Kom-bɩɩse, ra sak-y tɩ y taabã kɩt tɩ y maan wẽng ye
Kom-bɩɩse, ra sak-y tɩ y taabã kɩt tɩ y maan wẽng ye
“Bɩ y kɩt tɩ yãmb goamã . . . paam yamsem noom, la y bãng sẽn zems n leok ned kam fãa.”—KOL. 4:6.
1, 2. Kom-bɩɩs wʋsg tagsg yaa wãn b sẽn segd n yɩ toorã wɛɛngẽ, la bõe yĩnga?
SÃMBG sẽn ka be, y zoe n wʋma b sẽn gomd tɩ y taabã tõe n yɩɩ sabab tɩ y maan wẽnga, wall tõe meng tɩ y taab n zoe n mak n na n kɩt tɩ y maan sẽn pa segde. Tõe tɩ ned zoe n sagl-y lame n tʋlg tɩ y maan bũmb y sẽn mi tɩ yaa wẽnga. A buudã sã n paam-yã, y tagsg yaa wãna? Yʋʋm 14 bi-bɩɩg a yembr yʋʋr sẽn boond t’a Christopher yeela woto: “Wakat ninga, yaa wa m na n tiig n menema zĩig pʋgẽ, wall m sak n maand wa m karen-bi-taasã, n da le yɩ toor ne-b ye.”
2 Yãmb kom-bɩ-taasã yel-manesem la b no-goamã mi n kɩtame tɩ y wa kong n dat n maan wa bãmb bɩ? Sã n yaa rẽ, bõe yĩng tɩ yaa woto? Tõeeme tɩ yaa y sẽn tʋll n ta b yam yĩng bɩ? Pa wakat fãa la tʋlsem kãngã yaa wẽng ye. Bãng-y tɩ kom-kãsemsã me tʋllame n ta b taabã yam. Hakɩka, f yaa bi-bɩɩg tɩ f yaa kãsma, f taabã sã n pa nong f zĩigẽ, zabdame. La rẽnda y bãng tɩ y sã n nong n maand sẽn yaa tɩrga, pa wakat fãa la y taabã na n pẽg-y ye. Baa a Zezi meng pa põs zu-loe-kãngã ye. La ne rẽ fãa, a kell n maana sẽn segde. Neb kẽer tũu Wẽnnaam Biigã n sak n lebg a karen-biisi, la sãnda kisg-a lame n ‘da ka nand-a ye.’—Ezai 53:3.
Bõe yĩng tɩ yaa toog tɩ y tõog n da wõneg y taabã?
3. Bõe yĩng tɩ sak n maan wa y taabã yaa tudgri?
3 Wakat ninga, y tõe n wa rat n sak n maana wa y taabã, sẽn na yɩl tɩ b ra kisg-y ye. La woto yaa tudgri. Bala, kiris-nebã pa segd n yɩ wa kamb sẽn pa mi b nense, b sẽn tõe n yuus “wa sobg sẽn dɩkd bũmbã” ye. (Ef. 4:14) Ned tõe n kɩtame tɩ bi-bilf maan a raab nana-nana. La yãmb sẽn yaa kom-bɩɩsã, ka la bilfu, y na n lebga kãsemba. Woto yĩnga, y sã n kɩsa sɩd t’a Zeova noyã bee y neer yĩnga, segdame tɩ y tũud-ba, tɩ nafd-yã. (Tõo. 10:12, 13) Y sã n pa maand woto, yaa wa y sẽn bas tɩ y taabã wẽnd-yã. Sɩd me, y sã n basdẽ tɩ b tõogdẽ tɩ y maand wa bãmba, y lebga wa b reem-teoogo.—Karm-y 2 Pɩɛɛr 2:19.
4, 5. a) Bõe n kɩt t’a Aarõ wa sak n maan sẽn pa segde, la woto wilgda tõnd bõe? b) Bõe ne bõe la y taabã tõe n maan n tʋlg tɩ y maan wẽnga?
