Nong-y tɩrlem ne y sũur fãa
Nong-y tɩrlem ne y sũur fãa
“Yãmb nonga tɩrlem.”—YƖƖL 45:8.
1. Bõe n na n sõng tõnd tɩ d tũ “tɩrlem sorã”?
A ZEOVA tũnugda ne a Gomdã la ne a vʋʋsem sõngã n sõngd a nin-buiidã tɩ b tũud “tɩrlem sorã.” (Yɩɩl 23:3) La tõnd sẽn yaa koangdbã yĩnga, d wae n bʋdgdame n basd so-kãngã. Sã n wa yaa woto, yɩl n lebg n wa so-sõngã zugã, rat n yeel tɩ n maan sẽn yaa tɩrgã baooda modgr wʋsgo. Bõe n tõe n sõng-d tɩ d tõog n tũ tɩrlem sorã? D segd n dɩka a Zezi togs-n-taare, n nong tɩrlem.—Karm-y Yɩɩl Sõamyã 45:8.
2. Bõe la b sẽn boond tɩ “tɩrlem sorã”?
2 Bõe la b sẽn boond tɩ “tɩrlem sorã”? “Tɩrlem sorã” yaa noy nins a Zeova sẽn gãneg tɩrlmã wɛɛngẽ wã. Hebre wã la gɛrkã buud-goam pʋgẽ, b sã n yeel tɩ f tũ “tɩrlem,” rat n yeelame tɩ f tũ noy b sẽn kõ manesem sẽn yaa sõma wã tallg wɛɛngẽ ne f sũur fãa. A Zeova nin-buiidã sẽn mi tɩ yaa yẽ la tɩrlem soabã yĩnga, b sak n deegame tɩ yẽ n segd n wilg-b manesem sõma nins b sẽn segd n tallã.—Zer. 50:7, NW.
3. Bõe la d tõe n maan n bãng Wẽnnaam tɩrlmã sõma n paase?
3 Yaa d sẽn na n maood ne d sũur fãa n tũud Wẽnnaam noyã sẽn yaa tɩrsã bal la d na n tõog n ta a yam. (Tõo. 32:4) Yɩl n tõog n maan dẽ, d segd n zãmsa yɛl nins d sẽn tõe n bãng Wẽnnaam a Zeova zugã, ne Biiblã sẽn yaa a Gomdã maasem. D sã n baood n bãngd-a n paasdẽ tɩ kɩtdẽ tɩ d kolgd-a daar fãa, d na n maneg n nonga a tɩrlmã me n paasdẽ. (Zak 4:8) Sẽn paase, d sã n wa rat n yãk yam n maan bũmb sẽn tar yõod wʋsgo, d segd n tũu Wẽnnaam Gomdã a sẽn kɩt tɩ b gʋls ne a vʋʋsem sõngã maasmã sor-wilgri.
Bao-y Wẽnnaam tɩrlmã
4. Bao Wẽnnaam tɩrlmã rat n yeelame tɩ d maan bõe me?
4 Karm-y Matɩe 6:33. Pa d sẽn na n dɩkd sẽk wʋsg n moond Rĩungã koe-noogã bal la wilgd tɩ d baooda Wẽnnaam tɩrlmã ye. D sã n dat t’a Zeova sũur yɩ noog ne bũmb nins d sẽn maand a tũudmã pʋgẽ wã, d segd n tũuda a noyã d vɩɩmã nens fãa pʋsẽ. Bõe la neb nins fãa sẽn baood a Zeova tɩrlmã segd n maane? Yaa tɩlae tɩ b “yeelg nin-paalgã Wẽnnaam sẽn naan wa bãmb wẽneg ne tɩrlem la pʋ-peelmã.”—Ef. 4:24.
