‘Bels-y sũ-sãoong rãmbã fãa’
‘Bels-y sũ-sãoong rãmbã fãa’
‘Zusoab a Wẽnnaam yãka maam tɩ m bels sũ-sãoong rãmbã fãa.’—EZAI 61:1, 2.
1. A Zezi manesem yɩɩ wãn ne sũ-sãams rãmbã, la bõe yĩnga?
DAAR a yembre, a Zezi yeela woto: “Mam dɩɩb yaa tɩ maan sẽn tʋm-a maamã ratem, la tɩ maan bãmb tʋʋmã n sɛ.” (Zã 4:34) A Zeova ra bobla a Zezi tʋʋmde. A sẽn da wa n tʋmd tʋʋm-kãngã, a ra wilgdame t’a nonga nebã wa a Ba wã sẽn nong-b to-to wã. (1 Zã 4:7-10) Tʋm-tʋmd a Poll goma bũmb a ye a Zeova sẽn maand n wilgdẽ t’a nonga nebã yelle, a sẽn bool-a tɩ “belsg fãa Wẽnnaamã.” (2 Kor. 1:3) A Zezi koe-moonegã sasa, a talla nonglem kãng buud wa no-rɛɛs a Ezai sẽn da pĩnd n togsã. (Karm-y Ezai 61:1, 2.) Nazarɛt karen-doogẽ wã, a Zezi karma bãngr-gom-kãng la a yeel t’a pidsda yẽ zugu. (Luk 4:16-21) A Zezi koe-moonegã sasa, a belsa sũ-sãams rãmbã la a keng b raoodo, n kɩt tɩ b yam gãand bãane.
2, 3. Bõe yĩng tɩ Kiristã karen-biis segd n dɩkd a naoor n belsd nebã?
2 A Zezi karen-biisã fãa segd n dɩkda a naoore, n belsd sũ-sãams rãmbã. (1 Kor. 11:1) Tʋm-tʋmd a Poll da yeela woto: “Paas-y taab raoodo, la y bɩɩs taab tẽeb wa y sẽn zoe n maandẽ wã.” (1 Tes. 5:11, Kãab-paalgã Koe-noogo) Sẽn yɩɩd fãa, rũndã-rũndã la nebã rat belsgo, d sẽn vɩ “yaoolem wakat” tɩ yaa toogã yĩnga. (2 Tɩm. 3:1) Sɩd me, dũniyã gill zugu, nin-wẽnsã sõor sẽn tar paasgã, b tʋʋm-wẽnsã la b gom-yoodã maneg n namsda nin-tɩrsã la sãamd b sũyã.
3 Wa Biiblã sẽn da pĩnd n togsã, yaoolem da-kãensã pʋgẽ, neb wʋsg lebga “beed dãmba, ligd noangdba, wilg-m-mens rãmba, tɩtaam dãmba, Wẽnnaam tʋʋsdba, ba-rãmb la ma-rãmb kɩɩsdba, zɩ-beoog rãmba, nin-zaalse, neb sẽn ka tar nimbãan-zoeere, la sũ-to-neba, tẽnkãn-neba, neb sẽn ka tar yõk-m-menga, pʋto-rãmba, nin-sõamyã kisgdba, zãmb dãmba, neb sẽn ka gũusda, la wuk-m-mens rãmba sẽn nong dũniyã sũ-noog n yɩɩd Wẽnnaam.” Yɛlã wẽnem pʋd n yɩɩda pĩndã, bala, ‘nin-wẽnsã ne zãmb dãmbã maanda wẽng n paasdẽ.’—2 Tɩm. 3:2-4, 13.
