Bõe la Wẽnnaam maanda?

“[Zeova, NW ] * yaa bõe tɩ yãmb yaasd yɩɩg n solgd y meng namsg wakate?”—YƖƖL SÕAMYÃ 10:1.

D SÃ N kelgd kibayã, d nee vẽeneg tɩ d sɩd vɩɩ “namsg wakate.” La yel-beed sã n wa paam tõnd mengã, wala makre, bi-bees sã n maan-d bũmbu, d sã n paam sãmpogre, wall d ned n maan kaalem, d tõe n sokda d meng woto: “Wẽnnaam nee mam yellã sɩda? M yellã pak-a lame sɩda? Rẽ yĩnga a sɩd beeme bɩ?”

La rẽ yĩnga y mi n soka y meng n ges tõnd sẽn dat tɩ Wẽnnaam ges d yell to-to wã sã n pa mi n yaa kɛgr bɩ? D rɩk makre: Tags-y n ges-y bi-bilf sẽn na n yãbd a ba sẽn loog tʋʋm yĩnga. Biigã kʋmd n data a ba wã. A raabã yaa a ba wã sẽn na n pa ne-a yir bala. A tagsdame t’a sẽn pa zĩ yirã, yẽ yell pa pak-a ye. Hal n tãag wĩndgã kõom, a tara a ba wã yell sokre.

Yaa vẽeneg tɩ d na n sak n deegame tɩ biigã tagsg yaa kɛgre. Bala, yaa zakã neb fãa neer yĩng la a ba wã sẽn kẽnd tʋmã. Rẽ yĩnga tõnd me sã n wa tagsdẽ tɩ Wẽnnaam toor kae ne-do, pa kɛgr sɩda?

Wala makre, neb kẽer mi n datame tɩ ned sã n maan-b wẽnga, bɩ Wẽnnaam sɩbg a soab zĩig pʋgẽ n lebse. Sãnda me yamẽ, Wẽnnaam yaa wa Papa Nowɛll bala, t’a tʋʋmd yaa pʋɩt kũun toor-toor la a sõngd nebã. Wala makre, sõng ned t’a paam tʋʋmde, pa rẽ bɩ pag wall sɩda, wall sõng ned t’a rɩ lotori.

Sẽn tagsd-b woto wã fãa tẽedame tɩ ned sã n maan-d wẽng tɩ Wẽnnaam pa rok d sũurã zĩig pʋgẽ, wall d sã n kos Wẽnnaam bũmb t’a pa kõ-do, wilgdame t’a toor kae ne-d ye. La rẽ pa sɩd baa bilf meng ye! Sɩdã yaa tɩ rũndã-rũndã, Wẽnnaam a Zeova tʋmda ãdem-biisã beoog daar na yɩ neer yĩnga, la a pa maand wa neb wʋsg sẽn kot t’a maan bũmb ningã ye.

La bõe la Wẽnnaam maand tõnd neer yĩngã? Sẽn na yɩl n leok sok-kãngã, rẽnda d lebg n tẽeg yɛlã sẽn yɩ to-to hal sɩngrẽ wã. Bala rẽ wẽndã ãdem-biisã sẽn sãam zood ning b sẽn da tar ne Wẽnnaamã, b yellã ra pa sãam n tõt manegr ye.

B yel-wẽndã sẽn wa ne yɛl ninsã

Tags-y n ges-y wa roog sẽn na n sãam tɩ b bas-a tɩ maan yʋʋma. A tollã lʋɩɩ pʋgẽ, kʋɩlensã lagsame n bas b kʋɩlen-kuyã, tɩ lalsã me lags tɩ pa sakd gesg ye. Ro-kãngã yaool n da yɩɩ ro-sõngo. La a sẽn sãam woto fãa wã, a manegrã baooda tʋʋm wʋsgo. Pa ra-n-yɛng yell ye.