4 Sasa n da wa n zĩnd t’a Moiiz kẽem a Aarõ bas t’a taabã kɩt t’a maan sẽn pa segde. Israɛll nin-buiidã ra wa n yeel-a lame t’a maan bõn-naandg n kõ-b tɩ yɩ b wẽnnaam, t’a sake. A Aarõ yaool n da pa rabɛɛm ye. Bala, a ra yãaga a Moiiz Ezipt naab a Faraõ sẽn da yaa a soolmã nin-kãseng sẽn ka to wã nengẽ, n tɩ taas-a koees sẽn pa noom-a. A Aarõ yalsa nin-kãngã taoor n gom ne raoodo, n taas-a koɛɛg sẽn yit Wẽnnaam nengẽ. La Israɛll nebã sẽn wa n pẽdg-a wã, a sak n maana b raabã. Ad modgr ning d taabã sẽn maand n dat tɩ d sak b raabã sɩd tara pãnga! A Aarõ tõogame n gom n kɩɩs Ezipt rĩmã, n yaool n pa tõog n kɩɩs a taabã pẽdgrã ye.—Yik. 7:1, 2; 32:1-4.
5 Wa a Aarõ makrã sẽn wilgdã, pa kambã bal bɩ neb nins sẽn tʋll n maan wẽngã la b tõe n modg tɩ b maan sẽn pa segd ye. B tõe n modga sẽn dat-a ne a sũur fãa n maan sẽn yaa tɩrga, baa yãmb mengã. Y taabã tõe n pirsd-y lame wall b kãnd-yã, pa rẽ bɩ b yaand-y n dat tɩ y tʋm kɛgre. Bãng-y tɩ sẽn yaa bũmb ning la b maand me, yɩl n tõog n da sak b raabã pa nana ye. Bũmb sẽn tõe n sõng-y n yɩɩda, yaa y sẽn na n kɩs sɩd ne y sẽn tẽed bũmb ningã.
‘Bɩ y feesd y meng n getẽ’
6, 7. a) Bõe yĩng tɩ tar yõod tɩ y kɩs sɩd ne bũmb nins y sẽn tẽedã, la bõe n na n sõng-y tɩ y maan dẽ? b) Sogs-bʋs la y tõe n sok y meng tɩ sõng-y tɩ y maneg n kɩs sɩd ne bũmb nins y sẽn tẽedã?
6 Sẽn na yɩl n tõog tɩ y taabã ra kɩt tɩ y maan wẽnga, y segd n kɩsa sɩd tɩ y sẽn tẽed bũmb ninsã, la noy nins y sẽn tũudã yaa tɩrse. (Karm-y 2 Korẽnt dãmb 13:5.) Y sã n kɩsa sɩd tɩ bõn-kãensã yaa tɩrse, baa y yaa ned sẽn zoet yãnde, na n sõng-y lame tɩ y tall raoodo. (2 Tɩm. 1:7, 8) La ned tõe n kɩtame tɩ raood soab meng sak n maan wẽnga, sã n mik t’a pa kɩs sɩd zãng ne a sẽn tẽedã. Woto yĩnga, yɩta sõma tɩ y mao n tõog n kɩs sɩd tɩ y sẽn bãng bũmb nins Biiblã pʋgẽ wã sɩd yaa sɩda. Sɩng-y ne zãmsg nins võor wʋmb sẽn pa toogã. Wala makre, yãmb tẽeda Wẽnnaam, la y wʋmda y taab me sẽn wilgd bũmb ning sẽn kɩt tɩ b tẽed t’a sɩd beeme wã. Bɩ y sok y meng woto: “Bõe n kɩt tɩ mam sɩd sak n deeg tɩ Wẽnnaam beeme?” Sok-kãngã pa sẽn na n kɩt tɩ y wa maand sãmbs ye. Yaa sẽn na yɩl n paas y tẽebã pãnga. Y tõe n soka y meng woto me: “Bõe n kɩt tɩ mam kɩs sɩd tɩ Biiblã yaa Wẽnnaam Gomde?” (2 Tɩm. 3:16) “Bõe n kɩt tɩ m tẽed tɩ d vɩɩ ‘yaoolem wakatã’ sasa?” (2 Tɩm. 3:1-5) “Bõe n kɩt tɩ mam sak n deeg tɩ Wẽnnaam sẽn kõt tõnd sagls ninsã yaa d neer yĩnga?”—Ezai 48:17, 18.
