Tʋm-y ne vʋʋsem sõng sʋʋgã sõma
Tʋm-y ne vʋʋsem sõng sʋʋgã sõma
‘Bob-y Wẽnnaam goamã sɩɩg sõng sẽn kõ yãmbã wa sʋʋga.’—EF. 6:17.
1, 2. D sẽn dat koe-moondb wʋsg n paasã yĩnga, bõe la d segd n maane?
DAAR a yembre, a Zezi sẽn yã tɩ neb nins sẽn dat tɩ b sõng-b tɩ b bãng Wẽnnaam la a raabã sõor labsame, a yeela a karen-biisã woto: “Tigisgã yaa wʋsgo, la tigisdbã yaa bilfu. Dẽ yĩnga, bɩ y kos tigisgã soab tɩ b tʋm tigisdb tɩ b kẽng bãmb tigisgã.” La a Zezi pa yeel woto bal ye. A gomdã poore, a maana bũmbu. A “boola a karen-biis piig la a yiibã” n tʋm-b tɩ b kẽng ‘tigisgã,’ rat n yeel tɩ b saag n moon koɛɛgã. (Mat. 9:35-38; 10:1, 5) Rẽ zugẽ, a Zezi “yãka karen-biis a taab pis-yopoe n tʋm bãmb yiib-yiib” tɩ b kẽng n tɩ moon koɛɛgã.—Luk 10:1, 2.
2 Rũndã-rũndã me d rata koe-moondb wʋsgo. Yʋʋmd 2009 soabã pʋgẽ, neb nins sẽn wa a Zezi kũumã Tẽegrã sõor yɩɩ neb 18 168 323. Woto wilgdame tɩ sẽn yɩɩd neb milyõ 10 sẽn pa a Zeova Kaset rãmb n naage. Dẽnd pʋtã sɩd pelgame n ta tigisgu. (Zã 4:34, 35) Woto yĩnga d segd n pʋʋsa Wẽnnaam n kos tigisdb n paase. La wãn to la d na n wilg tɩ d sɩd rata koe-moondb n paase? Yaa d sẽn na n moond koɛɛgã ne yẽesem, la d maood n lebgd koe-moondb sẽn mi b tʋʋmd sõma, n tõogd n maand karen-biisi.—Mat. 28:19, 20; Mark 13:10.
3. Bõe yĩng tɩ d yetẽ tɩ yaa vʋʋsem sõngã n sõngd tõnd tɩ d lebgd koe-moondb sẽn mi b tʋʋmd sõma?
3 Sõsg ning sẽn loogã wilgame tɩ yaa Wẽnnaam vʋʋsem sõngã n tõe n sõng tõnd tɩ d “togs Wẽnnaam koɛɛgã ne raoodo.” (Tʋʋ. 4:31) Vʋʋsem sõngã tõe n sõng-d lame me tɩ d yɩ koe-moondb sẽn mi b tʋʋmd sõma. Wẽnnaam a Zeova kõo tõnd tʋʋm teoog a ye sẽn yaa sõma hal wʋsgo. Yaa Biiblã sẽn yaa a Gomdã. Bũmb a ye d sẽn tõe n maan n paas d moonegã sõmblem, yaa d sẽn na n tʋmd ne tʋʋm te-kãng sõma, bala yaa ne Wẽnnaam vʋʋsem sõngã maasem la b gʋls-a. (2 Tɩm. 3:16) Koɛɛg ning sẽn be a pʋgẽ wã yita Wẽnnaam nengẽ. Woto yĩnga, koe-moonegã sasa, d sã n taasd nebã Biiblã goamã neere, d tõe n yeelame tɩ yaa ne vʋʋsem sõngã sõngr la d tõogd n maand woto. La nand tɩ d wilg d sẽn tõe n maan to-to n taas koɛɛgã neerã, d na n deng n goma pãng ning Wẽnnaam Gomdã sẽn tarã yelle.
