D waoog kãadmã sẽn yaa Wẽnnaam kũunã
D waoog kãadmã sẽn yaa Wẽnnaam kũunã
“Yaa yãoã yĩng n kɩt tɩ rao na n bas a ba ne a ma n zĩnd ne a paga; la bãmb na n yɩɩ yĩng a yembre.”—SƖNG. 2:24.
1. Bõe yĩng t’a Zeova segd ne waoogre?
WẼNNAAM A ZEOVA sẽn yaa kãadmã lugundã sɩd segda ne waoogre. A sẽn yaa tõnd Naanda, d Soaal la d Ba sẽn be saasẽ wã yĩnga, Biiblã sẽn yeel tɩ “bark sõma fãa la kũun sõma fãa yita” a nengẽ wã sɩd zemsame. (Zak 1:17; Wil. 4:11) Woto wilgda a nonglmã sẽn ka to wã. (1 Zã 4:8) Bũmb nins fãa a sẽn wilgd tõndã, bũmb nins fãa a sẽn dat tɩ d maanã la bũmb nins fãa a sẽn kõt-dã yaa d neer yĩnga.—Ezai 48:17.
2. No-bʋs la a Zeova kõ a Ãdem ne a Hawa?
2 Biiblã wilgdame tɩ kãadmã bee kũun “sõma” nins Wẽnnaam sẽn kõtã sʋka. (Rut 1:9; 2:12) A Zeova sẽn loe pipi kãadmã poore, a kõ a Ãdem ne a Hawa noy takɩ b sẽn segd n tũ tɩ b zĩid-n-taarã yɩ noogo. (Karm-y Matɩe 19:4-6.) B sã n da kell n sak Wẽnnaam, b sũ-noogã ra pa na n tol n sa ye. La b maana b mense, n kɩɩs Wẽnnaam tɩ wa ne zu-loees wʋsgo.—Sɩng. 3:6-13, 16-19, 23.
3, 4. a) Rũndã-rũndã, wãn to la wʋsg paoogd kãadmã la b paoogd Wẽnnaam a Zeova me? b) Bõe yell la d na n gom sõs-kãngã pʋgẽ?
3 Rũndã-rũndã, neb wʋsg rɩkda a Ãdem ne a Hawa naoore, n pa tũud a Zeova noyã sõma kãadmã wɛɛngẽ, wall b pʋd n pa tũud-b baa bilf ye. Neb kẽer vɩɩ ne taab n pa kẽ kãadem, pa rẽ bɩ b kẽed kãadem tɩ pa zemsd ne Wẽnnaam noyã ye. Wala makre, rap kẽeda kãadem ne taaba, tɩ pagb me kẽed kãadem ne taaba, tɩ wʋsg tagsdẽ tɩ b tara sor n tõe n kao b kãadmã wakat ning b sẽn date. (Rom 1:24-32; 2 Tɩm. 3:1-5) B yĩmdame tɩ kãadmã yaa Wẽnnaam kũuni, la tɩ b sã n paoogd kũun-kãngã, b paoogda a kõtã sẽn yaa Wẽnnaam a Zeova wã.
4 Wakat ninga, Wẽnnaam a Zeova nin-buiidã neb kẽer mi n wa yĩma a sẽn get kãadmã to-to wã bilfu. Wala makre, kiris-neb sẽn kẽ kãadem tõe n wa rat n welga taaba, wall b kao b kãadmã tɩ bũmb ning sẽn kɩt tɩ b rat n maand dẽ wã yaool n pa zems ne Biiblã noyã ye. Bõe n tõe n sõng-d tɩ d gil yɛl a woto buudu? Wãn to la Wẽnnaam goam nins sẽn be Sɩngr 2:24 soabã tõe n sõng kiris-neb nins sẽn kẽ kãadmã tɩ b paas b kãadmã pãnga? La wãn to la sẽn magd-b n dat n kẽ kãadmã tõe n segl b mense? Biiblã gomda neb kẽer kãadem sẽn yɩ sõma yelle. D na n sõsa bãmb b tãab zugu. Rẽ na n sõng-d lame tɩ d bãng tɩ d sã n dat tɩ d kãadem yɩ sõma, yaa tɩlae tɩ d sak a Zeova noyã.
Modg-y n tall-y pʋ-peelem ne taaba, la ne Wẽnnaam
5, 6. Bõe n da tõe n kɩt t’a Zakari ne a Elizabɛt bas taaba, la b sẽn kell n pelg b pʋs ne taabã naf-b-la wãn-wãna?
