Yãmb kisa wẽng bɩ?
Yãmb kisa wẽng bɩ?
“Fo [a Zezi] kisa wẽnga.”—HEB. 1:9.
1. Bõe la a Zezi wilg a karen-biisã nonglmã wɛɛngẽ?
A ZEZI KIRIST wilga a karen-biisã nonglmã yõodo, n yeel-b woto: “Mam kõta yãmb tõog paalga. Bɩ yãmb nong taaba. Bɩ y nong taab wa mam sẽn nong yãmbã. Yãmb sã n nong taaba, nebã fãa na n bãngame tɩ yãmb yaa mam karen-biisi.” (Zã 13:34, 35) A Zezi gomdã wilgdame t’a sẽn dat t’a karen-biisã nong taab ne nonglem ningã baoodame tɩ b ned kam fãa sakd n mongd a meng a taabã yĩnga. Nonglem kãng n da na n kɩt tɩ nebã bãng-b n bake. A sagl-b lame me tɩ ‘b nong b bɛɛbã la b pʋʋs neb nins sẽn maand bãmb wẽngã, la sẽn namsd bãmbã yĩnga.’—Mat. 5:44.
2. Bõe la Kiristã karen-biis segd n kisgi?
2 La a Zezi sẽn wilg a karen-biisã tɩ b nong taabã toor sẽn ka be, a wilg-b-la bũmb ning b sẽn segd n kisgi. Biiblã goma a Zezi yell n yeel t’a ‘nonga tɩrlem, la a kis wẽnga.’ (Heb. 1:9; Yɩɩl 45:8) Woto wilgdame tɩ d pa segd n nong tɩrlem bal ye. D segd n kisga yel-wẽnã, rat n yeel tɩ sẽn yaa wẽng buud fãa. Sɩd me, tʋm-tʋmd a Zã yeela woto: “Ned ning fãa sẽn maand yel-wẽnã kɩɩsda tõogo, la yel-wẽnã yaa tõog kɩɩsgo.”—1 Zã 3:4.
3. Zĩ-bʋs wɛɛngẽ la d tõe n wilg tɩ d kisa wẽnga?
3 Rẽ n so tɩ tõnd sẽn yaa kiris-nebã, d ned kam fãa segd n sok a meng woto: ‘Rẽ yĩnga, mam kisa wẽng bɩ?’ Bɩ d ges d sẽn tõe n maan to-to n wilg tɩ d kisa wẽnga. D na n goma zĩis a naas yell n wilg d sẽn tõe n maan dẽ to-to. 1) D manesem sẽn segd n yɩɩ a soab ne rãamã yũ tɩ loogã. 2) D tagsg sẽn segd n yɩ to-to ne tɩtã bɩ zĩn-dãmbã yɛla. 3) D tagsg sẽn segd n yɩ to-to ne yoobã la raglem buud fãa, la 4) d manesem sẽn segd n yɩ a soab ne neb nins sẽn nong wẽngã.
Ra lebg-y rãamã yamb ye
4. Bõe n kɩt t’a Zezi tõog n sagl nebã ne pʋ-peelem rãamã yũ tɩ loogã wɛɛngẽ?
4 A Zezi meng ra mi n yũuda rãam, tɩ wilgdẽ t’a sak n deegame tɩ rãam yaa kũun sẽn yit Wẽnnaam nengẽ. (Yɩɩl 104:14, 15) La a zɩ n tʋm ne kũun-kãngã kɛgre, n sak n yũ tɩ loog ye. (Yel. 23:29-33) Woto kɩtame t’a tõog n sagl a kɛlgdbã ne pʋ-peelem dẽ wɛɛngẽ. (Karm-y Luk 21:34.) Rãamã yũ tɩ loogã tõe n kɩtame tɩ ned maan yel-wẽn-kãsems a taaba. Rẽ n so tɩ tʋm-tʋmd a Poll yeel woto: “Da yũ-y rãam n tɩg ye, yãoã sãamda neda. La bɩ y tɩg ne sɩɩg sõngo.” (Ef. 5:18) A sagla tigingã pʋg-yãansã me tɩ b gũus n “da yɩ rã-yũudb ye.”—Tɩt 2:3.
