Ra beeg-y-yã a Zeova vʋʋsem sõngã ye
Ra beeg-y-yã a Zeova vʋʋsem sõngã ye
“Bɩ y ra beeg Wẽnnaam sɩɩg sõng sẽn ning yãmb bãnd fãagr daar yĩngã ye.”—EF. 4:30.
1. Bõe la a Zeova maan tɩ kɩt tɩ neb milyõ rãmb zug zẽke, la bõe la nin-kãens me segd n maane?
A ZEOVA maana bũmb sẽn kɩt tɩ neb milyõ rãmb sẽn vɩ dũni kãngã sẽn pid ne zu-loeesã pʋgẽ paam zu-zẽkre: A kɩtame tɩ b lebg a zo-rãmb ne a Bi-ribl a Zezi Kirist maasem. (Zã 6:44) Yãmb sã n dɩka y meng n kõ Wẽnnaam, n tũud a raabã, y naaga nin-kãensã sẽn yaa a zo-rãmbã. Y sẽn deeg lisg vʋʋsem sõngã yʋʋr yĩngã, segdame tɩ y da maan bũmb sẽn kɩɩsd vʋʋsem sõngã ye.—Mat. 28:19.
2. Sogs-bʋs la d na n leoke?
2 Tõnd sẽn “bʋt sɩɩg sõng yĩngã,” d toeemda d zʋgã n lebgd nin-paalse. (Gal. 6:8; Ef. 4:17-24) La tʋm-tʋmd a Poll sagl-d lame tɩ d gũus n da wa beeg Wẽnnaam vʋʋsem sõngã ye. (Karm-y Efɛɛz rãmb 4:25-32.) Bɩ d maag d yĩns n bao n wʋm tʋm-tʋmdã saglgã võore. A Poll sẽn yeel tɩ d ra beeg Wẽnnaam vʋʋsem sõngã võor yaa bõe? La sɩngda wãn tɩ ned sẽn dɩk a meng n kõ a Zeova wa maan bũmb sẽn beegd vʋʋsem sõngã? La wãn to la d tõe n gũus n da wa beeg a Zeova vʋʋsem sõngã?
A Poll gomdã sẽn dat n yeelga
3. Wilg-y goam nins sẽn be Efɛɛz rãmb 4:30 wã võore.
3 Pipi, kelg-y-yã a Poll sẽn yeel bũmb ning Efɛɛz rãmb 4:30 wã sõma. A yeela woto: “Bɩ y ra beeg Wẽnnaam sɩɩg sõng sẽn ning yãmb bãnd fãagr daar yĩngã ye.” A Poll ra pa rat t’a tẽed-n-taasã a sẽn nong wʋsgã sãam zood ning b sẽn tar ne Wẽnnaamã ye. A Zeova talla a vʋʋsem sõngã n ‘ning-b bãnd fãagr daar yĩnga.’ Wẽnnaam vʋʋsem sõngã yɩɩ bãnde, la a ket n yaa bãnde, bala a yaa sẽn paam-b zaeebã, la b na n kell n yɩ sakdbã sẽn na n wa paam bũmb ningã “reng-n-lɛmbga.” (2 Kor. 1:22) Bãndã wilgdame tɩ b yaa Wẽnnaam dẽndã, n na n wa tɩ vɩɩmd saasẽ. B sõorã zãng na n yɩɩ neb 144 000.—Wil. 7:2-4.