5 A Zakari ne a Elizabɛt fãa ra modgame n maan sẽn segde. B ned kam fãa kẽe kãadem ne ned sẽn tũud a Zeova sõma. A Zakari ra tʋmda a maan-kʋʋrã tʋʋm neere. Sẽn paase, b fãa ra modgd n tũuda Wẽnnaam tõogã wa b sẽn tõe tɛka. Sãmbg kae tɩ yɛl wʋsg wɛɛngẽ, b ra tõe n pʋʋsa Wẽnnaam barka. La y sã n da kẽng b yirã Zida n tɩ kaab-ba, pa na n kaoos la y yã tɩ bũmb n da paoog-b ye. B ra pa tar kamb ye. A Elizabɛt ra yaa kiri. Sẽn paase, b yiibã fãa me ra kʋʋlame.—Luk 1:5-7.
6 Pĩnd wẽndẽ Israɛllã pʋgẽ, nebã ra geta kamb paoong wa bark bũmbu, la sẽn paase, b ra wae n dogda wʋsgo. (1 Sãm. 1:2, 6, 10; Yɩɩl 128:3, 4) Wakat kãnga, Israɛll ned pag sã n da yaa kiri, a ra tõe n bas-a-la rẽ yĩnga. La a Zakari kell n zĩnda ne a Elizabɛte. A pa bao bʋʋm n na n bas a pagã ye. A pagã me pa maan woto ye. Baa b sẽn da pa tar kambã sẽn da namsd-bã, b ra nooma ne taaba, la b ra ket n tũuda a Zeova. La b kʋʋlmã zugẽ, a Zeova ning-b-la bark wʋsgo, n maan yel-solemd n kɩt tɩ b paam biiga.—Luk 1:8-14.
7. Bõe me la a Elizabɛt wa n maan n wilg t’a pelga a pʋg ne a sɩdã?
7 A Elizabɛt wa n maana bũmb a to me sẽn wilgd t’a pelga a pʋg ne a sɩdã, hal tɩ sek pẽgre. B biig a Zã rogmẽ wã t’a Zakari ra pa le tõe n gome, bala Wẽnnaam kɩtame t’a lebg muka, a sẽn pa tẽ malɛkã goamã yĩnga. La yaa vẽeneg t’a Zakari ra bilga a pagã t’a Zeova malɛkã yeelame tɩ b segd n pʋda biigã yʋʋr t’a “Zã.” Yagsã la roagdbã wa n dat n dɩka biigã ba wã yʋʋr n pʋd-a, la a Elizabɛt tõdgame n yeel tɩ b pʋd yʋʋr ning a Ba wã sẽn da bilg yẽ wã. A leok-b-la woto: “Ayo, pʋd-y-yã a yʋʋr t’a Zã.”—Luk 1:59-63.
8, 9. a) Rao ne a pag sã n pelgd b pʋs ne taaba, wãn to la rẽ paasd b kãadmã pãnga? b) Bõe ne bõe la neb sẽn kẽ kãadem tõe n maan n wilg tɩ b pelga b pʋs ne taaba?
8 Rũndã-rũndã, neb wʋsg me sẽn kẽ kãadem sũy sãamda yɛl toor-toor yĩnga. Kãadem pʋgẽ, neb a yiibã sã n pa pelg b pʋs ne taab la ne Wẽnnaam, b kãadmã pa tõe n yɩ sõma ye. Wala makre, b nin-yɛng sã n wa tar dolemd manesem ned a to, pa rẽ bɩ a get yoobã yɛl wall a yood bɩ a maand yel-yood a taaba, tõe n sãama b kãadmã wall kɩt t’a to wã pa le tar bas-yard ne-a ye. La bas-yard sã n wa pa le be kãadem pʋgẽ, nonglmã me sɩngda boogre. Pʋ-peelmã yaa wa lalg sẽn gũbg zak sẽn kogend zakã neb tɩ b tõe n põs yɛl sãnda, la kɩtdẽ tɩ nin-wẽns pa tõe n paam-bã. Woto kɩtame tɩ pag ne a sɩd sã n pelg b pʋs ne taaba, bɩ kogend-b b zĩid-n-taarã pʋgẽ, tɩ b ned kam fãa tõe n togs a to wã a pʋga, tɩ kɩtdẽ tɩ b nonglmã paasdẽ. Hakɩka, kãadem pʋgẽ, pʋ-peelem yaa tɩlae.
