Rapa, yãmb sakda Kiristã zu-sobendã bɩ?
Rapa, yãmb sakda Kiristã zu-sobendã bɩ?
“Rao tara zu-soaba, yaa Kiristã.”—1 KOR. 11:3, SEBR SÕNGO.
1. Bõe n wilgd t’a Zeova pa zũnd-zãnd Wẽnnaam?
WẼNNAAM A ZEOVA n naan bũmb fãa, yaa yẽ la ãndũniyã fãa Zusoaba, tɩ bõn-naandsã fãa segd n sak-a. Wilgr 4:11 wã yeta woto: “[Zeova] tõnd Wẽnnaam, yãmb n zems tɩ reeg pẽgr la waoogre, la pãnga, tɩ bõe, yãmb n naan bũmb fãa, la yaa yãmb daabã yĩng la yãmb naan bãmb tɩ b beẽ.” D sã n ges a Zeova sẽn kɩt t’a malɛgsã tar zu-soben-dãmbã, d nee vẽeneg t’a sɩd yaa ‘laafɩ Wẽnnaam, n ka zũnd-zãnd Wẽnd’ ye.—1 Kor. 14:33, Sebr Sõngo; Ezai 6:1-3; Heb. 12:22, 23.
2, 3. a) Ãnda la a Zeova reng n naane? b) Ba wã ne Biigã sʋka, ãnda la a to zu-soaba?
2 Wẽnnaam da sɩng n bee hal yʋʋm sẽn kõn bãng n sõde, tɩ bũmb baa a ye da nan ka beẽ ye. A Zeova sẽn naan a soab pipi wã yaa malɛk b sẽn bool tɩ “Gomdã,” bala a yaa a Zeova koe-taasda. Yaa ne Gomdã maasem la a maan bũmb a taabã fãa. Kaoosg zugẽ, Gomdã waa tẽngã zugu, n yɩ ninsaal sẽn zems zãnga, tɩ b bool-a t’a Zezi Kirist.—Karm-y Zã 1:2-3, 14. *
3 Sã n yaa ne Biiblã, Ba wã ne Biigã sʋka, ãnda la a to zu-soaba? Wẽnnaam vẽnega tʋm-tʋmd a Poll t’a leok sok-kãngã, n yeel-d woto: “Mam datame tɩ yãmb bãng tɩ Kirist yaa ned kam fãa zugu, la tɩ pag zug ya a sɩda, la tɩ Kirist zug yaa Wẽnnaam.” (1 Kor. 11:3) Kiristã zu-soab yaa a Ba wã. Sẽn na yɩl tɩ zũnd-zãnd ra zĩnd malɛgsã sʋk la ninsaalbã sʋka, yaa tɩlae tɩ zu-soben-dãmb beẽ, tɩ b sakd-ba. Baa sẽn malɛk ning sẽn naag Wẽnnaam n maan bũmb a taabã fãa wã meng segd n saka Wẽnnaam zu-sobendo.—Kol. 1:16, NW.
4, 5. A Zezi manesem yaa wãn ne a Zeova sẽn yaa a zu-soabã?
4 A Zezi manesem yɩɩ wãna, a Zeova sẽn yaa a zu-soabã sẽn tʋm-a tẽngã zugã? Biiblã yeta woto: “Baa [Kirist Zezi] sẽn da wõnd Wẽnnaamã, a pa tags n na n deeg a zĩiga, sẽn dat n yeel tɩ n bao n zeng Wẽnnaam ye. Ayo, a sak n basa a ziirã, n lebg wa yamba, n puk ninsaalb wõneg pʋgẽ. Sẽn paasde, a sẽn wa n yaa ninsaalã wakate, a sika a meng n yɩ sakd hal n tɩ ta kũum, n-yẽe, kũum ra-luk zugu.”—Fil. 2:5-8, NW.
5 A Zezi sakda a Ba wã zu-sobendã wakat buud fãa. A meng yeela woto: “Mam ka tõe n maan bũmb ne m meng pãng ye. . . . Mam bʋʋd yaa tɩrga, tɩ bõe, mam ka baood m meng ratem ye, yaa sẽn tʋm-a maama ratem.” (Zã 5:30) A paasa woto: “Mam sẽn maand bũmb ninsã tata [m Ba] yam daar fãa.” (Zã 8:29) A Zezi kũumã sẽn wa n kolgã, a pʋʋsa a Ba wã n yeel-a: “Mam waooga yãmb dũniyã zugu. Tʋʋmd ninga yãmb sẽn kõ maam tɩ m maanã, mam maaname n sɛ.” (Zã 17:4) Woto fãa wilgda vẽeneg t’a Zezi sak n deegame tɩ zemsame tɩ Wẽnnaam yɩ a Zusoaba, la t’a sakd-a-la wakat fãa.
