D paamda pãng n tõogd n yalsd kãn-kãe toog buud fãa taoore
D paamda pãng n tõogd n yalsd kãn-kãe toog buud fãa taoore
“Mam tõee fãa ne a soab ning sẽn kõt maam pãngã maasem.”—FIL. 4:13, NW.
1. Bõe yĩng t’a Zeova nin-buiidã segd zu-loees toor-toore?
A ZEOVA nin-buiidã mi n segda zu-loees buud toor-toore. Yaa tõnd mensã pãn-komsem n mi n wat ne d zu-loeesã kẽere, la sãnda me tũuda ne dũniyã sababo. Beem ning sẽn be wẽn-tũudbã ne sẽn pa tũud-b Wẽnnaamã sʋkã me mi n kɩtdame tɩ d segd zu-loeese. (Sɩng. 3:15) Hal pĩnd wẽndẽ, Wẽnnaam sõnga a nin-buiidã tɩ b tõog n yals kãn-kae neb sẽn da wa n namsd-b b tẽebã yĩnga, b sẽn wa n weoogd-b n dat tɩ b maan sẽn pa segd yĩnga, la a sõng-b tɩ b tõog toog zu-loees a taab taoore. A vʋʋsem sõngã tõe n kõ tõnd me pãng tɩ d tõog n mao ne zu-loees a woto buudu.
B sã n wa namsd tõnd d tẽebã yĩnga
2. Bõe yĩng tɩ b mi n namsd neb b tẽeb yĩnga, la wãn to la b maand rẽ?
2 B sẽn mi n namsd neb b tẽeb yĩngã, yaa sẽn na yɩl n menes nin-kãens tũudmã wall kɩt t’a ra paam pãnga, pa rẽ bɩ n kɩt tɩ neb nins sẽn zoe n be tũudum kãng pʋgẽ wã bas-a. B namsda tõnd ne manesem toor-toore. Sasa ninga, yaa vẽeneg-vẽenega, la wakat ninga, b tũnugda ne sɩlem. Sɩd me, Biiblã pʋgẽ, b maka a Sʋɩtãan sẽn maand to-to n zabd ne tõndã wa gɩgemd la ruruug manesem.—Karm-y Yɩɩl Sõamyã 91:13.
3. Wãn to la a Sʋɩtãan mi n maand wa gɩgemd wall ruruug n namsd tõndo?
3 Wa gɩgemd sẽn yõkd bũmb vẽeneg-vẽenegã, a Sʋɩtãan tõe n tũnuga ne nen-kɛglem, bãens roogẽ kẽesgo, bɩ gɩdgr n nams tõndo. (Yɩɩl 94:20) Annuaire dãmbã pʋsẽ kibayã wae n wilgda b sẽn tũnugd ne manesem kãensã n namsd a Zeova Kaset rãmbã rũndã-rũndã to-to. Tẽns kẽer pʋsẽ, tũudum taoor dãmb bɩ politikã rãmb sãnda sẽn yaa yel-zẽndb mi n kɩtame tɩ nin-yood nams Wẽnnaam nin-buiidã. Manesem kãensã sẽn wõnd gɩgemd manesmã kɩtame tɩ neb bilf bal bas a Zeova. La wa ruruug sẽn soosd n kɛɛdẽ wã, a Sʋɩtãan tõe n tũnuga ne sɩlem me n tudg nebã, tɩ kɩt tɩ b maan a raabã. Manesem kãngã yaa sẽn na yɩl n koms d tẽebã wall kɩt tɩ d kɩɩs Wẽnnaam. La ne vʋʋsem sõngã maasem, d tõe n yalsa kãn-kãe a Sʋɩtãan makr buud fãa taoore.
4, 5. Bõe la d tõe n maan tɩ sõng-d tɩ d wa tõog n yals kãn-kãe namsg taoore, la bõe yĩnga? Kõ-y makre.
