Bãng Wẽnnaam la a yʋʋrã sẽn mi n yaa toogã võore

BÃNG-Y tɩ bɛ n be n pa rat tɩ yãmb bãng Wẽnnaam yʋʋrã n wa paam zood sõma ne-a ye. Bɛ-kãng yaa ãnda? Biiblã wilgame tɩ “dũni kãngã wẽnnaam” n lud neb nins sẽn ka tẽebã yam. Dũni-wẽng kãngã wẽnnaamã yaa a Sʋɩtãana. A ratame tɩ yãmb pa zɩɩlem pʋgẽ, tɩ ‘Wẽnnaam ziirã’ ra yãg yãmb sũyã pʋsẽ ye. A pa rat tɩ yãmb bãng Wẽnnaam la a yʋʋrã sõma ye. La wãn to la a Sʋɩtãan maand n lut nebã yam?—2 Korẽnt dãmba 4:4-6.

A Sʋɩtãan tũnugda ne ziri tũudum toor-toorã sẽn na yɩl tɩ nebã ra bãng Wẽnnaam sõma ye. Wala makre, pĩnd wẽndẽ wã, Zʋɩf rãmb kẽer wa n yãka yam n kɩɩs Gʋlsg Sõamyã sẽn yetã, n tũ ninsaalb minungu, tɩ kɩt tɩ b bas Wẽnnaam yʋʋrã pʋdbo. Wõnda wa pipi kiris-nebã wakat tɛka, b kõo noor tɩ Zʋɩf rãmb nins sẽn karemd Gʋlsg Sõamyã karen-dotẽ wã sã n wa karem n seg Wẽnnaam yʋʋrã, bɩ b ra pʋd-a ye. B segd n ledg-a-la ne gom-bil ning sẽn yaa ’Adhonay, sẽn dat n yeel tɩ “Zusoaba.” Sãmbg sẽn ka be, woto kɩtame tɩ zood ning nebã sẽn da tar ne Wẽnnaamã pãng booge. Rẽ kɩtame tɩ neb wʋsg kong nafa nins a Zeova zoodã sẽn wat ne wã. La yaa wãn to ne a Zezi yẽ? A manesmã ra yaa wãn ne Wẽnnaam yʋʋrã?

A Zezi ne a karen-biisã wilga nebã Wẽnnaam yʋʋrã

Daar a yembre, a Zezi pʋʋsa a Ba wã n yeel woto: “Mam wilga bãmb yãmb yʋʋre, la mam na n le wilga bãmba.” (Zã 17:26) Yaa vẽeneg t’a Zezi sã n da karemd Biiblã babg ning b sẽn da gʋls ne hebre wã, wall a sã n da sõdgd vɛrse bɩ n wilgd a võore, Wẽnnaam yʋʋrã sã n da be beenẽ, a ra pʋt-a lame. D tõe n yeelame t’a Zezi ra pʋta Wẽnnaam yʋʋrã wala no-rɛɛsdb nins sẽn deng yẽ wã sẽn da maandã. Baa Zʋɩf rãmbã sã n da pa pʋt Wẽnnaam yʋʋrã a Zezi wakatẽ wã me, yaa vẽeneg t’a Zezi yẽ pa maan wa bãmb ye. A ninga tũudmã taoor dãmb taale, n yeel-b woto: “Ne yãmb minungã yãmb maanda Wẽnnaam tõog tɩ lebg zaalem.”—Matɩe 15:6.

