Bao n ta Wẽnnaam yam wata ne vɩɩm sẽn kõn sa
Bao n ta Wẽnnaam yam wata ne vɩɩm sẽn kõn sa
“Zusoaba, yãmb ningda nin-tɩrs zut barka. Yãmb barkã yaa wa gãong bãmb yĩnga.”—YƖƖL 5:13.
1, 2. Bõe la a Eli kos Sarepta pʋg-kõore, la bõe la a yeel pagã tɩ kɩt t’a yam gãande?
KOM n da tar Sarepta pʋg-kõor ne a biiga, la Wẽnnaam no-rɛɛs a Eli me. Pagã sẽn wa n wɩɩsd raad n na n tɩ segle, no-rɛɛs a Eli ta n kos-a-la koom la rɩɩbo. A sakame n na n kõ no-rɛɛsã koomã, la rɩɩb a sẽn da tar yaa ‘zom ne rʋk la kaam ne lengr bilf’ bala. A tagsame t’a sẽn tarã pa sek yãk n kõ no-rɛɛsã, tɩ kɩt t’a togs-a rẽ.—1 Rĩm 17:8-12.
2 La ne rẽ fãa, a Eli yeel-a-la woto: “Reng n segl bũmb bilf n wa kõ maam la f yaool n segl foom ne f biigã yĩnga. Tɩ bõe, Israɛll Zusoab a Wẽnnaam yeelame tɩ zom ning sẽn be rʋkã pʋgẽ ne kaam ning sẽn be lengrã pʋgẽ wã ka na n sɛ ye.”—1 Rĩm 17:13, 14.
3. Yel-bʋg taoor la tõnd ned kam fãa be?
3 Pʋg-kõorã na sak n yãk a rɩɩbã sẽn pa waoogã n kõ no-rɛɛsã bɩ a na zãgsã ra na n wilga bũmb sẽn tar yõod wʋsgo. Woto ra na n wilga a sã n na n teega a Zeova t’a fãag yẽ ne a biigã, bɩ a sã n na n lʋɩɩsa bũmb ning sẽn pak-a wã taoor n yɩɩg bao Wẽnnaam lohorem la a zoodo. Tõnd ned kam fãa me bee yell a woto buud taoore. D na n modgame n bao n ta a Zeova yam bɩ, bɩ d na n basame tɩ laog la arzɛk baoob pak-do? Bʋʋm toor-toor n kɩt tɩ d segd n teeg Wẽnnaam la d maan a raabã. Sẽn paase, bũmb toɛy-toɛy n be d sẽn tõe n maan n paam Wẽnnaam lohormã.
“Yãmb n zems tɩ reeg pẽgr la waoogre”
4. Bõe yĩng tɩ zems tɩ d maan a Zeova raabã?
4 A Zeova tara sor n na n tʋlg tɩ ãdem-biisã tũ-a tɩ zems a sẽn dat to-to wã. A tʋm-tʋmdb sẽn be saasẽ n da naag taab n wilg tɩ rẽ sɩd segdame, n yeel woto: “Tõnd Zusoab la tõnd Wẽnnaam, yãmb n zems tɩ reeg pẽgr la waoogr la pãnga. Tɩ bõe, yãmb n naan bũmb fãa, la yaa yãmb daabã yĩng la yãmb naan bãmb tɩ b beẽ.” (Wil. 4:11) Sẽn yaa a Zeova n naan bũmb fãa wã yĩnga, sɩd zemsame tɩ d maan a raabã.