4. Bõe yĩng tɩ d segd n gũus n da wa maan bũmb n beeg Wẽnnaam vʋʋsem sõngã?
4 Kiris-ned sã n beegd vʋʋsem sõngã sẽn yaa Wẽnnaam pãngã, wat n kɩtame tɩ pãn-kãngã pa le sõngd-a ye. Bũmb ning a Davɩɩd sẽn yeel a sẽn wa n maan yel-wẽnd ne a Batseba wã wilgda rẽ vẽenega. A Davɩɩd sũur sãamame t’a kõs a Zeova woto: “Da rig-y maam tɩ m yi yãmb nengẽ ye, la y ra yiis yãmb sɩɩgã sẽn yaa sõngã mam pʋgẽ ye.” (Yɩɩl 51:13) Kiris-ned sã n paam vʋʋsem sõngã zaeebo, a segd n kell n “maana neer hal tɩ ta a kũum” n yaool n paam saasẽ vɩɩm “maanfã.” (Wil. 2:10; 1 Kor. 15:53) Kiris-neb nins sẽn na n wa vɩɩmd tẽngã zugã me rata vʋʋsem sõngã sõngre, sẽn na yɩl n kell n yɩ wẽn-sakdba, n wa paam bũmb ning Wẽnnaam sẽn kãab neb nins sẽn tẽed Kiristã kũumã sẽn yaa maoongã. (Zã 3:36; Rom. 5:8; 6:23) Dẽnd d fãa segd n gũusame n da wa beeg a Zeova vʋʋsem sõngã ye.
Wãn to la kiris-ned tõe n beeg vʋʋsem sõngã?
5, 6. Wãn to la kiris-ned tõe n wa beeg vʋʋsem sõngã?
5 D sẽn dɩk d mens n kõ Wẽnnaam n yaa kiris-nebã yĩnga, d tõeeme n da beeg vʋʋsem sõngã ye. La rẽ baoodame tɩ d kẽnd ne vʋʋsem sõngã. Bala vʋʋsem sõngã na n sõng-d lame tɩ d tõog n da sakd yĩngã ratem wẽnsã, la d tõog n da tall zʋg-yood ye. (Gal. 5:16, 25, 26) La d sã n pa gũusi, yɛlã tõe n wa toeemame. D tõe n wa yik n maanda yɛl Wẽnnaam Gomdã sẽn yaa vʋʋsem sõngã n vẽneg tɩ b gʋlsã sẽn gɩdge. Mi n sɩngda bilf-bilfu, la wakat ning menga, d pa bãngd ye. D sã n maan woto, d beegda Wẽnnaam vʋʋsem sõngã.
6 D sã n maand yɛl sẽn kɩɩsd vʋʋsem sõngã sẽn wilgd bũmb ninsã, d beegda vʋʋsem sõngã, rat n yeel tɩ d beegda a Zeova, bala yaa yẽ n so vʋʋsem sõngã. D sã n wʋm Efɛɛz rãmb 4:25-32 goamã võor sõma, na n sõng-d lame tɩ d bãng d sẽn segd n zã d mens to-to, la sõng-d tɩ d da wa beeg Wẽnnaam vʋʋsem sõngã ye.
D sẽn na n maan to-to n da beeg vʋʋsem sõngã
7, 8. Wilg-y d sẽn segd n yɩ pʋ-peelem dãmbã võore.
7 D segd n togsda sɩda. Efɛɛz rãmb 4:25 wã pʋgẽ, a Poll yeela woto: “Bɩ y bas ziri yagbo, la ned kam fãa togs sɩd ne a yaka, tɩ bõe, tõnd fãa yaa yĩng a yembr wil ne taaba.” Tõnd sẽn naag taab n yaa wa “yĩng a yembr wilã” yĩnga, yaa vẽeneg tɩ d ned baa a ye pa segd n yɩ pʋ-lik soaba, wall ned sẽn baood n na n tudg a tẽed-n-taasã ye. Bala woto me yaa ziri yagbo. Ned sã n maand woto la a pa rat n teke, a na n sãama zood ning a sẽn tar ne Wẽnnaamã.—Karm-y Yelbũn 6:16-19.