7 Tõe tɩ y pa rat n sok y meng sogs-kãensã, y sẽn yɛɛsd tɩ y pa na n yã leoorã yĩnga. Sã n yaa rẽ, y wõnda ned sẽn pa rat n fõk a montɛɛr esãens n gese, a sẽn yɛɛsd a na n wa mik tɩ esãensã saame yĩnga. Esãensã sã n saame, yaa tɩlae tɩ y bãng n tõog n bao n ningi. Woto me, yaa sõma tɩ y bao n bãng y sã n sɩd kɩsa sɩd ne bũmb nins y sẽn tẽedã, tɩ sã n pa woto, bɩ y mao n demse.—Tʋʋ. 17:11.
8. Wãn to la y tõe n maneg n kɩs sɩd tɩ Wẽnnaam sẽn yeel tɩ y ra yo wã sakr sɩd yaa yam bũmbu?
8 Wala makre, Biiblã sagend-y lame tɩ y “zoe yoobo.” Bɩ y sok y meng woto: “Bõe yĩng tɩ sagl-kãngã tũub yaa yam bũmbu?” Tags-y n ges-y bũmb ning sẽn kɩt tɩ y taabã yoodã. Leb-y n tags-y n ges-y bũmb ning sẽn kɩt tɩ Biiblã yetẽ tɩ sẽn yood-a “sãamda a meng yĩngã.” (1 Kor. 6:18) Rẽ poor bɩ y tags leoor toor-toorã zugu, la y sok y meng woto: “Bʋg la sõma tɩ m segd n maane? Rẽ yĩnga yoob tara yõod sɩda?” Tags-y yellã zug neere, la y leb n sok y meng woto: “Mam sã n yo, bõe n na n maane?” Zĩig pʋgẽ, y na n nooga y taabã kẽer sũyã. La rẽ poore, y sã n wa be ne y roagdbã bɩ ne y tẽed-n-taasã Rĩungã roogẽ, y tagsg yɩta wãna? La y sã n wa rat n pʋʋs Wẽnnaam yẽ? Rẽ yĩnga y na n sak n sãama zood ning y sẽn tar ne Wẽnnaamã y sẽn dat n noog y karen-bi-taasã sũy yĩng sɩda?
9, 10. Y sã n kɩsa sɩd ne y sẽn tẽedã, wãn to la na n sõng-y tɩ y taabã ra tudg-yã?
9 Y sã n yaa bi-bɩɩga, y vɩɩ sasa y “yamã” sẽn bɩt n paasdẽ wã. Tʋm-tʋmd a Poll yeela woto: “M saam-biisi, mam kota yãmb Wẽnnaam nimbãan-zoeerã yĩnga, tɩ y kõ y yĩnsã tɩ yɩ maan-vɩɩs sẽn yaa sõma, sẽn tat Wẽnnaam yam, rat n yeel tɩ y tʋm a tʋʋmdã ne y yamã. Bɩ y ra le wõneg dũniyã rãmb ye. Bɩ y tek y yamã n maneg-a zãnga, sẽn na yɩl n bãng tɩ Wẽnnaam daabã yaa sõma, sakda reegre, la zemsa zãnga.” (Rom 12:1, 2, NW ) Yaa y yamã sẽn wat n bɩtẽ wã la y segd n mao n bãng yɩ a Zeova Kaset soab sẽn dat n yɛɛlga. Y sã n tags rẽ zugu, na n sõng-y lame tɩ y maneg n kɩs sɩd ne y sẽn tẽed bũmb ninsã. Woto, y taabã sã n wa rat tɩ y maan bũmb y sẽn mi tɩ pa segde, zĩig pʋgẽ bala, y na n tõog n tõdga ne y sũur fãa. Woto, y na n tagsa wa yʋʋm 21 saam-bi-poak a ye sẽn da paam zu-loe-kãngã buud sẽn tagsg to-to wã. Ad a sẽn yeele: “Mam taabã sã n wa rat n tus maam tɩ m maan kɛgre, mam wilgd-b-la bũmb ning sẽn kɩt tɩ m pa na n saag n maan a buudã. Mam kɩtdame tɩ b bãng tɩ mam pa tũud m sorã ne noor bal ye. Yaa ne m sũurã fãa la ne m yamã fãa.”
