Tʋm-y tigisgã tʋʋmd ne y sũur fãa
Tʋm-y tigisgã tʋʋmd ne y sũur fãa
“Bɩ y maan Zusoabã tʋʋmd wʋsgo”—1 KOR. 15:58.
1. Bõe la a Zezi sagl a karen-biisã tɩ b maane?
YƲƲMD 30 soabã baasg sẽnese, daar a yembr a Zezi sẽn da wa n pɩʋʋgd Samari soolmã, a taa tẽng a ye b sẽn boond tɩ Sɩkaar n tek n zomb bulg noor n na n vʋʋse. Be, a yeela a karen-biisã woto: “Bɩ y zẽk y nens n ges pʋtã, tɩ bõe, bãmb pelgame n ta tigsg masã.” (Zã 4:35) Pa kood tigsg yell la a Zezi sẽn gomã ye. Yaa neb nins fãa sẽn yaa pʋ-peelem dãmba, n da tõe n wa lebg a karen-biisã tigsg yell la a sẽn gomã. A gomdã yaa saglga. A ra sagenda a karen-biisã tɩ b tʋm tigsgã tʋmd ne b sũy fãa. Tʋʋmdã ra yaa wʋsgo, tɩ sẽkã yaool n da paoodẽ!
2, 3. a) Bõe n wilgd tɩ masã sɩd yaa tigisg wakate? b) Bõe yell la sõs-kãngã na n gome?
2 Tigisg ning yell a Zezi sẽn gomã lebga tʋʋm-yãgdem rũndã-rũndã. Bala dũniyã b sẽn mak ne pʋʋgã sɩd “pelgame n ta tigsgu.” Yʋʋmd fãa, yaa neb milyõ rãmb la b taasd Biiblã koɛɛg sẽn kõt vɩɩmã, tɩ kɩtdẽ tɩ neb tusa reegd lisg n lebgd karen-biisi. Tõnd sẽn paam n naag n tʋmd tʋʋm-kãngã sẽn pa tar to, tɩ Wẽnnaam a Zeova sẽn yaa tigisgã soabã wilgd-d sorã, sɩd yaa zu-zẽkr n kõ-do. Rẽ yĩnga, yãmb tʋmda tʋʋm-kãngã wʋsg bɩ?—1 Kor. 15:58.
3 A Zezi koe-moonegã sẽn kaoos yʋʋm a tã la pʋɩ-sʋkã sasa, a zãmsa a karen-biisã tʋʋmdã neere. Sõs-kãngã na n goma sagl-sõma nins a Zezi sẽn kõ-b tʋʋmdã wɛɛngẽ wã a tãab yelle. Saglg fãa wilgda zʋg-sõng ning d sẽn segd n mao n talle, tɩ sõng-d rũndã-rũndã tɩ d tõog n maan d sẽn tõe fãa n tigis karen-biisã. D na n goma zʋg-sõma kãens yell ball-balle.
Sik-m-meng yaa tɩlae
4. Wãn-wãn la a Zezi wilg tɩ sik-m-meng yaa tɩlae?
4 Tags-y n ges-y yɛlã sẽn yɩ to-to, daar ning a Zezi karen-biisã sẽn tʋlg n na n bãng ned ning sẽn yaa-a kãseng n yɩɩd b sʋka, tɩ wa ne no-koeemdã. Rẽ poore, a Zezi boola bi-bilf t’a wa yals b sʋkã. Wõnda wakat kãng tɩ b ned kam fãa sũur da ket n zabdame. La a Zezi tees-b-la biigã n yeel-b woto: ‘Ned ninga fãa sẽn na n sik a meng wa bi-kãngã, a na n yɩɩ kãseng n yɩɩd saasẽ soolmã pʋgẽ.’ (Karm-y Matɩe 18:1-4.) Karen-biisã pa segd n tags wa dũniyã rãmb tɩ ned naam, a tarem wall a yʋʋr sẽn yi yĩng kɩtdame t’a yɩɩd a taabã ye. Yaa b ned kam fãa ‘sẽn na n sikd a meng’ a taabã taoor la a yɩt kãsma. Karen-biisã sã n dat a Zeova barka, yaa tɩlae tɩ b wilgdẽ tɩ b sɩd yaa sik-m-mens rãmba.
