D wilgd ne d no-goamã tɩ d nonga d taabã
D wilgd ne d no-goamã tɩ d nonga d taabã
“Yẽ gomda yam goama. La a sagenda neb ne nonglem.”—YEL. 31:26.
1, 2. a) Zʋg-sõng bʋg la sẽn tũud-b a Zeova wã segd n talle? b) Bõe yell la d na n gom sõs-kãngã pʋgẽ?
PĨND wẽndẽ wã, rĩm a Lemuɛll ma wã wilg-a-la yɛl sẽn tar yõod wʋsgo. Yel-kãens sʋka, a togsa bũmb sẽn wilgd tɩ pag yaa pʋg-sõngo. A yeelame tɩ pʋg-sõng “gomda yam goama. La a sagenda neb ne nonglem.” (Yel. 31:1, 10, 26 *) Pagb nins sẽn tar yamã, la neb nins fãa sẽn dat n ta Wẽnnaam a Zeova yamã segd n wilgda ne b no-goamã tɩ b nonga b taabã. (Karm-y Yelbũn 19:22.) Neb nins fãa sẽn tũud a Zeova ne b sũy fãa wã me goam segd n wilgda vẽeneg tɩ b nonga b taabã.
2 Nonglem ning yell d sẽn gomd sõs-kãngã pʋgẽ wã yaa bõe? Ãnd dãmb la d segd n wilg nonglem kãngã? Bõe n na n sõng tõnd tɩ d wilg ne d no-goamã tɩ d nonga d taabã? Wãn to la rẽ tõe n sõng tõnd tɩ d sõsd ne d zakã rãmb la ne d tẽed-n-taasã sõma?
D sẽn tõe n wilg nonglem hakɩk to-to
3, 4. a) Nonglem ning yell d sẽn gomd sõs-kãngã pʋgẽ wã yaa bõe? b) Bõe n kɩt tɩ nonglem kãng yaa toor ne maan-neere?
3 Wa d sẽn zoe n wilgã, nonglem ning yell d sẽn gomdã yaa sõmblem me. Sẽn dat n yeel tɩ d wilgd neb a taabã tɩ b yell pak-d lame, n maan bũmb takɩ n sõng-ba, bɩ n tũnug ne d no-goamã n wilg tɩ d nong-b lame. A rat n yeelame me tɩ d bao d taabã neere, d sẽn nong-bã yĩnga. Leb n yaa ned sẽn na n sak ne yamleoog n sõngd a to ne a sũur fãa, hal tɩ bũmb ning a sẽn dat ne a soabã wa pidsi.
4 Pa ned sẽn na n maan a to neer bal la d tõe n yeel t’a tara nonglem ning yell d sẽn gomdã ye. Bala d tõe n maana ned buud fãa neere, baa ned d sẽn da zɩ n yã. Wala makre, tʋm-tʋmd a Poll ne neb 275 wã sẽn wa n kẽ koom koglg n togd sor tɩ tek n sãamã, Malt sẽn yaa ko-sʋk tẽngã neb maan-b-la neere, baa ne b sẽn da zɩ n yã-bã. (Tʋʋ. 27:37–28:2) La nonglem ning yell d sẽn gomdã yaa nonglem hakɩka, sẽn be neb sẽn zoe n tar zood ne taab sʋka. * Yaa nonglem kãng n kɩt tɩ Kɛn nebã maan “Israɛll nebã neer wakat ning bãmb sẽn yi Ezipt n watẽ wã.”—1 Sãm. 15:6.
Bʋgsgã la pʋʋsgã yaa tɩlae
5. Bõe n na n sõng tõnd tɩ d tõog d zɩlemdã?
5 Yɩl n wilg ne d no-goamã tɩ d nonga d taabã pa nana ye. Karen-biig a Zak goma zɩlemdã yelle, n yeel woto: “Ned baa a ye ka tõe n tõog a zɩlemd ye. A yaa bõn-wẽng tɩ ned ka tõe n gɩdg-a ye, la a pida ne zẽnem toaaga.” (Zak 3:8) Bõe n tõe n sõng tõnd tɩ d tõog d zɩlemdã, baa ne a tõogr sẽn yaa toogã? Gomd a Zezi sẽn yeel a wakatẽ tũudmã taoor dãmb sõngda tõnd tɩ d bãng rẽ. A yeel-b-la woto: “Sũur sẽn pid ne bũmb ningã, noor gomda bõn-kãense.” (Mat. 12:34) Sẽn na yɩl n tõog n wilg ne d no-goamã tɩ d nonga d taabã, yaa tɩlae tɩ tõnd mengã tall nonglem. Bɩ d ges bʋgsgã la pʋʋsgã sẽn tõe n sõng tõnd to-to tɩ d tall nonglem.