‘Wẽnnaam Gomdã tara pãnga’
4. Wẽnnaam koɛɛgã sẽn be Biiblã pʋgẽ wã tõe n kɩtame tɩ ned maan bõe?
4 Pãng ning Wẽnnaam goamã bɩ a koɛɛgã sẽn tarã sɩd ka to ye! (Heb. 4:12) B maka koɛɛg ning sẽn be Biiblã pʋgẽ wã ne sʋʋg sẽn dɩt n yɩɩd sʋʋg buud fãa, n yeel t’a tõe n welga kõb-sugds ne b sɩɩlem. Biiblã goamã sɩd kẽeda sũur hal sõma, n tõe n sõng ned t’a bãng a sẽn sɩd yaa ned ning buudu. A tõe n kɩtame tɩ ned toeem fasɩ. (Karm-y Kolos rãmb 3:10.) Sɩd-sɩda, Wẽnnaam Gomdã sɩd tõe n toeema neda!
5. Wãn-wãn la Biiblã tõe n sõng-do, la d sã n sake, bõe n na n maane?
5 Sẽn paase, yam ning Biiblã sẽn kõtã buud ka to ye. A tara goam sẽn tõe n sõng ned dũni kãngã sẽn yaa toogã pʋgẽ, t’a tõog n mao ne zu-loeesã. Wẽnnaam Gomdã pa vẽnegd tõnd tɩ d yãt yambẽ-yambẽ bal ye, a vẽnegda d sorã tõre, tɩ d ne hal yɩɩg me. (Yɩɩl 119:105) A tara sagls ka tɛk sẽn tõe n sõng-d zu-loees sasa. A saglsã leb n tõe n sõng-d lame tɩ d bãng n yãk tũud-n-ta-sõmse, nug-tʋʋma, la d bãng d sẽn tog n maneg d mens to-to, la yɛl a taaba. (Yɩɩl 37:25; Yel. 13:20; Zã 15:14; 1 Tɩm. 2:9) Wẽnnaam Gomdã noy tũub tõe n sõng-d lame tɩ d bãng n vɩɩmd ne d taabã. (Mat. 7:12; Fil. 2:3, 4) No-kãens sẽn vẽnegd d sorã tɩ d ne yɩɩgã yĩnga, d tõe n zoe n bãnga bũmb d sẽn dat n maan sẽn na n wa ne biis ninsi. (1 Tɩm. 6:9) Biiblã togsa Wẽnnaam sẽn na n wa maan bũmb ning beoog daarã me, tɩ sõngd tõnd tɩ d tõe n bãng n vɩɩmd tɩ zems ne raab kãnga. (Mat. 6:33; 1 Zã 2:17, 18) Ad ned sã n sɩd sak n na n tũ Wẽnnaam Gomdã noyã, a vɩɩmã tallda võor la kõ-a sũ-noog tɛkẽ!
6. Hal sẽn ta zĩ-bʋg la Biiblã sõngd tõnd tẽebã zabr pʋgẽ?
6 Tags-y pãng ning Biiblã sẽn tar n tõe n sõng tõnd tẽebã zabr pʋgẽ wã me yelle. A Poll yeelame tɩ Wẽnnaam Gomdã yaa vʋʋsem sõng sʋʋga. (Karm-y Efɛɛz rãmb 6:12, 17.) D sã n taas nebã koɛɛg ning sẽn be Biiblã pʋgẽ wã sõma, tõe n fãag-b-la a Sʋɩtãan nugẽ. Sʋ-kãngã pa sʋʋg sẽn kʋʋd ned ye. A fãagda nebã. Dẽnd d segd n mao n bãnga d sẽn tõe n tall-a n tʋm sõma to-to.
Tʋm-y ne-a sõma
7. Bõe yĩng tɩ d segd n mao n wa tõe n tʋm ne vʋʋsem sõng sʋʋgã sõma?
7 Sodaag sã n dat tɩ zabr sasa bɩ a bãng n tʋm ne a zab-teed sõma, a segd n deng n zãmsa a sẽn tog n tʋm ne-b to-to. Tõnd me sã n dat n tõog n tall vʋʋsem sõng sʋʋgã n zab tẽebã zabr sõma, rẽnda d reng n zãmse. Tʋm-tʋmd a Poll sagla a Tɩmote rẽ wɛɛngẽ n yeel-a woto: “Nang pãng n ta Wẽnnaam yam, n yɩ tʋm-tʋmd sẽn kõn zoe yãnd ye, la sẽn togsd sɩd koɛɛgã tɩrg bala.”—2 Tɩm. 2:15.
8, 9. Bõe n tõe n sõng-d tɩ d wʋm Biiblã gomd võore? Rɩk-y makre.
