Yãmb wilgdame t’a Zeova yaa y pʋɩɩr bɩ?
Yãmb wilgdame t’a Zeova yaa y pʋɩɩr bɩ?
“Bɩ y reng n bao Wẽnnaam soolem ne bãmb tɩrlem, la bõn-kãens fãa na paas yãmba.”—MAT. 6:33.
1, 2. a) Galat dãmb 6:16 pʋgẽ wã, ãnd dãmb la b sẽn bool tɩ “Israɛll sẽn yaa Wẽnnaam dẽndã”? b) Matɩe 19:28 pʋgẽ wã, ãnd dãmb la b sẽn bool tɩ “Israɛll buud piig la a yiibã”?
YÃMB sã n karemd Biiblã n wa yã yʋʋr ning sẽn yaa Israɛllã, bõe n wat y yamẽ? Yaa a Izaak biig a Zakoob Wẽnnaam sẽn wa n toeem a yʋʋrã tɩ lebg a Israɛllã yell la y tagsd bɩ? Bɩ y tagsda a yagensã sẽn wa n lebg buud tɩ b boond-b tɩ Israɛllã yelle? La Biiblã yaool n gomda Israɛll a to me yelle. Yaa b sẽn boond a soab tɩ “Israɛll sẽn yaa Wẽnnaam dẽndã.” Yaa neb 144000 sẽn paam vʋʋsem sõngã zaeeb n na n wa yɩ rĩm dãmb la maan-kʋʋdb saasẽ wã la b sẽn boond woto wã. (Gal. 6:16; Wil. 7:4; 21:12) La Matɩe 19:28 wã pʋgẽ, b gomda Israɛll yelle, t’a võorã yaa toore.
2 Be, a Zezi yeela woto: “Mam yeta yãmb sɩd tɩ bũmb fãa manegr wakat sã n ta, Ninsaal Biigã sẽn na n zĩnd bãmb naam geer zugu, yãmb me sẽn tũ maamã na n zĩnda gɛy piig la a yiib zut n kao Israɛll buud piig la a yiibã bʋʋdo.” Vɛrse kãngã pʋgẽ, yaa neb nins sẽn na n wa vɩɩmd tẽngã sẽn na n lebg arzãnã zug wakat fãa yĩngã la b sẽn bool tɩ “Israɛll buud piig la a yiibã.” Neb 144000 na n yɩɩ nin-kãens bʋ-kaoodb la b maan-kʋʋdba.
3, 4. Mak-sõng-bʋg la sẽn paam-b vʋʋsem sõngã zaeebã kõta?
3 Maan-kʋʋdbã la Levi neb a taabã ra geta b tʋʋmdã wa zu-zẽkr bũmbu. Rũndã-rũndã, sẽn paam-b vʋʋsem sõngã zaeebã me geta tʋʋm nins Wẽnnaam sẽn bobl-bã woto. (Sõd. 18:20) Sẽn paam-b vʋʋsem sõngã zaeebã miime tɩ b pa na n paam pʋɩɩr tẽngã zug ye. Bala, Wilgr 4:10, 11 goamã wilgdame tɩ b na n wa tɩ maanda a Zeova raabã saasẽ, la tɩ b na n naaga a Zezi Kirist n dɩ naam, la b yɩ maan-kʋʋdba.—Eze. 44:28.
