Karemdbã sogsgo

A Zeova sẽn gɩdg bõn-naands pʋʋsgã, bõe yĩng t’a pa sɩbg a Aarõ, a sẽn wa n maan sãnem nag-bilã?

Yikr sak 32 wã wilgdame t’a Aarõ sẽn maan nag-bilã, a kɩɩsa Wẽnnaam noor ning sẽn gɩdg bõn-naandsã pʋʋsgã. (Yik. 20:3-5) Biiblã yeelame tɩ rẽ poore, a ‘[Zeova] sũur yika wʋsg ne a Aarõ hal tɩ b ra rat n sãam-a, la [a Moiiz] yõka sɛɛg a Aarõ yĩnga.’ (Tõo. 9:19, 20) Rẽ yĩnga yaa nin-tɩrg a Moiiz sẽn pʋʋs a Zeova n yõk sɛɛgã yĩng n kɩt t’a bas a Aarõ taalã bɩ? (Zak 5:16) N-ye. Wõnda yaa a Moiiz sẽn yõk sɛɛgã, n paas bʋʋm sẽn na ta a yiib yĩng n kɩt t’a Zeova reeg a Moiiz kosgã, n pa sɩbg a Aarõ ye.

Pipi, wõnda yaa a Aarõ sẽn sak a Zeova yʋʋm wʋsg pʋgẽ ne a sũur fãa wã yĩnga. Wala makre, Wẽnnaam sẽn da wa n tʋm a Moiiz t’a tɩ yeel a Faraõ t’a bas Israɛll kambã tɩ b yi Eziptã, a kɩtame t’a Aarõ yãag-a n tɩ gom a Moiiz yʋʋr yĩnga. (Yik. 4:10-16) A Moiiz ne a Aarõ sak n kẽnga Ezipt rĩmã nengẽ naoor wʋsgo, n tɩ togs-a koees sẽn zab-a, hal t’a keng a sũur n gom-b põosa. B sẽn wa n ket Eziptã, naoor wʋsgo, a Aarõ wilga ne a sũur fãa t’a yaa ned sẽn nong a Zeova, la sẽn sakd-a wakat fãa.—Yik. 4:21.

Yiib-n-soaba, d tẽeg sẽn sɩng to-to t’a Aarõ wa sak n na n maan sãnem nag-bilã. A Moiiz ra rʋʋ Sinayi tãngã n kaoos rasem 40 n pa sigd ye. ‘Nebã sẽn yã t’a Moiiz kaoosda tãngã zug n ka sigdã,’ b pẽdga a Aarõ t’a maan bõn-naandg n kõ bãmba. A Aarõ tũu nebã raabã, n sɩd maan nag-bil ne sãnem n kõ-ba. (Yik. 32:1-6) La bũmb nins a Aarõ sẽn maan rẽ poorã wilgdame tɩ nag-bilã maaneg pa tũ ne a raab ye. Yaa vẽeneg tɩ yaa nebã pẽdgrã n kɩt t’a kong n sake. Wala makre, a Moiiz sẽn wa n yeel nin-buiidã tɩ ned ning fãa sẽn be a Zeova poorẽ bɩ a wa yẽ nengẽ wã, a Aarõ ne a zakã rãmb fãa kẽngame. Bala Biiblã yeelame tɩ Levi buudã fãa wilgame tɩ b be a Zeova poorẽ. Baraare, b kʋʋ neb tus a tãab sẽn da yaa nag-bilã pʋʋsdb taoor dãmba.—Yik. 32:25-29.

Rẽ poore, a Moiiz yeela nin-buiidã woto: “Yãmb kongame n maan yel-wẽn-kãsenga.” (Yik. 32:30) Dẽnd d tõe n yeelame tɩ pa a Aarõ a ye la a Zeova bas n pa sɩbg ye. Bala neb a taabã me ra tara taal baa yaa bilf yellã pʋgẽ, la a Zeova bas-b lame. A Aarõ ne nin-kãensã fãa paamame t’a Zeova kõ-b sugri, a nimbãan-zoeerã sẽn yaa wʋsgã yĩnga.

Sãnem nag-bilã yell welgr poore, a Zeova kɩtame tɩ b yãk a Aarõ t’a lebg maan-kʋʋdbã kãsmã. Wẽnnaam yeela a Moiiz woto: “Bɩ f yeelg a Aarõ a fu-sõma wã, n pʋdg a zug kaam n welg-a t’a maan maan-kʋʋr tʋʋmd mam taoore.” (Yik. 40:12, 13) Woto wilgda vẽeneg t’a Zeova kõ a Aarõ sugr a kongrã yĩnga. Wẽnnaam ra miime t’a Aarõ yaa ned sẽn nong tũudum hakɩkã ne a sũur fãa, la t’a pa bas-a n na n pʋʋs bõn-naands ye.