8 Tigingã ned sã n yagd ziri la a zãmbd a taabã, tõe n sãama d zems-n-taarã. Woto yĩnga, d segd n yɩɩ pʋ-peelem dãmb wa no-rɛɛs a Daniɛlle, tɩ ned pa tõe n yã bũmb n dõd-d ye. (Dan. 6:5) Sẽn paase, d segd n tẽegda bũmb ning a Poll sẽn yeel kiris-neb nins sẽn na n wa tɩ vɩɩmd saasẽ wã. A yeel-b lame tɩ “Kirist yĩngã” wilã fãa, rat n yeel t’a karen-biis nins sẽn paam vʋʋsem sõngã zaeeb n tũud-a ne pʋ-peelmã segd n naaga taaba, tɩ zems-n-taar zĩnd b sʋka. (Ef. 4:11, 12) Tõnd me sẽn na n wa vɩɩmd tẽngã sẽn na n lebg arzãnã zugã segd n togsda taab sɩd wakat fãa, rẽ na n sõngame tɩ zems-n-taar zĩnd d saam-biisã sʋk dũniyã gill zugu.
9. Bõe yĩng tɩ d segd n tũud saglg ning sẽn be Efɛɛz rãmb 4:26, 27 wã?
9 D segd n kɩɩsa a Sʋɩtãana, n da bas t’a kɩt tɩ d wa maan bũmb a Zeova sẽn kis ye. (Zak. 4:7) Vʋʋsem sõngã sõngda tõnd tɩ d tõogd n kɩɩsd a Sʋɩtãana. Wala makre, a tõe n sõng-d lame tɩ d gũusdẽ tɩ d sũurã ra wa yik tɩ loog noor ye. A Poll yeela woto: “Yãmb sũyã sã n yiki, bɩ y ra maan yel-wẽn ye, la y ra sak tɩ wĩndg lʋɩ tɩ yãmb sũyã ket n ka sig ye. La bɩ y ra kõ Sʋɩtãanã weer ye.” (Ef. 4:26, 27) Bũmb sã n wa maan sẽn sek d sũur na yiki, d sã n pʋʋs d sũurẽ wã zĩig pʋgẽ, d tõe n paama “sũ-mar” sẽn na n sõng-d tɩ d ra wa tall manesem sẽn tõe n beeg Wẽnnaam vʋʋsem sõngã ye. (Yel. 17:27) D sũurã sã n yik bɩ d ra bas tɩ kaoose, t’a Sʋɩtãan wa paam weer n kɩt tɩ d maan sẽn yaa wẽng ye. (Yɩɩl 37:8, 9) Bũmb a ye sẽn na n kɩt t’a ra tõog-d yaa d sẽn na n tũud a Zezi saglgã, n welgd d mo-yõsã tao-tao.—Mat. 5:23, 24; 18:15-17.
10, 11. Bõe yĩng tɩ d pa segd n zu wall d tʋm pʋ-lik baa bilfu?
10 D pa segd n zu wall d tʋm pʋ-lik tʋʋm baa a ye. A Poll goma wagdmã yelle, n yeel woto: “Ned ninga sẽn da zuuda, bɩ a ra le zu ye, bɩ a maan nug-tʋʋmd sẽn yaa sõma n paam n kõ sẽn dat-b sõngrã.” (Ef. 4:28) Ned sẽn dɩk a meng n kõ Wẽnnaam sã n zu, a ‘paoogda Wẽnnaam yʋʋrã.’ (Yel. 30:7-9) Baa talemd meng pa kõt ned sor t’a zu ye. Neb nins sẽn nong Wẽnnaam la b nong b taabã miime tɩ bũmb kae n kõt ned sor t’a zu ye.—Mark 12:28-31.
