B ra gũuda Mesi wã waoongo

“Zãma wã ra gũuda Fãagdã. Dẽ la ned kam fãa ra yet a pʋgẽ: ‘Sãnd kaa a Zã la Wẽnd Nedã?’”—LUK 3:15, SEBR SÕNGO.

1. Koe-no-bʋg la malɛk taas pe-kɩɩmba?

YƖƖ zĩ-sobdo, tɩ pe-kɩɩmb ra be tẽngã noor n gũud b rũmsi. La malɛk n wa b nengẽ, tɩ Wẽnnaam ziirã yãg n gũbg-ba! Rabeem yõk-b lame, la malɛkã yeel-b-la woto: “Da zoe-y rabeem ye, mam togsda yãmb koe-noog sẽn na n wa ne sũ-noog wʋsg nebã fãa yĩnga. Ade, Fãagdã sẽn yaa Zusoabã sẽn yaa Kirist doga yãmb yĩng rũndã.” Bi-pɛɛlg ning yell malɛkã sẽn gomã yaa sẽn da na n yɩ-a Kiristã bɩ Mesi wã. Malɛkã yeela pe-kɩɩmbã tɩ b sã n kẽ a Davɩɩd tẽngã sẽn pẽ be wã pʋgẽ, b na n yãa biigã sẽn vil ne peend n gãe rũms rɩɩb koglgẽ. La wakat kãng bala, malɛgs wʋsg n wa n paas malɛkã tɩ b pẽg Wẽnnaam n yeele: “Pẽgre! Wẽnnaam sẽn be [saasẽ]. Laafɩ bee dũniyã zug neb nins sẽn sakd bãmbã sʋka.”—Luk 2:8-14.

2. “Mesi” rat n yeelame tɩ bõe, la wãn to la b ra na n maan n bãng ned ning sẽn sɩd yaa Mesi wã?

² Pe-kɩɩmbã ra miime tɩ ne hebre, “Mesi” bɩ “Kirist” rat n yeelame tɩ ned Wẽnnaam sẽn “welg” toor tʋʋmd takɩ yĩnga. (Yik. 29:5-7) La wãn to la pe-kɩɩmbã la neb a taabã ra na n maan n bãng la b kɩs sɩd tɩ yaa biig ning yell malɛkã sẽn gomã n sɩd yaa Wẽnnaam Mesi wã? Pipi, b ra segd n vaeesa Biiblã bãngr-goam nins sẽn gomd Mesi wã yellã, la b gũus n ges biigã vɩɩm sẽn da na n yɩ to-to wã sã n pidsda gom-kãense.

Bõe yĩng tɩ nebã ra gũud Mesi wã waoongo?

3, 4. Wilg-y Daniɛll 9:24, 25 goamã sẽn pids to-to.

³ Kaoosg zugẽ, a Zãmbatiis wa n sɩnga a koe-moonegã. La a goamã ne a tʋʋmã kɩtame tɩ kẽer da sokd b mens sã n pa yẽ la Mesi wã. (Karm-y Luk 3:15.) Biiblã pʋgẽ, bãngr-gomd n gom yʋʋm pis-yopoe naoor a yopoe yelle, tɩ ra na n sõng nebã tɩ b bãng Mesi wã sẽn da na n wa wakat ningã. Bãngr-gomdã yeta woto: “Na n yɩɩ yʋʋm pis-yopoe naoor a yopoe fo nebã ne tẽn-sõngã yĩnga. . . .  Bɩ f bãng tɩ b sẽn kõ noor tɩ b le me Zerizalɛmmã hal tɩ ta Wẽnnaam nin-tũusdgã sẽn yaa naabã wakatã, na n yɩɩ yʋʋm a yopoe naoor a yopoe, la yʋʋm pis-yoob la a yiib naoor a yopoe.”—Dan. 9:24, 25.

⁴ “Yʋʋm a yopoe naoor a yopoe, la yʋʋm pis-yoob la a yiib naoor a yopoe” wã yell b sẽn gomd Daniɛll 9:25 pʋgẽ wã fãa yaa yʋʋm 483. Rũndã-rũndã, a Zeova Kaset rãmbã miime tɩ yʋʋm kãens sɩnga yʋʋmd 455 soab sẽn deng a Zezi rogmã. Bala yaa yʋʋm-kãng la Pɛrs rĩm a Artazɛgzɛs kõ a Nehemi sore, n yeel-a t’a kẽng n tɩ lebs n me Zerizalɛm. (Neh. 2:1-8) Yʋʋm 483 wã saa a Zezi rogmã poor yʋʋmd 29 soabã pʋgẽ, sasa ning a Zezi sẽn deeg lisgã. Wakat kãnga, Wẽnnaam zae-a-la ne a vʋʋsem sõngã t’a lebg Mesi wã.—Mat. 3:13-17. *