5. Sogs-bʋs la sẽn yũud-b rãamã segd n sok b mense?
5 Y sã n yũuda rãam, yɩta sõma tɩ y sok y meng woto: ‘Rãamã yũ tɩ loogã wɛɛngẽ, mam tagsda wa a Zezi bɩ? M sã n segd n sagl ned yel-kãngã zugu, m tõe n goma ne pʋ-peelem bɩ? Mam yũuda sẽn na yɩl n yĩm m zu-loeesã wall boog m yɩɩrã bɩ? Semen fãa, mam sẽn yũudã zema wãna? Ned sã n wa yeel tɩ wõnda m yũuda wʋsgo, m manesem yaa wãna? M pademdame wall m yikd m sũur bɩ?’ D sã n saag n lebg rãamã yamba, tõe n wa kɩtame tɩ d pa le tõe n tags yɛlã zug sõma n bãng n maan sẽn segd ye. Kiristã karen-biisã maoodame tɩ b yamã vẽen wakat fãa.—Yel. 3:21, 22.
Zãag-y y mens ne tɩtã bɩ zĩn-dãmbã yɛl maanego
6, 7. a) A Zezi manesem yɩɩ wãn ne a Sʋɩtãan la a zĩn-dãmbã? b) Bõe yĩng tɩ tɩtã bɩ zĩn-dãmbã yɛl maaneg piuug rũndã-rũndã?
6 A Zezi sẽn wa n be tẽngã zugã, a kɩɩsa a Sʋɩtãan ne a zĩn-dãmbã ne a sũur fãa. Wala makre, a Sʋɩtãan sẽn wa n mak n na n kɩt t’a Zezi bas Wẽnnaam sakrã, a pa tol n tõog ye. (Luk 4:1-13) Sẽn paase, a Zezi tõog n bãnga sɩlem buud toor-toor sẽn da rat n kɩt t’a tags kɛgr wall a maan sẽn pa segde. (Mat. 16:21-23) A Zezi sõnga neb kẽer me tɩ b paam b mens ne zĩn-dãmb sẽn da namsd-ba.—Mark 5:2, 8, 12-15; 9:20, 25-27.
7 Yʋʋmd 1914 soabã pʋgẽ, a Zezi sẽn deeg naam saasẽ wã poore, a riga a Sʋɩtãan ne a zĩn-dãmbã tɩ b sig tẽngã zugu, tɩ kɩt tɩ kɩɩsdb pa le be saasẽ ye. Rẽ kɩtame t’a Sʋɩtãan maneg n “belgd dũniyã fãa” n yɩɩd pĩndã. (Wil. 12:9, 10) Dẽnd neb wʋsg sẽn yik n nong tɩtã bɩ zĩn-dãmbã yɛl maaneg zĩig fãa wã pa segd n ling tõnd ye. La bõe la d tõe n maan n kogl d mense?
8. Bũmb nins d sẽn maand n kokd pemsem wall n deemdẽ wã wɛɛngẽ, sogs-bʋs la d segd n sok d mense?
8 Biiblã wilga vẽeneg tɩ tɩtã bɩ zĩn-dãmbã yɛl maaneg yaa wẽng wʋsgo. (Karm-y Tõod 18:10-12.) Rũndã-rũndã, a Sʋɩtãan ne a zĩn-dãmbã tũnugda ne filim dãmba, sɛb la ze-video rãmb sẽn wilgd tɩt bɩ zĩn-dãmbã yɛlã, sẽn na yɩl tɩ nebã yam maneg n kẽ yel-kãensã. Woto kɩtame tɩ tõnd ned kam fãa sã n wa rat n yãk filim n ges wall sebr a sẽn dat n karme, bɩ a segd n sok a meng woto: ‘Rẽ yĩnga kiis nins sẽn loogã pʋgẽ, mam sak n gesa filim, pa rẽ bɩ m tãoa ze-video wall m karma sebr sẽn wilgd zĩn-dãmb yɛla, bɩ sẽn gomd rẽ yell bɩ? Mam sak n deegame tɩ m sɩd segd n laka m meng ne bõn-kãensã bɩ, bɩ m maanda m toor kae? Rẽ yĩnga mam zoe n soka m meng n ges a Zeova tagsg sẽn yaa a soab ne bũmb nins m sẽn maand n kokd pemsmã wall n deemdẽ wã bɩ? Mam sã n basame tɩ tɩtã bɩ zĩn-dãmbã yɛl kẽ m yamẽ wã, m sẽn nong a Zeova la m nong a noyã sẽn yaa tɩrsã na n kɩtame tɩ m modg n lak m meng fasɩ ne-b bɩ?’—Tʋʋ. 19:19, 20.
