Tõnd taoor soabã sẽn maand bũmb ninsã
Tõnd taoor soabã sẽn maand bũmb ninsã
“A kẽnga wa tõogda, n na n tõoge.”—WIL. 6:2, KÃAB-PAALGÃ KOE-NOOGO.
1, 2. a) Wãn to la Biiblã bilgd Kiristã sẽn maand bũmb ning yʋʋmd 1914 tɛkã? b) Kiristã sẽn lebg Rĩmã tɛka, bõe ne bõe la a maan-yã?
YƲƲMD 1914 pʋgẽ la a Zeova kɩt tɩ Kiristã lebg saasẽ Rĩungã Rĩma. Yãmb mamsda Kiristã wãn-wãn rũndã-rũndã? Rẽ yĩnga y tagsdame t’a yaa rĩm sẽn tagsd bũmb wʋsg yelle, n sulgd n get tẽngã zug wakat-wakat bal n na n bãng a tigingã neb yɛl sẽn yaa to-to bɩ? Sã n yaa woto, y segd n demsa y tagsgã. Bala Yɩɩl Sõamyã sebrã la Wilgr sebrã wilgdame t’a yaa rĩm sẽn tar pãng n zao wed-moaaga, la t’a kẽnga wa tõogda, n na n tõog a bɛɛbã fãa.—Wil. 6:2; Yɩɩl 2:6-9; 45:2-5.
2 Kiristã sẽn deeg naamã poore, pipi bũmb a sẽn maan yaa a sẽn zab ne “dragõ wã ne [a] malɛk rãmbã” n tõog-bã. Kiristã sẽn yaa malɛgsã naab a Mikaɛllã lʋɩɩ a malɛgsã taoore, tɩ b rig a Sʋɩtãan ne a zĩn-dãmbã tɩ b yi saasẽ n sig tẽngã zugu. (Wil. 12:7-9) Rẽ poore, a Zezi b sẽn boond tɩ “kaoolã koɛɛg soabã” tũu a Ba wã, tɩ b wa ges neb nins fãa sẽn da yet tɩ b yaa kiris-nebã. (Mal. 3:1) A kaoa kiris-neb ne yʋʋrã sẽn yaa “Babilon kãsengã” pʋgẽ neb nins sẽn tar taal n yɩɩdã bʋʋdo. A mikame tɩ b tara taale, zɩɩm wʋsg b sẽn daag yĩngã, la b sẽn kẽes b toog dũniyã politikã pʋgẽ n dẽgem b mens Wẽnnaam nifẽ wã yĩngã.—Wil. 18:2, 3, 24.
Kiristã yɩlga a tʋm-tʋmdã
3, 4. a) Bõe la Kiristã maan-yã, a sẽn yaa a Zeova “kaoolã koɛɛg soabã”? b) A Zeova ne a Zezi sẽn wa n ges neb nins sẽn yet tɩ b yaa kiris-nebã, bõe la b yã-yã? d) Kiristã sẽn yaa tigingã taoor soabã yĩngã, bõe la a maan-yã?
3 A Zeova ne a “kaoolã koɛɛg soabã” sẽn wa n ges neb nins sẽn da yet tɩ b yaa kiris-nebã, b mikame tɩ b sʋkã, sull n da be be t’a nebã yaa kiris-neb hakɩka, n da pa naag kiris-neb ne yʋʋrã Egiliiz rãmbã ye. La baasgo, kiris-nin-kãensã sẽn da paam vʋʋsem sõngã zaeebã, bɩ “a Levi yagensã” me ra segd n paama yɩlgre. Yɩɩ wa no-rɛɛs a Malaki sẽn da reng n togsã. A ra yeela woto: “[A Zeova] na n yɩɩ wa boaag bugum la sãnfãnde. Bãmb na n zĩnda wa ned sẽn ning wanzuri boaag pʋgẽ. Bãmb na n manega a Levi yagensã wa ned sẽn manegd sãnem ne wanzuri. La bãmb na n zãa kũun n tɩ kõ Zusoabã ne tɩrlem.” (Mal. 3:3) A Zeova kɩtame t’a Zezi Kirist sẽn yaa a “kaoolã koɛɛg soabã” yɩlg nin-kãensã b sẽn boond tɩ Wẽnnaam Israɛllã.