5, 6. Bõe yĩng tɩ d yetẽ tɩ sẽn na yɩl n tõog n wɩsg d mens n tʋm tigisgã tʋʋmde, d segd n yɩɩ sik-m-mens rãmba? Rɩk-y makre.
5 Hal ne rũndã, neb wʋsg rɩkda b vɩɩmã tõr n baood naam, ligd la yʋʋre. Woto kɩtame tɩ b pa tar sẽk n na n bao n bãng Wẽnnaam la b maan a raabã ye (Mat. 13:22) La a Zeova nin-buiidã ‘sikda b mens’ b taabã nifẽ ne yamleoogo, sẽn na yɩl n paam n ta tigsgã soab yam.—Mat. 6:24; 2 Kor. 11:7; Fil. 3:8.
6 Kelg-y d saam-biig a Francisco sẽn yaa kãsem soab Amerikdisiidã kibare. A bi-bɩɩlem wakate, a sẽn wa n be inivɛrsite wã, a basa a karengã n lebg so-pakda. Ad a sẽn yeele: “Mam sẽn wa n segend m meng n na n kẽ kãadmã, m da tõe n paama tʋʋmd sẽn na n kɩt tɩ maam ne m pagã paam ligd wʋsgo. La d yãka yam n na n bas bõn-kãsems baoobo, sẽn na yɩl n tõog n kell n pa so-pakrã pʋgẽ. Kaoosg zugẽ tõnd wa n doga kamba, tɩ kɩt tɩ d zɩɩbã paase. La a Zeova sõnga tõnd tɩ d sɩd tõog n kell n pa bao bõn-kãsems ye.” A Francisco paasa woto: “Yaa hal sẽn yɩɩd yʋʋm 30 woto masã la mam sẽn yaa kãsem soaba. Rẽ toor sẽn ka be, mam paama tʋʋm-kãsems a taab Wẽnnaam nin-buiidã sʋk n tʋme. Hakɩka, tõnd zɩ n maan d bãngẽ baa bilfu, d sẽn sak n bas bõn-kãsems baoobã ye.”
7. Yãmb zoe n maka Rom dãmb 12:16 saglgã tũub bɩ? La wãn to la naf-yã?
7 Y sã n sak n bas dũniyã “bõn-kãsemsã” baoob la y sak t’a ‘bõn-talsã sek-yã,’ y me tõe n wa paamame tɩ b bobl-y tʋʋm-kãsems tigisgã tʋʋmd pʋgẽ.—Rom 12:16; Mat. 4:19, 20; Luk 18:28-30.
Yẽesem wata ne bark toor-toore
8, 9. a) Kʋms-y-yã a Zezi yel-bũnd ning sẽn gomd talã rãmb yellã. b) Sẽn yɩɩd fãa, yaa ãnd rãmb daood la yel-bũndã tõe n kenge?
8 Zʋg-sõng a to d sẽn segd n tall tɩ sõng-d tigisgã tʋʋmd pʋgẽ yaa yẽesem. A Zezi yel-bũnd ning sẽn gomd talã rãmb yellã sɩd wilgdame tɩ yẽesem tara yõodo. * Yel-bũn-kãng pʋgẽ, a goma rao a ye sẽn bobl a paoong a tʋm-tʋmdb a tãab n bas n tog sor yelle. Raoã kõ a pipi tʋm-tʋmdã talã a nu, yiib-n-soabã talã a yiibu, la a kõ tãab-n-soabã talã a yembre. Tʋm-tʋmdbã zu-soabã loogr poore, pipi tʋm-tʋmdã la yiib-n-soabã rɩka b talã rãmbã n leeb n paam yõodo. La tãab-n-soabã yɩɩ “kʋɩɩma.” A rɩka a talã wã n tu n busi. B zu-soabã sẽn lebg n wa wã, a keoa pipi tʋm-tʋmdã la yiib-n-soabã, n kɩt tɩ b “soog bũmb wʋsgo.” La a reega tãab-n-soabã talã a yembrã, la a rig-a n yiis a zakẽ wã.—Mat. 25:14-30.