11 A Poll gomdã pʋgẽ, a pa wilg bũmb nins d sẽn pa segd n maanã bal ye. A wilga d sẽn segd n maanã me. D sã n kẽnd ne vʋʋsem sõngã, d na n wɩsga d meng n tʋm n tõog n ges d zakã rãmb yelle, la d “paam n kõ sẽn dat-b sõngrã.” (1 Tɩm. 5:8) A Zezi ne a tʋm-tʋmdbã ra tigsda ligd talsã sõngr yĩnga, la a Zida Iskariot sẽn da yaa pʋ-lik soabã ra zuuda ligdã. (Zã 12:4-6) Yaa vẽeneg tɩ pa vʋʋsem sõngã n kɩt t’a maan woto ye. Vʋʋsem sõngã sẽn so tõndã yĩnga, d maanda “bũmb fãa tɩ zems” wa a Poll sẽn da maanã. (Heb. 13:18) Woto kɩtdame tɩ d pa rat n maan bũmb n beeg a Zeova vʋʋsem sõngã ye.
Bũmb a taab me sẽn na n sõng-d tɩ d ra beeg vʋʋsem sõngã
12, 13. a) Wala Efɛɛz rãmb 4:29 sẽn wilgã, gom-bʋs buud la d pa segd n gome? b) La gom-bʋs buud la d segd n gomda?
12 D segd n gũusda ne d no-goamã. A Poll yeela woto: “Da sak-y tɩ goam sẽn ka sõma yi yãmb noorẽ ye. La weer sã n beẽ bɩ y gom sẽn yaa sõma sõngr yĩnga, t’a zĩnd bark neb nins fãa sẽn wʋmdã yĩnga.” (Ef. 4:29) Ka yɛsa, tʋm-tʋmdã pa wilg d sẽn pa segd n maanegã bal ye. A wilga d sẽn segd n maanegã me. Vʋʋsem sõngã tõe n sõng-d lame tɩ d gomd goam sẽn yaa sõma, sẽn sõngde, sẽn be bark neb nins fãa sẽn kelgd-dã yĩnga. Sẽn paase, d pa segd n bas tɩ “goam sẽn ka sõma” yi tõnd noorẽ ye. Gɛrkã gom-bil ning b sẽn lebg ka tɩ “sẽn ka sõma” wã rat n yeelame tɩ sẽn põoge. Wala tɩɩg biiga, zĩm, bɩ nemd sẽn põoge. D pa rat tɩɩg biiga, zĩm, bɩ nemd sẽn põog ye. Dẽnd d segd n kisga goam nins fãa sẽn pa sõma a Zeova nifẽ wã.
13 Segdame tɩ wakat fãa bɩ d noorã goam yaa sõma n tar “yamsem noom,” tɩ sakd kelgre. (Kol. 3:8-10; 4:6) Nebã sã n kelgd tõnd goamã, b segd n neeme tɩ d yaa toore. Bɩ d modg tɩ nebã sã n kelgd d goamã bɩ b neẽ tɩ yaa ‘goam sẽn yaa sõma, n sõngd-ba.’ Sẽn paase, d segd n talla yɩɩl-gʋlsdã tagsgã buudu. A ra yeela woto: “Zusoabã sẽn yaa mam pĩiga la mam fãagdã, bɩ y kɩt tɩ mam noor goam ne m sũur tagsg zems yãmb nin gesgo.”—Yɩɩl. 19:15.
14. Efɛɛz rãmb 4:30, 31 wã wilgdame tɩ d segd n zãaga d meng ne bõe?
14 D segd n zãaga d meng ne sũ-toogo, sũ-yikri, kãnegr la pʋ-toog buud fãa. A Poll sẽn yeel tɩ d gũus n da wa beeg vʋʋsem sõngã poore, a paasa woto: “Bɩ y bas sũ-toog ne kisgri, la sũ-yikr la no-koɛɛma, la kãnegr la pʋ-toog” buud fãa. (Ef. 4:30, 31) D sẽn yaa ninsaalb sẽn pa zems zãngã yĩnga, d sã n dat tɩ d tagsa wã la d tʋʋmã fãa zemsdẽ, baooda modgre. D sã n bas tɩ “sũ-toog ne kisgr la sũ-yikr” be d sũyẽ wã, d beegda Wẽnnaam vʋʋsem sõngã. Ned sã n maan-d bũmbu, tɩ d tugd beem ne a soab n pa baood n na n maneg yellã, wakat kãng me d beegda vʋʋsem sõngã. D sã n sɩng Biiblã sagls kɩɩsgo, bilf-bilfã, tõe n wa kɩtame tɩ d maan yel-wẽnd sẽn ka sugri, n wã d menga.