4 Pa d sẽn na n magd b sẽn tõe n wa nams tõnd ne manesem ninsã n na n kɩt tɩ d wa tõog n mao ne nams-kãens ye. Yellã yaa tɩ d pa tõe n bãng b sẽn tõe n wa nams-d to-to ye. Rẽnd d sã n maand yɩɩr ne bũmb sẽn tõe n pʋd n wa pa maane, a yõodã pa waoog ye. La baasgo, bũmb n be d sẽn tõe n maane. Saam-biis wʋsg tõog n yalsa kãn-kãe namsg taoore, b sẽn bʋgs Biiblã sẽn gomd wẽn-tũudb kẽer kibay zug yĩnga, la b sẽn bʋgs a Zezi goamã la a mak-sõngã me zug yĩnga. Rẽ sõng-b lame tɩ b paas nonglem ning b sẽn tar ne a Zeova wã pãnga, tɩ kɩt tɩ b tõog toog namsg buud fãa taoore.
5 D gom tõnd saam-bi-pogs a yiib sẽn be Malawi yelle. Sẽn na yɩl n kɩt tɩ b sak n da tẽngã politikã sull karte, neb kʋʋng n pãb-b la b yees b futã n bas-b zaala, n yeel-b tɩ b sã n pa ra kartã, b na n yõg-b lame. Kʋʋngã tol n belg-b lame meng tɩ b tẽngã Betɛllã neb raa kartã. La saam-bi-pogsã manesem yɩɩ wãn? B yeela kʋʋngã woto: “Tõnd tũuda Wẽnnaam a Zeova a ye bala. Woto yĩnga, baa tõnd saam-biisã sẽn be Betɛllẽ wã sã n daa kartã, tõnd pa na n toeem yam ye. Baa y sã n na n kʋʋ tõndo, d pa na n sak n beeg Wẽnnaam ye!” Saam-bi-pogsã sẽn kell n tall raood woto wã, b wa n kong n bas-b lame tɩ b looge.
6, 7. Wãn to la a Zeova kõt a nin-buiidã pãng tɩ b tõogd toog namsg sasa?
6 Tʋm-tʋmd a Poll wilgame tɩ kiris-neb nins sẽn da be Tesalonikã reega Wẽnnaam goamã “tood wʋsg pʋgẽ,” la tɩ b maana rẽ “ne sɩɩg sõng sũ-noogo.” (1 Tes. 1:6) Sɩd me, pĩnd wẽndẽ la rũndã-rũndã kiris-neb wʋsg sẽn paam namsg n tõog toog wilgame tɩ namsgã sẽn wa n be a zug tẽn-sʋkã, b paama laafɩ b sũyã pʋsẽ. Laafɩ wã naaga zʋg-sõma nins Wẽnnaam vʋʋsem sõngã sẽn kõtã. (Gal. 5:22) Laafɩ kãng sõng-b lame tɩ b kogl b sũyã la b tagsa wã. Hakɩka, a Zeova kõta a nin-buiidã pãng ne a vʋʋsem sõngã maasem, tɩ namsg pʋgẽ bɩ b tõe n tʋm ne yam la b tõog toogo. *
7 B sã n mi n wa namsd Wẽnnaam nin-buiidã tɩ b baas n ket n sakd-a ne b sũy fãa, lingda neb wʋsgo. Wõnda wa a Zeova Kaset rãmbã tara pãng sẽn yɩɩd ninsaal dẽndã, la sɩd me, b tara pãng a woto buudu. Tʋm-tʋmd a Pɩɛɛr yeel-d-la woto: “Bark bee yãmb zutu, neb sã n gomd yãmb wẽng Kirist yʋʋrã yĩnga, tɩ bõe, Wẽnnaam sɩɩgã sẽn yaa waoogr sɩɩgã bee yãmb zutu.” (1 Pɩɛ. 4:14) B sẽn namsd tõnd tɩrlmã yĩngã wilgdame tɩ d tata Wẽnnaamã yam. (Mat. 5:10-12; Zã 15:20) Ad rẽ sẽn wilgd t’a Zeova ningd-d-la barka sɩd kõta sũ-noogo!
