Bũmb ning a Zezi sẽn maan n wilg Wẽnnaam tɩrlmã
Bũmb ning a Zezi sẽn maan n wilg Wẽnnaam tɩrlmã
‘Yaa a Zezi Kirist la Wẽnnaam pĩnd n yãk t’a yɩ yel-wẽnã maoongo, neb nins fãa sẽn na n tẽ a zɩɩmã tɩ wilg Wẽnnaam tɩrlmã.’—ROM 3:25.
1, 2. a) Biiblã wilgdame tɩ ninsaal rogda ne bõe, la rẽ waa ne bi-bʋse? b) Sogsg-bʋs la d na leok sõs-kãngã pʋgẽ?
NEB wʋsg mii Biiblã kibar ning sẽn gomd b sẽn kɩɩs Wẽnnaam to-to Edɛnnã. A Ãdem beegrã biis namsda tõnd ned kam fãa rũndã-rũndã. Biiblã goma rẽ yell n yeel woto: “Rao a yembr n wa ne yel-wẽnã dũniyã, tɩ kũum wa yel-wẽnã yĩnga. Rẽ n kɩt tɩ kũum yõkd nebã fãa, fãa sẽn maand yel-wẽnã yĩnga.” (Rom 5:12) Baa tõnd sẽn modgd to-to n dat n maan sẽn yaa tɩrgã, d mi n kongame tɩ kɩt tɩ d rat tɩ Wẽnnaam kõ-d sugri. Rẽ wɛɛngẽ, tʋm-tʋmd a Poll meng wa n yeela woto ne sũ-sãanga: “Bõn-neer ninga mam sẽn dat n maanã, mam ka tõe n maan ye. La wẽng ninga mam sẽn ka rat n maanã, mam maanda rẽnda. Mam yaa nimbãan-ned bala.”—Rom 7:19, 24.
2 Ninsaal fãa sẽn dogd ne yel-wẽndã yĩng kɩtame tɩ d sokd d mens sogs-kãensã: Maana wãn tɩ Nazarɛt rao a Zezi yẽ pa tall yel-wẽnde, la bõe yĩng t’a reeg lisgu? Wãn to la a Zezi vɩɩmã tõr wilg tɩ Wẽnnaam yaa tɩrga? La sẽn yɩɩd fãa, a Zezi kũumã kɩtame tɩ bõe tõog n maane?
B rõda Wẽnnaam t’a pa tɩrg ye
3. Wãn to la a Sʋɩtãan belg a Hawa?
3 D yaab a Ãdem ne a Hawa maana b mense, n tõdg tɩ Wẽnnaam kõn yɩ b naaba, la b sak tɩ ‘wag-kʋdrã, b sẽn boond tɩ diaabl la Sʋɩtãanã’ na n soog-ba. (Wil. 12:9) D tẽeg b sẽn maan dẽ to-to wã. A Sʋɩtãan yeelame tɩ Wẽnnaam a Zeova pa rɩt a naamã ne tɩrlem ye. Bõe yĩng tɩ d yet woto? Yaa a sẽn sok a Hawa bũmb ningã n wilgd rẽ. A sok-a-la woto: “Rẽ yĩnga Wẽnnaam sɩd yeela yãmb tɩ y ra rɩ tɩɩs nins fãa sẽn be zẽedã zĩigẽ wã biis bɩ?” A Hawa wilg-a-la tɩɩg takɩ sẽn be zẽedã zĩigẽ, n yeel tɩ Wẽnnaam gɩdga bãmb tɩ b ra sɩɩs-a, sã n pa rẽ b na n kiime. La a Sʋɩtãan yeelame tɩ Wẽnnaam gomdã pa sɩd ye. Bala a leoka woto: “Yãmb ka na n ki ye.” Rẽ poore, a belga a Hawa t’a tẽ tɩ Wẽnnaam mongd-b-la bũmb sẽn yaa sõma, la tɩ b sã n dɩ tɩɩgã biiga, b na n lebga wa Wẽnnaam, n so b mense, n tõe n bãng sõma la wẽng b toore.—Sɩng. 3:1-5.