15. Ned sã n beeg-do, bõe la d segd n maane?
15 D segd n yɩɩ sũ-bʋgsem dãmba, n maand d taabã neere, la d kõt b sugri. A Poll yeela woto: ‘Bɩ yãmb maan taab neere, la y paam sũ-bʋgsem, la y kõ taab sugri, wa Wẽnnaam sẽn kõ yãmb sugr Kirist yĩngã.’ (Ef. 4:32) Baa ned sã n beeg-d tɩ loog noore, d segd n dɩka Wẽnnaam togs-n-taare, n sak sugri. (Luk 11:4) D rɩk makr wa d tẽed-n-taag sẽn na n gom n paoog-do. Sẽn na yɩl n welg yellã, tõnd tɩ yã-a lame. A sak n deegame t’a konga wʋsgo, la a kos sugri. Tõnd kõ-a-la sugrã. La d sugrã pa segd n yɩ ne noor bal ye. D tẽeg tɩ Maankʋʋr 19:18 wã yeta woto: “Bɩ f ra rok f sũur ne f buud ned ye, la bɩ f ra sak tɩ sũ-toog kaoos foom ne f buud sʋk ye. Bɩ f nong f yak wa f menga. Mam yaa Zusoabã.”
Gũusg me yaa tɩlae
16. Rɩk-y makr sẽn wilgd tɩ d sã n pa rat n beeg vʋʋsem sõngã, wakat ninga yaa tɩlae tɩ d toeem d yɛl kẽere.
16 Baa d sã n wa yaa d yembre, d sã n pa gũusi, d tõe n wa rat n maana bũmb sẽn pa noom Wẽnnaam. D rɩk makr wa saam-biig sẽn na n kelgd mizik tɩ goam nins b sẽn togsd a pʋgẽ wã pa sõma ye. A sũur kasetã wa ningd-a-la taale, a sẽn kɩɩsd Biiblã sagls “tʋm-tʋmd sẽn tũud sɩd la sẽn tar yamã” sẽn kõt sɛbã pʋsẽ wã yĩnga. (Mat. 24:45) Tõe t’a pʋʋsa Wẽnnaam dẽ wɛɛngẽ, la a tẽeg a Poll sẽn yeel bũmb ning Efɛɛz rãmb 4:30 wã. A sẽn pa tol n dat n maan bũmb sẽn beegd Wẽnnaam vʋʋsem sõngã yĩnga, a yãka yam tɩ rẽ tɛka, a pa na n le kelg mizik nins a sẽn da kelgdã ye. A Zeova na n ning-a-la bark a sẽn maan woto wã. Bɩ tõnd ned kam fãa wɩng ne gũusgu, n da wa beeg Wẽnnaam vʋʋsem sõngã ye.
17. D sã n pa gũusdẽ la d wɩngd ne pʋʋsgo, bõe n tõe n wa maane?
17 Sã n pa d gũusdẽ la d wɩngd ne pʋʋsgo, d tõe n wa maanda sẽn pa segd wall d tʋmd tʋʋm-dẽgd sẽn kɩɩsd bũmb nins a Zeova sẽn wilgd tõnd ne vʋʋsem sõngã maasmã. D sã n maand woto, d beegda a vʋʋsem sõngã. La d sã n beeg vʋʋsem sõngã, yaa a Zeova la d beegda, n sãamd a sũuri. Woto yaool n yaa bũmb d sẽn pa tol n dat n maane. (Ef. 4:30) A Zezi wakatẽ wã, gʋlsdbã sẽn yeel tɩ yaa a Sʋɩtãan n sõngd-a t’a maand yel-soalmã, b maana yel-wẽn-kãsenga. (Karm-y Mark 3:22-30.) Nin-kãensã sẽn yaa Kiristã bɛɛbã sẽn maan woto wã, b ‘tʋʋsa sɩɩg sõngã,’ tɩ yaa yel-wẽnd sẽn ka tõe n paam sugri. Bɩ d ra tol n maan a buud ye!
