Sẽn ki-bã tõe n sõnga sẽn vɩ-bã bɩ?

AFIRIK tẽng a ye pʋgẽ, bi-bɩɩg a ye yʋʋr sẽn boond t’a Tamba n da rat n maan ɛgzame. * A ma wã yeel-a lame tɩ sẽn na yɩl n paam a ɛgzame wã, yaa tɩlae t’a kos b neb nins sẽn ki wã sõngre. Itali babg ning b sẽn boond tɩ Sisillã na-tẽngã sẽn yaa Palɛrmã pʋgẽ, b manega kũ-rãmb wʋsg n bĩng bog-kẽeng pʋgẽ tɩ nebã kẽnd n getẽ. Neb kẽer tẽedame tɩ kũ-kãensã kogenda sẽn vɩ-bã. Lily Dale yaa Etazĩni tẽng a ye neb wʋsg sẽn mi tɩ pida ne bag-bʋgdb la kinkir-bagba. Yʋʋmd fãa, nebã kẽnda be n dat tɩ b neb bɩ b zo-rãmb sẽn ki sõng-ba.

Dũniyã gill zugu, neb wʋsg ket n tẽedame tɩ sẽn ki-bã tõe n sõnga sẽn vɩ-bã. Yãmb me tẽeda woto bɩ? Tõe tɩ b zãmsa yãmb woto, bɩ tõe tɩ y tara roagdb wall zo-rãmb sẽn tẽed woto. Yaa vẽeneg tɩ d fãa tʋll n yãa d neb nins sẽn ki wã. La bag-bʋgdbã ne kinkir-bagbã yetame tɩ b tõe n kɩtame tɩ d yã-ba. Zʋrnall a ye (Time) pʋgẽ, bag-bʋgd a ye yeelame tɩ “yaab rãmbã bee wakat fãa n tõe n sõng ned ning fãa sẽn dat sõngre.” A sẽn yeelã yaa sɩd bɩ? Rẽ yĩnga sẽn ki-bã sɩd tõe n sõnga sẽn vɩ-bã bɩ? Tõe tɩ Biiblã sẽn yet bũmb ning rẽ wɛɛngẽ wã na n ling-y-la wʋsgo.

Sẽn ki-bã tɩ vɩɩ zĩig a to bɩ?

Ges-y Koɛɛg Soab 9:5 sẽn yet bũmb ninga: “Nin-vɩɩs miime tɩ b na n kiime. La kũum ka mi bũmb ye.” Vɛrse a 6 pʋgẽ, b paasa woto: “Bãmb nonglmã ne b kisgrã la b sũ-kiirã me fãa sɛɛme. Bãmb ka le tar pʋɩɩr ne bũmb nins fãa sẽn maand dũniyã zugã ye.” Vɛrse 10 paasame tɩ “tʋʋmd ne tagsgo la yam ne bãngr ka be kɩɩm-kulg fo sẽn dabd zĩig ningã ye.” Gom-bil ning b sẽn lebg vɛrse kãngã pʋgẽ tɩ kɩɩm-kulgã ne Hebre yaa “Seolle,” la a ne gɛrk yaa “Hadɛs,” t’a võorã meng rat n yeel tɩ yaoogo. B lebga hadɛsã Tʋʋm sebrã pʋgẽ me tɩ kɩɩm-kulgu. La woto wilgame t’a Zezi Kirist sẽn ki wã, a kẽe zĩ-kãng sẽn yaa yaoogã.—Tʋʋma 2:31.

A Zezi sẽn da be tẽngã zugã, a sõnga neb wʋsgo, bala a ra miime t’a na n wa kiime. Rẽ yĩnga a ra tagsdame t’a sã n wa be yaoogẽ, a na n tõog n ket n sõngda nebã bɩ? Ayo. A maka a sẽn da na n wa ki wã ne yʋngo, sẽn yaa wakat nebã sẽn pa nong n tʋmdẽ wã. (Zã 9:4) A Zezi ra mii vẽeneg tɩ ned sã n ki, a pa ket n vɩ ye.—Ezai 26:14.