Biigã sẽn sakd Ba wã zu-sobendã nafd-a lame
6. A Zezi manesmã ra wilgdame t’a yaa nin-bʋg buudu?
6 A Zezi sẽn wa n be tẽng zugã, a manesem sẽn da yaa to-to ne nebã wilgame t’a tara zʋg-sõma toor-toore. Wala makre, nonglem kãseng ning a sẽn da tar ne Ba wã. A meng yeela woto: “Mam nonga m Ba.” (Zã 14:31) Sẽn paase, a wilgame t’a nonga ãdem-biisã hal wʋsgo. (Karm-y Matɩe 22:35-40.) A Zezi ra nonga nebã hal n da waoogd-ba. A ra pa nin-toaaga, bɩ ned sẽn maand a taab pãng ye. Daar a yembre, a yeela a kɛlgdbã woto: “Bɩ y wa mam nengẽ, yãmb fãa sẽn yɛ la sẽn tʋkd zɩɩb sẽn yaa zɩsgo, la mam na kõ yãmb vʋʋsgo. Bɩ y rɩk mam naoã n zãms bũmb nins mam sẽn na n wilg yãmbã. Tɩ bõe, mam yaa sũ-mar soaba, la m yaa nin-nana, la yãmb na paam vʋʋsgo. Tɩ bõe, mam yɛlã yaa naana, la mam zɩɩb yaa faasga.” (Mat. 11:28-30) Neb nins fãa sẽn da yaa wẽn-sakdbã, sẽn yɩɩd fãa, nin-toosã sẽn da namsd b rãmbã sẽn pẽneg a Zezi sẽn yaa nin-sõngã, b paama yolsgo. Sẽn paase, a Zezi koe-noogã ra kengda b raoodo.
7, 8. Sã n yaa ne a Moiiz Tõogã, bõe la pagã sẽn da bẽed zɩɩm bãagã ra pa segd n maane, la a Zezi manesem yɩɩ wãn to ne-a?
7 Tẽeg-y-yã a Zezi manesem sẽn da yaa to-to ne pagbã. Hal pĩnd wẽndẽ n tãag masã, rap wʋsg namsda pagbã. Israɛlle, baa tũudmã taoor dãmb meng ra pa nand pagb ye. La a Zezi ra waoogda pagbã. A sẽn tall manesem ning ne pag a ye sẽn da bẽed zɩɩm bãagã wilgda rẽ vẽenega. Pagã bãagã kaoosa ne-a yʋʋm 12. A “namsa wʋsg” tɩpdb wʋsg nengẽ, tɩ b reeg a sẽn tarã fãa. La a bãagã ra ket n “tara paasg bala.” A Moiiz Tõogã b sẽn da tũud wakat kãngã yetame tɩ ned a woto yaa rẽgdo, la tɩ ned ning fãa sẽn sɩɩs-a me lebgda rẽgdo.—Maan. 15:19, 25.
8 Pagã sẽn wʋm t’a Zezi maagda bãad rãmbã, a kẽe kʋʋngã sẽn da pʋgd a Zezi wã sʋka, n tagsd a sũurẽ woto: “Mam sã n tõog n sɩɩs bãmb fuugã bala, mam na n paama maagre.” A paam n sɩɩsa a Zezi t’a yĩnsã sɩd maag zĩig pʋgẽ. A Zezi bãngame tɩ pagã sɩɩsa a fuugã. La a pa zab-a ye. A pʋd n wilgame t’a rata a neere. A Zezi bãngame tɩ pagã bãag sẽn kaoosã nams-a-la wʋsgo, la t’a ra rata sõngr ne a sũur fãa. Rẽ n so t’a zoe a nimbãaneg n yeel-a woto: “M biiga, fo tẽeb n maag foom. Kẽng ne laafɩ n paam f meng ne bãag ninga sẽn tar foomã.”—Mark 5:25-34.