8 Bõe n na n sõng tõnd tɩ d tõogd n “togsd sɩd koɛɛgã tɩrga”? Nand tɩ d sõng ned t’a wʋm Biiblã gomd võore, rẽndame tɩ tõnd mengã reng n wʋmd a võorã sõma. Woto baoodame tɩ d sã n karem gomd Biiblã pʋgẽ, bɩ d maag d yĩng n bao n bãng bũmb ning sẽn kɩt tɩ b wa yet rẽ wã. Naoor wʋsgo, d sã n karem vɛrse nins sẽn deng d sẽn karem a soabã, la vɛrse nins sẽn pʋgl-bã, d bãngda rẽ.
9 Dẽnd sẽn na yɩl n wʋm vɛrse võor sõma, rẽnda d lebg n tɩ karem goamã sẽn sɩng zĩig ningã, n tãag a baasgẽ wã. Wala makre, sẽn na yɩl n wʋm tʋm-tʋmd a Poll goam nins sẽn be Galat dãmb 5:13 wã võore, sɩd yaa woto la d segd n maane. Be, a Poll yeela woto: “M ba-biisi, b boola yãmb lohorem pʋga. La lohorem kãng ka tɩ yãmb sak yĩngã ratem ye. La bɩ y sõng taab ne nonglem.” Yaa lohorem bʋg yell la a Poll sẽn gomdã? Rẽ yĩnga yaa b sẽn paam b mens ne yel-wẽnã la kũumã yembdã bɩ? Yaa b sẽn sõng-b tɩ b bãng sɩdã Wẽnnaam zug n paam b mens ne ziri wã bɩ, bɩ yaa lohorem a to yell la a gomda? D sã n tɩ karem a Poll sẽn sɩng a goamã zĩig ningã n tar n watẽ, d bãngdame tɩ yaa lohorem ning b sẽn paame, b sẽn yiis-b ‘Tõogã yembd pʋgẽ wã’ yell la a sẽn gomdã. (Gal. 3:13, 19-24; 4:1-5) Dẽnd yaa kiris-nebã sẽn sak Kiristã tɩ kɩt tɩ b paam lohorem ningã yell la a sẽn gomã. Neb nins sẽn da mi lohorem kãng yõodã ra tʋmda ne nonglem b taabã yĩng wa yembse. La neb nins sẽn da pa tar nonglmã ra zabda taab la b maand mo-beed ne taaba.—Gal. 5:15.
10. Sẽn na yɩl n wʋm vɛrse võor sõma, bõe me la d segd n bao n bãnge, la wãn to la d tõe n maane?
10 Yɛl a taab me n tõe n sõng-d tɩ d wʋm vɛrse goam võor sõma. Wala makre, segdame tɩ d bao n bãng sẽn gʋls-a Biiblã sebr ning d sẽn karmã, a sẽn gʋls-a wakat ninga, la sẽn sɩng to-to t’a wa gʋls sebrã. La sã n tõeyã, d tog n bao n bãnga a sẽn gʋls sebrã bũmb ning yĩnga, nebã vɩɩm la b minimd sẽn da yaa to-to, n paas b sẽn da maand bũmb nins tũudmã wɛɛngẽ sebrã gʋlsg wakate. *
11. D sã n wa wilgd nebã Biiblã sẽn yet bũmb ningã, d segd n gũusame n da maan bõe?
11 La ‘togs sɩd koɛɛgã tɩrgã’ baoodame tɩ d maan tɩ zʋʋg wilg nebã Biiblã sẽn yet bũmb ningã. D segd n gũusdame n da yɛɛsd nebã bɩ n paoogd-b ye. Yaa sɩd tɩ d tõe n talla Biiblã n wilg nebã sɩdã wa a Zezi sẽn maan to-to, a Sʋɩtãan sẽn wa n mak-a wã. La baasgo, d pa segd n tall-a n bugs d kɛlgdbã bɩ n sãbs-ba, pa rẽ bɩ n modg-b tɩ b sak n deeg tɩ tõnd sẽn tẽed bũmb ninsã la sɩd ye. (Tõo. 6:16; 8:3; 10:20; Mat. 4:4, 7, 10) D segd n tũu tʋm-tʋmd a Pɩɛɛr saglgã. A sagla woto: ‘Yãmb sũyã pʋsẽ, bɩ y waoog Kirist sẽn yaa Zusoabã. Bɩ y bãng daar fãa n leok ne sũ-maasem la sik-m-menga, ned ninga fãa sẽn sokd yãmb tẽeb yelle.’—1 Pɩɛ. 3:15.
