Kom-bɩɩse, tũ-y Wẽnnaam Gomdã saglse
Kom-bɩɩse, tũ-y Wẽnnaam Gomdã saglse
“Bao yam ne bãngre.”—YEL. 4:5.
1, 2. a) Bõe n sõng tʋm-tʋmd a Poll t’a tõog a zu-loɛɛgã? b) Yɛ la y tõe n paam yam la bãngre?
NED a yembr n da yeel woto: “Mam sẽn dat n maan neerã, wẽng loee ne maam.” Yãmb mii sẽn yaa ned ning n yeel woto wã bɩ? Yaa tʋm-tʋmd a Polle. Baa a Poll sẽn da nong a Zeova ne a sũur fãa wã, wakat ninga yɩl n maan tɩrg ra pa nana ne-a ye. A Poll tagsg yɩɩ wãn ne yel-kãngã? Ad a meng sẽn yeele: “Mam yaa nimbãan-ned bala.” (Rom 7:21-24) Yãmb mii rẽ sẽn da namsd a Poll to-to bɩ? Rẽ yĩnga mi n yaa toog ne yãmb me tɩ y maan sẽn yaa tɩrg bɩ? Rẽ mi n sãamda yãmb me sũur bɩ? Sã n yaa woto bɩ y ra koms raood ye. Baa a Poll sẽn da tar zu-loe-kãngã wã, a tõog n tũu Wẽnnaam sõma. Dẽnd yãmb me tõe n tõogame.
2 Yaa “gom-sõma” wã tũub n sõng a Poll t’a tõog a zu-loɛɛgã. (2 Tɩm. 1:13, 14) Kɩtame t’a paam yam la bãngre, tɩ sõng-a t’a bãng n maan sẽn segde. Wẽnnaam a Zeova tõe n sõnga yãmb me tɩ y paam yam la bãngre. (Yel. 4:5) Biiblã sẽn yaa a Gomdã pʋgẽ, a kõt-d-la sagls sõmblem sẽn ka to. (Karm-y 2 Tɩmote 3:16, 17.) Bɩ d ges Biiblã sagls sẽn tõe n sõng-y to-to tɩ y bãng n vɩɩmd ne y roagdbã, n bãng n zã y ligdã, la y bãng me n zã y meng sõma y sẽn wat n yaa y yembre.
Tũud-y Wẽnnaam Gomdã sagls zakã pʋgẽ
3, 4. Bõe n tõe n wa kɩt tɩ y getẽ tɩ y roagdbã noy sakr yaa toogo, la bõe yĩng la b sẽn kõt-y noyã?
3 Rẽ yĩnga y getame tɩ noy nins y roagdbã sẽn gãneg n dat tɩ y tũ wã yaa toog bɩ? Bõe yĩng tɩ y tõe n wa tagsd woto? Tõe tɩ yaa y sẽn dat tɩ b mi n basd-y tɩ y maand y yamã. Woto yaa bũmb sẽn segde, bala biig sã n bɩtẽ, a wat n tara tʋlsem kãngã. La y sã n nan keta y roagdbã nugẽ, yaa tɩlae tɩ y sak-ba.—Ef. 6:1-3.
4 Y sã n bãng bũmb ning sẽn kɩt tɩ y roagdbã gãneg noy n dat tɩ y tũ wã, b tũub yɩta nana ne-yã. Yaa sɩd tɩ wakat ninga, y tõe n wa tagsda wa yʋʋm 18 bi-pugl a ye yʋʋr sẽn boond t’a Brielle. * A goma a roagdbã yell n yeel woto: “B pa tol n tẽrẽ tɩ biig sã n wa ta yʋʋm 18, pa nana ne-a ye. B pa rat tɩ mam togs m tagsgo, wall m yãk m toorẽ yam n maan bũmbu, pa rẽ bɩ b sak n deeg tɩ mam pa le yaa yãag ye.” Tõe tɩ yãmb me tagsda wa a Brielle tɩ y roagdbã weoogd-y lame tɩ loogd nugu. La bãng-y tɩ sẽn yɩɩd fãa, yaa y roagdbã sẽn dat y neerã yĩng n kɩt tɩ b kõt-y noyã. Sẽn paase, roagdb nins sẽn yaa kiris-nebã miime tɩ b na n wa kolg n togsa a Zeova b sẽn zã-y to-to wã wɛɛngẽ.—1 Tɩm. 5:8.
