A Zeova pidsda a raabã ne a vʋʋsem sõngã maasem

“Gomd ninga sẽn yit mam noorẽ wã . . . na n tõoga bũmb ninga mam sẽn tʋm-a t’a tɩ maanã.”—EZAI 55:11.

1. Rɩk-y makr sẽn wilgd welgr sẽn be Wẽnnaam ne ninsaalbã sʋka.

TAGS-Y n ges-y wa neb a yiib sẽn na n segend n dat n tog sore. B ned kam fãa tara a mobilli. Ned a ye wã rɩka kart n zĩnd n mage, n yãk sor takɩ a sẽn segd n tũ n ta a sẽn datẽ wã. La ned a to wã mii a sẽn datẽ wã sõma, la a mi soay wʋsg sẽn debd be me, tɩ kɩt tɩ baa sẽn wa n yaa a soab fãa bɩ a tõe n toeem sor n ta be. Mak-kãngã wilgda welgr sẽn be a Zeova ne ninsaalbã sʋkã. Ninsaal sã n dat n maan bũmbu, yaa tɩlae t’a zĩnd n mage, n bao soay nins a sẽn tog n tũ wã. La Wẽnnaam nengẽ pa woto ye.

2, 3. a) A Zeova ra ratame tɩ tẽngã zug vɩɩm yɩ wãn-wãna, la bõe la a maan a Ãdem ne Hawa beegrã poore? b) Bõe yĩng tɩ d segd n modgd n bãngd a Zeova sẽn zoe n maan bũmb nins a raabã pidsg yĩngã?

² A Zeova sã n dat n maan bũmbu, a pa zĩnded n mag ye. A togsda bũmb ning a sẽn datã bala. (Ef. 3:11) Wala makre, a ra ratame tɩ tẽngã yɩ arzãna, tɩ ninsaalb sẽn pa tar yel-wẽn vɩɩmd a zug ne laafɩ la sũ-noogo, wakat sẽn pa sate. (Sɩng. 1:28) Baa a Ãdem ne a Hawa sẽn wa n beegã, a Zeova pa toeem a raabã ye. A maana bũmb sẽn na yɩl tɩ raab kãng kell n pidsi. (Karm-y Sɩngr 3:15.) A wilgame t’a pagã sẽn pa pag sɩdem-sɩdmã na n wa paama “yagenga,” sẽn na n wa sãam a Sʋɩtãan fasɩ, la a yiis yel-beed ning fãa a Sʋɩtãan sẽn wa ne wã.—Heb. 2:14; 1 Zã 3:8.

³ Bũmb kae saasẽ wall tẽngã zug ka, n tõe n kɩt t’a Zeova raabã pa pids ye. (Ezai 46:9-11) Bõe yĩng tɩ d yet woto? Bala, yaa ne a vʋʋsem sõngã la a na n pids-a. Vʋʋsem sõngã sẽn yaa pãng sẽn ka to wã yĩnga, fʋɩ pa tõe n kɩt tɩ Wẽnnaam pa “tõog bũmb ning” a sẽn dat n maanã ye. (Ezai 55:10, 11)  D segd n modgd n bãngda a Zeova sẽn zoe n maan bũmb nins a raabã pidsg yĩngã, la d maand d yɛlã tɩ zemsd ne rẽ. Yaa raab kãng pidsg bal n na n kɩt tɩ d wa tõog n vɩɩmd wakat sẽn kõn sa wã. Sẽn paase, d sã n ne a Zeova sẽn tʋmd ne a vʋʋsem sõngã n pidsd a raabã to-to wã, kengda d tẽebã. Bɩ d ges a Zeova sẽn tʋm ne a vʋʋsem sõngã to-to pĩnd wẽndẽ a raabã pidsg yĩnga, a sẽn tʋmd ne-a to-to rũndã-rũndã, la a sẽn na n tʋm ne-a to-to beoog daare.