5. Bõe n na n sõng tõnd tɩ d tõog n mao ne raood komsgo?
5 Baa ne d sẽn maand d sẽn tõe fãa n tũud Wẽnnaam noyã, sasa ninga d pãn-komsmã mi n wa kɩtame tɩ d koms raoodo. Bõe n tõe n sõng tõnd tɩ d tõog n mao ne raood komsgã, n nong sẽn yaa tɩrg la d tũud rẽ? (Yel. 24:10) D segd n pʋʋsda a Zeova wakat fãa “ne sũur sẽn yaa sɩda, sẽn pid ne tẽeb zãnga.” (Heb. 10:19-22) D yaa kiris-ned sẽn paam vʋʋsem sõng zaeebã tɩ d saagd n na n wa vɩɩmda tẽngã zug me, d tẽeda a Zezi Kirist maoongã sẽn yaa rondã la tʋʋm nins a sẽn tʋmd d yĩnga, a sẽn yaa maan-kʋʋdb kãsmã yĩnga. (Rom 5:8; Heb. 4:14-16) Tʋm-tʋmd a Zã yeela woto: “A Zezi Kirist zɩɩm pekda tõnd n yiisd tõnd yel-wẽnã fãa.” (1 Zã 1:6, 7) Biiblã paasame tɩ baa tõnd “yel-wẽnã sã n yaa miuug wa saag pag a mina-mina, b na n lebga pɛɛlg wa lam-paalga.” Ad a Zeova sẽn kɩt t’a Bi-nongr a Zezi ki tɩ yɩ rond tõnd yĩngã, sɩd yaa bõn-kãseng tɛkẽ!—Ezai 1:18.
Get-y zab-teed nins Wẽnnaam sẽn kõ-yã sã n pa rat manegre
6. Bõe yĩng tɩ tar yõod wʋsg tɩ d get zab-teed nins Wẽnnaam sẽn kõ-dã sã n pa rat manegre?
6 Wakat buud fãa, d segd n boba “tɩrlem tɩ yɩ gãntika,” bala rẽ naaga zab-teed nins Wẽnnaam sẽn kõtã. (Ef. 6:11, 14) D rɩka d meng n kõ a Zeova sẽn nan pa kaoos tɩ d sɩng n tũud-a-la na maan yʋʋm wʋsg me, segdame tɩ daar fãa bɩ d get zab-teed nins Wẽnnaam sẽn kõ-dã sã n pa rat manegre. Bõe yĩnga? Bala, b riga a Sʋɩtãan ne a zĩn-dãmbã tɩ b sig tẽngã zugu. (Wil. 12:7-12) A Sʋɩtãan sũurã puudame, la a miime me t’a wakatã lebga bilfu. Rẽ kɩtame t’a maneg n zabd ne Wẽnnaam nin-buiidã. Woto wilgdame tɩ sɩd tara yõod wʋsg tɩ d bob “tɩrlem tɩ yɩ gãntika.”
7. D sã n sak n deeg tɩ yaa tɩlae tɩ d bob “tɩrlem tɩ yɩ gãntika,” d manesem segd n yɩɩ wãna?
7 Gãntik kogenda sũuri. D sẽn dog ne yel-wẽndã yĩnga, d sũurã wae n tara ziri, n leb n yaa wẽng wʋsgo. (Zer. 17:9) D sũurã sẽn wae n dat tɩ d maan wẽngã yĩng kɩtame tɩ d segd n modg n kibl-a sõma. (Sɩng. 8:21) Tõnd sã n sak n deeg tɩ yaa tɩlae tɩ d bob “tɩrlem tɩ yɩ gãntika,” d pa na n saag n yãk gãntik-kãng baa yaa wakat bilfu, sẽn dat n yeel tɩ n sak n noog d yõor ne bũmb Wẽnnaam sẽn kisi, bɩ n sak n tagsd yel-yood yell ye. D pa na n basdẽ tɩ televiziõ wã gesg rɩkd d sẽkã wʋsg ye. D na n ket n maoodame n maand sẽn noom a Zeova. La baa d sã n wa lʋɩ d sẽn tall tags-wẽns la d tʋm tʋʋm-wẽns yĩnga, ne a Zeova sõngre, d tõogd n yikame.—Karm-y Yelbũn 24:16.
8. Bõe yĩng tɩ d segd n “tall tẽeb tɩ yɩ wa gãongo”?
8 “Tẽebã” b sẽn mak ne “gãongã” me bee zab-teed nins Wẽnnaam sẽn kõtã sʋka. A kɩtdame tɩ d “tõe n kok wẽng soabã pɛɛmã fãa sẽn yaa wa bugmã.” (Ef. 6:16) Dẽnd d sã n tẽed a Zeova la d nong-a ne d sũur fãa, sõngd-d lame tɩ d maand tɩrga, la d paad vɩɩm sẽn pa satã sor zugu. D sẽn nong a Zeova to-to wã sã n paasdẽ, d na n maneg n nee a tɩrlmã yõodo. La tõnd sũur-kasetã yẽ? D sẽn modgd n dat n yɩ neb sẽn nong tɩrlmã, wãn to la a sõngd tõndo?