6. Bõe yĩng tɩ d segd n bʋgs bũmb nins a Zeova sẽn maan tɩ wilgdẽ t’a nong-d lame wã zugu?
6 Biiblã wilgdame tɩ Wẽnnaam a Zeova “nonglmã yaa wʋsgo.” (Yik. 34:6) Yɩɩl-gʋlsd a ye me yeela woto: ‘Zeova, dũniyã pida ne yãmb nonglem.’ (Yɩɩl 119:64) Biiblã tara kibay wʋsg sẽn gomd a Zeova sẽn maan yɛl toor-toor sẽn wilgd t’a nonga a nin-buiidã yelle. D sã n maag d yĩng n bʋgs a ‘Zeova sẽn maanã’ zugu, na n sõng-d lame tɩ d tʋlg n dɩk a togs-n-taar nonglmã wɛɛngẽ.—Karm-y Yɩɩl Sõamyã 77:13.
7, 8. a) Bõe la a Zeova maan tɩ wilg t’a ra nonga a Lot ne a zakã rãmba? b) A Davɩɩd manesem yɩɩ wãna, Wẽnnaam sẽn zoe a nimbãanegã?
7 Wala makre, tags-y n ges-y a Zeova sẽn fãag a Abrahaam kẽem biig a Lot ne a zakã rãmb to-to, a sẽn wa n dat n sãam Sodom sẽn yaa tẽng ning b sẽn da beẽ wã. Sẽn wa n ket bilf t’a Zeova sãam tẽngã, malɛgs nins sẽn da wa a Lot nengẽ wã sagl-a lame t’a peeg a zakã rãmb tɩ b zoe n yi tao-tao. La Biiblã wilgame tɩ “yẽ sẽn kaoosdã, [malɛgsã] gãda yẽ ne a pagã la a kom-pugli a yiibã nusi n tɛ bãmb n yiis tẽngã pʋgẽ, Zusoabã sẽn zoe yẽ nimbãanegã yĩnga.” D sã n tags kiba-kãngã zugu, rẽ yĩnga pa noogd d sũur la kɩt tɩ d bãng tɩ woto wilgda Wẽnnaam nonglmã sɩda?—Sɩng. 19:16, 19.
8 D gom pĩnd wẽndẽ Israɛllã rĩm a Davɩɩd me yelle. A ra yeela woto: “Yaa [a Zeova] n kõt foom f yel-wẽnã fãa sugri, la b maagd fo bãasã fãa.” A Davɩɩd sũur segd n yɩɩ noog wʋsgo, a sẽn wa n yo ne a Batseba tɩ rẽ poore, a Zeova zoe a nimbãaneg n kõ-a sugrã! A pẽga a Zeova n yeel t’a ‘nonglmã a zoɛtbã yĩng zãntlem taa saasã sẽn be yĩngri.’ (Yɩɩl 103:3, 11) D sã n bʋgsd kiba-kãensã la Biiblã kibay a taab zugu, kɩtdame tɩ d rat n wilg a Zeova tɩ d sũur yaa noogo, a sẽn nong-d wʋsgã yĩnga. Leb n kɩtdame tɩ d rat n pẽg-a la d pʋʋs-a barka. D mi-beoogã ne Wẽnnaam sã n paasdẽ, d na n datame n dɩk a togs-n-taar wakat fãa.—Ef. 5:1.