9 A Zeova ra yeela a Ãdem woto: ‘Rao na n basa a ba ne a ma n zĩnd ne a paga.’ (Sɩng. 2:24) Woto rat n yeelame tɩ bõe? Rat n yeelame tɩ ned sã n kẽ kãadem, segdame t’a toeem manesem nins a sẽn da tar ne a zo-rãmbã la ne a roagdbã. Sẽn segd n pak-a n yɩɩd lebga a to wã yell gesgo. Neb a yiibã pa segd n bas b zakã yell gesgo, n lʋɩɩs b zo-rãmbã wall b roagdbã raab taoor ye. B leb n pa segd me n bas tɩ b roagdbã kẽed b zakã yɛlẽ wall b mo-yõsã pʋsẽ ye. Raoã ne a pagã segd n gãda taab sõma. Woto la Wẽnnaam data.
10. Bõe n na n sõng neb sẽn kẽ kãadem tɩ b pelgd b pʋs ne taaba?
10 Baa raoã ne a pagã tũudum sã n pa a ye, b sã n pelgd b pʋs ne taaba, nafd-b lame. Saam-bi-poak a ye sẽn tar sɩd sẽn pa kiris-ned yeela woto: “Mam pʋʋsda a Zeova bark wʋsgo, a sẽn wilgd-m m sẽn tõe n sak m sɩdã la m waoog-a to-to wã. Tõnd kãadmã tara yʋʋm 47 masã, la d sẽn pelgd d pʋs ne taabã yĩng kɩtame tɩ d ket n nong taab la d waoogd taaba.” (1 Kor. 7:10, 11; 1 Pɩɛ. 3:1, 2) Bɩ y ned kam fãa mao t’a to wã tõog n tall bas-yard ne-a. Ne y no-goamã la ne y manesmã, kɩt-y tɩ y to wã bãng vẽeneg tɩ yãmb nifẽ, ned kae dũni zug ka t’a yõod ta yẽ ye. Maan-y y sẽn tõe fãa n da tol n bas tɩ ned wall bũmb baa a ye sãam y kãadmã ye. (Karm-y Yelbũn 5:15-20.) Rao a ye yʋʋr sẽn boond t’a Ron ne a pag a Jeannette sẽn kẽ kãadem sẽn yɩɩd yʋʋm 35 masã wã yeela woto: “Tõnd sẽn sakd Wẽnnaam ne d sũur fãa la d pelgd d pʋs me ne taabã kɩtame tɩ d kãadmã yaa sõma n kõt-d sũ-noogo.”
Zems-n-taar paasda kãadem pãnga
11, 12. Wãn to la a Akila ne a Pirsill ra naagd taab n tʋmdẽ, a) b zakẽ wã, b) b nug-tʋʋmdã, la d) koe-moonegã pʋgẽ?
11 Tʋm-tʋmd a Poll sã n da wa gomd a zoa a Akila bɩ a pag a Pirsill yelle, a pa gomd b nin-yend yell n bas a to wã ye. Ra-kãngã ne a pagã sẽn da vɩ ne taab to-to wã sɩd wilgda Wẽnnaam sẽn yeel tɩ rao ne a pag segd n lebga ‘yĩng a yembrã’ sẽn dat n yɛɛlga. (Sɩng. 2:24) B ra naagda taab wakat fãa n tʋmd b zakã pʋgẽ, b nug-tʋʋmdã pʋgẽ, la koe-moonegã pʋgẽ. Wala makre, a Poll sẽn wa n kẽng Korẽnt pipi wã, a Akila ne a Pirsill sak n deeg-a-la b zakẽ, la wõnda a zĩnda be bilf n tʋm a tʋʋmã. Kaoosg zugẽ, a Akila ne a Pirsill sẽn da wa n tɩ be Efɛɛzã, b sakame tɩ b ra maand tigissã b zakẽ wã. Sẽn paase, b ra naagda taab n sõngd nin-paalsã tɩ b bãngd Wẽnnaam n paasdẽ, wa b sẽn sõng a Apolossã. (Tʋʋ. 18:2, 18-26) Dẽ poore, ra-kãngã ne a pagã sẽn da tar yẽesmã wa n kẽnga Rom. Beenẽ me, b sakame tɩ b ra maand tigissã b zakẽ wã. B wa n yii be n leb Efɛɛz n tɩ zĩndi, n kengd saam-biisã raoodo.—Rom 16:3-5.
