A Sʋɩtãan naamã pa na n yãk neng ye
A Sʋɩtãan naamã pa na n yãk neng ye
“Nin-wẽng ka na n tol n paam sũ-noog ye.”—KOƐ. 8:13.
1. Bõe yĩng tɩ b sẽn na n kao nin-wẽnsã bʋʋdã yaa kiba-noogo?
B NA N wa kaoa nin-wẽnsã buudo. Baa kaoosda, Wẽnnaam na n sok-b-la bũmb nins b sẽn maanã fãa. (Yel. 5:22; Koɛ. 8:12, 13) Ad woto yaa kiba-noogo, sẽn yɩɩd fãa ne neb nins sẽn nong tɩrlmã, la neb nins nin-wẽnsã sẽn wẽg la b namsã. A Sʋɩtãan sẽn yaa wẽnemã ba wã la Wẽnnaam na n deng n soke.—Zã 8:44.
2. Bõe yĩng tɩ yell ning sẽn zĩnd Edɛnnã welgr da baood sẽka?
2 Tẽeg-y tɩ sɩngrẽ wã, yaa wuk-m-meng n kɩt t’a Sʋɩtãan belg ninsaalbã tɩ b tõdg a Zeova naamã. Dẽnd d yaab a Ãdem ne a Hawa naaga a Sʋɩtãan n yeel t’a Zeova naamã pa zemse, n lebg yel-wẽn-maandba. (Rom 5:12-14) Yaa vẽeneg t’a Zeova ra mii b kɩɩsgã sẽn na n wa ne yɛl nins n kõ-bã. La baasgo, a ra segd n basame tɩ yel-kãens wa, tɩ malɛgsã la ninsaalbã fãa me bãnge. Woto yĩnga, sẽn na yɩl n welg yellã la a wilg vẽeneg tɩ kɩɩsdbã ka bʋʋm baa bilfu, ra yaa tɩlae t’a kõ-b sẽk tɩ b mak b sẽn tʋlg bũmb ningã.
3. Tõnd manesem segd n yɩɩ wãn ne nanambsã?
3 Ninsaalbã sẽn zãgs a Zeova naamã tɛka, yɩɩ tɩlae tɩ b lugl naam bɩ goosneema buud toor-toore. Tʋm-tʋmd a Poll ra gʋlsa lɛtr n tool a tẽed-n-taasã sẽn da be Rommã, n gom goosneema kãens yelle, n yeel tɩ b yaa ‘nanambs d sẽn segd n sake.’ Wakat kãng tɩ ra yaa Rom naab a Neerõ ne a goosneema wã neb fãa n da yaa nanambsã. Baa sẽn ka Wẽnnaam n lugl-bã, a Poll yeelame tɩ nanamb-kãensã “sẽn be wã yaa Wẽnnaam n kɩt tɩ b beẽ.” (Karm-y Rom dãmb 13:1, 2.) La rẽ yĩnga a Poll gomdã rat n yeelame tɩ d segd n saka ninsaalbã nanambs n yɩɩd Wẽnnaam bɩ? Abada! A rat n yeelame bal t’a Zeova sã n bas tɩ ninsaalbã naam ket n beẽ fãa, kiris-nebã segd n sakd-b lame.
A yam-yãkrã na n wã-a lame
4. Wilg-y bʋʋm ning sẽn kɩt tɩ ninsaalbã naam pa na n tol n yãk nengã?
4 Baa d sẽn sakd nanamb-kãensã wã, d miime tɩ sẽn yaa a Sʋɩtãan n so-bã, b naamã pa na n yãk neng ye. Bõe yĩnga? Bʋʋmã yaa tɩ b sẽn dɩt b naamã ne yam ningã pa yit Wẽnnaam nengẽ ye. Yaool n yaa a Zeova yamã buud bal n ka to. Rẽnd yaa yẽ bal n tõe n wilg tõnd naam ning sẽn yaa sõma ne-d n yɩɩdã. (Zer. 8:9; Rom 16:27) Naoor wʋsgo, yaa zu-loeesã ne tudgrã n wat n kɩt tɩ ninsaalbã bãng sẽn yaa sõma. La a Zeova yẽ mii sẽn segd wakat fãa n pa tudgdẽ ye. Naam buud fãa sẽn pa tũud a sor-wilgrã pa tõe n yãk neng ye. Bʋʋm kãngã yĩnga, n paas a Sʋɩtãan sẽn so nebã ne yam-wẽngã yĩnga, yaa vẽeneg t’a naamã a sẽn lugl ne ninsaalbã goosneema rãmbã maasmã ra pa tol n tõe n yãk neng ye.
