Zagsã rãmba, sõng-y taab n ‘gũ!’
Zagsã rãmba, sõng-y taab n ‘gũ!’
“Bɩ d ra gũs wa neb a taabã ye, la bɩ d kell n gũus la d tall yam sẽn vẽen sõma.”—1 TES. 5:6, NW.
1, 2. Zak rãmb sã n dat n tõog n ket n gũudẽ, bõe n yaa tɩlae ne-ba?
TƲM-TƲMD a Poll goma a Zeova ‘ra-kãsengã sẽn sek rabeemã’ yell ne Tesalonik kiris-nebã, n yeel woto: “M ba-biisi, yãmb ka be lik pʋgẽ tɩ da-kãng na n ling yãmb wa wagdr ye. Yãmb fãa yaa vẽenem kamba, la wĩntoog kamba. Tõnd ka yʋng kamba, wall lik kamb ye. Dẽ yĩnga, bɩ tõnd da gũs wa neb a taabã ye, la bɩ d gũusi, [la d tall yam sẽn vẽen sõma, NW].”—Zoɛll 3:4; 1 Tes. 5:4-6.
2 Saglg ning a Poll sẽn kõ Tesalonik kiris-nebã zemsa ne kiris-neb nins sẽn vɩ “sɛɛbã wakatã” me. (Dan. 12:4) Dũni kãngã sẽn yaa wẽngã saab sẽn kolgdã, a Sʋɩtãan maooda a sẽn tõe tɛk fãa, n dat n kɩt tɩ wẽn-tũudb hakɩkã wʋsg bas Wẽnnaam. Woto yĩnga, yaa yam bũmb tɩ d tũ a Poll saglgã ne d sũur fãa, tɩ sõng-d tɩ d ket n gũudẽ. Zak neb sẽn yaa kiris-neb sã n dat n tõog n ket n gũudẽ, segdame tɩ b ned kam fãa maand bũmb nins Wẽnnaam sẽn bobl-a zakã pʋgẽ wã. La bõe la pʋg-sɩdbã, pagbã la kambã segd n maan tɩ sõng zakã neb tɩ b ket n gũudẽ?
Pʋg-sɩdbã, rɩk-y “Pe-kɩɩm-sõngã” naoore
3. Wa 1 Tɩmote 5:8 wã sẽn yetã, rao sẽn yaa zak soabã yĩnga, bõe me la a segd n maane?
3 Biiblã yeelame tɩ “pag zug yaa a sɩda.” (1 Kor. 11:3) Sɩdã sẽn yaa zakã soabã tʋʋmd yaa bõe? Biiblã goma bũmb a yembr a sẽn segd n maan yelle, n yeel woto: “Ned sã n ka ges a neb yelle, la sẽn yɩɩda, a meng zak rãmba, yẽ soab yii tẽeb pʋgẽ, la a yaa wẽng n yɩɩd ned ning sẽn ka be tẽeb pʋgẽ.” (1 Tɩm. 5:8) Sɩd me, yaa raoã n segd n ges t’a zakã rãmb paam dɩɩbo, futu, la yɛl a taaba. La a sã n dat n sõng a zakã rãmb tɩ b ket n gũudẽ, a pa segd n getẽ tɩ b paamd rɩɩb bal ye. A segd n sõngd-b lame me tɩ b bãngd Wẽnnaam, tɩ zood ning b sẽn tar ne-a wã pãng paasdẽ. (Yel. 24:3, 4) Wãn to la a tõe n maan dẽ?
4. Bõe n tõe n sõng rao t’a tõog t’a zak rãmb tall zood sõma ne Wẽnnaam?
4 Sẽn mik tɩ “sɩd yaa pag zu-soab wa Kirist sẽn yaa bãmb nebã zu-soabã” yĩnga, yikãad segd n bao n bãnga Kiristã sẽn da get tigingã neb yell to-to wã, la a rɩk a togs-n-taare. (Ef. 5:23) A Zezi ra bilga a manesem sẽn yaa to-to ne a karen-biisã. (Karm-y Zã 10:14, 15.) Rao sã n dat t’a zak rãmb tõog n tall zood sõma ne Wẽnnaam, bõe n na n sõng-a? Yaa a sẽn na n bao n bãng “Pe-kɩɩm-sõng” a Zezi sẽn yeel la a maan bũmb ninsã, la a mao n ‘tũ a naoã.’—1 Pɩɛ. 2:21.