9. A Zezi karen-biisã sẽn bao n na n gɩdg kamb tɩ b ra wa a nengẽ wã, a yeel-b lame tɩ bõe?
9 Baa kambã meng ra nonga a Zezi zĩigẽ. Daar a yembre, neb n tall b kamb n wa a Zezi nengẽ, la a karen-biisã sẽn da tẽed tɩ kambã na n tiis-a lame wã, b bao n na n gɩdg-b lame. La rẽ pa yɩ a Zezi noog ye. Kibarã sẽn be Biiblã pʋgẽ wã sɩd wilgame t’a Zezi sẽn yã bõn-kãngã, a sũur pa yɩ noog baa bilfu, la t’a leoka a karen-biisã woto: “Bas-y kom-bõonegã tɩ b wa mam nengẽ n da gɩdg bãmb ye, tɩ bõe, Wẽnnaam soolem yaa neb nins sẽn wẽnd wa bãmbã yĩnga.” A pʋd n ‘talla kambã a nugẽ, n tik-b ne a nus n ning b zut barka.’ A Zezi pa yeel tɩ b bas kambã tɩ b wa a nengẽ bal ye, a sak n deeg-b lame, n wilg t’a sũur nooma ne rẽ maanego.—Mark 10:13-16.
10. Maana wãn t’a Zezi wa tar zʋg-sõma woto?
10 Maana wãn t’a Zezi wa tar zʋg-sõma woto? A sẽn deng n zĩnd saasẽ ne a Ba wã yʋʋm wʋsgã, a yãa a manesem sẽn yaa to-to ne a bõn-naandsã, tɩ kɩt t’a rɩkd a makre. (Karm-y Yelbũn 8:22, 23, 30.) A maaga a yĩng n ges a Zeova sẽn yaa yĩngr la tẽng zu-soabã sẽn pidsd a zu-sobendã to-to wã, n maand wa yẽ. Yaa a Zezi sẽn da sakd a Ba wã zu-sobendã yĩng n kɩt t’a tõog n dɩk a togs-n-taarã. A ra sakda a Ba a Zeova ne yamleoogo, la a Ba wã me sũur da nooma ne a Biigã, a sẽn sakd-a wã yĩnga. A Zezi sẽn wa tẽngã zugã, a rɩka a saasẽ Ba wã togs-n-taar kɛpɩ. Ad tõnd sẽn paam tɩ yaa Kiristã sẽn yaa Wẽnnaam Rĩungã rĩmã n yaa d zu-soabã, yaa waoogr tɛkẽ n kõ tõndo!
Rɩk-y Kiristã togs-n-taare
11. a) Ãnda togs-n-taar la d segd n mao n dɩke? b) Bõe yĩng tɩ yaa rapã n segd n mao n dɩk Kiristã togs-n-taar n yɩɩda?
11 Kiris-nebã gilli, la sẽn yɩɩd fãa, rapã segd n maoodame n dɩkd Kiristã togs-n-taare. Wa d sẽn zoe n yã wã, Biiblã yeelame tɩ ‘rao zu-soab yaa Kiristã.’ Wa Kiristã sẽn dɩk Wẽnnaam sẽn yaa a zu-soabã togs-n-taarã, rapã sẽn be tigingã pʋgẽ wã me segd n modgdame n dɩkd Kiristã sẽn yaa b zu-soabã togs-n-taare. Tʋm-tʋmd a Poll sẽn lebg kiris-nedã poore, a rɩka a Zezi makre. A sagla a tẽed-n-taasã woto: “Bɩ yãmb yɩ mam togs-n-taas wa mam me sẽn yaa Kirist togs-n-taagã.” (1 Kor. 11:1) Ad tʋm-tʋmd a Pɩɛɛr me sẽn yeele: “Yaa bõn-kãng yĩng la b bool yãmba, tɩ bõe, Kirist me namsa yãmb yĩnga, n bas mamsg ne yãmb tɩ y tũ bãmb nao.” (1 Pɩɛ. 2:21) La yaa bʋʋm a to me yĩng n kɩt tɩ b sagend rapã tɩ b rɩkd Kiristã togs-n-taarã. Yaa bãmb n lebgd kãsem dãmbã la kãsemb sõngdbã. Wa a Zezi sẽn da rɩkd a Zeova togs-n-taar ne yamleoogã, bãmb me segd n dɩkda Kiristã togs-n-taar ne yamleoogo.
12, 13. Kãsem dãmbã manesem segd n yɩɩ wãn-wãn ne tigingã neba?
