Yãmb na n tũu sor-wilgr ning a Zeova sẽn kõt-yã bɩ?
Yãmb na n tũu sor-wilgr ning a Zeova sẽn kõt-yã bɩ?
“Mam kisgda zir-n-be soayã fãa.”—YƖƖL 119:128.
1, 2. a) Y sã n wa sokd zĩig sore, sagl-bʋg buud la y na n sak n deege, la bõe yĩnga? b) Sagl-bʋs la a Zeova kõt a nin-buiidã, la bõe yĩnga?
TAGS-Y n ges-y wa y sẽn na n dat n tog sore, n kos y zoa y sẽn tõe n teeg la sẽn mi sorã sõma t’a sõng-yã. Tõe t’a sã n wa wilgd-y sorã, a na n yeel-y-la woto: “Fo na n wa taa zĩig sorã sẽn welge. F sã n ta be bɩ f gũusi, bala pano wã sẽn tees zĩig ningã pa sõma ye. Neb wʋsg tũu so-kãng n meneme.” Rẽ yĩnga y kõn kelg-a neer n tũu a saglgã sɩda? A Zeova wõnda zo-kãngã. A wilgda tõnd d sẽn tõe n maan to-to n ta zĩig ning d sẽn datã, rat n yeel tɩ n paam vɩɩm sẽn kõn sa wã. La a keoogd-d lame me tɩ d gũus tɩ yɛl toor-toor n be n tõe n kɩt tɩ d bʋdge, n wa pa paam vɩɩm sẽn kõn sa wã ye.—Tõo. 5:32; Ezai 30:21.
2 Sõs-kãngã la sõsg ning sẽn pʋgdã pʋgẽ, d na n goma yɛl kẽer Wẽnnaam a Zeova sẽn yaa d zoa wã sẽn keoogd-d tɩ d gũus ne yelle. La segdame tɩ d tẽeg tɩ yaa a Zeova sẽn nong-dã yĩng n kɩt t’a kõt-d sagl-kãensã. A ratame tɩ d vɩɩmd wakat sẽn kõn sa. A sã n get neb kẽer sẽn yãkd yam n maand yel-kɛg wall b basd a tũubã, sãamda a sũuri. (Eze. 33:11) Sõs-kãngã pʋgẽ, d na n goma yɛl a tãab sẽn yaa wẽns yelle. Pipi soabã pa yit tõnd nengẽ ye, la yiib-n-soabã yẽ yita tõnd nengẽ. A tãab-n-soabã pa bũmb sẽn yaa vẽeneg ye. La baasgo, a yaa wẽng wʋsgo. Dẽnd segdame tɩ d bao n bãng yel-kãensã fãa sẽn yaa b rãmba, la a Zeova sẽn wilgd tõnd d sẽn tõe n gil-b to-to. Biiblã gʋlsdb nin-yend ra yeela a Zeova woto: “Mam kisgda zir-n-be-soayã fãa.” (Yɩɩl 119:128) Rẽ yĩnga yaa woto me ne yãmb bɩ? Bɩ d ges d sẽn tõe n maan to-to n maneg n kisg zir-n-be-soayã ne d sũur fãa.
Ra tũ-y “neb b sẽn yaa wʋsg yĩng ye”
3. a) D sã n wa togd sor n yaool n pa mi sorã, bõe yĩng tɩ pa yam tʋʋmd tɩ d pʋg so-toagdb a taab bala? b) Yikr 23:2 wã kõt-d-la sagl-bʋg sẽn tar yõod wʋsgo?
3 Yãmb sã n togd so-wok n wa tiig n pa le mi sor ning y sẽn segd n dɩke, y na n maana wãna? Tõe tɩ y na n wa rat n tũu so-toagdb a taabã sẽn teesdẽ wã. Sẽn yɩɩd fãa, b sõorã sã n waoogẽ. La woto tõe n yɩɩ yelle. Bala bũmb pa wilgd tɩ b rebda yãmb sẽn datẽ wã ye. Tõe meng tɩ bãmb me menema wa yãmba. Mak-kãngã sõngda tõnd tɩ d wʋm saglg a Zeova sẽn da kõ Israɛll nebã Tõogã pʋgẽ võore. A ra yeelame tɩ bʋ-kaoodbã la neb nins sẽn kɩt-b kaset bʋ-kaoodb taoorã pa segd n yag ziri, b sẽn dat n tũ ‘neb b sẽn yaa wʋsg yĩng’ ye. (Karm-y Yikr 23:2.) Sãmbg sẽn ka be, ninsaalbã sẽn yaa koangdbã sɩd tõe n sak n maana bũmb a woto. La rẽ yĩnga ra yaa bʋ-kaoodbã n paas neb nins sẽn da kɩt kaset bʋ-kaoodb taoorã bal la b sẽn keoog woto wã bɩ? Ayo!
