A Zeova teegr zãng-zãng wata ne bas-m-yam
A Zeova teegr zãng-zãng wata ne bas-m-yam
“Mam sã n kelem n bool Zusoabã, bãmb wʋmdame.”—YƖƖL 4:4.
1, 2. a) Zu-loe-bʋg la a Davɩɩd paam tɩ ra tõe n tũ ne a yõore? b) Yɩɩl-bʋs yell la d na n gome?
ISRAƐLL rĩm a Davɩɩd naamã sasa, a wa n paama zu-loɛɛg sẽn da tõe n tũ ne a yõore. A biig a Absalom maana sɩlem n kɩt tɩ b moon n wilg tɩ yẽ lebga Israɛll rĩma, tɩ yɩ tɩlae ne a Davɩɩd t’a zoe n yi Zerizalɛm. Wakat kãnga, a sagend a ye me sẽn da yaa a zo-nongr n zãmb-a. A Davɩɩd yii Zerizalɛm na-zaal n yãbda, t’a poorẽ dãmbã sõor bilf bal yãag-a tɩ b rʋʋg oliiv tɩɩs tãngã. Sẽn paase, a Sayull buudã ned a ye yʋʋr sẽn boond t’a Simeyi yiime n lob a Davɩɩd kuga, n fãe-a tom la a tʋ-a.—2 Sãm. 15:30, 31; 16:5-14.
2 La rẽ yĩnga zu-loe-kãngã sẽn yɩ kɛgengã na n kɩtame t’a Davɩɩd ki ne yãnd la sũ-sãang bɩ? Ayo, bala, a teega a Zeova. Sɩd me, Yɩɩl Sõamyã a 3 soabã a sẽn gʋls a biig a Absalom sẽn da wa n digd-a wã wilgda rẽ. Yaa yẽ n gʋls Yɩɩl Sõamyã a 4 soabã me. Yɩɩn-kãensã fãa goamã wilgda vẽeneg tɩ Wẽnnaam sɩd reegda pʋʋsgo. (Yɩɩl 3:5; 4:4) B wilgda tõnd vẽeneg t’a Zeova bee ne neb nins sẽn maand a raabã ne pʋ-peelmã wakat buud fãa n teend-ba, la a kogend-ba. (Yɩɩl 3:6; 4:9) Bɩ d maag d yĩng n vaees yɩɩn-kãensã, n bãng b sẽn tõe n kɩt tɩ d maneg n bas d yam ne Wẽnnaam la d teeg-a to-to.
D bɛɛbã sã n wa lebg wʋsgo
3. Wa Yɩɩl Sõamyã 3:2, 3 wã sẽn wilgdã, a Davɩɩd yellã ra yaa wãn-to?
3 Koe-taasd a ye n da wa n tɩ yeel a Davɩɩd tɩ ‘Israɛll nebã bas-a lame n kẽ a Absalom.’ (2 Sãm. 15:13) A Davɩɩd sẽn da pa mi a Absalom sẽn sɩng to-to n wa paam tɩ neb wʋsg kẽ-a wã yĩng kɩtame t’a yeel woto: “Zusoaba, mam bɛɛbã lebga wʋsgo. Neb nins sẽn zẽkd b mens ne maamã yaa wʋsgo. Neb wʋsg gomda mam yell n yetẽ: ‘Fãagr ka be yẽ yĩng Wẽnnaam nengẽ ye.’” (Yɩɩl 3:2, 3) Israɛll nebã wʋsg ra tagsdame t’a Zeova pa na n fãag a Davɩɩd a Absalom ne a poorẽ dãmbã nusẽ ye.
4, 5. a) A Davɩɩd ra kɩsa sɩd ne bõe? b) A Davɩɩd sẽn yeel t’a Zeova “zẽkda [yẽ] zugã” võor yaa bõe?
4 Baasgo, a Davɩɩd yam da pa yoode, bala a ra teega Wẽnnaam ne a sũur fãa. Ad a sẽn yeele: “Zusoaba, yãmb yaa gãong n lilld maam. Yãmb yaa mam ziiri, yãmb zẽkda mam zugu.” (Yɩɩl 3:4) A Davɩɩd gom-kãensã wilgdame t’a kɩsa sɩd t’a Zeova na n kogl-a-la wa gãong sẽn kogend sodaagã. Rĩmã sẽn kʋʋlã ra pila a zug n zoetẽ tɩ yãnd tar-a. La Pãng-sẽn-ka-to soabã ra na n wa kɩtame tɩ yãndã toeem n lebg ziiri. A Zeova na n wa zẽka a zug n kɩt t’a lebs n paam a pĩnd ziirã. A Davɩɩd pʋʋsa Wẽnnaam n bas a yam t’a na n leokame. Rẽ yĩnga yãmb me wilgda wa a Davɩɩd tɩ y teega a Zeova zãng-zãng bɩ?