Nebã sã n wa rat tɩ d maan sẽn pa segde
8. a) Bõe n sõng a Zozue ne a Kalɛɛb tɩ b tõog n kɩɩs b taabã? b) A Zozue ne a Kalɛɛb kibarã wilgda tõnd bõe?
8 Bũmb ning sẽn tõe n nams kiris-nebã n yɩɩd yaa neb a taab sẽn mi n maand sɩlem wall b weoogd-b sẽn na yɩl tɩ b maan sẽn pa segdã. La baasgo, a Zeova vʋʋsem sõngã pãng sẽn yɩɩd dũniyã yamã yĩnga, d tõe n yalsa kãn-kãe tɩ neb nins sẽn yaand tõndã, sẽn yelgd-b ziri tõnd zugã, wall sẽn pẽdgd-b tõnd n dat tɩ d maand wa bãmbã ra tõog-d ye. Wala makre, bõe n sõng a Zozue ne a Kalɛɛb tɩ b tõog n kɩɩs neb piigã sẽn tũ-b n tɩ ges Kanaã soolmã sẽn yeel bũmb ningã? Yaa a Zeova vʋʋsem sõngã n kɩt tɩ b tall tagsg sẽn yaa toor fasɩ ne b tũud-n-taasã rẽndã.—Karm-y Sõdb 13:30; 14:6-10, 24.
9. Bõe yĩng tɩ kiris-nebã segd n sak n yɩ toor ne neb a taabã?
9 Vʋʋsem sõngã kõo a Zezi tʋm-tʋmdbã me pãnga, tɩ b sak Wẽnnaam n yɩɩd neb nins neb wʋsg sẽn da waoogde, n tẽed tɩ b yaa tũudum hakɩkã karen-saam dãmbã. (Tʋʋ. 4:21, 31; 5:29, 32) Neb wʋsg nong n maanda wa b taabã sẽn maand bũmb ninsã sẽn na yɩl n gill zab bɩ wɩdga. La kiris-neb hakɩkã yẽ maanda bũmb ning b sẽn mi tɩ yaa sõma wã wakat fãa. La baasgo, b miime tɩ yaa pãng ning Wẽnnaam vʋʋsem sõngã sẽn kõt-bã n kɩt tɩ b pa zoet rabeem ne yɩ toor ne neb a taabã. (2 Tɩm. 1:7) Bɩ d gom bũmb a ye wɛɛngẽ d sẽn pa segd n bas tɩ nebã weoogrã tõog-do.
10. Zu-loe-bʋg la kiris-neb kẽer tõe n wa sege?
10 Kom-bɩɩs kẽer sẽn yaa kiris-neb sã n wa bãng tɩ b zoa n maand bũmb Biiblã sẽn gɩdge, tõe n kɩtame tɩ b pa mi b sẽn maandg ye. B tõe n tagsame tɩ b sã n tɩ togs tigingã kãsem dãmbã sẽn na yɩl tɩ b sõng b zoa wã, na n kɩtame t’a wa tags tɩ b zãmb-a lame. Woto kɩtdame tɩ b pa rat n togs yellã b sẽn tagsd tɩ rẽ la b sõngd b zoa wã yĩnga. La yaool n yaa tudgri. Ned sẽn maan yel-wẽnd tõe n wa bao n na n modga a zo-rãmbã meng sẽn na yɩl tɩ b ra togs ye. La pa kom-bɩɩsã bal la yɛl a woto buud paamd ye. Sɩd me, kom-kãsems kẽer me tõe n wa getame tɩ yaa toog ne-b tɩ b tɩ togs tigingã kãsem dãmb b zoa wall b zakã ned ning yel-wẽnde. La kiris-ned hakɩk manesem segd n yɩɩ wãn yell a woto taoore?
11, 12. Tigingã ned sẽn maan yel-wẽnd sã n kos-y tɩ y ra togse, y manesem segd n yɩɩ wãna, la bõe yĩnga?
