A Zeova daarã sẽn na n puk bũmb ninsi
A Zeova daarã sẽn na n puk bũmb ninsi
“Zusoabã daar na n waa wa wagdre. La . . . tẽngã ne tʋʋmã fãa sẽn be a zugã na n [pukame, NW].”—2 PƖƐ. 3:10.
1, 2. a) Wãn to la dũni kãngã na n sa? b) Sogs-bʋs la d na n leoke?
BŨMB nins sẽn maand dũni kãngã pʋgẽ wã wilgdame t’a nebã tagsdame tɩ b tõe n sooga b mense, la b rɩ naam b taabã zut tɩ zemse, n pa bao a Zeova sor-wilgr ye. La woto yaa ziri fasɩ! (Yɩɩl 2:2, 3) Rẽ yĩnga ziri tõe n solgame tɩ pa wa puk sɩda? Abada! Baasgo, d pa segd n tẽ tɩ dũniyã na n wa sãama a toor ye. Yaa Wẽnnaam n na n sãam-a. A zoe n yãka a wakate, la a sẽn na n maan to-to n sãam-a wã me. Wẽnnaam sẽn na n sãam dũni-wẽn-kãngã wã na n wilgame t’a sɩd yaa tɩrga, la t’a nonga nebã.—Yɩɩl 92:8; Yel. 2:21, 22.
2 Tʋm-tʋmd a Pɩɛɛr yeela woto: “Zusoabã daar na n waa wa wagdre. La baraare, saasã na n looga ne bʋr-kãsenga, la dũniyã bũmb fãa na n wɩnga wʋsg n yẽnege, la tẽngã ne tʋʋmã fãa sẽn be a zugã na n [pukame, NW.]” (2 Pɩɛ. 3:10) Bõe la b sẽn boond tɩ “saasã” la “tẽngã”? “Bũmb fãa” sẽn na n yẽnegã yaa bõe? La a Pɩɛɛr sẽn yeel tɩ ‘tẽngã ne tʋʋmã fãa sẽn be a zugã na n pukame’ wã võor yaa bõe? Tara yõod tɩ d bãng sogs-kãensã leoore, bala na n sõnga tõnd tɩ d segl d mens n gũ yel-kãensã sẽn sek yɛɛsgã sẽn na n maan ka la bilfã.
Saasã la tẽngã sẽn na n loogã yaa bõe?
3. Bõe la 2 Pɩɛɛr 3:10 sẽn bool tɩ “saasã,” la wãn to la a na n looge?
3 Biiblã sã n wa gomd ‘saas’ yelle, mi n yaa goosneema rãmb yell la a gomda, bala b sẽn so nin-buiidã, yaa wa b sẽn zẽk n be yĩngri. (Ezai 14:13, 14; Wil. 21:1, 2) Rẽnd ‘saas ning sẽn na n loogã’ yaa ãdem-biisã goosneema rãmbã sẽn so dũni kãngã nebã sẽn pa mi Wẽnnaamã. B sẽn yeel tɩ b na n looga ne “bʋr-kãsenga” wilgdame tɩ b na n menes-b-la zĩig pʋgẽ.
4. Bõe la b sẽn boond tɩ “tẽngã,” la wãn to la a na n sãame?
4 Yaa ãdem-biis nins sẽn pa maand Wẽnnaam daabã fãa sẽn naag taaba, la b sẽn boond tɩ “tẽngã” bɩ “dũniyã.” Dũni a woto buud ra zĩnda a Nowe wakatẽ wã, tɩ Wẽnnaam kɩt tɩ sa-kãsengã sãam-a. Tʋm-tʋmd a Pɩɛɛr yeela woto: “Yĩngr la dũniyã sẽn be masã wã bĩnga bugum yĩnga, bʋʋd kaoobo, la wẽn-kɩɩsdbã sãoong daar sẽn na n ta wã.” (2 Pɩɛ. 3:7) Sa-kãsengã sasa, yɩɩ wakat yɛng la b naag nin-wẽnsã fãa n sãame. La “to-kãsengã” sasa, sãoongã pa na n yɩ wakat yɛng yell ye. (Wil. 7:14) Wẽnnaam na n deng n kɩtame tɩ nanambsã sãam “Babilon kãsengã.” Woto na n kɩtame tɩ b bãng t’a sũur pa tol n noom ne tũudum nins sẽn belgd nebã, a sẽn mak ne pʋg-yoodrã ye. (Wil. 17:5, 16; 18:8) Rẽ poor la Armagedõ zabrã sẽn na n baas to-kãsengã na n sɩnge. Wakat kãng la a Zeova na n menes a Sʋɩtãan dũniyã bũmb nins fãa sẽn ketã.—Wil. 16:14, 16; 19:19-21.
