A Zeova yaa mam pʋɩɩre
A Zeova yaa mam pʋɩɩre
“Yaa maam la fo pʋɩɩre, la f paoong Israɛll nebã sʋka.”—SÕD. 18:20.
1, 2. a) A Zeova sẽn wa n kɩt tɩ b pʋɩ tẽngã n kõ Israɛll buud toor-toorã, a maana wãn ne Levi buudã? b) Bõe la a pʋlem Levi nebã?
ISRAƐLL nebã sẽn wa n tõog n deeg kãabg tẽngã fãa la balã, a Zozue ne maan-kʋʋdb kãsem a Eleazaar la buudã fãa taoor-dãmbã pʋɩɩ tẽngã, sẽn na yɩl tɩ buud toor-toorã paam b zĩisi. (Sõd. 34:13-29) A Zeova kɩtame tɩ b kõ buudã fãa zĩiga, la b bas Levi buudã. (Zoz. 14:1-5) Bõe yĩng tɩ Levi buudã pa paam zĩig kãabg tẽngã pʋgẽ? A Zeova yĩma b yell bɩ?
2 A Zeova sẽn togs Levi nebã bũmb ningã kɩtdame tɩ d bãng leoorã. Bala a yeela a Aarõ woto: “Yaa maam la fo pʋɩɩre, la f paoong Israɛll nebã sʋka.” (Sõd. 18:20) Ad yaa gomd sẽn sɩd kengd raoodo! A Zeova sã n da yeel yãmb woto, y tagsg na n yɩɩ wãna? Tõe tɩ y na n deng n soka y menga: ‘Mam segd ne Sẽn-ka-to soabã yeel-m woto sɩda?’ Tõe me tɩ y na n dat n bãnga kiris-ned sã n tõe n paamame t’a Zeova yɩ a pʋɩɩre, baa ne a sẽn yaa ninsaal n pa zems-zãngã. Sogs-kãensã leoorã bãngr tara yõodo, bala d sã n paam t’a Zeova yeel tõnd ne neb nins d sẽn nongã woto, noom-d lame. Bɩ d reng n bao n bãng a Zeova gomdã võore. Rẽ na n sõng-d lame tɩ d bãng wãn to la a Zeova tõe n yɩ kiris-nebã pʋɩɩr rũndã-rũndã. Sẽn yɩɩd fãa, d na n wa tɩ vɩɩmda saasẽ tɩ yaa tẽngã sẽn na n wa lebg arzãna zug me, d na n bãnga wãn to la a Zeova tõe n yɩ d ned kam fãa pʋɩɩre.
A Zeova gesa Levi nebã yelle
3. Bõe n kɩt tɩ Wẽnnaam wa yãk Levi buudã tɩ b na n tʋmd a tʋʋmã?
3 Nand t’a Zeova kõ Israɛll nebã tõogã, ra yaa zak-soab fãa n da yaa a zakã maan-kʋʋda. La a Zeova sẽn wa n kõt tõogã, a yãka Levi buudã neb kẽer tɩ b lebg maan-kʋʋdba, tɩ kẽer sõngd ne wẽnd-doogã tʋʋm a taaba. Bõe yĩng t’a maan woto? A Zeova yeelame tɩ yẽ sẽn wa n na n sãam Ezipt rãmbã kom-dẽemsã, a rɩka Israɛll kom-dẽemsã n “kõ a menga.” Woto rat n yeelame t’a welg-b-la toor a tʋʋmdã yĩnga. La a Zeova yãka yam n na n dɩk Levi nebã tɩ b “led Israɛll nebã kom-dẽemsã.” Sẽn mik tɩ Israɛll buud a taabã nebã pipi kom-dibli wã sõor da yɩɩda Levi buudã rapã yĩnga, a Zeova kɩtame tɩ b yao wanzuri tɩ lede. (Sõd. 3:11-13, 41, 46, 47) Rẽ tɛka, Levi nebã ra tõe n sɩnga tʋʋmd ning Wẽnnaam sẽn bobl-bã.