10 Vẽenega, yɩl n tõog n ket n maand bũmb f sẽn mi tɩ yaa tɩrga, baooda modgre. (Luk 13:24) La tõe tɩ y sokda y meng rẽ maaneg sã n sɩd tara yõodo. Sã n yaa rẽ bɩ y tẽeg tɩ y sã n maand sãmb-sãmb y taabã taoore, b na n bãngame tɩ y pa kɩs sɩd ne y sẽn tẽed bũmb ninsã ye. Woto na n kɩtame tɩ b maneg n pẽgd-y sõma. La y sã n wilg-b ne y sũur fãa tɩ b sẽn datã pa segde, tõe tɩ b pa pẽdg-y n zãag zĩiga, tɩ ling-y menga.—Ges-y Luk 4:12, 13.
‘Tagsd-y n yaoond n leokdẽ’
11. Y sã n deng n tags y taabã sẽn tõe n wa rat tɩ y maan bũmb ninsã yelle, wãn to la tõe n sõng-yã?
11 Bũmb a to me y sẽn tõe n maan tɩ sõng-y tɩ y ra bas tɩ y taabã tõog-yã, yaa y sẽn na n dengd n segend y menga. (Karm-y Yelbũn 15:28.) Woto rat n yeelame tɩ y reng n tags n bãng b sẽn tõe n wa rat tɩ y maan bũmb ninsã. Y sã n mi n deng n tags rẽ yell bilfu, tõe n sõng-y lame tɩ y gil yɛla. Wala makre, y sã n ne y karen-bi-taas sẽn yũud sɩgaar n watẽ tɩ y miẽ tɩ b tõe n wa kãab-y-la sɩgaarã, bõe la y tõe n maane? Yelbũn 22:3 wã yeta woto: “Nin-yẽeseng yãta toog n gil n looge.” Y sã n gil-ba, tõe n kɩtame tɩ y põse. Woto pa rat n yeel tɩ y yaa rabɛɛm ye. Wilgdame tɩ y yaa yam soaba.
12. Y to sã n wa baood y noore, wãn to la y tõe n leok-a tɩ zemse?
12 La sã n mikame tɩ yaa yell y sẽn pa tõe n gili? D rɩk makr wa y to sẽn na n sok-y woto: “Fo ket n pa tar dolle?” Wakat kãnga, a tɩɩmã yaa y sẽn na n tũ Kolos rãmb 4:6 goamã. Be, b yeta woto: “Bɩ y kɩt tɩ yãmb goamã zĩnd bark wakat fãa n paam yamsem noom, la y bãng sẽn zems n leok ned kam fãa.” Wa vɛrse kãngã sẽn wilgdã, y sẽn na n leok to-to wã bee ne yɛlã sẽn yaa to-to. Pa tɩlae tɩ y bao n na n wilg-a Biiblã sẽn yet bũmb ning rẽ wɛɛngẽ wã fãa ye. Tõe tɩ y sã n leok koɛɛg-koɛɛg la ne y sũur fãa bala, sekame. Wala makre, y sã n na n leok sok-kãngã buudã, y tõe n yeela woto: “N-ye, yaa sɩda.” Pa rẽ bɩ y yeel woto: “Rẽ pa segd n pak foo ye.”