4, 5. Wãn to la b pẽdg a Zozue ne a Kalɛɛb sẽn na yɩl tɩ b tũ neb b sẽn yaa wʋsg yĩnga, la bõe n sõng-b tɩ b tõog n zãgse?
4 Hakɩka, yell buud fãa taoore, d tõe n wa rat n sak n tũu neb b sẽn yaa wʋsg yĩnga. Mi n tõe n wa ling-d lame hal tɩ yɩl n tõog n da maan woto pa nana ye. Wala makre, tẽeg-y yell ning sẽn da paam a Zozue ne a Kalɛɛbã. B sẽn da wa n tʋm neb 12 tɩ b soos n tɩ ges Kãabg Tẽngã, b zĩnda sʋka. La b sẽn tɩ ges tẽngã n lebg n wa wã, b neb piig n togs kibar sẽn koms nin-buiidã raoodo. B yeelame meng tɩ tẽngã neb sãnda yaa nin-wobd bɩ nefilim dãmba, rat n yeel tɩ malɛgs nins sẽn da kɩɩs Wẽnnaam n sig tẽngã zug n dɩgs pagbã yagense. (Sɩng. 6:4) La pa sɩd ye. Bala, yʋʋm kobs sẽn deng rẽ, a Nowe wakatẽ sa-kãsengã sãama nin-kãens fasɩ. La ne rẽ fãa, Israɛll nin-buiidã sak n deega neb piigã tẽeb sẽn da paoodã goamã. Ned tẽeb sã n paoodẽ, a basda Wẽnnaam teegr n teeg ninsaalb tagsa. Zĩig pʋgẽ wã, b goamã kɩtame tɩ Israɛll nebã tags tɩ b pa segd n sak a Zeova noorã n yik n kẽng Kãabg Tẽngẽ wã ye. La yellã taoore, a Zozue ne a Kalɛɛb manesem yɩɩ wãna?—Sõd. 13:25-33.
5 B pa sak n ‘tũ nebã b sẽn yaa wʋsgã yĩng ye.’ Baa nin-kãensã b yiibã sẽn togs sɩdã tɩ sãam kʋʋngã sũur hal tɩ b ra rat n lob-b kugã, b kell n talla raoodo. Bõe n kɩt tɩ b tall raood woto? Yaa vẽeneg tɩ sẽn yɩɩd fãa, yaa b tẽebã. Bala ned sã n tẽed Wẽnnaam a Zeova ne a sũur fãa, a sakda a goamã, a pa sakd ninsaalb tagsa ye. Kaoosg zugẽ, a Zozue ne a Kalɛɛb fãa sẽn wa n gom b sẽn teeg a Zeova to-to wã yellã, b yeelame t’a pidsda a kãabg buud fãa. (Karm-y Zozue 14:6, 8; 23:2, 14.) A Zozue ne a Kalɛɛb ra nonga b Wẽnnaamã, la b ra kɩs-a sɩd me. B ra pa rat n maan bũmb sẽn na n sãam Wẽnnaam sũuri, n noog b taabã sũur ye. Woto kɩtame tɩ b pa tol n sak n tũ kʋʋngã sẽn da pa tar tẽeb baa bilfã raab ye. B sẽn maan woto wã, b basa mak-sõng n kõ tõnd rũndã-rũndã.—Sõd. 14:1-10.