4 Tẽng zug ka, sẽn paam-b vʋʋsem sõngã zaeebã sẽn vɩ to-to wã wilgdame t’a Zeova n sɩd yaa b pʋɩɩre. Yaa Wẽnnaam daabã maaneg n tar yõod ne-b n yɩɩda. Tʋm-tʋmd a Pɩɛɛr da yeela woto: “Bɩ y maan yãmb sẽn tõe tɛk n da kong yãmb boolgã ne y tũusgã ye.” (2 Pɩɛ. 1:10) Sẽn zae-bã tũuda a Pɩɛɛr saglgã, n tẽed Kiristã maoong sẽn yɩ rondã, la b tũud Kiristã wakat fãa. B yɛlã la b pãn-tõodã yaa toor-toore. La b ned baa a ye pa baood padeng sẽn na yɩl n da tʋm Wẽnnaam tʋʋmdã wa a sẽn tõe tɛk ye. B pʋd n lʋɩɩsda Wẽnnaam daabã maaneg taoore, n maand b sẽn tõe fãa a tʋʋmdã pʋgẽ. B sẽn maand woto wã, b kõta neb nins sẽn saagd n na n wa vɩɩmd tẽngã zug wakat fãa yĩngã mak-sõngo.
5. Bõe la kiris-ned buud fãa tõe n maan n wilg t’a Zeova la a pʋɩɩre, la bõe yĩng tɩ rẽ maaneg tõe n yɩ toogo?
5 A Zezi yeelame tɩ kiris-neb nins sẽn na n wa tɩ vɩɩmd saasẽ la sẽn na n vɩɩmd-b tẽngã zugã ned kam fãa segd “n kɩɩsa a meng raabo,” la a rɩk a kũum da-luk n tũ yẽ wakat fãa. (Mat. 16:24) Neb milyõ rãmb sẽn saagd n na n wa vɩɩmd tẽngã sẽn na n lebg arzãnã zugã n sɩd maand Wẽnnaam daabã la b tũud Kiristã wa a sẽn yeelã. B pa tʋmd Wẽnnaam tʋʋmdã yaal-yaal ye. B maanda b sẽn tõe fãa. Wʋsg sak n basa yɛl kẽer b sẽn da maand n tõog n lebg wakat fãa so-pakdba. Sãnda modgdame n dɩkd sõngr so-pakrã kiuug bɩ kiis a wãn yʋʋmd fãa. La baa sẽn pa tõe n yɩ-b so-pakdbã modgda wʋsg koe-moonegã pʋgẽ. B rɩkda Maari ning sẽn da pʋdg kaam a Zezi zugã togs-n-taare. A Zezi goma bũmb ning a Maari sẽn maanã yell n yeel woto: ‘A maana maam yel-sõmde. . . . A maana a sẽn tõe.’ (Mark 14:6-8) La sẽn yaa a Sʋɩtãan n so dũniyã yĩngã, tõe n yɩɩ toog ne-d tɩ d maan d sẽn tõeyã fãa. D segd n maoa d pãng tɛka, la d teeg a Zeova ne d sũur fãa. Bɩ d ges d sẽn tõe n maan dẽ to-to zĩis a naas pʋgẽ.
D reng n bao Wẽnnaam soolmã
6. a) Bõe la dũniyã neb maand tɩ wilgdẽ tɩ b pʋɩɩr bee vɩ-kãngã pʋgẽ bala? b) Bõe yĩng tɩ d segd n dɩk a Davɩɩd togs-n-taare?
6 A Zezi yeela a karen-biisã tɩ b reng n bao Wẽnnaam soolmã bɩ a Rĩungã la a tɩrlmã. Dũniyã neb wae n baooda bãmb meng nafr bala. Biiblã goma b yell n yeel tɩ b “pʋɩɩr bee vɩ-kãngã pʋgẽ” bala. (Karm-y Yɩɩl Sõamyã 17:1, 13-15.) Nin-kãensã pa tagsd b Naandã yell ye. Sẽn pak-b yaa mao n paam vɩ-noogo, b zagsã rãmb yell gesgo, la bao paoong n bĩng b kambã. B pʋɩɩr sɩd bee dũni-kãngã pʋgẽ bala. A Davɩɩd yẽ ra pa woto ye. Sẽn da pak-a yaa a tõog n paam yʋ-noog a Zeova nifẽ. A biig a Salomo wa n yeelame tɩ ninsaal buudã fãa sɩd segd n maana woto. (Koɛ. 7:1) Wa a Azafe, a Davɩɩd ra miime tɩ yaa a Zeova zood paoong n tar yõod n yɩɩda. Rẽ kɩtame t’a ra maand Wẽnnaam daabã ne sũ-noogo. Rũndã-rũndã, kiris-neb wʋsg wilgdame tɩ bãmb nifẽ, a Zeova tʋʋmdã tara yõod n yɩɩd b mens tʋʋmã.