D tẽeg ãdem-biisã yɛl sẽn sãam hal tɩ ta zĩig ningã. Sẽn na n maan yʋʋm 6 000 woto sẽn  looge, malɛk a ye n kɩɩs Wẽnnaam n lebg Sʋɩtãana, n belg d yaab a Ãdem ne a Hawa tɩ bãmb me kɩɩse. Nand t’a Ãdem ne a Hawa maan yellã, b ra zemsa zãnga, n pa lʋɩt bãag ye. B ra segd n doga kamb tɩ bãmb ne b kambã la b yagensã fãa vɩɩmd wakat sẽn kõn sa. (Sɩngre 1:28) La b sẽn maan yel-wẽndã b sãama bark nins fãa b sẽn da paamdã, tɩ b kambã la b yagensã me bõne.

Ra n tags-y tɩ b kɩɩsgã sẽn wa ne sãoong ningã yaa bilf ye. Biiblã yeela woto: “Rao a yembre, [rat n yeel t’a Ãdem,] n wa ne yel-wẽnã dũniyã, tɩ kũum wa yel-wẽnã yĩnga.” (Rom dãmba 5:12) Yel-wẽndã sẽn kɩt tɩ ninsaalbã kiidẽ wã toor sẽn ka be, a sãama zood ning d sẽn da tar ne d Naandã. Sẽn paase, kɩtame tɩ d yɛlã fãa wilgdẽ tɩ d yaa pãn-komsem dãmba. Dẽnd ãdem-biisã yɛl sẽn yaa to-to wõnda roog sẽn sãame. Nin-tɩrg a Zoob sẽn da yeel bũmb ningã sɩd yaa sɩda. A yeela woto: “Ninsaal pag sẽn dogã vɩɩm yaa koɛɛga, la toogo.”—Zoob 14:1.

La rẽ yĩnga a Ãdem ne a Hawa beegrã poore, Wẽnnaam basa ninsaalbã bɩ? Abada! Sɩd me, rẽ tɛk n tãag masã, d saasẽ Ba wã tʋmda ãdem-biisã fãa neer yĩnga. Sẽn na yɩl n wʋm Wẽnnaam sẽn maand bũmb nins tõnd yĩngã võor sõma, d na n wilga bũmb a tãab ned sẽn dat n maneg roog sẽn segd n maane, la d wilg wãn to la bõn-kãens b tãabã fãa zems ne bũmb nins Wẽnnaam sẽn maan n na n maneg ãdem-biisã yɛlã.

1 Roogã soab sã n ges a sãoongã sẽn ta zĩig ningã, a bãngda a sã n segd n siig-a-la zãnga, wall a sã n na n maneg-a lame.

D yaab a Ãdem ne a Hawa kɩɩsgã poor bala, Wẽnnaam a Zeova wilgame t’a na n wa manega ninsaalbã yellã. A yeela malɛk ning sẽn kɩt tɩ b kɩɩs-a wã woto: “Mam na n ninga beem foo ne pagã sʋka, la fo yagengã ne yẽ yageng sʋka. Yẽ yageng na n bedsa fo zugu, la fo na n pogla yẽ na-kãsenkãare.”—Sɩngre 3:15.

A Zeova sẽn yeel woto wã, wilgdame t’a na n wa sãama sẽn kɩt-a t’a Ãdem ne a Hawa kɩɩs-a Edɛnnã. (Rom dãmba 16:20; Wilgri 12:9) Sẽn paase, a Zeova pĩnd n togsame tɩ “yageng” n da na n wa fãag ãdem-biisã ne yel-wẽndã. * (1 Zã 3:8) A Zeova sẽn pʋlem woto wã, wilgdame t’a pa na n siig a sẽn naanã fãa ye. A yãka yam n na n maaneg sẽn sãamã. La ãdem-biisã yellã manegr baooda sẽk wʋsgo.

2 Sẽn na n maneg-a roogã rengd n maga a tʋʋmdã sẽn na n yɩ to-to wã.

Wẽnnaam a Zeova ra kõo Israɛll nebã noyã, la a wilg-b pʋʋsg roog b sẽn segd n me. Biiblã goma rẽ yell n yeel tɩ “ra yaa bũmb nins sẽn na n wa wã mamsgo.” (Kolos rãmba 2:17) Bõn-kãens ra yaa wa pãlã rãmb sẽn da yaa bũmb sẽn yɩɩd rẽ mamsgo.