Tall-y sũur-kaset sẽn yaa sõma
9. Wãn to la sũur-kaset sẽn yaa sõma tallg nafd tõndo?
9 Ne lisgã reegr maasem, d kosa a Zeova sũur-kaset sẽn yaa sõma. (1 Pɩɛ. 3:21, NW ) D sẽn tẽed rondã yĩnga, a Zezi zɩɩmã luda d yel-wẽnã tɩ kɩt tɩ d yaa yɩlem Wẽnnaam nifẽ. Sẽn na yɩl n kell n yɩ yɩlemd Wẽnnaam nifẽ, yaa tɩlae tɩ d tall sũur-kaset sẽn yaa sõma. D sũur-kasetã sã n mi n wa ningd-d taal la a keoogd-do, segd n yɩ-d-la noogo, bala wilgdame t’a tʋmda sõma. Woto wilgdame t’a pa riglme, tɩ kɩt t’a pa tõe n sõng tõnd tɩ d tũ Wẽnnaam noyã sẽn yaa tɩrsã ye. (1 Tɩm. 4:2) La sũur-kasetã tõe n sõnga neb nins sẽn dat n nong tɩrlmã ne manesem a to me.
10, 11. a) Togs-y kibar sẽn wilgd tɩ d segd n kelgda d sũur-kasetã sẽn yaa sõma wã. b) Bõe yĩng tɩ d sã n nong tɩrlem bɩ kot-d sũ-noog wʋsgo?
10 D sã n maan wẽnga, d sũur-kasetã tõe n ning-d-la taale. Wala makre, bi-bɩɩg a ye n da bʋdg n bas “tɩrlem sorã.” A sɩnga yoobã yɛl gesg tɩ wa lebg a minungu, la a kẽ dorg yũubu. A sã n da kẽng tigissã, a sũur-kasetã ningd-a-la taale. A sã n da wa moond koɛɛgã me, a neeme t’a yaa pʋ-lik soaba. Woto fãa kɩtame t’a tolg n bas tigissã kẽnd la koɛɛgã moonego. A yeela woto: “Mam da pa mi tɩ m sũur-kasetã ra na n wa ningd-m-la taal m manesmã yĩng ye.” La a paasa woto: “Mam talla manesem kãngã na maan yʋʋm a naase.” Bi-bɩ-kãngã wa n tagsda a sẽn na n maan to-to n lebg n wa sɩdã pʋgẽ. Baa a sẽn da tagsd t’a Zeova pa na n kelg a pʋʋsgã, a baas n pʋʋsame n kos sugri. La sẽn pa yã n maan minit piiga, a ma wã wa n na n kaag-a lame la a sagl-a t’a lebs n sɩng tigissã kẽnde. A kẽnga Rĩungã Roogẽ n tɩ kos kãsem soab a ye t’a zãms-a Biiblã. A wa n deega lisgu. A sũur yaa noog ne a Zeova a sẽn fãag-a wã yĩnga.
11 Woto wilgda vẽeneg tɩ d sã n maand sẽn yaa tɩrga, kot-d-la sũ-noogo. D sã n nong tɩrlmã la d wɩngd ne tɩrg maanego, d saasẽ Ba wã raab maaneg na n kõt-d-la sũ-noogo. Yãmb wee n tags n gese! Wakat n wate, tɩ ãdem-biisã fãa na n paam sũ-noogo, b ned kam fãa sũur-kasetã sẽn na n yaa sõma wã yĩnga. B na n zemsa zãnga, n tõe n dɩk Wẽnnaam togs-n-taar kɛpɩ. Masã tɛk bɩ d modg n yɩ neb sẽn nong tɩrlem ne d sũur fãa, n kɩt t’a Zeova sũur yɩ noogo.—Yel. 23:15, 16.
12, 13. Bõe la d tõe n maan n kibl d sũur-kasetã?
12 Bõe la d tõe n maan n kibl d sũur-kasetã? D sã n zãmsd Biiblã la sɛb nins tʋm-tʋmdã sẽn yiisdã, segdame tɩ d tẽegdẽ tɩ “nin-sõng tagsdame n yaool n leokdẽ.” (Yel. 15:28) Wala makre, d sã n wa baood tʋʋmde, d mikdame tɩ sɩd yaa woto. Tʋʋmd sã n kɩɩsd Wẽnnaam Gomdã noyã, yaa vẽeneg tɩ d fãa la bal na n yɩɩ tao-tao n tũ tʋm-tʋmd sẽn tũud sɩd la sẽn tar yamã sẽn kõt sagls ninsã. La d sã n wa tar sãmb-sãmb tʋʋmd zugu, segdame tɩ d pʋʋs a Zeova n kos sõngr la d bao sagls Biiblã pʋgẽ. * Leb n baoodame me tɩ d gũus n ges tʋʋmdã sã n pa na n sãam d taabã sũyã. (1 Kor. 10:31-33) Sẽn yɩɩd fãa, d segd n gũusame n da wa kɩt tɩ zood ning d sẽn tar ne Wẽnnaamã sãam ye. D sã n sɩd tara zood sõma ne a Zeova, d na n deng n soka d meng woto: ‘Mam sã n tʋm tʋʋm-kãngã, pa na n sãam a Zeova sũur sɩda?’—Yɩɩl 78:40, 41.