A Zezi leb n maka kũumã ne bũmb a to sẽn na yɩl n wilg tɩ ned sã n ki, a pa ket n vɩ ye. A Zezi zoa a Lazaar sẽn wa n ki wã, a Zezi maka kũumã ne gõeem. (Zã 11:11-13) Rẽ yĩnga d na sak n kos ned sẽn gõe t’a sõng-d a gõeemã sasa sɩda? Ayo! Bala ned sẽn gõe ka mi bũmbu, a pa tõe n maan bũmb n sõng ned me ye.

Ned sã n ki, bũmb n yit a yĩngẽ wã n ket n vɩ bɩ?

Biiblã wilgdame tɩ Wẽnnaam naana ninsaalbã ne rũmsã tɩ b vʋʋsd pemsmã. La yaa b sẽn vʋʋsdã n kɩtd tɩ b fãa tõe n vɩɩmde. Dẽnd ninsaal bɩ rũng sã n wa pa le vʋʋsdẽ, a kiime, sẽn dat n yeel t’a pa le mi bũmb ye.—Sɩngre 3:19; Koɛɛg Soaba 3:19-21; 9:5.

 La neb kẽer tõe n sokda b mens woto: ‘La nebã sẽn mi n yetẽ tɩ b goma ne ned sẽn ki, tɩ b wʋma a koɛɛga, bɩ tɩ b yã-a lame wã yẽ?’ Nebã sɩd yeta woto tẽns wʋsg pʋsẽ. Rẽ kɩtame tɩ neb wʋsg tagsdẽ tɩ b roagd bɩ b zoa sẽn maan kaalem ket n vɩɩme, tɩ kɩt tɩ kẽer kẽnd bag-bʋgdb la kinkir-bagb sẽn yet tɩ b tõe n goma ne sẽn ki-bã nengẽ n baood sõngre.

Nebã sẽn mi n yet woto wã yaa sɩd bɩ? Sã n sɩd yaa woto, rẽ yĩnga pa kɩɩsd Biiblã sẽn yet bũmb ningã sɩda? A Zezi Kirist yeelame tɩ Wẽnnaam Gomdã yaa sɩda. (Zã 17:17) Bũmb sã n yaa sɩd me, ziri pa be a pʋgẽ ye. Nebã yetame tɩ sẽn ki-bã tõe n sõnga sẽn vɩ-bã. La Biiblã sõngda tõnd tɩ d wʋmd yɛlã võore. Biiblã gomda ned sẽn kẽng n na n tɩ bao ned sẽn ki sõngr yelle. D sã n maag d yĩng n karem kiba-kãngã, na n sõng-d lame tɩ d bãng sɩdã sẽn ki-bã zugu.

Rĩm sẽn kẽng n na n tɩ kos ned sẽn ki sõngre

Daar a yembre, rĩm a Sayull ne a tãb-biisã wa n dat n zaba ne Filisti nebã. La a Sayull sẽn yã Filisti nebã, “rabeem yõk-a lame t’a sũur kiuusdẽ.” A ra ket n yaa rĩma, la a ra basa a Zeova. Woto kɩtame t’a Zeova ra pa le reegd a kosg ye. No-rɛɛs a Sãmwɛll me ra maana kaalem. Masã, yɛ la a Sayull na n kẽng n tɩ paam sõngre?—1 Sãmwɛll 28:3, 5, 6.

A Sayull kẽnga En-dor n na n tɩ kos kinkir-bag sõngre. A kosa kinkir-bagã “t’a bool a Sãmwɛll” sẽn ki wã n kõ-a. Kinkir-bagã boola kɩɩma, sẽn maan a meng wa a Sãmwɛlle. Kɩɩmã yeela a Sayull tɩ Filisti nebã na n tõoga zabrã, la t’a Sayull ne a kambã na n kii zabrã pʋgẽ. (1 Sãmwɛll 28:7-19) Rẽ yĩnga sɩd yɩɩ no-rɛɛs a Sãmwɛll la sẽn gom ne-a wã bɩ?