A Zezi kũumã la a vʋʋgrã poore, a karen-biis hakɩkã kell n sõnga nebã tɩ b bãng Wẽnnaam yʋʋrã. (Ges-y zĩ-gũbrã gom-zug sẽn yaa:  “Rẽ yĩnga pipi kiris-nebã ra pʋta Wẽnnaam yʋʋrã bɩ?”) Yʋʋmd 33 Pãntekotã daar sẽn yaa wakat ning b sẽn lugl kiris-neb tigingã, tʋm-tʋmd a Pɩɛɛr lebg n dɩka no-rɛɛs a Zoɛll bãngr-gomd n taas kʋʋng sẽn yaa Zʋɩf rãmb la neb sẽn da tuub n sak Zʋɩf rãmbã tũudmã, n yeel-b woto: “Ned ninga fãa sẽn pʋʋsd ne a Zeova yʋʋr na n paama fãagre.” (Tʋʋma 2:21; Zoɛll 3:5) Pipi kiris-nebã sõnga buud toor-toor  neb tɩ b bãng a Zeova yʋʋrã. Rẽ n kɩt tɩ tʋm-tʋmdbã la kãsem dãmbã sẽn wa n tigim taab Zerizalɛmmã, karen-biig a Zak yeel woto: “Wẽnnaam . . . tũusa neb bu-zẽmsã sʋk b meng yʋʋr yĩnga.”—Tʋʋma 15:14.

La bɛ ning sẽn dat n menes Wẽnnaam yʋʋrã pa tek woto ye. Tʋm-tʋmdbã kũum poore, a Sʋɩtãan yɩɩ tao-tao n kẽes yɛl sẽn pa sɩd kiris-neb tũudmã pʋgẽ. (Matɩe 13:38, 39; 2 Pɩɛɛr 2:1) Wala makre, seb-gʋlsd a Justin Martyr sẽn da boond a meng tɩ kiris-nedã roga wakat ning tʋm-tʋmd a Zã sẽn maan kaalmã. Tʋm-tʋmdbã sʋka, a Zã n yɩ yaoolem soab n maan kaalem. La a Justin ra nong n gʋlsda a sɛbã pʋsẽ t’a soab ning sẽn yaa bũmb fãa kõatã yaa “Wẽnnaam sẽn pa tar yʋ-peelle.”

Kiris-neb ne yʋʋrã sẽn wa n ges Biiblã babg ning b sẽn da gʋls ne gɛrkã n lebg n gʋlsã, b yãka Wẽnnaam yʋ-peellã sẽn yaa Zeova wã, n ledg-a ne gɛrk gom-bil ning sẽn yaa Kurios, sẽn dat n yeel tɩ “Zusoaba.” Yaa woto me la b maan Biiblã babg ning b sẽn da gʋls ne hebre wã. Zʋɩf  rãmbã sẽn da karemd Gʋlsg Sõamyã n pa le pʋt Wẽnnaam yʋ-peellã yĩnga, kɩtame tɩ b gʋlsdbã ledg yʋ-kãng ne gom-bil ning sẽn yaa ʼAdhonay wã sẽn na maan naoor 130. Yʋʋmd 405 soabã sasa, a Jérôme baasa Biiblã lebgr ne Latin, tɩ neb wʋsg ra tʋmd ne rẽ. Biibl kãng b sẽn boond tɩ Vulgatã me pʋgẽ, b ledga Wẽnnaam yʋ-peellã.

Rũndã-rũndã me, neb n bao n na n menems Wẽnnaam yʋʋrã

Rũndã-rũndã, bãngdbã miime t’a Zeova yʋʋrã pukda Biiblã pʋgẽ sẽn na maan naoor 7 000. Wala makre, katolik rãmbã Bible de Jérusalem ne La Biblia Latinoamérica katolik rãmbã sẽn lebg ne ɛspayõllã, ne Reina-Valera Biiblã me sẽn yaa ne ɛspayõllã fãa yaa Biibl dãmb neb wʋsg sẽn nong n karemdẽ. Biibl kãensã fãa pʋsẽ, b ninga Wẽnnaam yʋ-peellã zĩis wʋsgo. Biibl kẽer pʋsẽ, b lebga Wẽnnaam yʋ-peellã tɩ “Yahweh.”