5. Hal sẽn ta zĩ-bʋg la Pe-kɩɩm-sõngã mi tigingã neba?
5 Bɩ d gom yikãad sẽn tõe n dɩk yam ning a Zezi mak-sõngã pʋgẽ wã yelle. Bas-yard la minim n be pe-kɩɩm ne a piis sʋka. Pe-kɩɩm mi a piis fãa, tɩ piisã me mi-a, n basd b yam ne-a. B pʋd n mi a koɛɛgã, la b sakd-a. A Zezi yeela woto: “Mam mii mam piisã, la bãmb mii maam.” Woto wilgdame t’a ra mii tigingã neb sõma. Gɛrk gom-bil ning b sẽn lebg ka tɩ “miime” wã rat n yeelame t’a mi a pesg fãa sõma. Pe-kɩɩm-sõngã sɩd mii a piisã sõma. A mii pesg fãa sẽn date, a pãn-tõogo, la a pãn-komsem. A Zezi sẽn kõ mak-sõng pe-kɩʋʋngã wɛɛngẽ wã mii bũmb fãa a piisã zugu. Piisã me mii b kɩɩmã hal sõma, n sakd-a ne bas-m-yam.
6. Wãn to la pʋg-sɩd tõe n dɩk Pe-kɩɩm-sõngã naoore?
6 Pʋg-sɩd sã n dat n dɩk Kiristã togs-n-taar zu-sobendã wɛɛngẽ, a segd n ninga a yamẽ t’a yaa wa pe-kɩɩmã, la tɩ neb nins yell a sẽn getã yaa wa piisi. A segd n modgame n bãng a zakã neb fãa sõma. Rẽ yĩnga pʋg-sɩd tõe n sɩd bãnga a zak neb woto bɩ? N-ye. Yaa a sẽn na n yẽsd ne b ned kam fãa, n kelgd b zu-loeesã la a lʋɩt zakã tʋʋm taoore. Sẽn paase, a segd n tẽegda a zakã rãmb yɛl sẽn yaa to-to wã, a sã n wa rat n sigl zak pʋgẽ zaabr Biibl zãmsgã, tigissã kẽnde, koe-moonegã yiibu, pemsmã kokr la yɛl a taaba. Pʋg-sɩd sã n zãmsd Wẽnnaam Gomdã sõma, la a modgd n bãngd a zakã neb sõma, n kõt-b mak-sõng yɛl nins fãa a sẽn yãkd yam n maandẽ wã pʋgẽ, yɩta nana ne-b tɩ b bas b yam ne a sẽn get b yell to-to wã. Sẽn paase, zakã rãmb na n tõog n ket n naagda taab n tũud Wẽnnaam ne b sũy fãa tɩ kõt-a sũ-noogo.
7, 8. Wãn to la yikãadbã tõe n dɩk a Zezi naoor n nong neb nins yell b sẽn getã?
7 Pe-kɩɩm-sõng nonga a piis me. D sã n karemd a Zezi vɩɩmã la a koe-moonegã kibar sẽn be Evãnzill dãmbã pʋgẽ wã, d yãta a sẽn da nong a karen-biisã to-to wã tɩ noom-d wʋsgo. A pʋd n sak n ‘kõ a vɩɩmã a piisã yĩnga.’ Yikãadbã segd n dɩka a Zezi naoore, n nong neb nins yell b sẽn getã hal sõma. Pʋg-sɩd sẽn dat n ta Wẽnnaam yam pa weoogd a pag ye. A nong-a-la ‘wa Kiristã sẽn nong a tẽedbã’ to-to wã. (Ef. 5:25) A segd n bʋkda a meng ne a pagã la a wilgdẽ t’a yaa wʋmda, a sẽn mi t’a segd n nan-a lame wã yĩnga.—1 Pɩɛ. 3:7.