7. Tõnd saam-biig a ye sẽn deng n bao Wẽnnaam Rĩungã yĩng kɩtame t’a paam bark bʋgo?
7 D gom saam-biig a Jean-Claude sẽn vɩ Repiblik Sãntrafrikɛnnã yelle. A yaa kãsem soab sẽn kẽ kãadem n tar kamb a tãabo. Sẽn mik tɩ tẽng-kãng pʋgẽ, tʋʋm paoong yaa toogã, neb wʋsg sã n paam tʋʋmde, b maanda b sẽn tõe fãa sẽn na yɩl t’a ra sãam ye. La daar a ye, a Jean-Claude tʋʋmdã taoor soab yeel-a lame tɩ yẽ ratame t’a tʋmd yʋng masã, la t’a na n tʋmda semennã tõre, n sɩngd zaabr 6:30. A Jean-Claude leok-a lame tɩ yẽ sẽn segd n ges t’a zakã rãmb paam sẽn yaa tɩlae ne-bã toor sẽn ka be, a segd n sõng-b lame me tɩ b kell n tall zood sõma ne Wẽnnaam. A paasame t’a tara tʋʋm tigingã pʋgẽ. La tʋʋmdã taoor soab yeel-a-la woto: “F zug sã n yɩ noog tɩ f paam tʋʋmde, f segd n yĩma sẽn ketã fãa, rat n yeel tɩ baa f pagã, f kambã la f zu-loeesã. Lebga f tʋʋmdã yell bal n segd n pak-fo. Woto wã, rẽnda f yãk f sẽn dat-a soaba: F tũudmã wall f tʋʋmdã.” Sã n da yaa yãmba, y maanda wãna? A Jean-Claude ra miime tɩ baa a tʋʋmdã sã n sãame, Wẽnnaam na n gesa a yelle. A ra na n tõog n ket n tʋmda a Zeova tʋʋmdã wʋsgo, t’a Zeova me getẽ t’a zakã rãmb paamd sẽn yaa tɩlae ne-bã. Woto kɩtame tɩ tigisg ning sẽn pʋglã, a bas a tʋʋmdã n kẽnge. Rẽ poore, a ra wa n segend n na n kẽnga tʋʋma, baa a sẽn da pa mi sẽn na n yɩ to-to wã. La wakat kãng bala, ned n bool-a telefõnnẽ, n yeel-a tɩ b riga tʋʋmdã taoor soaba. Tõnd saam-biigã yẽ tʋʋmdã pa sãam ye.
8, 9. Wãn to la d tõe n dɩk maan-kʋʋdbã la Levi neb a taabã togs-n-taar n wilg t’a Zeova la d pʋɩɩre?
8 Tõe tɩ yãmb sʋkã, kẽer zoe n paama yel-kãngã buudu. Tõe tɩ y ra maanda yɩɩr tɩ y tʋʋmdã sã n sãame, y zakã rãmb yell gesg na n yɩɩ toog ne-yã. (1 Tɩm. 5:8) La y zoe n paama zu-loɛɛg a woto buud tɩ y nan pa paam me, sãmbg sẽn ka be, yãmb sẽn vɩɩmd n yã bũmb ninsã kɩtame tɩ y miẽ tɩ Wẽnnaam pa basd neb nins sẽn wilgd tɩ yẽ la b pʋɩɩre, n lʋɩɩsd a raabã maaneg taoorã ye. A Zezi sẽn wa n yeel a karen-biisã tɩ b ‘reng n bao Wẽnnaam Rĩungã,’ a paasame tɩ b sã n maan woto, b na n paas-b-la bũmb ning fãa sẽn yaa tɩlae ne-bã.—Mat. 6:33.
