Bãng Wẽnnaam yʋʋrã rat n yeelame tɩ bõe?

YÃMB yʋʋrã tara võor takɩ bɩ? Tẽns wʋsg pʋsẽ, nebã nong n kõta b kambã yʋy sẽn tar võore. Yʋʋrã tõe n wilgda roagdbã sẽn tẽed bũmb ninsã, wall wilgd bũmb nins sẽn tar yõod ne-b n yɩɩdã, pa rẽ bɩ b sẽn dat tɩ biigã wa yɩ ned ning buud beoogã.

Pa rũndã la b sɩng n kõt nebã yʋy sẽn tar võor ye. Pĩndã, b ra pa kõt ned yʋʋr yaar ye. Yʋʋrã tõe n wilga b sẽn dat t’a soabã wa maan bũmb ninga. Wala makre, a Zeova goma ne a Davɩɩd n wilg-a a biig a Salomo sẽn na n wa maan bũmb ningã, n yeel-a woto: “Yẽ yʋʋr na n yɩɩ a Salomo sẽn dat n togs tɩ laafɩ. La Israɛll nebã na n zĩnda ne laafɩ yẽ zãmaane.”—1 Kibaya 22:9.

Wakat ning me, a Zeova mi n kõo ned yʋ-paalle, n na n wilg bũmb nin-kãng sẽn na n wa maane. Wala makre, a Zeova toeema a Abrahaam pagã sẽn da yaa kirã yʋʋre, n pʋd-a t’a Saara, sẽn dat n yeel tɩ “na-bi-poaka.” Bõe yĩnga? A Zeova meng yeela woto: “Mam na n ninga a zug barka, la sẽn paase, mam na n kɩtame tɩ yẽ rog bi-ribl n kõ foom. Mam na n ninga a zug barka la yẽ na n yɩɩ buud toɛy-toɛy ma, la buud toɛy-toɛy rĩm dãmb na yi yẽ pʋgẽ.” (Sɩngre 17:16) Vẽenega, d sã n bãng bũmb ning sẽn kɩt tɩ Wẽnnaam kõ a Saara yʋ-paallã, d wʋmda bũmb ning Wẽnnaam sẽn da rat t’a wa maanã võor me.

La yaa wãn yẽ ne yʋʋr ning sẽn yaa Zeova wã sẽn yaa yʋ-kãseng n yɩɩd yʋyã fãa wã? Yʋ-kãng võor yaa bõe? A Moiiz sẽn wa n sok Wẽnnaam n dat n bãng a yʋʋrã, a leok-a-la woto: “Mam na n yɩɩ m sẽn na n yɩ a soaba.” (Yikri 3:14, NW ) Biibl ning b sẽn boond tɩ Rotherham lebgrã pʋgẽ, b yeta woto: “Mam na n lebga m sẽn dat n yɩ a soab fãa.” Rẽnd a Zeova yʋʋrã võor wilgdame t’a maanda yɛl wʋsgo. D rɩk makr n wilg rẽ võore. Pag tõe n maana yɛl wʋsg sẽn na yɩl n ges a kamb yelle. Wakat ninga, a segd n tɩpa a kambã, n segl rɩɩb n kõ-ba, wall a sagl-ba. Yaa woto me ne a Zeova, la a sẽn maandã yɩɩda ninsaal sẽn tõe n maanã zĩig sẽn zãre. Sẽn na yɩl n pids a raabã sẽn wilgd t’a nonga ãdem-biisã, a tõe n lebga a sẽn dat fãa n maan rẽ sẽn baood t’a maan bũmb ningã. Dẽnd bãng a Zeova sõma wã rat n yeelame me tɩ d bãng a yʋʋrã võore, la d wilg mi-beoog ne-a, bũmb nins a sẽn maanã yĩnga.

Neb nins sẽn pa mi Wẽnnaam yʋʋrã la a võorã pa tõe n bãng Wẽnnaam sõma ye. La y sã n zãmsd Biiblã, y na n bãnga Wẽnnaam sẽn maand bũmb nins tõnd sõngr yĩngã. Wala makre, y na n bãngame t’a yaa Sagend sẽn ka to, Fãagd sẽn tar pãng la Kõata. A Zeova yʋʋrã sẽn tar võor woto fãa wã sɩd noogda sũuri.

La yɩl n bãng Wẽnnaam la a yʋʋrã pa mi n yaa nana ye. Sõsg ning sẽn pʋgdã wilgda bũmb ning sẽn kɩt tɩ yaa woto wã.