4, 5. a) Wẽnnaam sẽn yeel Levi nebã tɩ yẽ la b pʋɩɩrã võor yaa bõe? b) Wãn to la Wẽnnaam ges Levi nebã yelle?
4 A Zeova sẽn yeel tɩ yẽ la Levi buudã pʋɩɩrã rat n yeelame tɩ bõe? Wall t’a kõ-b zĩig kãabg tẽngã pʋgẽ wã, a kõ-b-la bũmb a to sẽn tar yõod wʋsgo. A bobl-b-la tʋʋmde. Ra yaa “Wẽnnaam maandã maaneg” la bãmb pʋɩɩre. (Zoz. 18:7) Sõdb sak 18 soabã goam sõngd-d lame tɩ d bãng tɩ b ra na n ket n paamda bũmb nins fãa sẽn yaa tɩlae ne-bã. (Karm-y Sõdb 18:19, 21, 24.) Wẽnnaam yeelame t’a na n ‘kõo Levi nebã piig-pʋɩɩr nins fãa Israɛll nebã sẽn yãkdã tɩ b sooge, b sẽn tʋmd sɛk-roogã tʋʋmdã yĩnga.’ Woto rat n yeelame tɩ tẽngã koodã n paas yir-dũmsã sẽn da rogdã fãa sã n pʋɩ zĩis piiga, a ye wã yaa bãmb n so. La Levi nebã me ra segd n pʋɩɩ “bũmb nins sẽn yaa sõma wã” fãa b sẽn da paamdã zĩis piiga, n yãk a ye n kõ maan-kʋʋdbã. * (Sõd. 18:25-29) Maan-kʋʋdbã leb n da reegda “kũun-sõma nins” Israɛll nebã sẽn da wat n kõt wẽnd-doogẽ wã. Woto kɩtame tɩ b ra sɩd tõe n teeg a Zeova, n miẽ t’a na n gesa b yelle.
5 Wõnda Israɛll nebã ra kõta piig-pʋɩɩr a to. Kibs rãmb nins b sẽn da maand yʋʋmd-yʋʋmdã sasa, ra yaa piig-pʋɩɩr kãng la b ra rɩta. (Tõo. 14:22-27) La b ra maanda bũmb a to me ne piig-pʋɩɩr kãngã. Yʋʋm a yopoe fãa, b ra maanda vʋʋsg yʋʋmde, tɩ yʋʋm a tãab la yʋʋm a yoob yʋʋmd fãa, bɩ b rɩkd piig-pʋɩɩr kãng n sõngd naong rãmbã la Levi nebã. Bõe yĩng tɩ Levi nebã me ra paamd sõng-kãngã? Yaa b ‘sẽn ka paam pʋɩɩr’ tẽngã pʋgẽ wã yĩnga.—Tõo. 14:28, 29.
6. Baa Levi nebã sẽn pa paam pʋɩɩr tẽngã pʋgẽ wã, b maana wãn n paam zagse?
6 Levi nebã sẽn da pa tar zĩigã, b maana wãn n paam zagse? Wẽnnaam gesa rẽ me yelle. A kɩtame tɩ b kõ-b tẽns 48 ne rũms wãbneg zĩisi. Tẽns a yoob nins b sẽn da yãk tɩ yaa zĩ-solgdsã ra naaga tẽn-kãense. (Sõd. 35:6-8) Dẽnd Levi nebã sã n da wa pa tʋmd wẽnd-doogẽ wã, b ra bee b zagsẽ. A Zeova ra geta neb nins sẽn tʋmd a tʋʋmã yell hal sõma. La woto wã, bõe la Levi nebã ra tõe n maan n wilg tɩ b miime t’a Zeova n yaa bãmb pʋɩɩre? B ra segd n kɩsa sɩd t’a Zeova tõe n gesame tɩ b paam bũmb nins sẽn yaa tɩlae ne-bã, la t’a sɩd rata rẽ.
