Y sẽn tõe n welg zu-loees kẽer to-to

BIIBLÃ pa yeel tɩ kãadmã pʋgẽ zĩid-n-taarã yaa nana ye. Wẽnnaam da vẽnega tʋm-tʋmd a Poll t’a yeel tɩ sẽn kẽed-b kãadmã na n paama “toogo.” (1 Korẽnt dãmba 7:28) La rao ne a pag tara b sẽn tõe n maan n boog to-kãnga, la b paas sũ-noog ning b kãadmã sẽn kõt-bã. D na n goma zu-loees a yoob sẽn wae kãadmã pʋgẽ yelle, la Biiblã sagls tũub sẽn tõe n sõng n welg-b to-to.

1

ZU-LOƐƐGÃ:

“Maam ne m to wã pa le sõsd ne taab sõma ye.”

BIIBLÃ SAGLGA:

‘Bãng-y bũmb nins sẽn tar yõod n yɩɩdã.’—FILIP RÃMBA 1:10, NW.

Yãmb kãadmã naaga bũmb nins sẽn tar yõod ne-y n yɩɩdã sʋka. Segdame tɩ y ges a yell n yɩɩda. Woto yĩnga, bao-y n bãng-y sã n pa y ned kam fãa tʋʋmã n kɩt tɩ y pa le tar sẽk n sõsd ne taab sõma wã. Da n basd-y tɩ raasenkam tʋʋmã kɩtdẽ tɩ y pa paamd sẽk n zĩnded ne taab ye. Yaa sɩd tɩ tʋʋmã la yɛl a taab mi n wa kɩtame tɩ yɩ tɩlae tɩ y zãag taab wakat bilfu. La baasgo, y tõe n booga bũmb nins sẽn pa tɩlaeyã, wala makre, sẽk ning y sẽn dɩkd n deemdẽ wall y sõsd ne y zo-rãmbã. Y pʋd n segd n maana woto.

 Rap kẽer ne b pagb baooda tʋʋm a taab n paase, wall b ned kam fãa tar bũmb a sẽn nong n maand n kokd pemsem, tɩ kɩt tɩ b pa le tar sẽk n zĩ ne to ye. Sẽn maand-b woto wã zãagda b mens ne taab n pa miẽ ye. Sã n lebga woto yãmb kãadmã pʋgẽ, segdame tɩ y bao n bãng bũmb ning sẽn kɩt tɩ y pa le zĩ ne to wã, la y bao a tɩɩm. Yaa yãmb y yiibã sẽn na n baood sẽk n zĩ ne taab bal la y na n tõog n sɩd lebg “yĩng a yembre.”—Sɩngre 2:24.

Neb kẽer sẽn tũ sagl-kãngã to-to: A Andrew * ne a Tanji sẽn vɩ Ostrali wã kãadmã taa yʋʋm piiga. A Andrew yeela woto: “Mam bãngame tɩ ned tʋʋmd sã n dɩkd a sẽkã wʋsgo, wall a sã n dɩkd sẽk wʋsg n be ne a zo-rãmbã, tõe n waa ne zu-loees a kãadmã pʋgẽ. Woto kɩtame tɩ maam ne m pagã yãkd sẽk sẽn na yɩl n paamd n sõsd ne taaba.”

A Dave ne a Jane sẽn vɩ Etazĩni wã kãadmã taa yʋʋm 22. Zaabr fãa, b rɩkda lɛɛr pʋɩ-sʋk n sõsd ne taaba, tɩ b ned kam fãa tõe n togs a be-vẽerã sẽn yɩ to-to, la a yɛl a taaba. Ad a Jane sẽn yeele: “Yaa wakat sẽn tar yõod wʋsg ne tõndo, tɩ kɩt tɩ d pa sakd tɩ bũmb tiis-d tɩ d pa tõog n maan dẽ ye.”

2

ZU-LOƐƐGÃ:

“Mam to wã pa le maand mam sẽn datã ye.”

BIIBLÃ SAGLGA:

“Bɩ ned kam fãa ra bao a meng sõngr bal ye, la bɩ ned kam fãa bao a taab sõngr me.”—1 KORẼNT DÃMBA 10:24.

Kãadem pʋgẽ, sã n yaa f mengã yell bal n pak-fo, f pa na n tol n paam sũ-noog hakɩka, baa f sã n toeem zĩid-n-taaga. Yaa neb a yiibã ned kam fãa sẽn na n baood a to wã neer bal la b kãadmã yɩt sõma. Bala, a Zezi yeela woto: “Sẽn kõt-a sũ-noog yɩɩda sẽn deegd-a.”—Tʋʋma 20:35, Sebr Sõngo.