5, 6. Wõnda bõe n kɩt t’a Sʋɩtãan wa kɩɩs a Zeova?
5 Naoor wʋsgo, ned sẽn tar yam pa sakd n maan bũmb a sẽn zoe n miẽ tɩ pa na n yãk neng ye. A sã n mum a nin n maan me, wat n yaa tɩlae ta sak n deeg t’a tudgame. Ninsaalbã sẽn be tẽng zug tɛka, b yɛl wʋsg wilgame tɩ d Naandã sẽn ka to wã kɩɩsg yaa faoore. (Karm-y Yelbũn 21:30.) La wuk-m-mengã la ziirã raab kɩtame t’a Sʋɩtãan mum a nin n kɩɩs a Zeova. Dẽnd a Sʋɩtãan yãka yam n dɩk sor sẽn tar-a n dabd sãoong zĩigẽ.
6 Kaoosg zugẽ, Babilon naab a ye n wuk a meng n gom goama, tɩ wilgd a Sʋɩtãan wuk-m-mengã sẽn ta zĩig ningã. Naabã yeela woto: “Mam na n dʋʋ n taa saasẽ. Mam na n looga Wẽnnaam ãdse, n zẽk m naam geere. Mam na n zĩnda saasẽ pãens tãngã zug rɩtgo, zĩ-zãrgã pʋgẽ. Mam na n looga sawat zutu, la mam na n yɩɩ wa sẽn ka-a to wã.” (Ezai 14:13-15) Rĩm kãngã sẽn tʋlg bũmb ningã sẽn yaa yalemdã yĩnga, pa tõoge, la Babilon naamã meng pʋd n baasa ne yãnde. Ka la bilfu, a Sʋɩtãan ne a dũniyã me na n baasa woto.
Bõe yĩng tɩ Wẽnnaam bas tɩ b kɩɩs-a?
7, 8. A Zeova sẽn bas tɩ wẽnemã beẽ wã waa ne nafa. Sõdg-y kẽere.
7 Neb kẽer tõe n sokda b mens n dat n bãng bũmb ning sẽn kɩt t’a Zeova bas tɩ ninsaalbã kẽ a Sʋɩtãan la b luglg b goosneema rãmba, baa a sẽn mi tɩ ka na n yãk nengã. A sẽn yaa Wẽnnaam sẽn tõe fãa wã yĩnga, a ra tõe n gɩdg-b lame. (Yik. 6:3) La wall t’a maan woto wã, a bas-b lame. A yamã sẽn ka to wã yĩnga, a bãngame t’a sã n kõ-b weer bilf tɩ b maan b raabã, na n wa baasa neere. Bala, na n wa lebga vẽeneg t’a Zeova bal la naab sẽn zems la sẽn sɩd nong ãdem-biisã. Sẽn paase, Wẽnnaam sẽn welg yellã to-to wã na n nafa nin-tɩrsã.
8 Ad ninsaalbã sã n da tõdg a Sʋɩtãan daabã n pa kɩɩs a Zeova naamã, b ra na n gilẽ-la nimbãaneg tɛkẽ! La baasgo, a Zeova sẽn bas-b tɩ b soog b mensã waa ne nafa wʋsgo. Kɩtame tɩ sũ-tɩrs rãmbã bãng tɩ yaa yam bũmb tɩ b sak Wẽnnaam la b teeg-a. Hal pĩnd wẽndẽ n tãag masã, ninsaalbã sigla naam dɩɩb bugs toɛy-toɛyã, la baa a ye pa tõog n welg b zu-loeesã ye. Woto fãa kɩtame tɩ Wẽnnaam a Zeova nin-buiidã maneg n kɩs sɩd n paas tɩ yaa yẽ naamã bal n yaa sõma. Yaa sɩd t’a Zeova sẽn bas a Sʋɩtãan t’a soog ninsaalbã waa ne namsg buud toor-toore, tɩ baa neb nins sẽn maand Wẽnnaam daabã ne pʋ-peelmã namsdẽ. La waa ne nafa toor-toor me n kõ wẽn-tũudbã.