4. Sɩnga wãn t’a Sʋɩtãan wa lebg ãdem-biisã naaba?
4 A Sʋɩtãan gomdã rat n yeelame tɩ yaa nebã sã n bas Wẽnnaam n soog b mense, la b vɩɩmã na n yɩ sõma n yɩɩge. La wall t’a Ãdem tõdg a Sʋɩtãan gomdã n wilg tɩ Wẽnnaam naamã la sõma wã, a kelga a pagã, n naag-a tɩ b rɩ tɩɩgã bil b sẽn da pa segd n dɩ wã. A sẽn maan woto wã, a beega a Zeova n lebg ned sẽn pa zems zãnga, la a kɩt me tɩ tõnd fãa lebg yel-wẽnã la kũumã yembse. Woto kɩtame tɩ ãdem-biisã fãa naab lebg kɩɩsd a Sʋɩtãan sẽn yaa “dũni kãngã wẽnnaamã.”—2 Kor. 4:4; Rom 7:14.
5. a) Bõe la a Zeova maan n wilg t’a gomd fãa yaa sɩda? b) Bõe la Wẽnnaam yeel tɩ kɩt t’a Ãdem ne a Hawa kambã la b yagensã ra na n wa tõog n tẽ tɩ manegr n wate?
5 A Zeova gomd fãa sẽn yaa sɩdã yĩnga, a yeela a Ãdem ne a Hawa tɩ b sẽn kɩɩsã, b sɩd na n kiime. (Sɩng. 3:16-19) La woto pa rat n wilg tɩ Wẽnnaam sẽn da rat bũmb ning sɩngrẽ wã pa tõog ye. Raab kãngã pa tõe n vaal abada! Sɩd me, a Zeova sẽn wa n wilgd a Ãdem ne a Hawa bũmb ning sẽn na n paam-bã, a yeela gomd sẽn kɩt tɩ b kambã la b yagensã na n wa tõog n tẽ tɩ manegr n wate. A yeelame t’a na n tʋma “yagenga,” la t’a Sʋɩtãan na n pogla yagengã na-kãsenkãare. La yagengã na-kãsenkãarã poglg na n maagame, tɩ rẽ poor bɩ a na n wa “pogl [a Sʋɩtãan] zugã.” (Sɩng. 3:15) Biiblã goma rẽ yelle, n wilg tɩ yaa a Zezi Kirist n na n maan bõn-kãngã, n yeel woto: “Wẽnnaam Biigã waame n na n sãam Sʋɩtãanã tʋʋmã.” (1 Zã 3:8) La wãn-wãn la a Zezi vɩɩmã la a kũumã sẽn yɩ to-to wã wilgd Wẽnnaam tɩrlmã?
A Zezi sẽn deeg lisgã võore
6. Bõe yĩng tɩ d tõe n yeel t’a Zezi pa rog ne a Ãdem yel-wẽndã?
6 A Zezi rogmã poore, a bɩʋʋng zugẽ, a ra segd n yɩɩ wa a Ãdem sẽn da yaa to-to nand t’a beegã bal kɛpɩ. (Rom 5:14; 1 Kor. 15:45) Sẽn na yɩl tɩ woto tõog n yɩ, a pa tog n dog ne yel-wẽndã ye. Ra na n maana wãn tɩ rẽ tõoge? Malɛk a Gabriyɛll wilga a Zezi ma a Maari bũmb ning sẽn na n kɩt tɩ rẽ tõogã vẽenega, n yeel-a woto: “Sɩɩg sõng na n waa fo zugu, la Sẽn-ka-to pãng na n buii foom. Woto yĩnga, bi-sõng ninga fo sẽn na n dogã, b na n boonda yẽ tɩ Wẽnnaam Biigã.” (Luk 1:35) Wõnda wa a Zezi yãadmẽ, a Maari wilg-a-la a rogmã sẽn yɩ to-to wã bilfu. Rẽ n so tɩ daar a yembre, a Zezi ba-wubdg a Zozɛf ne a ma wã sẽn da gẽesd-a n wa tɩ yãa-a Wẽnnaam doogẽ wã, a sok-b woto: “Yãmb da ka mi tɩ mam tog n bee m ba wã roogẽ la?” (Luk 2:49, Kãab-paalgã Koe-noogo) A Zezi gom-kãensã wilgda vẽeneg tɩ hal a yãadmẽ, a ra miime t’a yaa Wẽnnaam Bi-ribla. Rẽnd ra tara yõod wʋsg ne-a t’a kɩt tɩ nebã bãng tɩ Wẽnnaam sɩd yaa tɩrga.