4 Kiristã mikame me tɩ nin-kãensã sẽn paam vʋʋsem sõngã zaeebã maanda b sẽn tõe fãa n sõngd Wẽnnaam nin-buiidã tẽebã wɛɛngẽ. Yʋʋmd 1879 wã tɛka, baa sẽn mi n pa nana wã, b modgdame n yiisd Gũusg Gasgã sẽn yaa sebr sẽn wilgd Biiblã sẽn yet bũmb ning Wẽnnaam Rĩungã wɛɛngẽ wã. A Zezi reng n wilgame tɩ yẽ sã n “wa” na n ges a zakã neb “dũniyã sɛɛb wakate,” a na n mika tʋm-tʋmd sẽn ‘moenegd a zakã wa sẽn zemse.’ A wilgame t’a na n ninga tʋm-tʋmd kãng barka, la a “kõ-a noor t’a yɩ a zakã fãa yel-gɛta.” (Mat. 24:3, 45-47) Kiristã sẽn yaa tigingã taoor soabã yĩnga, a tũnugda ne “tʋm-tʋmd sẽn tũud sɩd la sẽn tar yamã,” n get bũmb nins fãa b sẽn sigl tẽngã zug Rĩungã yĩngã yelle. Kiristã tũnugda ne Siglgã taoor lʋɩtb Sull n kõt neb nins sẽn paam vʋʋsem sõngã zaeebã sẽn yaa a “zakã nebã” sor-wilgri, la a kõt “piis a taabã” me sor-wilgri.—Zã 10:16.
Dũniyã bõn-koaadlã tigsgu
5. Bõe la a Zã yã-yã, tɩ yaa bũmb Mesi wã sẽn na n wa maan a naamã reegr poore?
5 Wẽnnaam vẽnega tʋm-tʋmd a Zã t’a yã bũmb Mesi wã sẽn na n wa maan “Zusoabã raar” sasa, rat n yeel tɩ yʋʋmd 1914 tɛka, a naamã reegr poore. A yeela woto: “Mam gesame, la gese! sawad-pɛɛlg n be be. La . . . sẽn wẽnd ninsaal n zao a zugu, la sãnem maanf n fõg bãmb zugu, la goeeg sẽn dɩt bee bãmb nugẽ.” (Wil. 1:10; 14:14) Rẽ poore, a Zã wʋma malɛk sẽn yi a Zeova nengẽ n yeel sẽn zãad-a goeegã t’a sɩng wʋrb tɩ bala, “dũniyã bõn-koaadlã bɩɩme.”—Wil. 14:15, 16.
6. Bõe n na n maan pʋʋgã pʋga, nand tɩ tigisgã wakat ta?
6 “Dũniyã bõn-koaadlã” wʋrb yell b sẽn gomã tẽegda tõnd a Zezi yel-bũnd ning sẽn gomd ki ne nadens yellã. A maka yẽ mengã ne rao sẽn fẽrg ki a pʋʋgẽ, n gũudẽ n na n wa kẽeb bi-sõma sẽn makd “saasẽ soolem kambã,” bɩ kiris-neb hakɩk sẽn paam vʋʋsem sõngã zaeeb n na n wa naag a Zezi n dɩ naam Rĩungã pʋgẽ wã. La yʋng sasa, bɛ, rat n yeel t’a Sʋɩtãan wa n fẽrga nadense, rat n yeel tɩ “wẽng soabã kamb” ki wã sʋka. La pʋʋgã soab yeela a tʋm-tʋmdbã tɩ b bas ki wã ne nadensã fãa tɩ b bɩ ne taaba, hal tɩ ta tigisg wakate, rat n yeel tɩ “dũniyã sɛɛb” wakate. Wakat kãng sã n wa ta, a Zezi na n tʋma a malɛgsã tɩ b tɩ welg ki wã ne nadensã.—Mat. 13:24-30, 36-41.