5. Bãngr-goam bʋs la d na n wɛgse?

⁵ Biiblã bãngr-goam a taab me n gomd Mesi wã yelle, tɩ d na n wɛgs-b sõs-kãngã pʋgẽ. B kẽer n gomd a rogmã, a yãadmẽ la a bi-bɩɩlem wakatẽ yɛl yelle, n paas a koe-moonegã yelle. D na n yãa bãngr-gom-kãens sẽn pids a Zezi vɩɩmã pʋgẽ to-to. Rẽ na n kɩtame tɩ d tẽ Biiblã goam n paase, la kɩt me tɩ d kɩs sɩd tɩ yaa a Zezi la Mesi ning b sẽn da gũudã.

B togsa a rogmã la a yãadmẽ yɛla

6. Wãn-wãn la Sɩngr 49:10 goamã pids-yã?

⁶ B pĩnd n togsame tɩ Mesi wã na n yɩɩ Zida buudã neda. Nand t’a Zakoob maan yõore, a ninga a kom-dibli wã barka. A yeela a Zida woto: “Naam dasaar ka na n bas a Zida ye. La naam kãnd ka na n yi yẽ naoã tẽngr ye, hal tɩ sẽn so-a bãmbã wa. Yaa bãmb la nebã na n sake.” (Sɩng. 49:10) Zʋɩf rãmbã karen-saam-dãmb ra sɩng n tẽedame tɩ gom-kãensã a Zakoob sẽn yeel a Zida wã gomda Mesi wã yelle. La a gomdã võor yaa bõe? A Zakoob sẽn gom naam dasaar la naam kãnd yellã, wilgdame t’a gomda ned sẽn tar sor n na n wa yɩ nebã naab yelle. Dẽnd a gomdã wilgdame tɩ rĩm ning sẽn tar sor n na n wa soog nebã na n yɩɩ Zida buudã neda. La tẽng zug ka, yaa rĩm a Davɩɩd n yɩ pipi rĩm sẽn yaa Zida buudã neda, t’a Sedesias yɩ yaoolem dĩm sẽn yaa bu-kãngã neda. La a Zakoob bãngr-gomdã wilgdame me tɩ rĩm a to n da na n wa reeg naamã a Sedesias loogr poore, n pa zaoorẽ wã wakat fãa yĩnga. Wẽnnaam yeela a Sedesias tɩ rĩm kãng la ned ning ‘sẽn so-a noorã.’ (Eze. 21:31, 32) Nand tɩ b rog a Zezi, malɛk a Gabriyɛll yeela a Maari woto: “Wẽnnaam na n kõo yẽ a yaab a Davɩɩd naam. Yẽ na n sooga a Zakoob buudã wakat fãa la a soolem ka na n sɛ abada.” (Luk 1:32, 33) A Zezi yɩɩ Zida buudã neda, la a Davɩɩd yagenga. A Davɩɩd yagensã sʋk me, yaa a Zezi a ye tãa bal la Wẽnnaam yeel t’a na n yɩɩ rĩma. Dẽnd rĩm ning sẽn da segd n wa rɩ naam wakat fãa wã yaa a Zezi Kirist.—Mat. 1:1-3, 6; Luk 3:23, 31-34.

7. Wãn to la bãngr-gomd ning sẽn gomd Mesi wã rogem yellã pids-yã?

⁷ Mesi wã ra na n doga Betlehɛm tẽngã. A Miise yeela woto: “Efrata Betlehɛm, fo nebã yaa buud sẽn yaa bilf Zida buudã sʋka; la mam na n kɩtame tɩ Israɛll naabã yi f pʋgẽ. A buudã sɩnga hal kʋdemd wakate.” (Mii. 5:1) Gom-kãensã wilgdame tɩ Mesi wã ra na n doga Betlehɛm, sẽn yaa Zida tẽng a yembr b sẽn da boond me tɩ Efrata wã. La a Zezi ma a Maari ne a sɩd a Zozɛf yaool n da bee Nazarɛt sẽn yaa Zida tẽng a to wã. A Zezi rogmã sẽn wa n kolgã, Rom naabã kõo noor tɩ ned kam fãa leb a ba-yir tɩ b sõd nin-buiidã. Rẽ yɩɩ sabab t’a Maari ne a Zozɛf leb Betlehɛm, t’a Maari tɩ rog beenẽ. (Mat. 2:1, 5, 6) Woto n kɩt t’a Zezi rog zĩig ning bãngr-gomdã sẽn da pĩnd n wilgã takɩ!