11 D rɩk makr wa bi-bɩɩg yʋʋr sẽn boond t’a Alex sẽn wa n bãng t’a zoa a Steve sẽn yaa kiris-nedã minim n geta yoob yɛla. A Alex yeela a Steve t’a sẽn maand bũmb ningã sãama a sũur wʋsgo. La a Steve maana wa yellã pa wẽng woto ye. A Alex sagl-a lame t’a tɩ togs kãsem dãmbã a yellã, t’a yeel a Alex t’a sã n sɩd yaa yẽ zoa, bɩ a ra saag n togs ye. Rẽ yĩnga, a Alex segd n sakame n sĩndi, a sẽn zoet b zoodã na n wa sãam yĩng bɩ? Tõe t’a sokda a meng a sã n tɩ togs kãsem dãmbã t’a Steve kɩɩse, ãnda la b na n tẽ. La pa a Alex sẽn na n sĩnd la yellã na n maneg ye. Sɩd me, zood ning a Steve sẽn tar ne a Zeova wã tõe n wa sãama yel-kãngã poorẽ. Segdame t’a Alex tẽeg tɩ “ninsaal zoees wata ne yelle, la sẽn teegd-a [a Zeova] tara laafɩ.” (Yel. 29:25) Bõe me la a Alex tõe n maane? A segd n pelga a pʋg n maag a yĩng n sõs ne a Steve a yellã zug yɛsa. Woto maaneg baooda raoodo. La tõe tɩ so-kãnga, a Steve na n sakame tɩ b gom a yellã zugu. A Alex segd n le sagla a Steve t’a tɩ togs kãsem dãmbã, la a yeel-a tɩ sã n kaoos wʋsg t’a pa maan dẽ, yẽ meng n na n tɩ togse.—Maan. 5:1, NW.
12 Y sã n wa seg yell a woto buudu, tõe tɩ sɩngrẽ wã, y zoa wã sũur pa na n yɩ noog ne y sẽn modgd n dat n sõng-a wã ye. La tõe t’a wa bãng tɩ yaa a neer la y rata. Koangdã sã n paam tɩ b sõng-a t’a sak n toeeme, a tõe n wa talla mi-beoog ne-y wakat fãa, y sẽn tall raood la y pelg y pʋg ne-a wã yĩnga. La y sẽn togs kãsem dãmbã sã n kɩt t’a sũur yik t’a zabd ne-yã, rẽ yĩnga y rata zoa a woto buud sɩda? D sẽn noogd a Zeova sẽn yaa d zo-kãsengã sũur n yaa sõma n yɩɩd wakat fãa. D sã n ningd a raabã taoore, neb a taab sẽn nong-a na n nanda tõnd d sẽn sakd-a ne d sũur fãa wã yĩnga, tɩ kɩt tɩ b lebg d zo-rãmb hakɩka. D pa tol n segd n sak wẽng tigingã pʋgẽ ye. Sã n pa rẽ, d beegda a Zeova vʋʋsem sõngã. La d sã n maand d sẽn tõe fãa sẽn na yɩl tɩ tigingã ket n yaa yɩlemde, d sakda vʋʋsem sõngã sor-wilgrã.—Ef. 4:27, 30.
D sã n wa tar zu-loeese
13. Zu-loe-bʋs la a Zeova nin-buiidã segda, la bõe yĩng tɩ zu-loe-kãens waoog rũndã-rũndã?
13 Yɛl nins d sẽn segdã yaa buud toor-toore. Wala makre, ligd zu-loeese, tʋʋmd sãoongo, sabaab-wẽnse, d ned kaalem, la bãase. D sẽn vɩ wakat ningã sẽn yaa ‘toogã’ yĩnga, d ned kam fãa pa tõe n pa wa seg zu-loees ye. (2 Tɩm. 3:1) La d sã n wa seg zu-loɛɛga, d pa segd n yɛɛs ye. Bala vʋʋsem sõngã tõe n kõ-d-la pãng tɩ d tõog n yals kãn-kãe zu-loɛɛg buud fãa taoore.