7. Wãn to la Kiristã wʋrd “dũniyã bõn-koaadlã”?
7 Rũndã-rũndã, a Zezi lʋɩta tigisg tʋʋmd ning sẽn maand dũniyã gill zugã taoore, tɩ pidsd bũmb ning a Zã sẽn yã wã. “Dũniyã bõn-koaadlã” wʋrb sɩnga ne neb 144 000 sẽn yaa “saasẽ soolem kambã,” rat n yeel tɩ neb nins a Zezi sẽn mak ne ki a yel-bũndã pʋgẽ wã kellã tigisgu. Welgr ning sẽn be kiris-neb hakɩkã ne kiris-neb ne yʋʋrã sʋkã wa n lebga vẽeneg dũni gill pipi zabrã poore, hal n kɩt tɩ b sɩng “dũniyã bõn-koaadlã” yaoolem wʋrbã, rat n yeel tɩ piis a taabã tigisgu. Nin-kãensã pa “saasẽ soolem kamb” ye. B yaa neb “kʋʋng” sẽn sakd Rĩungã. Yaa neb sẽn yit “soolem fãa, la buud fãa, la neb sẽn gomd goam toɛ-toɛya.” B sakda Mesi Rĩungã ne yamleoogo. Yaa Kirist Zezi ne neb 144 000 sẽn na n naag-a n dɩ naam saasẽ wã fãa sẽn naag taab la b sẽn boond tɩ Mesi Rĩungã.—Wil. 7:9, 10; Dan. 7:13, 14, 18.
Kiristã lʋɩta tigimsã taoore
8, 9. a) Bõe n wilgd tɩ tigingã yɛl sẽn yãk a toogo, Kiristã geta tigingã ned kam fãa tʋʋm ne a manesem me? b) “Sʋɩtãanã sãmbd” bʋs la d segd n gili?
8 Sõsg ning sẽn loogã pʋgẽ, d yãame tɩ pipi kiris-nebã wakatẽ, Kiristã ra gũusd n geta tiging fãa yɛl sẽn yaa to-to. Rũndã-rũndã me, Kiristã sẽn deeg naam tɩ b kõ-a “pãng fãa sẽn be saasẽ la sẽn be dũniyã,” a lʋɩta tigimsã sẽn be dũniyã gill zugã taoore, la a kõt b yel-gɛtbã sor-wilgri. (Mat. 28:18; Kol. 1:18) A Zeova kɩtame tɩ Kiristã yɩ b tẽedbã fãa, rat n yeel tɩ kiris-neb nins sẽn paam vʋʋsem sõngã zaeebã Zusoab ne bũmb fãa. (Ef. 1:22) Woto kɩtame tɩ bũmb pa maand a Zeova Kaset rãmbã tigims sẽn yɩɩd 100 000 baa a ye pʋgẽ tɩ Kiristã pa bãng ye.