12, 13. B sẽn yeel tɩ sɩd ning sẽn be Wẽnnaam Gomdã pʋgẽ wã tõe n ‘sika pãens rãmbã’ võor yaa bõe? Rɩk-y makre.
12 D sã n maag d yĩng n togs sɩd ning sẽn be Wẽnnaam Gomdã pʋgẽ wã neere, tõe n kɩtame tɩ bõe maane? (Karm-y 2 Korẽnt dãmb 10:4, 5.) Tõe n ‘sika pãens rãmba,’ rat n yeel tɩ tõe n kɩtame tɩ ned bãng tɩ bũmb a sẽn da tẽed ne a sũur fãa yaa ziri, tɩ yɛl kẽer a sẽn maand yaa wẽnse, la kɩt me t’a ra le tẽ goam la tagsa sẽn yaa ninsaalb bãngr sẽn ka yõodo. D tõe n talla Biiblã n kɩt tɩ ned bas tagsg buud fãa ‘sẽn zẽkd a meng ne Wẽnnaam bãngrã,’ bɩ sẽn kɩɩsd Wẽnnaam bãngrã. Woto rat n yeelame tɩ ne Biiblã goamã maasem, d tõe n sõnga ned t’a toeem a tagsg tɩ zems ne sɩdã.
13 Ad kibar sẽn sɩd wilgd rẽnda. Yaa yʋʋm 93 pʋg-yãang sẽn yit Ẽnd soolmẽ wã kibare. Hal a yãadmẽ, b wilg-a lame tɩ ned sã n ki, a lebgd n waa dũni, n yɩ ned bɩ bũmb a to. A wa n sɩnga Biiblã zãmsg ne a bi-ribl a ye sẽn be tẽng a to tɩ b gʋlsd taaba. A sak n deega bũmb ning a sẽn bãng a Zeova la a pʋlemsã zugã. La b sẽn da zãms-a bũmb ning kũumã zugã ra kẽ-a-la hal sõma. Woto kɩtame t’a biigã sẽn wa n gʋls n wilg-a sẽn ki-bã sẽn lebgd bũmb ningã, a leok-a woto: “Mam pa tol n tõe n wʋm yãmb Biiblã sẽn yet yel-kãngã zugã baa bilf ye. Tũudmã toɛy-toɛyã fãa la bal wilgda nebã tɩ ninsaal tara sɩɩg sẽn pa kiidi. Mam sɩng n tẽedame tɩ ninsaal sã n ki, yaa a yĩngã bal n ki, la t’a sɩɩgã tʋgd n kẽe ned bɩ rũnga, tɩ b rog-a ne yĩng a to, tɩ yĩn-kãng kũum poor me bɩ a le lebg bũmb a to. B wilga tõnd tɩ tallda woto n tãag naoor 8 400 000. Dẽnd rẽ fãa yaa ziri wɛ? Fo rat n yeelame tɩ tũudum kãensã fãa tudgame bɩ?” Rẽ yĩnga, ‘vʋʋsem sõng sʋʋgã’ tõe n kɩtame tɩ pagã bas tẽeb-kãngã sẽn kẽ a sũur woto wã bɩ? A biigã lebs n gʋls-a lame n wilg-a Biiblã vɛrse rãmb a taaba, la semen a wãn poore, pagã gʋlsame n leok woto: “Mam wʋmda ned sẽn sɩd lebgd bũmb ning a kũum poorã võor masã bilf-bilfu. M sẽn bãng tɩ kũum vʋʋgrã sasa, d na n le yãa d neb nins sẽn da ki wã, kõo maam sũ-noog wʋsgo. Mam datame tɩ Wẽnnaam Rĩungã wa tao-tao.”