5 A Davɩɩd sẽn yeel t’a Zeova “zẽkda [yẽ] zugã,” yaa vẽeneg t’a ra kɩsa sɩd t’a Zeova na n sõng-a lame. Biibl a ye (Today’s English Version) lebga a gom-kãens woto: “La foo m Soaala, fo yaa mam gãong n kogend maam la f kõt-m tõogre, la f paasd-m daoodo.” Sebr a to bilga a Davɩɩd sẽn yeel tɩ ‘Wẽnnaam zẽkda yẽ zugã’ võore, n yeel tɩ “Wẽnnaam sã n zẽk. . . ned ‘zugu,’ a kɩtdame t’a soabã bas a yam ne bũmb fãa, la a tẽed manegre.” B sẽn modg a Davɩɩd t’a sig naamẽ wã, a sũur da segd n sãama wʋsgo. La a ‘zugã zẽkrã’ na n kenga a raood la kɩt t’a maneg n kɩs Wẽnnaam sɩda, la a teeg-a zãng-zãnga.
A Zeova na n leokame!
6. Bõe yĩng t’a Davɩɩd yeel t’a Zeova zĩnda a tãn-sõngã zug n leok yẽ?
6 A Davɩɩd sẽn teeg a Zeova la a kɩs-a sɩd ne a sũur fãa wã yĩnga, a yeela woto: “Mam zẽka m koɛɛg n kelme, la Zusoabã zĩnda bãmb tãn-sõngẽ wã n leok maam.” (Yɩɩl 3:5) Nin-buiidã ra rɩka kãabg koglgã sẽn wilgd tɩ Wẽnnaam bee a nebã sʋkã n dat n tũ. La b saka a Davɩɩd noore, n tall-a n tɩ lebs Siõ tãngã zugu. (Karm-y 2 Sãmwɛll 15:23-25.) Dẽnd a Davɩɩd sẽn yeel t’a Zeova zĩnda a tãn-sõngã zug n leok yẽ wã zemsame.
7. Bõe yĩng t’a Davɩɩd pa yɛɛs tɩ loog noore?
7 A Davɩɩd sẽn da kɩs sɩd tɩ Wẽnnaam na n deega a pʋʋsgã, a pa yɛɛs tɩ loog noor ye. A pʋd n yeela woto: “La maam, mam gãandame n gũsi, mam nekame. Zusoabã yaa mam tallda.” (Yɩɩl 3:6) Baa sẽn da yaa yʋng la a Davɩɩd bɛɛbã ra tõe n soos n ling-a wã, a ra gõeeme tɩ rabeem pa tar-a ye. A sẽn da zoe n yã Wẽnnaam sẽn kogl-a yɛl a taab pʋsẽ wã yĩng kɩtame t’a ra kɩs sɩd ne a sũur fãa t’a na n le sõng-a lame. Tõnd me sã n kell n tũ a Zeova “soayã n ka base,” d tõe n teeg-a-la ne bas-m-yam wa a Davɩɩde.—Karm-y 2 Sãmwɛll 22:21, 22.
8. Wãn to la Yɩɩl 27:1-4 wilgd t’a Davɩɩd ra teega Wẽnnaam?
8 A Davɩɩd wilga a yɩɩll a to me pʋgẽ t’a teega Wẽnnaam ne a sũur fãa. Be a yeela woto: “Zusoabã yaa mam vẽenem la mam fãagda. Ãnda la mam na n zoe? Zusoabã yaa mam vɩɩm tebendeda. Yaa ãnda la mam na n zoe? . . . Tãb-biis kʋʋng sã n kolg maam n maan sika, mam sũur kõn zoe rabeem ye. . . . Mam kota Zusoabã bũmb a yembre, yaa yãoã la mam baooda: A yaa tɩ mam tõe n zĩnd Zusoabã yir hal tɩ ta m yõor tɛka, la m ges Zusoabã neerlmã, la m bao bãmb bãngrã bãmb doogã pʋgẽ.” (Yɩɩl 27:1-4) Yãmb me sã n tar a Davɩɩd yamã buudu, y na n modgda wakat fãa tɩ sã n tõe bɩ y kẽnd n naagd y tẽed-n-taasã n maand tigissã.—Heb. 10:23-25.