Neb kẽer sẽn tũ sagl-kãngã to-to: A Maria ne a Martin sẽn vɩ Megsikã kãadmã tara yʋʋm 39 masã. La pa wakat fãa la yɩ noog ye. B tẽra  wakat sẽn zĩnd tɩ b moorã yõsg taab hal tɩ pa yɩ nana ye. Rẽ wɛɛngẽ, a Maria yeela woto: “Goamã sẽn wa n wɩngã, mam goma gomd sẽn paoog a Martin wʋsgo. Rẽ maneg n puuga a sũurã. Mam tʋlgame n na n wilg-a t’a pa wʋm gomdã võor sõma, la tɩ yaa m sũurã sẽn yikã yĩng la m sẽn gom woto wã. La a pa kelg ye.” A Martin me yeela woto: “Tõnd mo-yõsrã sasa, mam wa n tagsdame tɩ d pa le tõe n zĩnd ne taaba, la tɩ m pa le segd n mao n bao d kãadmã manegr ye.”

A Martin ra tʋllame t’a pagã waoogd-a. A Maria ra ratame t’a sɩdã wilgdẽ t’a wʋmda a manesmã võore. La b ned baa a ye da pa paamd a sẽn tʋllã ye.

Bõe n sõng-b tɩ b tõog n welg b zu-loɛɛgã? Ad a Martin sẽn yeele: “Mam basame tɩ m sũurã wa sigi, tɩ d yã taab n yãk yam n na n tũud Biiblã sagls nins sẽn yet tɩ d waoogd taab la d maand taab neerã. Yʋʋm wʋsg loogr poore, tõnd bãngame tɩ baa zu-loeesã sẽn wat to-to fãa, d sã n pʋʋsd Wẽnnaam n kot a sõngr la d tũud Biiblã saglsã, d tõogd n welgd-b lame.”—Ezai 48:17, 18; Efɛɛz rãmba 4:31, 32.

3

ZU-LOƐƐGÃ:

“Mam to wã pa modgd tõnd kãadmã na yɩ neer yĩng ye.”

BIIBLÃ SAGLGA:

“Tõnd ned kam fãa na n togsa a meng yell Wẽnnaam taoore.”—ROM DÃMBA 14:12.

Yaa vẽeneg tɩ kãadem pʋgẽ, sã n yaa nin-yɛng bal n modgd n dat tɩ kãadmã yɩ neere, pa tõe n yãk neng ye. La neb a yiibã fãa sã n maand b toor kae tɩ ned kam fãa ningd a to wã taale, yɛlã na n zẽname.

Y sã n tagsd y to wã sẽn segd n maan bũmb ninsã yell bala, y pa na n tol n tall sũ-noog ye. Sẽn yɩɩd fãa, y to wã sẽn pa modgdã yĩng sã n kɩt tɩ yãmb me yãk yam n pa maoodẽ. La y sã n modgd n dat n yɩ sɩd-sõng wall pʋg-sõngo, y zĩid-n-taarã noom na n paasame. (1 Pɩɛɛr 3:1-3) Sẽn tar yõod n yɩɩda, y wilgda Wẽnnaam tɩ y waoogda kãadmã a sẽn luglã, la y modgrã na n nooga a sũuri.—1 Pɩɛɛr 2:19.

Neb kẽer sẽn tũ sagl-kãngã to-to: A Kim ne a sɩdã sẽn vɩ Koore wã kãadmã tara yʋʋm 38. Ad a Kim sẽn yeele: “Mam sɩdã sũur da mi n yika ne maam t’a pa le gomd ne-ma, tɩ m pa wʋmd a võor ye. Woto kɩtame tɩ m da tagsdẽ t’a pa le nong maam sõma ye. Mam da mi n sokda m meng woto: ‘Bõe yĩng t’a rat tɩ mam yɩ wʋmda, tɩ yẽ mengã yaool n pa modgd n na n yɩ wʋmda?’ ”

A Kim da tõe n tagsa a zu-loɛɛgã la a sɩdã sẽn pa maand bũmb ningã yell zug wʋsg tɩ maneg n sãam a sũuri. La a pa maan woto ye. Ad a sẽn yeele: “Wall tɩ m ket n yikd m sũurã, mam bãngame tɩ sẽn são yaa m sẽn na n bao tɩ laafɩ zĩnd d sʋka. Kaoosg zugẽ, d sɩd wa n tõe n zĩnd n yẽsa ne taab d yɛlã zug tɩ gãgs pa zĩnd ye.”—Zak 3:18.