Kɩɩsgã pʋd n kɩtame t’a Zeova yʋʋr paam pẽgre
9, 10. Wãn to la a Sʋɩtãan naamã kɩt t’a Zeova yʋʋrã paamd pẽgre?
9 A Zeova sẽn bas ninsaalbã tɩ b sak a Sʋɩtãan n soog b mensã pa paoogd a naamã ye. Ninsaalbã naam sẽn yɩ to-to hal pĩnd wẽndẽ n tãag masã wã pʋd n wilgdame tɩ Wẽnnaam sẽn vẽneg a Salomo t’a yeel tɩ ninsaal pa tõe n wilg a meng sorã yaa sɩda. (Karm-y Yelbũn 20:24.) A Sʋɩtãan kɩɩsgã leb n kõo sor t’a Zeova paam n wilg a sẽn yaa Wẽnnaam ning buudã sõma n paase. Bõe yĩng tɩ d yet woto?
10 A Sʋɩtãan naamã sẽn wa ne zu-loees ninsã kɩtame tɩ maneg n lebg vẽeneg ne-d n paas t’a Zeova yaa Wẽnnaam sẽn sɩd yaa sõma wʋsgo. Dẽnd woto kɩtame tɩ neb nins sẽn nong-a wã maneg n pẽgd-a. A Sʋɩtãan naamã sɩd waa ne bũmb a sẽn da pa rate. A sẽn dɩt a naamã to-to wã wẽneg n kɩtame tɩ Wẽnnaam yʋʋrã paamd pẽgre. Bala wilgame t’a Zeova sẽn welg naamã poorẽ no-koeemdã to-to wã sɩd yaa sõma wʋsgo. Sẽn na yɩl n bãng tɩ sɩd yaa woto, bɩ d ges wãn to la a Sʋɩtãan naamã kɩt tɩ d maneg n ne a Zeova nonglmã, a pãngã, a tɩrlmã, a yamã, a sũ-marã la a sẽn sakd n kõt sugrã.
11. Bõe ne bõe la a Zeova maan n wilg a nonglmã?
11 A nonglmã. Biiblã yeta tõnd tɩ “Wẽnnaam yaa nonglem.” (1 Zã 4:8) Wẽnnaam sẽn naan ninsaalbã meng zoe n wilgda a nonglmã. Sẽn paase, Wẽnnaam sẽn naan tõnd tɩ d yaa to-to wã bee rasãnd hal wʋsgo, tɩ wilgd vẽeneg t’a sɩd nong-d lame. A Zeova sẽn naan tẽngã to-to wã wilgdame me t’a nonga nebã. Tẽngã yaa neere, tɩ bũmb nins fãa sẽn yaa tɩlae ninsaalbã sũ-noog yĩngã me be a pʋgẽ. (Sɩng. 1:29-31; 2:8, 9; Yɩɩl 139:14-16) La kɩɩsgã tɛka, a Zeova maana yɛl a taab n wilg t’a nonga ãdem-biisã. Bõe la a maan-yã? Tʋm-tʋmd a Zã yeelame t’a Zezi ra yeela woto: “Wẽnnaam nonga dũniyã hal tɩ b kõ b Biigã sẽn ka to, tɩ ned ninga fãa sẽn tẽed bãmb kõn sãam ye, la a na paam vɩɩm sẽn ka sɛta.” (Zã 3:16) Rẽ yĩnga bũmb da bee Wẽnnaam sẽn tõe n maan tɩ wilg a nonglmã, n yɩɩg a sẽn tʋm a Biigã tẽng zug ka sẽn na yɩl n fãag ãdem-biisã sɩda? (Zã 15:13) Wẽnnaam sẽn wilg a nonglmã woto wã leb n yaa mak-sõng n kõ ninsaalbã, tɩ b tõe n dɩk a togs-n-taare, n modgd n nong b taabã wa a Zezi sẽn maanã.—Zã 17:25, 26.
