D bels neb nins sũy sẽn sãamã wala a Zezi sẽn maan to-to wã

BETANI rao a Lazaar wa n lʋɩɩ bã-kɛgenga, t’a tão a Mart ne a Maari tʋm tɩ b tɩ bool b zoa a Zezi t’a wa. La bãagã tũu ne a Lazaar yõore. B sẽn wa n mum-a wã, a Mart ne a Maari zo-rãmbã la b yagsã waame ‘n na n bels-ba.’ (Zã 11:19) La a Zezi sẽn wa n ta Betani, a kẽngame n na n tɩ ges-ba. D sã n bãng bũmb nins a sẽn yeel la a sẽn maanã, na n sõng-d lame tɩ d tõog n bels neb nins sũy sẽn sãam b ned kũum yĩngã.

Y sã n kẽnge, wilgdame tɩ y kʋmd-b lame

Sẽn na yɩl n kẽng Betani, a Zezi rɩka rasem a yiibu. A rʋʋga Zʋrdẽ kʋɩlgã, n tũ Zeriko sorã sẽn yaa tãens la gõdem-gõdmã. A Zezi sẽn wa n kolg tẽngã, a Mart yɩɩ tao-tao n yi n seg-a. Sẽn yɩ bilfu, a Maari sẽn wʋm t’a Zezi waame wã, yẽ me yɩɩ tao-tao n na n tɩ yã-a. (Zã 10:40-42; 11:6, 17-20, 28, 29) A Zezi waoongã sɩd yɩɩ belsg tɛkẽ n kõ pʋg-kãensã sũy sẽn sãamã!

 Tõnd me sã n tɩ ges neb sũy sẽn sãame, d waoongã tõe n yɩɩ belsg n kõ-ba. A Scott ne a Lydia yʋʋm a yoob biig a Theo paama sãmpogre, n maan kaalem. B yeela woto: “Tõnd da rata d roagdbã la d zo-rãmbã sõngre. B waa logtorã yir ne yʋn-sʋka.” Bõe la b zo-rãmbã yeel-ba? A Scott ne a pagã yeela woto: “Sasa kãngã, d ra pa rat goam wʋsg ye. B waoongã meng zoe n wilgdame tɩ b kʋmd-d lame.”

Biiblã wilgame t’a Zezi sẽn yã nebã sẽn yãbd a Lazaar kũumã, yẽ me sũur sãamame t’a yãbe. (Zã 11:33-35, 38) A Zezi pa tags tɩ rao sã n yãb neb sʋka yaa yãnd ye. Nebã sũ-sãangã reeg n sãama yẽ me sũuri. Woto zãmsda tõnd bõe? D sã n kẽng kʋ-yiri, d pa segd n zoe yãnd ye. D tõe n naaga neb nins sẽn kʋmdã n kʋme. (Rom dãmba 12:15) La d pa segd n modg ned sũur sẽn sãam t’a yãb ye. Neb kẽer mi n pa rat n yãb neb sʋk ye.

D maag d yĩng n kelg neere

Tõe t’a Zezi ra tara bũmb n dat n yeel n bels a Mart ne a Maari, la a basame tɩ b reng n gome. (Zã 11:20, 21, 32) A sẽn gom ne a Martã, a sok-a-la sokre, la a kelg-a.—Zã 11:25-27.

D sã n kelgd neere, wilgdame tɩ d kʋmd-b lame. Sẽn na yɩl n tõog n bels ned sũur sẽn sãame, yaa tɩlae tɩ d kelg-a sõma. Sẽn na yɩl n wilg tɩ d kelgda neere, d tõe n sokda a soabã sogsg sẽn na n sõng-a t’a togs sẽn be a sũurẽ. La sã n mikame t’a soabã pa rat goama, d segd n maana gũusg n da baoodẽ n na n sõs ne-a tɩlae ye. Bala tõe t’a yaame n dat n vʋʋse.

Neb nins sũy sẽn sãamã yam tõeeme n ka b mense, tɩ b togsd yɛl kẽer n yɩlemdẽ. Sãnda me tõe n yiisda sẽn be b sũurẽ wã. A Maari ne a Mart fãa yeela a Zezi yaa: “Zusoaba, yãmb sã n da beẽ ka, mam tãoã ra kõn ki ye.” (Zã 11:21, 32) La bõe la a Zezi maan-yã? A maaga a yĩng n kelg-ba. A pa bao n na n dems b tagsgã ye. A ra miime tɩ yaa b sũ-sãangã yĩng n kɩt tɩ b gomd woto wã.

D sã n tɩ ges ned sũur sẽn sãam n pa mi d sẽn na n yɛɛlga, d tõe n sok-a sokre, bɩ n yeel bũmb sẽn na n kɩt t’a gome, la d maag d yĩng n kelg a sẽn na n yeel bũmb ningã neere. A soabã sã n gomd bɩ y get-a la y ra sulg y neng ye.

Sẽn na yɩl n bãng a soabã sũ-sãangã sẽn taẽ zĩig ningã pa nana ye. A Lydia yeela woto: “D sẽn dat bũmb ninsã toeemdame. Sasa ninga ned sã n wa ges tõndo, d tara yãbr bala. D sẽn dat yaa b bels-d bala. D zo-rãmbã modgame n sõng tõnd wa b sẽn tõe tɛka.”