7. Bõe la a Zezi ra tar t’a yõodã ra yaa kãsenga?
7 A Zezi ra kẽnda tigissã b sẽn da maand wakat fãa n zãmsd Wẽnnaam Gomdã, tɩ wilgdẽ tɩ Wẽnnaam daabã yell n da pak-a n yɩɩda. A sẽn da zems zãngã yĩnga, yaa vẽeneg t’a sã n da wʋmdẽ wall a karemd bũmb Biiblã babg ning b sẽn da gʋls ne hebre wã pʋgẽ, a ra wʋmda a võorã nana-nana. (Luk 4:16) La a Zezi ra tara bũmb a to me t’a yõodã yaa kãsenga: Yaa a yĩngã sẽn zems zãng t’a tõe n dɩk n kõ tɩ yɩ maoong ninsaalbã fãagr yĩngã. A sẽn wa n na n deeg lisgã sasa, a ra pʋʋsdame la a ra tagsd bãngr-gomd ning sẽn be Yɩɩl Sõamyã 40:7-9 wã yelle.—Luk 3:21; karm-y Hebre dãmb 10:5-10. *
8. A Zezi sẽn wa n na n deeg lisgã, bõe yĩng t’a Zãmbatiis ra pa rat n sake?
8 A Zãmbatiis ra pa rat n sak n lis a Zezi ye. Bõe yĩnga? Bala a sẽn da lisd zʋɩf rãmbã yaa sẽn na yɩl n wilg tɩ b teka yam n kot b sẽn kɩɩs Tõogã n maan yel-wẽnã sugri. A sẽn da yaa a Zezi roagdã yĩnga, a ra segd n miime t’a Zezi pa tar yel-wẽnde, tɩ kɩt t’a pa segd n tek yam n kos sugr ye. La a Zezi wilga a Zãmbatiis tɩ ra zemsame tɩ yẽ reeg lisgu, n yeel woto: “A zemsame tɩ tõnd pids bũmb nins fãa sẽn yaa tɩrgã.”—Mat. 3:15.
9. Bõe yĩng t’a Zezi reeg lisgu?
9 A Zezi sẽn da yaa ninsaal sẽn zems zãngã, a ra tõe n yeelame t’a sẽn yaa wa a Ãdem sẽn da yaa to-to sɩngrẽ wã, a tõe n doga kamb sẽn zems zãnga. La a pa bao n na n maan woto, bala pa rẽ la a Zeova ra rat t’a maan ye. Wẽnnaam ra tʋm-a-la tẽngã zug t’a wa maan yagengã bɩ Mesi wã sẽn da segd n maanã. Woto ra baoodame t’a Zezi rɩk a vɩɩmã sẽn zems zãngã n kõ tɩ yɩ maoongo. (Karm-y Ezai 53:5, 6, 12.) Yaa vẽeneg t’a Zezi lisgã reegr ne tõnd rẽndã võor pa yembr ye. A Zezi sẽn da yaa Israɛll ned tɩ Israɛll yaool n da yaa buud sẽn dɩk a meng n kõ Wẽnnaam a Zeova wã yĩnga, ra pa tɩlae t’a rɩk a meng n kõ Wẽnnaam yɛs ye. A Zezi sẽn deeg lisgã ra yaa sẽn na n wilg Wẽnnaam t’a na n maan a raabã tɩ zems ne bãngr goam nins sẽn wilgd bũmb nins Mesi wã sẽn na n maanã.
10. Bõe me la Mesi wã ra segd n maan n pids Wẽnnaam daabã, la a Zezi tagsg ra yaa wãn ne tʋʋm-kãense?
10 Rĩungã koe-noogã moonego, maan karen-biis la sõng-b tɩ bãmb me wa tõog n moon koɛɛgã naaga a Zeova sẽn da rat t’a Zezi maan bũmb ninsã sʋka. A Zezi lisgã reegr wilgdame me tɩ sẽn na yɩl n wilg tɩ Wẽnnaam a Zeova rɩta a naamã ne tɩrlem, a na n sakame tɩ b nams-a la b kʋ-a menga. A Zezi sẽn sɩd nong a saasẽ Ba wã yĩnga, Wẽnnaam raabã maaneg ra noom-a-la wʋsgo, hal tɩ kɩt t’a sak ne yamleoog n kõ a vɩɩmã tɩ yɩ maoongo. (Zã 14:31) A sẽn da mi me t’a ra tõe n dɩka a vɩɩmã sẽn zems zãngã n kõ Wẽnnaam tɩ yɩ rond n yao n yiis tõnd yel-wẽnã la kũumã yembd pʋgẽ wã ra noom-a lame. Rẽ yĩnga a Zezi sẽn deeg lisg n na n wilg Wẽnnaam t’a na n sak n tʋma tʋʋm kãensã fãa wã, Wẽnnaam sakame bɩ? Vẽenega, a sakame!
