr-goamã wilga sẽn na n yɩ zĩig ning la wakat ning la b na n dog a Zezi wã. A Zezi sɩd roga Betlehɛm wa b sẽn da togsã. (Mii. 5:1) Wakat kãng tɩ zʋɩf rãmbã ra gũuda Mesi wã waoong ne b sũy fãa. Kẽer sẽn wʋm a Zãmbatiis kibarã, b bao n na n bãnga a “sã n yaa Kiristã.” La a Zãmbatiis leok-b-la woto: “Ned a ye n wata, n tar pãng n yɩɩd maam.” (Luk 3:15, 16) Yʋʋmd 29 soabã saab sẽnese, a Zezi waa a Zãmbatiis nengẽ n na n deeg lisgu. Rẽ t’a tara yʋʋm 30. La b ra pĩnd n wilgame tɩ yaa yʋʋm-kãng bal takɩ la Mesi wã na n puki. (Dan. 9:25) A lisgã poore, a sɩnga a koe-moonegã, n yet nebã tɩ “wakat taame, la Wẽnnaam soolem kolgame.”—Mark 1:14, 15.
9. Baa ne a Zezi karen-biisã sẽn da pa mi yɛl kẽer sõma wã, b ra kɩsa sɩd ne bõe?
9 La nebã sẽn da tagsd tɩ Mesi wã na n maana bũmb ninsã ra pa zems ye. Yaa sɩd tɩ nebã kaasame n pẽg a Zezi t’a yaa b Rĩma. La wakat kãng tɩ b ra pa mi t’a naamã na n yɩɩ saasẽ, la tɩ yaa bũmb sẽn da nan wat me ye. (Zã 12:12-16; 16:12, 13; Tʋʋ. 2:32-36) La ne rẽ fãa, a Zezi sẽn wa n sok a karen-biisã tɩ b tagsdame tɩ ‘yẽ yaa ãnda wã,’ a Pɩɛɛr leoka vẽeneg woto: “Yãmb yaa Kirist, Wẽnnaam sẽn vɩ Biiga.” (Mat. 16:13-16) Wakat n zĩnd tɩ neb wʋsg bas a Zezi pʋgb a sẽn gom gomd tɩ b pa wʋm a võor yĩnga. La a Pɩɛɛr le yeela goam sẽn wõnd woto.—Karm-y Zã 6:68, 69.
Kelg-y Mesi wã
10. A Zeova maana bõe n wilg tɩ d segd n kelga a Biigã?
10 Wẽnnaam bi-ribl-yendã sẽn da be saasẽ wã, a ra yaa malɛk sẽn tar pãn-kãsenga. A sẽn wa tẽngã zugã me, yɩɩ a ba wã yʋʋr yĩnga. (Zã 16:27, 28) A meng yeela woto: “Mam karengã ka mam dẽnd ye, yaa sẽn tʋm-a maamã rẽnda.” (Zã 7:16) A Zezi tedgrã sasa, sẽn na yɩl n le wilg t’a sɩd yaa Mesi wã, a Zeova yeela woto: “Bɩ y kelg-a.” (Luk 9:35) A yeelame tɩ d kelg-a, rat n yeel tɩ d sak nin-kãngã a sẽn tʋmã. Woto maaneg baoodame tɩ d tall tẽeb la d tʋmd tʋʋm-sõma. Yel-kãensã b yiibã yaa tɩlae, d sã n dat n ta Wẽnnaam yam la d wa paam vɩɩm sẽn kõn sa wã.—Zã 3:16, 35, 36.
11, 12. a) Bõe n kɩt t’a Zezi wakatẽ zʋɩf rãmbã pa sak n deeg t’a yaa Mesi wã? b) Ãnd dãmb n tẽ a Zezi?
11 Baa a Zezi sẽn maan yɛl wʋsg sẽn wilgd tɩ sɩd yaa yẽ la Mesi wã, a wakatẽ zʋɩf rãmbã wʋsg pa sak n tẽ-a ye. Bõe yĩnga? Bala, b ra tagsdame tɩ Mesi wã na n maana yɛl kẽer bãmb mensã sẽn da rate. Wala makre, b ra tẽedame t’a segd n wa fãaga bãmb Rom nebã nugẽ. (Karm-y Zã 12:34.) Woto kɩtame tɩ b ra pa tẽed wa b sẽn da pĩnd n togsã tɩ nebã na n paooga Mesi wã n bas-a, t’a na n yɩɩ ned sẽn tar sũ-sãoong la sẽn minim toogo, la tɩ b na n wa baas n kʋ-a lame ye. (Ezai 53:3, 5) B ra pa rat Mesi a woto buud ye. A Zezi karen-biisã kẽer meng sũy sãamame, a sẽn pa sõng n fãag Israɛll Rom nebã nugẽ wã yĩnga. La baasgo, b kell n paa ne-a, hal tɩ b wa vẽneg-b yɛlã võor sõma.—Luk 24:21.