4. Dũniyã yɛl yaa wãn-wãn rũndã-rũndã?
4 Woto fãa pa segd n ling tõnd ye. Bala, Wẽnnaam Gomdã wilga vẽeneg tɩ “dũniyã fãa bee wẽng soabã nugẽ.” (1 Zã 5:19) Politikã siglsã, ziri tũudmã la leebgã siglsã n paas bũmb nins fãa a Sʋɩtãan sẽn tũnugd n yelgd a tagsa wã naaga b sẽn bool tɩ “dũniyã fãa” wã pʋgẽ. A Sʋɩtãan n sɩd yaa “dũniyã naaba,” la “dũni-kãngã wẽnnaam.” (Zã 14:30; 2 Kor. 4:4) Dũniyã yɛl sẽn tar zẽnebã, yaa a Sʋɩtãan sũurã sẽn puud wʋsgã yĩnga. Bala, a miime tɩ ka la bilfu, a Zeova na n menes-a lame. (Wil. 12:12) D sẽn mi tɩ Wẽnnaam pa na n bas a Sʋɩtãan ne a dũniyã tɩ b le kaoosã, la t’a na n welga no-koeemd ning a Sʋɩtãan sẽn wa ne a naamã wɛɛngẽ wã, kengda d raoodo!—Sɩng. sak a 3; Zoob sak a 2.
B moonda koe-noogã dũniyã tɛk fãa
5. Wãn to la b sẽn pĩnd n togs tɩ b na n moona koe-noogã pidsd rũndã-rũndã?
5 A Zezi ra pĩnd n togsa woto: “Wẽnnaam soolem koe-no-kãngã na n moona dũniyã tɛk fãa tɩ yɩ kaset buud fãa yĩnga. Dẽ, dũniyã sɛɛb na yaool n ta.” (Mat. 24:14) Wa a Zezi sẽn da yeelã, a Zeova nin-buiidã moonda Rĩungã koe-noogã dũniyã gill zugu. Dũniyã gill zugu, sẽn yɩɩd a Zeova Kaset rãmb 7500000 n be tigims sẽn yɩɩd bãmb 107000 pʋsẽ, n tʋmd tʋʋm-kãngã. A Zezi moona Wẽnnaam Rĩungã koɛɛg la a sõng nebã tɩ b bãng Rĩung-kãng sẽn yaa a soabã. A Zeova Kaset rãmbã me maanda woto. (Mat. 4:17) Ne tʋʋm-kãngã maasem, b belsda sũ-sãams rãmb wʋsgo. Sɩd me, rɩẽ la yʋʋm-bɩtẽ bala, sẽn ta neb 570601 n deeg lisg n lebg a Zeova Kaset rãmba!
6. Yãmb tagsg yaa wãn tõnd koe-moonegã sẽn paamd pãng to-to wã wɛɛngẽ?
6 Rũndã-rũndã, a Zeova Kaset rãmbã sẽn yiisd b sɛbã buud-goam sẽn yɩɩd 500 pʋgẽ n taasd nebã, wilgda b tʋʋmdã pãng sẽn ta zĩig ningã. Ninsaalbã sẽn be dũni zug tɛka, a buudã ra nan zɩ n zĩnd ye! Baa a Zeova nin-buiidã sẽn vɩ dũni a Sʋɩtãan sẽn so pʋgẽ wã, b tʋmda b tʋʋmdã ne yẽesem, tɩ b sõorã me paasdẽ. Sã n pa Wẽnnaam sẽn tũnugd ne a vʋʋsem sõngã sẽn yaa pãng sẽn ka to wã n sõngd-b la a wilgd-b sorã, b ra pa na n tõog n maan woto ye. B sẽn moond koe-noogã dũniyã gill zugã yĩnga, tõnd tẽed-n-taasã, n paas sũ-sãoong rãmb nins sẽn sakd n kelgd Rĩungã koɛɛgã paamda belsg ning sẽn yit Gʋlsg Sõamyã pʋgẽ wã.
D tẽed-n-taasã tõe n bels-d lame
7. a) Bõe yĩng tɩ d pa segd n tẽ t’a Zeova na n menesa bũmb nins fãa sẽn wat ne sũ-sãamsã masã tɛka? b) Bõe n kɩt tɩ d miẽ tɩ d tõe n maoa ne zu-loeesã?