‘Bũmb fãa sẽn na n yẽnegã’ yaa bõe?
5. ‘Bũmb fãa sẽn na n yẽnegã’ yaa bõe?
5 Bũmb nins fãa sẽn na n yẽnega yaa bõe? A Pɩɛɛr sẽn bool tɩ “bũmb fãa” wã yaa bũmb nins fãa sẽn kɩt tɩ Wẽnnaam sũur pa noom ne dũni kãngã wã, rat n yeel t’a nebã manesmã, b tʋʋmã la b ratem buud toor-toorã. “Dũniyã sɩɩgã” bɩ yam ning dũniyã nebã sẽn tarã, sẽn “tʋmd zãgsdbã fãa” pʋsẽ wã me naaga a Pɩɛɛr sẽn bool tɩ “bũmb fãa” wã sʋka. (1 Kor. 2:12; Karm-y Efɛɛz dãmb 2:1-3.) Yam kãng buii dũniyã nebã wa pemsem. A kɩtdame tɩ nebã tagsgo, b magbo, b goamã la b tʋʋmã wõnd a Sʋɩtãan rẽndã. Bala yaa yẽ n ‘tar noor ne yĩngr yɛlã,’ tɩ d yaool n mi t’a yaa wuk-m-meng soab la kɩɩsda.
6. Dũniyã sɩɩgã bɩ a yamã kɩtdame tɩ nebã maand bõe?
6 Rẽnd neb nins sẽn tar dũniyã yamã mi tɩ b pa mi me, yaa a Sʋɩtãan n so-ba, n kɩtdẽ tɩ b sũyã tagsg la b tʋʋmã wõnd yẽ rẽndã. Woto kɩtame tɩ b maand b yam, n pa tagsd Wẽnnaam daabã yell ye. Bũmb fãa pʋgẽ, b zẽkda b mens la b baood b mens nafr bala. B kɩɩsda pãn-soaadbã, la b pʋgd ‘yĩngã ratem wẽnsã la ninã ratem wẽnsã.’—Karm-y 1 Zã 2:15-17. *
7. Bõe yĩng tɩ d segd n ‘gũus ne d sũyã tagsgo’?
7 Woto yĩnga, tara yõod wʋsg tɩ d ‘gũus ne d sũyã tagsgo.’ La rẽ maaneg baoodame tɩ d tũud Wẽnnaam noyã bũmb fãa pʋgẽ. Wala makre, zo-rãmbã yãkr wɛɛngẽ, sɛb nins d sẽn karemdã, reemã buud toor-toorã, la ẽntɛrnetã yɛlã wɛɛngẽ. (Yel. 4:23) Tʋm-tʋmd a Poll yeela woto: “Bɩ y gũus neer tɩ ned da sãam yãmb ne ninsaalb bãngr la b belgr sẽn ka yõodo, sẽn yaa ninsaalbã minund sẽn yaa dũniyã rẽnda, la ka Kirist rẽndã ye.” (Kol. 2:8) Sẽn mik t’a Zeova raarã kolgdame wã yĩnga, tara yõod wʋsg tɩ d tũ sagl-kãngã. Bala a Zeova sũ-puugrã sasa, dũni kãngã “bũmb fãa” na n yẽnegame n sãame. Woto tẽegda tõnd Malaki 3:19 sẽn yetã. Be b yeela woto: “Raar n wat n yaa wa bugum. Tɩ tɩtaam dãmbã ne neb nins sẽn maand wẽngã na n yɩ wa mo-koeemse, t’a rɩ bãmb n ka bas b yẽgã bɩ b wilã ye.”
Tẽngã ne tʋʋmã fãa sẽn be a zugã na n pukame
8. ‘Tẽngã ne tʋʋmã fãa sẽn be a zugã na n pukame’ wã rat n yeelame tɩ bõe?
8 A Pɩɛɛr sẽn yeel tɩ “tẽngã ne tʋʋmã fãa sẽn be a zugã na n [pukame, NW]” wã rat n yeelame tɩ bõe? A Pɩɛɛr gomdã rat n yeelame tɩ to-kãsengã sasa, a Zeova na n vẽnega bũmb nins fãa sẽn be a Sʋɩtãan dũniyã pʋgẽ wã, n kɩt tɩ nebã bãng tɩ bõn-kãensã zemsa ne sãoongo, b sẽn kɩɩsd yẽ ne a Rĩungã yĩngã. A Ezai ra reng n goma rẽ yelle. Ezai 26:21 yeta woto: “Zusoabã na n yii b zĩigẽ wã n wa sɩbg dũniyã rãmb b tʋʋm-wẽnsã yĩnga. Tẽngã na n yiisa zɩɩm ning sẽn da raag a zugã, la a ka na n le lud neb nins bãmb sẽn da kʋ wã ye.”