8, 9. Bõe me la b ra togs Mesi wã rogem wɛɛngẽ, la a rogmã poore, bõe n da na n maane?

 ⁸ B pĩnd n togsame tɩ pʋg-sad sẽn pa mi rao n da na n dog Mesi wã. (Karm-y Ezai 7:14.) Vɛrse wã yetame tɩ pa-kuil n da na n dog bi-ribla. Wẽnnaam vʋʋsem sõngã kɩtame t’a Matɩe wilg t’a Zezi rogmã sɩd yɩɩ wa Ezai 7:14 sẽn wilgã. Evãnzill gʋlsdb a Matɩe ne a Luk yeelame t’a Maari sẽn wa n na n dɩk pʋgã t’a ra nan pa mi raoa, la tɩ tũu ne Wẽnnaam vʋʋsem sõngã.—Mat. 1:18-25; Luk 1:26-35.

⁹ Mesi wã rogem poore, kom-bõoneg la b ra na n kʋ. Yell a woto buud n zĩnd yʋʋm kobs sẽn deng Mesi wã rogem. Ezipt rĩm a Faraõ ra wa n yiisa noor n yeel tɩ Hebre ned sã n dog bi-ribl fãa, bɩ b lob biigã Nill kʋɩlgã pʋgẽ. (Yik. 1:22) La Zeremi 31:15, 16 pʋgẽ, b gomda a ‘Rasɛll sẽn yãbd a kambã yĩng’ yelle, bɛɛb sẽn wa n yõg-b n loog yĩnga. B yeelame tɩ nebã wʋma a kelemsã hal baa Rama. Rama yaool n da be Bẽnzame tẽngã sẽn be Zerizalɛm nug rɩtgã. A Matɩe yeelame tɩ rẽ pidsa wakat ning a Herood sẽn kõ noor tɩ b kʋ Betlehɛm la a tẽng-kɩremsã kom-dibli nins faa sẽn zems yʋʋm a yiib la sẽn pa ta rẽ wã. (Karm-y Matɩe 2:16-18.) Tags-y n ges-y nebã sũ-sãoong sẽn yɩ to-to!

10. Wilg-y sẽn yɩ to-to tɩ Oze 11:1 goamã pidsã.

¹⁰ B ra na n kɩtame tɩ Mesi wã yi Ezipti. (Oze 11:1) Sẽn na yɩl tɩ rĩm a Herood ra paam n kʋ a Zezi, malɛk n yeel a Zozɛf ne a Maari tɩ b rɩk-a n yi Israɛlle, n zoe n kẽng Ezipti. B paa be n tãag a Herood kũum. Rẽ poore, a Zozɛf talla a Zezi n leb Israɛlle, t’a Zeova sẽn da yeel a Oze bũmb ningã pidsi. A ra yeel-a-la woto: “Mam boola m biigã t’a yi Ezipt.” (Mat. 2:13-15) Vẽenega, pa a Zezi n kɩt tɩ bũmb nins sẽn zĩnd a rogmã sasa la a yãadmẽ wã yɩ wa b sẽn da togsã ye.

Mesi wã sɩnga a tʋʋmdã!

11. Ãnd n maneg sorã Mesi wã waoong yĩnga?

¹¹ Koe-moond n da na n maneg sor Mesi wã yĩnga. A Malaki pĩnd n togsame tɩ ned n da na n deng taoor n maneg sor Mesi wã waoong yĩnga. Koe-moondã ra segd n sõnga nebã tɩ b segl b mense, tɩ Mesi wã sã n wa bɩ b tõog n sak-a. A Malaki boola nin-kãng soab tɩ no-rɛɛs a Eli. (Karm-y Malaki 3:23, 24.) A Zezi yeelame tɩ yɩɩ a Zãmbatiis la Eli ning sẽn da tog n wa wã. (Mat. 11:12-14) Sɩd me, a Mark yeelame t’a Zãmbatiis wa n manega sorã. Sɩd yaa woto la no-rɛɛs a Ezai sẽn da togsã. (Ezai 40:3; Mark 1:1-4) Pa a Zezi n yeel a Zãmbatiis t’a maneg sorã a yĩng ye. Yaa Wẽnnaam n kɩt tɩ yɩ woto, sẽn na yɩl tɩ nin-buiidã tõog n bãng Mesi wã sẽn da na n yɩ ned ningã. Dẽnd Wẽnnaam n yãk a Zãmbatiis t’a tʋm tʋʋm kãngã sẽn wõnd a Eli tʋʋmdã, sẽn na yɩl tɩ nebã segl b mens n sak Mesi wã.