5. Y sã n sakd y roagdbã, wãn to la rẽ na n naf-yã?
5 Y roagdbã noyã sakr yaa wa y sẽn kẽnd butikẽ n daad teed samde. Y sã n yaood samã sõma, y sã n le wa rat bũmbu, butikã soab na n sak n kõ-y-la nana-nana. Woto me, y roagdbã sakrã la b waoogrã yaa wa samd y sẽn segd n yaooda. (Karm-y Yelbũn 1:8.) Y sã n sakd y roagdbã sõma, bãmb me na n sakd n kõt-y-la sor tɩ y maand yɛl kẽere. (Luk 16:10) Wala butik soab sẽn tõe n wa pa le rat n koos teed kẽer samd ne ned wall a tolg n pa le rat n koos bũmb samd ne-a wã, yãmb me sã n wae n kɩɩsd y roagdbã, b sã n wa pa le kõt-y sor tɩ y maand yɛl kẽere, pa segd n ling-y ye.
6. Wãn to la roagdbã tõe n sõng b kambã tɩ b yɩ sakdba?
6 Bũmb a ye roagdbã sẽn tõe n maan n sõng b kambã tɩ b tũ b noyã yaa bãmb mensã sẽn na n kõt mak-sõngo. Bãmb mensã sã n sakd n tũud a Zeova noyã, b wilgdame tɩ Wẽnnaam sẽn dat tɩ tõnd maanã pa yɩɩd d pãng ye. Woto na n sõnga kom-bɩɩsã tɩ b bãng tɩ b roagdbã me sẽn dat tɩ b maan bũmb ningã pa yɩɩd b pãng ye. (1 Zã 5:3) Sẽn paase, Biiblã tara kibay sẽn wilgd a Zeova sẽn da kõ a tʋm-tʋmdb sor tɩ b togs b tagsg yɛl kẽer wɛɛngẽ. (Sɩng. 18:22-32; 1 Rĩm 22:19-22) Rẽ yĩnga wakat tõe n wa zĩndame tɩ roagdbã kõ b kambã sor tɩ b togs b tagsg yɛl kẽer zug bɩ?
7, 8. a) Zu-loe-bʋg la kom-bɩɩs kẽer segda? b) Bõe la y segd n ning y yamẽ tɩ sõng-y tɩ b sã n wa kibl-y bɩ naf-yã?
7 Bũmb me sẽn tõe n nams kom-bɩɩsã, yaa b sẽn mi n tagsdẽ tɩ b roagdbã goam wilgdame tɩ b pa nand modgr ning b sẽn maandã. Wakat ninga, y tõe n wa tagsda wa bi-bɩɩg a Christian. Ad a sẽn yeele: “M ma yẽ yaa wa polɩɩs bala. Wakat fãa, a vaeesdame n baood n na n yã zĩig mam sẽn konge.”