9 Tẽeg-y Levi nebã sẽn da pa paam pʋɩɩr kãabg tẽngã pʋgẽ wã yelle. B tʋʋmd sẽn da yaa sõng nin-buiidã tɩ b tõog n tũ a Zeova wã yĩnga, b ra segd n kɩsa sɩd t’a Zeova yaa b pʋɩɩre, la t’a na n gesame tɩ b paam bũmb ning fãa sẽn yaa tɩlae ne-bã. (Sõd. 18:20) Baa tõnd sẽn pa maand Wẽnnaam daabã wẽnd-doog neb nus sẽn me pʋgẽ wa maan-kʋʋdbã la Levi neb a taabã sẽn da maandã, d tõe n dɩka b togs-n-taare, n kɩs sɩd tɩ Wẽnnaam na n gesa d yelle. Dũni-kãngã saabã sẽn tar kolgrã, d miime tɩ vɩɩmã na n maneg n lebga toog ne neb nins sẽn pa rat n yɩ a Sʋɩtãan dũniyã rẽndã. Woto yĩnga, na n maneg n yɩɩ tɩlae tɩ d teeg Wẽnnaam t’a ges d yelle.—Wil. 13:17.
D reng n bao Wẽnnaam tɩrlmã
10, 11. Tʋʋmã wɛɛngẽ, wãn to la neb kẽer wilg tɩ b teega a Zeova? Kõ-y makre.
10 A Zezi leb n sagla a karen-biisã tɩ b ‘reng n bao Wẽnnaam tɩrlmã.’ (Mat. 6:33) Woto rat n yeelame tɩ d tũud noy nins a Zeova sẽn gãneg sẽn segd la sẽn pa segdã wɛɛngẽ wã, la d ra tũ ninsaalbã tagsa ye. (Karm-y Ezai 55:8, 9.) Wala makre, nand tɩ neb kẽer lebg kiris-neba, b ra kooda taba, pa rẽ bɩ b koosd tab wall sɩgaare. Sãnda ra zãmsda b taab zaba, tɩ sãnda ra maand zab-teedo, wall b koosd zab-teedo. La b sẽn wa n bãng sɩdã, b yãka yam n toeem tʋʋma, tɩ kɩt tɩ b tõog n deeg lisgu.—Ezai 2:4; 2 Kor. 7:1; Gal. 5:14.
11 Rao a ye yʋʋr sẽn boond t’a Andrew maana woto. Yẽ ne a pagã sẽn wa n bãng a Zeova wã, b yãka yam n na n maan a raabã. A Andrew yaool n da nonga a tʋʋmdã wʋsgo, la baasgo, a yãka yam n bas-a. Bõe yĩnga? A tʋʋmdã ra kɩtame t’a kẽesd a toog zabã pʋsẽ, t’a yaool n da rat n maan sẽn noom a Zeova. A Andrew sẽn wa n basd a tʋʋmdã t’a ra tara kamb a yiibu, tɩ ligd ning a sẽn da tarã zems b kiis a wãn rɩɩb bala. A ra lebga wa Levi nebã sẽn da pa tar pʋɩɩrã. A kell n teega Wẽnnaam, n sɩng tʋʋm baoobo. Rũndã-rũndã, a Andrew ne a zakã rãmb sã n tẽeg yɛlã sẽn yɩ to-to wã, b nee vẽeneg tɩ Biiblã sẽn yeel t’a ‘Zeova nug ka koɛɛg n ka tõe n fãagã’ sɩd yaa sɩda. (Ezai 59:1) A Andrew ne a pagã sẽn kell n yãk yam n pa na n bao bõn-kãsemsã, b tõog n lebga so-pakdba. Ad a sẽn yeele: “Yaa sɩd tɩ wakat ninga, ligd zu-loeese, yɩl n paam doog n luaase, laafɩ wã kaalem la baa d sẽn kʋʋndã meng mi n kõt-d-la yɩɩre. La wakat fãa, a Zeova sõngd-d lame. . . . Tõnd tõe n yeela ne pʋ-peelem t’a Zeova raabã maaneg n nafd ned n yɩɩda, la t’a yaa zu-zẽkr bũmb sẽn ka to.” *—Koɛ. 12:13.