12 Sasa n da zĩnd me t’a Akila ne a Pirsill la a Poll naag taab n tʋme, bala b fãa nug-tʋʋmd ra yaa a ye. B ra maanda fu-roto. Wakat kãng me, raoã ne a pagã naaga taab n tʋme, tɩ wags-taab la mo-yõs pa zĩnd ye. (Tʋʋ. 18:3) Yaa vẽeneg tɩ yaa a Akila ne a Pirsill sẽn da naagd taab n moond koɛɛgã la sẽn kɩt tɩ b ra lʋɩɩsd Wẽnnaam daabã taoorã. Yaa rẽ n sõng tɩ b kãadmã yɩ sõma hal wʋsgã. B sẽn zĩnd Korẽnt ne Efɛɛz la Rommã fãa, nebã bãngame tɩ nin-kãensã yaa “tʋmd-n-taas Kirist Zezi tũudmã pʋgẽ.” (Rom 16:3) B sẽn zĩndẽ fãa, b ra naagda taab n sõngd ne Rĩungã koɛɛgã moonego.
13, 14. a) Kãadem pʋgẽ, yel-bʋs n tõe n kɩt tɩ neb a yiibã pa gãd taab sõma? b) Bõe maaneg n tõe n sõng rao ne a pag tɩ b sɩd yɩ wa “yĩng a yembre”?
13 Kãadem pʋgẽ, neb a yiibã fãa raabã sã n yaa yembre, la b sã n naagd taab n tʋmdẽ, sɩd paasda b kãadmã pãnga. (Koɛ. 4:9, 10) Bʋko, neb wʋsg sẽn kẽ kãadem pa rɩkd sẽk n zĩnded ne taab tɩ sekdẽ ye. B ned kam fãa tʋʋmd yaa toore, la rɩkd sẽk wʋsg me. Kẽer tʋʋmd kɩtame tɩ b togd soay wʋsgo, tɩ sãnda mi n bas b zakã rãmb n tɩ tʋmd zĩig a to, n toond ligdã. Baa kẽer sã n be yir ne taaba, b pa sõsd ne to ye. Yaa televiziõ wã, ɛspoor ning b sẽn nonge, ze-video rãmbã wall ẽntɛrnetã n pak-ba. Rẽ yĩnga, yãmb zakẽ wã yaa woto bɩ? Sã n yaa rẽ bɩ y mao n toeem y yɛlã n tõogd n sõsd ne taab sõma. Tags-y n ges-y y sã n pa tõe n naagd taab n tʋmd tʋʋm kẽer zakã pʋgẽ. Rẽ toor sẽn ka be, y tõe n naagda taab n get y kambã yell wall y roagdb sẽn kʋʋl yelle.
14 Sẽn yɩɩd fãa, naagd-y taab n tʋmd a Zeova tũudmã yĩnga. Wala makre, y sã n vaeesd daarã vɛrse wã ne taab la y naagd taab n maand zak pʋgẽ Biibl zãmsgã, na n kɩtame tɩ yãmb y yiibã raabã la y tagsa wã zemsd taaba. Naagd-y taab me n moond koɛɛgã. Sã n tõe bɩ y rɩkd so-pakrã tʋʋmd ne taaba, baa yaa kiuug a ye wall yʋʋmd a ye bal la y tõeyã. (Karm-y 1 Korẽnt dãmb 15:58.) Saam-bi-poak a ye sẽn da naag a sɩd n yɩ so-pakd yeela woto: “Koe-moonegã me ra kɩtdame tɩ d be ne taab la d sõsd ne taab n yɩɩda. Bala d yiibã fãa sẽn da rat yaa sõng neb nins d sẽn moondã. Rẽ kɩtame tɩ m da neẽ tɩ d ra gãda taab la d teend taaba. M da pa le get m sɩdã wa m sɩd bal ye, m da get-a-la wa m zoa hakɩka.” Y sã n naagd taab n tʋmd tʋʋm sẽn tar yõodo, bũmb nins sẽn pak-yã, y raabã la bũmb nins y sẽn minim n maandẽ wã na n wõnegda taab bilf-bilfu, hal tɩ y wa lebg wa a Akila ne a Pirsill. Y tagsa wã, y sẽn get yɛlã to-to wã la y tʋʋmã na n wa zemsda taab kɛpɩ, n kɩt tɩ y lebg wa “yĩng a yembre.”