Bʋko, egiliiz rãmb wʋsg sã n na n kɩt tɩ bãngdbã lebg Biiblã b yʋʋr yĩnga, b pẽdgd-b lame tɩ b ra ning Wẽnnaam yʋ-peellã ye. Wala makre, yʋʋmd 2008 sigr kiuugã rasem 29 wã daare, Vatican wã toola lɛtr egiliiz katolikã evɛk rãmbã taoor dãmba. Lɛtrã pʋgẽ, b yeela woto: “Sẽn nan pa kaoose, kẽer yikame n sɩng n pʋt Israɛll Wẽnnaamã yʋ-peellã.” Lɛtrã paasa woto: “Ned pa segd n gʋls Wẽnnaam yʋʋrã zĩig baa a ye wall a pʋd-a ye.” Lɛtrã kẽnga taoor n wilg woto: “Ned sã n na n lebg Biiblã ne buud gomd a to, . . . a segd n yãka tetragrammã sẽn wilgd Wẽnnaam yʋʋrã, n ning Adonay wall Kurios, sẽn dat n yeel tɩ ‘Zusoaba.’ ” Vẽenega, Vatican wã sẽn yeel woto wã wilgdame tɩ b ratame tɩ nebã bas Wẽnnaam yʋ-peellã pʋdbo.

Portɛstã rãmbã me tara manesem kãngã sẽn wilgd tɩ b pa waoogd Wẽnnaam yʋʋrã. Wala makre, yʋʋmd 1978 wã pʋgẽ, portɛstã rãmbã lebga Biiblã ne ãngilindi, tɩ b boond lebg-kãng tɩ New International Version. Rao a ye sẽn gomd Biibl kãng yiisdbã yʋʋr yĩng yeela woto: “Wẽnnaam yʋ-peellã sɩd yaa a Zeova, tɩ d ra segd n pʋt-a. La d yiisa sẽn yɩɩd dolaarã ligd milyõ a 2 Biibl kãng lebgr yĩnga. La tõnd sã n da rat n sãam ligdã yaa d sẽn na n lebg goam nins sẽn be Yɩɩl Sõamyã 23 soabã sɩngrẽ wã woto: ‘A Yahweh yaa mam pe-kɩɩma.’ D sã n da maanẽ woto, tʋʋmdã ra na n yɩẽ-la zaalem, bala ned pa na n dat Biibl kãng ye.”

Sẽn paase, egiliiz rãmbã kɩtame tɩ Amerik Latin nebã pa mi Wẽnnaam yʋʋrã ye. A Steven Voth sẽn kõt sagls Biiblã lebgr wɛɛngẽ n tʋmd Aliãns biblik inivɛrsɛllã (ABU) pʋgẽ wã yeela woto: “Bũmb a ye sẽn wat ne no-koɛɛm wakat fãa Amerik Latin portɛstã rãmbã sʋk yaa b sã n segd n pʋta Wẽnnaam yʋ-peellã sẽn yaa Zeova wã bɩ b sã n pa segd n pʋt-a. . . . Sẽn noom tõnd yaa tɩ neo-pãntekotistã egiliizã neb sõor sẽn tar  paasgã . . . yeelame tɩ b rata Reina-Valera Biibl ning b sẽn lebg yʋʋmd 1960 soabã pʋgẽ wã, la b ratame tɩ b yãk Wẽnnaam yʋʋrã sẽn yaa Zeova wã. B ratame tɩ b ledg-a ne gom-bil ning sẽn yaa Señor [sẽn dat n yeel tɩ Zusoaba].” A Steven Voth wilgame tɩ sɩngrẽ wã, ABU wã neb ra zãgsame, la kaoosg zugẽ, b wa n sakame n yiis Reina-Valera lebgrã “n pa ning Zeova wã ye.”