Wala makre, Israɛll nebã ra  kʋʋda rũms n kõt Wẽnnaam maando, n kot b yel-wẽnã sugri. (Maankʋʋre 17:11) Maand nins b sẽn da kʋʋdã ra makda maoong a ye bark sẽn ka to sẽn da wate. Yaa maoong sẽn da na n wa kɩt tɩ ãdem-biisã fãa paam b yel-wẽnã sugr zãng-zãnga. * Sɛk-roogã ne wẽnd-doogã a Zeova sẽn da kɩt tɩ Israɛll nebã maan n pʋʋsd-a wã teed fãa la b sẽn da maand be wã ra makda bũmb toor-toore, Mesi wã sẽn da na n wa maane, a kũumã sẽn na n yɩ maoongã tɛka, n tall n tãag a saasẽ dʋʋbã.—Ges-y bilgrã sẽn be neng a 7 wã.

3 Roogã soab segd n yãka ned sẽn na n tũ a pãlã wã n maneg roogã.

A Zezi la Mesi ning Wẽnnaam sẽn da pĩnd n togs tɩ watame wã. A ra na n wa pidsa bũmb ning Israɛll nebã maandã sẽn da makdã, rat n yeel t’a na n kiime tɩ yɩ maoong ãdem-biisã fãa yel-wẽn yĩnga. Sɩd me, a Zãmbatiis boola a Zezi tɩ “Wẽnnaam Pebil sẽn yiisd dũniyã yel-wẽnã.” (Zã 1:29) A Zezi sak n maana rẽ ne yamleoogo. A meng yeela woto: “Tɩ bõe, mam ka yi [saasẽ] n na n wa maan m meng ratem ye, la yaa tɩ maan sẽn tʋm-a maamã ratem.”—Zã 6:38.

Wẽnnaam pa tʋm a Zezi wã t’a wa “kõ a vɩɩmã tɩ yao neb wʋsg yĩng” bal ye. A tʋm-a lame me t’a wa sõng neb tɩ b lebg a karen-biisi, la b wa paam n naaga n dɩ naam a Rĩungã pʋgẽ. (Matɩe 20:28; Luk 22:29, 30) Yaa ne Rĩung kãng maasem la Wẽnnaam na n pids a sẽn da sɩng n dat tɩ ãdem-biisã vɩɩm yɩ to-to. B boonda Wẽnnaam Rĩungã koɛɛg tɩ “koe-noogo,” bala a wilgdame tɩ Wẽnnaam lugla goosneema saasẽ t’a na n wa maaneg yɛl nins fãa sẽn be dũniyã zugã.—Matɩe 24:14; Daniɛll 2:44. *

Yellã ket n be a manegr zugu

Nand t’a Zezi leb saasẽ, a yeela a karen-biisã woto: “Bɩ y kẽng n maan nebã buud fãa tɩ b yɩ mam karen-biisi, n lis bãmb ne Ba la Biiga, la sɩɩg sõng yʋʋre. . . . La gese, mam bee ne yãmb wakat fãa hal tɩ ta wakat sɛɛbo.”—Matɩe 28:19, 20.

Woto wilgdame t’a Zezi kũumã poore, ãdem-biisã yellã ra ket n be a manegr zugu. A na n tall n tãaga hal “wakatã sɛɛbo,” rat n yeel tɩ wakat ning Wẽnnaam Rĩungã sẽn na n sɩng naam dɩɩb dũniyã zugã. Wakat kãng ta n saame. D sɩd tõe n yeela woto, bala d nee bãnd ning a Zezi sẽn da pĩnd togs tɩ na n wilga “dũniyã sɛɛb wakatã.” *—Matɩe 24:3-14; Luk 21:7-11; 2 Tɩmote 3:1-5.