7. A Zeova sẽn da yaa Levi nebã pʋɩɩrã yĩnga, ra yaa tɩlae tɩ b maan bõe?
7 Tõogã ra pa wilg tɩ Israɛll ned sã n pa kõ piig-pʋɩɩrã, b segd n sɩbg-a lame ye. La b sã n da kɩɩs a Zeova noorã n pa kõ piig-pʋɩɩrã, maan-kʋʋdbã la Levi neb a taabã ra namsdame. Yɩɩ woto a Nehemi wakatẽ wã. Rẽ kɩtame tɩ Levi nebã bas wẽnd-doogã tʋʋm n tɩ tʋmd b pʋtẽ. (Karm-y Nehemi 13:10.) Dẽnd yaa nebã sã n da sakd a Zeova noyã bal la Levi nebã ra paamd bũmb nins sẽn yaa tɩlae ne-bã. La maan-kʋʋdbã ne Levi nebã me ra segd n talla tẽeb ne a Zeova, la b kɩs sɩd t’a sẽn get b yell to-to wã yaa sõma.
Levi neb sẽn sɩd ges a Zeova wa b pʋɩɩre
8. Bõe n da sãamd Levi ned a Azaf sũuri?
8 Yaa sɩd t’a Zeova yeelame tɩ yaa yẽ la Levi buudã tõr pʋɩɩre. La Levi neb kẽer sẽn da tar zood sõma ne a Zeova la b teeg-a yĩnga, b yeela woto: “Zusoabã yaa mam pʋɩɩre.” (Wiis. 3:24) Wala makre, Biiblã wilgame t’a Azaf sẽn da yaa yɩɩn-yɩɩnd la yɩɩn-gʋlsdã yeelame t’a Zeova yaa yẽ pʋɩɩre. D pa mi sã n yaa Azaf ning sẽn yɩ yɩɩn-yɩɩndbã taoor soab rĩm a Davɩɩd wakatẽ wã, bɩ sã n yaa a biig bɩ a yageng la b sẽn bool woto wã ye. (1 Kib. 6:16-28) Yɩɩl Sõamyã 73 soabã wilgame tɩ Azaf kãng ra maanda sũ-kiir ne nin-wẽnsã, n da pa wʋmd sẽn wõnd b vɩɩmã yaa sõma wã võor ye. A pʋd n wa n yeela woto: “Yaa zaalem tɩ mam zĩnd ne pʋ-peelem n nudg m nus ne bʋʋm.” Wõnda wakat kãng t’a Azaf yĩmame tɩ tʋʋmd ning a Zeova sẽn bobl-a wã yaa zu-zẽkr tʋʋmde. A yĩmame t’a Zeova ra yaa yẽ pʋɩɩre. Yellã nams-a lame n tãag wakat ning a sẽn wa n “kẽng Wẽnnaam sɛk-zĩigẽ wã.”—Yɩɩl 73:2, 3, 12, 13, 17.
9, 10. Bõe yĩng t’a Azaf tõog n yeel tɩ Wẽnnaam yaa yẽ “pʋɩɩr wakat fãa” yĩnga?
9 A Azaf sẽn ta sɛk-zĩigẽ wã, a tagsgã sɩnga toeengo. A buud zoe n paama yãmb bɩ? Tõe tɩ wakat n zĩnd tɩ yãmb me yĩm tɩ y sẽn paam n maand a Zeova raabã yaa zu-zẽkr bũmbu, n bas n tagsd bũmb nins y sẽn da tõe n paamã yelle. La Biiblã kareng la tigissã kẽnd kɩtame tɩ y toeem yam, tɩ y tagsgã le zems ne a Zeova tagsgã. A Azaf bʋgsa bũmb ning sẽn na n wa paam nin-wẽnsã zugu. A tagsa bark nins a sẽn paamde, a sẽn maand a Zeova raabã yĩngã. A wa n baas n yeelame t’a Zeova na n gãda a nug-rɩtgo, n wilg-a sore. Rẽ poore, a yeela a Zeova woto: “Mam ka maand sũ-noog dũniyã pʋgẽ tɩ sã n ka ne yãmb ye.” (Yɩɩl 73:23, 25) Wakat kãng la a yeel t’a Zeova yaa yẽ pʋɩɩre. (Karm-y Yɩɩl Sõamyã 73:26.) A Azaf yeela woto: “Mam yĩnsã ne m sũurã lʋɩɩ bõaga.” La a paasame tɩ Wẽnnaam yaa yẽ “pʋɩɩr wakat fãa.” A ra miime t’a paama yʋ-noog a Zeova nengẽ tɩ kɩt t’a na n ket n tẽr a yelle, la t’a pa na n yĩm a sẽn maan a raabã ne a sũur fãa wã ye. (Koɛ. 7:1) Ad woto sɩd segd n kenga a Azaf raood hal wʋsgo! A yeelame: “Ne maam, mam sã n kolg Wẽnnaam n yaa sõma. Mam geta Zusoabã sẽn yaa Soaalã tɩ b yɩ m zĩ-lilldga.”—Yɩɩl 73:28.
