Tõnd yell paka Wẽnnaam: Bũmb nins sẽn wilgd rẽ

HAL pĩnd wẽndẽ n tãag masã, neb wʋsg sokda b mens woto: Wẽnnaam sã n nonga tõndo, bõe yĩng tɩ namsgã waoog woto? Yaa sɩd tɩ nebã sẽn sɩng n sokd woto daar zãrame, la tara yõod tɩ d bãng a leoorã. Yaa vẽeneg tɩ y sã n nong neda, y pa tol n dat t’a nams ye. Y sã n yã t’a namsdẽ, y maanda y sẽn tõe fãa n sõng-a. Yaa rẽ n kɩt tɩ neb wʋsg tagsdẽ tɩ ãdem-biisã namsgã sẽn yaa wʋsgã wilgdame tɩ tõnd yell pa pak Wẽnnaam ye. Dẽnd yɩta sõma tɩ d reng n ges bũmb nins sẽn wilgd tɩ Wẽnnaam nonga tõndo, la tɩ d yell sɩd pak-a lame wã.

Bũmb nins Wẽnnaam sẽn naanã wilgdame t’a nonga tõndo

Yaa Wẽnnaam a Zeova “n naan yĩngr la tẽnga, la ko-kãsengã ne bũmb nins fãa sẽn be b pʋsẽ” wã. (Tʋʋma 4:24) D sã n maag d mens n ges bũmb nins a sẽn naanã, d nee vẽeneg t’a sɩd rata tõnd neere. Wala makre, tags-y bũmb nins fãa sẽn noom yãmbã yelle. Rɩ-bʋg la yãmb nonga? A Zeova ra tõe n kõo ãdem-biisã rɩ-yɛng bala. La a kɩtame tɩ rɩɩb buud toor-toor beẽ, tɩ d tõe n dɩ n bãng b noom. A kɩtame me tɩ tẽngã pid ne tɩɩs la mood buud toor-toore, tɩ kẽer tar puud hal tɩ b gesg tar yamleoogo. Woto fãa kɩtame tɩ d sũur noom ne vɩɩmã.

D ges a sẽn naan tõnd to-to wã me. A naan-d lame tɩ d tõe n la wall d maan laado, n tõe n kelg yɩɩl wall d yɩɩl d toore, la d maan yɛl a taab sẽn noom-do. Yaa sẽn na yɩl tɩ d vɩɩmã yɩ-d noogo, bala a ra tõe n kɩtame tɩ d vɩ n pa mi woto fãa ye. Tags-y tõnd ne d taabã zĩid-n-taarã yell me. D sã n be ne d zo-rãmba, wall d sã n yã ned d sẽn nong wʋsg tɩ d mobg taaba, d sũy yaa noogo. Bɩ bõe? A sẽn naan tõnd tɩ d tõe n nong d to wall bũmbã meng zoe n yaa kaset sẽn wilgd t’a nonga tõndo. A sẽn naan tõnd tɩ d tõe n wilg nonglmã kɩtame tɩ d tõe n yeel t’a sɩd yaa nonglem.

 Biiblã yetame tɩ Wẽnnaam nonga tõndo

Biiblã yeta tõnd tɩ Wẽnnaam yaa nonglem. (1 Zã 4:8) Pa Wẽnnaam sẽn naan bũmb ninsã bal n wilgd tõnd t’a nong-d lame ye. Biiblã me wilgda rẽ vẽenega. Wala makre, Biiblã tara sagls sẽn kogend tõnd ne bãase, sẽn sõngd-d tɩ d yɩ maan-n-zems rãmb bũmb fãa pʋgẽ, la sẽn keoogd tõnd tɩ d lak d mens ne yão-beedã la rã-tɩgrã.—1 Korẽnt dãmba 6:9, 10.

Biiblã leb n kõta sagl-sõma tõnd ne taab zems-n-taarã wɛɛngẽ, n yet-d tɩ d segd n nonga d taabã, n waoogd-b la d maand-b neere. (Matɩe 7:12) A sagend-d lame tɩ d zãag d mens ne zʋg nins sẽn wat ne namsgã. Wala makre, rat-tɩ-loogã, munaafɩglmã, sũ-kiirã, yoobã la nin-kʋʋrã. Nebã fãa sã n da modgd n tũud Biiblã saglsã, yaa vẽeneg tɩ namsgã ra kõn yɩ wʋsg woto ye.

La bũmb ning sẽn wilgd n yɩɩd tɩ Wẽnnaam nonga tõndo, yaa a sẽn kɩt t’a biigã wa ki tɩ yɩ rond ãdem-biisã yĩngã. Zã 3:16 yeta woto: “Wẽnnaam nonga dũniyã hal tɩ b kõ b Biigã sẽn ka to, tɩ ned ninga fãa sẽn tẽed bãmb kõn sãam ye, la a na paam vɩɩm sẽn ka sɛta.” Woto wilgdame t’a Zeova zoe n maana bũmb sẽn na yɩl tɩ kũumã la namsgã buud fãa sa fasɩ.—1 Zã 3:8.

Dẽnd d tara kaset wʋsg sẽn wilgd t’a Zeova nonga tõndo. Woto wilgdame t’a sẽn ne tɩ tõnd namsdẽ wã, pa noom-a ye. A na n wa kɩtame tɩ namsgã sa. D pa segd n maan sãmbs ne rẽ ye. Biiblã pʋd n wilgda a sẽn na n maan to-to n kɩt tɩ namsgã fãa sa wã vẽenega.

[Foto, seb-neng a 4]

Wẽnnaam sẽn naan tõnd tɩ d tõe n nong d to wall bũmbã wilgdame t’a nong-d lame