9, 10. Baa ne Yɩɩll 3:7, 8 sẽn yet bũmb ningã, bõe n wilgd t’a Davɩɩd ra pa ned sẽn nong beem tugbu?
9 Baa a Davɩɩd sẽn wa n zoet n baood a yõor a Absalom taoor t’a zo-rãmb wʋsg me zãmb-a wã, a yeela a yɩɩll pʋgẽ woto: “Mam ka zoet neb tus-kẽema kãensã sẽn gũbg maam n dat n zab ne maamã ye. Zusoaba, yik-y-yã. Mam Wẽnnaam, fãag-y maam. Yãmb wẽeda mam bɛɛbã fãa pɛgse. Yãmb kaooda nin-wẽns yẽna.”—Yɩɩl 3:7, 8.
10 A Davɩɩd ra pa ned sẽn nong n tugd beem ye. A sẽn yeel tɩ Wẽnnaam ‘wẽeda yẽ bɛɛbã fãa pɛgsã’ wilgdame t’a basa a bɛɛbã Wẽnnaam nugẽ. Rĩm a Davɩɩd ra gesa a Moiiz tõogã n gʋls n tar n karemdẽ, n da miẽ t’a pʋgẽ wã, a Zeova yeelame tɩ “sũ-dokr la beem tugb yaa [yẽ] n so.” (Tõo. 17:14, 15, 18, NW; 32:35) A Davɩɩd ra miime tɩ Wẽnnaam n tog n ‘kao nin-wẽnsã yẽna.’ Kao b yẽnã rat n yeelame t’a na n kɩtame tɩ b pa le tar pãng n tõe n maan wẽng ye. A Zeova mii nin-wẽnsã sẽn yaa b rãmba, bala a “geta sũuri.” (1 Sãm. 16:7) Ad d sũy yaa noogo, Wẽnnaam sẽn kengd tõnd tẽebã la a kõt-d raood tɩ d tõe n mao ne nin-wẽnsã naab a Sʋɩtãanã. Ka la bilfu, b na n yõk-a-la wa gɩgemd sẽn kelemd la sẽn ka yẽna, n tog ne sãoongo, n lob bog-zulung pʋgẽ.—1 Pɩɛ. 5:8, 9; Wil. 20:1, 2, 7-10.
‘Fãagr yaa a Zeova n so’
11. Bõe yĩng tɩ d segd n pʋʋsd d tẽed-n-taasã yĩnga?
11 A Davɩɩd bãngame tɩ yaa a Zeova bal n da tõe n fãag-a wa a sẽn datã. La pa a mengã yell bal n da pak-a ye. Ãnd dãmb me yell n da pak-a? A ra tagsda a Zeova nin-buiidã fãa yelle. Rẽ n so t’a goamã baasgẽ, a yeel woto: “Fãagr yaa Zusoabã n so; bɩ yãmb barkã zĩnd yãmb nebã zutu.” (Yɩɩl 3:9) Yaa sɩd t’a Davɩɩd ra tara zu-loe-kɛgemse, la a ra ket n tagsda a Zeova nin-buiidã fãa yelle, n da kɩs sɩd t’a na n ning-b-la barka. Tõnd me pa segd n tagsd d tẽed-n-taasã yell sɩda? Segdame tɩ d tẽegd b yell n pʋʋsd b yĩnga, t’a Zeova kõt-b a vʋʋsem sõngã sẽn na yɩl tɩ b tall raoodo, n moond koe-noogã ne bas-m-yam.—Ef. 6:17-20.
12, 13. Bõe n paam a Absalom, la a Davɩɩd manesem yɩɩ wãna?
12 A Absalom kii ne yãnde. Woto yaa saglg n kõ neb nins fãa sẽn namsd b taabã, la sẽn yɩɩd fãa, sẽn namsd-b neb nins Wẽnnaam sẽn zae wa a Davɩɩdã. (Karm-y Yelbũn 3:31-35.) A Absalom nebã zaba ne a Davɩɩd poorẽ dãmbã, la b pa tõog ye. A Absalom wa n zomba a weefã n zoetẽ, la weefã kẽe tɩ-kãseng tẽngre, t’a Absalom zoobdã sẽn wogmã gaag willi. A kell n yagenda be n pa tar a sẽn maandga, t’a Zoaab tɩ mik-a n kõs a sũurã ne kãn a tã t’a ki.—2 Sãm. 18:6-17.