8 Naoor wʋsgo, y roagdbã sẽn gomd goam nins tɩ y tagsdẽ tɩ b pa nand-yã, yaa sagls wall kiblgu. Sɩd me, Biiblã yeelame tɩ kiblg buud fãa sakr pa nana, baa sã n mik tɩ f sɩd segda ne kiblgã. (Heb. 12:11) B sã n kibl-yã, bõe n na n sõng-y tɩ kiblgã naf-yã? Sẽn yɩɩd fãa, yaa y sẽn na n ningd y yamẽ tɩ yaa y roagdbã sẽn nong-yã yĩng n kɩt tɩ b sagend-yã. (Yel. 3:12) B rat n sõng-y lame tɩ y tall zʋg-sõma la y ra bɩɩs zʋg-wẽns ye. Bãng-y tɩ y roagdbã miime tɩ b sã n pa kibl-yã, wilgdame tɩ b pa nong-y ye! (Karm-y Yelbũn 13:24.) Yãmb mengã segd n bãngame tɩ y pa tõe n bãng bũmb maaneg n pa tol n tudg ye. Woto yĩnga, b sã n wa yeel-y bũmb n na n kibl-yã, bɩ y rɩk yam gomdã pʋgẽ. Biiblã yeelame tɩ ‘yam yõod yɩɩda wanzuri,’ la t’a ‘nafda ned n yɩɩd sãnem.’—Yel. 3:13, 14.
9. Wall tɩ biig tagsdẽ t’a roagd sẽn gom-a pa zemse, bõe la a segd n maane?
9 La baasg zãnga, roagdbã me kongdame. (Zak 3:2) B sã n wa kibind-yã, b tõe n wa goma goam kẽer n pa gũus ye. (Yel. 12:18) Bõe n tõe n kɩt tɩ y roagdbã wa gom woto? Wakat ninga, yaa yaamsã, wall b sẽn tagsd tɩ yãmb sẽn maan tɩ yõsgã yaa bãmb meng yellã yĩnga. Wall tɩ y sãamd y sũur b sẽn gomd-y woto wã yĩngã, y segd n wilgame tɩ y nanda b sẽn modgd n dat n sõng-yã. Y sã n tõogd n sakd kiblgã, y sã n wa bɩ, na n ket n nafd-y lame.
10. Bõe la y tõe n maan tɩ y roagdbã noyã la b saglsã tũub yɩ nana ne-yã?
10 Y ratame tɩ y roagdbã noyã la b saglsã tũub yɩ nana ne-yã, la naf-y bɩ? Sã n yaa rẽ, segdame tɩ y paas y sẽn yẽsd ne y roagdbã to-to wã sõmblem. Wãn to la y tõe n maan dẽ? Pipi, b sã n gomd ne-yã, y segd n kelga sõma. Biiblã yeelame tɩ “ned kam fãa wɩng ne kelgr la a maag ne goama, la a maag ne sũ-yikri.” (Zak 1:19) Woto yĩnga, wall tɩ y baood bʋʋm wakat fãa n dat n wilg tɩ y sẽn maanã zemsame wã, segdame tɩ y tõogd y menga, n kelgd y roagdbã sẽn yet-yã. Tagsd-y b sẽn yet-yã zugu, la y ra tagsd b sẽn togs-y gomdã to-to wã zug ye. Wilg-y ne waoogr tɩ y wʋmame, la tɩ y sak n deega y kongrã. Woto, b na n bãngame tɩ y wʋma b sẽn yeel-y bũmb ningã. La y sã n yeela bũmb wall y talla manesem ninga tɩ b zabd-yã, tɩ y rat n wilg bũmb ning sẽn kɩt tɩ y maan dẽ wã, y maanda a wãna? Naoor wʋsgo, yɩta sõma tɩ y tõog y meng n sĩnd n sak n maan b sẽn datã nanda. (Yel. 10:19) Y roagdbã sã n yã tɩ y sakame n na n tũ b raabã, bãmb me na n sak n kelg-y lame. Y sã n maand woto, y wilgdame tɩ y tũuda Wẽnnaam Gomdã saglse.
Tũud-y Wẽnnaam Gomdã sagls ligdã zãab wɛɛngẽ
11, 12. a) Ligdã zãab wɛɛngẽ, bõe la Wẽnnaam Gomdã sagend tõnd tɩ d maane, la bõe yĩnga? b) Wãn to la y roagdbã tõe n sõng-y tɩ y bãng n zã y ligdã?
