Pipi soabã:

Nong-y nebã, la y ra nong ligd la tarem ye

BÕE LA BIIBLÃ YETA? “Ligdã nonglem yaa bõn-wẽnsã fãa yẽgre.”—1 Tɩmote 6:10, Kãab-paalgã Koe-noogo.

BÕE N KƖT TƖ PA NANA? Sẽn maand-b te-paalã piblisite rãmbã kɩtdame tɩ d pa nand bũmb nins d sẽn tarã ye. B ratame tɩ tõnd tʋmd wa yembs n baood ligdã sẽn na yɩl n daad te-paala, te-bɛda, la teed sẽn yaa sõma n yɩɩda. La ligd belgda neda, tɩ f sã n pa gũus bɩ f tõe n wa nong-a faag-faaga. Biiblã yaool n wilgdame tɩ ned sã n nong ligdi, a pa tõe n paam sũ-noog abada. Rĩm a Salomo ra yeela woto: “Ned sã n nong ligdi, ligd ka sekd-a ye. La ned sã n nong arzɛgse, paoong paasg ka sekd-a ye.”—Koɛɛg Soaba 5:9.

BÕE LA Y SEGD N MAANE? Rɩk-y-yã a Zezi togs-n-taare, n nong nebã n yɩɩd teedã. A Zezi ra sak n na n bõna bũmb ning fãa a sẽn tare, la baa a vɩɩmã menga, a sẽn nong nebã yĩnga. (Zã 15:13) A meng yeela woto: “Sẽn kõt-a sũ-noog yɩɩda sẽn deegd-a.” (Tʋʋma 20:35, Sebr Sõngo) D sã n yaa kõta, la d nong n dɩkd d sẽkã n sõngd nebã n maand-b neere, bãmb me na n maand-d-la neere. Sɩd me, a Zezi yeela woto: “Kõ-y tɩ b na kõ yãmb me.” (Luk 6:38, Sebr Sõngo) Neb nins sẽn zoet n pʋgd ligdã la b baood teedã toor-toorã kẽesda b mens toog pʋgẽ. (1 Tɩmote 6:9, 10) La bũmb ning sẽn kõt sũ-noog hakɩkã, yaa tõnd sẽn na n nong d taabã tɩ bãmb me nong-do.

Woto yĩng bɩ y bao n bãng y sẽn tõe n maneg y yɛlã to-to tɩ zemse. Wala makre, ges-y y sã n pa tõe n boog teed kẽer y sẽn zoe n tarẽ, wall y sẽn magd n na n da. Y sã n maan woto, tõe tɩ y paam sẽk la keelem n paase, n tõog n maan bũmb nins sẽn tar yõod n yɩɩdã, rat n yeel tɩ n sõngd nebã, la y tũud Wẽnnaam sõma, bala yaa yẽ n kõ yãmb bũmb nins fãa y sẽn tarã.—Matɩe 6:24; Tʋʋma 17:28.

[Foto, seb-neng a 4]

“Kõ-y tɩ b na kõ yãmb me”