9 Sãmbg sẽn ka be, y tʋll n dɩka a Zezi yel-bũndã pʋgẽ tʋm-tʋmdb a yiibã sẽn tall yẽesmã togs-n-taare, n wɩsg y mens n maan karen-biisã wa y sẽn tõe tɛka. La yɛl toor-toor sã n kɩtame tɩ y pa le tõe n tʋm tʋʋmdã wʋsg wa pĩndã yẽ? Tõe tɩ lebga tɩlae tɩ y rɩk sẽk wʋsg n tʋm n tõog n paam ligd n ges y zakã rãmb yelle. Kʋʋlem me tõe n kɩtame tɩ y pa le kɛgem wa pĩndã ye. Sã n yaa rẽ, talã rãmbã kibar tara sagls sẽn tõe n keng y raoodo.
10. Yel-bũndã pʋgẽ, bõe la tʋm-tʋmdbã zu-soab maan tɩ wilgdẽ t’a miime tɩ b pãn-tõogã pa yembre, la bõe yĩng tɩ rẽ kengd y raoodo?
10 Gũus-y n ges-y tɩ yel-bũndã pʋgẽ, tʋm-tʋmdbã zu-soabã ra miime tɩ b pãn-tõogã pa yembr ye. A sẽn “kõ ned kam fãa sẽn zems-a” wã sɩd wilgda rẽ. (Mat. 25:15) Sɩd me pipi tʋm-tʋmdã paama yõod n yɩɩg yiib-n-soabã. La baasgo, b zu-soabã pẽga b yiibã fãa, b sẽn tʋm ne yẽesmã yĩnga, n yeel b ned kam fãa t’a yaa “tʋm-tʋmd-sõngo sẽn maand sɩda.” Sẽn paase, b yiibã fãa paama keoor a ye. (Mat. 25:21, 23) Wẽnnaam a Zeova sẽn yaa tigisgã soabã me miime tɩ yɛl toor-toor tõe n kɩtame tɩ y pa tõe n tolg n tʋm a tʋʋmdã wa y sẽn datã ye. Baasgo, a ne modgr ning y sẽn maandã, la a na n keo-y lame.—Mark 14:3-9; karm-y Luk 21:1-4.
11. Rɩk-y makr n wilg tɩ baa yɛl sã n kɩt tɩ pa nana ne-do, d sã n kell n tall yẽesem, d paamda barka.
11 Berzill saam-bi-poak a ye yʋʋr sẽn boond t’a Selmira makrã sɩd wilgdame tɩ baa d yɛlã sẽn yaa to-to fãa, d tõe n tʋma Wẽnnaam tʋʋmdã ne yẽesem. Yʋʋm pisi woto sẽn looge, wagda n tão a Selmira sɩdã ne bug-raoog t’a maan yõore, n bas-a ne kom-bõoneg a tãabo. A Selmira tʋmda zak a ye pʋgẽ t’a tʋʋmã rɩkd sẽk wʋsgo. Sẽn paase, zĩigã zãrame tɩ yɩl n kẽnge, yaa tɩlae t’a kẽ bis sẽn pit ne neba. La baa woto fãa sẽn kɩt tɩ pa nana ne a Selmira wã, a sigla a sẽkã sõma n tõog n lebg wakat fãa so-pakda. Kaoosg zugẽ, a kamb a tãabã sʋka, b yiib n wa n lebg so-pakdba. Ad a Selmira sẽn yeele: “Hal n tãag masã, sẽn yɩɩd neb 20 la mam zãms Biiblã tɩ b lebg wa mam doagdba. B yaa mam zo-rãmb sẽn nong-m hal wʋsgo. Woto yaa paoong buud yõod sẽn ka to ligd sẽn pa tõe n da.” Yaa vẽeneg tɩ tigisgã soab ninga a Selmira yẽesmã barka!