9. Bʋʋm kãseng bʋg n kɩt tɩ neb nins sẽn maand a Zeova raabã segd n wilgd wakat fãa tɩ b nonga neb a taabã?
9 Biiblã tara kibay sẽn wilgd t’a Zeova maanda yɛl toor-toor sẽn wilgd t’a nonga neb nins sẽn zoe n tar zood ne yẽ wã wʋsgo. La neb nins sẽn pa tar zood ne a Zeova wã yẽ? Rẽ yĩnga a Zeova toog kae ne nin-kãensã bɩ? Pa woto ye. Bala Luk 6:35 yeta woto: “[Wẽnnaam] maanda zɩ-beoog rãmbã ne nin-wẽnsã neere.” Biiblã le yeela woto: “[Wẽnnaam] kɩtdame tɩ bãmb wĩntoog zẽk nin-wẽns la nin-tɩrs yĩnga, la bãmb tʋmda saagã nin-tɩrs la nin-wẽns yĩnga.” (Mat. 5:45) Nand tɩ d bãng a Zeova n maand a raabã, a ra zoe n maand-d-la neere, wa a sẽn maand nebã fãa neerã. La d sẽn sɩng a raabã maanegã tɛkã, a nong-d-la ne nonglem hakɩka, nonglem sẽn tar pãng wʋsgo. (Karm-y Ezai 54:10.) Ad segdame tɩ d wilg a Zeova d mi-beoogo! Leb n yaa bʋʋm kãseng sẽn segd n kɩt tɩ d wilgd wakat fãa ne d no-goamã, la ne manesem a taab tɩ d nonga nebã.
10. Bõe yĩng tɩ pʋʋsgã tõe n sõng tõnd wʋsg tɩ d tall nonglem?
10 Pʋʋsgã tõe n sõnga tõnd wʋsgo, tɩ d tõogd n wilgdẽ tɩ d nonga d taabã. Bala, nonglmã me yaa vʋʋsem sõngã bila. (Gal. 5:22) D sã n sakd vʋʋsem sõngã sor-wilgri, d na n tõog n talla nonglem. Bũmb d sẽn tõe n maan n paam vʋʋsem sõngã yaa d sẽn na n pʋʋs a Zeova n kose. (Luk 11:13) Yaa sõma tɩ d pʋʋsd wakat fãa n kot vʋʋsem sõngã, la d sakd a sor-wilgrã. Wa d sẽn yã wã, d sã n dat n wilgd ne d no-goamã tɩ d nonga d taabã, bʋgsgã la pʋʋsgã yaa tɩlae.
Pag ne a sɩd sẽn tõe n gomd ne taab ne nonglem to-to
11. a) Bõe n wilgd t’a Zeova ratame tɩ rapã nong b pagbã? b) Rao sã n nong a paga, wãn to la a tõe n wilg rẽ ne a no-goamã?
11 Tʋm-tʋmd a Poll sagla pʋg-sɩdbã woto: “Bɩ y nong y pagbã wa Kirist sẽn nong bãmb tẽedbã n kõ bãmb meng bãmb yĩngã.” (Ef. 5:25) A Poll leb n tẽeg-b-la bũmb a Zeova sẽn da yeel a Ãdem ne a Hawa. A tẽeg-b-la woto: “Rao na n basa a ba ne a ma n zĩnd ne a paga, la bãmb b yiibã fãa na n lebga yĩng a yembre.” (Ef. 5:31) Vẽenega, a Zeova ratame tɩ pʋg-sɩdbã kell n zĩnd ne b pagbã, n nong-b wakat fãa. Rao sã n wilgd ne a no-goam t’a nonga a paga, a pa na n gomd n pukd a bãongo, wall a gomd n paoogd-a neb sʋk ye. A na n pẽgd-a-la ne sũ-noogo. (Yel. 31:28) Baa bũmb sã n wa kɩt tɩ b moorã yõsg taabã, raoã sẽn nong a pagã yĩnga, a pa na n sak n gom n ning-a yãnd ye.
12. Wãn to la pag tõe n wilg ne a no-goamã t’a nonga a sɩdã?
12 Pagbã me segd n wilgda ne b no-goamã tɩ b nonga b sɩdbã. Pag sẽn yaa kiris-ned pa segd n gomd wa dũniyã neb sẽn gomd to-to wã ye. Pag sã n ‘waoogd a sɩda,’ a sã n wa be neb sʋka, a na n gomd n pẽgda a sɩdã, tɩ kɩt tɩ nebã maneg n waoogd-a. (Ef. 5:33) B kambã taoor me, a pa na n kɩɩs a sɩdã gomd wall a yeel t’a tagsg pa zemse, a sẽn pa rat tɩ b wa pa le waoogd b ba wã yĩnga. A na n basame tɩ b sã n wa yaa b yiib bal bɩ a gom rẽ yelle. Biiblã yeta woto: “Pagb nins sẽn tar yamã manegda b yiyã.” (Yel. 14:1) Pag sã n maand woto, b zakã pʋgẽ vɩɩm na n talla yamleoogo.