6. Bõe ne bõe n tõe n wa kɩt tɩ d rat n pʋg neb b sẽn yaa wʋsg yĩnga?
6 Rẽ yĩnga sasa mi n zĩndame tɩ y tʋll n ‘tũ neb b sẽn yaa wʋsg yĩng’ bɩ? Rũndã-rũndã neb wʋsg pa tũud a Zeova ye. B tagsdame t’a sẽn yet bũmb ning sõma la wẽngã wɛɛngẽ wã pa zems ye. Nin-kãensã tara b toorẽ tagsg sõma la wẽngã zugu, n dat tɩ tõnd me tẽ rẽ. Wala makre, b yetame tɩ televiziõ wã filim dãmbã ne ze-video rãmb nins sẽn wilgd yoob yɛla, nen-kɛglem la zĩn-dãmb yɛlã pa wẽng ye. (2 Tɩm. 3:1-5) Yãmb y yembre, wall yãmb ne y zakã rãmb sã n wa rat n kok pemsem, wãn to la y maanda? Rẽ yĩnga y teegda neb wʋsg sẽn yet la b maandẽ wã bɩ? Y sã n maand woto, kõn yɩ wa y sẽn sakd n tũud neb b sẽn yaa wʋsg yĩng sɩda?
7, 8. a) D sã n dat tɩ d sẽn tõe n bãng sõma ne wẽng n bakã naf-do, bõe la d segd n maane, la bõe yĩng tɩ ka yõod tɩ b kõ-d noy ka tɛka? b) Bõe yĩng tɩ kom-bɩɩs wʋsg sẽn kõt mak-sõng ningã noom-yã?
7 A Zeova kõo tõnd kũun sẽn yaa sõma wʋsgo, tɩ sõngd-d tɩ d tõe n yãk yam n maan bũmb toor-toore. Kũun-kãng yaa a sẽn kɩt tɩ d tõe n tags neer n bãng sõma la wẽng n welgã. La sẽn na yɩl n dɩ a nafa, rẽnda d tʋmd ne-a sõma. (Heb. 5:14, MN) Rẽ maaneg baoodame tɩ d ra tũud neb b sẽn yaa wʋsg yĩng bal ye. Sẽn paase, yɛl kẽer wɛɛngẽ, d segd n tũu d sũur-kasetã n bãng d sẽn segd n maanega. Dẽnd d pa tog n tʋlg tɩ b kõ-d noy takɩ yel-kãens wɛɛngẽ ye. Rẽ n so tɩ b pa gʋls filim dãmba, sɛb la sit ẽntɛrnet rãmb nins sẽn pa sõma ne a Zeova nin-buiidã n kõ-b ye. Dũniyã yɛl sẽn toeemd tao-tao wã yĩng kɩtame tɩ b sã n da na n gʋlsd rẽ fãa sɛb zug n kõt-do, na n yɩɩ tɩlae tɩ d toeemd seb-kãens wakat fãa. (1 Kor. 7:31) Sẽn yaa wẽngã meng yaa tɩ woto maaneg na n kɩtame tɩ d pa le tõe n fees Biiblã sagls d toor n bãng n tũ rẽ n maan bũmb ye.—Ef. 5:10.
8 Yaa sɩd tɩ d sã n nong n tũud Biiblã saglse, pa wakat fãa la nebã na n pẽg-d ye. Wala makre, kom-bɩɩs nins sẽn yaa kiris-neb n be lekollã karen-bi-taas mi n modgd-b lame n dat tɩ b maan bũmb neb wʋsg sẽn maande. (1 Pɩɛ. 4:4) Rẽ n so tɩ d sã n ne kiris-neba, kom-bɩɩs la kãsemb sẽn dɩkd a Zozue ne a Kalɛɛb togs-n-taar n pa ‘tũud neb b sẽn yaa wʋsg yĩngã,’ sɩd be yamleoogo.
Ra ‘tũ-y y sũyã sẽn date, la y nin sẽn ne n dat ye’
9. a) Y sã n wa togd sore, bõe yĩng tɩ y sã n tũ y sũurã la y ninã sẽn ne n datã bal bɩ tõe n wã-yã? b) Bõe yĩng tɩ noor ning sẽn be Sõdb 15:37-39 wã ra nafd Israɛll nebã?