14. Bõe n kõ a Zoob pãng t’a tõog n yals kãn-kãe a zu-loeesã taoore?
14 A Zoob sega zu-loees buud toor-toore. A bõna a paoongã, a kambã maana kaalem, a zo-rãmb sãeegame n bas-a, bã-kɛgeng n yõk-a, t’a pagã me wa bas a Zeova teegre. (Zoob 1:13-19; 2:7-9) La a Zoob paamame t’a Eliyu bels-a. A Eliyu goamã n paas a Zeova meng sẽn yeel a Zoob bũmb ninsã kɩtame t’a “yaas n tags Wẽnnaam tʋʋm-kãsemsã yelle.” (Zoob 37:14) Bõe n sõng a Zoob t’a tõog n yals kãn-kãe a zu-loeesã fãa taoore? La bõe n tõe n sõng tõnd me tɩ d tõog n yals kãn-kãe d zu-loeesã taoore? Yaa d sẽn na n tẽegd bõn-kãsems nins a Zeova sẽn maan ne a vʋʋsem sõngã maasmã la d bʋgsd rẽ zugu. (Zoob 38:1-41; 42:1, 2) Tõe tɩ tõnd ned kam fãa tẽra bũmb sẽn zoe n maan t’a yã vẽeneg t’a yell sɩd paka Wẽnnaam. A ket n data d neere.
15. Bõe n kõ a Poll pãng t’a tõog n yals kãn-kãe zu-loees taoore?
15 Tʋm-tʋmd a Poll sega zu-loees toor-toor a tẽebã yĩnga, sẽn da tõe n tũ ne a yõore. (2 Kor. 11:23-28) Bõe n sõng-a t’a tõog n kell n tall tẽeb la raood zu-loe-kãensã fãa taoore? A ra teega a Zeova n pʋʋsd-a wakat fãa. A Poll zu-loɛɛg a ye sasa, la tõe tɩ yɩɩ wakat kãng la b sẽn kʋ-a a tẽebã yĩngã, a yeela woto: “Zusoabã sõnga maam n kõ maam pãng tɩ m togs koe-noog tɩ bu-zẽmsã fãa wʋme, la b fãaga maam gɩgemd noorẽ.” (2 Tɩm. 4:17) Rẽnd yaa a Poll mengã sẽn yã Wẽnnaam sẽn sõng-a to-to wã n kɩt t’a tõog n yeel a tẽed-n-taasã tɩ b ra maan “yɩɩr ne bũmb ba a yembrã.”—Karm-y Filip rãmb 4:6, 7.
16, 17. Rɩk-y makr n wilg a Zeova sẽn kõt a nin-buiidã pãng to-to rũndã-rũndã tɩ b tõogd toog zu-loees sasa.
16 Tõnd saam-bi-poak yʋʋr sẽn boond t’a Roxana sɩd yãa a Zeova sẽn get a nin-buiidã yell to-to wã vẽenega. Daar a ye, a kosa a tʋʋmdã taoor soab sor n na n kẽng rasem a tãab tigis-kãsenga, la a sũur yika ne a Roxana t’a yeel t’a sã n kẽnge, a na n yiis-a-la a tʋʋmdẽ wã. La d saam-bi-poakã baas n kẽngame, la a pʋʋsd ne a sũur fãa tɩ b ra wa yiis-a tʋʋm ye. A sẽn pʋʋsã poore, a pa le maan yɩɩr ne yellã ye. La tẽne wã raar yibeoogo, a sẽn lebg n kẽng tʋʋmã, tʋʋmdã taoor soabã sɩd bas-a-la tʋʋm wa a sẽn da yeelã. A Roxana ra pa mi a sẽn maandg masã ye. Baa b sẽn da pa yaood-a wʋsgã, a sẽn da paamdã ra sekda a yɛl kẽer manegre. A le pʋʋsame, la a ning a yamẽ tɩ Wẽnnaam sẽn sõng-a to-to ne tigis-kãsengã maasmã, yaa vẽeneg t’a tõe n gesame t’a paam bũmb a taab nins sẽn yaa tɩlae ne-a wã me. A Roxana sẽn wa kuusẽ wã, a yãa sebr sẽn tabe, t’a zugã, b wilg tɩ b baooda neb sẽn mi masĩn sẽeb n na n dɩk tʋʋma. Tao-tao bala, a gʋlsa sebr n tɩ kɩse. Tʋʋmdã taoor soab gesa a sɛbã n mik t’a minimã pa ta bãmb sẽn datã ye. La ne rẽ fãa, a kõ-a-la tʋʋmd a to, tɩ b sẽn na n yaood-a wã kolg a sẽn da paamdã naoor a yiibu. A Roxana bãngame t’a pʋʋsgã fãa reegame. La bark ning a sẽn paam tɩ noom-a n yɩɩd yaa t’a paam n moona koɛɛgã a tʋmd-n-taas wʋsgo. Bãmb b nu n sak sɩdã n lebg kiris-neba, t’a tʋʋmdã taoor soab be b sʋka.