Sõng-y kɛlgdbã tɩ b bãng tɩ yaa sɩda
14. Tõog tɩ d kɛlgdbã sak n deeg Biiblã sẽn yetã rat n yeelame tɩ bõe?
14 Tall Biiblã n tʋm sõma koe-moonegã pʋgẽ wã pa rat n yeel tɩ d karemd vɛrse rãmbã bal tɩ nebã kelgdẽ ye. A Poll da tõogdame t’a kɛlgdbã sakd n deegdẽ tɩ bũmb ning a sẽn karemd Biiblã pʋgẽ wã “sɩd yaa sɩda.” Tõnd me segd n tõogd n maanda woto. (Karm-y Tʋʋm 19:8, 9; 28:23.) Ned sẽn sak n deeg gomd kɩsa sɩd tɩ b sẽn yeel-a wã sɩd zemsame, la t’a tõe n tẽe ne a sũur fãa. D sã n tõog tɩ ned sak n deeg tɩ bũmb Biiblã sẽn yeel yaa sɩda, rat n yeelame tɩ d tõogame t’a soabã sak n tẽ a sẽn wʋmã ne a sũur fãa. Yɩl n tõog n maan dẽ, rẽndame tɩ d mao tɩ d kɛlgdã sak n kɩs sɩd tɩ d sẽn yeel-a wã yaa sɩd fasɩ. Bɩ d ges d sẽn tõe n maan dẽ to-to.
15. Wãn to la d tõe n sõng nebã tɩ b waoog Biiblã goamã?
15 Tikd-y y goamã Biiblã zugu, tɩ kɩt tɩ nebã waoog Wẽnnaam Gomdã. Nand tɩ y karem vɛrse, bɩ y kɩt t’a soabã bãng tɩ tara yõod wʋsg tɩ d bãng Wẽnnaam tagsg bũmb ning d sẽn sõsdã zugu. Y sã n sok kɛlgdã t’a wilg a tagsgo, y tõe n yeel-a-la woto: “Bɩ d ges Wẽnnaam sẽn yet bũmb ning rẽ zugu.” Wall y sok-a woto: “Bõe la Wẽnnaam yet rẽ wɛɛngẽ?” D sã n deng n yeel woto n yaool n karem vɛrse wã, d wilgdame tɩ Biiblã sɩd yaa Wẽnnaam Gomde, la na n sõnga kɛlgdã me t’a sak n deeg rẽ. Sẽn yɩɩd fãa, d sã n wa sõsd ne ned sẽn tẽed Wẽnnaam la a yaool n pa mi Biiblã sẽn yet bũmb ningã, yaa sõma tɩ d maan woto.—Yɩɩl 19:8-11.
16. Bõe n na n sõng-y tɩ y tõogd n wilgd vɛrse rãmbã võor neere?
16 Ra n karemd-y vɛrse rãmbã bal ye. Wilgd-y b võorã me. A Poll da minim n maanda woto. A sã n da yeel bũmbu, a tikda vɛrse rãmb zug n wilg a kɛlgdbã t’a sẽn yetã yaa sɩda. (Tʋʋ. 17:3) Naoor wʋsgo, y tõe n karma vɛrse, tɩ yaa gomd wall gom-biis a wãn bal la y rat tɩ y kɛlgdã gãd a yamẽ. Dẽnd y segd n bãnga y sẽn na n maan dẽ to-to. Wala makre, y tõe n lebs n togsa vɛrse wã gom-biis nins sẽn wilgd y gomdã võorã, wall y sok-a bũmb sẽn na n kɩt t’a bãng gom-bi-kãens vẽenega. Rẽ poore, y segd n wilga vɛrse wã gom-kãens võore, la y yaool masã n sõng-a t’a bãng rẽ sẽn tõe n naf-a to-to.