13. Sẽn yɩɩd fãa, yɛ la nonglem segd n zĩndi, la bõe la pag ne a sɩd tõe n maan tɩ rẽ tõoge?
13 Baa pag ne a sɩd sã n wa be b zakẽ wã n yaa b yiib bala, b segd n kell n wilga ne b no-goamã tɩ b waoogda taaba. Tʋm-tʋmd a Poll yeela woto: “Bɩ y bas bõn-kãens fãa sẽn yaa sũ-puugri, kisgri, pʋ-toogo, kãnegre, la gom-dẽgd sẽn yit yãmb noyã pʋsẽ.” A paasa woto: “Bɩ y paas nimbãan-zoeer wʋsgo, la neerlem ne sik-m-menga, la sũ-bʋgsem ne sũ-mare. . . . Bɩ y [tall] nonglem sẽn yaa bũmb fãa loɛtg sɩd-sɩdã.” (Kol. 3:8, 12-14) Zakã pʋgẽ, kambã sã n minim n wʋmd b roagdbã sẽn gomd goam sẽn wilgd nonglem la waoogre, na n naf-b lame, la kɩt me tɩ b rat n dɩk b togs-n-taar b no-goamã wɛɛngẽ.
14. Wãn to la zak-soben-dãmbã tõe n tũnug ne b no-goamã n bels neb nins b sẽn get b yellã?
14 Yɩɩl-gʋlsdã kosa a Zeova woto: ‘Bɩ y nonglmã bels maam.’ (Yɩɩl 119:76) A Zeova sẽn maand bũmb ning n belsd a nin-buiidã tɩ tar yamleoog n yɩɩd yaa a sẽn sagend-b la a wilgd-b sorã. (Yɩɩl 119:105) Wãn to la zak-soben-dãmbã tõe n dɩk d saasẽ Ba wã togs-n-taare, n tũnugd ne b no-goamã n belsd neb nins b sẽn segd n ges b yellã? B tõe n maana woto ne b sẽn na n wilgd nin-kãensã sor la b kengd b raoodo. Zak pʋgẽ zaabr Biibl zãmsgã sɩd yaa bũmb sẽn tõe n sõng zak-soben-dãmbã tɩ b tõog n maan woto!—Yel. 24:4.
D wilgd d tẽed-n-taasã tɩ d nong-b lame
15. Wãn to la kãsem dãmbã, la neb a taab sẽn bɩ tẽebã wɛɛngẽ tõe n kogl tigingã neb ne b no-goamã?
15 Rĩm a Davɩɩd ra pʋʋsa Wẽnnaam n yeel woto: “Yãmb nonglem ne y sɩdã na n gʋʋla maam n ka bas ye.” (Yɩɩl 40:12) Wãn to la tigingã kãsem dãmb la kiris-neb a taab sẽn bɩ tẽebã wɛɛngẽ tõe n dɩk a Zeova togs-n-taare, n kɩt tɩ b nonglmã gʋʋl bɩ n kogl neb a taabã? D sã n tũnugd ne d no-goamã n sõngd d taabã tɩ b bãngd Wẽnnaam Gomdã sẽn yetã, wilgdame tɩ d nong-b lame.—Yel. 17:17.
16, 17. Bõe ne bõe la d tõe n maane, tɩ d no-goamã wilg tɩ d nonga d tẽed-n-taasã?
16 D sã n wa yã tɩ d tẽed-n-taag tara manesem sẽn tõe n wa kɩt t’a maan bũmb sẽn kɩɩsd Biiblã noyã, bõe la d segd n maane? Rẽ yĩnga d sẽn nong-a wã yĩnga, d pa na n sagl-a sɩda? (Yɩɩl 141:5) D sã n wa bãng tɩ d tẽed-n-taag n maan yel-wẽn-kãsenga, d sẽn nong-a wã yĩnga, d na n sagl-a lame t’a “bool Wẽnnaam tẽedbã kãsem dãmba,” sẽn na yɩl tɩ b tik-a “ne kaam ne Zusoabã yʋʋre n pʋʋs Wẽnnaam a yĩnga.” (Zak 5:14) La sẽn maan-a yel-wẽndã sã n pa togs kãsem dãmbã, tɩ tõnd me sĩnd n pa togse, pa wilgd tɩ d nonga a soabã, bɩ tɩ d rata a neer ye. Tõnd sʋka, tõe tɩ neb kẽer komsa raoodo, tõe tɩ kẽer me sũy sãamame, b sẽn tagsd tɩ b yaa b yembr wall tɩ b ka yõod yĩnga. Bũmb d fãa sẽn tõe n maan tɩ d no-goamã wilg tɩ d nonga d tẽed-n-taasã yaa d sẽn na n “bels sũ-sãoong rãmbã.”—1 Tes. 5:14.