7 D sẽn vɩ dũni sẽn yaa wẽng pʋgẽ wã yĩnga, d pa tõe n pa wa seg zu-loees tɩ d sũur sãam ye. Sã n pa dũni-kãngã sãoongã poore, d pa tõe n paam tɩ Wẽnnaam menes bũmb nins fãa sẽn wat ne sũ-sãamsã ye. Sẽn paase, b ra pĩnd n togsame tɩ b na n nams-d-la d tẽebã yĩnga. (2 Tɩm. 3:12) Rẽ na n kɩtame tɩ d tõog n wilg d sã n sɩd sakda a Zeova la d teend a naamã. La ne tõnd saasẽ Ba wã sõngr la a belsgo, d tõe n yɩɩ wa pĩnd wẽndẽ Tesalonik kiris-nebã sẽn da paam vʋʋsem sõngã zaeebã. B talla ‘sũ-mar la tẽeb’ toog pʋgẽ.—Karm-y 2 Tesalonik rãmb 1:3-5.
8. Wãn to la Biiblã wilgd t’a Zeova belsda a nin-buiidã?
8 Sãmbg sẽn ka be, a Zeova belsda a nin-buiidã. Wala makre, rĩm-poak a Zezabɛll ra wa n baooda no-rɛɛs a Eli n na n kʋ, tɩ kɩt t’a yaees n zoe. A pʋd n wa n yeelame meng t’a yamã yi a vɩɩmã. La wall t’a Zeova zab a Eli wã, a bels-a lame la a keng a raood sẽn na yɩl t’a kell n tʋm tʋʋmd ning a sẽn da bobl-a wã. (1 Rĩm 19:1-21) Makr a to sẽn wilgd t’a Zeova belsda a nin-buiidã yaa a sẽn sõng pipi kiris-nebã to-to wã. Wakat kãnga, a Zezi ‘tẽedbã sẽn da be Zide, Galile la Samari wã fãa paama laafɩ n bɩ tẽeb pʋgẽ.’ Sẽn paase, b sẽn da ‘kẽnd ne Zusoabã rabeemã, b paama paasgo, sɩɩg sõng sẽn be ne bãmbã yĩnga.’ (Tʋʋ. 9:31) Tõnd me sẽn paam tɩ vʋʋsem sõngã be ne-d n belsd-dã, d sũy nooma wʋsgo!
9. Bõe yĩng tɩ d sã n bao n bãng a Zezi bɩ tõe n bels-do?
9 D sẽn yaa kiris-nebã yĩnga, d paama belsg d sẽn bãng a Zezi Kirist la d tũud a mak-sõngã. A Zezi ra yeela woto: “Bɩ y wa mam nengẽ, yãmb fãa sẽn yɛ la sẽn tʋkd zɩɩb sẽn yaa zɩsgo, la mam na kõ yãmb vʋʋsgo. Bɩ y rɩk mam naoa, n zãms bũmb nins mam sẽn na n wilg yãmbã, tɩ bõe, mam yaa sũ-mar soaba, la m yaa nin-nana, la yãmb na paam vʋʋsgo. Tɩ bõe, mam yɛlã yaa naana, la mam zɩɩb yaa faasga.” (Mat. 11:28-30) D sã n baood n bãngd a Zezi manesem sẽn da yaa to-to ne nebã tɩ wilgdẽ t’a nong-b lame wã, la d maood n dɩkd a togs-n-taare, belsd-d lame la boog yɩɩr ning d zu-loeesã sẽn wat ne wã.
10, 11. Tigingã pʋgẽ, ãnd dãmb n tõe n bels-do?
10 D tẽed-n-taasã me tõe n bels-d lame. Wala makre, d gom kãsem dãmbã sẽn tõe n maan to-to n sõng neb nins tẽeb sẽn komsã yelle. A Zak yeela woto: “Ned bee yãmb sʋk n ka laafɩ bɩ? Bɩ a bool Wẽnnaam tẽedbã kãsem dãmbã, la bɩ bãmb tik a soab ne kaam ne Zusoabã yʋʋre, n pʋʋs Wẽnnaam a yĩnga.” Wãn to la rẽ na n naf a soabã? A Zak paasa woto: “Tẽeb pʋʋsg na maag bãadã, la Zusoabã na yik-a t’a paam laafɩ, la yẽ sã n da maan yel-wẽna, a na paam sugri.” (Zak 5:14, 15) La tigingã neb a taab me tõe n bels-d lame.