13. Y to sã n wa baood y noore, y sã n bãng a goamã võore, wãn to la na n sõng-yã?
13 A Zezi sã n da wa mik tɩ goam wʋsg pa na n yãk yell nenga, a leokda koɛɛg-koɛɛga. A Herood sẽn wa n sok-a bũmb wʋsgã, a pʋd n pa leok-a ye. (Luk 23:8, 9) B sã n sok-y sokr n na n paoog-y wall b yaal-yã, wakat ninga, yɩta sõma tɩ y ra leok ye. (Yel. 26:4; Koɛ. 3:1, 7) La baa ned sã n sãbsd-y a sẽn pa wʋmd y manesem kẽer võore, wala makre, y sẽn pa yoodã, a tõe n wa gomame tɩ y mik t’a sɩd rat n bãnga bũmb ning sẽn kɩt tɩ y yaa woto wã. (1 Pɩɛ. 4:4) Sã n yaa rẽ, yɩta sõma tɩ y maag y yĩng n wilg-a Biiblã sẽn yeele, tɩ kɩt tɩ y pa yoodã. Sã n mik t’a sɩd rata sõngr a woto bɩ y modg n sõng-a n da zoe rabeem n bas ye. Modgd-y wakat fãa n bãngd n wilgd bũmb ning y sẽn tẽedã.—1 Pɩɛ. 3:15.
14. Wãn to la y tõe n maan yam n kɩt tɩ y to bãng tɩ bũmb a sẽn maand pa segde?
14 Yɛl kẽer taoore, y tõeeme n kɩt tɩ y to wã bãng t’a sẽn maandã n pa segde. La y segd n maana rẽ ne gũusgu. Wala makre, y karen-bi-taag sã n wa rat tɩ y sak n yũ sɩgaare, y tõe n yeela woto: “Ayo, m pa rat ye.” Rẽ poore, y tõe n paasa woto: “Mam da tẽedame tɩ fo yamã seka f na bãng tɩ sɩgaar yũub pa sõma ye.” Y sã n leok woto, na n sɩd kɩtame t’a bãng tɩ yẽ sẽn maandã n pa segde. Wall tɩ y bao n na n wilg-a bũmb ning sẽn kɩt tɩ y pa yũud sɩgaarã, y sẽn leok-a to-to wã na n kɩtame t’a sok a meng n ges yẽ sẽn yũudã võore. *
15. Wakat bʋg la y segd n loog n bas y to sẽn dat n pẽdg-y tɩ y maan sẽn pa segde, la bõe yĩnga?
15 La y sã n maan y sẽn tõe fãa, tɩ y to wã baas n ket n pẽdgd-yã? Sã n yaa rẽ, a tɩɩmã yaa y loog la y bas-a. Bala, y sã n yalse, y tõe n wa sak n maana y sẽn pa rate. Sẽn na yɩl n gil dẽ, rẽnda y looge. Y sã n looge, pa rat n yeel t’a tõog-y lame ye. Sẽn yaa vẽeneg yaa t’a pa tõog tɩ y maan a sẽn datã ye. Y pa sak n yɩ a reem-teoog ye. La sẽn paase, y nooga a Zeova sũuri.—Yel. 27:11.
Rengd-y n magd-y y yɛlã
16. Wãn to la y taab sẽn yet tɩ b yaa kiris-neb tõe n wa rat tɩ y maan sẽn pa segde?
16 Wakat ninga, y taab sẽn yet tɩ b tũuda a Zeova meng tõe n wa ratame tɩ y naag-b n maan bũmb sẽn pa segde. Wala makre, y sã n kẽng soaare, n tɩ mik tɩ sẽn maan-a soaare wã pa yãk kãsem sẽn na n ges tɩ yɛlã fãa yɩ sõma, y maanda wãna? Wall y taame n mik tɩ rãamã yaa wʋsgo, tɩ y zo-rãmbã wa sɩng yũub tɩ loogdẽ. Sã n yaa rẽ y manesem yɩta wãna? Bãng-y tɩ yɛl sãnda pʋsẽ, yaa tɩlae tɩ y tũ y sũur-kasetã sẽn paam kiblg ne Biiblã maasmã sẽn yet-y bũmb ningã. Yʋʋm 16 bi-pugl a ye sẽn yaa kiris-ned yeela woto: “Maam ne m yao-bi-pugl n paas d tẽed-n-taas n da kẽng n na n tɩ ges filim. La d wa n mikame tɩ filmã pʋgẽ, gom-põosã yaa wʋsgo, tɩ maam ne m yaoã yik n yi. La tõnd tũud-n-taasã paame n ges filmã. Tõnd roagdbã pẽga tõnd d sẽn maan woto wã yĩnga. La d taabã sũy yika ne-do, bala tõnd manesmã kɩtame tɩ b wa getẽ tɩ b pa maan neer ye.”