12. Sẽn na yɩl n dengd n baood Wẽnnaam tɩrlmã, bõe n yaa tɩlae ne-do? Yãmb mii neb sẽn sɩd maan woto bɩ?
12 A Zezi yeela a karen-biisã woto: “Yãmb sã n da tar tẽeb wa siil bila, yãmb sã n yeel tãng kãngã t’a serg n kẽng ka sẽnẽ, a na serge. La bũmb kõn zĩnd yãmb sẽn kõn tõog ye.” (Mat. 17:20) Rẽ yĩnga y na n ket n dengd n baooda Wẽnnaam tɩrlmã baa rẽ maaneg sã n na n waa ne zu-loees n kõ-y bɩ? Y sã n pa kɩs sɩd ne rẽ, bɩ y sõs ne tigingã neb a taaba. B sã n togs yãmb a Zeova sẽn zoe n sõng-b to-to wã, yaa vẽeneg tɩ na n paasa y tẽebã pãnga.
D tall mi-beoog ne a Zeova, bũmb nins fãa a sẽn kõt-dã yĩnga
13. D sã n maand a Zeova raabã ne d sũur fãa, d tõe n kɩsa sɩd ne bõe?
13 Y sã n wilgd a Zeova y mi-beoog y sẽn paam n tũud-a wã yĩnga, y tõe n kɩsa sɩd t’a na n gesame tɩ y paam bũmb nins fãa sẽn yaa tɩlae ne-yã, wa a sẽn da ges Levi nebã yell to-to wã. Tẽeg-y-yã a Davɩɩd yelle. Baa a sẽn da wa n tɩ solg tãng bokẽ wã, a ra kɩsa sɩd tɩ Wẽnnaam na n sõng-a lame. Tõnd me tõe n teega a Zeova, baa sã n wa wõnd ned baa a ye pa tõe n sõng-do. Tẽeg-y me tɩ yaa a Azaf sẽn wa n “kẽng Wẽnnaam sɛk-zĩigẽ wã” la a tõog n bãng bũmb ning sẽn da namsd-a wã vẽenega. (Yɩɩl 73:17) Tõnd me segd n teega a Zeova t’a kõt-d bũmb ning fãa sẽn yaa tɩlae sẽn na yɩl tɩ d tõog n kogl zood ning d sẽn tar ne-a wã. D sã n maand woto, d wilgdame tɩ baa d yɛlã sẽn yaa to-to, d nanda tʋʋm nins a Zeova sẽn bobl-dã. Woto, d wilgdame t’a Zeova la d pʋɩɩre.
14, 15. A Zeova siglgã sã n wa rems d sẽn da wʋmd Biiblã gomd ning võor to-to, d manesem segd n yɩɩ wãna, la bõe yĩnga?