11. Wãn to la a Zeova wilg tɩ yaa a Zezi n sɩd yaa Mesi wã, Kirist ning a sẽn da pʋlmã?
11 Evãnzill rãmb a naasã fãa gʋlsdb wilga Wẽnnaam sẽn maan bũmb ning n wilg vẽeneg t’a yãka a Zezi, b sẽn wa n lis-a Zʋrdẽ kʋɩlgã koomẽ t’a pukã. A Zãmbatiis kõo rẽ kaset n yeel woto: “Mam yãa sɩɩg sõng sẽn wẽnd wall sẽn yi yĩngr n sigda n paad bãmb zugu. . . . La mam yãame la m kɩt kaset tɩ bãmb yaa Wẽnnaam Biiga.” (Zã 1:32-34) Sẽn paase, wakat kãng me, a Zeova yeela woto: “Ada yaa mam Bi-nongre, mam sẽn nong ne m sũur fãa zãnga.”—Mat. 3:17; Mark 1:11; Luk 3:22.
A yɩɩ sakd n tãag a kũum
12. Bõe la a Zezi maan yʋʋm a tã la pʋɩ-sʋk nins sẽn pʋgl a lisgã?
12 A Zezi lisgã poore, yʋʋm a tã la pʋɩ-sʋk nins sẽn pʋglã, a zãmsa nebã bũmb wʋsg a Ba wã zug ne a sũur fãa, la a wilg-b tɩ Wẽnnaam rɩta a naamã ne tɩrlem. A Zezi sẽn tog soay ne nao n gilg Kãabg Tẽngã tõrã, kõ-a-la yaamse. La bũmb baa a ye da pa tõe n gɩdg-a t’a pa kõ sɩdã kaset sõma ye. (Zã 4:6, 34; 18:37) A Zezi wilga nebã Wẽnnaam Rĩungã sẽn yaa a soabã. A sẽn maan yel-soalem n sãoog bãad rãmba, n dɩlg kʋʋng kom sẽn da tare, la a vʋʋg kũum mengã, yɩɩ sẽn na n wilg Rĩungã sẽn na n wa maan bũmb nins n kõ ninsaalbã.—Mat. 11:4, 5.
13. Pʋʋsgã wɛɛngẽ, bõe la a Zezi zãms tõndo?
13 A Zezi pa bao tɩ b pẽg-a a sẽn da tõogd n zãmsd nebã sõma la a maand yel-soalem n maagd bãad rãmbã yĩng ye. A pʋd n kõo tõnd mak-sõngo, a sẽn da sikd a meng wakat fãa sẽn na yɩl t’a Zeova yʋʋr paam pẽgrã yĩnga. (Zã 5:19; 11:41-44) A Zezi kɩtame me tɩ d bãng bũmb nins sẽn tar yõod n yɩɩd tɩ d segd n pʋʋs n kosã. A wilgame tɩ d segd n pʋʋsame tɩ Wẽnnaam yʋʋrã sẽn yaa a Zeova wã paam “waoogre,” n kos me t’a naamã sẽn pid ne tɩrlmã ledg a Sʋɩtãan naamã sẽn yaa wẽngã, tɩ kɩt t’a raabã “maan dũniyã zug wa sẽn maand saasẽ” wã. (Mat. 6:9, 10) A Zezi sagla tõnd me tɩ d tʋm tɩ zems ne kos-kãensã, d sẽn na n “deng n bao Wẽnnaam soolem ne [Wẽnnaam] tɩrlmã.”—Mat. 6:33.
14. Baa a Zezi sẽn da zems zãngã, bõe yĩng t’a ra segd n maan modgr n yaool n tõog n pids tʋʋmd ning a sẽn da segd n tʋmã?