 4

ZU-LOƐƐGÃ:

“Mam pagã pa sulgd n sakd maam ye.”

BIIBLÃ SAGLGA:

“Kirist yaa rao fãa Zu-soaba.”—1 KORẼNT DÃMBA 11:3, Kãab-paalgã Koe-noogo.

Pʋg-sɩd sẽn tagsd t’a pag pa sulgd n sakd-a segd n deng n feesa a meng n ges yẽ mengã sã n sakda a Zu-soabã sẽn yaa a Zezi Kiristã. Yaa pʋg-sɩd sã n dɩkd a Zezi mak-sõngã la a wilgd t’a sakda a Zu-soabã.

Tʋm-tʋmd a Poll yeela woto: “Rapa, bɩ y nong y pagbã wa Kirist sẽn nong bãmb tẽedbã n kõ bãmb meng bãmb yĩngã.” (Efɛɛz rãmba 5:25) A Zezi pa ‘soog’ a karen-biisã ne pãng ye. (Mark 10:42-44) A ra wilgd-b-la sor la a remsd-ba, b sã n da wa segd ne remsgo. La a ra pa maand-b pãng ye. A ra maand-b-la neere, n da pa baoodẽ me tɩ b maan sẽn yɩɩd b nug ye. (Matɩe 11:29, 30; Mark 6:30, 31; 14:37, 38) Wakat fãa, a ra baooda a karen-biisã neer n yɩɩda.—Matɩe 20:25-28.

Pʋg-sɩd segd n soka a meng sok-kãngã: ‘Rẽ yĩnga tagsg ning mam sẽn tar dapã zu-sobendã zug la pagbã zugã zemsa ne tõnd babgẽ wã neb minung bɩ, bɩ zemsa ne Biiblã sagls la a kibay sẽn wilgdã?’ Wala makre, pag sã n pa sak a sɩd tagsg yell zug tɩ kɩt t’a wilg rẽ vẽeneg la ne waoogre, y tagsg yɩta wãn ne-a? Biiblã wilgame t’a Abrahaam pag a Saara yaa mak-sõng sulg n sakã wɛɛngẽ. (1 Pɩɛɛr 3:1, 6) La sã n da wa yaa tɩlae, a togsda a tagsgo. Wala makre, sasa ning zu-loees sẽn wa n kẽ b zakã t’a Abrahaam yaool n da pa neẽ wã, a togsa a tagsgo.—Sɩngre 16:5; 21:9-12.

Yaa vẽeneg t’a Abrahaam pa gom n bugs a Saara n kɩt t’a sĩnd ye. A ra pa nin-toaag ye. Woto me, pʋg-sɩd sẽn tũud Biiblã sagls pa segd n bugsd a paga, n dat t’a sakd yẽ tagsg yell fãa pʋgẽ ye. Yaa a sẽn na n wilgd a zu-sobendã pʋgẽ t’a yaa wʋmd la nimbãan-zoɛta, la a pagã na n waoogd-a.

Neb kẽer sẽn tũ sagl-kãngã to-to: A James sẽn vɩ Ãngeletɛɛrã kãadmã yʋʋm a nii la woto. Ad a sẽn yeele: “Mam pa le yãkd yam n maan bũmb sẽn tar yõod tɩ m pa reng n sok m pagã a tagsg ye. Mam pa tagsd m mengã yell bal ye. Mam lʋɩɩsda sẽn noom m pagã taoore.”

A George sẽn vɩ Etazĩni wã ne a pagã kãadmã tara yʋʋm 59. A yeela woto: “Mam pa get m pagã wa ned sẽn pa zem maam ye. Mam get-a-la wa ned m sẽn segd n kelge, la sẽn sɩd tõe n sõng-ma.”—Yelbũna 31:10.

 5

ZU-LOƐƐGÃ:

“Mam sɩdã pa lʋɩt taoor n get zakã yell sõma ye.”

BIIBLÃ SAGLGA:

“Pagb nins sẽn tar yama manegda b yiya. La pʋg-yalembã sãamda b yiya.”—YELBŨNA 14:1.