11 Biiblã vɛrse a yembr yeelame tɩ ‘ligd kogenda neda.’ La b yeela vɛrse kãng pʋgẽ me tɩ yam yõod yɩɩda ligdi. (Koɛ. 7:12, NW ) Wẽnnaam Gomdã wilgd-d lame tɩ ligd tara yõodo, la tɩ d pa segd n nong ligd ye. Bõe yĩng tɩ y segd n gũus n da wa nong ligdi? D rɩk makre: Koaas sã n tar sʋʋg sẽn dɩt sõma, sõngd-a-la wʋsgo. La ned sẽn pa gũusd sã n tʋmd ne sʋ-kãngã, tõe n pogl-a lame. Ligd me yaa woto. F sã n bãng a zãabo, tõe n sõng-f-la wʋsgo. La naoor wʋsgo, neb nins “sẽn dat n yɩ arzɛgs rãmbã” tõe n sak n sãama zoodo, n bas b zak neba, wall b pʋd n sak n sãam zood ning b sẽn tar ne Wẽnnaamã, b sẽn baood arzɛgsã ne b sũur fãa wã yĩnga. Woto kɩtame tɩ b ‘kẽesd b mens to-kãseng pʋgẽ.’—Karm-y 1 Tɩmote 6:9, 10.
12 Wãn to la y tõe n bãng n zã ligd sõma? Sok-y y roagdbã tɩ b wilg-y y sẽn tõe n bãng n mag ligd ning y sẽn paamdã to-to, n tõog n zã-a sõma. Rĩm a Salomo ra yeela woto: “Yam soab na n kelgame n paam yam n paase, la yaa sẽn wʋmd-a yɛlã võor n bãngd a sẽn segd n maanega.” (Yel. 1:5, NW ) Bi-pugl a ye yʋʋr sẽn boond t’a Anna kosa a roagdbã tɩ b wilg-a a sẽn tõe n bãng n zã ligd sõma to-to. Ad a sẽn yeele: “Mam Ba wã wilga maam m sẽn tõe n bãng n mag ligd ning m sẽn paamdã to-to n tõog n zã sõma. A leb n wilga maam tɩ tara yõod tɩ m da raad teedã yaar ye.” A Anna ma wã me wilg-a-la bũmb wʋsg sẽn nafd-a. A Anna yeela woto: “A wilga maam tɩ nand tɩ m da bũmbu, m segd n sogsa bũmbã ligd zĩis wʋsgo.” Wãn to la rẽ sõng a Anna? Ad a sẽn yeele: “Masã, mam mii m ligdã zãab sõma. Mam pa raad teed yaar ye. Rẽ n so tɩ m pa pengd ligd tɩ pa tɩlae, tɩ kɩt tɩ m yamã gãe bãane.”
13. Teedã raabã wɛɛngẽ, bõe la y tõe n maand n tõogd y menga?
13 Y sã n nong n daad teedã yaar n pa tagsdẽ, wall sẽn na yɩl n bugs y zo-rãmbã, y na n wa kẽe sama. Bõe n tõe n sõng-y tɩ y gil bẽd-kãngã? Teedã raabã wɛɛngẽ, y segd n tõogda y menga. Woto la bi-pugl a ye yʋʋr sẽn boond t’a Ellena n tar yʋʋm 20 la zak maanda. Ad a sẽn yeele: “Mam sã n wa yit ne m zo-rãmbã, m dengd n geela m ligdã n yãk m sẽn na n dɩ wã tɛka. . . . Sẽn paase, mam yãka yam n tũud m zo-rãmb nins sẽn pa sãamd ligdi, la sẽn na n sagl-m tɩ m gilg n sogs teedã ligd zĩis a taab n yaool n da wã.”
14. Bõe yĩng tɩ y segd n gũus tɩ arzɛgsã tʋlsem da belg-yã?
14 Tara yõod ne ninsaal fãa t’a baood ligdi, la a bãngd n zãad-a sõma. La a Zezi yeelame tɩ bũmb sẽn kõt ned sũ-noog hakɩk yaa a sẽn na n mi t’a “segd n baoa Wẽnnaam.” (Mat. 5:3, NW ) A goma yɛl kẽer sẽn tõe n kɩt tɩ ned pa bao n na n bãng Wẽnnaam sõma yelle. Wala makre, “arzɛgsã belgre.” (Mark 4:19) Dẽnd tara yõod tɩ y tũud Wẽnnaam Gomdã sagls wakat fãa, la y tall tagsg sẽn zems ligdã zugu.