17 Wẽnnaam bɛ sã n wa wɩt d tẽed-n-taasã, d manesem segd n yɩɩ wãna? D pa segd n bas tɩ d yam yo ne d tẽed-n-taasã sã n sɩd sakda Wẽnnaam ye. D pʋd n pa segd n kelg a soabã wall d leok-a ye. La sã n mik t’a na n sak n kelga tõndo, d tõe n sok-a lame n ges a sã n sɩd tara kaset sẽn wilgd rẽ. Wẽnnaam nin-buiidã bɛɛb sã n wa sok tõnd n dat n bãng d tẽed-n-taas zĩig sẽn na yɩl n nams-ba, d sẽn nong d tẽed-n-taasã yĩnga, d pa na n sak n togs ye.—Yel. 18:24.
Sẽn baood-a “sõmblem, a paamda vɩɩm”
18, 19. Bõe yĩng tɩ d manesmã fãa pʋgẽ, d segd n modg n wilg ne d no-goamã tɩ d nonga d tẽed-n-taasã?
18 Wakat fãa, d manesmã ne d tẽed-n-taasã segd n wilgdame tɩ d nong-b lame. Baa zu-loees sasa, d segd n ket n wilgda ne d no-goamã tɩ d nonga d taabã. Israɛll nebã nonglem sẽn wa n lebg “wa meenem sẽn loogd tao-tao” wã, a Zeova sũur sãama ne-ba. (Oze 6:4, 6) La d sã n wilgd wakat fãa tɩ d nonga d taabã, a Zeova sũur yaa noogo. D ges a sẽn na n ning neb nins sẽn maand woto wã bark to-to.
19 Yelbũn 21:21 wã yeta woto: “Ned sã n baood tɩrlem ne sõmblem, a paamda vɩɩm ne tɩrlem la waoogre.” Bark nins nin-kãens sẽn na n paamã sʋka, vɩɩm naagame. La pa wakat bilf pʋgẽ bal la b na n vɩɩmd ye. B na n vɩɩmda wakat sẽn ka sate. A Zeova na n sõng-b lame tɩ b wa “paam vɩɩm hakɩkã.” (1 Tɩm. 6:12, 19, Kãab-paalgã Koe-noogo) Bɩ d maand d sẽn tõe fãa n wilgdẽ tɩ d nonga d taabã la d ‘zoet taab nimbãanega.’—Zak. 7:9.
[Tẽngr not rãmbã]
^ sull 1 Hebre wã gom-bil ning b sẽn lebg vɛrse kãngã pʋgẽ tɩ “nonglmã” tɩ d gomd a yell sõs-kãngã pʋgẽ wã võorã pa nonglem bal ye. Moorã Biiblã pʋgẽ, b lebg-a lame me tɩ “nonglem, sõmblem, maan-neere, wall nimbãan-zoeere,” bala moorã pa tar gom-bil sẽn tõe n bilg a võorã fãa ye. Sõsgã pʋgẽ, nonglem ning yell d sẽn gomdã, la vɛrse rãmb nins fãa sẽn gomd sõmblem, maan-neer la nimbãan-zoeer yellã, yaa Hebre wã gom-bi-kãngã.
^ sull 4 Y sã n dat kibay a taab sẽn wilgd tɩ nonglem ning yell d sẽn gomdã yaa toor ne kɩs-sɩda, nonglem la maan-neere, bɩ y ges yʋʋmd 2002 sigr kiuugã pipi daar Gũusg Gasgã seb-neng a 9-10, 15-16.
Y tõe n wilga a võor bɩ?
• Nonglem ning yell d sẽn gomã yaa bõe?
• Bõe n tõe n sõng-d tɩ d tõog n wilgd ne d no-goamã tɩ d nonga d taabã?
• Wãn to la pag ne a sɩd tõe n wilg ne b no-goamã tɩ b nonga taaba?
• D manesmã fãa pʋgẽ, bõe la d tõe n maan tɩ d no-goamã wilg tɩ d nonga d tẽed-n-taasã?
[Zãmsgã sogsgã]
[Foto, seb-neng 25]
A Davɩɩd pẽga a Zeova, a nonglmã yĩnga
[Foto, seb-neng 26]
Yãmb maanda y zak pʋgẽ zaabr Biibl zãmsgã n pa vaandẽ bɩ?