12. Bõe n wilgd t’a Zeova pãngã sɩd ka to?
12 A pãngã. Yaa “Wẽnnaam sẽn-tõe-fãa wã” bal n tõe n naan yõore. (Wil. 11:17; Yɩɩl 36:10) Ned rogmẽ, a sẽn nan pa maan baa fʋɩ wã kɩtame tɩ b tõe n mak a vɩɩmã ne sebr b sẽn nan pa gʋls a zugu. A kũumã poore, d tõe n yeelame t’a pidsa sebrã ne a sẽn yãk yam n maan bũmb nins fãa wã, tɩ wilgd a sẽn yɩ ned ning buudã. A Zeova tẽra bõn-kãens fãa, la wakat ning a sẽn yãkã sã n ta, a na n vʋʋga ned fãa wa a sẽn da yaa a soabã bal kɛpɩ. (Zã 5:28, 29) Dẽnd baa Wẽnnaam a Zeova sẽn da pa rat tɩ ninsaalbã kiidẽ wã, kũumã sẽn be wã kɩtame t’a paam sor n na n wilg t’a tara tõog n tõe n vʋʋg kũum. Sɩd me, a Zeova yaa “Wẽnnaam sẽn-tõe-fãa.”
13. Bõe yĩng tɩ d yetẽ t’a Zezi kũumã sẽn yɩ maoongã wilgdame t’a Zeova tɩrlmã sɩd ka to?
13 A tɩrlmã. A Zeova pa yagd ziri, a leb n pa maand kɛgr me ye. (Tõo. 32:4; Tɩt 1:2) Wakat fãa, a tũuda a noyã sẽn yaa tɩrsã, la a tũud sɩdã baa sasa ning ninsaalbã sẽn mi n tẽed tɩ woto maaneg pa nafd-a wã. (Rom 8:32) Tags-y n ges-y-yã a sũurã sẽn sãam to-to, b sẽn wa n kaad a bi-nongr a Zezi ra-luk zug wa a yaa wẽn-tʋʋsã! La a sẽn nong ninsaalbã yĩnga, a saka yel-kãngã sẽn zabd wʋsgã, sẽn na yɩl n tũ noy nins yẽ mengã sẽn gãneg tɩrlmã wɛɛngẽ wã. (Karm-y Rom dãmb 5:18-21.) Tɩrlem sẽn kae dũni kãngã pʋgẽ baa bilfã kõo a Zeova sor t’a wilg t’a tɩrlmã buud sɩd ka to ye.
14, 15. Sõdg-y yɛl kẽer a Zeova sẽn maan tɩ wilgdẽ t’a yamã ka to, la t’a yaa sũ-mar soaba?
14 A yamã. A Ãdem ne a Hawa beegrã poor bala, a Zeova wilga a sẽn na n maan to-to n menes kɩɩsgã bi-wẽnsã. (Sɩng. 3:15) A Zeova sẽn yɩ tao-tao n wilg woto wã, n paas a sẽn vẽneg a nebã bilf-bilf a sẽn na n pids rẽ to-to wã, kɩtame tɩ b bãng t’a yamã buud sɩd ka to ye. (Rom 11:33) A Zeova tara tõog n tõe n welg yell buud fãa tɩ bũmb pa gɩdg-a ye. Dũni kãngã pida ne yoobo, zaba, wẽgbo, kɩɩsgo, nimbãan-zoeer kaalem, bak n sõnge, la pʋ-lika. La rẽ kɩtame t’a Zeova paam n wilg ninsaalbã la malɛgsã yam hakɩkã sẽn yaa a soabã. Karen-biig a Zak yeela woto: “Yam ninga sẽn yit yĩngrã reng n yaa sõma, la a yaool n bee laafɩ la sũ-bʋgsem n sakd nana, la a pida ne nimbãan-zoeer la sõmblem biisi, a ka be kãnegr ye, la a ka zãmbg ye.”—Zak 3:17.