11 Pagbã mi n neeme tɩ yaa nana ne-b tɩ b gom b zu-loeesã yell ne b pʋg-taase. Sẽn yɩɩd fãa, saam-bi-pogs nins yʋʋm sẽn vẽsg la sẽn tar minimã tõe n sõnga saam-bi-pogs a taabã. Tõe tɩ b zoe n sega yɛl kẽer b taabã sẽn mi n segda. B sã n maag b yĩng n kelg-b la b ges b yelle, tõe n sõng-b-la hal wʋsgo. (Karm-y Tɩt 2:3-5.) Vẽenega, tigingã kãsem dãmbã la neb a taabã tõe n “belsa sũ-sãoong rãmbã,” la b pʋd n segd n maanda woto. (1 Tes. 5:14, 15) Sẽn paase, segdame tɩ d fãa tẽeg tɩ Wẽnnaam sẽn “belsd tõnd d toog fãa pʋgẽ” wã, yaa sẽn na yɩl tɩ tõnd me tõog “n bels toog sẽn tar-b rãmbã.”—2 Kor. 1:4.
12. Bõe yĩng tɩ d segd n kẽnd tigissã?
12 Bũmb sẽn tõe n belsd n yɩɩd yaa tigissã. Sõss nins d sẽn kelgd be wã sẽn tik Biiblã zugã kengda d raoodo. Sɩd me, Biiblã goma a Ziid ne a Sɩlas yell n yeel tɩ b tigma saam-biisã, n sagl-b “ne goam wʋsgo, n paas bãmb pãnga.” (Tʋʋ. 15:32) Nand tɩ tigissã sɩng la tigissã poore, d sõsda ne taab n kengd taab raoodo. Woto yĩnga, baa d sã n tar zu-loees tɩ namsd-do, d pa segd n zãagd d mens ne d tẽed-n-taasã ye. Bala, pa rẽ la yellã tɩɩm ye. (Yel. 18:1) D pʋd n segd n tũu tʋm-tʋmd a Poll saglgã. A yeela woto: “Bɩ tõnd tẽeg taab yelle, la d yik taab ratem tɩ maan nonglem la tʋʋm-sõma. Bɩ d da bas taab tiging wa neb kẽer sẽn maandã ye. La bɩ d sagl taaba, la bɩ d sagl n yɩɩda, tõnd sẽn yã tɩ daarã kolgdame wã yĩnga.”—Heb. 10:24, 25.
Belsg sẽn yit Wẽnnaam Gomdã pʋgẽ
13, 14. Wãn to la Gʋlsg Sõamyã tõe n bels-do?
13 D reega lisg tɩ d nan sɩnga Wẽnnaam la a raabã bãngr me, d tõe n paama belsg Biiblã pʋgẽ. A Poll yeela woto: “Bũmb fãa sẽn gʋls pĩndã gʋlsa tõnd zãmsg yĩnga, tɩ tõnd tõe n gũ tõnd tẽeb pidsg ne sũ-mare, la ne Gʋlsg Sõamyã belsgo.” (Rom 15:4) Sɩd me, Gʋlsg Sõamyã tõe n bels-d lame la b sõng-d tɩ d yɩ ned sẽn ‘maand tʋʋm-sõma fãa.’ (2 Tɩm. 3:16, 17) Yaa vẽeneg tɩ d sã n mi sɩdã Wẽnnaam daabã zug la d tar saagr hakɩk beoog-daarã wɛɛngẽ, na n bels-d-la wʋsgo. Woto yĩnga, bɩ d maand d sẽn tõe fãa n karemd Wẽnnaam Gomdã la sɛb nins tʋm-tʋmd sẽn tũud sɩdã sẽn yiisdã, n paamd belsg la nafa a taaba.