12 Yaa tɩlae tɩ kãsem dãmbã maood n dɩkd Kiristã togs-n-taare. A Pɩɛɛr sagl-b-la woto: “Bɩ y rɩlg Wẽnnaam piisã sẽn be yãmb nusẽ wã, ka modgr yĩng ye, la yaa ne yamleoogo, sẽn zems Wẽnnaam yam, ka ligd yĩng ye, la yaa nonglem yĩnga, ka tɩ soog bãmb ne pãng ye, yaa tɩ yɩ mamsg bãmb yĩnga.” (1 Pɩɛ. 5:1-3) Kãsem dãmbã pa segd n yɩ nin-toos sẽn dat n soog tigingã neb ne pãng ye. B segd n dɩkda Kiristã togs-n-taare, n nong piisã b sẽn bobl-bã, n waoogd-ba, la b sikd b mens b taoore.
13 Rap nins sẽn lʋɩt taoor tigingã pʋgẽ wã yaa neb sẽn pa zems zãnga. B segd n ningda rẽ b yamẽ wakat fãa. (Rom 3:23) Rẽ n so tɩ b segd n maood n bãngd a Zezi n paasdẽ, la b nong nebã wa a Zezi. Segdame tɩ b bʋgsd Wẽnnaam ne Kiristã manesem sẽn yaa to-to ne nebã zugu, la b modg n dɩkd b makre. A Pɩɛɛr sagla woto: “Bɩ yãmb fãa sak taab ne sik-m-menga, tɩ bõe, Wẽnnaam kɩɩsda tɩtaam dãmbã, la bãmb ningda sik-m-mens rãmbã zut barka.”—1 Pɩɛ. 5:5.
14. Bõe la kãsem dãmbã segd n maan n wilg tɩ b waoogda tigingã neba?
14 Kãsem dãmbã ne kãsemb sõngdbã manesem ne tigingã neb segd n wilgdame tɩ b tara zʋg-sõma. Rom dãmb 12:10 soabã yeta woto: “Bɩ y nong taab wʋsg ne ba-biis nonglem. Bɩ y waoog taaba.” Kãsem dãmbã ne kãsemb sõngdbã waoogda tigingã neb fãa. Wa b sẽn sagl kiris-nebã fãa wã, nin-kãensã me pa segd n ‘maan bũmb baa a yembr ne zabr wall wilg-m-meng ye. B ned kam fãa segd n tẽe ne sik-m-meng yam tɩ nebã fãa yɩɩda yẽnda.’ (Fil. 2:3) Dẽnd segdame tɩ taoor-lʋɩtbã wilgd vẽeneg tɩ b ningda b yamẽ tɩ tigingã neb a taabã yɩɩda bãmba. B sã n maand woto, na n yɩɩ wa a Poll sẽn da yeelã. A ra yeela woto: “Zemsame tɩ tõnd sẽn tar pãngã zɩ neb nins sẽn ka pãngã zɩɩbo, la ka tɩ maan sẽn noom tõnd mens ye. Bɩ tõnd ned kam fãa maan sẽn noom a yaka, a sõngr la a bɩɩb yĩnga. Tɩ bõe, Kirist ka maan sẽn noom bãmb meng ye.”—Rom 15:1-3.
Waoogd-y y pagbã
15. Pʋg-sɩdbã manesem segd n yɩɩ wãn-wãn ne b pagbã?
15 Tẽeg-y saglg ning tʋm-tʋmd a Pɩɛɛr sẽn kõ pʋg-sɩdbã. A yeel-b-la woto: “Rapa, bɩ yãmb ned kam fãa vɩɩmd ne a paga, la y bãng tɩ bãmb yaa neb sẽn ka tar pãng wa yãmb ye. Maan-y-b wa sẽn zemse, n nand-ba.” (1 Pɩɛ. 3:7, Kãab-paalgã Koe-noogo) F sã n nand neda, rat n yeelame tɩ f waoogda a soabã hal sõma. F kelgda a tagsgo, la f maand a raabo, sã n pa wa n mikame tɩ pa zems ne Wẽnnaam noor wall yɩɩda f tõogo. Yaa woto la pʋg-sɩd segd n maan ne a paga.