5. Bõe yĩng tɩ Wẽnnaam sẽn nong-dã segd n kɩt tɩ d maan a raabã?
5 Bũmb a to me sẽn kɩt tɩ d segd n maan a Zeova raabã yaa a sẽn nong tõnd ne nonglem sẽn ka to wã. Biiblã yeela woto: “Wẽnnaam naana ninsaal wa b meng wẽnego, Wẽnnaam naana yẽ wa bãmb wẽnego. Bãmb naana bãmb daoa, la paga.” (Sɩng. 1:27) Wẽnnaam kõo ninsaal tõog t’a tõe n tags n yãk yam n tũ yẽ wall a maan yɛl a taaba. Sẽn yaa a Zeova n naan tõndã, a yaa ninsaalbã fãa Ba. (Luk 3:38) Wa Ba sẽn nong a kamb sẽn maand to-to wã, a kõo a kom-dibli wã ne a kom-pugli wã bũmb nins fãa sẽn yaa tɩlae ne b vɩɩmã. A ‘kɩtdame tɩ wĩntoog zẽkdẽ’ la a “tʋmd saaga,” tɩ bõn-bɩts toor-toor yit la b womd biis tɩ d paamd rɩɩb tɩ sekdẽ, la d paamd zĩis sẽn yaa neer n be rasãnde.—Mat. 5:45.
6, 7. a) Yel-bʋs la a Ãdem bao n kõ a kambã la a yagensã? b) Bõe la Kiristã maoongã na n kɩt tɩ sẽn dat-b n ta Wẽnnaam yamã wa paame?
6 A Zeova maana bũmb n na n fãag tõnd ne yel-wẽndã bi-wẽns buud toor-toorã me. A Ãdem sẽn maan yel-wẽndã, a maana wa zak soab sẽn bas a zak rãmb yell gesgo, n dɩk a tarmã n tɩ tão lotori n bõne. A sẽn kɩɩs a Zeova wã, a kɩtame t’a kambã kong bark ning b sẽn da segd n paamã, rat n yeel tɩ sũ-noog sẽn kõn sa. A sẽn bao a meng nafr balã, a kẽesa a kambã la a yagensã fãa yembd pʋgẽ. A kɩtame tɩ b lebg koangdba. Rẽ n so tɩ ãdem-biisã fãa bẽedẽ, n paamd sũ-sãamse, la b wa baas n ki. B sã n dat n yiis yamb a yembd pʋgẽ, b segd n yaoa a zu-soabã yaoodo. A Zeova yaoa yaood sẽn tõe n kɩt tɩ tõnd me paam d mens ne yel-wẽndã bi-wẽnsã. (Karm-y Rom dãmb 5:21.) A Zezi Kirist sak n ‘kõo a vɩɩmã tɩ yao neb wʋsg yĩnga,’ tɩ zems ne a Ba wã raabo. (Mat. 20:28) Ka la bilfu, neb nins fãa sẽn modgd n tat Wẽnnaam yamã na n dɩɩ rond ning a sẽn yao n deeg-bã yõod zãnga.
7 A Zeova sẽn yaa tõnd naandã maana bũmb ned sẽn pa tol n tõe n maane, sẽn na yɩl tɩ tõnd paam sũ-noog la vɩɩm sẽn tar barka. D sã n tat a yam, d na n tõog n bãnga a sẽn maand to-to n na n yiis ãdem-biisã b namsgã pʋgẽ wã. A Zeova na n ket n wilgda tõnd ned kam fãa t’a sɩd ‘yaa neb nins sẽn baood-a wã roanda.’—Heb. 11:6.
“Yãmb nebã na n dɩka b mens n kõ yãmb ne yamleoogo”
8. Wẽnnaam sẽn tall manesem ning ne a Ezai wã wilgda tõnd bõe a raabã maaneg wɛɛngẽ?
8 Yɩl n ta Wẽnnaam yam baoodame tɩ d tʋm ne tõog ning a sẽn kõ-d tɩ d tõe n yãk d toorẽ yamã sõma. Bala, a Zeova pa modgd ned baa a ye t’a maan a raabã ye. Wala makre, a Ezai wakatẽ wã, Wẽnnaam sẽn da wa n dat ned n tʋmã, a soka woto: “Mam na n tʋma ãnda? Ãnda n na n kẽng n kõ-do?” A sẽn sok woto n kõ no-rɛɛsã weer t’a ra tõe n sak wall a zãgsã, a waoog-a lame. Tags-y n ges-y-yã a Ezai sũur sẽn yɩ noog to-to a sẽn wa n leokd woto wã: “Ad maam, bɩ y tʋm maam.”—Ezai 6:8.