13 La rẽ yĩnga a Davɩɩd kɩdma sũ-noog a biigã kũum yĩng bɩ? Abada! A sũur sãama wʋsg hal t’a yãbd n yet woto: “M biig a Absalom, m biig a Absalom, mam sã n da ki tɩ fo pa n são.” (2 Sãm. 18:24-33) Sã n pa a Zoaab sẽn tɩ gom ne a Davɩɩd n sagl-a wã, a sũ-sãangã ra na n nams-a lame tɩ loog nugu. Ad wuk-m-meng sẽn tus a Absalom t’a sak n zab ne a ba wã a Zeova sẽn zaeyã, a baoa yel-beed n kõ a menga, tɩ kɩt t’a baas wẽnga!—2 Sãm. 19:1-8; Yel. 12:21; 24:21, 22.
A Davɩɩd kell n wilgame t’a teega Wẽnnaam
14. D tõe n yeelame tɩ b gʋlsa yɩɩll a 4 soabã bõe yĩnga?
14 Wa yɩɩll a tãab-n-soabã, yɩɩll a naas-n-soabã me yaa pʋʋsg a Davɩɩd sẽn da pʋʋs ne a sũur fãa, tɩ wilgdẽ t’a sɩd ra teega a Zeova zãng-zãnga. (Yɩɩl 3:5; 4:4) Tõe t’a Davɩɩd gʋls-a yɩɩn-kãngã a sẽn põs a Absalom nugẽ wã poore, n na n wilg Wẽnnaam a sũ-noog la a mi-beoogo. Tõe me t’a gʋls-a-la Levi yɩɩn-yɩɩndbã yĩnga. La sẽn yaa a soab fãa, d sã n bʋgs a goamã zugu, na n kɩtame tɩ d maneg n teeg a Zeova n paase.
15. Bõe yĩng tɩ d tõe n pʋʋsd a Zeova ne bas-m-yam, a biigã maasem yĩnga?
15 A Davɩɩd le wilgame t’a teega Wẽnnaam zãng-zãnga, la t’a kɩsa sɩd t’a kelgda pʋʋsgo, la a reegdame me. A yeela woto: “Wẽnnaam mam tɩrlem kõata, mam sã n kelem, yãmb leokdame. Yãmb yolsda maam mam toog pʋgẽ. Zoe-y mam nimbãanega, n kelg mam pʋʋsgã.” (Yɩɩl 4:2) Tõnd me tõe n kɩsa sɩd ne Wẽnnaam woto wa a Davɩɩde, d sã n maand sẽn yaa tɩrga. D sẽn mi t’a Zeova yaa Wẽnnaam sẽn yaa tɩrlem soabã, la t’a ningda a nin-buiidã sẽn yaa tɩrsã barkã, d tõe n pʋʋsd-a-la ne bas-m-yam a biig a Zezi maasem yĩnga, n tẽed a Zezi maoongã sẽn yɩ rondã. (Zã 3:16, 36) Ad woto sɩd kɩtame tɩ d yam gãe bãane!
16. Tõe tɩ yaa bõe n da wa n kɩt t’a Davɩɩd koms raoodo?
16 La yell ning tõe n wa komsa d raood wʋsgo, hal n kɩt tɩ d yam yo ne Wẽnnaam teegre. Tõe t’a Davɩɩd yã a buudu, bala a soka woto: “Yãmba, ninsaalb kamba, mam ziirã na n kell n paama paoogr tɩ ta wakat bʋgo? Yãmb na n nonga bõn-vɩɩdo, la y bao ziri wakat a wãna?” (Yɩɩl 4:3) Vẽenega, a Davɩɩd pa pẽgd neb nins a sẽn bool tɩ “ninsaalb kamb” ka wã ye. A ‘bɛɛbã ra nonga bõn-vɩɩdo.’ Biibl a ye (New International Version) lebga a gom-kãens woto: “Y na n ket n nonga zɩlem-beed la y tũud ziri wẽnnaam dãmb hal tɩ ta dabʋre?” Sok-kãngã wilgdame tɩ baa nebã yel-manesem sã n wa koms d raoodo, segdame tɩ d maood n ket n pʋʋsd Wẽnnaam sɩd-sɩdã ne d sũur fãa, la d wilgdẽ tɩ d teeg-a-la zãng-zãnga.