17. Wãn-wãn la y tõe n kɩt tɩ ned tags vɛrse rãmbã zug tɩ sõng-a?
17 Sõng-y y kɛlgdbã tɩ b tags vɛrse rãmbã zug neere. A Poll da maagda a yĩng n ‘sõsd ne nebã ne Gʋlsg Sõamyã,’ n wilgd-b yɛlã ball-ball tɩ kɩtdẽ tɩ b tagsd neere. (Tʋʋ. 17:2-4) Rɩk-y-yã a togs-n-taare, n modgdẽ tɩ y goamã kẽed y kɛlgdbã sũyã. Sogsd-y-b sogsg sẽn wilgd tɩ y rat n bãnga b tagsg n paam n sõng-ba. (Yel. 20:5) Gũusd-y n da paoogd-b ye. Y goamã segd n yɩɩ vẽenega, tɩ kɛlgdã tõog n pʋg ball-ball n wʋm a võorã. Rẽ n so tɩ y sẽn yetã segd n tik yɛl sẽn yaa vẽenes zugu. Segdame tɩ y goamã zemsd ne Biiblã sẽn sɩd yetã kɛpɩ. Y sẽn na n karem vɛrse a yembr n wilg a võor la y rɩk makr sẽn na n sõng kɛlgdã n são y sẽn na n karem vɛrse a yi bɩ a tãab var-var n pa wilg b võor ye. Y sã n gom bũmb y kɛlgdã sẽn mi vẽeneg yelle, tõe n ‘paasa y goamã pãnga.’ (Yel. 16:23) Sasa ning me, y segd n maana vaeesg n bao kibay a taab n paas n tõog n sõng a soabã. Wala makre, yɩɩ tɩlae tɩ b sõng yʋʋm 93 pʋg-yãang ning yell d sẽn da gomã t’a bãng sẽn sɩng to-to tɩ b wa wilgd nebã zĩig zãng tɩ sɩɩg pa kiidã. Yaa b sẽn sõng-a t’a bãng rẽ, la a bãng sẽn sɩng to-to tɩ tũudmã fãa la bal wa tẽed rẽ wã poor bal la a yaool n sak n deeg Biiblã sẽn yetã. *
Ket-y n tʋmd-y ne-a sõma
18, 19. Bõe yĩng tɩ d segd n ket n tʋmd ne ‘vʋʋsem sõng sʋʋgã’ sõma?
18 Biiblã yeta vẽeneg tɩ “dũni kãngã loogdame,” rat n yeel t’a toeemdame. Nin-wẽnsã tʋʋm-wẽns tara paasgo. (1 Kor. 7:31; 2 Tɩm. 3:13) Woto yĩnga, tara yõod tɩ d ket n tʋmd ne vʋʋsem sõng sʋʋgã sẽn yaa Wẽnnaam goamã, n ‘sikd pãens rãmbã.’
19 D sũy sɩd yaa noog d sẽn tar Biiblã sẽn yaa Wẽnnaam Gomdã, n tõe n wilg nebã a koɛɛgã sẽn tar pãngã tɩ kẽ pʋ-peelem dãmbã sũyã, la d sõng-b tɩ b bas zɩlem-beedã tẽebã! Zɩlem-beed baa a ye pãng pa ta Biiblã goamã pãng ye. Woto yĩnga, d sã n wa moond Rĩungã koɛɛg Wẽnnaam sẽn bobl-dã, bɩ d fãa ket n modgd n tʋmd ne ‘vʋʋsem sõng sʋʋgã’ hal sõma!
[Tẽngr not rãmbã]
^ sull 10 Sɛb sẽn tõe n sõng-d tɩ d paam kiba-kãens yaa “ Toute Écriture est inspirée de Dieu et utile, ” Étude perspicace des Écritures, la Gũusg Gasgã sõsg ning gom-zug sẽn yaa: “A Zeova Gomdã vɩɩme” wã.
^ sull 17 Ges-y seb-bil ning gom-zug sẽn yaa: Tõnd sã n ki bõe n paamd-do? A neng a 5-16.
Bõe la yãmb bãng-yã?
• Wẽnnaam Gomdã pãng taa zĩ-bʋgo?
• Wãn to la d tõe n maan n tõogd n togsd sɩd koɛɛgã tɩrga?
• Bõe yĩng tɩ b yetẽ tɩ Biiblã goam tõe n ‘sika pãens rãmba’?
• Wãn to la y tõe n maand n tõogdẽ tɩ nebã tẽed koɛɛgã?
[Zãmsgã sogsgã]
[Zĩ-gũbri, seb-neng 21]
D sẽn tõe n maan to-to tɩ nebã tẽ Biiblã goamã
▪ Kɩt-y tɩ nebã waoog Biiblã goamã
▪ Wilgd-y vɛrse rãmbã võore
▪ Sõng-y nebã tɩ b tags vɛrse rãmbã zug neer tɩ goamã kẽ-ba
[Foto, seb-neng 20]
Y segd n modg n bãnga vʋʋsem sõng sʋʋgã tall n tʋm sõma