9, 10. a) Ne yam bʋg la d segd n tũ Wẽnnaam? b) Bõe yĩng tɩ d segd n maand a Zeova raabã ne d sũur fãa?
9 Ned buud fãa tara sor n na n tũ Wẽnnaam wall a ra tũ-a ye. A Zeova ratame tɩ d maan a raabã ne yamleoogo. (Karm-y Zozue 24:15.) Ned sã n maand Wẽnnaam daabã la a yẽgemdẽ, a pa tõe n ta a yam ye. Ned sã n tũud Wẽnnaam nebã na pẽg-a yĩng bal me, pa noom Wẽnnaam ye. (Kol. 3:22) D sã n pa tũud Wẽnnaam ‘ne d sũur fãa,’ n basdẽ tɩ dũniyã yɛl tiisd-du, d pa tõe n ta a yam ye. (Yɩɩl 119:2) A Zeova miime tɩ d sã n maand a raabã ne d sũur fãa, nafd-d lame. A Moiiz ra sagla Israɛll nebã tɩ b yãk vɩɩm, rat n yeel tɩ b nong Wẽnnaam a Zeova, n sak a koɛɛgã la b gãd-a.—Tõo. 30:19, 20.
10 Pĩnd wẽndẽ Israɛll rĩm a Davɩɩd ra yeela woto: “Yãmb nebã na n dɩka b mens n kõ yãmb ne yamleoog daar ning yãmb kʋʋngã sẽn na n tigim tãn-sõamyã zutã. Yãmb kom-bɩɩs na n waa yãmb nengẽ wa meenem sẽn yit yibeoogo.” (Yɩɩl 110:3) Sẽn pak neb wʋsg rũndã-rũndã yaa laogã baoob la yõ-noogrã. La sã n yaa ne neb nins sẽn nong a Zeova wã yẽ, yaa a raabã maaneg n lʋɩt taoore. B sẽn moond koe-noogã ne yẽesem ningã wilgda bũmb nins sẽn pak-b n yɩɩdã. B tẽeda ne b sũy fãa t’a Zeova sɩd tõe n gesame tɩ b paam sẽn yaa tɩlae ne-b daar fãa wã.—Mat. 6:33, 34.
Maand nins sẽn tat Wẽnnaam yamã
11. Israɛll nebã sẽn da kʋʋd maand n kõt a Zeova wã, bõe la b ra baooda?
11 A Moiiz tõogã tũub wakate, Wẽnnaam nin-buiidã ra kõt-a-la maand sẽn tat a yam, sẽn na yɩl n paam a barka. Maankʋʋr 19:5 wã yeta woto: “Yãmb sã n dat n maan laafɩ maoong Zusoabã waoogr yĩnga, bɩ y maan-a wa sẽn zemse, tɩ bãmb deeg yãmba.” Biiblã seb-kãng pʋgẽ me, a Zeova yeela woto: “Yãmb sã n dat n maan bark pʋʋsg maoong Zusoabã waoogr yĩnga, bɩ y maan tɩ zems tɩ mam deeg yãmba.” (Maan. 22:29) Israɛll nebã sã n da wa kʋʋd rũms sẽn pa tar zams a Zeova tẽn-kugrã zugu, maandã bug-zõos sẽn da rukdã ‘yũug yaa noog a taoore.’ (Maan. 1:9, 13) A nin-buiidã sẽn da maand woto n wilgdẽ tɩ b nong-a lame wã ra noogda a sũuri. (Sɩng. 8:21) A Moiiz tõogã noy nins sẽn da yet tɩ b kʋʋd maandã pʋsẽ, d yãta saglg sẽn ket n tar yõod rũndã-rũndã. Neb nins sẽn da kõt a Zeova maand sẽn tat a yamã ra paamda barka. La maand bʋs buud n tat a yam? D na n goma yɛl a yiib yelle: D manesmã la d no-goamã.