9 Bũmb a yiib-n-soab ning sẽn tõe n tudg-d tɩ d na n gom a yellã yita tõnd mengã nengẽ. D tõe n dɩka makr n wilg rẽ. Ges-y wa yãmb sẽn na n togd sor n debd zĩiga. Y sã n tõdg y na tũ sor ning sẽn debd be wã, tɩ y sã n yã sor sẽn wõnd yaa neer fãa bɩ y gõdg n tũudẽ, bõe n na n maane? Yaa vẽeneg tɩ y pa na n ta y sẽn datẽ wã ye. Mak-kãngã tõe n sõng-d lame tɩ d wʋm noor a Zeova sẽn da kõ Israɛll nebã võore. Tõe tɩ b sã n yeel neb wʋsg rũndã-rũndã tɩ b ning b futã noy zerd la gĩs sẽn yaa kẽese, a võor wʋmb yɩta toog ne-ba. (Karm-y Sõdb 15:37-39.) La rẽ yĩnga y mii Wẽnnaam sẽn da yeel a nin-buiidã tɩ b maan woto wã sẽn naf-b to-to bɩ? Ra sõngd-b lame tɩ b tõe n kell n yɩ toor ne tẽn-yagsã neb sẽn da pʋʋsd bõn-naandsã. Sẽn na yɩl n ta a Zeova yam, ra yaa tɩlae tɩ b yɩ toore. (Maan. 18:24, 25) La no-kãngã wilgda bũmb sẽn yit tõnd mengã nengẽ, n yaool n tõe n kɩt tɩ d kong vɩɩm sẽn kõn sa wã. Bõe la rẽ?
10. Wãn to la a Zeova wilg t’a mii ninsaal sõma?
10 A Zeova meng wilga a nin-buiidã bũmb ning sẽn kɩt t’a kõ-b no-kãngã. A yeel-b-la woto: “Ra tũ y sũyã sẽn datã la y nin sẽn ne n dat ye.” A Zeova mii ninsaal sẽn yaa to-to wã hal sõma. A miime tɩ tõnd sũurã tõe n tʋlga bũmb nins d sẽn getã nana-nana. Rẽ n so tɩ Biiblã yet woto: “Ninsaal sũur tara ziri n yɩɩd bũmb fãa, la a yaa wẽng wʋsgo. Yaa ãnda n tõe n bãng-a?” (Zer. 17:9) Y pa ne bʋʋm ning sẽn kɩt t’a Zeova ra keoog Israɛll nebã tɩ b ra tũ b sũyã la b ninã sẽn ne n datã sɩdã? A ra mii vẽeneg tɩ b tõe n wa yãa bu-zẽmsã neb sẽn pa mi Wẽnnaamã sẽn maand bũmb ninsã, tɩ b yamã kẽ rẽ n kɩt tɩ b tʋlg n wõneg-ba, n wa rɩk b togs-n-taare.—Yel. 13:20.
11. Bõe la d sũurã la d ninã tõe n wa kɩt tɩ d tʋlg n maane?
11 Sẽn yɩɩd fãa, yaa rũndã-rũndã la d sũurã sẽn tar ziri wã tõe n wa kɩtame tɩ d tʋlg bũmb nins d sẽn getã nana-nana. D vɩɩ dũni sẽn pid ne yɛl buud toor-toor sẽn tõe n kɩt tɩ d tʋlg wẽnga. Woto yĩnga, wãn-wãn la d tõe n tũ Sõdb 15:39 soab saglgã? Wala makre, d futã ningrã wɛɛngẽ, d pa segd n tũud d sũyã la d ninã sẽn ne n datã ye. D karen-bi-taase, d tʋmd-n-taas wall d sagsã pʋsẽ neb sẽn manegd b mens to-to wã nekda pag ne rao lageng tʋlsem. D sẽn yãt rẽ wakat fãa wã, d tõe n wa rat n wõneg-b lame, tɩ wa kɩt tɩ d yik n ningd fut sẽn wõnd rẽ.—Rom 12:1, 2.
12, 13. a) D sã n wae n get sẽn pa sõma, bõe la d segd n maane? b) Bõe n tõe n kɩt tɩ d ra wa yɩ kug-lakdg n kõ d taabã?
12 D segd n talla yõk-m-menga. D sã n nong n get sẽn pa sõma, segdame tɩ d tẽeg bũmb ning nin-tɩrg a Zoob sẽn da maanã yelle. A ra maana kaool ne a ninã, rat n yeel t’a ra yãka yam tɩ sã n pa a meng pagã, a pa na n tol n ges pag a to n tʋlg-a ye. (Zoob 31:1) Rĩm a Davɩɩd me ra yeela woto: “Mam ka na n ges bũmb sẽn ka bark ye.” (Yɩɩl 101:3) Bũmb ning fãa sẽn tõe n dẽgem tõnd sũur-kasetã la sãam zood ning d sẽn tar ne a Zeova wã yaa “bũmb sẽn ka barka.” Bũmb ning fãa d sẽn tõe n ges tɩ kɩt tɩ d tʋlg n maan wẽng naaga sʋka.