Tũ-y keoogr ning a Zezi sẽn kõ yoobã wɛɛngẽ wã
9. Wãn to la ned tõe n wilg t’a nonga wẽnga?
9 A Zezi wilgame t’a sakda noy nins a Zeova sẽn gãneg pag ne rao lagengã wɛɛngẽ wã, n yeel woto: “Yãmb nan ka karem tɩ Naandã naana bãmb dao la pag hal sɩngrẽ, la tɩ bãmb yeelame tɩ ‘yaa woto yĩnga, dao na bas a ba ne a ma n zĩnd ne a paga, la bãmb b yiibã fãa na n yɩɩ yĩng a yembr’ bɩ? Woto yĩnga, bãmb ka leb n ya a yiib yɛs ye, b yaa yĩng a yembre. Dẽ yĩnga, bɩ ned da welg bũmb nins Wẽnnaam sẽn lagem ne taabã ye.” (Mat. 19:4-6) A Zezi ra miime tɩ bũmb nins tõnd sẽn getã kẽeda d sũurẽ wã. Rẽ n so t’a sẽn wa n sõsd ne nebã tãngã zugã, a yeel-b woto: “Yãmb wʋmame tɩ b rag n yeelame yaa: ‘Ra yo ye.’ La mam yeta yãmb tɩ ned ning fãa sẽn get pag ne datem-wẽnga, a maana yoob ne yẽnda a sũur pʋgẽ.” (Mat. 5:27, 28) Yaa vẽeneg tɩ neb nins fãa sẽn pa tũud a Zezi sagl-kãensã wã wilgdame tɩ b nonga wẽnga.
10. Togs-y kibar sẽn wilgd tɩ ned sẽn lebg yoobã yɛl gesg yamb tõe n wa paama a menga.
10 A Sʋɩtãan tũnugda ne yoobã yɛl b sẽn wilgdã n tusd nebã tɩ b yooda. Yoobã yɛl sɩd bee zĩig zãnga. Yaa toog ne sẽn get-b yel-kãensã wã tɩ b yĩm b sẽn yãtã. B pʋd n tõe n wa lebga yoobã yɛl gesg yembse. Kelg-y kiris-ned a ye sẽn yeel dẽ wɛɛngẽ. A yeela woto: “Mam da soosd n geta yoobã yɛla. Woto kɩtame tɩ mam yamẽ wã, mi n wa lebg wa m bee dũni sẽn yaa toor fasɩ pʋgẽ, dũni sẽn pa tol n wõnd a soab ning pʋgẽ m sẽn be n maand a Zeova raabã. Mam da miime tɩ m sẽn maandã yaa wẽnga, la m baas n da yeta m meng tɩ m sẽn tũud Wẽnnaam to-to wã tata a yam.” Bõe n sõng saam-bi-kãngã t’a toeem tagsgo? A yeela woto: “Mam wa n yãka yam n tɩ togs kãsem dãmbã m zu-loɛɛgã, baa ne rẽ maaneg sẽn yɩ toog ne maam n yɩɩd bũmb fãa wã.” Saam-bi-kãngã wa n tõog n basa a minim-wẽngã. Rẽ poore, a yeela woto: “Mam sẽn wa n tõog n bas yel-wẽn-kãngã fasɩ wã, m yãame tɩ m sũur-kasetã lebga sõma.” Neb nins sẽn kis wẽngã segd n mao n kisga yoobã yɛl gesg me.