14 A Zezi kũumã sẽn yɩ maoongã sẽn wa n kolgdẽ wã, a sũur da sãamda wʋsgo, a sẽn da ne tʋʋmd ning a sẽn segd n tʋmã sẽn yaa kãsengã. A Zezi Ba wã raabã pidsg la a yʋʋrã waoogr da baoodame t’a Zezi tõog toogo, b sẽn na n dõd-a, n nams-a la b kʋ-a wã sasa. A kũumã ket rasem a nu, a pʋʋsa Wẽnnaam n yeel woto: “Masã sũ-sãoong n tar maam. La mam na n yeelame tɩ bõe? Mam na n yeelame tɩ m Ba, fãag maam ne wakat kãngã bɩ? Yaa bõn-kãng yĩng la mam wa n be ka masã.” Wa a Zezi, ned buud fãa sũur na n sãama yell a woto taoore. La Zezi sẽn wilg a sũ-sãangã poore, a basa a meng yell tagsgo, la a tags bũmb ning yõod sẽn yɩɩdã yelle, n pʋʋs n kos woto: “M Ba, waoog-y y yʋʋrã.” Zĩig pʋgẽ, a Zeova leok-a lame n yeele: “Mam da waoog-a lame, la m na n le waoog-a lame.” (Zã 12:27, 28) N-ye, a Zezi ra sakame tɩ b na n mak-a mak-toaag ninsaal buud baa a ye sẽn zɩ n paame, sẽn na yɩl tɩ b bãng a sã n na n kell n saka Wẽnnaam ne a sũur fãa. La a sẽn wʋm a saasẽ Ba wã gom-kãensã wã, yaa vẽeneg t’a maneg n kɩsa sɩd t’a na n tõog n kɩtame t’a Zeova yʋʋrã paam pẽgre, la a wilg t’a rɩta a naamã ne tɩrlem. A sɩd tõogame me!
A Zezi kũumã sẽn kɩt tɩ bũmb nins tõog n maane
15. A Zezi sẽn wa n na n ki wã, bõe yĩng t’a yeel tɩ “bũmb fãa maan n saame”?
15 A Zezi sẽn wa n be ra-lukã zug n wa kolg kũumã, a yeela woto: “Bũmb fãa maan n saame!” (Zã 19:30, Kãab-paalgã Koe-noogo) A lisgã tɛk n tãag a kũumã sẽn kaoos yʋʋm a tã la pʋɩ-sʋkã pʋgẽ, Wẽnnaam sõng-a lame t’a tõog n maan yel-kãsemse! A Zezi sẽn wa n ki wã, tẽngã rigimda hal wʋsgo, tɩ Rom sodaas naab ning sẽn ges tɩ b kʋ-a wã meng yeel woto: “Hakɩka, dao kãngã sɩd yaa Wẽnnaam Biiga.” (Mat. 27:54) Wõnda sodaas naabã yãa b sẽn da wa n yaand a Zezi, a sẽn yeel t’a yaa Wẽnnaam Biigã. Baa ne b sẽn nams a Zezi wʋsgã, a kell n saka Wẽnnaam tɩ wilg t’a Sʋɩtãan sɩd yaa pʋ-yagda. Bala a Sʋɩtãan ra goma neb nins fãa sẽn sak tɩ yaa Wẽnnaam n segd n yɩ yĩngr la tẽng naabã yelle, n yeel woto: “Ned na n dɩka a sẽn tar fãa n kõ a vɩɩm yĩnga.” (Zoob 2:4) A Zezi sẽn kell n sak Wẽnnaamã, a wilgame t’a Ãdem ne a Hawa me ra tõe n kell n saka Wẽnnaam, bala b makrã toom pa ta a Zezi rẽndã ye. Sẽn yɩɩd fãa, a Zezi sẽn vɩɩmd to-to wã la a kũumã fãa kɩtame tɩ b bãng vẽeneg t’a Zeova rɩta a naamã ne tɩrlem. (Karm-y Yelbũn 27:11.) Rẽ yĩnga a Zezi kũumã leb n kɩtame tɩ yɛl a taab tõog n pids bɩ? Yaa vẽeneg tɩ n-ye!
16, 17. a) Bõe n kɩt t’a Zeova kaset rãmb nins sẽn vɩɩmd nand t’a Zezi wa wã tõog n paam t’a Zeova geelg-b wa nin-tɩrse? b) Wãn to la a Zeova keo a Biigã, a sẽn sak-a wã yĩnga, la bõe la Soaal a Zezi Kirist ket n maandẽ?
