Yãmb mii a Zezi Kirist sõma bɩ?

“La bãmb sẽn kẽ Zerizalɛm, tẽngã fãa rãmbame, la nebã sokame: ‘Yaa yɛ ned la woto?’ Neb kʋʋng leokame: ‘Yaa Wẽnnaam no-rɛɛs a Zezi sẽn yi Galile Nazarɛt.’”—MATƖE 21:10, 11.

BÕE yĩng t’a Zezi Kirist * sẽn ta Zerizalɛm yʋʋmd 33 Pakã sẽn wa n kolgã wa ne rãmbg woto? Tẽngã neb wʋsg ra wʋma a Zezi kibare, la yel-soalem nins a sẽn da maanã, n da togsd neb a taaba. (Zã 12:17-19) La kʋʋngã ra pa mi tɩ nin-kãngã kibarã na n saaga dũniyã gill zug hal n tãag rũndã ye.

D ges yɛl a wãn sẽn wilgd tɩ hal pĩnd wẽndẽ n tãag masã, dũniyã gill zugu, neb wʋsg wʋma a Zezi kibarã.

▪ Kalãndirie ning neb wʋsg sẽn tarã yʋʋm sõdg sɩnga ne yʋʋmd ning nebã sẽn tẽed tɩ yaa a Zezi rogem yʋʋmdã.

▪ Sẽn na ta neb milyaar a yiib n yet tɩ b yaa kiris-neba. Woto rat n yeelame tɩ dũniyã gill zugu, neb a tãab sʋka, ned a ye yaa kiris-neda.

▪ Moeembã sõor yɩɩda milyaar a ye. La b sak n deegame t’a Zezi yaa no-rɛɛs sẽn yaa kãseng n yɩɩd a Abrahaam, a Nowe, la a Moiizi.

▪ Nebã goam pʋgẽ, b mi n lebsd n dɩkda a Zezi goam kẽere. Ad bãmb b wãna:

‘Bɩ y wẽ kʋɩlenga, la b na pak n kõ-yã.’—MATƖE 7:7.

‘Ned ka tõe n sak zu-soben-dãmb a yiib ye.’—MATƖE 6:24.

‘Ra rɩk y sãnem-gilg n lob kurkur ye.’—MATƖE 7:6.

‘Yãmb sẽn dat tɩ nebã maan yãmb bũmb ningã, bɩ yãmb me maan bãmb boto.’—MATƖE 7:12.

‘Bɩ yãmb n-yẽe yɩ n-yẽe, la y ayo yɩ ayo.’—MATƖE 5:37.

Woto fãa wilgda vẽeneg t’a Zezi kibarã sɩd saaga zĩig zãnga. La nebã tara tagsg toor-toor a Zezi zugu. La tõe tɩ y sokda y meng woto: ‘A Zezi Kirist pʋd n yaa ãnda?’ Yaa Biiblã bal n wilgd tõnd a Zezi sẽn yi zĩig ninga, a sẽn maan bũmb ninsi, la a sẽn ki wã võore. Y sã n bãng woto fãa, tõe n naf-y-la masã menga, la beoog daare.

[Tẽngr note]