11, 12. D sã n wa yãkd mizik n na n kelge, wãn to la d tõe n wilg tɩ d kisa wẽnga?
11 Mizik ne goam nins b sẽn yet yɩɩlã pʋsẽ wã tõe n toeema ned tagsa la kɩt t’a manesem toeeme. Yaa sɩd tɩ mizikã yaa Wẽnnaam kũuni, la tɩ hal sẽn kaoose, a tara yõod tũudum hakɩkã pʋgẽ. (Yik. 15:20, 21; Ef. 5:19) La a Sʋɩtãan dũniyã neb tara yɩɩl sẽn pẽgd yoob la tʋʋm dẽgd a taaba. (1 Zã 5:19) Wãn to la y tõe n bãng mizik nins y sẽn kelgdã sã n dẽgemda y sũurã bɩ pa rẽgemd-a?
12 Y segd n deng n soka y meng woto: ‘Yɩɩl nins mam sẽn kelgdã pẽgda tʋʋm-beed wala nin-kʋʋre, wẽn-tʋʋsgo, yoob la raglem tʋʋm a taab bɩ? Mam sã n togs ned yɩɩn-kãens goamã, a na n bãngame tɩ mam kisa wẽng bɩ, bɩ na n wilgame tɩ m sũurã rẽgmame?’ D pa tõe n yeel tɩ d kisa wẽnga, n yaool n kelgd yɩɩl sẽn pẽgd wẽng ye. A Zezi yeela woto: “Bũmb ninga sẽn yit noorẽ yita sũurẽ, la yaa bõn-kãng n maand ned t’a yɩ rẽgdo. Tɩ bõe, tags-wẽnse, la nin-kʋʋre, la yoob buud fãa, la wagdem ne ziri, la kãnegr yita sũur pʋgẽ.”—Mat. 15:18, 19; ges-y Zak 3:10, 11.
Ges-y sẽn nong-b wẽngã wa a Zezi sẽn get-b to-to wã
13. Wãn to la a Zezi ra get neb nins sẽn maand yel-wẽnã n pa rat n tekã?
13 A Zezi yeelame tɩ yẽ waame n na n bool yel-wẽnã rãmb tɩ b tek yam n kos sugri. (Luk 5:30-32) La wãn to la a ra get neb nins sẽn da maand yel-wẽnã hal tɩ kɩt tɩ b sũyã riglmã? A Zezi keooga a kɛlgdbã tɩ b gũus n da wa wõneg nin-kãensã ye. (Mat. 23:15, 23-26) A leb n yeela woto vẽenega: “Pa neb nins fãa sẽn boond maam tɩ ‘Zusoaba, Zusoaba!’ n na n kẽ [saasẽ] soolmẽ wã ye. Yaa ned ning sẽn maand mam Ba sẽn be [saasẽ] daabã bala. Baraare [rat n yeel tɩ bʋʋdã raare], neb wʋsg na n yeela maam yaa: ‘Zusoaba, Zusoaba, tõnd da ka togs bãngr-goam ne yãmb yʋʋre, la d rig zĩn-dãmb ne yãmb yʋʋre, la d maan bõn-bãn wʋsg ne yãmb yʋʋr sɩda?’ ” La a na n wilga neb nins sẽn maand tʋʋm-wẽns la b pa rat n tekã t’a pa mi-ba, n yeel-b yaa: “Bɩ y bas maam.” (Mat. 7:21-23) Bõe yĩng tɩ nin-kãensã bʋʋd na n yɩ woto? B tʋʋm-wẽnsã paoogda Wẽnnaam yʋʋrã la namsd neb a taaba.
