A Zezi sẽn wilg nebã bũmb ning Wẽnnaam Rĩungã zugã

“A Zezi saaga tẽn-bɛd ne tẽn-bõoneg fãa n moon Wẽnnaam soolem koe-noogo.”—LUK 8:1.

WAE n yaa bũmb nins yell d sẽn tagsd n yɩɩdã, rat n yeel tɩ bũmb nins sẽn tar yõod wʋsg ne tõndã yell la d nong n gomda. A Zezi meng yeelame tɩ yaa ‘sũur sẽn pid ne bũmb ningã la noor gomda.’ (Matɩe 12:34) D sã n ges bũmb nins yell a Zezi sẽn gom a koe-moonegã sasa wã, d tõe n yeelame tɩ Wẽnnaam Rĩungã yell la a ra tagsd n yɩɩda.

La Wẽnnaam Rĩungã yaa bõe? Rĩung yaa goosneema, t’a taoor soabã yaa rĩma. Dẽnd Wẽnnaam Rĩungã yaa goosneema Wẽnnaam sẽn lugli. A Zezi ra gomda Wẽnnaam Rĩungã yell wʋsgo. Pʋd n yaa rẽ yell la a ra gomd n yɩɩda. Evãnzill dãmb a naasã pʋsẽ, d yãta gom-bil ning b sẽn lebg tɩ Wẽnnaam soolem bɩ Rĩungã sẽn yɩɩd naoor 110. La a Zezi pa wilg nebã Rĩungã sẽn yaa bũmb ningã ne a no-goam bal ye. A maana yɛl toor-toor n kɩt tɩ b bãng yɛl wʋsg Wẽnnaam Rĩungã zugu, la b bãng bũmb nins a sẽn na n wa maanã.

Rĩmã yaa ãnda? Pa ninsaalb n zems taab n yãk Wẽnnaam Rĩungã rĩm ye. Yaa Wẽnnaam n yãk-a a toore. A Zezi koe-moonegã pʋgẽ, a wilgame tɩ yaa yẽ la ned ning Wẽnnaam sẽn yãk t’a na n yɩ rĩmã.

A Zezi ra miime tɩ bãngr-goamã pĩnd n wilgame tɩ Mesi wã naamã pa na n tol n tall tɛk ye. (2 Sãmwɛll 7:12-14; Daniɛll 7:13, 14; Matɩe 26:63, 64) Tẽeg-y t’a Zezi yeela vẽeneg tɩ yaa yẽ la Mesi ning sẽn da segd n wa wã. A Zezi sẽn yeel woto wã, wilgdame t’a sak n deegame tɩ yẽ la rĩm ning Wẽnnaam sẽn yãkã. (Zã 4:25, 26) Rẽnd a Zezi sẽn da wae n gomd Rĩungã yell n boond-a tɩ yẽ “soolem” bɩ a Rĩungã zemsame.—Zã 18:36.

A Zezi wilgame me tɩ neb a taab n na n naag-a n dɩ naam Rĩungã pʋgẽ. (Luk 22:28-30) A boola nin-kãens fãa sẽn naag taab tɩ “wubr pa zem bũmbu,” bɩ bãg-bila, b sõorã sẽn paoodã yĩnga. A yeel-b-la woto: “Yãmb Ba wã sũur noomame t’a kõ yãmb rĩungã.” (Luk 12:32, Sebr Sõngo) Biiblã yaoolem sebrã pʋgẽ, b wilgame tɩ yaa neb 144 000 la Wẽnnaam na n yãk tɩ b tɩ rɩ naam ne Kiristã.—Wilgri 5:9, 10; 14:1.

Rĩungã bee yɛ? A Zezi yeela Rom nin-naab a Põns Pɩlat tɩ yẽ Rĩungã bɩ a “soolmã ka dũniyã rẽnd ye.” (Zã 18:36) Wẽnnaam Rĩungã a sẽn bobl Kiristã pa na n tũnug ne ninsaalb sigls n dɩ a naamã ye. A Zezi ra wae n boonda Wẽnnaam Rĩungã tɩ ‘saasẽ soolem.’ * (Matɩe 4:17; 5:3, 10, 19, 20) Rẽnd Wẽnnaam Rĩungã yaa goosneema sẽn na n zĩnd saasẽ.

 A Zezi sẽn da wa n be tẽngã zugã, a ra mii vẽeneg t’a segd n wa leba saasẽ. Rẽ n so t’a yeel t’a na n tɩ “manega zĩiga,” rat n yeel t’a na n tɩ kɩtame tɩ neb nins sẽn na n wa tɩ naag-a n dɩ naamã tõog n wa kẽng saasẽ.—Zã 14:2, 3.

Bõe la Rĩungã zoe n maane? A Zezi wilga a kɛlgdbã tɩ b kos Wẽnnaam t’a “soolmã” bɩ a Rĩungã wa, t’a ‘raabã maan dũniyã zug wa sẽn maand saasẽ’ wã. (Matɩe 6:9, 10) Wẽnnaam daabã zoe n maanda saasẽ. Yaa ne Rĩungã maasem la Wẽnnaam na n pids bũmb ning a sẽn da sɩng n dat ne tẽngã. Sẽn na yɩl n maan dẽ, Rĩungã na n kɩtame tɩ yɛlã fãa toeem fasɩ tẽngã zugu.

Bõe la Rĩungã na n maan tẽngã zugu? A Zezi wilgame tɩ Wẽnnaam Rĩungã na n menesa nin-wẽnsã fãa, tɩ wẽnemã sa tẽngã zugu. (Matɩe 25:31-34, 46) Na n kɩtame tɩ wẽgbã la tʋʋm-beedã buud fãa sa. A Zezi wilga a kɛlgdbã tɩ rẽ poore, yaa “sũ-maasem dãmbã,” nin-tɩrsã, nimbãan-zoɛtbã, “pʋ-peelem dãmbã” la sẽn baood-b bãanã, n na n pid dũniyã.—Matɩe 5:5-9.