D tags yellã zug neere. Biiblã yeelame tɩ ned sã n ki a “lebda tẽngã tomẽ,” la tɩ baraar bala, a “tagsg na n sɛɛme.” (Yɩɩl Sõamyã 146:4) A Sayull ne a Sãmwɛll fãa ra miime tɩ Wẽnnaam gɩdga bag-bʋgendo. A Sayull ra pʋd n kɩtame meng tɩ b rig bag-bʋgdbã la kinkir-bagbã fãa tẽngã pʋgẽ.—Maankʋʋre 19:31.

Rẽ yĩnga wẽn-sakd a Sãmwɛll sẽn ki wã sã n da tɩ vɩɩ zĩig a to, a na kɩɩs Wẽnnaam noor n sak kinkir-bag boolg n wa gom ne a Sayull sɩda? D bãng me t’a Zeova ra pa le gomd ne a Sayull ye. Rẽ yĩnga kinkir-bag tõe n modga Wẽnnaam sẽn yaa pãng sẽn ka to soabã t’a tũnug ne no-rɛɛs a Sãmwɛll sẽn ki wã n gom ne a Sayull sɩda? Ayo. Dẽnd yaa vẽeneg tɩ pa no-rɛɛs a Sãmwɛll sẽn yɩ wẽn-sakdã la kinkir-bagã sẽn boolã ye. Yaa zĩn bɩ malɛg-wẽng n maan a meng wa a Sãmwɛlle.

Zĩn-dãmbã yaa malɛg-wẽns sẽn kɩɩs Wẽnnaam hal pĩnd wẽndẽ wã. (Sɩngre 6:1-4; Ziid 6) Malɛg-kãensã tõe n gesa ned n bãng-a, n bãng a sẽn gomd to-to, a manesem sẽn yaa to-to, la yɛl a taaba. B ratame tɩ nebã tags tɩ Biiblã sẽn yetã pa sɩd  ye. Pa zaalem yĩng la Biiblã sẽn yet tɩ d zãag d mens ne-bã ye! (Tõodo 18:10-12) Malɛg-wẽns kãensã ket n bee rũndã-rũndã.

Masã, tõe tɩ d bãnga nebã sẽn mi n yet tɩ b wʋma ned sẽn da ki koɛɛga, bɩ tɩ b yãa ned sẽn da ki wã võore. * (Efɛɛz rãmba 6:12) Tags-y bilf yɛsa. A Zeova yaa Wẽnnaam sẽn nong neba la a get b yelle. Sẽn ki-bã sã n tɩ vɩɩ zĩig a to la b tõe n sõng b zo-rãmb la b zak rãmba, rẽ yĩnga Wẽnnaam na gɩdg nebã tɩ b ra gom ne-b la a yeel t’a “ka nong neb nins fãa sẽn maand woto wã” sɩda? Yaa vẽeneg tɩ ayo! (Tõodo 18:12; 1 Pɩɛɛr 5:7) Ãnda n sɩd tõe n sõng sẽn vɩ-bã la sẽn ki-bã?

Sẽn vɩ-bã la sẽn ki-bã tõe n paama sõngr hakɩka

D bãnga vẽeneg tɩ sẽn ki-bã pa tõe n sõng sẽn vɩ-bã ye. Sẽn paase, tõnd sã n baood sẽn ki-bã sõngre, yaa wẽng wʋsgo. Bala kɩɩsda Wẽnnaam noyã, la tõe n kɩtame me tɩ zĩn-dãmbã soog-do.

Biiblã yeta tõnd tɩ d bao sõngr d naand a Zeova nengẽ, tɩ yẽ bal n sɩd tõe n sõng tõndo. A tõe n fãaga tõnd ne kũumã. (Yɩɩl Sõamyã 33:19, 20) Rũndã-rũndã, d tõe n paama a sõngre. A kɩtame tɩ d miẽ tɩ beoog daar na n yɩɩ sõma, tɩ bag-bʋgdbã la kinkir-bagbã pa tõe n maan dẽ ye.

