Yãmb na n wa tɩ vɩɩmda saasẽ bɩ?

NEB wʋsg sɩd tʋlla ne b sũy fãa n tɩ vɩɩmd saasẽ! Sɩd me, wʋsg tagsdame tɩ ninsaal kũum poore, a na n tɩ vɩɩmda zĩig a to. Moeemba, Ẽndu rãmba, Budist rãmba, n paas neb wʋsg sẽn yet tɩ b yaa kiris-​neba, la baa neb sẽn pa tar tũudum takɩ meng tẽeda woto. Wʋsg tagsdame tɩ saasẽ yaa zĩig sẽn yaa sõma la neer wʋsgo, tɩ ned sã n ki n kẽng be bɩ a na n paam a meng ne namsgã buud toor-​toorã, la a paam n yã a neb nins sẽn deng yẽ n ki wã. La baa ne rẽ, ned baa a ye pa rat n ki ye. Bõe yĩng tɩ yaa woto?

Wẽnnaam sã n naana ninsaal n dat t’a wa tɩ vɩɩmd saasẽ, rẽ yĩnga d ra pa na n yãgd n dat n kẽng be, wa kambã sẽn yãgd n na n lebg bɛda, tɩ kom-​bɩɩsã me rat n kẽ kãadmã sɩda? Ned yaool n kae n dat n ki ye.

La tũudum wʋsg taoor dãmb yaool n yeta nebã tɩ ninsaal segd n zĩnda dũni zug wakat bilfu, la tɩ yaa saasẽ la a vɩɩmã zĩig menga. Wala makre, b wilgame t’a Theodore Edgar McCarrick sẽn yaa Etazĩni evɛk rãmbã taoor soab a ye wã yeela woto: “B pa naan tõnd dũni zug ka vɩɩmã yĩng ye. B naana tõnd tɩ d vɩɩmd saasẽ.” Ned a ye sẽn da yɩ tũudum taoor soab me yeelame tɩ “vɩɩmã yõod tẽng zug ka yaa d pẽg Wẽnnaam la d wa kẽng saasẽ, . . . bala yaa saasẽ la d yiri.”

Naoor wʋsgo, neb nins sẽn tẽed tɩ ninsaal kũum poore, a rebda saasẽ wã teega kibay b sẽn wʋmd bala. Sull a ye sẽn vaeesd n na n bãng tũudum toor-​toorã neb tagsg sogsa neb wʋsg yel-​kãngã wɛɛngẽ. A George Barna sẽn yaa sull kãng taoor soabã yeelame tɩ bãmb mikame tɩ nebã sẽn tagsd to-⁠to “vɩɩmã la kũum poor vɩɩmã zugã tika bũmb toor-​toore. Bõn-​kãens yaa wala filim dãmba, yɩɩla, la sɛba.” Floriid soolmẽ wã, b wilgame tɩ pastɛɛr a ye yeela woto: “Tõnd pa mi saasẽ sẽn yaa to-⁠to ye. Tõnd sẽn mi bal yaa tɩ Wẽnnaam bee be.”

Biiblã pʋgẽ, b yaool n gomda saasẽ yell wʋsgo. Wẽnnaam Gomdã yetame tɩ saasã pʋd n yaa wãn-​wãna, la bõe n be beenẽ? Rẽ yĩnga b naana ninsaal t’a tog n tɩ vɩɩmd saasẽ bɩ? La neb sã n na n tɩ vɩɩmda saasẽ, bõe la b na n tɩ maane?

[Foto, seb-neng a 3]

Bõe yĩng tɩ nebã yetẽ tɩ b kũum poore b rebda saasẽ, n yaool n pa rat n ki?