12 Bũmb a to me n kɩt tɩ nebã pa tẽ t’a Zezi la Mesi wã ye. B wʋsg ra getame t’a goamã reegr yaa toogo. Wala makre, a yeelame tɩ ned sã n dat n zĩnd Wẽnnaam Rĩungã pʋgẽ, a segd n ‘kɩɩsa a meng raabo,’ a segd n ‘wãba’ yẽ nemd la a yũ a zɩɩm, a segd n ‘paama rogem paalga,’ la t’a soab pa segd n yɩ “dũniyã rẽnd” ye. (Mark 8:34; Zã 3:3; 6:53; 17:14, 16) Zẽk-m-mens rãmbã, rakãag-rãmbã la sẽn da pa tũud-b Wẽnnaam ne pʋ-peelmã ra getame tɩ woto fãa maaneg yaa toogo. La zʋɩf rãmb nins sẽn da yaa sik-m-mens rãmbã sak n deegame t’a Zezi sɩd yaa Mesi wã. B saka wa Samari neb nins sẽn yeel woto wã: “Tõnd mii hakɩka, tɩ bãmb yaa dũniyã fãagda.”—Zã 4:25, 26, 41, 42; 7:31.
13. B sẽn da pĩnd n togs tɩ b na n pogla a Zezi na-kãsenkãarã pidsa wãna-wãna?
13 A Zezi ra pĩnd n togsame tɩ maan-kʋʋdbã kãsem dãmb na n kaoa yẽ bʋʋd n yeel t’a segda ne kũum, n ning-a bu-zẽmsã neb nusẽ tɩ b kʋ-a ra-luk zugu, la tɩ rasem a tãab-n-soabã daare, yẽ na n vʋʋgame. (Mat. 20:17-19) A sẽn leok Sãnedrẽ wã neb tɩ sɩd yaa yẽ la “Kirist, Wẽnnaam Biigã,” b yeelame t’a sẽn yeel woto wã, a tʋʋsa Wẽnnaam. (Mat. 26:63-66) A Pɩlat meng feesa a Zezi, n yeel t’a “ka maan bũmb sẽn zems kũum ye.” La zʋɩf rãmbã sẽn da rõt-a t’a yaa tẽn-dãmbdã yĩnga, a Pɩlat “rɩka a Zezi n kɩs bãmba.” (Luk 23:13-15, 25) Rẽnd baa kaset toor-toor sẽn da wilgd fasɩ tɩ sɩd yaa Wẽnnaam n tʋm a Zezi wã, nin-kãensã kell n zãgsa “vɩɩm naabã” n kɩt tɩ b kʋ-a. (Tʋʋ. 3:13-15) B sɩd “kʋʋ” Mesi wã wa b sẽn da pĩnd n togsã. B ka-a-la ra-luk zug yʋʋmd 33 soabã Pakã daare. (Dan. 9:26, 27; Tʋʋ. 2:22, 23) A sẽn ki kũ-toaag ningã pidsa b sẽn pĩnd n yeel Sɩngr 3:15 wã pʋgẽ tɩ b na n “pogla yẽ na-kãsenkãarã.”
Mesi wã sẽn da segd n ki wã võore
14, 15. a) A Zeova sakame t’a Zezi ki bʋʋm a yiib bʋs yĩnga? b) A Zezi vʋʋgrã poore, bõe la a maan-yã?