9 A Zezi kɩtame tɩ b taas pĩnd wẽndẽ Tiyatiir tigingã koɛɛga, n yeel-b woto: “Gese, Wẽnnaam Biigã sẽn tar nin sẽn wẽnd bug-witmã . . . yetame tɩ yaa: ‘Mam bãnga yãmb tʋʋmã.’ ” (Wil. 2:18, 19) A zaba tiging-kãng nebã, b sẽn da yood la b ra maand sẽn noom bãmb balã yĩnga. A yeel-b-la woto: “Mam mii nebã ratem ne b sũyã, la mam na n kõo yãmb ned kam fãa sẽn zems a tʋʋmã.” (Wil. 2:23) Gom-kãngã wilgdame tɩ Kiristã pa get tiging fãa yɛl sẽn yaa to-to wã bal ye. A geta tigingã ned kam fãa tʋʋm ne a manesem sẽn yaa a soab me. La a Zezi pẽga Tiyatiir tigingã neb nins sẽn da “ka zãmsd bũmb nins sẽn boond tɩ Sʋɩtãanã sãmbdã.” (Wil. 2:24) Rũndã-rũndã me, a sũur nooma ne kom-bɩɩs la kãsemb nins sẽn gũusd n pa rat n bao n bãng “Sʋɩtãanã sãmbdã” ne ẽntɛrnetã la nen-kɛglem ze-video rãmbã tũnugrã, bɩ n pa tagsd wa dũniyã nebã sẽn tagsd tɩ f tõe n maana f sẽn dat tɩ yell kae wã. A sẽn ne kiris-neb wʋsg sẽn maand b sẽn tõe fãa rũndã-rũndã n tũud a sor-wilgrã daar fãa wã noom-a lame.
10. Wãn to la b bilg tigingã kãsem dãmbã sẽn paamd Kiristã sor-wilgrã, la bõe la kãsem dãmbã segd n sak n deege?
10 Kiristã yãka kãsem dãmba, n tũnugd ne-b n get tigimsã sẽn be dũniyã zugã yell ne nonglem. (Ef. 4:8, 11, 12) Pipi kiris-nebã wakat tɩ yel-gɛtbã fãa ra yaa neb sẽn paam vʋʋsem sõngã zaeebo. Wilgr sebrã pʋgẽ, b bilg-b-la wa ãds sẽn be Kirist nug-rɩtg pʋgẽ. (Wil. 1:16, 20) Rũndã-rũndã, kãsem dãmbã wʋsg bee piis a taabã sʋka. La reng tɩ b yãk ned t’a yɩ kãsem soaba, tũuda ne pʋʋsg la ne vʋʋsem sõngã sor-wilgri. Woto kɩtame tɩ d tõe n yeel tɩ nin-kãng me bee Kiristã nug-rɩtgã pʋgẽ n paamd sor-wilgri. (Tʋʋ. 20:28) Kãsem dãmbã sak n deegame tɩ Kiristã tũnugda ne sull sẽn yaa rap sẽn paam vʋʋsem sõngã zaeebo, n yaa Siglgã taoor lʋɩtb Sull n kõt a karen-biisã sẽn be tẽngã zugã sor-wilgri.—Karm-y Tʋʋm 15:6, 28-30.
“Bɩ y wa, Zusoab a Zezi”
11. Bõe yĩng tɩ d yãgd n dat tɩ d taoor soabã wa tao-tao?
11 Vẽnegr ning tʋm-tʋmd a Zã sẽn paamã pʋgẽ, a Zezi yeela naoor wʋsg tɩ yẽ wata tao-tao. (Wil. 2:16; 3:11; 22:7, 20) Yaa vẽeneg t’a ra gomda a sẽn na n wa sãam Babilon kãsengã la a Sʋɩtãan dũniyã sẽn yaa wẽngã babs a taabã yelle. (2 Tes. 1:7, 8) Tʋm-tʋmd a Zã sẽn da kʋʋlã sẽn da yãgd n dat n yã bũmb nins fãa b sẽn da pĩnd n togs tɩ be yamleoogã pidsgã, a yeela woto: “Amina! Bɩ y wa, Zusoab a Zezi.” Tõnd sẽn vɩ dũni-wẽn-kãngã saabã wakatã, d me yãgdame n dat n yã d taoor soab la d rĩmã sẽn na n wa kɩt t’a Ba wã yʋʋr paam waoogre, la a wilg me tɩ yaa a Ba wã bal n segd n yɩ yĩngr la tẽng naabã.