A Zeova sẽn tʋm ne a vʋʋsem sõngã pĩnd wẽndẽ to-to

4. Bõe yĩng tɩ d yetẽ t’a Zeova vẽnega a raabã bilf-bilfu?

⁴ Yɩɩ bilf-bilf la a Zeova wilg a sẽn na n maan to-to n pids a raabã. Kaoosame tɩ b pa mi yɛl wʋsg yagengã a sẽn pʋlem tɩ watame wã zug ye. (1 Kor. 2:7) Yʋʋm 2 000 poore, a Zeova le goma yagengã yelle. (Karm-y Sɩngr 12:7; 22:15-18.) Wakat kãnga, a pʋlma a Abrahaam bũmbu, t’a pidsgã na n naf neb wʋsgo. A sẽn yeela a Abrahaam tɩ ‘yaa a yagengã yĩngã,’ wilgda vẽeneg tɩ yageng ning a sẽn pʋlmã na n yɩɩ ninsaala, la t’a na n yi a Abrahaam pendẽ wã. D tõe n kɩsa sɩd t’a Sʋɩtãan sẽn wʋm dẽ wã tɛka, yẽ me baoa a sẽn na n maanega. Sãmbg sẽn ka be, bɛ kãngã baoome n na n menes a Abrahaam yagensã wall a kɩt tɩ Wẽnnaam bas-ba, pa rẽ bɩ n gɩdg yagengã waoongo, sẽn na yɩl tɩ Wẽnnaam raabã ra tõog ye. La woto ra pa tol n tõe n tõog ye. Bala, sasa kãng me tɩ Wẽnnaam tʋmda ne a vʋʋsem sõngã. Wãn-wãna?

5, 6. Wãn to la a Zeova kogl yagengã yaab-rãmbã ne a vʋʋsem sõngã maasem?

⁵ Ne vʋʋsem sõngã maasem, a Zeova kogla neb kẽere, bala yagengã ra na n wa yii nin-kãens pendẽ. A yeela a Abram (b sẽn wa n bool t’a Abrahaamã) woto: “Mam yaa fo gãongo.” (Sɩng. 15:1) Gom-kãngã pa yɩ belgr ye. Wala makre, d tẽeg bũmb ning sẽn maan yʋʋmd 1919 sẽn deng a Zezi rogmã. Rẽ t’a Abrahaam ne a Saara tɩ zĩnda Geraar soolmẽ wã. Tẽn-kãng rĩm a Abimelɛk sẽn da pa mi t’a Saara yaa a Abrahaam pagã yĩnga, a peeg-a lame n na n maan a paga. Biiblã pa wilgd sã n yaa a Sʋɩtãan n da rat tɩ yɩ woto, sẽn na yɩl t’a Saara ra tõog n dog a Abrahaam biig ye. La Biiblã wilgda vẽeneg t’a Zeova lʋɩɩsa a toogo. A Abimelɛk zãmsd pʋga, a Zeova keoog-a lame t’a ra sak n sɩɩs a Saara ye.—Sɩng. 20:1-18.

⁶ La pa yel-kãngã pʋgẽ bal la a Zeova kogl-b ye. A Zeova fãaga a Abrahaam ne a roogã neb yɛl toɛy-toɛy pʋsẽ. (Sɩng. 12:14-20; 14:13-20; 26:26-29) Rẽ n so tɩ yɩɩl-gʋlsd a ye gom a Abrahaam ne a yagensã yell n yeel woto: “Wẽnnaam ka sak tɩ neb nams bãmb ye, la bãmb sɩbga rĩm dãmb bãmb poorẽ n yeele: ‘Da sɩɩs-y mam nin-tũusdsã ye, la ra maan-y mam no-rɛɛsdbã wẽng ye.’ ”—Yɩɩl 105:14, 15.

7. Bõe la a Zeova maan n kogl Israɛll buudã?

⁷ Ne vʋʋsem sõngã maasem, a Zeova kogla Israɛll buudã sẽn da yaa yagengã buudã. A kõo zʋɩf rãmbã a Tõogã ne a vʋʋsem sõngã maasem sẽn na yɩl tɩ b bãng n tũ-a la b ra wa tũ wẽnnaam dãmb a taaba, la b rɩk bu-zẽmsã neb zʋg ye. (Yik. 31:18; 2 Kor. 3:3) Bʋ-kaoodbã sẽn da wa n so Israɛllã sasa, a Zeova kõo rap kẽer a vʋʋsem sõngã tɩ kɩt tɩ b fãag nin-buiidã b bɛɛb nugẽ. (Bʋk. 3:9, 10) Yaa vẽeneg tɩ yʋʋm nins fãa sẽn tall n tãag a Zezi sẽn yaa a Abrahaam yagensã yagen-kãsengã rogmã, a Zeova tʋma ne a vʋʋsem sõngã n kogl Zerizalɛm, Betlehɛm la wẽn-doogã, bala goam b sẽn da pĩnd n togs a Zezi zug n da segd n wa pids zĩ-kãense.

8. Bõe n wilgd tɩ vʋʋsem sõngã zĩnda ne Wẽnnaam bi-riblã a vɩɩmã tõre, la a sõng-a a koe-moonegã pʋgẽ?

⁸ Vʋʋsem sõngã zĩnda ne a Zezi a vɩɩmã tõre, la a sõng-a a koe-moonegã pʋgẽ. Nand t’a Maari sẽn da pa mi raoã rɩk a Zezi pʋgã, a Zeova tʋma ne a vʋʋsem sõngã n maan  bũmb b sẽn da nan zɩ n yã. A kɩtame tɩ ne a sẽn pa zems zãnga, a rog biig sẽn pa tar yel-wẽnde, la sẽn da pa segd n ki ye. (Luk 1:26-31, 34, 35) Rẽ poore, vʋʋsem sõngã kogla a Zezi a yãadmẽ tɩ b pa tõog n kʋ-a ye. (Mat. 2:7, 8, 12, 13) A Zezi sẽn wa n zems yʋʋm 30, Wẽnnaam zae-a-la ne a vʋʋsem sõngã n yãk-a t’a na n wa reeg a yaab a Davɩɩd naamã, la a tʋm-a t’a tɩ moon koɛɛga. (Luk 1:32, 33; 4:16-21) A Zeova kõo a Zezi a vʋʋsem sõngã n kɩt t’a tõog n maan yel-soalem toɛy-toɛya. Wala makre, a maaga bãase, a rɩlga kʋʋngo, la a vʋʋg kũ-rãmb menga. Yel-soalem kãens fãa yaa bũmb nins a sẽn na n wa maan a naamã sasa wã reng-n-lɛmbga.

9, 10. a) Pipi kiris-nebã wakate, bõe n wilg vẽeneg tɩ vʋʋsem sõngã ra bee ne a Zezi karen-biisã? b) Wakat kãnga, toeen-bʋg n zĩnd a Zeova raabã pidsg wɛɛngẽ?

⁹ Yʋʋmd 33 Pãntekotã tɛka, a Zeova tʋmda ne a vʋʋsem sõngã, n yãkd neb a taab sẽn na n wa yɩ a Abrahaam yagengã yagen-pʋgdse. Nin-kãensã wʋsg pa zʋɩf rãmb ye. (Rom 8:15-17; Gal. 3:29) Yaa vẽeneg tɩ vʋʋsem sõngã zĩnda ne a Zezi pipi karen-biisã me. Rẽ n kɩt tɩ b tõog n moon koɛɛgã ne yẽesem la b maan yel-soalem toor-toorã. (Tʋʋ. 1:8; 2:1-4; 1 Kor. 12:7-11) Vʋʋsem sõngã sẽn kõ-b pãn-tõog toɛy-toɛyã kɩtame tɩ lebg vẽeneg t’a Zeova raabã pidsg wɛɛngẽ, bũmb n toeeme. B bãngame t’a pa le rat tɩ b tũ-a wa a sẽn da wilg-b pĩnd wẽndẽ tɩ b kẽnd n pʋʋsd-a Zerizalɛm wẽnd-doogẽ wã la b maand yɛl toor-toorã ye. Ra lebga kiris-neb tigingã sẽn lugl paalmã la Wẽnnaam be ne masã. Rẽ tɛka, yaa ne kiris-neb nins sẽn paam vʋʋsem sõng zaeebã sull la a Zeova pidsd a raabã.

¹⁰ D yãame tɩ pĩnd wẽndẽ wã, a Zeova tʋma ne a vʋʋsem sõngã n kogl neba, n kõ kẽer pãnga, la a tall-a n zae neb kẽer me. Woto yaa tʋʋm a wãn bal a sẽn tʋm ne a vʋʋsem sõngã n pids a raabã. La rũndã-rũndã yẽ? Wãn to la a Zeova tʋmd ne a vʋʋsem sõngã n pidsd a raabã? D segd n bao n bãngame, bala d ratame tɩ d tʋʋmã zemsd ne rẽ. Bɩ d ges a Zeova sẽn tʋmd ne a vʋʋsem sõngã to-to rũndã-rũndã n pidsd a raabã. D na n goma yɛl a naas a sẽn maand yelle.

A Zeova sẽn tʋmd ne a vʋʋsem sõngã to-to rũndã-rũndã

11. Bõe n wilgd tɩ yaa vʋʋsem sõngã n sõngd Wẽnnaam nin-buiidã tɩ b zãagd b mens ne tʋʋm-wẽns toor-toorã, la wãn to la y wilgd tɩ y sakda a sõngre?

¹¹ Pipi, a Zeova sõngda a nin-buiidã ne a vʋʋsem sõngã maasem tɩ b tõogd n zãagd b mens ne tʋʋm-wẽns toor-toore. Neb nins sẽn tũud a Zeova la b na n wa rɩ a raabã pidsg yõodã segd n zãaga b mens ne wẽng buud fãa. (Karm-y 1 Korẽnt dãmb 6:9-11.) Neb kẽer sẽn lebg kiris-neb ra yɩɩ yoaadba, rap sẽn gãe rapa, la pagb sẽn gãe pagba, la neb sẽn da tʋʋmd tʋʋm yood buud toor-toore. Yaa sɩd tɩ tʋlsem nins sẽn wat ne yel-wẽnã tõe n talla pãnga, hal tɩ tʋʋm yoodã basg yaa toogo. (Zak 1:14, 15) La nin-kãensã “paama pekre,” tɩ wilgdẽ tɩ b tõog n toeema b vɩɩmã sẽn na yɩl n ta Wẽnnaam yam. Bõe n sõngd neb nins sẽn nong Wẽnnaamã, tɩ tʋls-wẽnsã pa tõogdẽ tɩ b maand yel-wẽna? 1 Korẽnt dãmb 6:11 wã yeelame tɩ yaa “tõnd Wẽnnaam sɩɩgã pãnga.” Y sã n tõogd n zãagd y meng ne tʋʋm yoodã, wilgdame tɩ y sakdame tɩ pãn-kãngã soogd-yã.

12. a) Sã n yaa ne vẽnegr a Ezekɩɛll sẽn paamã, wãn to la a Zeova wilgd a siglgã sore? b) Bõe la y tõe n maan n wilg tɩ y sakda vʋʋsem sõngã sõngre?

¹² Yiib-n-soaba, a Zeova tʋmda ne a vʋʋsem sõngã n wilgd a siglgã bũmb ning a sẽn date. A Zeova ra vẽnega a Ezekɩɛll t’a yã saar sẽn be saasẽ n zoet n teesd zĩis toɛy-toɛy n pidsd a Zeova raabã tɩ bũmb pa tõe n gɩdg-a. La pa saar sɩd-sɩd ye. A makda a siglgã babg ning sẽn be yĩngrã. Bõe n wilgd  saarã a sẽn segd n kẽngẽ? B yeelame tɩ yaa vʋʋsem sõngã. (Eze. 1:20, 21, NW ) D tẽeg t’a Zeova siglgã tara babs a yiibu. A ye wã bee saasẽ, t’a to wã be tẽngã zugu. Sã n mik tɩ vʋʋsem sõngã wilgda saasẽ soabã sore, yaa vẽeneg tɩ yaa vʋʋsem sõngã me n wilgd sẽn be-a tẽngã zugã me sore. Y sã n sakd Wẽnnaam siglgã babg ning sẽn be tẽngã zugã sẽn wilgd-d bũmb ninsã, y wilgdame tɩ y tũuda a Zeova saasẽ saarã, la tɩ y sakda vʋʋsem sõngã sõngrã.—Heb. 13:17.

13, 14. a) Yaa ãnd dãmb la “zãmaan” ning yell a Zezi sẽn gomã neba? b) Rɩk-y makr n wilg tɩ yaa ne vʋʋsem sõngã maasem la d wʋmd Biiblã goam võore. (Ges-y zĩ-gũbr ning gom-zug sẽn yaa: “Y sakda remsg nins b sẽn maand Biiblã goam võor wʋmb wɛɛngẽ wã bɩ?”)

¹³ Tãab-n-soaba, a Zeova tʋmda ne a vʋʋsem sõngã n sõngd tõnd tɩ d sẽn wʋmd Biiblã goamã võor to-to wã lebgd vẽeneg n paasdẽ. (Yel. 4:18) Hal sẽn kaoose, “tʋm-tʋmd sẽn tũud sɩd la sẽn tar yamã” tũnugda ne Gũusg Gasgã n wilgd Biiblã goam võor sõma. (Mat. 24:45) Wala makre, y tẽra tõnd sẽn da tẽed tɩ “zãmaan kãnga” ning yell a Zezi sẽn da gomã yaa neb ninsã bɩ? (Karm-y Matɩe 24:32-34.) Yaa ãnd dãmb zãmaan yell la a sẽn gomã? Gũusg Gasgã sõsg ning gom-zug sẽn yɩ “Kirist waoongã rat n yeelame tɩ bõe” wã pʋgẽ, b wilgame tɩ pa nin-wẽnsã la a Zezi sẽn bool tɩ “zãmaan kãngã” wã ye. Yaa a karen-biisã sẽn da na n wa paam zaeeb ne vʋʋsem sõngã. * Dẽnd yaa a Zezi karen-biis nins sẽn paam vʋʋsem sõngã zaeeb pipi kiris-nebã wakatã, la sẽn paamd-b zaeebã tõnd wakatã n da na n yã bãndã, la b bãng a võore, rat n yeel tɩ bãmb n na n bãng t’a Zezi “kolgame n ta rig-noorẽ.”

¹⁴ B sẽn maneg n wilg yel-kãngã võorã to-to wã wilgda tõnd bõe? Yaa sɩd tɩ d pa tõe n bãng “zãmaan kãngã” yell a Zezi sẽn gomã sẽn na n kaoos to-to wã ye. La yɩta sõma tɩ d tẽeg “zãmaanã” sẽn dat n yɛɛlga. Naoor wʋsgo, b sã n gomd zãmaan yelle, yaa neb sẽn tar yʋʋm toɛy-toɛya, n vɩ wakat yɛng pʋgẽ yell la b gomda. Rẽnd zãmaan yaa wakat sẽn pa kaoosd wʋsg ye. A tara tɛka. (Yik. 1:6) Woto wã, a Zezi gomdã rat n yeelame tɩ bõe? Rat n yeelame tɩ sẽn paam-b vʋʋsem sõngã zaeebo, la b yã yaoolem dayã sɩngr 1914 soabã pʋgẽ wã na n vɩɩmda wakat bilf ne kiris-neb a taab me sẽn paam vʋʋsem sõngã zaeebo, la sẽn na n yã to-kãsengã sɩngre. B zãmaanã talla sɩngre, la yaa vẽeneg t’a tara tɛk me. Yɛl nins b  sẽn wilg tɩ na n yɩɩ yaoolem dayã bãndã sẽn pidsd rũndã-rũndã wã wilgdame tɩ to-kãsengã me segd n kolgame. Y sã n tẽegd wakat fãa tɩ dũniyã yikr ta n saame la y wɩng ne gũubu, y wilgdame tɩ y sakd n tũuda remsg nins tʋm-tʋmdã sẽn wilgd tõnd Biiblã goam võor wʋmb wɛɛngẽ wã, la tɩ y sakda vʋʋsem sõngã sõngrã.—Mark 13:37.

15. Bõe n wilgd tɩ yaa vʋʋsem sõngã n kɩtd tɩ tõnd tõe n moon koe-noogã?

¹⁵ Naas-n-soaba, a Zeova tʋmda ne a vʋʋsem sõngã n kõt-d pãng tɩ d moond koe-noogã. (Tʋʋ. 1:8) Sã n pa ne vʋʋsem sõngã sõngre, d ra na tõog n moon koe-noogã dũniyã gill zug woto sɩda? Neb kẽer zoeta yãnd wʋsgo, n da tagsdẽ tɩ b pa tol n tõe n moon koɛɛgã zak ne zak ye. Tõe tɩ yãmb me ra yaa woto. La masã, y tʋmda tʋʋm kãngã ne yẽesem. * A Zeova Kaset rãmb wʋsg modgame n kell n moon koɛɛgã baa neb sẽn gɩdg-b wall b nams-bã menga. Yaa Wẽnnaam vʋʋsem sõngã bal n kõt-d pãng tɩ d tõogd zu-loees toor-toor sẽn tõe n koms d raoodo, la kɩtdẽ me tɩ d tõogd n maand yɛl d sẽn pa tõe n maan ne d meng pãnga. (Mii. 3:8; Mat. 17:20) Y sã n moond koɛɛgã ne y sũur fãa, y wilgdame tɩ y sakda vʋʋsem sõngã sõngre.

A Zeova sẽn na n tʋm ne a vʋʋsem sõngã beoog daar to-to

16. Bõe yĩng tɩ d tõe n kɩs sɩd tɩ to-kãseng ning sẽn watã sasa, a Zeova na n kogla a nin-buiidã?

¹⁶ Beoog daare, a Zeova na n tʋma tʋʋm kãsems ne a vʋʋsem sõngã, n pids a raabã n baase. Bɩ d reng n gom a sẽn na n kogl a nin-buiidã yelle. Wa d sẽn zoe n yã wã, pĩnd wẽndẽ a tʋma ne a vʋʋsem sõngã n kogl neba, la a kogl Israɛll buudã tõre. Woto wilgdame tɩ ka la bilfu, to-kãseng ning sẽn watã sasa, a na n le tʋma ne pãn-kãngã sẽn ka to wã n kogl a nin-buiidã. Pa tɩlae tɩ d bao n bãng a Zeova sẽn na n maan to-to n kogl-dã ye. La d kɩsa sɩd t’a na n kogl-d lame. Bala d miime tɩ bũmb pa tõe n solg neb nins sẽn nong a Zeova wã t’a pa yã-ba, la zĩig me kae b sẽn na n be be t’a vʋʋsem sõngã pa tõe n ta n fãag-b ye.—2 Kib. 16:9; Yɩɩl 139:7-12.

17. Dũni-paalgã pʋgẽ, bõe la a Zeova na n maan ne a vʋʋsem sõngã maasem?

¹⁷ Dũni-paalgã sẽn watã pʋgẽ, bõe la a Zeova na n maan ne a vʋʋsem sõngã? Yaa ne vʋʋsem sõng kãng maasem la b na n gʋls seb-paal nins b sẽn na n lags dũni-paalgã pʋgẽ wã. (Wil. 20:12) Bõe n be seb-kãens pʋsẽ? Vẽenega, yaa bũmb nins fãa a Zeova sẽn dat tɩ ãdem-biisã maan yʋʋm tusrã sasa wã. Rẽ yĩnga yãmb tʋll n wa bãnga seb-kãens sẽn yet bũmb ningã bɩ? Sɩd-sɩda, d fãa gũuda dũni-paalgã ne yãgbo. D pa tõe n yãg n bãng vɩɩmã sẽn na n yɩ noog to-to wã fãa n bilg ye. Wakat kãnga, a Zeova na n tʋma ne a vʋʋsem sõngã n pids a sẽn da sɩng n dat tɩ tẽngã zug vɩɩmã yɩ to-to wã.

18. Bõe la yãmb yãk yam n na n maane?

¹⁸ Bɩ d ra tol n yĩm t’a Zeova raabã pa tõe n pa pids ye. Bala yaa ne pãng ning sẽn ka to ãndũniyã fãa pʋgẽ wã maasem, rat n yeel tɩ ne a vʋʋsem sõngã maasem la a na n pids-a. Raab-kãngã pidsgã yaa yãmb neer yĩnga. Bɩ y yãk yam tɩ masã tɛk bɩ y teegd a Zeova ne y sũur fãa, n kot-a a vʋʋsem sõngã, la y sakd-a wakat buud fãa. (Luk 11:13) Woto, y na n wa paam n vɩɩmda bark vɩɩm ning a Zeova sẽn sɩng n dat tɩ ãdem-biisã paamã, rat n yeel tɩ n vɩɩmd tẽngã sẽn na n lebg arzãnã zug wakat sẽn kõn sa.

[Tẽngr not rãmbã]

Y tẽrame bɩ?

• Pĩnd wẽndẽ, wãn-wãn la a Zeova tʋm ne a vʋʋsem sõngã sẽn na yɩl t’a raabã ra vaale?

• Wãn to la a Zeova tʋmd ne a vʋʋsem sõngã rũndã-rũndã?

• Beoog daare, tʋʋm-bʋs la a Zeova na n tʋm ne a vʋʋsem sõngã n pids a raabã n baase?

[Zãmsgã sogsgã]

[Zĩ-gũbri, seb-​neng 22]

Y sakda remsg nins b sẽn maand Biiblã goam võor wʋmb wɛɛngẽ wã bɩ?

A Zeova ket n vẽnegda a nebã tɩ b wʋmd Biiblã goam võor n paasdẽ. Yãmb ket n tẽra vẽnegr kẽer b sẽn wilg Gũusg Gasgã pʋgẽ bɩ?

▪ A Zezi yel-bũnd ning sẽn gomd rabɩll yellã wilgda bõe, sẽn yɩt to-to tɩ ned wa lebg Kirist karen-biigã wɛɛngẽ? (Mat. 13:33)—Yʋʋmd 2008 sẽoog kiuug pipi daar Gũusg Gasgã seb-neng 27-28.

▪ Wakat bʋg la kiris-neb nins sẽn na n kẽng saasẽ wã yãkr sata?—Yʋʋmd 2007 sig-noy kiuug pipi daar Gũusg Gasgã ne farendã seb-neng 30-31.

▪ Waoog a Zeova ne “sɩɩgã” rat n yeelame tɩ bõe? (Zã 4:24)—Yʋʋmd 2002 sa-sik kiuug pipi daar Gũusg Gasgã seb-neng 12.

▪ Wẽnd-doogã saman-bʋg pʋgẽ la kʋʋn-kãsengã sẽn be wã? (Wil. 7:15)—Yʋʋmd 2002 sig-noy pipi daar Gũusg Gasgã ne farendã seb-neng 30-31.

▪ Wakat bʋg la b na n welg piisã ne bʋʋsã? (Mat. 25:31-33)—Yʋʋmd 1995 zĩ-likr kiuug rasem 15 Gũusg Gasgã seb-neng 18-28.