14. Bõe yĩng tɩ b yiisd tigingã neb nins sẽn maand yel-wẽn n pa rat n tekã?
14 Wẽnnaam Gomdã wilgame tɩ b segd n yiisa neb nins sẽn maand yel-wẽn n pa rat n tekã tigingã pʋgẽ. (Karm-y 1 Korẽnt dãmb 5:9-13.) Bʋʋm toor-toor yĩng n kɩt tɩ b segd n maan woto. D sõdg a tãab bala. 1) Kɩtdame t’a Zeova yʋʋrã ra paam paoogr ye. 2) Kogenda tigingã neb a taabã. 3) Sõngda bɛɛgdã t’a tõog n tek yam n kos sugri.
15. Sẽn na yɩl n tõog n kell n sak a Zeova, sogs-bʋs la d segd n sok d mense?
15 Rẽ yĩnga tõnd me geta neb nins sẽn maand yel-wẽnã n pa rat n tek yam n kos sugrã wa a Zezi sẽn get-b to-to wã bɩ? D segd n soka d mens sogsg nins sẽn pʋgdã, la d tags b zug neere. Sogs-kãens la woto: ‘Rẽ yĩnga mam na n sakd n tũuda ned b sẽn yiis tigingã pʋgẽ, bɩ ned sẽn yiis a meng tigingã pʋgẽ bɩ? La sã n mik tɩ nin-kãng yaa d roagd sẽn pa le vɩ ne tõnd zag-yɛnga?’ Yell a woto pʋgẽ, tõe n sɩd yɩɩ toog ne-d tɩ d tõog n kell n wilg tɩ d nonga tɩrlem, la tɩ d tʋll n saka Wẽnnaam. *
16, 17. a) Zu-loe-bʋg la saam-bi-poak a ye seg-yã? b) Bõe n sõng-a t’a tõog n tall manesem ning b sẽn baood tɩ d tall ne ned b sẽn yiis tigingã pʋgẽ wã?
16 D gom saam-bi-poak a yembr yelle. A bi-ribl sẽn bɩ la sẽn da nong a Zeova n wa n yik n maand sẽn pa zemse, la a pa rat n toeem yam ye. Rẽ kɩtame tɩ b wa baas n yiis-a tigingã pʋgẽ. Saam-bi-poakã nonga a Zeova, la a nong a biigã me, tɩ kɩt tɩ ra yaa toog ne-a t’a tõog n tũ Biiblã saglg ning sẽn yet tɩ d ra maan tũud-n-taar ne ned a woto buudã.
17 Y sã n da beẽ ne pʋg-kãngã, sagl-bʋg la y ra na n kõ-a? Kãsem soab a yembr n sõng-a t’a bãng t’a Zeova mii yellã sẽn namsd-a to-to wã sõma. Saam-biigã yeel-a lame t’a tags malɛgs kẽer sẽn wa n kɩɩs a Zeova wã sẽn da segd n sãam a sũur to-to wã zugu. Kãsem soabã sõng-a lame t’a bãng tɩ baa a Zeova sẽn mi tɩ yell a woto tõe n sɩd waa ne sũ-sãamsã, a ratame tɩ b yiis neb nins sẽn maand wẽng n pa rat n tekã a nin-buiidã sʋka. Saam-bi-poakã sak n deega saglsã n sɩd tũ noy nins b sẽn gãneg yel-kãngã wɛɛngẽ wã. * Manesem a woto buud noogda a Zeova sũuri.—Yel. 27:11.
18, 19. a) Y sã n pa le maand tũud-n-taar ne ned b sẽn yiis tigingã pʋgẽ, wilgda bõe? b) D sã n tũud noy nins Wẽnnaam sẽn gãneg yiisgã wɛɛngẽ wã, tõe n waa ne bi-bʋse?
18 Y sã n bee yell a woto taoor bɩ y tẽeg t’a Zeova kʋmd-y lame. Y sã n pa le maand tũud-n-taar ne ned b sẽn yiis wall sẽn yiis a menga, y wilgdame tɩ y kisa a soabã manesmã wall bũmb ning a sẽn maan tɩ kɩt tɩ b yiis-a wã. Leb n wilgdame tɩ y nonga bɛɛgdã, la tɩ y rata a neere. Ned ning b sẽn kiblã sã n sak n tek yam, tõe n kɩtame tɩ yãmb meng maneg n sak a Zeova ne y sũur fãa.