12. Bõe la Kiristã segd n maan n baas nand tɩ b bas sobd nins sẽn na n sãam dũniyã?
12 A Zezi sã n wa na n sãam a Sʋɩtãan dũniyã, rẽ tɩ neb 144 000 sẽn yaa Israɛll sẽn yaa Wẽnnaam dẽndã yaoolem soabã paama yaoolem bãndã ningri. Biiblã wilgda vẽeneg tɩ nand tɩ b bas sobd nins sẽn na n sãam a Sʋɩtãan dũniyã, rẽ tɩ neb 144 000 fãa paama yaoolem bãndã ningri.—Wil. 7:1-4.
13. “To-kãsengã” pipi babgã sasa, bõe la Kiristã na n maan n wilg t’a sɩng n waame?
13 Nebã wʋsg pa mi tɩ Kiristã “waoongã” sɩnga yʋʋmd 1914 pʋgẽ ye. (2 Pɩɛ. 3:3, 4) La ka la bilfu, a na n sãama a Sʋɩtãan dũniyã babs toor-toorã, tɩ lebg vẽeneg t’a sɩng n waame. Kiristã sã n wa na n sãam “yel-wẽnã rao” sẽn yaa kiris-neb ne yʋʋrã tũudmã taoor dãmb sẽn naag taabã, na n sɩd wilgame t’a waame. (Karm-y 2 Tesalonik rãmb 2:3, 8.) Woto na n yɩɩ kaset sẽn wilgd tɩ yaa a Zeova n yãk Kiristã t’a kaood bʋʋd yẽ yʋʋr yĩnga. (Karm-y 2 Tɩmote 4:1.) Yaa “Babilon kãsengã” babg ning sẽn tar taal n yɩɩdã la b na n deng n sãame. Rẽ poore, b na n sãama ziri tũudmã zãng fasɩ. A Zeova na n ninga nanambsã yamẽ tɩ b sãam pʋg-yood-kãngã. (Wil. 17:15-18) Woto n na n yɩ “to-kãsengã” pipi babgã.—Mat. 24:21.
14. a) Bõe yĩng tɩ b na n boog to-kãsengã pipi babgã kaoosgã? b) “Ninsaal Biigã bãnd” pukr na n kɩtame t’a Zeova nin-buiidã bãng bõe?
14 A Zezi wilgame tɩ b na n booga to-kãsengã kaoosgã, “nin-tũusdsã,” rat n yeel tɩ kiris-neb nins sẽn paam vʋʋsem sõngã zaeeb n ket tẽngã zugã yĩnga. (Mat. 24:22) A Zeova pa na n sak tɩ ziri tũudmã sãoong mad kiris-neb nins sẽn paam vʋʋsem sõngã zaeebã ne b tũud-n-taasã sẽn yaa piis a taabã ye. A Zezi paasame tɩ “ra-kãens toogã zugẽ,” bãnd n na n puk wĩntoogã, kiuugã, la ãdsã pʋsẽ, la tɩ “wakat kãnga Ninsaal Biigã bãnd na n puka yĩngri.” Woto yĩnga, “dũniyã buud fãa na n wiisame.” La pa na n yɩ woto ne kiris-neb nins sẽn paam vʋʋsem sõngã zaeeb n saagd n na n tɩ vɩɩmd saasẽ wã ne b tũud-n-taasã sẽn saagd n na n vɩɩmd tẽngã zugã ye. B na n ‘doogame n nak n ges yĩngri, tɩ bala b fãagrã kolgame.’—Mat. 24:29, 30; Luk 21:25-28.