13 La tõnd mengã tõe n wa lebga “bũmb sẽn ka barka,” d sẽn manegd d mengã to-to wã sã n kɩtdẽ tɩ d taabã tʋll n maan wẽnga. Rẽ n so tɩ d tũud Biiblã saglg ning sẽn yet tɩ d manegd d mensã tɩ zemsdẽ, la d ningd fut sẽn yaa sõma wã ne d sũur fãa. (1 Tɩm. 2:9) Maneg d meng tɩ zemsã pa rat n yeel tɩ zemsd ne d mengã sẽn tagsd tɩ yaa sõma ye. Segdame tɩ d tẽegdẽ tɩ tõe n sãama d taabã sũuri, tɩ kɩtdẽ tɩ d pa lʋɩɩsd d mengã raab taoor ye. (Rom 15:1, 2) Kom-bɩɩs tusa sẽn yaa a Zeova Kaset rãmb manegda b mens sõma tɩ yaa mak-sõngo. B sẽn pa ‘tũud b sũyã la b ninã sẽn ne n datã,’ n yãk yam n noogd a Zeova sũur b sẽn maand fãa pʋgẽ, la baa b sẽn manegd b mensã to-to wã pʋgẽ wã, d sũy nooma ne-b hal wʋsgo!
Ra tũ-y “bõn-zaals” ye
14. ‘Bõn-zaalsã’ pʋgb wɛɛngẽ, keoog-bʋg la a Sãmwɛll kõ Israɛll nebã?
14 Tags-y n ges-y wala y sẽn na n wa pasgd rasempʋɩ-kẽeng y so-toakã sasa. Y sã n yã ko-sɩɩg n tags tɩ yaa koom sɩd-sɩd n bʋdg n babse, bõe n tõe n paam-yã? Y sã n tall ko-sɩɩgã pʋgbo, tõe n wa tũu ne y yõore! A Zeova mii vẽeneg tɩ yɛl sẽn pa sɩd pʋgb tõe n waa ne yelle. Ad makr sẽn wilgd rẽ. Israɛll nebã ra wa n tʋlga rĩm sẽn yaa ninsaala, sẽn na yɩl n wõneg tẽns nins sẽn da gũbg-bã. La b sẽn tʋlg rẽ wã, b maana yel-wẽn-kãsenga, bala b tõdgame t’a Zeova kõn le yɩ b Rĩm ye. Baa a Zeova sẽn sak tɩ b sʋkã ned na n lebg b rĩmã, a kɩtame tɩ no-rɛɛs a Sãmwɛll keoog-ba. A Sãmwɛll yeel-b lame tɩ b ra tũ “bõn-zaalse,” rat n yeel tɩ b ra teeg bũmb sẽn pa tõe n sõng-b ye.—Karm-y 1 Sãmwɛll 12:21.
15. Bõe n kɩt tɩ d tõe n yeel tɩ Israɛll nebã pʋga bõn-zaalse?
15 Tõe tɩ nin-kãensã tagsame tɩ sã n yaa ninsaal n yaa b rĩma, b sẽn na n ne-a wã yĩng na n kɩtame tɩ b tõe n maneg n teeg-a sõma n yɩɩd b sẽn teeg a Zeova to-to wã. La sã n yaa rẽ, sɩd yaa bõn-zaalg la b sẽn da pʋgdã! Bala rẽ tõe n kɩtame t’a Sʋɩtãan tõog tɩ b tʋlg bõn-zaals a taaba. Wala makre, b rĩm dãmbã tõe n wa kɩtame tɩ b pʋʋs bõn-naandse. Sẽn pʋʋsd-b bõn-naandsã tudgame n tagsdẽ tɩ b sẽn ne b wẽnnaam dãmbã sẽn maan ne raad wall kugã kɩtame tɩ b tõe n teegd-b n yɩɩg b sẽn tõe n teeg Wẽnnaam a Zeova sẽn naan bũmba fãa tɩ b yaool n pa ne-a wã. La wa tʋm-tʋmd a Poll sẽn yeelã, bõn-naandsã nebã sẽn pʋʋsdã yaa “zaalem.” (1 Kor. 8:4) B pa ne, b pa wʋmde, b pa tõe n gom wall b maan bũmb ye. Yaa sɩd tɩ y tõe n yã-b-la ne nif la y sɩɩs-b menga. La baasgo, y sã n pʋʋsd-ba, yaa bõn-zaals la y pʋgda, la na n wã-y lame.—Yɩɩl 115:4-8.