Rũndã-rũndã, a Zeova Kaset rãmbã sakda a Zezi noorã, n moond Wẽnnaam Rĩungã koe-noog tẽns 236 pʋsẽ. Sɩd me, b yiisa seb-kãngã y sẽn karemdã n na n sõng yãmb tɩ y bãng Wẽnnaam Rĩungã sõma, la y bãng a sẽn na n maan bũmb ninsã. Gũusg Gasgã neng a 2 fãa pʋgẽ, b yeta woto: “Seb-kãngã . . . kengda nebã pelse, bala, a wilgdame tɩ ka la bilfu, Wẽnnaam Rĩungã sẽn yaa goosneema b sẽn zoe n lugl saasẽ wã na n kɩtame tɩ wẽnem buud fãa sa, la a kɩt tɩ tẽngã lebg arzãna. A sagenda nebã tɩ b tẽ a Zezi Kirista, bala yẽ n sak n ki sẽn na yɩl tɩ tõnd tõog n paam vɩɩm sẽn ka satã, leb n yaa yẽ la Wẽnnaam Rĩungã Rĩma.”

Yaa sɩd tɩ y ket n wʋmda teerorist rãmbã tʋʋm-beedã kibay la sabab-wẽns a taab kibaya. Sẽn paase, yel-kɛgeng ning tõe n wa paama yãmb mengã. La y sã n maag y yĩng n vaees Biiblã, y na n yãame tɩ Wẽnnaam sɩd pa bas ãdem-biisã ye. Pʋd n na n kɩtame tɩ y bãng t’a “ka zãr ne tõnd fãa ye.” (Tʋʋma 17:27) Y na n bãngame me t’a sẽn pʋlem t’a na n kɩtame tɩ d lebs n paam bark nins d yaab a Ãdem ne a Hawa sẽn bõnã me sɩd na n pidsame.—Ezai 55:11.

[Tẽngr not rãmbã]

 [Taablo/Foto rãmba, seb-neng a 7]

‘Sẽn da watã mamsgo’—Sɛk-roogã sẽn da makde

TẼN-KUGRÃ

Ra wilgdame tɩ Wẽnnaam na n wa sak n deega a Zezi maoongã.—HEBRE DÃMBA 13:10-12.

MAAN-KƲƲDBÃ KÃSMÃ

Ra makda a Zezi.—HEBRE DÃMBA 9:11.

1 Paasg Daarã, maan-kʋʋdbã kãsem ra kʋʋda maoong nin-buiidã yel-wẽnã yĩnga.—MAANKƲƲRE 16:15, 29-31.

1 Yʋʋmd 33 Nizã kiuug rasem 14 soabã, a Zezi kõo a vɩɩmã tɩ yɩ maoong tõnd yel-wẽnã yĩnga.—HEBRE DÃMBA 10:5-10; 1 ZÃ 2:1, 2.

ZĨ-SÕNGÃ

Ra makda a Zezi sẽn paam vʋʋsem sõng zaeebã.—MATƖE 3:16, 17; ROM DÃMBA 8:14-17; HEBRE DÃMBA 5:4-6.

FU-LILLDGÃ

Nand t’a Zezi ki, a yĩngã ra yaa wa fu-lilldg sẽn kɩt t’a pa tõe n kẽng saasẽ ye.—1 KORẼNT DÃMBA 15:44, 50; HEBRE DÃMBA 6:19, 20; 10:19, 20.

2 Maan-kʋʋdbã kãsem da yita zĩ-sõngã pʋgẽ, n kẽ zĩ-sõng n yɩɩdã pʋgẽ.

2 A Zezi vʋʋgrã poore, a leba saasẽ n tɩ ‘yas Wẽnnaam taoor tõnd yĩnga.’ Maan-kʋʋdbã kãsem sẽn da ‘kẽed zĩ-sõng n yɩɩdã pʋgẽ wã’ ra makda rẽ.—HEBRE DÃMBA 9:24-28.

ZĨ-SÕNG N YƖƖDÃ

Saasẽ.—HEBRE DÃMBA 9:24.

3 Maan-kʋʋdbã kãsem sã n kẽ zĩ-sõng n yɩɩdã pʋgẽ, a yãkda maoongã zɩɩm n mes kãabg-koglgã taoore.—MAANKƲƲRE 16:12-14.

3 A Zezi sẽn tɩ wilg Wẽnnaam a zɩɩmã sẽn daagã yõodã, a tʋma paasg tʋʋm-kãseng tõnd yel-wẽnã yĩnga.—HEBRE DÃMBA 9:12, 24; 1 PƖƐƐR 3:21, 22.