A Tamba wa n bãngame tɩ bag-bʋgdbã la kinkir-bagbã pa togsd sɩda, la t’a Zeova sẽn kãab tõnd bũmb ninsã la sɩda. Bag-bʋgdbã yeelame t’a Tamba sã n pa kʋ maoong n kõ a yaab rãmbã, a pa na n paam a ɛgzame wã ye. A Tamba ra zãmsda Biiblã ne a Zeova Kaset rãmbã. Rẽ kɩtame t’a bãng bũmb ning sẽn paamd ned a kũum poore, la a bãng me tɩ yaa malɛg-wẽns n maand b mens wa nebã yaab rãmba. Baa ne a ma wã sẽn pẽdg-a naoor wʋsg t’a kos sõngr bag-bʋgdbã nengẽ wã, a zãgsame la a yeel a ma wã woto: “Mam sã n pa paam m ɛgzame wã rõndã, vẽere m na modg n paame.”

Ɛgzame wã baasa wãna? Yẽ n lʋɩ nebã fãa taoore. Woto linga a ma wã wʋsgo, tɩ kɩt t’a pa le tẽed bag-bʋgdbã la kinkir-bagbã ye. Rẽ tɛka a pa le gom kʋ maoong n kõ yaab rãmb n kos sõngr yell ye. A Tamba bãngame t’a Zeova yeelame tɩ d pa segd n tɩ “sok kũum” nin-vɩɩs yĩng ye. (Ezai 8:19) A Tamba sẽn zãms Biiblã, a bãngame t’a sã n nong Wẽnnaam noyã, na n naf-a-la wʋsgo.—Yɩɩl Sõamyã 1:1-3.

La d neb nins sẽn ki wã yẽ? Rẽ yĩnga b tõe n wa vʋʋgame bɩ? A Zeova sõngda sẽn vɩ-bã, la a kãabame t’a na n vʋʋga neb nins sẽn ki wã. No-rɛɛs a Ezai wilgame tɩ sẽn ki-bã pa le tõe n maan bũmb ye. A sebrã sak 26 vɛrse 19 wã pʋgẽ, a yeela woto: “Neb nins sẽn ki wã na n leb n yikame. . . . Neb nins sẽn be tẽngã tom pʋgẽ wã, nek-y-yã, kelm-y ne sũ-noogo.” No-rɛɛsã paasame tɩ sẽn ki-bã sẽn pa tõe n maan baa fʋɩ wã na n wa vʋʋgame.

Tags-y n ges-y neb milyaar dãmbã sẽn ki n pa le tõe n maan bũmbã sẽn na n vʋʋgã sẽn na n yɩ to-to! Biiblã wilgdame t’a Zeova rata ne a sũur fãa n vʋʋg neb nins sẽn ki wã. (Zoob 14:14, 15) Yãmb tagsdame tɩ woto yaa bũmb sẽn pa tõe bɩ? A Zezi Kirist sẽn da kɩs sɩd tɩ sẽn ki-bã na n vʋʋgame wã yĩnga, a wilgame t’a Zeova nifẽ, sẽn ki-bã ket n vɩɩme.—Luk 20:37, 38.

Yãmb sã n dat n kɩs sɩd tɩ sẽn ki-bã na n wa vʋʋgame, bɩ y ket n zãmsd Biiblã n paasdẽ. * Rẽ na n kɩtame tɩ y tall bas-yard t’a Zeova tõe n sõnga sẽn vɩ-bã la a vʋʋg sẽn ki-bã, la t’a sẽn kãab bũmb ninsã fãa “yaa sɩda, la b zemsa reegre.”—Wilgri 21:4, 5.

[Tẽngr not rãmbã]

[Goam sẽn tar pãnga, seb-neng 11]

Yaa vẽeneg tɩ d fãa tʋll n yãa d neb nins sẽn ki wã

[Foto, seb-neng 12]

Yaa no-rɛɛs a Sãmwɛll sẽn da ki wã la sẽn gom ne rĩm a Sayullã bɩ?