14 A Zeova sã n wa sõngd-d sẽn na yɩl tɩ d wʋm a “yel-zulums” nins sẽn be Biiblã pʋgẽ wã võore, d manesem yaa wãna? (1 Kor. 2:10-13, MN) Tʋm-tʋmd a Pɩɛɛr sẽn tall manesem ning daar a yembr a Zezi sẽn wa n sõsd ne zʋɩf rãmbã wilgdame tɩ d segd n kɩsa a Zeova sɩda. A Zezi ra wa n yeela zʋɩf rãmbã woto: “Yãmb sã n ka wãb Ninsaal Biigã nemdo, la y ka yũ a zɩɩm, yãmb ka tar vɩɩm ye.” La a karen-biisã wʋsg tagsame t’a Zezi yeelame tɩ b segd n sɩd wãba yẽ nemd la b yũ a zɩɩm. Rẽ kɩtame tɩ b yeel woto: “Gom-kãngã yaa toogo. Ãnd n tõe n deeg yãoã?” Rẽ poore, wʋsg ‘leba poorẽ n ka le tũ-a’ ye. La a Pɩɛɛr yeelame yaa: “Zusoaba, tõnd na n basa yãmb n kẽng ãnda nengẽ? Yãmb tara vɩɩm sẽn ka sɛt goama.”—Zã 6:53, 60, 66, 68.
15 A Pɩɛɛr da pa wʋmd a Zezi gomdã võor sõma ye. La a ra kɩsa sɩd t’a Zeova tũnugda ne-a n sõngd nebã tɩ b bãngd sɩdã. Rũndã-rũndã, a Zeova siglgã sã n wa rems d sẽn da wʋmd Biiblã gomd ning võor to-to wã, yãmb modgdame n na n wʋm remsgã võor bɩ? (Yel. 4:18) Pipi kiris-nebã wakate, Beere nebã “deega Wẽnnaam koɛɛgã ne b sũyã fãa. La daar fãa, [b] ra vaeesda Gʋlsg Sõamyã.” (Tʋʋ. 17:11, Kãab-paalgã Koe-noogo) Y sã n dɩkd nin-kãensã togs-n-taare, y na n maneg n nana tʋʋm nins Wẽnnaam sẽn bobl-dã. Y sũur na n maneg n yɩɩ noog y sẽn paam t’a Zeova yaa y pʋɩɩrã.
D sã n na n kẽ kãadem, tog n yɩɩ ne ned sẽn tũud Zusoabã bala
16. Wãn to la kiris-ned sẽn pa kẽ kãadem tõe n tũ 1 Korẽnt dãmb 7:39 wã sẽn yetã n wilg tɩ Wẽnnaam la a pʋɩɩre?
16 Bũmb a to me kiris-nebã sẽn tõe n maan n wilg tɩ Wẽnnaam daabã maaneg n pak-ba, yaa b sẽn na n tũud Biiblã sagl ning sẽn yeel tɩ b sã n na n kẽ kãadem, tog n yɩɩ ne “ned sẽn tũud Zusoabã balã.” (1 Kor. 7:39) Wʋsg sẽn pa rat n kɩɩs no-kãngã yĩnga, b yãka yam n na n kell n zĩnd b yembre. Wẽnnaam geta nin-kãensã yell sõma. A Davɩɩd sũur sã n da wa sãam a sẽn yaa a yembr tɩ yaa wa a pa tar sõngdã, bõe la a ra maanda? A ra kota a Zeova sõngre. Ad a sẽn yeele: “Mam pelgda m pʋg ne bãmb n wilgd m toogã bãmb taoore. Mam sũur sã n sãam m pʋgẽ, yãmb mii mam sore.” (Yɩɩl 142:2-4) A Zeremi tʋma Wẽnnaam tʋʋmdã yʋʋm wʋsg pʋgẽ ne a sũurã fãa n da pa kẽ kãadem ye. Tõe tɩ yembrã zĩndg ra mi n sãamda yẽ me sũuri. Dieu nous parle par Jérémie sebrã sak a 8 wã gomda a mak-sõngã yelle, tɩ y tõe n paam sagls a pʋgẽ.