12. Yel-bʋs maaneg n tõe n kɩt tɩ d pa tõog n kõ Wẽnnaam d yĩnsã tɩ yɩ maand sẽn tat a yam?
12 Tʋm-tʋmd a Poll lɛtr ning a sẽn gʋls Rom kiris-nebã pʋgẽ, a yeela woto: “Kõ-y y yĩnsã tɩ yɩ maan-vɩɩs sẽn yaa sõma, sẽn tat Wẽnnaam yam, rat n yeel tɩ y tʋm a tʋʋmdã ne y yamã.” (Rom 12:1, NW ) Ned sã n dat n ta Wẽnnaam yam, rẽndame t’a zã a yĩngã sõma. A sã n yũud sɩgaar bɩ dorge, wall a rɩt taba, pa rẽ bɩ a yũud rãam tɩ loogdẽ, a rẽgemda a yĩngã tɩ kɩt t’a pa le tõe n kõ Wẽnnaam a yĩngã tɩ yɩ maoong sẽn yaa sõma ye. (2 Kor. 7:1) Sẽn paase, Biiblã sẽn yeel tɩ ‘ned ninga sẽn maand yoob sãamda a meng yĩngã,’ ned sã n tʋmd raglem buud fãa, a pa tõe n kõ a Zeova maand sẽn tat a yam ye. (1 Kor. 6:18) Dẽnd f sã n dat n ta Wẽnnaam yam, f segd n yɩɩ yɩlemd f manesmã fãa pʋgẽ.—1 Pɩɛ. 1:14-16, NW.
13. Bõe yĩng tɩ segd tɩ d pẽg a Zeova?
13 Maoong buud a to me n noom a Zeova, n yaa bũmb d sẽn tõe n maan ne d no-goamã. Wala makre, neb nins sẽn nong a Zeova wã gomda a yell zãma sʋk n pẽgd-a, la baa b zagsã pʋsẽ. (Karm-y Yɩɩl Sõamyã 34:2-4.) Karm-y Yɩɩl Sõamyã 148-150 soabã, la y maag y yĩng n ges b sẽn sagend-d yɩɩn-kãensã b tãabã pʋsẽ to-to n yɩlemdẽ tɩ d pẽg a Zeova wã. Hakɩka, sɩd “zemsame tɩ nin-tɩrsã pẽg bãmba.” (Yɩɩl 33:1) A Zezi Kirist pẽga Wẽnnaam ne koe-noogã mooneg maasem tɩ wilgdẽ tɩ tõnd me segd n maana woto.—Luk 4:18, 43, 44.
14, 15. Maand bʋs buud la a Oze sagl Israɛll nebã tɩ b kõ a Zeova, la a Zeova manesem yɩɩ wãna?
14 D sã n moond koɛɛgã ne yẽesem, wilgdame tɩ d nonga a Zeova, la tɩ d tʋll n taa a yam. Wala makre, tẽeg-y no-rɛɛs a Oze sẽn sagl Israɛll nebã to-to, b sẽn da wa n pʋʋsd wẽn-naands tɩ kɩt tɩ Wẽnnaam sũur da pa le noom ne-bã. (Oze 13:1-3) A Oze sagl-b lame tɩ b pʋʋs Wẽnnaam n kos sugr woto: “Yiis-y tõnd yel-wẽnã la y reeg d pʋʋsgã tɩ d na n pẽga yãmba.”—Oze 14:2, 3.
15 Wãn to la a Zeova leokd neb nins sẽn pẽgd-a woto tɩ yaa wa b sẽn kõt-a maandã? Ad a sẽn yeele: ‘M nong-b-la ne m sũur fãa.’ (Oze 14:5) Dẽnd nin-kãens paamda a Zeova sugri, a zoodo, la b tat a yam.