9. a) Bõe la d segd n kisgi, la bõe yĩnga? b) Bõe la d segd n modg n bao, la bõe yĩnga?
9 A Zeova daarã sasa, neb nins sẽn bas tɩ dũniyã ne a tags-wẽnsã soog-bã na n puka b zʋgã tɩ yɩ vẽenega, hal n kʋ taab menga. Sɩd me, tõe tɩ nen-kɛglem reem buud toor-toorã sẽn pid dũniyã rũndã-rũndã wã yaa sẽn na yɩl tɩ neb wʋsg sũy kʋɩ, tɩ yɩ wa b sẽn segend b mens wakat ning b sẽn na n “zab taabã” yĩnga. (Zak. 14:13) Woto yĩnga, sɩd tara yõod wʋsg tɩ d kisg filim dãmba, sɛba, ze-video rãmba, la bũmb nins fãa sẽn tõe n wa kɩt tɩ d tall zʋg sẽn pa noom Wẽnnaam. Wala makre, d sã n wa nong nen-kɛglem ne wuk-m-menga. (2 Sãm. 22:28; Yɩɩl 11:5) D pʋd n segd n modgame n bao zʋg-sõma nins Wẽnnaam vʋʋsem sõngã sẽn kõtã, bala yaa zʋg-sõma kãens n na n sõng tõnd tɩ d põs a Zeova sũ-puugrã.—Gal. 5:22, 23.
“Yĩngr paalgã” la “tẽn-paalgã” yaa bõe?
10, 11. “Yĩngr paalgã” la “tẽn-paalgã” yaa bõe?
10 Karm-y 2 Pɩɛɛr 3:13. “Yĩngr paalgã” yaa Wẽnnaam Rĩungã sẽn be saasẽ wã. B lugl-a-la yʋʋmd 1914 soabã pʋgẽ, sasa ning “bu-zẽmsã wakat” sẽn ta a tɛkã. (Luk 21:24) Yaa a Zezi Kirist ne a na-rɩt-n-taas 144 000 n na n soog Rĩung-kãngã. A na-rɩt-n-taas kãensã wʋsg zoe n paama b keoorã n be saasẽ. Wilgr sebrã pʋga, b maka nin-kãensã sẽn naag taabã ne “tẽn-sõngo,” b sẽn bool tɩ ‘Zerizalɛm paalga, sẽn yit saasẽ Wẽnnaam nengẽ n sigda, n wẽnd wa pʋg-paal sẽn segl n na n seg a sɩda.’ (Wil. 21:1, 2, 22-24) Pĩnd Zerizalɛmmã ra yaa Israɛll na-tẽngã, zĩig ning b goosneema wã sẽn da be wã. Woto me, Zerizalɛm paalgã b sẽn mak ne pʋg-paalã ne a sɩdã n yaa goosneema ning sẽn na n wa rɩ naam dũni paalgã pʋgẽ wã. B sẽn yeel t’a yita saasẽ n sigdã rat n yeelame bal tɩ yẽ n na n soog tẽngã n ges a yelle.
11 “Tẽn-paalgã” yaa nin-tɩrsã sẽn na n vɩɩmd tẽngã zug Wẽnnaam Rĩungã naam sasa wã, rat n yeel tɩ neb nins sẽn wilg tɩ b bee a naamã poorẽ wã. Rũndã-rũndã, Wẽnnaam zoe n ningda a nin-buiidã bark wʋsgo, hal tɩ yaa wa b bee arzãn pʋgẽ. La yaa “dũni ning sẽn watã” pʋgẽ la b na n sɩd paam tɩ tẽngã tõr lebg arzãna. (Heb. 2:5) Bõe la d tõe n maan n wa paam n vɩɩmd dũni paalgã pʋgẽ?