16. Pagbã waoogrã wɛɛngẽ, keoog bʋg la Wẽnnaam Gomdã kõt pʋg-sɩdbã?
16 Saglg ning a Pɩɛɛr sẽn kõ pʋg-sɩdbã pʋgẽ, a keoog-b-la woto: “Maan-y-yã a woto tɩ bũmb baa fʋɩ ra wa gɩdg yãmb pʋʋsg ye.” (1 Pɩɛ. 3:7, Kãab-paalgã Koe-noogo) Woto wilgdame tɩ manesem ning rao sẽn tar ne a pagã tõe n sãama zood ning a sẽn tar ne a Zeova wã. A sã n pa waoogd a pagã, tõe n kɩtame t’a Zeova pa kelg a pʋʋsg ye. Sẽn paase, naoor wʋsgo, rao sã n waoogd a paga, kɩtdame tɩ pagã me waoogd-a.
17. Bõe la rapã segd n sak n maan n wilg tɩ b nonga b pagbã?
17 Wẽnnaam Gomdã leb n sagenda pʋg-sɩdbã woto: “Rapã tog n nonga b pagbã wa bãmb mens yĩnsi. . . . Tɩ bõe, ned nan ka kisg a meng yĩng abada. La a rɩlgd-a lame la a geta a meng yell wa Kirist sẽn maand bãmb nebã. . . . Bɩ yãmb ned kam fãa nong a pag wa a menga.” (Ef. 5:28, 29, 33) Wãn-wãn la pʋg-sɩdbã segd n nong b pagbã? Tʋm-tʋmd a Poll yeel-b lame tɩ b nong b pagbã wa Kirist sẽn nong a tẽedbã to-to, n sak n ki b yĩngã. (Ef. 5:25) Rao segd n sak n kõ a vɩɩm a pag yĩnga, wala Kiristã sẽn sak n ki ãdem-biisã yĩnga. Rao sã n get a pag yell ne nonglem, sũ-bʋgsem, n pa baood a meng nafr bala, yɩta nana ne pagã t’a sak a zu-sobendã.
18. Bõe la pʋg-sɩdbã tõe n paam tɩ sõng-b tɩ b yɩ sɩd-sõma?
18 Rẽ yĩnga Wẽnnaam sẽn sagl rapã tɩ b waoogd b pagbã woto wã yaa bũmb sẽn yɩɩd b pãng bɩ? Ayo. A Zeova pa na n tol n kos-b tɩ b maan bũmb b sẽn pa tõe ye. Sẽn paase, a Zeova nin-buiidã ned kam fãa tõe n paama a vʋʋsem sõngã sẽn yaa pãn-kãseng sẽn ka to wã sõngre. A Zezi yeela woto: “A sã n yaa woto tɩ yãmb a nin-wẽnsã bãng tɩ kõ yãmb kambã kũun sẽn yaa sõma; dẽ, sẽn yɩɩda, yãmb [saasẽ] Ba kõn kõ neb nins sẽn kot bãmbã sɩɩg sõng bɩ?” (Luk 11:13) Pʋg-sɩdbã tõe n kosa a Zeova t’a kõ-b a vʋʋsem sõngã tɩ sõng-ba, tɩ b tõog tɩ b sẽn tar manesem ning ne neb a taabã la ne b pagbã yɩ sõma.—Karm-y Tʋʋm 5:32.
19. Sõsg ning sẽn pʋgdã na n goma bõe yelle?
19 Vẽenega, rapã sɩd segd n mao n bãnga b sẽn segd n sak Kiristã zu-sobendã to-to wã, la b rɩkd a togs-n-taare. La kiris-nin-pogsã yẽ? Sẽn yɩɩd fãa sẽn kẽ-b kãadmã? Sõsg ning sẽn pʋgdã na n wilga b manesem sẽn segd n yɩ to-to ne zu-sobend ning a Zeova sẽn lugl zakã pʋgẽ wã.
[Tẽngr note]
^ sull 2 Zã 1:1 (NW ) wã yeta woto: “Hal sɩngrẽ, Gomdã ra beeme, la Gomdã ra bee ne Wẽnnaam, la Gomdã yaa wẽnnaam.”
Y tẽrame bɩ?
• A Zezi zʋg-bʋs la d segd n mao n talle?
• Kãsem dãmbã manesem ne tigingã neb segd n yɩɩ wãn-wãna?
• Rao manesem segd n yɩɩ wãn ne a paga?
[Zãmsgã sogsgã]
[Foto rãmba, seb-neng 16]
Rɩk-y-yã a Zezi makr n waoogd nebã