A Zezi ra maana woto tɩ zems wakat fãa. A ra miime tɩ ned fãa tara a zu-loees la a sũ-sãamse. (2 Kibaya 6:29) A Zezi sẽn tall manesem ning ne pagb a yiibã pa yembr ye. A Mart sẽn da ket n gomdã yĩnga, a Zezi sõsa ne-a. La a Maari yẽ sẽn da kʋmdã yĩnga, a Zezi pa gom ne-a wʋsg ye. (Zã 11:20-28, 32-35) Wãn to la d tõe n dɩk a Zezi togs-n-taare? D tõe n basame t’a soabã gomda, tɩ d reesdẽ. Y sã n maag y yĩng n kelge, tõe n yɩɩ belsg n kõ-a.

 Goam sẽn kengd pelse

A Maari ne a Mart sẽn yeel a Zezi tɩ “yãmb sã n da beẽ ka” wã, a pa zab-b bɩ n ning-b taal ye. Sẽn na yɩl t’a Mart yam gãande, a yeel-a-la woto: “Fo tãoã na n vʋʋgame.” (Zã 11:23) Ne gom-kãensã tɛk bala, a Zezi sõng-a lame t’a bãng tɩ yellã tara tɩɩm, la a tẽeg-a tɩ sẽn ki-bã na n wa vʋʋgame.

Y sã n wa gomd ne ned sũur sẽn sãam a ned kũum yĩnga, baa y pa gom wʋsgo, y goamã sã n yaa ne pʋ-peelem la kengd pɛlga, tõe n sõnga a soabã wʋsgo. Y tõe n gʋlsa lɛtr bɩ n gʋls goam a wãn bal kart zug me n tool-a. Sẽn mik tɩ ned tõe n karma lɛtr bɩ kart n yɩlma, tõe n kell n bels-a-la kaoosg zugẽ. A Bob kũumã kiis a wɛ zugẽ, a pag a Kath lebs n karma kart dãmbã nebã sẽn da tool-a wã. A yeela woto: “Yaa wakat kãng la kart dãmbã sõng maam n yɩɩda. Kart kãensã sɩd yɩɩ belsg n kõ maam.”

D sã n na n gʋls n bels neda, bõe la d tõe n yeele? Y tõe n goma kiidã yelle, y tõe n goma bũmb yãmb ne kiidã sẽn da maan ne taaba, y tõe n goma a zʋg-sõmã yell me. A Kath yeela woto: “Nebã sẽn gomd n pẽgd a Bob la b wilgd bũmb ning sẽn kɩt tɩ b nong-a wã, mi n kɩtame tɩ m laadẽ tɩ m nintãmã me yita. Kibay kẽer sẽn maand laad mi n kɩtame tɩ m laadẽ, la tẽegd maam tõnd sẽn da nong taab la d tar sũ-noogã yelle. Kart rãmb nins mam sẽn nong n yɩɩd masã wã, yaa b rãmb nins pʋsẽ b sẽn paas Biiblã vɛrse rãmbã.”

Sõng-y sũ-sãang rãmbã

Sẽn na yɩl n sõng a Lazaar zakã rãmba, a Zezi maana bũmb tõnd sẽn pa tõe n maane. A vʋʋga a Lazaare. (Zã 11:43, 44) La yɛl kẽer n be tõnd me sẽn tõe n maan n sõng-ba. Wala makre, d tõe n segla rɩɩbo, d tõe n deega b sãambã, d tõe n pɛgsa b futu, n ges b kom-kɩdsã yelle, n kẽn b kẽnã, bɩ n dɩk-b n kẽng b sẽn datẽ. Y sã n maan yɛl a woto buudu, wilgdame tɩ y nong-b lame, la b sũy na n sɩd yɩɩ noog wʋsgo.

Sasa ninga, sũ-sãang rãmbã rat n zĩnda b yembre. La y tõe n kell n bool-b lame bɩ n tɩ kaag-b wakat-wakate. Pag a yembr biig sẽn maan kaalem yeela woto: “Sũ-sãang pa tar wakat takɩ n satẽ ye.” Neb kẽer mi n tẽegda kiidã kãadmã daare, bɩ a kũumã daare, tɩ sasa kãng sã n ta bɩ b tɩ kaag kiidã nebã bɩ n bool-ba. Y sã n maan woto sasa kãngã, y wilgdame tɩ y yaa zoa hakɩk toog wakate.—Yelbũna 17:17.

A Zezi sẽn yeel a karen-biisã bũmb ningã me yɩɩ belsg n kõ-ba. A yeela woto: “Tõnd zoa a Lazaar gõeeme. La mam na n kẽng n tɩ neka yẽnda.” (Zã 11:11) A Zezi sẽn yeel woto wã, a kɩtame t’a karen-biisã bãng tɩ kũum vʋʋgrã yaa waaziba. A soka a Mart yaa: “Fo tẽeda woto bɩ?” T’a leok tɩ “n-ye Zusoaba.”—Zã 11:24-27.

Yãmb kɩsa sɩd t’a Zezi na n vʋʋga sẽn ki-bã bɩ? Sã n yaa n-ye, bɩ y gom rẽ yell ne sũ-sãang rãmbã. Maan-y bũmb vẽeneg n sõng-ba. Ne y goamã la ne y manesmã, y tõe n kenga b pelse.—1 Zã 3:18.

[Kart, seb-neng a 9]

(Yaa sebrã meng pʋgẽ la y tõe n yã fãa)

PEERE

Zʋrdẽ kʋɩlgã

Zeriko

Betani

Yamsem mogrã

Zerizalɛm

SAMARI