8 Kambã wubr wɛɛngẽ, zak-soben-dãmbã segd n tũu Wẽnnaam noyã ne b sũur fãa. La b segdame me n wilgd-b tɩ b nong-b lame. Sã n wa yaa tɩlae tɩ b kibl-ba, b segd n maan-a rẽ ne nonglem. Kamb kẽer pa sakd n tũud sagls nins b sẽn kõt-bã zĩig pʋgẽ ye. Sã n wa yaa woto, ba wã segd n maneg n talla sũ-mar sõma. Rapã sã n tũud a Zezi mak-sõngã, kɩtdame tɩ b zagsã pʋsẽ vɩɩm tar sũ-noog la bãane. B zagsã neb na n tara bas-yard ne Wẽnnaam wa yɩɩl-gʋlsdã me sẽn da tarã.—Karm-y Yɩɩl Sõamyã 23:1-6.
9. Wa a Nowe, bõe la zak-soben-dãmbã segd n maane, la bõe n na n sõng-b tɩ b tõog n maan dẽ?
9 A Nowe me kõo zak-soben-dãmbã mak-sõngo. A vɩɩmda a wakatẽ dũniyã saab sasa. La a Zeova ‘sẽn wa n tʋm sãoong sa-kãseng wẽn-kɩɩsdbã sẽn be dũniyã zugã yĩngã, a fãaga a Nowe ne neb a yopoe.’ (2 Pɩɛ. 2:5) Yaa a Nowe n da segd n sõng a zakã rãmb tɩ b paam n põs sãoongã. Woto me la zak-soben-dãmb nins sẽn yaa kiris-nebã segd n maan rũndã-rũndã sẽn yaa yaoolem wakatã. (Mat. 24:37) Sẽn na yɩl n tõog n sõng b zagsã rãmba, rẽndame tɩ b bao n bãng Pe-kɩɩm-sõngã sẽn bas mak-sõng ningã, la b mao n dɩk a naoore.
Pagbã, ‘maneg-y y yiyã’
10. Pag sẽn segd n sak a sɩdã rat n yeelame tɩ bõe?
10 Tʋm-tʋmd a Poll yeela woto: “Pagba, bɩ y sak y sɩdbã wa yãmb sẽn sakd Zusoabã.” (Ef. 5:22) Gom-kãngã pa paoogd pagbã ye. Nand tɩ Wẽnnaam naan a Hawa sẽn yɩ pipi pagã, a yeela woto: “A ka neer tɩ ninsaal zĩnd a yembr ye. Mam na n maana sõangd sẽn zems ne yẽ n kõ-a.” (Sɩng. 2:18) Pag sẽn “yaa sõangd sẽn zems” ne a sɩdã, rat n yeel t’a sẽn segd n sõng a sɩdã n ges zakã yellã yaa waoogr n kõ-a.
11. Wãn to la pʋg-sõng ‘manegd a yiri’?
11 Pʋg-sõng tʋmda a zakã rãmb neer yĩnga. (Karm-y Yelbũn 14:1.) A pa maand wa pʋg-yalem sẽn kɩɩsd noy nins Wẽnnaam sẽn gãneg zu-sobendã wɛɛngẽ wã ye. A sakda a sɩdã ne a sũur fãa. A pa maand wa dũniyã neb sẽn yaa kɩɩsdba n nong soog-m-mengã ye. (Ef. 2:2) Pʋg-yalem wae n wɩta a sɩda, la pag sẽn tar yam nong n gomd n pẽgda a sɩd a kambã la neb a taab taoore, tɩ kɩt tɩ b maneg n waoogd a sɩdã. Pag a woto gũusdame n pa kɩɩsd a sɩdã la a pa wẽed no-koɛɛm ne-a, sẽn na yɩl n da paoogd-a n kõt nebã ye. Rẽ toor sẽn ka be, a mii ligd zãabo. La pʋg-yalem sãamda ligd ning b sẽn namsd n paamdẽ wã. Pag sẽn sõngd a sɩd pa maand woto ye. A sõngda a sɩdã n zãad zakã paoongo. A maanda bũmba fãa ne gũusgu, sẽn na yɩl tɩ b kẽgs ligdã. A pa weoogd a sɩdã t’a tʋm wʋsg n bao ligd ye.