18. Bõe n tõe n kɩt tɩ d bãng tɩ d pa maan yel-wẽnd sẽn pa tar sugri?
18 D sẽn pa rat n wa maan yel-wẽnd sẽn ka sugrã yĩnga, wakat fãa, d segd n tẽegda sagls nins a Poll sẽn kõ-do, n na n sõng-d tɩ d ra wa beeg vʋʋsem sõngã. La d sã n da maana yel-wẽn-kãsenga? D sã n teka yam n kos sugr la d kos kãsem dãmbã sõngre, d tõe n kɩsa sɩd tɩ Wẽnnaam kõ-d-la sugri, la tɩ pa yel-wẽnd sẽn ka sugr la d sẽn maanã ye. Ne Wẽnnaam sõngre, d tõe n gũusame n da tol n le maan bũmb sẽn beegd vʋʋsem sõngã ye.
19, 20. a) Sõdg-y yɛl nins d sẽn segd n gilã kẽere. b) Bõe la d segd n yãk yam n maane?
19 Yaa ne vʋʋsem sõngã maasem la Wẽnnaam kɩtd tɩ nonglem, sũ-noog la zems-n-taar be a nin-buiidã sʋka. (Yɩɩl 133:1-3) Woto yĩnga, d segd n gũusame n da wɩt wall d gomd goam sẽn paoogd neb nins Wẽnnaam sẽn yãk ne a vʋʋsem sõngã maasem tɩ b get tigingã yellã ye. Bala d sã n maand woto, d beegda vʋʋsem sõngã. (Tʋʋ. 20:28; Ziid 8) D manesmã la d goamã pʋd n segd n wilgdame tɩ d waoogda d taabã, la tɩ d ratame tɩ zems-n-taar zĩnd tigingã pʋgẽ. Sãmbg sẽn ka be, d pa segd n tũus tigingã neb kẽere, tɩ yaa ne bãmb bal n nong n sõsda, tɩ wa kɩt tɩ d weel sul toɛy-toɛy ye. A Poll yeela woto: “M ba-biisi, mam kota yãmb ne tõnd Zusoab a Zezi Kirist yʋʋre, tɩ yãmb koees fãa zems taaba, la tɩ welgr da zĩnd yãmb sʋk ye. La bɩ yãmb lagem taab sõma, n paam tagsg la yam a yembre.”—1 Kor. 1:10.
20 A Zeova tʋll n sõng-d lame tɩ d ra wa beeg a vʋʋsem sõngã, la a sɩd tõe n sõng-d lame me. D ket n pʋʋsd Wẽnnaam n kot a vʋʋsem sõngã, la d yãk yam n da wa tol n maan bũmb sẽn beegd-a ye. Bɩ d ket n “bʋt sɩɩg sõng yĩnga,” n sakd ne d sũy fãa t’a wilgd-d sẽn segd masã tɛka, la wakat fãa.
Y na n leokame tɩ bõe?
• Beeg vʋʋsem sõngã võor yaa bõe?
• Bõe la ned sẽn dɩk a meng n kõ a Zeova tõe n maan n beeg vʋʋsem sõngã?
• Wãn to la d tõe n gũus n da wa beeg vʋʋsem sõngã?
[Zãmsgã sogsgã]
[Foto, seb-neng 30]
Welgd-y mo-yõsã tao-tao
[Foto, seb-neng 31]
Yãmb goamã wõnda tɩɩgã bi-bʋse?