16, 17. Ned sã n sɩng koɛɛgã mooneg a sẽn tẽed Wẽnnaam a Zeova yĩnga, wãn to la a get a soabã sẽn pẽgd-a wã?
16 Pẽg a Zeova zamã sʋkã tara yõod wʋsg tũudum hakɩkã pʋgẽ. Wẽnnaam sɩd-sɩdã waoogr da tara yõod wʋsg ne yɩɩl-gʋlsdã. Rẽ n so t’a ra kos Wẽnnaam woto: “Zusoaba, mam kota yãmb tɩ y reeg mam noorã bark pʋʋsgo.” (Yɩɩl 119:108) La rũndã-rũndã yẽ? No-rɛɛs a Ezai ra pĩnd n goma kʋʋn-kãseng sẽn da na n zĩnd tõnd wakatã yelle, n yeel tɩ b na n ‘wa moona Zusoabã pẽgre,’ la tɩ ‘b na n dʋʋme n ta Wẽnnaam tẽn-kugrẽ wã t’a reeg-ba,’ rat n yeel t’a reeg b kũunã. (Ezai 60:6, 7) Bãngr-gom-kãngã pidsda rũndã-rũndã, bala neb milyõ rãmb n kõt Wẽnnaam ‘maand daar fãa sẽn yaa pẽgre, sẽn dat n togs tɩ kaset ne noor goam a yʋʋrã yĩnga.’—Heb. 13:15.
17 Rẽ yĩnga, yãmb me kõta Wẽnnaam maand sẽn tat a yam bɩ? Y sã n pa maand woto, bɩ y modg n dems yɛl nins y sẽn segd n demsã n tõogd n maand rẽ. Y tẽebã sã n kɩtame tɩ y sɩng koe-noogã moonego, bɩ y bãng tɩ y tʋʋmdã “tata Zusoabã yam n yɩɩd loalga.” (Karm-y Yɩɩl Sõamyã 69:31, 32.) Bãng-y t’a nee y sẽn maand bũmb ning n pẽgd-a wã, la tɩ y tata a yam. (Eze. 20:41) Rẽ, sũ-noog ning sẽn na n kẽ-yã pa na n tall to ye.
‘A Zeova ningda nin-tɩrsã barka’
18, 19. a) Rũndã-rũndã, tags-bʋg la neb wʋsg tar Wẽnnaam daabã maaneg wɛɛngẽ? b) Ned sã n kong Wẽnnaam lohormã, baasda wãna?
18 Rũndã-rũndã, neb wʋsg tagsda wa a Malaki wakatẽ neb kẽer sẽn da tagsdã, n yet woto: “Tõnd sẽn sak [Wẽnnaam] sẽn yeelã yaa zaalem.” (Mal. 3:14) Sẽn yet-b woto wã sẽn nong laogã yĩng kɩtame tɩ b tagsdẽ tɩ Wẽnnaam daabã pa na n pidsi, la t’a noyã tũub pa le tar yõod ye. Ne bãmba, koe-noogã mooneg sãamda sẽka, la wat ne sũ-sãamse.
19 Tags-kãensã buudã sɩnga hal Edɛnne. A Sʋɩtãan tusa a Hawa t’a paoog vɩ-noog ning a Zeova sẽn da kõ-a wã, la a wilg t’a pa baood n ta a yam ye. Rũndã-rũndã, a Sʋɩtãan ket n tudgda nebã tɩ b tẽed tɩ Wẽnnaam daabã maaneg pa tar yõod ye. La a Hawa ne a sɩdã bãngame tɩ f sã n kong Wẽnnaam lohormã, f konga vɩɩm. Ka la bilfu, neb nins fãa sẽn dɩkd b naoorã na n wa bãngame tɩ sɩd yaa woto.—Sɩng. 3:1-7, 17-19.
20, 21. a) Bõe la Sarepta pʋg-kõorã maan-yã, la baasa wãna? b) Wãn to la d tõe n dɩk Sarepta pʋg-kõorã makre, la bõe yĩnga?