12. Bõe la d tõe n maan n tõog n moona koɛɛgã ne yẽesem?
12 Baa yɛl kẽer sã n kɩtame tɩ y pa tõe n paam sẽk wʋsg n moon koɛɛgã, y tõe n kell n mao n tʋma tʋʋmdã wa y sẽn tõe tɛka, n modgd n paasd y koe-moonegã sõmblem. Y sã n tũud sagls nins b sẽn kõt semen fãa tʋʋmdã tigisgẽ wã, y na n tõog n paasa y moonegã minim la y bãng y sẽn tõe n maan to-to n paamd segb a taab n kõt kasetã. (2 Tɩm. 2:15) Sẽn paase, y sã n tõe bɩ y bas yɛl kẽer yõod sẽn pa waoog maanego, wall y toeem y sẽn maand-b wakat ningã, n paam n tõog n naagd tigingã n moond koɛɛgã sasa nins b sẽn yãk moonegã yĩngã.—Kol. 4:5.
13. Sẽn yɩɩd fãa bõe n na n sõng-y tɩ y tʋm tʋʋmdã ne yẽesem?
13 Tẽeg-y tɩ yaa ned sẽn na n nong Wẽnnaam ne a sũur fãa la a tʋmd a tʋʋmdã ne yẽesem. (Yɩɩl 40:9) A Zezi yel-bũndã pʋgẽ, tʋm-tʋmd a tãab-n-soabã ra zoeta a zu-soabã, n get-a wa nin-toaaga. Rẽ n so t’a tõdg a na rɩk a talã wã n leeb n paam yõodo, n dɩk-a n tɩ tu n busi. Sẽn na yɩl n da wa tags wa nin-kãngã, rẽnda d bao zood sõma ne a Zeova sẽn yaa tigisgã soabã, la d mao n nong-a wʋsgo. Bao-y sẽk n zãmsd Biiblã la y bʋgsd a Zeova sẽn yaa Wẽnnaam ning buudã zugu, rat n yeel tɩ y tagsd a nonglmã, a sũ-marã la a nimbãan-zoeerã yelle. Y sã n maand woto, na n sõng-y lame tɩ y tõog n tʋm a tʋʋmdã ne y sũur fãa.—Luk 6:45; Fil. 1:9-11.
Yãmb segd n yɩɩ yɩlma
14. Tigisdbã fãa segd n yɩɩ nin-bʋs buudu?
14 Tʋm-tʋmd a Pɩɛɛr tẽega Biiblã babg ning b sẽn da gʋls ne hebre wã goama, n wilg Wẽnnaam sẽn dat t’a nin-buiidã yɩ to-to wã, n yeele: “Wala sẽn bool-a yãmbã sẽn yaa Sõmblem naabã, y me yɩ sõma, y manesem fãa pʋgẽ, tɩ yaa woto la b gʋls-yã: ‘Yɩ-y sõma tɩ mam mengã yaa sõngo.’ ” (1 Pɩɛ. 1:15, 16, Sebr Sõngo; Maan. 19:2; Tõo. 18:13) Gom-kãensã wilgdame tɩ tigisdbã fãa segd n yɩɩ yɩlem Wẽnnaam nifẽ, b vɩɩmã nens fãa pʋsẽ. Woto baoodame tɩ d maan yɛl toor-toore. Wãn to la d tõe n maan dẽ? Yaa Wẽnnaam goamã sẽn yaa sɩdã n na n sõng-do.