17 Wakat ninga, tõe n wa wõnda d pʋʋsgã pa paamd leokre, rat n yeel tɩ Wẽnnaam pa leok-d zĩig pʋgẽ wall a pa leok-d wa d sẽn da ratã kɛpɩ ye. La sã n wa yaa woto, yaa vẽeneg tɩ tara võore. A Zeova mii a sẽn pa leok tõnd wa a sẽn datã võore, la yaa kaoosg zugẽ la d me tõe n wa bãng rẽ. La bũmb sẽn be bal yaa tɩ Wẽnnaam pa basd a nin-buiidã sõngr lae-lae.—Heb. 6:10.
D paamda pãng n yalsd kãn-kãe toog buud fãa taoore
18, 19. a) Bõe yĩng tɩ d pa tõe n pa seg zu-loees la makr toor-toore? b) Bõe n tõe n sõng-y tɩ y tõog n yals kãn-kãe zu-loees taoore?
18 A Zeova nin-buiidã sã n segd makre, raood komsgo, namsg b tẽebã yĩnga, la neb sẽn pẽgd-b n dat tɩ b maan wẽnga, pa lingd-b ye. Dũniyã neb pʋd n kisa tõndo. (Zã 15:17-19) La vʋʋsem sõngã tõe n kõ-d-la pãng tɩ d tõog n yals kãn-kãe toog buud fãa taoore. A Zeova pa na n tol n bas tɩ makr sẽn yɩɩd d pãng paam-d ye. (1 Kor. 10:13) A pa na n tol n bas-d sõngr abada! (Heb. 13:5) Biiblã noyã tũub kogenda tõnd la kõt-d pãnga. Sẽn paase, Wẽnnaam vʋʋsem sõngã tõe n kɩtame tɩ d tẽed-n-taasã sõng tõnd wakat ning d sẽn dat sõngr n yɩɩdã.
19 Bɩ tõnd ned kam fãa ket n baood vʋʋsem sõngã, a sẽn na n pʋʋsdẽ la a zãmsd Wẽnnaam Gomdã. Bɩ d fãa ‘pãng paamd paasg ne bũmb fãa Wẽnnaam pãn-kãsengã yĩnga, hal tɩ d modgd ne sũ-mar la sũ-noog daar fãa.’—Kol. 1:11.
[Tẽngr note]
^ sull 6 Ges-y yʋʋmd 2001 sig-noy kiuug pipi daar Gũusg Gasgã seb-neng 27, la yʋʋmd 1993 wao-fugdg kiuug rasem a 8 Réveillez-vous ! wã seb-neng 21 ne 22.
Y na n leokame tɩ bõe?
• Bõe la y tõe n maan tɩ sõng-y tɩ y wa tõog n yals kãn-kãe namsg taoore?
• Ned sẽn maan yel-wẽnd sã n kos-y tɩ y ra togse, y manesem segd n yɩɩ wãna?
• Zu-loɛɛg fãa taoore, y tõe n kɩsa sɩd ne bõe?
[Zãmsgã sogsgã]
[Foto, seb-neng 30]
A Zozue ne a Kalɛɛb kibarã zãmsda tõnd bõe?
[Foto, seb-neng 31]
Wãn to la y tõe n sõng y zoa sẽn maan sẽn pa segde?