Rẽ yĩnga nin-tɩrs kãensã na n vɩɩmda tẽng sẽn pid ne rẽgd zug bɩ? Abada! A Zezi pĩnd n wilgame tɩ Wẽnnaam Rĩungã na n toeema tẽngã hal t’a lebg neere. B sẽn wa n ka a Zezi wã, rao a yembr b sẽn ka n yɛgl-a kos-a-la woto: “Zezi, tẽeg-y m yelle, yãmb sã n lɛɛg n wa n na n dɩ y naamã.” A Zezi leok-a lame: “Sɩd-sɩda, . . . fo na n zĩnda arzãnẽ ne maam.” (Luk 23:42, 43, Sebr Sõngo) Wẽnnaam Rĩungã sɩd na n toeema tẽngã t’a lebg arzãn wa Edɛn sẽn da yaa to-to wã.

Bõe me la Rĩungã na n maan n kõ ãdem-biisã? A Zezi pa wilg nebã Wẽnnaam Rĩungã sẽn na n wa maan bũmb ninsã ne noor bal ye. A maana yɛl toor-toor n wilg rẽ vẽenega. A Zezi maana yel-soalem toor-toor n maag bãad-rãmba, tɩ wilgdẽ t’a naamã sasa, a na n  kɩtame tɩ bãasã buud fãa sa. Evãnzill a ye pʋgẽ, b yeelame t’a Zezi “saaga Galile soolem fãa n zãms nebã karen-dot pʋsẽ, n moon Wẽnnaam soolem koe-noogo, n maag bãase, la yĩns tood buud fãa sẽn tar neba.”—Matɩe 4:23.

A Zezi kɩtame tɩ neb sẽn da bẽed bãas toor-toor paam laafɩ. A “puka ned sẽn dog ne zond nini.” (Zã 9:1-7, 32, 33) A maaga rao a ye wãoodo, hal n sak n sɩɩs-a menga. (Mark 1:40-42) B ra wa n talla “bãad a ye sẽn yaa muk la wʋng” me n wa a Zezi nengẽ, la a maaga a bãasã, tɩ wilgdẽ t’a tõe n kɩtame tɩ ‘wʋms wʋme, tɩ mugs me gome.’—Mark 7:31-37, Sebr Sõngo.

Rĩm ning Wẽnnaam sẽn yãkã vʋʋga baa kũ-rãmb menga. Evãnzill dãmbã pʋgẽ, b sõdga naoor a tãab a sẽn vʋʋg neba. Pipi wã yɩɩ pʋg-kõor a yembr bi-ribl yende. Yiib-n-soabã yaa yʋʋm 12 bi-pugla, la tãab-n-soabã yɩ a zoa a Lazaare.—Luk 7:11-15; 8:41-55; Zã 11:38-44.

A Zezi ra pĩnd n vẽnega tʋm-tʋmd a Zã t’a bilg bark nins ãdem-biisã sẽn na n paam Wẽnnaam Rĩungã naam sasa wã. A Zã yeela woto: ‘Gese, Wẽnnaam yir bee nebã sʋka. La Wẽnnaam na n zĩnda ne bãmba, la b na n yɩɩ a neba, la Wẽnnaam mengã na n paa ne bãmba. A na n yẽesa nintãmã fãa t’a ra le zĩnd nebã ninẽ ye, la kũum ka na n le zĩnd ye, la sũ-sãoong bɩ yãbr wall toog kõn le zĩnd yɛs ye, tɩ bõe, dẽenem bũmb fãa loogame.’ (Wilgri 1:1; 21:3, 4) Yãmb we n tags n gese! Woto wilgdame tɩ wakat kãnga, sũ-sãoongo, toogo, wall kũum pa na n le zĩnd ye. Sasa kãng la d sẽn da sɩng n pʋʋsd n kot Wẽnnaam t’a kɩt t’a raabã maan tẽngã zug wa sẽn maand saasẽ wã na n pids zãng-zãnga.

Wakat bʋg la Wẽnnaam Rĩungã na n wa? A Zezi goma yẽ sẽn na n wa sɩng a naamã rɩɩb saasẽ wã yelle, n wilg tɩ na n yɩɩ wakat sẽn pa wõnd a taaba. A boola wakat kãng t’a “waoongã wakate.” A pĩnd n wilga yɛl toor-toor sẽn na n pids tẽngã zugu, n kɩt tɩ b bãng t’a lebga rĩm saasẽ. A yeelame tɩ wakat kãnga, zaba, kom, tẽn-digimds la bã-longds na n zĩndame, la tɩ wẽngã me na n lebga wʋsgo. (Matɩe 24:3, 7-12; Luk 21:10, 11) Yel-kãensã la yɛl a taab a Zezi sẽn da pĩnd n wilg sɩnga pidsg yʋʋmd 1914 soabã pʋgẽ, dũni gill pipi zabrã sɩngr tɛka. Dẽnd rẽ tɛk n tãag masã, a Zezi rɩta naam saasẽ. Ka la bilfu, Wẽnnaam Rĩungã na n kɩtame tɩ Wẽnnaam daabã maan tẽngã zugu. *

Wẽnnaam Rĩungã waoong na n nafa yãmb bɩ? Rẽ bee ne yãmb manesem sẽn yaa to-to ne koɛɛg ning a Zezi sẽn kɩt tɩ b moondẽ wã.

[Tẽngr not rãmbã]