12. Tʋʋm-bʋg la Wẽnnaam bobl Mesi wã?

¹² Wẽnnaam da na n bobla Mesi wã tʋʋmd sẽn pa wõnd a taaba. Daar a yembre, a Zezi ra wa n bee karen-doog pʋgẽ Nazarɛt sẽn yaa tẽng ningẽ b sẽn wub-a wã. Baraare, a Zezi paka seb-pindem n karem a Ezai sebrã zĩig a yembre. Be, b yeta woto: “Zusoabã sɩɩg bee mam zugu. Tɩ bõe, bãmb kõo maam pãng tɩ m moon koe-noog naong rãmb sʋka. Bãmb tʋma maam tɩ m bels sũ-sãoong rãmba, la m moon koɛɛg tɩ yembs paam fãagre, tɩ zoens paam b nini, la m kõ namsdbã lohorem, la m moon Zusoabã bark wakat koɛɛga.” Dẽ poore, a Zezi wilgame tɩ yaa yẽ yell la a Ezai sẽn gomã. Sɩd me, a sẽn yaa Mesi wã yĩnga, a yeela nebã: “Gʋlsg sõng kãngã yãmb sẽn wʋm masã wã pidsa rũndã.”—Luk 4:16-21.

13. Bõe la a Ezai pĩnd n togs a Zezi koe-moonegã wɛɛngẽ?

¹³ B ra togsame tɩ Mesi wã na n moona koɛɛgã Galile. A Ezai ra togsa bãngr-gomd “Zabulõ” ne “Neftali” la “Galile bu-zẽmsã tẽngã” zug n yeele: “Neb nins sẽn da kẽnd lik pʋgẽ wã yãa vẽenem kãsenga. Vẽenem yãgame n gũbg neb nins sẽn da zĩ lik bida pʋgẽ wã.” (Ezai 8:23; 9:1) Sɩd me, a Zezi  sɩnga a koe-moonegã Kapɛrnaum sẽn be Galile wã. A moona koɛɛgã Zabulõ la Neftali soolmẽ wã me. A Zezi zãmsa soolem kãensã nebã sɩd ning sẽn be Wẽnnaam Gomdã pʋgẽ n wõnd vẽenem kãseng sẽn yãgdã, n sõng-ba. (Mat. 4:12-16) Yaa Galile la a Zezi sẽn sõs ne nebã tãngã zugã. Yaa be la a sẽn yãk a tʋm-tʋmdbã. Leb n yaa be la a maan a pipi yel-solemdã. A vʋʋgrã poore, yɩɩ be me la a sẽn vẽneg a meng tɩ sẽn yɩɩd a karen-biis 500 yã-a wã. (Mat. 5:1–7:27; 28:16-20; Mark 3:13, 14; Zã 2:8-11; 1 Kor. 15:6) Dẽnd a Zezi sẽn moon koɛɛgã “Zabulõ tẽngã ne Neftali tẽngã,” a pidsa a Ezai bãngr-gomdã. Sẽn paase, a Zezi moona Rĩungã koe-noog Israɛll tẽns a taab pʋsẽ.

Bãngr-goam a taaba

14. Wãn to la Yɩɩl Sõamyã 78:2 wã pids-yã?

¹⁴ Mesi wã ra na n tũnuga ne kibay la yel-bũn n zãms nebã. Yɩɩl-gʋlsd a Azaf ra yeela woto: “Mam yaagda m noor n wẽed yel-bũna.” (Yɩɩl 78:2) A Matɩe wilga gom-kãngã sẽn pids to-to. A Zezi koe-moonegã pʋgẽ, a sɩd ra tũnugda ne kibay la yel-bũn n zãmsd nebã. Wala makre, a ra wẽe siil-bil yel-bũnd la rabɩll yel-bũndi, n na n sõng nebã tɩ b bãng Wẽnnaam Rĩungã sẽn yaa a soaba. A Matɩe sẽn wa n gom rẽ yellã poore, a paasa woto: “A Zezi goma ne kʋʋngã ne yel-bũna, la b ka gom ne bãmba, sã n ka ne yel-bũnd ye, tɩ Wẽnnaam no-rɛɛsã sẽn da togsã paam pidsgu, sẽn yeele: ‘Mam na n yaaga m noor n wẽ yel-bũna. Mam na n togsa bũmb nins sẽn solg hal dũniyã naaneg wakatã.’” (Mat. 13:31-35) Kibayã la yel-bũnã ra kɩtdame t’a Zezi tõogd n sõngd neb wʋsg tɩ b bãngd a Zeova la a raabã sõma.