10 La pa a Azaf sẽn da yaa Levi ned tɩ kɩt t’a paamd bũmb ninsã yĩng bal la a sẽn yeel t’a Zeova yaa yẽ pʋɩɩrã ye. Sẽn yɩɩd fãa, yaa a sẽn da paam n tʋmd a Zeova sẽn yaa Sẽn-ka-to soabã tʋʋmã, n paas zood ning a sẽn da tar ne-a wã yell la a ra tagsda. (Zak 2:21-23) Sẽn na yɩl n tõog n kell n yɩ a Zeova zoa, a Azaf ra segd n kell n tẽ-a lame la a kɩs-a sɩda. A ra segd n kɩsa sɩd t’a sã n kell n sak a Zeova, a na n wa kɩtame t’a paam vɩɩm sẽn tar bark beoog-daare. Yãmb me tõe n kɩsa sɩd t’a Zeova na n wa maana woto n kõ-yã.
11. Sok-bʋg la a Zeremi sok a Zeova, la wãn to la a Zeova leok-a?
11 Levi buudã ned a to me sẽn da yeel t’a Zeova yaa yẽ pʋɩɩr yaa no-rɛɛs a Zeremi. Bɩ d ges bũmb ning sẽn kɩt t’a wa yeel woto wã. A Zeremi ra vɩɩ Anatot sẽn da yaa Levi nebã tẽng sẽn pẽ Zerizalɛmmã. (Zer. 1:1) Wakat n zĩnd t’a Zeremi me sok a Zeova n na n bãng bũmb ning sẽn kɩt tɩ nin-wẽnsã vɩɩm yaa sõma tɩ nin-tɩrsã yaool n namsdẽ wã. (Zer. 12:1) Yaa a sẽn yã bũmb nins sẽn da maand Zerizalɛm la Zida pʋgẽ wã n kɩt t’a sũur sãam t’a sok woto wã. La a Zeremi ra miime t’a Zeova yaa tɩrga. A leoka a Zeremi sokrã, n kɩt t’a moon koɛɛg n wilg tɩ sãoong n wate. Sẽn paase, a Zeova kɩtame t’a sẽn yeel bũmb ningã sɩd pidsi. Neb nins sẽn sak koɛɛgã põsame. La nin-wẽnsã pa kelg keoogrã, tɩ kɩt tɩ b paam sãoongo.—Zer. 21:9.
12, 13. a) Bõe n kɩt t’a Zeremi wa yeel t’a ‘Zeova yaa yẽ pʋɩɩre?’ La bõe la a maan-yã? b) Bõe yĩng tɩ Israɛll buud a taabã neb me ra segd n maan wa a Zeremi?
12 Rẽ poore, a Zeremi sẽn wa n ges a ba-yirã sẽn sãam to-to n lebg ra-boogã, a sũurã sãama wʋsg hal tɩ yaa wa a kẽnda lik pʋgẽ. A yeelame tɩ yaa wa a Zeova zĩndg-a-la lik pʋgẽ wa “neb sẽn ki daar zãra.” (Wiis. 1:1, 16; 3:6) A Zeremi ra pĩnd n keooga Israɛll nebã sẽn yaa tõatbã tɩ b lebg n sak b saasẽ Ba wã. La b wẽnemã ra looga noor hal t’a Zeova ges tɩ lebga tɩlae t’a sãam Zerizalɛm ne Zida. Woto sãama a Zeremi sũuri, baa ne a sẽn da maand sẽn yaa tɩrgã. La ne a Zeremi sũurã sẽn sãam wʋsgã, a baas n tẽegame tɩ yaa a Zeova “nonglmã sẽn ka sɛtã” yĩng la bãmb sẽn ket n vɩyã. A yeelame t’a Zeova ‘nimbãan-zoeerã lebgda paals yibeoog fãa.’ Yaa rẽ poor la a Zeremi yeel t’a ‘Zeova yaa yẽ pʋɩɩre.’ Bala, a ra ket n tara bũmb sẽn yaa zu-zẽkr bũmbu. A ra ket n yaa a Zeova no-rɛɛsa.—Karm-y Wiisg 3:22-24.