13 D sã n wa segend Gũusg Gasgã bɩ Tigingã Biibl zãmsgo, d pa segd n yĩm tɩ d tog n bʋgsa bũmb ning d sẽn zãmsdã zug ye. Rẽ yĩnga d rẽegda sokr fãa leoor tao-tao la d kẽng ne sull ning sẽn pʋgdã bɩ? D sã n maand woto, na n yɩɩ toog tɩ d sẽn zãmsd bũmb ninsã sõng-d tɩ d maneg n nong tɩrlem wall kɩt tɩ d tall sũur-kaset sẽn yaa sõma. Sẽn na yɩl n tõog n nong tɩrlem, d segd n maagda d yĩng n zãmsdẽ, la d bʋgsd bũmb nins d sẽn karemd Wẽnnaam Gomdã pʋgẽ wã zugu. Yɩl n wa nong tɩrlmã baooda modgre.
Bas-y tɩ tɩrlem kom la a ko-yũud tall-yã
14. Wãn to la Wẽnnaam a Zeova ne a Zezi Kirist rat tɩ d tʋm b tʋʋmdã?
14 Wẽnnaam a Zeova ne a Zezi Kirist ratame tɩ d tʋm b tʋʋmdã ne sũ-noogo. Bõe n tõe n kɩt tɩ d tall sũ-noog b tʋʋmdã pʋgẽ? Yaa vẽeneg tɩ yaa d sẽn na n nong tɩrlem! A Zezi sẽn wa n sõsd ne nebã tãngã zugã, a yeela woto: “Bark bee tɩrlem kom la ko-yũud sẽn tar-b rãmbã zutu, tɩ bõe, bãmb na tɩge.” (Mat. 5:6) Gom-kãensã võor yaa bõe ne neb nins sẽn tʋll n wilg tɩ b nonga tɩrlmã?
15, 16. Wãn to la tɩrlem kom la a ko-yũud sẽn tar-b rãmbã na n tɩge?
15 Rũndã-rũndã, dũniyã bee wẽng soabã nugẽ. (1 Zã 5:19) Sẽn yaa tẽng ning fãa zʋrnall la d rɩk n karme, d yãtame tɩ zĩig fãa, wẽnemã la nen-kɛglmã tʋʋm zẽname n yɩɩd pĩndã. Ninsaalbã maanda taab pãng wʋsg tɩ reeg n namsd nin-tɩrsã. (Koɛ. 8:9) Tõnd sẽn nong a Zeova wã yĩnga, d miime tɩ yaa yẽ a ye bal n tõe n yols neb nins tɩrlem kom la a ko-yũud sẽn tarã. Ka la bilfu, nin-wẽnsã fãa na n menemame, tɩ neb nins sẽn nong tɩrlmã paam b mens ne wẽn-kɩɩsgã la tʋʋm-beedã sẽn wat ne sũ-sãams ninsã. (2 Pɩɛ. 2:7, 8) Ad sɩd na n yɩɩ yolsg tɛkẽ!
16 D sẽn yaa a Zeova nin-buiid la a Zezi Kirist karen-biisã, d miime tɩ tɩrlem kom la a ko-yũud sẽn tar-b rãmbã ‘na n tɩgame.’ Yaa yĩngr-paalgã la tẽn-paalgã Wẽnnaam sẽn pʋlem tɩ ‘tɩrlem na n zĩnd b pʋsẽ’ wã n na n kɩt tɩ b tɩge. (2 Pɩɛ. 3:13) Woto yĩng bɩ d ra bas tɩ weoogrã la nen-kɛglmã sẽn kɩt tɩ tɩrlem kae a Sʋɩtãan dũniyã pʋgẽ wã koms d raoodo, wall yɛɛs-d ye. (Koɛ. 5:7) A Zeova sẽn yaa ãndũniyã fãa Naabã mii yɛlã fãa, la ka la bilfu, a na n fãaga neb nins sẽn nong tɩrlmã.