Lʋɩɩsd-y Wẽnnaam daabã taoore
15. Bõe n kɩtd tɩ kãadem tall barka? Wilg-y y leoorã võore.
15 A Zezi ra miime tɩ kãadem pʋgẽ, tara yõod tɩ neb a yiibã lʋɩɩs Wẽnnaam daabã taoore. A yãa a Zeova sẽn wa n loet pipi kãadmã. A yãa a Ãdem ne a Hawa sũy sẽn da noom to-to, b sẽn da wa n sakd Wẽnnaamã. A leb n yãa b sẽn kɩɩs Wẽnnaam noorã sẽn kɩt tɩ b paam zu-loees ninsã. Rẽ n kɩt t’a Zezi sẽn wa n moond koɛɛgã, a lebs n togs nebã a Ba wã goam nins sẽn be Sɩngr 2:24 soabẽ wã, la a paas woto: “Bɩ ned da welg bũmb nins Wẽnnaam sẽn lagem ne taabã ye.” (Mat. 19:6) Dẽnd sẽn na yɩl tɩ kãadem tall bark la kõ neb a yiibã sũ-noogo, ket n yaa tɩlae tɩ b waoogd a Zeova ne b sũy fãa. Rẽ wɛɛngẽ, a Zezi ba-wubdg a Zozɛf ne a ma a Maari kõo mak-sõngo.
16. Wãn to la a Zozɛf ne a Maari ra wilgd tɩ b yaa wẽn-sakdba?
16 A Zozɛf ra geta a Maari yell sõma la a waoogd-a. A sẽn da wa n bãng t’a Maari tʋtame wã, baa nand tɩ Wẽnnaam malɛkã wa wilg-a bũmb ning sẽn paam a Maari wã, a talla manesem sẽn wilg t’a zoet-a a nimbãanega. (Mat. 1:18-20) A Zozɛf ne a pag a Maari saka a Sezaar noorã la b tũu a Moiiz tõogã me sõma. (Luk 2:1-5, 21, 22) Sẽn paase, baa sẽn da yaa rapã bal la Wẽnnaam kõ noor tɩ b kẽngd Zerizalɛm n maand tig-kãsemsã, yʋʋmd fãa, a Zozɛf ne a Maari n paas b zakã rãmb fãa ra kẽngdame. (Tõo. 16:16; Luk 2:41) Ra-kãngã ne a pagã sẽn da yaa wẽn-zoɛtbã ra modgd n maanda woto la b maand yɛl a taab sẽn na yɩl n ta a Zeova yam. B ra nanda a tũudmã yel-maandɩ wã hal wʋsg me. Rẽnd pa lingr la a Zeova sẽn bobl-b a biig a Zezi n kɩt tɩ b ges a yell a yãadmã sasa wã ye.
17, 18. a) Wãn to la rao ne a pag tõe n lʋɩɩs Wẽnnaam daabã taoor b vɩɩmã pʋgẽ? b) Wãn to la rẽ na n naf-ba?
17 Yãmb ne y pagã me wilgdame tɩ y yaa wẽn-sakdb bɩ? Wala makre, y sã n wa rat n yãk yam n maan bũmb sẽn tar yõod wʋsgo, y baooda sagls Biiblã pʋgẽ bɩ? Y pʋʋsda rẽ wɛɛngẽ la y kos kiris-neb sẽn bɩ sõngr bɩ? Bɩ y mi n tũuda y meng yam wall y roagdb bɩ y zo-rãmb saglse? Y modgdame n tũud sagl-sõma nins tʋm-tʋmd sẽn tũud sɩdã sẽn kõt kãadmã la zak pʋgẽ vɩɩmã wɛɛngẽ wã bɩ? Bɩ y nong n tũuda y tẽngã rog-m-migs la a nebã tagsgo? Y pʋʋsdame la y zãmsd Biiblã ne taab wakat fãa bɩ? Yãmb mi n naaga taab n yãk bũmb takɩ y sẽn dat n wa maan Wẽnnaam tʋʋmdã pʋgẽ bɩ? Y sõsda ne taab bũmb nins sẽn segd n pak y zakã rãmbã yell zug bɩ?