Segl-y y meng n gũ a Zeova ra-kãsengã
12. Bõe yĩng t’a Zeova raarã na n ling dũniyã nebã?
12 A Poll ne a Pɩɛɛr fãa reng n togsame t’a Zeova raarã na n waa “wa wagdre,” rat n yeel tɩ wakat ning d sẽn pa tẽede. (Karm-y 1 Tesalonik rãmb 5:1, 2.) Baa ne kiris-neb hakɩkã sẽn gũud ra-kãngã wã, a waoongã na n yɩɩ zĩig pʋgẽ, n ling-ba. (Mat. 24:44) La dũniyã nebã la a na n ling n yɩɩda. A Poll yeela woto: “Wakat ning nebã [rat n yeel tɩ sẽn pa maand-b a Zeova raabã] sẽn na n yeel tɩ laafɩ la yĩn-maasmã, wakat kãng bala, toog na n paama bãmb wa toog sẽn yõkd pag sẽn tʋta, la bãmb kõn põs ye.”—1 Tes. 5:3.
13. Bõe n na n sõng tõnd tɩ “laafɩ la yĩn-maasmã,” b sẽn na n wa yeelã ra tõog n belg-do?
13 B sẽn na n wa yeel tɩ “laafɩ la yĩn-maasmã” yaa ziri. Yaa gomd sẽn naag ziri goam nins sẽn yit zĩn-dãmbã nengẽ wã, la rẽ pa na n tõog n belg a Zeova nin-buiidã ye. Sɩd me, a Poll yeela woto: “M ba-biisi, yãmb ka be lik pʋgẽ tɩ da-kãng na n ling yãmb wa wagdr ye. Yãmb fãa yaa vẽenem kamba, la wĩntoog kamba.” (1 Tes. 5:4, 5) Woto yĩnga, bɩ d kell n pa vẽenemã pʋgẽ, n zãag ne lik ning sẽn be a Sʋɩtãan dũniyã pʋgẽ wã. A Pɩɛɛr sagla kiris-nebã tɩ b gũus ne neb nins sẽn dat n zãms tigingã neb sẽn pa sɩdã, la a paas woto: ‘Mam zo-nongdse, yãmb sẽn deng n bãng bõn-kãensã, bɩ y gũus neer tɩ [ziri karen-saam dãmb nins sẽn kẽ tigingã pʋgẽ wã,] ne wẽn-kɩɩsdbã tʋʋm-wẽnsã ra vigs yãmb ye.’—2 Pɩɛ. 3:17.
14, 15. a) Bõe la a Zeova maan tɩ wilgdẽ t’a nong-d lame la a nand-do? b) Keoog-bʋs la d pa segd n yĩmi?
14 A Zeova pa yeel bal tɩ d “gũus neer” ye. A sẽn nong tõnd la a nand-dã yĩnga, a kɩtame tɩ d “deng n bãng” bũmb nins sẽn na n zĩnd ka la bilfã kẽere.
15 Zu-bʋko, baa ne b sẽn keoogd tõnd tɩ d modg n gũ wã, neb kẽer baas n maanda b toor kae, wall b pʋd n yetẽ tɩ pa sɩd ye. Tõe tɩ b yeta woto: “Yʋʋm a wãn masã la b sẽn sɩng n yetẽ tɩ d gũ wã!” La ned sã n tagsd woto, a segd n tẽegame tɩ pa tʋm-tʋmd sẽn tũud sɩd la sẽn tar yamã bal la a wɩt ye. Gom kãensã wilgdame t’a pa kɩs a Zeova ne a bi-riblã sɩd ye. A Zeova meng yeela woto: ‘Bɩ y gũ.’ (Hab. 2:3) A Zezi me yeelame: “Bɩ yãmb gũus tɩ yãmb ka mi daar ning yãmb Zusoabã sẽn na n wa ye.” (Mat. 24:42) A Pɩɛɛr me yeelame tɩ d segd n yɩɩ neb “yel-manesem sẽn yaa sõma, la sẽn sakd Wẽnnaam n gũud bãmb daarã ne datem kãsenga.” (2 Pɩɛ. 3:11, 12) Tʋm-tʋmd sẽn tũud sɩd la sẽn tar yamã ne a Siglgã taoor lʋɩtbã Sull pa na n tol n deem ne keoog-kãensã ye.