15. Bõe la Wẽnnaam goamã sẽn yaa sɩdã tõe n maan tõndo?
15 Wẽnnaam goamã sẽn yaa sɩdã tõe n yɩlga ned wa koom. Wala makre, tʋm-tʋmd a Poll yeelame tɩ kiris-neb nins sẽn paam vʋʋsem sõng zaeebã yaa yɩlem Wẽnnaam nifẽ, wa pʋg-paal sẽn nan pa mi raoa, Kiristã sẽn so, la a sẽn pek ‘wa b sẽn pek bũmb ne koom, la ne Wẽnnaam goamã . . . , tɩ rẽgd wall yõbd ra zĩnd ye.’ (Ef. 5:25-27) Nand t’a Poll wa yeel woto, a Zezi me ra wilgame tɩ Wẽnnaam goamã yẽ sẽn togsdã sɩd tõe n yɩlga neda. A ra yeela a karen-biisã woto: “Masã yãmb yaa yɩlma, goam ninga mam sẽn da gom ne yãmbã yĩnga.” (Zã 15:3) Dẽnd Wẽnnaam goamã sẽn yaa sɩdã tõe n kɩtame tɩ d yɩ yɩlem Wẽnnaam nifẽ. Yaa d sã n sak tɩ Wẽnnaam goamã yɩlg-d bala, la d na n tõog n tũ Wẽnnaam tɩ ta a yam.
16. Bõe la d tõe n maan n yɩ yɩlem Wẽnnaam nifẽ?
16 Sẽn na yɩl tɩ Wẽnnaam sak tɩ d naag n tʋm a tigsgã tʋʋmde, d segd n deng n basa bũmb nins fãa sẽn kɩtd tɩ ned yaa rẽgd Wẽnnaam nifẽ wã. D sã n dat t’a Zeova sak tɩ d ket n tʋmd a tʋʋmdã, d segd n pelgda d pʋs n tũud a noyã d vɩɩmã nens fãa pʋgẽ. (Karm-y 1 Pɩɛɛr 1:14-16.) Wa d sẽn modgd n sood koom la d maand yɛl a taab sẽn na yɩl n yɩ yɩlemd yĩngã wɛɛngẽ wã, d segd n modgdame tɩ Wẽnnaam goamã sẽn yaa sɩdã yɩlgd-do. Woto baoodame tɩ d karemd Biiblã la d kẽnd tigissã. Leb n baoodame me tɩ d modgd n tũud Wẽnnaam saglsã. D sã n maand woto, na n sõng-d lame tɩ d tõogd n maood ne d pãn-komsem toor-toorã, la d tõog me n da rɩk dũniyã neb togs-n-taar ye. (Yɩɩl 119:9; Zak 1:21-25) Ad d sũy sɩd yaa noogo, d sẽn mi tɩ baa d sã n da maana yel-wẽn-kãsenga, Wẽnnaam goamã sẽn yaa sɩdã tõe n yɩlg-d lame wã.—1 Kor. 6:9-11.
17. Sẽn na yɩl n kell n yɩ yɩlemde, Biiblã sagl-bʋs la d segd n tũ?
17 Rẽ yĩnga yãmb sakdame tɩ Wẽnnaam goamã sẽn yaa sɩdã yɩlgd-y bɩ? Wala makre, b sã n sagl-y tɩ y gũus y meng ne reem nins fãa sẽn tõe n sãam y tẽebã, y manesem yaa wãna? (Yɩɩl 101:3) Rẽ yĩnga y gũusda y mens ne y karen-bi-taas wall y tʋmd-n-taas nins sẽn pa a Zeova Kaset rãmbã tũub bɩ? (1 Kor. 15:33) Y maooda ne y sũur fãa sẽn na yɩl n tõog y pãn-komsem nins sẽn tõe n kɩt tɩ y yɩ rẽgd a Zeova nifẽ wã bɩ? (Kol. 3:5) Y lakda y mens ne dũni kãngã politikã poorẽ no-koɛɛmã, la a tẽng-n-biilmã yam sẽn pukd ɛspoorã wɛɛngẽ wags-taab toɛy-toɛyã pʋsẽ wã bɩ?—Zak 4:4.