17. Bõe la saam-bi-poak sẽn pa kẽ kãadem maand a sũur sã n mi n wa sãam a sẽn yaa a ye wã yĩnga?
17 Saam-bi-poak a ye sẽn vɩ Etazĩni yeela woto: “Mam zɩ n yãk yam n na n kell n zĩnd m yembr ye. Mam sã n yã ned sẽn ta m daabo, m na n kẽe kãadem. Mam ma wã sẽn pa kiris-nedã yẽ ra pẽdgda maam n dat tɩ m sak ned yaar bala. La mam sok-a lame n ges a sã n na sak tɩ mam sã n tũ a raabã tɩ wa pa yãk neng bɩ m ning-a taale. A sẽn wa n yã tɩ mam paama tʋʋm-sõng n tõe n ges m meng yell hal tɩ m sũur noomẽ wã, a bas-m-la pẽdgre.” D saam-bi-poakã sũur mi n sãamda a sẽn zĩ a ye wã. La ad a sẽn yeele: “Mam teega a Zeova n togsd-a m zu-loeesã wakat fãa. A zɩ n bas maam ye.” Bõe n sõng-a t’a tõog n teeg a Zeova? A yeela woto: “Pʋʋsgã sõnga maam tɩ m kɩs sɩd tɩ Wẽnnaam bee ne-ma, la t’a sõngd-m lame. Pãng-sẽn-ka-to soabã sẽn kelgd-ma, bõe yĩng tɩ m pa na n zẽk m zug la m noog m sũuri?” A kɩsa sɩd tɩ Biiblã sẽn yeel tɩ “sẽn kõt-a sũ-noog yɩɩda sẽn deegd-a” wã sɩd yaa sɩda. Woto kɩtame t’a yãk yam n sõngd nebã. A paasa woto: “Mam sã n wa yã ned n sokd m meng m sẽn tõe n sõng a soabã to-to wã, noom-m lame.” (Tʋʋ. 20:35, Sebr Sõngo) A paamame t’a Zeova yaa a pʋɩɩre. Sẽn paase, a sẽn paam n tʋmd a Zeova tʋʋmdã kõt-a-la sũ-noogo.
18. Wãn to la y tõe n lebg a Zeova pʋɩɩre?
18 Baa y yɛlã sẽn yaa to-to fãa, y tõe n wilgdame tɩ Wẽnnaam la y pʋɩɩre. Y sã n maand rẽ, y na n tõog n paam n yɩɩ a neda, n zĩnd a nin-buiidã sẽn tar sũ-noogã sʋka. (2 Kor. 6:16, 17) Woto, y na n paam n lebga a Zeova pʋɩɩre, wa neb a taab sẽn paam n yɩ a pʋɩɩr pĩnd wẽndẽ wã. (Karm-y Tõod 32:9, 10.) Wa Israɛll buudã sẽn da paam n yaa Wẽnnaam pʋɩɩr buudã fãa sʋkã, yãmb me tõe n paamame tɩ Wẽnnaam yãk-y tɩ y yaa a pʋɩɩr t’a get y yell ne nonglem.—Yɩɩl 17:8.
[Tẽngr note]
^ sull 11 Ges-y yʋʋmd 2009 sɩpaolg kiuug Réveillez-vous ! wã neng 12-14.
Y na n leokame tɩ bõe?
Wãn to la y wilgd t’a Zeova la yãmb pʋɩɩre,
• y sã n dengd n baood Wẽnnaam Rĩungã la a tɩrlmã?
• y sã n wilgd-a y mi-beoogo, bũmb nins fãa a sẽn kõt-dã yĩnga?
• y sã n tũud noor ning sẽn yet tɩ d sã n na n kẽ kãadem tog n yɩɩ ne ned sẽn tũud Zusoabã balã?
[Zãmsgã sogsgã]
[Goam sẽn tar pãnga, seb-neng 16]
Yaa d sẽn na n lʋɩɩsd a Zeova raabã maaneg taoor la a lebgd d pʋɩɩre
[Foto seb-neng 18]
A Zeremi mak-sõngã kengda raoodo