17. Manesem bʋg la d segd n tall tɩ wilg tɩ d tũuda Yɩɩl Sõamyã 4:4 sẽn yetã?
17 A Davɩɩd goam nins sẽn pʋgdã wilgda vẽeneg t’a ra teega Wẽnnaam. A yeela woto: “Bɩ y bãng tɩ Zusoabã welga bãmb nin-nongdsã b mengã yĩnga. Mam sã n kelem n bool Zusoabã, bãmb wʋmdame.” (Yɩɩl 4:4) Sẽn na yɩl n tõog n ket n sakd a Zeova, yaa tɩlae tɩ d tall raood la d teeg-a zãng-zãnga. Sẽn yɩɩd fãa, d zakã ned wall d roagd sã n wa maan yel-wẽnd n pa rat n tek yam n kos sugr tɩ kɩt tɩ b yiis-a tigingã pʋgẽ. Wẽnnaam ningda neb nins sẽn tũud a noyã barka. Sẽn paase, d sã n tũud-a ne pʋ-peelem la d teeg-a zãng-zãnga, kɩtdame tɩ sũ-noog be a nin-buiidã sʋka.—Yɩɩl 84:12, 13.
18. Wa Yɩɩl Sõamyã 4:5 sẽn yetã, ned sã n wa gom-d wẽnga, wall a maan-d bũmb sẽn pa noom-do, d manesem segd n yɩɩ wãna?
18 La ned sã n wa gom goam wall a maan bũmb tɩ sãam d sũuri, d manesem segd n yɩɩ wãna? D sã n tũ a Davɩɩd goam nins sẽn pʋgdã, tõe n kɩtame tɩ d lebs n tall sũ-noogo. A yeela woto: “Bɩ y rig ne dabeem n da maan yel-wẽn ye. Bɩ y gom yãmb sũyã pʋsẽ yãmb gãas pʋsẽ, la bɩ y sĩndi.” (Yɩɩl 4:5) Ned sã n wa gom-d wẽng wall a maan-d bũmb sẽn pa noom-do, d ra bao n na n dok d sũuri, n maan yel-wẽnd ye. (Rom 12:17-19) Yaa sɩd tɩ d tõe n tagsa bũmb ning a soabã sẽn maan tõndã yell d gãagẽ. La d sã n pʋʋs yellã zugu, tõe n kɩtame tɩ d toeem yam, n tõog n kõ-a sugri, d sẽn nong-a wã yĩnga. (1 Pɩɛ. 4:8) Rẽ wɛɛngẽ tʋm-tʋmd a Poll sẽn kõ saglg ning tɩ wõnd tika Yɩɩl Sõamyã 4:5 soabã zugã tara yõod wʋsgo. A yeela woto: “Yãmb sũyã sã n yiki, bɩ y ra maan yel-wẽn ye, la y ra sak tɩ wĩndg lʋɩ tɩ yãmb sũyã ket n ka sig ye. La bɩ y ra kõ Sʋɩtãanã weer ye.”—Ef. 4:26, 27.
19. Bõe la Yɩɩl Sõamyã 4:6 goamã wilgd tõnd d sẽn tũud Wẽnnaam to-to wã zugu?
19 Sẽn na yɩl n wilg Wẽnnaam teegr yõod sẽn ta zĩig ningã, a Davɩɩd yeela woto: “Maan-y tɩrlem maando, la y rell Zusoabã.” (Yɩɩl 4:6) Pĩnd wẽndẽ, Israɛll ned sã n da rat tɩ Wẽnnaam deeg a maoongo, ra yaa tɩlae t’a kõ ne yam-sõngo. (Ezai 1:11-17) Rũndã-rũndã, tõnd me sã n dat tɩ d sẽn tũud Wẽnnaam to-to wã ta a yam, yaa tɩlae tɩ yɩ ne yam-sõngo, la d teeg-a zãng-zãnga.—Karm-y Yelbũn 3:5, 6; Hebre dãmb 13:15, 16.