Tɩrlmã nonglem sẽn nafd tõnd to-to
17. Wãn to la d sẽn nong tɩrlmã nafd tõndo?
17 Yɩɩl Sõamyã 146:8 wã wilgda nafa buud sẽn ka to, tɩrlem sorã tũub sẽn kɩtd tɩ ned paame. Yɩɩl-gʋlsdã yeela woto: “Zusoabã nonga nin-tɩrse.” Yãmb wee n tags n gese! Yĩngr la tẽng Naabã nonga tõndo, d sẽn nong tɩrlmã yĩnga! A Zeova sẽn nong tõndã yĩnga, d tõe n kɩsa sɩd t’a na n gesa d yelle, d sã n lʋɩɩsd a Rĩungã yɛl taoore. (Karm-y Yɩɩl Sõamyã 37:25; Yelbũn 10:3.) Yaa neb nins sẽn nong tɩrlmã n na n wa soog dũniyã tõre. (Yel. 13:22) Wẽnnaam nin-buiidã na n paama keoore, b sẽn maand sẽn yaa tɩrgã yĩnga. Wʋsg keoor na n yɩɩ sũ-noog hakɩka, la vɩɩm sẽn kõn sa tẽngã sẽn na n lebg arzãnã zugu. Baa rũndã-rũndã menga, neb nins sẽn nong Wẽnnaam tɩrlmã paamdame t’a kõt-b sũur pʋgẽ bãane, tɩ kɩtdẽ tɩ zems-n-taar be b zagsã la b tigimsã pʋsẽ.—Fil. 4:6, 7.
18. Bõe la d tõe n maand n gũud a Zeova daarã?
18 D segd n ket n baooda a Zeova tɩrlmã n gũud a ra-kãsengã waoongo. (Sof. 2:2, 3) Woto yĩnga, bɩ d wilgdẽ tɩ d nonga Wẽnnaam a Zeova noyã sẽn yaa tɩrsã. Rẽ maaneg baoodame tɩ d kell n bob “tɩrlem tɩ yɩ gãntika,” n kogend d sũurã. Segdame me tɩ d tall sũur-kaset sẽn yaa sõma, rat n yeel tɩ sũur-kaset sẽn na n kõ-d sũ-noogo, la kɩt me tɩ d Wẽnnaamã sũur yɩ noogo.—Yel. 27:11.
19. Bõe la d segd n yãk yam n maane, la bõe yell la sõsg ning sẽn pʋgdã na n gome?
19 A Zeova ‘nif geta dũniyã zĩigã fãa n dat n sõng neb nins sẽn dat yẽ ne b sũyã fãa wã.’ (2 Kib. 16:9) D sẽn maand sẽn yaa tɩrg dũni sẽn pid ne zũnd-zãnde, nen-kɛglem la zu-loees buud toor-toor pʋgẽ wã yĩnga, gom-kãensã sɩd kengda d raoodo! Yaa sɩd tɩ tõnd sẽn maand tɩrgã lingda neb nins sẽn zãag b mens ne Wẽnnaamã. La d sẽn tũud a Zeova noyã tɩrlmã wɛɛngẽ wã nafd-d-la wʋsgo. (Ezai 48:17; 1 Pɩɛ. 4:4) Woto yĩnga, bɩ d kell n nong tɩrlmã ne d sũur fãa la d maand sẽn yaa tɩrg wakat fãa, tɩ kõt-d sũ-noogo. La nong tɩrlmã ne f sũur fãa wã rat n yeelame me tɩ f kisg wẽnga. Sõsg ning sẽn pʋgdã na n wilga kisg wẽngã sẽn dat n yɛɛlga.
[Tẽngr note]
^ sull 12 Y sã n dat sagls Biiblã sẽn kõt tʋʋmd baoob wɛɛngẽ, bɩ y ges yʋʋmd 1999 tʋʋl-nif kiuug rasem 15 Gũusg Gasgã seb-neng 28-30 wã.
Y na n leokame tɩ bõe?
• Bõe yĩng tɩ sẽn na yɩl n nong tɩrlem, yaa tɩlae tɩ d bãng rondã yõodo?
• Bõe yĩng tɩ d segd n bob “tɩrlem tɩ yɩ gãntika”?
• Bõe la d tõe n maan n kibl d sũur-kasetã?
[Zãmsgã sogsgã]
[Foto, seb-neng 26]
Tʋʋmd baoob sasa, d sũur-kasetã sã n yaa sõma, sõngd-d lame