14 A Zeova sakame t’a Zezi ki bʋʋm kãsems a yiib yĩnga. Pipi, a Zezi sẽn kell n sak a Zeova hal n tɩ ki wã, pidsa bũmb a ye sẽn be “sãmbgã” bɩ yel-soalgdgã pʋgẽ n tar yõod wʋsgo. Kɩtame tɩ b bãng vẽeneg fasɩ tɩ ned sã n zems zãnga, baa a Sʋɩtãan sẽn na n nams-a to-to fãa, a tõe n kell n yɩɩ wẽn-sakda, n wilg t’a sakame tɩ Wẽnnaam n yaa yĩngr la tẽng naaba. (1 Tɩm. 3:16) Yiib-n-soaba, wa a Zezi meng sẽn da yeelã, ‘ninsaal Biigã waame n na n kõ a vɩɩm tɩ yao neb wʋsg yĩnga.’ (Mat. 20:28) A sẽn ki tɩ yɩ rondã, a yaoa ãdem-biisã yĩng tɩ b na n paam b mens ne yel-wẽndã a Ãdem sẽn long-bã, la kɩt tɩ neb nins fãa sẽn tẽed tɩ yaa ne a Zezi maasem la Wẽnnaam fãagd sakdbã na n wa paam vɩɩm sẽn kõn sa.—1 Tɩm. 2:5, 6.
15 A Zezi sẽn ki wã, a maana rasem a tãab yaoogẽ n yaool n vʋʋge. Sẽn na yɩl t’a karen-biisã bãng t’a vʋʋgame la a paam n togs-b yɛl a taaba, a ra vẽnegda a meng tɩ b yãta. A maana woto rasem 40 pʋgẽ. (Tʋʋ. 1:3-5) Rẽ poore, a leba saasẽ n na n tɩ wilg a Zeova a maoongã yõodo, la a gũ wakat ning a sẽn na n kɩt t’a lebg a Rĩungã Rĩmã. La nand tɩ wakat kãng ta, a ra tara tʋʋm wʋsg a sẽn segd n tʋme.
Bũmb a taab Mesi wã sẽn segd n maane
16, 17. Wilg-y tʋʋm a Zezi sẽn tʋm a sẽn leb saasẽ wã poore, la a sẽn nan na n tʋme?
16 A Zezi vʋʋgrã tɛk n tãag masã, a yaa kiris-neb tigingã Rĩmã, n get tigingã tʋʋm yell ne a sũur fãa. (Kol. 1:13) La Wẽnnaam sẽn yãk wakat ningã sã n da ta, a Zezi na n lebga Wẽnnaam Rĩungã Rĩmã. Biiblã bãngr-goam la yɛl wʋsg sẽn maand dũniyã zug wilgdame t’a Zezi sɩd lebga Rĩm yʋʋmd 1914 soabã, la tɩ “dũniyã sɛɛb” bɩ a yaoolem dayã me sɩnga wakat kãnga. (Mat. 24:3; Wil. 11:15) Rẽ poor bilfu, a lʋɩɩ taoore, tɩ yẽ ne a malɛgsã zab ne a Sʋɩtãan ne a zĩn-dãmbã, n dig-b n yiis saasẽ.—Wil. 12:7-10.
17 Tʋʋmd ning a Zezi sẽn sɩng yʋʋmd 29 soabã tɛkã, rat n yeel tɩ koɛɛgã mooneg la karen-biisã maanegã kolgda a saab zĩigẽ. Ka la bilfu, a na n kaoa ãdem-biisã fãa bʋʋdo. A na n yeela neb nins fãa sẽn sak n tẽ tɩ yaa ne yẽ maasem la a Zeova na n fãag sakdbã woto: “Bɩ y reeg soolem ninga sẽn segl yãmb yĩng hal dũniyã naaneg wakatã.” (Mat. 25:31-34, 41) La neb nins sẽn pa sak a naamã na n paama sãoongo, wakat ning yẽ ne a malɛgsã sẽn na n wa sãam nin-wẽnsã. Rẽ poore, a Zezi na n balga a Sʋɩtãan n lob yẽ ne a zĩn-dãmbã fãa “bog-zulungẽ.”—Wil. 19:11-14; 20:1-3.
18, 19. A Zezi sẽn tʋmd tʋʋm nins a sẽn yaa Mesi wã yĩngã kɩtame t’a na n maan bõe, la wãn to la rẽ na n naf sakdbã?