13 Yʋʋm 70 pʋgẽ, Israɛll tẽngã kell n yɩɩ ra-boogo. (Zer. 25:11) La a Zeremi sẽn yeel t’a ‘Zeova yaa yẽ pʋɩɩrã’ wilgdame t’a kɩsa sɩd t’a na n zoee b nimbãanega. Rẽ kɩtame t’a ra ‘tẽed-a,’ rat n yeel t’a ra basa a yam n gũud a Zeova. Sãoongã kɩtame tɩ Israɛll buud a taabã ra pa le tar b zĩisã ye. Rẽnd wa a Zeremi, bãmb me ra segd n gũu a Zeova. Yaa yẽ bal la b ra tõe n teege. Yʋʋm 70 wã loogr poore, b leba b ba-yirã, n paam sor n na n le tɩ tũud a Zeova beenẽ.—2 Kib. 36:20-23.
Neb sẽn pa Levi neb me n paam t’a Zeova yɩ b pʋɩɩre
14, 15. Levi nebã sẽn yãk b toogo, ãnda me n paam tɩ Wẽnnaam yɩ a pʋɩɩre, la bõe yĩnga?
14 A Azaf ne a Zeremi fãa ra yaa Levi buudã neba. La ra pa Levi nebã bal n da paam n tʋmd a Zeova tʋʋmã sẽn yaa zu-zẽkr bũmbã ye. A Davɩɩd me ra yeelame tɩ Wẽnnaam la yẽ “pʋɩɩr dũniyã pʋgẽ zĩig ning nin-vɩɩs sẽn be wã.” (Karm-y Yɩɩl Sõamyã 142:2, 6.) A Davɩɩd sẽn wa n gʋlsd yɩɩn-kãnga wã t’a nan pa reeg naamã ye. A ra pa be na-yirã me ye. A ra pa tar doog n gãe meng ye. A bɛɛb n da rigd-a t’a zoe n tɩ solg tãng bokẽ. La pa vugr bal la yɩ tɩlae ne a Davɩɩd t’a tɩ solg tãng bokẽ ye. Wala makre, a ra tɩ solga tãng bokẽ, Adullam noorẽ. A ra le wa n zoee n kẽnga En-Gedi we-raoogẽ wã, n tɩ solg tãng bokẽ. Wõnda yaa tãn-kãensã a ye bok pʋgẽ la a zĩnd n gʋls Yɩɩl Sõamyã 142 soabã.
15 Sã n yɩɩ woto, rẽnd yaa rĩm a Sayull sẽn wa n baood-a n na n kʋ wã sasa la a gʋls yɩɩn-kãngã. A ra miime t’a sã n solg tãn-kãensã bogdẽ wã, a paoong ra na n yɩɩ toogo. (1 Sãm. 22:1, 4) A Davɩɩd sẽn wa n tɩ be be wã, a tog n da tagsdame t’a pa tar ned sẽn na n kogl-a ye. (Yɩɩl 142:5) Yaa wakat kãng la a Davɩɩd kos Wẽnnaam sõngre.
16, 17. a) Yel-bʋs n da tõe n kɩt t’a Davɩɩd tags t’a pa tar sõngda? b) Ãnda bal la a Davɩɩd ra tõe n kos sõngre?