18. Bõe n wilgd tɩ d sã n yaa yɩlem Wẽnnaam nifẽ, d na n woma biis tigsgã tʋʋmd pʋgẽ?
18 Y sã n sakd n tũud sagls nins fãa b sẽn kõt tõnd n na n sõng-d tɩ d ra wa rẽgem d mensã, y na n paama barka. A Zezi ra goma a karen-biis nins sẽn paam vʋʋsem sõng zaeebã yell n mak-b ne viyn tɩɩg wila, n yeel woto: ‘Mam will ninga fãa sẽn ka womd biisi, [m Ba] na n kɛ-a lame n lobe. La will ninga fãa sẽn womd biisi, b na n yos-a lame n maneg-a t’a wom biis n paase.’ (Zã 15:2) Y sã n sakdẽ tɩ Biiblã goam sẽn yaa sɩdã yɩlgd-yã, y na n woma biis n paase.
Y na n paama bark masã la beoog daare
19. Bark bʋs la a Zezi karen-biisã paam tigisgã tʋʋmd pʋgẽ?
19 A Zezi karen-biis nins sẽn sak n tũ bũmb nins fãa a sẽn wilg-bã wa n paama vʋʋsem sõngã yʋʋmd 33 Pãntekotã sasa, tɩ kɩt tɩ b paam daood n moon koɛɛgã tɩ ta “dũniyã tɛk fãa.” (Tʋʋ. 1:8) B kẽer wa n lebga siglgã taoor-lʋɩtba, kẽer misioneer dãmba, sãnda yel-gɛtb sẽn gilgd n kaagd tigimsã, tɩ b fãa lagem n sõng wʋsg n kɩt tɩ b tõog n moon koɛɛgã t’a piuug “dũniyã fãa.” (Kol. 1:23) Ad b sɩd paama bark wʋsgo, la b sõng neb wʋsg me!
20. a) Bark bʋs la yãmb paam-yã, y sẽn tʋmd tigisgã tʋʋmd ne y sũur fãa wã yĩnga? b) Yãmb yãka yam n na n maand bõe?
20 D sã n sɩd wilgdẽ tɩ d yaa sik-m-mens rãmba, d sã n tʋmd ne yẽesem la d tũud Wẽnnaam Gomdã noy sẽn yaa sõma hal wʋsgã, d na n ket n naagd n tʋmda tigisgã tʋʋmd sẽn paamd pãng rũndã-rũndã wã. Dũni kãngã neb wʋsg yãka yam n pʋgd laogã la yõ-noogrã tɩ kɩt tɩ b paamd zu-loees toor-toor sẽn sãamd b sũyã. La tõnd yẽ tara sũ-noog hakɩkã, d sẽn pa baood bõn-kãsemsã yĩnga. (Yɩɩl 126:6) Sẽn yɩɩd fãa, d sẽn “tʋmd Zusoabã tʋʋmdã ka na n yɩ zaalem ye.” (1 Kor. 15:58) Wẽnnaam a Zeova sẽn yaa tʋʋmdã soabã na n ning-d-la bark sẽn pa sate, d tʋʋmdã yĩnga, la d sẽn wilgd tɩ d nonga a yʋʋrã yĩnga.—Heb. 6:10-12.
[Tẽngr note]
^ sull 8 Talã rãmbã yel-bũndã wilgda a Zezi manesem sẽn yaa to-to ne a karen-biis nins sẽn paam vʋʋsem sõng zaeebã. La yel-bũndã sẽn kõt sagls ninsã paka kiris-nebã fãa.
Y tẽrame bɩ?
Y sẽn modgd n dat n tʋm tigisgã tʋʋmd ne y sũur fãa wã . . .
• bõe yĩng tɩ sik-m-meng yaa tɩlae?
• bõe n tõe n sõng-y tɩ y tall yẽesem?
• bõe yĩng tɩ y segd n yɩ yɩlem Wẽnnaam nifẽ?
[Zãmsgã sogsgã]
[Foto, seb-neng 25]
Sik-m-meng tõe n sõng-d lame tɩ d lʋɩɩs Rĩungã tʋʋm taoore, n da bao bõn-kãsems ye