15. Wilg-y Ezai 53:4 goamã sẽn pids to-to.

¹⁵ Mesi wã ra na n maaga neb bãase. A Ezai ra togsa woto: “Sɩda, bãmb deega tõnd toodo, la b zɩɩ tõnd sũ-sãoongo.” (Ezai 53:4) A Pɩɛɛr pagã ma sẽn da wa n ka laafɩ, a Zezi maana yel-solemd t’a yĩnsã sigi. Rẽ poore, nebã talla bãad rãmb a taab n wa a Pɩɛɛr zakẽ wã t’a Zezi maag-ba. A Matɩe yeelame tɩ woto pidsa a Ezai gomd ning sẽn yeel tɩ “bãmb deega tõnd yĩns toodo, la b zɩɩ tõnd bãasã.” (Mat. 8:14-17) La pa baraar bal la a Zezi maag bãad rãmb ye.

16. Bõe la tʋm-tʋmd a Zã yeel tɩ wilgdẽ tɩ Ezai 53:1 wã gomda a Zezi yelle?

¹⁶ Baa a Zezi sẽn da maand neerã, wʋsg pa sak n deeg tɩ yẽ la Mesi wã ye. (Karm-y Ezai 53:1.) Tʋm-tʋmd a Zã yeelame tɩ bãngr-gom-kãngã pidsame. A yeela woto: “Baa b sẽn da maan bõn-bãn wʋsg bãmb sʋkã, b kell n ka tẽ bãmb ye, tɩ Wẽnnaam no-rɛɛs a Ezai koɛɛgã pidsi, yẽ sẽn yeele: ‘Zusoaba, ãnda n tẽ tõnd koɛɛga? La Zusoabã wilga ãnda rãmb b pãnga?’” (Zã 12:37, 38) Yʋʋm wʋsg poor menga, tʋm-tʋmd a Poll sẽn wa n moond koe-noogã, neb wʋsg ra ket n pa tẽed t’a Zezi n yaa Mesi wã ye.—Rom 10:16, 17.

17. Wãn to la Yɩɩl Sõamyã 69:5 goamã pids-yã?

¹⁷ B ra na n kisga Mesi wã zaalem. (Yɩɩl 69:5) A Zezi ra yeela woto: “Mam sã n da ka maan tʋʋm nins ned a to sẽn ka maan bãmb sʋkã, bãmb da ka tar yel-wẽn ye. La masã bãmb yãame la b kisga maam ne m Ba. La a yɩɩ woto tɩ goam nins sẽn gʋls bãmb tõog pʋgẽ wã pidsi: ‘Bãmb kisga maam zaalem bala.’” (Zã 15:24, 25) Yaa Biiblã sɛb nins fãa b sẽn da tar wakat kãngã la b sẽn bool ka tɩ “tõogã.” (Zã 10:34; 12:34) D sã n karemd evãnzill dãmbã, d sɩd yãtame tɩ neb wʋsg kisga a Zezi. Sẽn yɩɩd fãa, zʋɩf rãmbã tũudum taoor dãmbã. Sɩd me a Zezi ra yeela woto: “Dũniyã ka tõe n kisg yãmb ye, la a kisgda maam, mam sẽn kɩt kaset t’a tʋʋmã yaa wẽnsã yĩnga.”—Zã 7:7.

18. Bõe yell la d na n gom sõsg ning sẽn pʋgdã pʋgẽ?

¹⁸ A Zezi wakatẽ wã, a karen-biisã ra kɩsa sɩd t’a yaa Mesi wã. B ra miime t’a Zezi pidsa bãngr-goam nins sẽn da gomd Mesi wã yellã fãa. (Mat. 16:16) Sõs-kãngã pʋgẽ, d yãame tɩ  bãngr-goam nins sẽn da gomd a Zezi rogmã la a yãadmẽ yɛl yellã n paas a koe-moonegã yellã fãa pidsame. La Biiblã bãngr-goam a taab me n wilgd Mesi wã sẽn sɩd yaa a soabã. Sõsg ning sẽn pʋgdã pʋgẽ, d na n wɛgsa bãngr-gom-kãense. D sã n bʋgs b zug neere, na n sõng-d lame tɩ d maneg n kɩs sɩd tɩ yaa a Zezi la Mesi ning a Zeova sẽn yãkã.

[Tẽngr note]

Y na n leokame tɩ bõe?

• Wilg-y bãngr-goam kẽer sẽn gomd a Zezi rogmã yelle.

• Ãnda n maneg sor Mesi wã yĩnga?

• Wãn to la bãngr-goam nins sẽn be Ezai sak 53 wã pids-yã?

[Zãmsgã sogsgã]