14 A Zezi ra tũnugda ne Gʋlsg Sõamyã n zãmsd nebã la a belsd-ba, tɩ yaa mak-sõng n kõ tõndo. Wala makre, a vʋʋgrã poore, daar a yembre, a vẽnega a meng ne a karen-biis a yiibu, n ‘bilg-b Gʋlsg Sõamyã’ hal tɩ kẽ-ba. (Luk 24:32) Tʋm-tʋmd a Poll rɩka a Zezi togs-n-taare, n da sõsd ne nebã ne “Gʋlsg Sõamyã koɛɛgã.” A sẽn da wa n moon koɛɛgã Beere soolmẽ wã, a kɛlgdbã “reega Wẽnnaam koɛɛgã ne b sũyã fãa,” la b ra feesd ‘Gʋlsg Sõamyã daar fãa.’ (Tʋʋ. 17:2, 10, 11) Woto yĩnga, tara yõod tɩ d karemd Biiblã daar fãa, la d karemd tʋm-tʋmdã sɛbã b sẽn yiisd n na n belsd tõnd la b kengd d raood masã sẽn yaa toog wakatã!
Bũmb a taab d sẽn tõe n maan n bels d taabã
15, 16. Bõe la d tõe n maan n sõng d tẽed-n-taas la d keng b raoodo?
15 Bũmb toor-toor n be d sẽn tõe n maan n sõng d tẽed-n-taasã la d bels-ba. Wala makre, d tõe n kẽnga d to sẽn kʋʋl wall sẽn ka laafɩ nengẽ t’a tʋm-d raaga. D leb n tõe n sõnga d taab me ne b zagsã pʋsẽ tʋʋma, n wilgd-b tɩ d tʋll n gesa b yelle. (Fil. 2:4) Bũmb a to me d sẽn tõe n maan n bels d taabã, yaa d sẽn na n mi n pẽgd-ba, b zʋg-sõma wã yĩnga. Wala makre, b nonglmã, b tẽebã la b raoodã n paas b pãn-tõod toor-toorã.
16 D tõe n kẽnd n geta sẽn kʋʋl-bã, n sõsd ne-b tɩ b togsd-d bũmb nins b sẽn maan a Zeova tʋʋmdã pʋga, la bark nins b sẽn paamã. Woto belsd-b lame, la belsd tõnd me n kengd d raoodo. D sã n wa tɩ kaagd nin-kãensã buudã, d tõe n naag-b lame me n karem Biiblã wall tʋm-tʋmdã sɛbã. Wala makre, d tõe n segla Gũusg Gasgã sõsg ning d sẽn na n wɛgs semennã pʋgẽ wã, wall tigingã Biibl zãmsg sõsgã. D tõe n naag-b lame me n ges siglgã filim ninga. Sẽn paase, d tõe n karma neb kibay sẽn be d sɛbã pʋsẽ n kengd raood tɩ b kelge, wall d sõs ne-b rẽ zugu.
17, 18. Bõe yĩng tɩ d tõe n kɩs sɩd t’a Zeova na n ket n belsd-d lame la a sõngd-do?
17 D sã n gũus n ges tɩ d saam-biig wall d saam-bi-poak ning rata belsg tɩrga, d tõe n pʋʋsa a yĩnga. (Rom 15:30; Kol. 4:12) D sã n wa maood ne zu-loees wall d wa baood n na n bãng d sẽn tõe n bels d taabã b toogã pʋgẽ to-to, d segd n talla tẽeb la kɩs-sɩd ning yɩɩl-gʋlsdã sẽn da tarã. A ra yeela woto: “Bas f yell ne Zusoabã la bãmb na kogl foom. Bãmb ka na n bas nin-tɩrg t’a leng wakat sẽn ka sɛt ye.” (Yɩɩl 55:23) Sɩd me, a Zeova na n ket n belsda tõnd la a sõngd tõnd d sẽn tũud-a ne pʋ-peelmã yĩnga.
18 Pĩnd wẽndẽ, a yeela a nin-buiidã tɩ yaa yẽ mengã n belsd-ba. (Ezai 51:12) Rũndã-rũndã, a na n belsa tõnd me la a ning modgr ning d sