Kom-bɩɩse, maan-y a Zeova raabã ne y sũy fãa
Kom-bɩɩse, maan-y a Zeova raabã ne y sũy fãa
“Tẽeg f Naandã yell f bi-bɩɩlem wakate.”—KOƐ. 12:1.
1. Israɛlle, no-bʋg la b ra kõ tɩ baa kambã ra segd n tũ?
SẼN na maan yʋʋm 3 500 woto, a Zeova no-rɛɛs a Moiiz ra yeela Israɛll maan-kʋʋdbã la kãsem dãmbã yaa: “Bɩ y tigim nebã fãa, rapã ne pagbã la kambã . . . , tɩ b wʋm, la b zãms Zusoab a Wẽnnaam zoeese, n gũus b mens n sak tõodã goamã fãa.” (Tõo. 31:12) B yeelame tɩ b tigim nebã fãa: Rapã, pagbã la kambã. Woto wilgdame tɩ baa kambã meng ra segd n naaga nin-buiidã n kelg Tõodã kareng la b zãms a Zeova tũubu.
2. Pipi kiris-nebã wakate, bõe la a Zeova maan n wilg t’a rata kamb nins sẽn be tigingã pʋgẽ wã neere?
2 Pipi kiris-nebã wakat me, a Zeova wilgame t’a rata kamb nins sẽn be a nin-buiidã sʋkã neere. Wala makre, lɛta nins a sẽn vẽneg tʋm-tʋmd a Poll t’a gʋls n tool tigimsã pʋsẽ, a kɩtame t’a paas sagls takɩ kambã yĩnga. (Karm-y Efɛɛz rãmb 6:1; Kolos rãmb 3:20.) Kamb nins sẽn tũ sagl-kãensã wã tõog n wilga b mi-beoog ne b saasẽ Ba wã sẽn nong-bã n paase, la b paam a barka.
3. Bõe la kom-bɩɩs maand n wilgdẽ tɩ b tʋll n maana Wẽnnaam daabã?
3 A Zeova ket n datame tɩ kambã tigimd ne a nin-buiidã n maand a raabã bɩ? N-ye! Sɩd me, d sũy yaa noogo, d sẽn ne tɩ dũniyã gill zugu, kom-bɩɩs wʋsg sakda saglg ning a Poll sẽn kõ Wẽnnaam nin-buiidã fãa wã. A Poll da yeela woto: “Bɩ tõnd tẽeg taab yelle, la d yik taab ratem tɩ maan nonglem la tʋʋm sõma. Bɩ d da bas taab tiging wa neb kẽer sẽn maandã ye. La bɩ d sagl taaba, la bɩ d sagl n yɩɩda, tõnd sẽn yã tɩ daarã kolgdame wã yĩnga.” (Heb. 10:24, 25) Sẽn paase, kamb wʋsg tũuda b roagdbã n moond Wẽnnaam Rĩungã koe-noogã. (Mat. 24:14) Yʋʋmd fãa, kom-bɩɩs tusa n wilgd tɩ b nonga a Zeova ne b sũy fãa, n dɩkd b mens n kõt-a n deegd lisgu. Woto kɩtdame tɩ b paamd bark wʋsgo, b sẽn lebgd Kiristã karen-biisã yĩnga.—Mat. 16:24; Mark 10:29, 30.
Saglg y sẽn segd n sak masã tɛka
4. Yaa bi-bɩɩg sẽn wat n tar yʋʋm a wãn la a segd n sak n maan Wẽnnaam daabã wa a sẽn saglã?
4 Koɛɛg Soab 12:1 wã yeta woto: “Tẽeg f naandã yell f bi-bɩɩlem wakate.” Bi-bɩɩg segd n taa yʋʋm a wãn n yaool n sak sagl-kãngã n tũ a Zeova? Biiblã pa wilgd yʋʋm sõor takɩ ye. Woto yĩnga y pa segd n tags tɩ y paooda ne y bao n bãng a Zeova la y maan a raabã ye. Baa y yʋʋmã sẽn yaa to-to, b sagend-y lame tɩ y tũ vɛrse wã sẽn yet-yã, n da bas tɩ kaoos ye.
5. Wãn to la roagdbã tõe n sõng b kambã tɩ b paam zood sẽn tar pãng ne Wẽnnaam?
5 Yãmb sʋkã, wʋsg paamame tɩ b roagd a ye wall b yiibã fãa sõng-b tɩ b paam zood sẽn tar pãng ne Wẽnnaam. Woto kɩtame tɩ y wõnd a Tɩmote sẽn zĩnd pipi kiris-nebã wakatã. Yaa hal a yãadmẽ la a ma a Eniis ne a yaab-poak a Loyiis zãms-a Gʋlsg Sõamyã. (2 Tɩm. 3:14, 15) Yãmb me roagdbã sõngd-y-la woto. B zãmsd-y-la Biiblã, n mi n naagd-y n pʋʋsdẽ, n tar-y n kẽngd tigissã la tigis-kãsemsã, la b yit ne-y n moond koɛɛgã. Sɩd me, yaa a Zeova meng n kõ y roagdbã noor tɩ b zãms yãmb a raabã. Rẽ yĩnga y nanda modgr ning b sẽn maand tɩ wilgdẽ tɩ b rata y neere, la tɩ b nong-y lame wã bɩ?—Yel. 23:22.
6. a) Wala Yɩɩl Sõamyã 110:3 sẽn yetã, wãn to la y tõe n tũ a Zeova tɩ noog a sũuri? b) Bõe yell la d na n gome?
6 La biig sã n bɩtẽ, a Zeova ratame t’a maan modgr a toore, n bao n ‘bãng yẽ raabã sẽn yaa sõma, la sẽn tat a yam, la sẽn zems zãngã,’ wa a Tɩmote me sẽn maanã. (Rom 12:2) Y sã n maan woto, na n kɩtame tɩ y sakd n moond koɛɛgã la y kẽnd tigissã, n miẽ tɩ pa y roagdbã sẽn dat tɩ y maan dẽ wã yĩnga, la tɩ yaa yãmb mensã sẽn dat n maan a Zeova raabã yĩnga. Y sã n maand a Zeova raabã ne yamleoogo, y noogda a sũuri. (Yɩɩl 110:3) La wãn to la y tõe n wilg tɩ y rata ne sũur fãa n bãng a Zeova la y maan a raabã? D na n goma yɛl a tãab y sẽn tõe n maan n wilg rẽ yelle. Yaa Biiblã zãmsgã, pʋʋsgã, la y sẽn zãad y meng to-to wã. D na n goma bõn-kãensã yell ball-balle.
Bao-y n bãng-y-yã a Zeova sõma
7. Mak-sõng bʋg la a Zezi kõ Biiblã zãmsgã wɛɛngẽ, la ãnd n sõng-a?
7 Pipi bũmb y sẽn tog n maan n wilg tɩ y rata ne y sũur fãa n tũ a Zeova, yaa y sẽn na n karemd Biiblã daar fãa. Y sã n karemd Wẽnnaam Gomdã daar fãa, na n sõng-y lame tɩ y tõog n bãng Wẽnnaam la a raabã. (Mat. 5:3, NW ) A Zezi kõo mak-sõng rẽ wɛɛngẽ. A sẽn da wa n nan tar yʋʋm 12, daar a yembre, a roagdbã gẽes-a lame n tɩ yã-a ‘Wẽnnaam doogẽ wã t’a zĩ karen-saamb dãmbã sʋka, n kelgd bãmba, la a sokd bãmb bũmb wʋsgo.’ (Luk 2:44-46) Woto wilgdame tɩ baa a Zezi yãadmẽ, a ra rata ne a sũur fãa n bãng Gʋlsg Sõamyã, la a ra zoe n wʋmd yɛl kẽer võore. Ãnd n sõng-a? Yaa vẽeneg t’a ma a Maari ne a ba wubdg a Zozɛf sẽn yɩ wẽn-tũudbã sõng-a-la wʋsg a yãadmẽ wã t’a bãng Wẽnnaam.—Mat. 1:18-20; Luk 2:41, 51.
8. a) Yaa wakat bʋg la roagdbã segd n sɩng b kambã Biiblã zãmsgo? b) Togs-y kibar sẽn wilgd sɩng biig Biiblã zãmsg a yãadmẽ wã yõodo.
8 Rũndã-rũndã, roagdb nins sẽn yaa wẽn-zoɛtbã me miime tɩ tara yõod wʋsg tɩ b sõng b kambã hal b yãadmẽ tɩ b tʋlg ne b sũy fãa n bãng Biiblã. (Tõo. 6:6-9) Yaa woto la saam-bi-poak a Rubi maan a pipi biig a Zozɛf rogmã poore. Daar fãa, a Rubi ra karemda Biiblã kibay sebrã t’a biigã kelgdẽ. A Zozɛf sẽn wa n lebg bedr bilfã, a ma wã sõng-a lame t’a zãms Biiblã vɛrse rãmb kẽer ne zugu. Rẽ yĩnga woto naf-a lame bɩ? Vẽenega! A sẽn wa n sɩng goamã, a ra zoe n tõe n wilga ned Biiblã kibay kẽere. A Zozɛf sẽn wa n tar a yʋʋm a nu, a maana a pipi sõsg Wẽnnaam tʋʋmdã lekollẽ.
9. Bõe yĩng tɩ Biiblã kareng la a zug bʋgsg tar yõodo?
9 Kom-bɩɩse, y sã n dat n bãng Wẽnnaam la a raabã sõma, rẽndame tɩ y minim n karemd Biiblã daar fãa, la baa y bɩʋʋngã zugẽ menga. (Yɩɩl 71:17) Bõe yĩng tɩ Biiblã karengã tõe n sõng-y tɩ y bãng Wẽnnaam sõma? Kelg-y-yã a Zezi sẽn yeel a Ba wã bũmb ning a pʋʋsg a ye pʋgẽ. A yeela woto: “Vɩɩm sẽn ka sɛta yaa woto, tɩ bãmb na bãng yãmb sẽn yaa sɩd Wẽnnaam sẽn ka to la a Zezi Kirist yãmb sẽn tʋm a soabã.” (Zã 17:3) Sɩd me, y sã n bãngd a Zeova n paasdẽ, na n lebgda wa y sɩd ne-a lame, la sẽn paase, y na n maneg n nong-a-la hal wʋsgo. (Heb. 11:27) Woto yĩnga, y sã n wa karemd Biiblã bɩ y bao n bãng a Zeova sõma. Y tõe n soka y meng woto: ‘Wãn to la zĩ-kãngã tõe n sõng maam tɩ m bãng a Zeova sẽn yaa Wẽnnaam ning buudã? Wãn to la rẽ wilgd tɩ Wẽnnaam sɩd nong-m lame, la t’a rata m neere?’ Y sã n dɩk sẽk n bʋgs sogs-kãensã buudã zugu, na n sõng-y lame tɩ y bãng a Zeova sẽn get yɛlã to-to, sẽn noom-a, la a sẽn dat tɩ y maanega. (Karm-y Yelbũn 2:1-5.) Y sã n maan woto, wa a Tɩmote, na n kɩtame tɩ y kell n sak bũmb nins y ‘sẽn zãms la y bãng tɩ yaa sɩdã,’ la kɩt me tɩ y tũ a Zeova ne yamleoogo.—2 Tɩm. 3:14.
Pʋʋsgã kɩtdame tɩ y maneg n nong a Zeova
10, 11. Wãn to la pʋʋsgã tõe n sõng-y tɩ y tʋlg ne y sũur fãa n tũ a Zeova?
10 Bũmb a yiib-n-soab sẽn tõe n sõng-y tɩ y tʋlg ne y sũur fãa n tũ a Zeova, yaa pʋʋsgã. Yɩɩl Sõamyã 65:3 wã yeta woto: “Yãmb wʋmda pʋʋsgo. Neb buud fãa na n waa yãmb nengẽ.” Hal baa wakat ning Israɛll sẽn da yaa buud Wẽnnaam sẽn welg toor a yʋʋrã yĩngã, bu-zẽms neb ra tõe n wa pʋʋsa a Zeova a roogẽ wã. (1 Rĩm 8:41, 42) Wẽnnaam pa tũusd neb ye. Ned ning fãa sẽn tũud a noyã tõe n kɩsa sɩd t’a sã n pʋʋs-a, a na n deegame. (Yel. 15:8) Sɩd-sɩda, b sẽn yeel tɩ “neb buud fãa” wã, rat n yeelame tɩ yãmb me sã n pʋʋs-a, a na n deegame.
11 Y mii vẽeneg tɩ ned ne a zoa sã n dat tɩ b zoodã yɩ sõma, yaa tɩlae tɩ b yẽsdẽ. Tõe tɩ y nong n togsda y zoa y tagsgo, y zu-loeese, la y yɛl a taaba. Y sã n pʋʋsd Wẽnnaam ne y sũur fãa, y yẽsda ne y Naandã sẽn ka to wã. (Fil. 4:6, 7) Pʋʋsd-y-yã a Zeova, n togsd-a y yɛlã fãa wala y sẽn sõsd ne y ba wall y zoa hakɩka. Sɩd me, y pʋʋsgã wilgda yãmb sã n sɩd mi a Zeova sõma la y nong-a. Y na n yãame tɩ yãmb ne a Zeova zoodã pãng sã n paasdẽ, y pʋʋsgã sõmblem me na n paasdame.
12. a) Bõe yĩng tɩ pʋʋsg sõmblem pa be ne a goamã bala? b) Bõe n na n kɩt tɩ y bãng t’a Zeova pẽneg-y lame?
12 La segdame tɩ y tẽeg tɩ pʋʋsg sõmblem pa be ne bũmb ning y sẽn yetã bal ye. Y segd n wilgda sẽn sɩd be y sũurẽ wã. Y pʋʋsgã segd n wilgdame tɩ y sɩd nonga a Zeova, tɩ y waoogd-a lame, la tɩ y teeg-a-la ne y sũur fãa. Y sã n bãng a Zeova sẽn leokd-y to-to wã, y na n maneg n kɩsa sɩd n paas t’a ‘pẽnegda neb nins sẽn boond-a wã.’ (Yɩɩl 145:18) N-ye, a Zeova na n pẽneg-y lame, n kõ-y pãng tɩ y tõog n kɩɩs a Sʋɩtãana, la y maand sẽn tat yẽ yam.—Karm-y Zak 4:7, 8.
13. a) Wãn to la tõnd saam-bi-poak zood ne Wẽnnaam sõng-a? b) Wãn to la zood ning y sẽn tar ne Wẽnnaamã sõng-y tɩ y tõdg y taabã sagl-yoodo?
13 Bɩ d gom saam-bi-poak a ye yʋʋr sẽn boond t’a Cherie yelle. A paasa zood ning a sẽn tar ne a Zeova wã pãnga, tɩ sõng-a wʋsgo. A Cherie sẽn wa n karemd kolɛɛsã, a sẽn da karemd sõma la a tõe ɛspoorã me sõma wã yĩnga, b kõ-a-la keoor toor-toore. A sẽn wa n karem kolɛɛsã n sa wã, a paama burs n na n tɩ karem inivɛrsite. A Cherie tẽega rẽ yelle, n yeel woto: “Kellẽ la bilf tɩ mam sake, bala b ra rat n sõnga maam wʋsgo. Mam karen-saam dãmbã la m karen-bi-taasã pẽdga maam n dat tɩ m sake.” La a Cherie mikame t’a sã n sake, karengã la ɛspoorã yɛl na n kɩtame t’a wa pa le tar sẽk n na n maan a Zeova raabã ye. Woto wã, a maana wãna? Ad a sẽn yeele: “Mam sẽn pʋʋs a Zeova poore, m tõdga sõngrã, la m yãk yam n lebg wakat fãa so-pakda.” Yʋʋm a nu poore, a yeela woto: “Mam pa tol n maand m bãngẽ ye. Mam sẽn mi tɩ m maana sẽn noom a Zeova wã yĩnga, mam sũur yaa noogo. F sã n sɩd reng n bao Wẽnnaam Rĩungã, Wẽnnaam getame tɩ f paam bũmb nins fãa sẽn yaa tɩlae ne-fã.”—Mat. 6:33.
Y sã n zãad y meng sõma, wilgdame tɩ y “yaa pʋ-peelem soaba”
14. Bõe yĩng tɩ y segd n zãad y meng sõma?
14 Bũmb a tãab-n-soab y sẽn tõe n maan n wilg tɩ y tũuda a Zeova ne y sũur fãa, yaa y sẽn na n zãad y meng sõma. A Zeova ningda kom-bɩɩs nins sẽn tũud a noyã, n zãad b mens sõma wã barka. (Karm-y Yɩɩl Sõamyã 24:3-5.) Bi-bɩɩg a Sãmwɛll pa sak n dɩk maan-kʋʋdb kãsem a Eli kom-yoodã zʋg ye. Woto kɩtame tɩ nebã ra pẽgd-a. A kibarã sẽn be Biiblã pʋgẽ wã yeta woto: “Biig a Sãmwɛll bɩtame la Zusoabã ne nebã fãa nong-a lame.”—1 Sãm. 2:26.
15. Wilg-y bʋʋm kẽer sẽn kɩt tɩ y zãad y meng sõma wã.
15 Wala a Poll sẽn yeelã, rũndã-rũndã nebã sɩd yaa beed rãmba, wilg-m-mens rãmba, neb sẽn kɩɩsd b roagdba, zɩ-beoog rãmba, pʋ-ligs rãmba, sũ-to-neba, tɩ-taam dãmba, neb sẽn nong dũniyã sũ-noog n yɩɩd b sẽn nong Wẽnnaam, la sẽn tar zʋg-wẽns a taaba. (2 Tɩm. 3:1-5) Y sẽn vɩ neb a woto sʋkã kɩtame tɩ yɩl n tõog n ket n zãad y meng sõma, tõe n sɩd yɩ toogo. La baasgo, sasa ning fãa y sẽn tõog n zãgs wẽng maanego, y wilgdame tɩ y be a Zeova poorẽ, no-koeemd ning a Sʋɩtãan sẽn wa ne yĩngr la tẽng naamã wɛɛngẽ wã. (Zoob 2:3, 4) Sẽn paase, y sũur yaa noogo, y sẽn mi tɩ y maana bũmb a Zeova sẽn kos-yã. A yeela woto: “M biiga, maan yam n kõ maam sũ-noogo tɩ m paam n leok sẽn paoogd-a maamã.” (Yel. 27:11) Y sẽn mi me tɩ bũmb ning y sẽn maanã nooma a Zeova wã, na n kenga y raoodo, tɩ y ket n maand a raabã.
16. Bõe la saam-bi-poak a ye maan n noog a Zeova sũuri?
16 Saam-bi-poak a ye yʋʋr sẽn boond t’a Carol sẽn da wa n be lekollã, a ra tũuda Biiblã noy ne a sũur fãa, tɩ wʋsg ra mi rẽ vẽenega. La bõe n maane? A Carol sẽn da pa sakd n naagd a karen-bi-taasã n maand kibs toɛy-toɛyã, la yel-maandɩ nins a sẽn mi tɩ Biiblã gɩdgame wã yĩnga, a taabã ra wae n yaand-a lame. Woto kɩtame t’a ra mi n paamd sor n wilgd a sẽn pa rat n naag-b n maand rẽ wã võore. Yʋʋm wʋsg loogr poore, a Carol karen-bi-taag n gʋls-a lɛtre, n yeel-a woto: “Mam da sɩng n data ne m sũur fãa n yã-fo, n pʋʋs-f barka. Fo sẽn da zãad f meng to-to wã, n paas raood ning fo sẽn tall n da pa naagd tõnd n maand kibs toɛy-toɛyã sõnga maam wʋsgo. Fo n yɩ a Zeova Kaset soab ning mam sẽn seg pipi.” A Carol sẽn da zãad a meng to-to wã yɩ a karen-bi-taagã noog wʋsgo, hal t’a wa sak n sɩng Biiblã zãmsgo. A Carol karen-bi-taagã yeela a lɛtrã pʋgẽ t’a lebga a Zeova Kaset soab sẽn yɩɩd yʋʋm 40 masã. Rũndã-rũndã, yãmb a kom-bɩɩs nins sẽn tũud Biiblã noy ne y sũy fãa wã me tõe n yɩɩ sabab tɩ pʋ-peelem dãmbã bao n bãng a Zeova.
Kom-bɩɩs sẽn pẽgd a Zeova
17, 18. a) Yãmb tagsg yaa wãn ne y tigingã kom-bɩɩse? b) Bõe la kom-bɩɩs nins sẽn tũud Wẽnnaam ne b sũy fãa wã na n wa paame?
17 Kom-bɩɩs tus ka tɛk sẽn be d sʋk n tũud a Zeova ne yẽesmã, tõnd a Zeova nin-buiidã sẽn be dũniyã gill zugã fãa sũy yaa noogo! Kom-bɩ-kãensã modgdame n karemd Biiblã daar fãa, n pelgd b pʋs n pʋʋsdẽ la b zãad b mens sõma wa Wẽnnaam a Zeova sẽn datã, tɩ wilgdẽ tɩ b sɩd rat n tu-a-la ne b sũy fãa. Kom-bɩ-kãensã sẽn kõt mak-sõngã noogda b roagdbã la a Zeova nin-buiidã fãa sũyã.—Yel. 23:24, 25.
18 Ka la bilfu, kom-bɩɩs nins sẽn tũud a Zeova ne b sũy fãa wã na n zĩnda neb nins sẽn na n põsã sʋka, n paam n vɩɩmd Wẽnnaam dũni-paalgã sẽn watã pʋgẽ. (Wil. 7:9, 14) Wakat kãnga, b na n paama bark toor-toor sẽn pa tõe n bãng n bilgi. B na n maneg n bãnga a Zeova n paase, la b paam n tõog n pẽg-a wakat sẽn kõn sa.—Yɩɩl 148:12, 13.
Y tõe n wilga a võor bɩ?
• Wãn to la kom-bɩɩsã tõe n teel tũudum hakɩkã rũndã-rũndã?
• Bõe yĩng tɩ bʋgsgã yaa tɩlae, y sã n dat tɩ Biiblã karengã naf-yã?
• Wãn-wãn la pʋʋsgã tõe n paas y zoodã ne a Zeova?
• Kiris-ned sã n zãad a meng sõma tõe n kɩtame tɩ bõe maane?
[Zãmsgã sogsgã]
[Foto, seb-neng 17]
Yãmb minim n karemda Biiblã daar fãa bɩ?