18 Rao a ye sẽn kẽ kãadem na maan yʋʋm 50 t’a yʋʋr boondẽ t’a Ray yeela woto: “Tõnd zɩ n paam zu-loɛɛg d sẽn pa tõog n welg ye. Bala a Zeova bee tõnd sʋk wakat fãa tɩ kɩt tɩ d kãadmã yaa wa ‘wĩir sẽn kal a tãabo.’ ” (Karm-y Koɛɛg Soab 4:12.) A Danny ne a pag a Trina me yeela woto: “Tõnd sẽn naagd taab n tũud a Zeova wã, paasda d kãadmã pãnga.” Yaa hal sẽn yɩɩd yʋʋm 34 masã la b kẽ kãadem, n vɩ ne taab tɩ tar yamleoogo. Y kãadmã pʋgẽ, y sã n lʋɩɩsd a Zeova raabã taoore, a na n ning-y-la barka, la a sõng-y tɩ y tõog tɩ y kãadmã tall yamleoogo.—Yɩɩl 127:1.
Ket-y n waoogd-y Wẽnnaam kũunã
19. Bõe yĩng tɩ Wẽnnaam lugl kãadem?
19 Rũndã-rũndã, sẽn pak neb wʋsg yaa bũmb nins sẽn noom bãmb mensã bala. La pa woto ne ned sẽn tũud a Zeova ye. Bala, a miime tɩ Wẽnnaam sẽn lugl kãadmã n kõ ãdem-biisã yaa sẽn na yɩl n pids a raabã. (Sɩng. 1:26-28) A Ãdem ne a Hawa sã n da waoogẽ kũun-kãngã, dũniyã gill ra na n lebga arzãna, n pid ne neb sẽn tũud Wẽnnaam ne sũ-noogo.
20, 21. a) Bõe yĩng tɩ d segd n ning d yamẽ tɩ kãadem yaa sõngo? b) Kũun-bʋg yell la d sõsg ning sẽn pʋgdã na n gome?
20 Sẽn yɩɩd fãa, Wẽnnaam a Zeova nin-buiidã geta kãadmã wa segb b sẽn paam n na n waoog-a. (Karm-y 1 Korẽnt dãmb 10:31.) Wa d sẽn yã sõs-kãngã pʋgẽ wã, neb sẽn kẽ kãadem sã n pelgd b pʋs ne taaba, b sã n sõngd taaba, la b lʋɩɩs Wẽnnaam taoor b kãadmã pʋgẽ, nooma Wẽnnaam la paasd b kãadmã pãnga. Rẽ n so tɩ d sã n segend n dat n kẽe kãadem, wall d rat n paasa d kãadem pãnga, pa rẽ bɩ d kãadem n dat n sãam tɩ d tʋll n maneg-a, rẽndame tɩ d bãng tɩ d pa segd n deem ne kãadmã, bala yaa Wẽnnaam n lugl-a. D sã n ning woto d yamẽ, na n kɩtame tɩ d maand d sẽn tõe fãa n tũud Wẽnnaam Gomdã sagls d kãadmã pʋgẽ. D sã n maand woto, d pa wilgd bal tɩ d waoogda kãadmã sẽn yaa kũunã ye, d wilgdame me tɩ d waoogda kũun-kãngã kõtã sẽn yaa Wẽnnaam a Zeova wã.
21 Yaa sɩd tɩ pa kãadmã bal la kũun a Zeova sẽn kõ-d ye. Leb n pa kãadem bal n kɩtd tɩ ned vɩɩm yɩ-a noog ye. Sõsg ning sẽn pʋgdã na n goma kũun a to me Wẽnnaam sẽn kõt tɩ tar yõod wʋsg yelle. Kũun-kãng yaa tõog ning a sẽn kõ neb kẽer tɩ b tõe n zĩnd b ye n kaoos n pa kẽ kãadmã.
Y na n leokame tɩ bõe?
• Kiris-neb sẽn kẽ kãadem sã n maand pʋ-peelem ne taaba, wãn to la nafd-ba?
• Bõe yĩng tɩ rao ne a pag sã n naagd taab n tʋmdẽ bɩ na n paas b kãadmã pãnga?
• Bõe ne bõe la sẽn kẽ-b kãadmã tõe n maan n wilg tɩ b lʋɩɩsda Wẽnnaam daabã taoore?
• Wãn to la d tõe n wilg tɩ d waoogda a Zeova sẽn yaa kãadmã lugundã?
[Zãmsgã sogsgã]
[Foto, seb-neng 18]
Naag taab n tʋm wata ne zems-n-taare