18 A Zezi naamã sẽn na n kaoos yʋʋm tusrã sasa, a na n tʋma tʋʋm toor-toor tɩ zems ne naam yʋy nins b sẽn pʋd-a wã fãa gill kɛpɩ. Wala makre, a na n wilgame t’a sɩd yaa ‘Sagend sẽn yaa sõma wʋsgo, Wẽnnaam sẽn-tar-pãnga, Ba sẽn-ka-kiida, la Laafɩ-naaba.’ (Ezai 9:5, 6) A Zezi naamã sasa, a na n kɩtame tɩ bilf-bilfu, sẽn na n põs-bã la sẽn na n vʋʋg-b rãmbã fãa lebg neb sẽn zems zãnga. (Zã 5:26-29) Mesi wã na n talla sakdbã n ta “vɩɩm ko-bunds zĩisẽ,” n kɩt tɩ b paam zems-n-taar hakɩk ne a Zeova. (Karm-y Wilgr 7:16, 17.) Yaoolem makrã poore, b na n naaga kɩɩsdbã fãa ne a Sʋɩtãan la a zĩn-dãmbã n sãam “bugum mogr sẽn dɩt kidbrã pʋgẽ.” Rẽ na n yɩɩ “waafã” zug bedsg b sẽn da pĩnd n togsã pidsgu.—Wil. 20:10.
19 Ad a Zezi sɩd pidsda tʋʋm nins Mesi wã sẽn segd n tʋmã, hal tɩ be rasãnde! Tẽngã na n lebga arzãna, n pid ne ninsaalb sẽn paam b yel-wẽnã sugr la sẽn zems zãnga, n na n vɩɩmd ne keelem la sũ-noog hakɩk wakat sẽn kõn sa yĩnga. Wakat kãng t’a Zeova yʋʋrã paama waoogre, tɩ b sak n deeg zĩig fãa t’a sɩd yaa yĩngr la tẽng naaba. Ad sẽn sakd-b Wẽnnaam sẽn tʋm a soabã sẽn na n wa paam bark ninsã sɩd yaa kãsems wʋsgo!
Yãmb yãa Mesi wã bɩ?
20, 21. Bʋʋm bʋs yĩng n kɩt tɩ y segd n gomd Mesi wã yell ne nebã?
20 Hal yʋʋm 1914 soabã tɛk n tãag masã, d vɩɩ Kirist parousia wã bɩ a waoongã wakate, bala a lebga Wẽnnaam Rĩungã Rĩm saasẽ. Baa ne sẽn yaa saasẽ tɩ d pa tõe n yã-a ne nifã, d nee bãngr-goam nins sẽn gomd rẽ yellã sẽn sɩd pidsd tɩ yaa vẽenega. (Wil. 6:2-8) La baa ne rẽ, wa pipi kiris-nebã wakatẽ zʋɩf rãmbã, neb wʋsg pa rat n sak n deeg tɩ Mesi wã lebga Rĩm saasẽ ye. Bãmb me baooda fãagd sẽn na n kẽes a meng politikã pʋgẽ, wall sẽn na n tũnug ne ninsaalbã goosneema rãmbã n fãag-ba. La yãmb yẽ tõog n bãngame t’a Zezi lebga Wẽnnaam Rĩungã Rĩma. Rẽ yĩnga y sũur pa yɩ noog y sẽn paam n bãng rẽ wã sɩda? Wa a Zezi pipi karen-biisã, yãmb me sẽn bãng rẽ wã kɩtame tɩ y yeel y taab woto: “Tõnd yãa Mesi wã.”
21 Rẽ yĩnga y sã n gomd Wẽnnaam la a raabã yell ne nebã, y wilgd-b-la tʋʋm nins a Zezi sẽn segd n tʋm a sẽn yaa Mesi wã yĩngã bɩ? Y sã n maand woto, na n paasa mi-beoog ning y sẽn tar ne-a bũmb nins a sẽn zoe n maan n kõ-yã, a sẽn maand rũndã-rũndã wã, la a sẽn na n wa maan beoog daar n kõ-yã yĩnga. Yaa vẽeneg tɩ wala a Filip la a Ãndere, yãmb me zoe n goma Mesi wã yell ne y roagdb la y zo-rãmba. La bɩ y maneg n sõs ne-b ne yẽesem, n wilg-b tɩ sɩd yaa a Zezi la Mesi ning b sẽn da pʋlem tɩ watame wã, la tɩ yaa ne a Zezi maasem la Wẽnnaam na n fãag sakdbã fãa!
Y tõe n wilga a võor bɩ?
• Bõe n kɩt t’a Zezi pipi karen-biisã tõog n bãng Mesi wã?
• Bʋʋm a yiib bʋs yĩng la a Zezi ki-yã?
• Tʋʋm bʋs me la a Zezi sẽn yaa Mesi wã segd n wa tʋme?
[Zãmsgã sogsgã]