16. a) Wãn to la a Sʋɩtãan belg neb rũndã-rũndã tɩ b pʋgd bõn-zaalse? b) Bõe yĩng tɩ d tõe n yeel tɩ arzɛk ne paoong yaa bõn-zaalse, d sã n mak-b ne a Zeova?
16 A Sʋɩtãan ket n mii a sẽn tõe n belg nebã to-to hal tɩ b pʋgd bõn-zaalse. Wala makre, a belga neb wʋsg tɩ b tẽed tɩ b sã n paam ligdi, tʋʋmd sẽn yaood sõma la te-neeba, b na n paama sũ-noog la bãane. B tẽedame tɩ b tõe n teega yel-kãensã n tõog n welg b zu-loeesã. La rẽ yĩnga b tarmã tõe n sõng-b-la sabaab-wẽng sasa, b tẽngã sã n wa be ligd zu-loees pʋgẽ, pa rẽ bɩ b sã n wa lʋɩ bãag sɩda? B sã n wa tagsdẽ tɩ b vɩɩmã pa tar võore, wall b wa baood n na n bãng vɩɩmã võore, b tarmã tõe n sõng-b lame sɩda? B paoongã tõe n sõng-b-la kũum taoor bɩ? D sã n teeg d paoongã, d sũur na n sãamame. Arzɛkã pa tõe n kõ tõnd bũmb nins d sẽn dat tɩlae sẽn na yɩl n paam sũ-noogo, wall fãag-d ne bãas la kũumã ye. (Yel. 23:4, 5) A yaa ‘bõn-zaalga.’ La tõnd Wẽnnaam a Zeova yẽ pa woto ye. Yaa yẽ la Wẽnnaam sɩd-sɩdã! Yaa d sẽn na n tar zood sõma ne-a bal la d tõe n paam koglg hakɩka. Tõnd sũy yaa noog d sẽn paam n yaa a zo-rãmbã. Bɩ d ra tol n bas-a, n pʋg bõn-zaals ye!
17. Sagls nins d sẽn yã sõs-kãngã pʋgẽ wã wɛɛngẽ, bõe la y yãk yam n na n maane?
17 Rẽ yĩnga d sũy pa noom d sẽn paam t’a Zeova yaa d zoa la a yãagd-d vɩɩmã so-toakã pʋgẽ wã sɩda? Tõnd sã n ket n kelgd a saglsã, d tõe n wa paam n vɩɩmda wakat sẽn pa sate. Sõs-kãngã pʋgẽ, d yãa bũmb a tãab sẽn yaa wẽnse, sẽn kɩt tɩ neb wʋsg bʋdg n dɩk sor sẽn pa sõma. Yaa tʋlg n pʋg neb b sẽn yaa wʋsg yĩngã, d sũurã sẽn datã la d ninã sẽn ne n datã tũubu, la bõn-zaalsã pʋgbo. Sõsg ning sẽn pʋgdã pʋgẽ, d na n goma sagls a tãab a Zeova sẽn kõt tõnd sẽn na yɩl n sõng-d tɩ d kisg la d gil so-wẽns sẽn tõe n kɩt tɩ d bʋdge.—Yɩɩl 119:128.
Yãmb tagsg yaa wãna?
Wãn to la y tõe n tũ vɛrse nins sẽn pʋgdã saglsã?
[Zãmsgã sogsgã]
[Foto, seb-neng 11]
Yãmb zoe n tʋlg n na n tũu neb b sẽn yaa wʋsg yĩng bɩ?
[Foto, seb-neng 13]
Bõe yĩng tɩ d pa segd n tũ d sũurã sẽn datã?
[Foto, seb-neng 14]
Yãmb pʋgda “bõn-zaals” bɩ?