16 Neb wʋsg n tũ Wẽnnaam a Zeova nand t’a Zezi wa tẽngã zugu. Wẽnnaam geelga nin-kãensã wa nin-tɩrse, n pʋlem-b me t’a na n wa vʋʋg-b lame. (Ezai 25:8; Dan. 12:13) La bõe la Wẽnnaam a Zeova sẽn yaa sõng soabã tik n kɩt tɩ neb sẽn yaa koangdb paam bark kãensã fãa? Biiblã leoka sok-kãngã, n yeel woto: “Yaa [a Zezi Kirist] la Wẽnnaam pĩnd n yãk n kõ, neb nins sẽn na n tẽ bãmbã yel-wẽnã yiisg yĩnga, ne b zɩɩmã. Woto na n wilga Wẽnnaam tɩrlem. Bãmb sẽn bas nebã n ka sɩbg-b b yel-wẽn nins b sẽn dag n maan Wẽnnaam sũ-marã wakatã yĩnga, bãmb da rat n wilga b tɩrlmã masã wakatã, tɩ nebã na bãng tɩ bãmb yaa tɩrga, bãmb sẽn kɩtd tɩ ned ning sẽn tẽed a Zezi wã zemsã.”—Rom 3:25, 26, Kãab-paalgã Koe-noogo. *
17 A Zeova keoa a Zezi n vʋʋg-a, n kõ-a ziir sẽn yɩɩd ziir ning a sẽn da tar nand t’a wa tẽng zugã. Rẽ tɛka, a lebga malɛk sẽn tar ziir kãsenga, n pa tõe n ki ye. (Heb. 1:3) Soaal a Zezi Kirist lebga maan-kʋʋdb kãsem la rĩmã. La a ket n sõngda a karen-biisã tɩ b wilgd nebã Wẽnnaam tɩrlmã. D sẽn paam tɩ yaa d saasẽ Ba a Zeova n keood neb nins fãa sẽn wilgd nebã yẽ tɩrlmã, la b rɩkd a Biigã togs-n-taar n maand a raabã wakat fãa wã, sɩd noogda d sũuri.—Karm-y Yɩɩl Sõamyã 34:4; Hebre dãmb 11:6.
18. Bõe yell la sõsg ning sẽn pʋgdã na n gome?
18 Sẽn sɩng ne a Abɛlle, neb nins sẽn da tũud a Zeova wã paama zood ne-a, b sẽn tall tẽeb la b ra gũud yageng ning a Zeova sẽn pʋlmã ne b sũy fãa wã yĩnga. A Zeova ra miime t’a Biigã na n tõog n kell n sak-a lame, la t’a kũumã na n yɩɩ rondo, “dũniyã yel-wẽnã” yĩnga. (Zã 1:29) A Zezi kũumã leb n nafda neb wʋsg rũndã-rũndã. (Rom 3:26) La wãn to la Kirist kũumã sẽn yaa rondã tõe n naf yãmba? Sõsg ning sẽn pʋgdã gomda rẽ yelle.
[Tẽngr not rãmbã]
^ sull 7 Tʋm-tʋmd a Poll sẽn sõdg Yɩɩl Sõamyã 40:7-9 to-to wã zemsa ne lebgr ning b sẽn boond tɩ Sɛptãntã sẽn yaa ne gɛrkã. Be b paasa gom-kãensã: “Yãmb segla yĩng n kõ maam.” Biiblã seb-pindem nins sẽn be rũndã-rũndã wã baa a ye pʋgẽ, d pa yãt gom-kãensã ye.
^ sull 16 Ges-y yʋʋmd 2010 sa-sik kiuug rasem 15 Gũusg Gasgã ne farendã seb-neng a 6-7.
Y na n leokame tɩ bõe?
• Wãn to la b rõd Wẽnnaam t’a pa rɩt a naamã ne tɩrlem?
• Bõe yĩng t’a Zezi reeg lisgu?
• A Zezi kũumã kɩtame tɩ bõe tõog n maane?
[Zãmsgã sogsgã]
[Foto, seb-neng 15]
Yãmb mii a Zezi lisgã sẽn da makd bũmb ningã bɩ?