12. Bõe la pag tõe n maan n sõng a zak neb tɩ b tõog n ket n gũudẽ?
12 Pʋg-sõng sõngda a sɩd tɩ b wilgd b kambã Wẽnnaam noyã tɩ kɩt tɩ zakã neb fãa tõe n ket n gũudẽ. (Yel. 1:8) A maanda a sẽn tõe fãa n sõngdẽ tɩ zak pʋgẽ Biibl zãmsgã tõogd n maandẽ. Sẽn paase, a sɩdã sã n wa sagend kambã wall a kibind-ba, a sõngd-a lame. A yaa toor fasɩ ne pag sẽn pa sõngd a sɩda, tɩ kɩt tɩ b pa tõe n ges b kambã yell sõma la b sõng-b tɩ b bãng Wẽnnaamã.
13. Rao sã n tar tʋʋm wʋsg tigingã pʋgẽ, bõe yĩng t’a pagã segd n teel-a?
13 Pag sẽn teend a sɩd tagsg yaa wãna, a sɩdã sã n tar tʋʋm wʋsg tigingã pʋgẽ? Yaa vẽeneg tɩ noom-a lame! Raoã yaa kãsemb sõngd t’a yaa kãsem soaba, pa rẽ bɩ a naaga kãsem dãmbã sull ning sẽn get logtor yirẽ tɩbsg zu-loeesã yellã, (CLH) wall a naaga sull ning sẽn get Rĩungã Roog yellã me, a pagã sũur nooma ne rẽ. Yɩl t’a tõog n teel a sɩdã ne a no-goam la ne a tʋʋma, rẽndame t’a sak n mong a menga. La a miime t’a sɩdã sẽn tʋmd wʋsg tigingã pʋgẽ wã sõngdame tɩ zakã neb fãa tõe n ket n tũud Wẽnnaam sõma.
14. a) Wakat bʋg la tõe n yɩ toog ne pag t’a kell n teel a sɩda, la bõe n tõe n sõng-a? b) Wãn to la pag tõe n sõng n kɩt t’a zakã pʋgẽ zĩndg tall yamleoogo?
14 La tõe n yɩɩ toog ne pag sẽn teend a sɩd t’a tõog n kell n teel-a, a sɩdã sã n wa yãk yam n na n maan bũmb tɩ pa ta a yam. La baa ne rẽ, a tallda “sũ-bʋgsem la sũ-maasem,” n teel a sɩdã t’a tõog n maan bũmb ning a sẽn datã. (1 Pɩɛ. 3:4) Pʋg-sõng rɩkda pĩnd wẽndẽ pʋg-sõms wa a Saara, a Rut, a Abigayill la a Zezi ma a Maari naoore. (1 Pɩɛ. 3:5, 6) La a rɩkda rũndã-rũndã pʋg-yãans sẽn tar ‘yel-manesem sõma’ me togs-n-taare. (Tɩt 2:3, 4) Pag sã n wilgdẽ t’a nonga a sɩda, paasda b zĩid-n-taarã noosem, la kɩtdẽ tɩ zakã pʋgẽ zĩndg tar yamleoogo, bala laafɩ la bãan bee be. Rao sẽn tũud Wẽnnaam ne a sũur fãa sã n paam t’a pagã teend-a, a get-a-la wa bark sẽn pa tõe n bãng n sɩfe!—Yel. 12:4.