16 Nand t’a Davɩɩd gʋls Yɩɩl Sõamyã 142 soabã, tõe t’a ra wʋma bũmb ning sẽn paam maan-kʋʋdb kãsem a Ahimelɛkã. A ra sõnga a Davɩɩde, n da pa miẽ t’a Sayull baood-a lame t’a zoetẽ ye. Rĩm a Sayull sẽn da maand sũ-kiir ne a Davɩɩdã sẽn bãngã, a yeelame tɩ b kʋ a Ahimelɛk ne a zakã rãmba. (1 Sãm. 22:11, 17-19) A Davɩɩd tagsame tɩ yaa yẽ yĩng la b sẽn kʋ-bã. Yaa wa yaa yẽ n kʋ maan-kʋʋd ning sẽn da sõng-a wã. Sã n da yaa yãmba, y ra na n ninga y meng taal bɩ? Yellã meng yaa t’a Sayull ra ket n baood-a lame.
17 A Ahimelɛk kũumã poore, pa yã n kaoos la no-rɛɛs a Sãmwɛll me maan kaalem ye. Yaool n yaa yẽ la Wẽnnaam kɩt t’a zae a Davɩɩd t’a na n lebg rĩmã. (1 Sãm. 25:1) Tõe tɩ woto kɩtame t’a Davɩɩd sũurã maneg n sãam t’a tagsdẽ t’a pa tar sõngd ye. La a ra miime t’a Zeova na n sõng-a lame. Yaa sɩd t’a Zeova ra pa bobl-a tʋʋmd ning Levi nebã sẽn da tʋmdã ye. La a yãk-a lame t’a ra na n wa tʋm tʋʋmd a to. A ra na n wa yɩɩ Wẽnnaam nin-buiidã rĩma. (1 Sãm. 16:1, 13) Woto kɩtame t’a Davɩɩd pelg a pʋg n togs a Zeova bũmb nins fãa sẽn da pak-a wã, la a kell n teeg-a. Yãmb me tõe n paamame t’a Zeova yɩ y pʋɩɩre. Y tõe n teeg-a lame, n ket n tʋmd a tʋʋmdã ne y sũur fãa.
18. Bõe yĩng tɩ d tõe n yeel tɩ neb nins yell d sẽn gomã wilgame t’a Zeova sɩd yaa b pʋɩɩre?
18 Neb nins yell d sẽn gom sõs-kãngã pʋgẽ wã sẽn paam t’a Zeova yɩ b pʋɩɩrã võor yaa bõe? Yaa b sẽn paam t’a bobl-b tʋʋmdã. Sẽn paase, b ra teeg-a lame, n miẽ t’a na n gesa b yelle. Levi buudã nebã, n paas buud a taab neb wala a Davɩɩd tõog n paamame tɩ Wẽnnaam yɩ b pʋɩɩre. La tõnd yẽ? Wãn to la d tõe n yɩ wa bãmba, n paam t’a Zeova yɩ d pʋɩɩre. D na n goma rẽ yell sõsg ning sẽn pʋgdã pʋgẽ.
[Tẽngr note]
^ sull 4 Y sã n dat n bãng n paas bɩ y ges Étude perspicace des Écritures volume 2, seb-neng 655.
Y na n leokame tɩ bõe?
• A Zeova sẽn yeel tɩ yẽ la Levi buudã pʋɩɩrã rat n yeelame tɩ bõe?
• Bõe la a Azafe, a Zeremi la a Davɩɩd maan n wilg t’a Zeova n sɩd yaa b pʋɩɩre?
• Y sã n dat t’a Zeova yɩ y pʋɩɩre, bõe la y segd n maane?
[Zãmsgã sogsgã]
[Goam sẽn tar pãnga, seb-neng 11]
Levi buudã neb pa paam pʋɩɩr kãabg tẽngã pʋgẽ ye. A Zeova n da yaa b pʋɩɩre, bala, b ra paamame t’a bobl-b wẽnd-doogã tʋʋma
[Foto seb-neng 10]
A Zeova sẽn yeel tɩ yẽ la maan-kʋʋdbã la Levi neb a taabã pʋɩɩrã võor yaa bõe?
[Foto seb-neng 12]
Bõe n sõng a Azaf t’a tõog n paam t’a Zeova kell n yɩ a pʋɩɩre?