17. Y sã n wa rebd soaare, bõe la y tõe n pĩnd n maan tɩ wa sõng-y tɩ y tũ Wẽnnaam noyã?
17 Wa bi-puglã ne a yaoã kibar sẽn wilgã, y sã n dat n tũ y sũur-kasetã sẽn yet-yã, tõe n wa kɩtame tɩ y taabã pa pẽg-y ye. La y segd n ket n maanda bũmb nins y sẽn mi tɩ yaa tɩrgã. Segend-y y meng rẽ yĩnga. Y sã n wa rebd soaare, bɩ y pĩnd n mag n ges y sẽn tõe n wa maan to-to n yik n looge, y sã n wa mik tɩ yɛlã pa sigl wa sẽn segdã. Tẽns kẽer pʋsẽ, kom-bɩɩs wʋsg zemsda ne b roagdbã, tɩ sã n wa yaa woto bɩ b maan rãamd ne b selilɛɛrã tɩ b wa peeg-b n kuli. (Yɩɩl 26:4, 5) Y sã n segend y meng woto, y na n yãa a “yõodo.”—Yel. 21:5.
“Maan sũ-noog f bi-bɩɩlmã wakate”
18, 19. a) Bõe n kɩt tɩ y tõe n kɩs sɩd t’a Zeova ratame tɩ y tall sũ-noogo? b) Wẽnnaam tagsg yaa wãn ne kom-bɩɩs nins sẽn pa basd tɩ b taabã kɩt tɩ b maan wẽngã?
18 A Zeova naan-y lame n kɩt tɩ y tõe n noogd y sũuri, la a sɩd ratame tɩ y tall sũ-noogo. (Karm-y Koɛɛg Soab 11:9.) Tẽeg-y tɩ y taabã sẽn soogd b mens n maand b raabã sẽn paamd yaa “sũ-noog ning yel-wẽnã sẽn kõt wakat bilf pʋgẽ wã” bala. (Heb. 11:25) Wẽnnaam datame tɩ yãmb paam bũmb bark sẽn yɩɩd rẽ hal zĩig sẽn zãre. A ratame tɩ y tall sũ-noog wakat sẽn kõn sa yĩnga. Woto yĩnga, b sã n wa rat tɩ y maan bũmb y sẽn mi tɩ yaa wẽng Wẽnnaam nifẽ, bɩ y tẽeg t’a Zeova sẽn dat tɩ y maan bũmb ninsã yaa sẽn na yɩl tɩ y naf wakat fãa yĩnga.
19 Kom-bɩɩse, segdame tɩ y bãng tɩ baa y sã n paam n ta y taabã yam, yʋʋm a wãn poor bala, tõe tɩ wʋsg pa na n le tẽr y yʋʋr meng ye. La y sã n tõdgd y taabã raabã maanego, a Zeova neeme, la a pa na n tol n yĩm y sakrã yell ye. A na n ‘paka saagã t’a ni-yã. La a kõ-y bark wʋsg tɩ sek-yã.’ (Mal. 3:10) Sẽn paase, a na n kõ-y-la a vʋʋsem sõngã tɩ kɩt tɩ y paam a sõngr zĩis nins fãa y sẽn dat teelgã. Hakɩka, a Zeova tõe n sõng-y lame tɩ y taabã ra tõog tɩ y maan sẽn yaa wẽng ye!
[Tẽngr note]
^ sull 14 Ges-y Les jeunes s’interrogent — Réponses pratiques volume 2 wã pʋgẽ, zĩig ning b sẽn gʋls tɩ “ Contre la pression du groupe, ” seb-neng 132 la 133 wã.
Y tẽrame bɩ?
• Modgr ning d taabã sẽn maand n dat tɩ d sak b raabã pãng taa zĩ-bʋgo?
• Y sã n kɩsa sɩd ne y sẽn tẽed bũmb ningã, wãn to la na n sõng-y tɩ y ra sak y taabã raabo?
• Wãn to la y tõe n segl y meng n wa tõog n da sak y taabã raabo?
• Bõe n kɩt tɩ y miẽ t’a Zeova nanda y sẽn sakd-a wã?
[Zãmsgã sogsgã]