16. Tags-bʋg la d pa segd n talle, la bõe yĩnga?
16 Biiblã wilgame tɩ yaa “tʋm-tʋmd wẽngã” n na n wa yeel t’a Zusoabã kaoosda waoongo. (Mat. 24:48) Tʋm-tʋmd wẽngã naaga neb nins yell b sẽn gomd 2 Pɩɛɛr 3:3, 4 pʋgẽ wã. Be, a Pɩɛɛr yeelame tɩ “yaoolem wakate, neb sẽn laad neba,” la sẽn “sakd bãmb mens wẽng ratmã na n zĩndame,” la tɩ b na n yaala neb nins sẽn wilgd tɩ b gũuda a Zeova raarã. Sɩd-sɩda, nin-kãensã pa lʋɩɩsd Wẽnnaam Rĩungã yɛl taoor ye. Yaa b mensã, la b raab toɛy-toɛyã yell bal n pʋd n pak-ba. Bɩ d ra tol n tall nin-kãensã tagsgã la b yamã buudu, bala, na n wã-d lame! Wall tɩ d maan woto wã, d wilg tɩ d miime ‘tɩ Zusoabã sẽn maand sũ-marã yaa tõnd fãagr yĩnga,’ n wɩngd ne koɛɛgã mooneg la karen-biisã maanego, la d ra maand yɩɩr tɩ loog noor ne yel-kãensã sẽn na n wa wakat ningã ye. Bala yaa a Zeova a ye bal n mi rẽ.—2 Pɩɛ. 3:15; Karm-y Tʋʋm 1:6, 7.
Kɩs-y Wẽnnaam sẽn yaa fãagdã sɩda
17. Pipi kiris-nebã manesem yɩɩ wãn ne a Zezi saglgã, la bõe yĩnga?
17 Rom sodaasã sẽn wa n gũbg Zida yʋʋmd 66 a Zezi rogmã poorã, kiris-neb hakɩkã tũ a Zezi saglgã, n zoe n yi Zerizalɛm tao-tao. (Luk 21:20-23) Bõe yĩng tɩ b yãk yam tao-tao n zoe n yi? Sãmbg kae tɩ yaa b sẽn pa yĩm a Zezi saglgã yĩnga. Yaa vẽeneg tɩ b ra miime tɩ wa a Zezi sẽn da zoe n yeelã, zoeesã ra pa na n yɩ nana ye. La b ra miime me t’a Zeova pa na n tol n bas neb nins sẽn sakd yẽ wã ye.—Yɩɩl 55:23.
18. A Zezi goam nins sẽn be Luk 21:25-28 wã kɩtame tɩ yãmb tar tags-bʋg to-kãsengã zugu?
18 Tõnd me segd n kɩsa a Zeova sɩd ne d sũy fãa, bala, to-kãseng ning sẽn ka to wã sẽn watã sasa, yẽ bal n tõe n fãag tõndo. To-kãsengã sɩngr poore, la nand tɩ wakat ning a Zeova sẽn yãk n na n menes a Sʋɩtãan dũniyã bũmb nins fãa sẽn ketã ta, “nebã sũy na n lebga yog-yog rabeem yĩnga, b sẽn gũud bũmb nins sẽn na n wa dũniyã zugã yĩnga.” La a Zeova bɛɛbã sã n wa rigd rabeem, a nin-buiidã pa na n yɛɛs wa bãmb ye. B pʋd n na n maana sũ-noogo, b sẽn mi tɩ b fãagrã ta n saame wã yĩnga.—Karm-y Luk 21:25-28.
19. Bõe yell la sõsg ning sẽn pʋgdã na n gome?
19 Ad neb nins sẽn pa basd tɩ dũniyã ne ‘bũmb nins fãa’ sẽn be a pʋgẽ wã soog-bã sẽn na n wa paam keoor ning beoog-daarã sɩd bee yamleoogo! La wala sõsg ning sẽn pʋgdã sẽn na n wilgã, pa d sẽn na n bas wẽng maaneg bal la d na n wa paam vɩɩm sẽn kõn sa wã ye. D segdame me n mao n paam zʋgd sẽn noom a Zeova, la d tʋmd tʋʋm sẽn tat a yam.—2 Pɩɛ. 3:11.
[Tẽngr note]
^ sull 6 Y sã n dat n bãng dũni kãngã yamã sẽn kɩtd tɩ nebã maand bũmb ninsã n paase, bɩ y ges Comment raisonner à partir des Écritures sebrã neng 140-143.
Y tõe n wilga a võor bɩ?
• ‘Saasã la tẽngã sẽn na n loogã’ yaa bõe?
• Dũniyã “bũmb fãa” wã yaa bõe?
• “Yĩngr paalgã” la “tẽn-paalgã” yaa bõe?
• Bõe yĩng tɩ d kɩs Wẽnnaam sɩd ne d sũy fãa?
[Study Questions]
[Foto, seb-neng 17]
Wãn to la y tõe n ‘gũus ne y sũurã tagsgo,’ n da yɩ dũniyã rẽnda?
[Foto, seb-neng 18]
Wãn to la d tõe n wilg tɩ d miime tɩ ‘Zusoabã sẽn maand sũ-marã yaa tõnd fãagr yĩnga’?