Kom-bɩɩsã, get-y “bũmb nins nin sẽn ka ne wã”
15. Wãn to la kom-bɩɩsã tõe n sõng b roagdbã tɩ b ges tɩ zakã neb fãa tõog n ket n gũudẽ?
15 Wãn to la yãmb a kom-bɩɩsã tõe n sõng y roagdbã tɩ b ges tɩ zakã neb fãa tõog n ket n gũudẽ? Tagsd-y keoor ning a Zeova sẽn na n kõ-yã yelle? Tõe tɩ hal y yãadmẽ, y roagdbã wilg-y-la fot rãmb sẽn bilgd arzãnã pʋgẽ vɩɩm sẽn na n yɩ to-to wã. Tõe tɩ y sẽn wa n bɩtẽ wã, b talla Biiblã la tʋm-tʋmdã sɛb n sõng-y tɩ y bãng vɩɩm sẽn kõn sa wã sẽn na n yɩ to-to dũni-paalgã pʋgẽ. Y sã n ket n tagsd a Zeova tʋʋmdã yell la y sigind y yɛlã tɩ zemsd ne rẽ, na n sõng-y lame tɩ y tõog n ket n gũudẽ.
16, 17. Bõe la kom-bɩɩsã tõe n maan tɩ kɩt tɩ b zoe zoeesã n tõoge?
16 Tʋm-tʋmd a Poll maka Wẽnnaam tʋʋmdã d sẽn tʋmdã ne zoees d sẽn zoete, tɩ vɩɩm sẽn ka sɛtã yaa kũunã. Tẽeg-y saglg ning a sẽn kõ 1 Korẽnt dãmb 9:24 pʋgẽ wã. (Karm-y-yã.) Zoee-y vɩɩmã zoeesã ne y sũur fãa sẽn na yɩl n paam kũunã. Yãk-y y sẽn na n vɩɩmd y vɩɩmã to-to wã sõma, tɩ sõng-y tɩ y wa paam kũunã sẽn yaa vɩɩm sẽn kõn sa wã. Kom-bɩɩs kẽer basame tɩ laogã baoob tiisd-b tɩ b pa le get kũunã ye. Ad woto sɩd pa yam tʋʋmd baa bilf ye! Ned sã n maand a bũmbã fãa n baood arzɛk bala, a pa tõe n paam sũ-noog hakɩk ye. Bũmb nins ligd sẽn tõe n da wã pa kaoosd ye. Woto yĩnga, bɩ yãmb yẽ ket n get “bũmb nins nin sẽn ka ne wã.” Bõe yĩnga? Bala “bũmb nins nin sẽn ka ne wã paada wakat sẽn ka sɛta.”—2 Kor. 4:18.
17 Rĩungã sẽn na n wa ne bark ninsã naaga “bũmb nins nin sẽn ka ne wã” sʋka. Modg-y tɩ y sẽn sigind y yɛlã to-to wã sõng-y tɩ y wa paam bark kãensã. Yaa y sẽn na n tʋmd a Zeova tʋʋmdã bal la y paamd sũ-noog hakɩka. Wẽnnaam tũudmã pʋgẽ, tʋʋm toɛy-toɛy n be y sẽn tõe n yãk n maan masã tɛka, wall y yãk n wa maan kaoosg zugẽ. * Y sã n yãk bũmb takɩ y sẽn dat n maan la y sẽn sɩd tõe n maane, na n sõng-y lame tɩ y ket n tũud Wẽnnaam sẽn na yɩl n wa paam kũunã sẽn yaa vɩɩm sẽn kõn sa wã.—1 Zã 2:17.
18, 19. Wãn to la bi-bɩɩg tõe n bãng a sã n yãka yam a toor n tũud Wẽnnaam?