20 A Ãdem ne a Hawa yellã baasa wẽngã, la a Eli ne Sarepta pʋg-kõorã kibarã baasa neere. Pagã sẽn wʋm a Eli goamã sẽn kengd raoodã bala, a yɩɩ tao-tao n segl n deng n yãk n kõ no-rɛɛsã. A sẽn maan woto wã, a Zeova pidsa bũmb ning a sẽn da kɩt t’a Eli togsã. Kibarã yeta woto: “Yẽ ne a zakã rãmb la a Eli rɩɩme n kaoos wʋsgo. Rʋkã zomã ne leng-bilã kaamã ka tol n sɛ ye, a yɩɩ wa Zusoabã sẽn da kɩt t’a Eli yeelã.”—1 Rĩm 17:15, 16.
21 Sarepta pʋg-kõorã sẽn maanã yaa bũmb rũndã-rũndã neb milyaar dãmbã wʋsg sẽn pa na n sak n maane. A teega Wẽnnaam sẽn yaa fãagdã zãng-zãnga, la Wẽnnaam sɩd pa bas-a ye. Kiba-kãngã la a taab sẽn be Biiblã pʋgẽ wilgdame tɩ d sɩd tõe n teega a Zeova. (Karm-y Zozue 21:43-45; 23:14.) Rũndã-rũndã, a Zeova Kaset rãmb wʋsg kibay wilgdame t’a Zeova sɩd pa na n tol n bas neb nins sẽn tat a yamã ye.—Yɩɩl 34:7, 8, 18-20. *
22. Bõe yĩng tɩ d segd n bao n ta Wẽnnaam yam masã tɛka?
22 Daar ning Wẽnnaam sẽn na n kao “nebã fãa sẽn be dũniyã zugã” bʋʋdã ta n saame. (Luk 21:34, 35) Bũmb pa tõe n gɩdg ra-kãng waoongã ye. Baraare, tarem buud baa a ye yõod pa na n ta f sẽn na n paam tɩ bʋ-kaood ning Wẽnnaam sẽn yãkã yeel-f bũmb ning a sẽn na n yeel nin-tɩrsã ye. A na n yeel-b-la woto: “Wa-y-yã, yãmb dãmb sẽn tar m Ba barka. Bɩ y reeg soolem ning sẽn segl yãmb yĩngã.” (Mat. 25:34) Sɩd-sɩda, a Zeova na n ninga nin-tɩrsã barka. A ‘barkã na n yɩɩ wa gãong b yĩnga.’ (Yɩɩl 5:13) Rẽ yĩnga woto fãa pa sek d na bao n ta Wẽnnaam yam sɩda?
[Tẽngr note]
^ sull 21 Ges-y yʋʋmd 2005, tʋʋl-nif kiuug pipi daar Gũusg Gasgã neng 11, sull 15 wã, la fãrendã Gũusg Gasg ning sẽn yi yʋʋmd 1997 sa-sik kiuug pipi daarã, a neng 20-25 wã.
Y tẽrame bɩ?
• Bõe yĩng tɩ zems tɩ d maan a Zeova raabã ne d sũur fãa?
• Maand bʋs buud n tat a Zeova yam rũndã-rũndã?
• Bõe la d maand a Zeova yĩng tɩ yaa wa maoong d sẽn kõt-a, la bõe yĩng tɩ d segd n maand rẽ?
• Bõe yĩng tɩ d segd n bao n ta Wẽnnaam yam?
[Zãmsgã sogsgã]
[Foto, seb-neng 19]
Bõe la Wẽnnaam no-rɛɛsã kos pag sẽn yaa naong soab t’a maane?
[Foto, seb-neng 21]
D sẽn kõt a Zeova pẽgr sẽn yaa maandã, nafa bʋg la d paamda?
[Foto, seb-neng 23]
Y sẽn teegd a Zeova ne y sũur fãa wã, a pa na n tol n bas-y ye