Y sɩdã sã n pa nong n lʋɩt taoor zakã yell gesg wɛɛngẽ, tõe tɩ yɛl a tãab nins sẽn pʋgdã sʋka, a ye la y na n maane: 1) Tõe tɩ y na n tara a sẽn pa maandã yell goama, 2) wall y reeg a zĩig n lʋɩt zakã yɛl taoore, 3) pa rẽ bɩ y modgd n pẽgd-a ne pʋ-peelem modgr ning fãa a sẽn maan yĩnga. Y sã n maan pipi yɛl a yiibã, bãng-y tɩ y na n wãa y zakã y toore. La y sã n yãk tãab-n-soabã, na n sõng-y lame tɩ y maneg y kãadmã wall y paas-a pãnga.

Rap wʋsg nonga b pagbã sẽn na n waoogd-b n yɩɩd b sẽn na n wilgd-b tɩ b nong-b lame. Woto yĩnga, y sã n kɩtdẽ tɩ y sɩdã neẽ tɩ y waoogd-a lame, rat n yeel tɩ y sã n wilgdẽ t’a sẽn modgd to-to n get zakã yellã yaa sõma la tɩ y nanda a modgrã, tõe n sõng-a lame t’a maneg n ges zakã yell sõma n paase. Yaa sɩd tɩ wakat tõe n wa zĩndame tɩ y pa tall tags-yɛng ne y sɩdã yell ning zug ye. Sã n wa yaa woto, segdame tɩ yãmb y yiibã zĩnd n yẽse. (Yelbũna 18:13) La yẽsgã sasa, goam nins y sẽn na n yiisã la y koe-zomã tõe n sõng n wãa y kãadmã wall maneg-a. (Yelbũna 21:9; 27:15) Y sã n na n togs y sɩdã y tagsg bɩ y maand rẽ ne waoogre, tɩ tõe tɩ y wa tõog n paam y sẽn datã, rat n yeel tɩ n paam tɩ y sɩdã lʋɩt taoor n get zakã yell sõma.

Neb kẽer sẽn tũ sagl-kãngã to-to: A Michele sẽn vɩ Etazĩni wã kãadmã tara yʋʋm 30 masã. A yeela woto: “Mam ma wã wuba maam ne m yap a yi wã yẽ a yembre. Yaa pag sẽn da yẽese, la sẽn da maand bũmba fãa a toore. Woto kɩtame tɩ mam mi n dɩkd a togs-n-taare. Wakat fãa, mam da segd n maana modgr n tõog n sulg m meng m sɩdã taoore. Wala makre, mam sã n wa rat n yãk yam n maan bũmbu, m wae n sokda m sɩdã a tagsgo.”

Yʋʋm 21 la woto a Rachel sẽn kẽ kãadem ne a Mark tɩ b vɩ Ostrali. B sẽn wub a Rachel to-to wã me kɩtame tɩ ra pa nana ne-a b kãadmã pʋgẽ ye. A yeela woto: “M ma ra pa sulgd a meng m baaba taoor ye. Wakat fãa, ra yaa mo-yõs la paoog taaba. Woto kɩtame tɩ mam kãadmã poore, m da rɩkd m ma togs-n-taare. La kaoosg zugẽ, mam wa n bãngame tɩ Biiblã noy nins sẽn wilgd tɩ d waoogd d sɩdbã tũub tara yõodo. Rũndã-rũndã, maam ne a Mark zĩid-n-taarã nooma hal wʋsgo.”

6

ZU-LOƐƐGÃ:

“Mam ya n yaa ne a manesem kãensã.”

BIIBLÃ SAGLGA:

“Bɩ y maan sũ-mar ne taaba, la y kõ taab sugri, ned sã n tar yell ne a to.”—KOLOS RÃMBA 3:13.

Yãmb sẽn wa n dood taab n dat n kẽ kãadmã, y sẽn da ne n yɩɩd yaa y to wã zʋg-sõma wã, tɩ kɩt tɩ y ra pa get a zamsã ye. Modg-y n ket-y n maand woto. Yaa vẽeneg tɩ  y to wã tõe n wa talla manesem sẽn pa noom-yã. La bɩ y sok y meng woto: ‘Mam to wã zʋg-bʋs la m get n yɩɩda? A zʋg-sõma wã bɩ, bɩ a zʋg-wẽnsã?’

Daar a yembre, a Zezi rɩka makr sẽn tar pãng n wilg bũmb ning sẽn kɩt tɩ d pa segd n get d taabã zamsã võore. A yeela woto: “Yaa bõe tɩ fo get moogã sẽn be fo ba-biigã nifẽ wã n ka get raoogã sẽn be fo mengã nifẽ wã?” (Matɩe 7:3) Moogã tõe n yaa saok bala. La raoog ning yell a Zezi sẽn gomd ka wã yẽ yaa raoog b sẽn tõe n tall n tilg sugri. Bõe la a makrã rat n wilgi? A yeela woto: “Reng n yãk raoog ning sẽn be fo nifẽ wã, n yaool n yã n yãk moogã sẽn be f ba-biigã nifẽ wã.”—Matɩe 7:5.