Tũud-y Wẽnnaam Gomdã saglse, y sã n wa yaa y ye
15. Yaa wakat bʋg la bũmb tõe n kɩt tɩ y kɩɩs Wẽnnaam noyã nana-nana n yɩɩda?
15 Yãmb tagsdame tɩ yaa wakat bʋg la bũmb tõe n kɩt tɩ y kɩɩs Wẽnnaam noyã nana-nana n yɩɩda? Yaa y sẽn wat n be ne neb bɩ, bɩ yaa y sẽn wat n yaa y yembre? Yaa vẽeneg tɩ y sã n wa be y lekollẽ wall y tʋʋm zĩigẽ, y gũusda wʋsg sẽn na yɩl tɩ bũmb da wa sãam yãmb ne Wẽnnaam zoodã ye. La yaa y sẽn wat n yaa y ye n pa tẽed tɩ bũmb tõe n maan-y lame wã la bũmb tõe n wa kɩt tɩ y beeg Wẽnnaam nana-nana.
16. Bõe yĩng tɩ y segd n sakd a Zeova noyã baa y sã n wa yaa y ye?
16 Bõe yĩng tɩ baa y sã n wa yaa y ye bɩ y segd n ket n sakd a Zeova noyã? Tẽeg-y tɩ y tõe n sãama a Zeova sũuri, wa y sẽn tõe n noog a sũurã. (Sɩng. 6:5, 6; Yel. 27:11) Sɩd yaa woto, bala yãmb yell paka Wẽnnaam. (1 Pɩɛ. 5:7) A ratame tɩ y sak n maan a raabã tɩ naf-yã. (Ezai 48:17, 18) Pĩnd wẽndẽ, Israɛll neb kẽer sẽn wa n kɩɩs a Zeova noyã, sãama a sũuri. (Yɩɩl 78:40, 41) La a Zeova ra nonga no-rɛɛs a Daniɛll yẽ wʋsgo, hal tɩ malɛk a ye meng yeel-a tɩ ‘Wẽnnaam nong-a lame.’ (Dan. 10:11) Bõe yĩnga? Bala a Daniɛll ra sakda a Zeova nebã sʋka, la baa a sã n da wa yaa a yembr me.—Karm-y Daniɛll 6:11.
17. Y sã n wa rat n yãk reem ninga, sogs-bʋs la y segd n sok y menga?
17 Sẽn na yɩl n tõog n sakd a Zeova y sẽn wat n yaa y yembre, rẽnda y modg n zãms n wa tõe n bãng “sõma ne wẽng n bake,” la y sakd n maand bũmb nins y sẽn mi tɩ yaa sõma wã. (Heb. 5:14) Wala makre, y sã n wa rat n yãk mizik y sẽn na n kelge, pa rẽ bɩ filim y sẽn dat n gese, wall ẽntɛrnetã pʋgẽ sit y sẽn dat n kẽ, ad sogsg sẽn tõe n sõng-y tɩ y bãng sõma la wẽng n bake. Sok-y y meng woto: “Rẽ yĩnga bõn-kãngã na n sõnga maam tɩ m yɩ nimbãan-zoɛt bɩ, bɩ a na n kɩtame tɩ mam ‘maand sũ-noog ne m taabã toogo’?” (Yel. 17:5) “A na n sõnga maam tɩ m ‘nong neere,’ bɩ na n kɩtame tɩ lebg toog ne-m tɩ m ‘kisg wẽnga.’?” (Amos 5:15, Sebr Sõngo) Yãmb sẽn maand a soab y sẽn wat n yaa y ye wã wilgda bũmb ning y sẽn sɩd nong n yɩɩdã.—Luk 6:45.