15. Kiristã sã n wa, bõe la a na n maane?
15 Nand tɩ Ninsaal Biigã tõog a bɛɛbã fãa, a na n maana bũmb a to sẽn na n wilg t’a waame. A pĩnd n togsa woto: “Ninsaal Biigã sã n wa ne naam la ne b malɛk rãmbã fãa, b na n zaoonda b naam geer zugu. Buudã fãa na n tigma b taoore. Bãmb na n welga bãmb ne taab wa pe-kɩɩm sẽn welgd a piis ne a bʋʋse. La bãmb na n ninga piisã b rɩtgo, la b ning bʋʋsã b goabga.” (Mat. 25:31-33) Woto wilgda Kiristã sẽn na n wa kao bʋʋd n welg “buudã fãa” neb zĩis a yiibã. “Piisã” yaa neb nins sẽn sak n sõng Kiristã ba-biis sẽn yaa kiris-neb nins sẽn paam vʋʋsem sõngã zaeeb n da be tẽngã zugã. “Bʋʋsã” yaa neb nins ‘sẽn ka sak tõnd Zusoab a Zezi Koe-noogã.’ (2 Tes. 1:7, 8) Piisã b sẽn bool tɩ “nin-tɩrsã na n paama vɩɩm sẽn ka sɛta.” Bʋʋsã yẽ na “n paama sɩbgr” bɩ sãoong wakat fãa yĩnga.—Mat. 25:34, 40, 41, 45, 46.
A Zezi sẽn na n baas a tõogrã to-to
16. Wãn to la Kiristã sẽn yaa tõnd taoor soabã na n baas a tõogrã?
16 Kiristã na-rɩt-n-taasã fãa sã n wa paam bãndã, t’a welg neb nins a sẽn mak ne piisã n ning a rɩtg tɩ b segd ne fãagr poore, a na n kell n tõogame. (Wil. 5:9, 10; 6:2) Kiristã na n lʋɩya malɛgs sẽn tar pãng taoore, a ba-biisã sẽn vʋʋgã sẽn naage, n sãam dũniyã politikã, a sodaasã la a leebgã siglsã fãa a Sʋɩtãan sẽn so wã. (Wil. 2:26, 27; 19:11-21) Kiristã sã n wa sãam a Sʋɩtãan dũni-wẽngã tõr la a na n baas a tõogrã. Rẽ poore, a na n loba a Sʋɩtãan ne a zĩn-dãmbã bog-zulung pʋgẽ tɩ b pa be yʋʋm tusri.—Wil. 20:1-3.
17. Kiristã naamã sẽn na n kaoos yʋʋm tusrã sasa, bõe la a na n kɩt tɩ piis a tãabã paame, la d segd n yãka yam n maand bõe?
17 Tʋm-tʋmd a Zã pĩnd n goma “kʋʋn-kãsengã” neb sẽn yaa piis a tãabã sẽn na n põs-b to-kãsengã sãoongã yelle, n yeel woto: “Pe-bilã sẽn be geerã sʋkã na n dɩlga bãmba, la b na n talla bãmb n ta vɩɩm ko-bunds zĩisẽ.” (Wil. 7:9, 17) Hakɩka, Kiristã naamã sẽn na n kaoos yʋʋm tusrã sasa, a na n ket n wilgda piis a taabã sẽn sɩd kelgd a koɛɛgã sore, la a kɩt tɩ b paam vɩɩm sẽn ka sɛta. (Karm-y Zã 10:16, 26-28.) Bɩ d modg n ket n tũud d taoor soabã sẽn yaa rĩmã masã tɛka, la dũni-paalg ning a Zeova sẽn pʋlem-dã pʋgẽ me!
D lebg n tẽege
• Kiristã sẽn deeg naamã poore, bõe la a maan-yã?
• Ãnd dãmb la Kiristã tũnugd ne n wilgd tigimsã sore?
• Kiristã sẽn yaa tõnd taoor soabã sẽn na n wa wã võor yaa bõe?
• Wãn to Kiristã na n kell n wilgd tõnd sor dũni-paalgã pʋgẽ?
[Zãmsgã sogsgã]
[Foto, seb-neng 32]
A Sʋɩtãan dũniyã sẽn yaa wẽngã sãoong na n wilga vẽeneg tɩ Kiristã waame