B sẽn yãk Wẽnnaam yʋʋrã a Gomdã pʋgẽ n ledg-a ne “Zusoabã” kɩtdame tɩ nebã pa mi Wẽnnaam sẽn sɩd yaa a soab ye. Woto liibda nebã. Wala makre, ned sã n karemd Biiblã n seg gom-bil ning sẽn yaa “Zusoabã,” a tõeeme n pa bãng sã n yaa a Zeova yell la b gomd bɩ yaa a Biig a Zezi yell la b gomd ye. Wala makre, vɛrse ning pʋgẽ tʋm-tʋmd a Pɩɛɛr sẽn lebs n dɩk a Davɩɩd goamã n togsã, Traduction du monde nouveau wã pʋgẽ, b yeela woto: “A Zeova yeela mam Zusoabã [rat n yeel t’a Zezi sẽn vʋʋgã] yaa: Zĩnd mam dɩtgo.” La Biibl dãmb wʋsg pʋsẽ, b lebga vɛrse kãngã woto: “Zusoabã yeela mam Zusoabã.” (Tʋʋma 2:34) A David Clines gʋlsa sebr gom-zug sẽn yaa: “A Yahweh ne kiris-neb tũudmã sẽn gomd Wẽnnaam ning yellã.” Seb-kãng pʋgẽ, a yeela woto: “Kiris-nebã sẽn pa mi a Yahweh wã kɩtame tɩ b gomd Kiristã yell n yɩɩda.” Woto kɩtame tɩ neb wʋsg sẽn kẽnd wẽnd-dotẽ wã pa mi tɩ Wẽnnaam ning a Zezi sẽn da pʋʋsdã tara yʋ-peell sẽn yaa Zeova ye.

A Sʋɩtãan maana a sẽn tõe tɛka, n lud nebã yam sẽn na yɩl tɩ b ra bãng Wẽnnaam sõma ye. Baa ne rẽ fãa, y ket n tõe n bãnga Wẽnnaam a Zeova sõma.

Y tõe n bãnga a Zeova sõma

Sãmbg sẽn ka be, a Sʋɩtãan maanda a sẽn tõe fãa n dat n menems Wẽnnaam yʋ-peellã. Ne sɩlem, a tũnugda ne ziri tũudmã n dat n maan woto. La a Zeova ratame tɩ neb nins sẽn sɩd rat n bãng yẽ la b bãng a sẽn na n wa maan bũmb nins wẽn-sakdbã neer yĩngã bãng a yʋʋrã. Bũmb ka be saasẽ wall tẽngã zug n tõe n gɩdg saasẽ pãng soab a Zeova t’a pa kɩt tɩ nin-kãensã bãng a yʋʋrã ye.

A Zeova Kaset rãmbã tʋllame n sõng yãmb tɩ y zãms Biiblã, n tõog n paam zood ne Wẽnnaam. B rɩkda a Zezi togs-n-taare, bala a ra yeela Wẽnnaam woto: “Mam wilga bãmb yãmb yʋʋre.” (Zã 17:26) Yãmb sã n zãmsd Biiblã la y tagsd vɛrse rãmb nins sẽn wilgd bũmb toor-toor a Zeova sẽn maand ãdem-biisã neer yĩngã zugu, na n kɩtame tɩ y bãng a sẽn yaa Wẽnnaam ning buudã.

A Zoob sẽn yɩ wẽn-sakdã talla zood sõma ne Wẽnnaam. Dẽnd yãmb me tõe n paamame tɩ Wẽnnaam yɩ y zoa. (Zoob 29:4) Y sã n zãms Wẽnnaam Gomdã n bãng a sẽn yetã, y na n bãnga a Zeova sõma. Rẽ na n kɩtame tɩ y kɩs sɩd tɩ sẽn wa n yaa a soab fãa, a Zeova na n maaname tɩ zems wa a sẽn wilg a yʋʋrã võorã. A yeela woto: “Mam na n lebga m sẽn dat n yɩ a soab fãa.” (Yikri 3:14, Rotherham) Dẽnd d tõe n kɩsa sɩd t’a na n pidsa bõn-sõma nins fãa a sẽn kãab ãdem-biisã.

[Zĩ-gũbri/Foto rãmba, seb-​neng a 6]

 Rẽ yĩnga pipi kiris-nebã ra pʋta Wẽnnaam yʋʋrã bɩ?

Pipi kiris-nebã wakatẽ, b lugla kiris-neb tigims zĩis wʋsgo. Tigims kãens nebã ra tigimda taab wakat fãa n zãmsd Gʋlsg Sõamyã. Rẽ yĩnga Wẽnnaam yʋ-peellã ra bee Gʋlsg Sõamyã nins nin-kãensã sẽn da karemdã pʋsẽ bɩ?