18 Kom-bɩɩsã, bũmb ning y sẽn segd n deng n maan n wa tõog n paam vɩɩm sẽn kõn sa wã, yaa yãk yam y toor n tũud Wẽnnaam. Yãmb maanda woto bɩ? Bɩ y ned kam fãa sok a menga: ‘Rẽ yĩnga mam geta yɛlã wa Wẽnnaam sẽn get-b to-to wã bɩ, bɩ yaa m doagdbã yĩng la m sẽn tũud Wẽnnaamã? Mam modgd n baooda zʋg sẽn tat Wẽnnaam yam bɩ? Mam modgd n tʋmda Wẽnnaam tʋʋmã n pa vaandẽ bɩ? Wala makre, m pʋʋsda Wẽnnaam wakat fãa, n zãmsd Biiblã, n kẽnd tigissã la m moond koɛɛgã bɩ? Mam maooda sẽn na yɩl n tall zood sõma ne Wẽnnaam bɩ?’—Zak 4:8.
19 Bʋgs-y mak-sõng ning a Moiiz sẽn basã zugu. Baa sẽn yɩ bu-zẽms neb n wub-a wã, a tõdgame tɩ b kõn bool-a t’a Faraõ bi-pugl biiga, n yãk yam n na n naag a Zeova nin-buiidã. (Karm-y Hebre dãmb 11:24-27.) Kom-bɩɩsã, yãmb me segd n yãka yam n tũ a Zeova ne y sũur fãa. Y sã n maan woto, y na n paama sũ-noog hakɩka, rat n yeel tɩ y vɩɩmã na n talla bark masã tɛka, la y saagdẽ me tɩ y na n wa paama “vɩɩm hakɩkã.”—1 Tɩm. 6:19, Kãab-paalgã Koe-noogo.
20. Yaa ãnd dãmb n na n paam vɩɩmã zoees kũunã?
20 Pĩnd wẽndẽ wã, b sã n da zoe, yaa zoɛtbã nin-yend n paamd kũunã. La vɩɩmã zoees kũunã pa nin-yend n na n paam ye. Wẽnnaam datame tɩ “nebã [buud, NW] fãa paam fãagre, la b bãng sẽn yaa sɩda.” (1 Tɩm. 2:3, 4) Neb n deng yãmb n zoe zoeesã n tõoge, tɩ neb a taab naag yãmb n ket n zoetẽ. (Heb. 12:1, 2) Yaa neb nins fãa sẽn na n zoe zoeesã n tãag a tɛkã n na n paam kũunã. Woto yĩng bɩ y mao n paam-a!
21. Bõe yell la d na n gom sõsg ning sẽn pʋgdã pʋgẽ?
21 A Zeova ra-kãsengã ‘sẽn sek rabeemã’ waoong pa na n vaal ye. (Mal. 3:23) A pa segd n ling kiris-nebã zags rãmb me ye. Tara yõod tɩ zagsã ned kam fãa maand bũmb nins Wẽnnaam sẽn bobl-a zakã pʋgẽ wã. La bõe me la y segd n maan tɩ sõng-y tɩ y ket n gũudẽ, la paasd zood ning y sẽn tar ne Wẽnnaamã pãnga? Sõsg ning sẽn pʋgdã na n wilga bũmb a tã sẽn tõe n sõng zagsã neb fãa tɩ b tall zood sõma ne Wẽnnaam.
[Tẽngr note]
^ sull 17 Ges-y yʋʋmd 2010 sɩpaolg kiuug pipi daar Gũusg Gasgã seb-neng 20-24, la yʋʋmd 2004 sẽoog kiuug rasem 15 Gũusg Gasgã seb-neng 21-23.
Bõe la yãmb bãng-yã?
• Bõe yĩng tɩ tar yõod tɩ kiris-nebã zags rãmb ket n gũudẽ?
• Wãn to la pʋg-sɩd tõe n dɩk Pe-kɩɩm-sõngã naoore?
• Bõe la pʋg-sõng tõe n maan n sõng a sɩda?
• Bõe la kom-bɩɩsã tõe n maan n sõng tɩ b zagsã neb fãa kell n gũ?
[Zãmsgã sogsgã]
[Foto, seb-neng 12]
Rao sã n paam t’a pag teend-a, nafd-a-la wʋsgo