Nand t’a Zezi rɩk a makrã, a reng n keooga a kɛlgdbã woto: “Da bʋ-y ned bʋʋd ye, tɩ Wẽnnaam da wa bʋ yãmb bʋʋd ye. Tɩ bõe, yãmb sẽn na n bʋ ned bʋʋd bũmb ningã, yãmb na n paama bʋ-kãnga.” (Matɩe 7:1, 2) Dẽnd y sã n dat tɩ Wẽnnaam da ges y kongrã b sẽn mak ne raoog sẽn be y nifẽ wã, y segd n basa y to wã zamsã gesgo.—Matɩe 6:14, 15.

Neb kẽer sẽn tũ sagl-kãngã to-to: A Jenny sẽn vɩ Ãngeletɛɛrã ne a sɩd a Simon kãadmã tara yʋʋm a wae masã. A yeela woto: “Mam yãame tɩ bũmb ning sẽn kɩt tɩ mam sũurã mi n yikd ne m sɩdã, yaa t’a pa magd la a maand a yɛlã ye. La sẽn maand laadã yaa tɩ tõnd sẽn da wa n dood taabã sasa menga, a ra maanda woto tɩ mam pẽgda. Masã m bãngame tɩ ma-me tara zamse. Wala makre, m sẽn nong n dat n lʋɩ yɛlã taoorã. Rũndã-rũndã, maam ne a Simon maoodame n pa le get taab pãn-komsem ye.”

Michele ning yell d sẽn da zoe n gomã sɩd a Curt yeela woto: “Y sã n nong n get y to wã zams sẽn yikd y sũurã, bilf-bilfã, y na n wa get-b-la wa yel-kãsemse. Mam sẽn wae n get a Michele nengẽ yaa a zʋg-sõma nins sẽn kɩt tɩ mam yamã kẽ-a tɩ kɩt tɩ m do-a wã.”

Bũmb ning sẽn kɩtd tɩ kãadem tall barkã

Kãadem nins makr d sẽn sõdgã wilgdame tɩ kãadem buud fãa pʋgẽ, zu-loees pa kongde, la tɩ d tõe n welg-b lame. Bõe n kɩtd tɩ kãadem tall barka? Yaa neb a yiibã sẽn na n nong Wẽnnaam, n sakd n tũud sagls nins sẽn be a Gomdã sẽn yaa Biiblã pʋgẽ wã.

A Alex ne a pag a Itohan sẽn vɩ Nizeria tɩ b kãadmã tar sẽn yɩɩd yʋʋm 20 masã wã bãnga bũmb ning sẽn kɩtd tɩ kãadem tall barkã. A Alex yeela woto: “Mam bãngame tɩ kãadem pʋgẽ, neb a yiibã sã n tũud Biiblã saglse, b tõogd n welgda b zu-loeesã fãa la bala.” Ad a pagã me sẽn yeele: “Tõnd bãngame tɩ d segd n naagda taab n pʋʋsd wakat fãa, n tũud Biiblã sẽn sagend-d tɩ d nong taab ne pʋ-peelem la d maand sũ-mar ne taabã. Rũndã-rũndã, tõnd zu-loeesã boogame n yɩɩd d sẽn wa n kẽ kãadem paalmã.”

Yãmb nong n bãnga Wẽnnaam Gomdã sagls sẽn tõe n sõng-y to-to tɩ y zakã pʋgẽ vɩɩm tall barkã n paas bɩ? Sã n yaa rẽ, bɩ y kos a Zeova Kaset rãmbã tɩ b wa sõs ne-y Biiblã sɩd yetame tɩ bõe? * sebrã sak 14 soabã zugu.

[Tẽngr not rãmbã]

[Foto, seb-neng a 4]

D baooda sẽk d to wã yĩng bɩ?

[Foto, seb-neng a 5]

Yaa mam mengã yell bal n pak-m bɩ?

[Foto, seb-neng a 6]

M yɩta pipi n baood mo-yõsã tɩɩm bɩ?

[Foto, seb-neng a 7]

Nand tɩ m yãk yam n maan bũmbu, m sokda m pagã a tagsg bɩ?

[Foto, seb-neng a 9]

M geta m to wã zʋg-sõma wã n yɩɩd bɩ?