19 Ned a ye sẽn tek yam n kos sugr tɩ b lebs n deeg-a tigingã pʋgẽ yeela woto: “Mam sũur yaa noog a Zeova sẽn nong a nin-buiidã wʋsg tɩ kɩt t’a kogend a siglgã sẽn na yɩl t’a kell n yɩ yɩlemdã. B sã n yiis ned tigingã pʋgẽ, baa yɩng rãmbã sẽn tõe n getẽ tɩ pa zemsã, yiisgã yaa bũmb sẽn wilgd tɩ b nonga a soabã.” Rẽ yĩnga nin-kãngã zakã rãmb la tigingã neb sã n da kell n maana tũud-n-taar ne-a a yiisgã poore, a ra na n wa tõog n yeela woto sɩda? D sẽn tũud noy nins Biiblã sẽn gãneg yiisgã wɛɛngẽ wã wilgdame tɩ d nonga tɩrlem la tɩ d sak n deegame t’a Zeova tara sor n na n wilg tõnd sẽn segd la sẽn pa segde.
‘Kisg-y wẽnga’
20, 21. Bõe yĩng tɩ d segd n mao n kisg wẽnga?
20 Tʋmd-tʋmd a Pɩɛɛr sagla kiris-nebã tɩ b ‘yõk b mens n gũusi.’ Bõe yĩnga? A paasa woto: “Yãmb bɛyã sẽn yaa Sʋɩtãanã gõoda wa gɩgemd sẽn kelemda, n baood a sẽn tõe n paam a soaba n sãame.” (1 Pɩɛ. 5:8) Ned ning a sẽn na n paam n sãamã na n yɩɩ yãmb bɩ? Rẽ bee ne y sẽn kis wẽng to-to wã.
21 Yɩl n tõog n wa kis wẽng pa nana ye. Bala d fãa yaa koangdba. Sẽn paase, dũniyã tusd-d lame n dat tɩ d sak d yĩngã la d ninã raabo. (1 Zã 2:15-17) La d sã n dɩk a Zezi Kirist togs-n-taar la d mao n nong Wẽnnaam a Zeova ne d sũur fãa, d na n tõogame n kisg wẽnga. Woto yĩng bɩ d mao n sɩd ‘kisg wẽnga,’ la d kɩs sɩd ne d sũur fãa t’a Zeova “gũuda neb nins sẽn yaa bãmb dẽndã, n yiisd bãmb nin-wẽns nusẽ.”—Yɩɩl 97:10.
[Tẽngr not rãmbã]
^ sull 15 Y sã n dat kibay a taab yel-kãngã zug n paas bɩ y ges yʋʋmd 1981 yʋʋm-sar kiuug rasem 15 Gũusg Gasgã seb-neng 25-30 wã.
^ sull 17 Ges-y yʋʋmd 2007 yʋʋm-vẽkr kiuug rasem 15 Gũusg Gasgã seb-neng 17-20 wã.
Y na n leokame tɩ bõe?
• Bõe n na n sõng-d tɩ d bãng d tagsg sẽn yaa a soab rãamã yũub wɛɛngẽ?
• Bõe la d tõe n maan n gil tɩtã bɩ zĩn-dãmbã yɛl maanego?
• Bõe yĩng tɩ yoobã yɛl gesg yaa wẽnga?
• B sã n wa yiis tõnd ned tigingã pʋgẽ, wãn to la d tõe n wilg tɩ d kisa wẽnga?
[Zãmsgã sogsgã]
[Foto, seb-neng 29]
Y sã n mi n yũuda rãam, bõe la y pa segd n yĩmi?
[Foto, seb-neng 30]
Gũus-y t’a Sʋɩtãan da paam-y ne pemsmã kokr maasem ye
[Foto, seb-neng 31]
Ned sẽn get yoobã yɛl wilgdame t’a nonga bõe?