20. A ‘Zeova neng vẽenemã’ makda bõe?
20 A Davɩɩd paasa woto: “Nebã yetame yaa: ‘Ãnda n na n kɩt tɩ tõnd yã sũ-noogo?’ Zusoaba, bɩ y kɩt tɩ yãmb neng vẽenem zẽk n yãg tõnd zutu.” (Yɩɩl 4:7) A Zeova ‘neng vẽenemã’ makda bark ning sẽn yit a nengẽ wã. (Yɩɩl 89:16) Dẽnd a Davɩɩd sẽn pʋʋs n kos t’a ‘kɩt t’a neng vẽenem zẽk n yãg bãmb zutã,’ a ra rat n yeelame t’a ning-b barka. D sẽn teeg a Zeova wã yĩnga, d maanda a raabã ne bas-m-yam, n paamd a barkã la sũ-no-kãsenga.
21. D sã n kẽes d meng zãng-zãng koɛɛgã mooneg sẽn yaa wa tigsgã pʋgẽ, d tõe n kɩsa sɩd ne bõe?
21 A Davɩɩd sẽn da gẽegd sũ-noog ning sẽn yit Wẽnnaam nengẽ t’a barkã yɩɩd kood tigisg wakat sẽn kõt sũ-noog ningã, a yeela a Zeova woto: “Yãmb kõo maam sũ-noog n yɩɩd neb sẽn ta bõn-bɩʋʋng wakate.” (Yɩɩl 4:8) D tõe n kɩsa sɩd tɩ d sã n kẽes d meng koɛɛgã mooneg sẽn yaa wa tigisgã pʋgẽ ne d sũur fãa, d na n paama sũ-no-kãsenga. (Luk 10:2) Rũndã-rũndã, “tigsdbã” sõor sẽn tar paasgã, d naag kiris-neb nins sẽn paam vʋʋsem sõngã zaeebã sẽn lʋɩt tʋʋmdã taoorã n kɩdemdẽ. (Ezai 9:2) Rẽ yĩnga yãmb tʋmda tʋʋm-kãngã sẽn kõt sũ-noogã ne y sũur fãa bɩ?
Bas-y y yam n teeg Wẽnnaam, n ket n wɩngdẽ
22. Wa Yɩɩl Sõamyã 4:9 soabã sẽn yetã, Israɛll nebã sẽn da wa n sakd Wẽnnaam tõodã, b yɛlã ra yaa wãna?
22 A Davɩɩd yɩɩn-kãngã baasgẽ, a yeela woto: “Mam gãanda ne laafɩ n gũsi, tɩ bõe, Zusoaba, yaa yãmb bal n kɩt tɩ mam zĩnd ne laafɩ.” (Yɩɩl 4:9) Israɛll nebã sẽn da wa n sakd a Zeova tõodã, a ra nong-b lame, n kogend-ba. Wala makre, rĩm a Salomo naamã sasa, laafɩ zĩnda Zida ne Israɛll tẽnsã pʋsẽ. (1 Rĩm 5:5) Nin-buiidã sẽn da teeg Wẽnnaamã zĩnda laafɩ, baa tẽn-yagsã sẽn da kis-bã. Wa a Davɩɩde, tõnd me gãeyã bãane, bala Wẽnnaam kogend-d lame.
23. D sã n teeg Wẽnnaam zãng-zãnga, bõe n na n yɩ?
23 Woto yĩnga, bɩ d fãa bas d yam n teeg a Zeova zãng-zãnga, n ket n wɩngd ne a tʋʋmdã. La bɩ d fãa pʋʋsd ne tẽebo, n paamd “Wẽnnaam laafɩ sẽn yɩɩd nebã bãngr fãa” wã. (Fil. 4:6, 7) Rẽ na n kõ-d-la sũ-no-kãsenga! Sẽn paase, d sã n kell n teeg a Zeova zãng-zãnga, d tõe n kɩsa sɩd tɩ d beoog daarã na n yɩɩ sõma.
Y na n leokame tɩ bõe?
• A Absalom kɩtame t’a Davɩɩd paam zu-loe-bʋse?
• Yɩɩl Sõamyã a 3 soabã kɩtame tɩ d tõe n bas d yam ne bõe?
• Wãn to la Yɩɩl Sõamyã a 4 soabã tõe n kɩt tɩ d maneg n teeg a Zeova?
• D sã n teeg a Zeova zãng-zãnga, wãn to la na n naf-do?
[Zãmsgã sogsgã]
[Foto, seb-neng 32]
Yãmb teega a Zeova zãng-zãng bɩ?