15 A sũ-marã. Ninsaalbã sã n da pa lebgẽ yel-wẽn-maandb tɩ kɩt t’a Zeova na n maan sũ-mar ne-ba, d ra pa na n bãng t’a sũ-marã ka to ye. A Zeova sẽn sak n maand sũ-mar hal na maan yʋʋm tusa wã, wilgdame t’a sũ-marã ka tar mak-n-taaga, la tɩ d segd n wilg-a-la d mi-beoog rẽ yĩnga. Tʋm-tʋmd a Pɩɛɛr bee bʋʋm a sẽn yeel tɩ d segd n bãngame t’a Zeova ‘sẽn maand sũ-marã yaa tõnd fãagr yĩngã.’—2 Pɩɛ. 3:9, 15.
16. Bõe yĩng t’a Zeova sẽn sakd n kõt sugrã noom tõnd hal wʋsgo?
16 A yaa sugr kõta. Tõnd fãa yaa yel-wẽn-maandba, n beegd naoor wʋsgo. (Zak 3:2; 1 Zã 1:8, 9) D sũy segd n yɩɩ noogo, a Zeova sẽn sakd n “kõt sugr wʋsgã” yĩnga. (Ezai 55:7) Bɩ d bãng tɩ yaa tõnd sẽn dog ne yel-wẽndã, n beegdẽ tɩ Wẽnnaam kõt-d sugrã, n kɩt tɩ d miẽ tɩ sugr noomame wã. (Yɩɩl 51:7,11,19) A Zeova sẽn sakd n kõt tõnd ned kam fãa sugrã kɩtame tɩ d maneg n nong-a hal wʋsgo, la wilgdẽ tɩ d segd n modg n dɩka a togs-n-taare, n kõt d taabã sugri.—Karm-y Kolos rãmb 3:13.
Dũniyã yɛl sẽn tar kengrã võore
17, 18. Bʋʋm bʋs n wilgd t’a Sʋɩtãan naamã pa yãk nenga?
17 Hal pĩnd wẽndẽ n tãag masã, a Sʋɩtãan sẽn so dũniyã, a sigl-a-la wa a sẽn dat to-to, la rẽ pa tol n tõog n maaneg ninsaalbã yɛl ye. Yʋʋmd 1991 wã, zʋrnall a ye (The European) pʋgẽ b soka woto: “Dũniyã bẽedame bɩ?” La b wẽneg n leoka woto: “Yaa vẽeneg t’a bẽedame, . . . la pa Wẽnnaam yell ye. Yaa nebã n kɩt t’a bẽedẽ.” Ad woto sɩd yaa sɩda! Yaa a Sʋɩtãan sẽn belg a Ãdem ne a Hawa tɩ b zãgs a Zeova naamã n bao n na n soog b mensã n wa ne yɛlã. B sẽn maan woto wã, b saka naam buud sẽn pa na n tol n naf-ba. Toog la nimbãaneg ning sẽn tar nebã dũniyã gill zugã wilgda vẽeneg tɩ ninsaalbã naam bẽeda a yõor bãaga.
18 A Sʋɩtãan yaa rat-m-ye soaba, n dɩt a naamã a meng nafr yĩng bala. La a Zeova yẽ nonga nebã n dat b neere. Woto kɩtame t’a Sʋɩtãan pa tol n tõe n mak a naamã ne a Zeova naamã ye. A Sʋɩtãan naamã pa tõog tɩ zems-n-taare, sũ-noog la bãan zĩnd dũniyã zug ye. Rẽnd lebga vẽeneg tɩ yaa a Zeova naamã n sɩd zemse! Rẽ yĩnga kaset bee tõnd wakatã n wilgdẽ tɩ sɩd yaa woto bɩ? N-ye! Sõsg ning sẽn pʋgda na n wilga rẽ.
Bõe la vɛrse nins sẽn pʋgdã wilgd tõndo?
• Yelbũn 21:30.
• Yelbũn 20:24.
[Zãmsgã sogsgã]
[Foto rãmba, seb-neng 25]
A Sʋɩtãan naamã zɩ n naf ãdem-biisã ye
[Foto rãmbã soaadba]
U.S. Army photo
WHO photo by P. Almasy
[Foto, seb-neng 26]
A Zeova tõe n vʋʋga kũum menga
[Foto, seb-neng 27]
A Zeova sẽn sak t’a Biigã ki tɩ yɩ maoongã wilga a nonglmã ne a tɩrlmã