Bao-y n pẽneg-y Wẽnnaam

Wẽnnaam tõe n toeema yam bɩ?

BƲKAOODBA 2:11-18

TÕND sẽn yaa koangdbã yĩnga, d mi n toeemda yam. D tõe n maana bũmbu, n lebg n maand d bãngẽ. La Biiblã wilgdame t’a Zeova mi n toeema yam. Wẽnnaam sẽn yaool n pa koangdã yĩnga, a pa tudgd wa ninsaal ye. La bõe yĩng masã tɩ b yetẽ t’a mi n toeema yam? D sã n bãng sok-kãngã leoorã, na n sõng-d lame tɩ d bãng bũmb sẽn tar yõod wʋsgo. D na n bãngame tɩ tõnd manesmã tõe n sãama Wẽnnaam sũuri, wall noog a sũuri. Bɩ d ges bũmb ning sẽn be Bʋkaoodb 2:11-19 wã, tɩ na n sõng-d lame tɩ d bãng sokrã leoore.

Bʋkaoodb sebrã gomda Israɛll nebã vɩɩm yelle. Wakat kãng tɩ b kẽe Kanaã, tẽng ning Wẽnnaam sẽn da pʋlem b yaab a Abrahaamã pʋgẽ. La maana yʋʋm wʋsgo, tɩ wakat fãa, Israɛll nebã wat n kɩɩsa a Zeova, t’a bas tɩ b bɛɛbã nams-ba. La b wat n le kosa a sõngre, t’a fãag-ba. *

B kɩɩsa a Zeova. Bilf-bilfu, Kanaã nebã wa n kɩtame tɩ Israɛll nebã “bas Zusoabã” n sɩng wẽnnaam dãmb a taab tũubu. Wala makre b basa a Zeova n tũ a “Baal ne a Astarte.” * B sẽn maan woto wã, b paooga a Zeova wʋsgo. Rẽnd pa lingr t’a Zeova ‘sũur yik’ ne Israɛll nebã a sẽn yiis Eziptã ye.—Vɛrse 11-13; Bʋkaoodba 2:1.

B bɛɛbã nams-b lame. Nin-buiidã sẽn kɩɩs a Zeova t’a sũur yik ne-bã, a me basa b koglgo. A “basa bãmb bɛɛbã sẽn gũbg bãmbã tɩ b tõog-ba.” A basame tɩ b wa fã-ba.—Vɛrse 14.

B kosa a Zeova sõngre. Toogã sã n da wa wʋm Israɛll nebã, b sũur sãamda ne b sẽn beeg Wẽnnaamã, tɩ b kelem n kos a sõngre. Tõe tɩ yaa b sẽn wat n “yãbd b namsgã ne b toogã” yĩngã, la b wilgd tɩ b sɩd rata a Zeova sõngre. (Vɛrse 18) La b wat n le kɩɩsa a Zeova tɩ toog le wʋm-ba, tɩ b le kelem n kos a sõngre. (Bʋkaoodba 3:9, 15; 4:3; 6:6, 7; 10:10) La b sã n kos Wẽnnaam sõngr fãa, bõe la a maanda?

A fãagd-b lame. Israɛll nebã sã n da wa kelemd n kot Wẽnnaam sõngre, a ‘zoeta b nimbãanega,’ n fãag-ba. Hebre wã gom-biig ning b sẽn lebg tɩ “zoe nimbãanegã” rat n yeelame me tɩ “toeem yam.” Sebr a ye yeela woto: “Israɛll nebã yãbrã kɩtame t’a Zeova toeem yam. A yãka yam n bas b sɩbgre, la a fãag-ba.” Wakat fãa, a Zeova zoeta b nimbãanega, ‘n kõ-b bʋ-kaood’ t’a fãag-b b bɛɛbã nugẽ.—Vɛrse 18.

Yãmb gũus n gesa bũmb ning sẽn da kɩtd tɩ Wẽnnaam toeemd yam n basd b sɩbgrã bɩ? Yaa nin-buiidã sã n wa sak n deeg tɩ b sẽn maanã yaa wẽnga. Yaa wa ba sẽn kibind a biiga. Wala makre, ba wã tõe n monga biigã bũmb a sẽn date. La a sã n wa yã t’a biigã sũur sɩd sãama ne a sẽn maanã, a na n yãka yam n bas sɩbgrã woto.

Bõe la kiba-kãngã wilgd tõnd a Zeova zugu? Wilgdame tɩ ned sã n maan yel-wẽnd ne yamleoogo, yikda a sũuri, la tɩ yel-wẽn-maand sã n tek yam n kos sugri, a zoeta a nimbãaneg n kõ-a sugri. Dẽnd sɩd yaa vẽeneg tɩ tõnd yel-manesmã tõe n nooga Wẽnnaam sũuri, wall sãam a sũuri. Bɩ y modg n bao n bãng y sẽn tõe n maand to-to n noogd a Zeova sũuri. (Yelbũna 27:11) Y sã n maan woto, y kõn tol n wa maan y bãngẽ abada!

[Tẽngr not rãmbã]