Wakat kãng tɩ yaa gɛrkã la neb wʋsg ra gomda. Woto kɩtame tɩ tigims wʋsg pʋsẽ, b ra karemd Sɛptãntã. Yaa Biiblã babg ning b sẽn da gʋls ne hebre wã b sẽn lebg ne gɛrk yʋʋmd 200 ne yʋʋmd 100 sẽn deng a Zezi rogmã sʋkã la b sẽn boond tɩ Sɛptãntã. Bãngdb kẽer yetame tɩ b sẽn wa n lebgd Sɛptãntã, b yãka Wẽnnaam yʋʋrã n ning gɛrk gom-bil ning sẽn yaa Kurios, sẽn dat n yeel tɩ “Zusoaba.” La yɛl wʋsg wilgdame tɩ pa yɩ woto ye.

Foto rãmbã yãmb sẽn ne wã yaa Sɛptãntã pedse. Bãngdbã wilgame tɩ b gʋlsa seb-ped-kãensã yʋʋm 100 sẽn deng a Zezi rogmã sẽnese. Seb-ped-kãensã sẽn gʋls ne gɛrkã zugu, b gʋlsa a Zeova yʋʋrã ne hebre gʋls-biis a naas kãensã יהוה (YHWH) b sẽn boond tɩ tetragrammã. A George Howard sẽn yaa porfesɛɛrã yeela woto: “D tara Sɛptãntã sɛb toor-toor a tãabo, b sẽn gʋls nand tɩ Kirist wa tẽngã zugu, la seb-kãensã fãa pʋsẽ, b pa tol n yãk tetragrammã zĩig baa a ye n ning kurios wall b wilg a võorã ye. Masã d tõe n yeelame tɩ sẽn deng nuuvo tɛstama wã gʋlsgo, a gʋlsgã sasa, la rẽ poore, Zʋɩf rãmbã ra gʋlsda Wẽnnaam yʋʋrã ne hebre gʋls-biis . . . Biibl nins b sẽn da lebgd ne gɛrkã pʋsẽ.”—Biblical Archaeology Review

Rẽ yĩnga a Zezi tʋm-tʋmdbã ne a karen-biisã gʋlsa Wẽnnaam yʋʋrã sɛb nins Wẽnnaam sẽn vẽneg-b tɩ b gʋlsã pʋsẽ bɩ? A Howard yeela woto: “Sẽn mik tɩ kiris-neb nins nuuvo tɛstama wã sẽn gomd b yellã ra karemda Sɛptãntã la b sõdgd a vɛrse rãmb tɩ Wẽnnaam yʋʋrã ra be be ne hebre wã gʋls-biisã yĩnga, sãmbg kae tɩ nuuvo tɛstama wã gʋlsdb ninga tetragrammã b sɛbã pʋsẽ ye.”

Woto yĩnga, d tõe n yeelame bal tɩ pipi kiris-nebã ra karemda Wẽnnaam yʋʋrã Biiblã babg ning b sẽn da gʋls ne hebre wã b sẽn lebg ne gɛrkã pʋsẽ, la Biiblã babg ning b sẽn gʋls ne gɛrkã pʋgẽ me.

[Foto rãmbã sẽn yitẽ]

Toutes les photos : Société Royale de Papyrologie du Caire

[Foto, seb-​neng a 4, 5]

A Ezai seb-pindmã b sẽn yã mog-kɩɩngã sɛɛgã pɛdga. Wẽnnaam yʋʋrã la sẽn gũbgã

 [Fotã sẽn yitẽ]

Shrine of the Book, Photo © The Israel Museum, Jerusalem

[Foto, seb-​neng a 7]

Egiliizã taoor dãmb yãka Wẽnnaam yʋ-peellã Biiblã pʋgẽ, b sẽn tũ Zʋɩf rãmbã minung yĩnga, wall b sẽn baood ligd yĩnga

[Foto, seb-​neng a 8]

A Zezi kõo mak-sõngo, a sẽn kɩt tɩ nebã bãng Wẽnnaam yʋʋrã yĩnga