18. Sã n mik tɩ y soosd n maanda yel-wẽna, bõe la y segd n maane, la bõe yĩnga?
18 La sã n mik tɩ y soosd n maanda yɛl y sẽn mi tɩ yaa yel-wẽna, bõe la y segd n maane? Tẽeg-y tɩ “sẽn solgd-a a yel-wẽn ka na n tõog ye. La sẽn sak n vẽneg-a a yell la a bas-a na n paama nimbãan-zoeere.” (Yel. 28:13) Ad y sã n maand yel-wẽnã n beegd Wẽnnaam vʋʋsem sõngã n pa rat n toeeme, pa yam tʋʋmd ye! (Ef. 4:30) Bãng-y tɩ y sã n maan yel-wẽn-kãsenga, yaa tɩlae tɩ y sak n deeg tɩ y sẽn maanã yaa wẽnga, la y vẽneg n togs Wẽnnaam la y roagdbã. Yell a woto pʋgẽ, tigingã “kãsem dãmbã” tõe n sõng-y-la wʋsgo. Karen-biig a Zak yeela woto: “Bɩ bãmb tik [sẽn maan-a yel-wẽndã] ne kaam ne Zusoabã yʋʋre, n pʋʋs Wẽnnaam a yĩnga. Tẽeb pʋʋsg na maag bãadã, la Zusoabã na yik-a t’a paam laafɩ, la yẽ sã n da maana yel-wẽna, a na paam sugri.” (Zak 5:14, 15) Yaa vẽeneg tɩ y sã n vẽneg y yel-wẽnd n togse, tõe n wa kɩtame tɩ yãnd tar-yã, wall wa ne zu-loees a taaba. La y sã n tall raood n kos sõngre, y na n gila yɛl a taab yel-wẽndã sẽn tõe n kɩt tɩ y paame, la y paam sũur kaset sẽn yaa sõma, tɩ y yam gãand bãane.—Yɩɩl 32:1-5.
Noogd-y-yã a Zeova sũuri
19, 20. Bõe la a Zeova rat tɩ y paame, la bõe la yãmb me segd n maane?
19 Wẽnnaam a Zeova “yaa sũ-noog soaba.” A ratame tɩ yãmb me tall sũ-noogo. (1 Tɩm. 1:11, NW) Yãmb yell pak-a-la hal wʋsgo. Baa ned pa ne yãmb sẽn modgd to-to n na n maan sẽn yaa sõma wã, a neeme. Bũmb baa a ye pa solg ne a Zeova ye. A feesda yãmba, la pa sẽn na yɩl n yã y kongr ye. Yaa sẽn na n sõng-y tɩ y tõog n maan sẽn yaa sõma. Wẽnnaam “nif geta dũniyã zĩigã fãa n dat n sõng neb nins sẽn dat [yẽ] ne b sũyã fãa wã.”—2 Kib. 16:9.
20 Woto yĩnga, bɩ y sakd Wẽnnaam Gomdã saglse, la y tũud a noyã. Y sã n maand woto, y na n paama yam la bãngre, tɩ sõngd-y tɩ y tõogd n gind zu-loeesã, la y maand sẽn segde. Woto, pa y roagdbã ne a Zeova sũur bal la y na n noog ye, na n kɩtame me tɩ y vɩɩmã tall barka, n kõ-y sũ-noogo.
[Tẽngr note]
^ sull 4 D toeema yʋyã.
Y na n leokame tɩ bõe?
• Bõe la kom-bɩɩsã tõe n maan n tõog n sak b roagdbã noy la b kiblgã tɩ naf-ba?
• Bõe yĩng tɩ tar yõod tɩ y tall tagsg sẽn zems ligdã zugu?
• Wãn to la y tõe n maan n tõog n ket n sakd Wẽnnaam baa y sã n wa yaa y ye?
[Zãmsgã sogsgã]