Ninsaalbã vɩɩm sɩnga Edɛn bɩ?

MAMS-Y n ges-y yãmb sẽn na n be zẽed zĩigẽ. Bʋrg sẽn tiisd pa tol n be beenẽ ye. Zĩigã yaa yalengo, la bũmb kae sẽn kõt rabeem ye. Y pa maand yɩɩre, y pa bẽede, toog buud baa a ye me pa paamd-yã. Vɩɩmã noom-y-la hal sõma.

Y nee tɩɩs puud toor-toore, koom sẽn zoete, tɩɩs vãad toor-toore, la mood sẽn yi n gãneg zĩigã fãa tɩ yaa neere. Pems-noog n wẽed yãmba. Y wʋmda tɩɩsã puud yũug tɩ noome. Y nee koomã sẽn kiigd pĩisã zut tɩ be yamleoogo, la y wʋmd liuuli wã rãamde. Rẽ yĩnga yãmb pa rat n zĩnd zĩig sẽn yaa woto pʋgẽ sɩda?

Zĩig fãa la bala, nebã yetame tɩ pipi ninsaalbã ra vɩɩ zĩig sẽn wõnd woto. Hal sẽn kaoose, b wilga zidaismã neba, moeembã, la kiris-nebã tɩ zẽed zĩig n zĩnd Edɛnne, la tɩ yaa be la Wẽnnaam ning a Ãdem ne a Hawa. Biiblã wilgdame tɩ b ra vɩɩ laafɩ la bãan pʋgẽ, n tar sũ-noogo. B ra nonga taaba, rũmsã ra pa maand-b bũmbu, bãmb me ra pa maand-b bũmb ye. B ra nonga Wẽnnaam tɩ Wẽnnaam me nong-ba. A ning-b-la zĩ-kãng n da rat tɩ b vɩɩmd wakat sẽn kõn sa.—Sɩngre 2:15-24.

Ẽndu rãmbã me tẽeda pĩnd wẽndẽ arzãna, la b tagsgã yaa toore. Budist rãmbã tẽedame tɩ b tũudmã taoor dãmb toor-toorã, b sẽn boond tɩ Buda rãmbã pukda dũni sẽn yaa wa arzãn pʋgẽ. Afiriki, soalem wʋsg n be n wõnd a Ãdem ne a Hawa kibarã.

Sɩda, tũudmã la rog-n-mikã yɛl pʋgẽ, nebã gomda goam sẽn wilgd tɩ arzãn n zĩnd pĩnd wẽndẽ. Seb-gʋlsd a Jean Delumeau yeela woto: “Zĩis wʋsgo, nebã tẽedame tɩ sɩngrẽ wã arzãn n zĩndi, tɩ nebã ra zems zãnga, n pa mi yel-wẽnde, n zemsd taaba, n tar sũ-noogo, n dɩt n tɩgda, tɩ toogo, mo-yõsr bɩ zabr kae ye. . . . Nebã sẽn tẽed  woto wã wilgdame tɩ b miime tɩ b konga bũmbu, la tɩ b rata ne b sũy fãa tɩ arzãn kãng lebg n wa.”

Kiba-kãensã fãa pa tar yẽgr a yembr sɩda? Rẽ yĩnga pa vɩɩmã sẽn sɩd yɩ sõma sɩngrẽ wã n kɩt tɩ kiba-kãensã beẽ wã sɩda? Rẽ yĩnga zẽed zĩig n sɩd zĩnd Edɛn pĩnd wẽndẽ wã bɩ? La a Ãdem ne a Hawa me sɩd zĩndame bɩ?

Neb kẽer sã n wʋm ned sẽn gomd a Ãdem ne a Hawa la Edɛn zẽedã yelle, b laada a soabã. Rũndã-rũndã, neb wʋsg tagsdame tɩ kiba-kãngã yaa soalem bala. Sẽn yaa yell n yɩɩda, yaa tɩ tũudum taoor dãmb wʋsg meng pa tẽed tɩ zẽed zĩig n sɩd zĩnd Edɛn ye. B yetame tɩ zĩig woto buud zɩ n zĩndi, la tɩ yaa makre, bɩ solemde, wall kibar sẽn pa sɩda.

Yaa sɩd tɩ makr wʋsg bee Biiblã pʋgẽ. Bãmb wʋsg nebã sẽn mi wã yaa a Zezi meng n togse. La Biiblã yaool n pa wilgd tɩ Edɛn kibarã yaa makr bɩ solemd ye. A wilgdame tɩ yaa bũmb sẽn sɩd zĩndi. Sã n mik tɩ pa bũmb sẽn sɩd zĩndi, dẽnd Biiblã goam a taabã me pa sɩd wɛ? D ges bũmb ning sẽn kɩt tɩ neb kẽer pa tẽed tɩ zẽed zĩig n sɩd zĩnd Edɛnnã, la d ges b sã n tara bʋʋm. Rẽ poore, d na n yãa bũmb ning sẽn kɩt tɩ tar yõod tɩ ned fãa bao n bãng kiba-kãngã sã n yaa sɩd bɩ pa sɩdã.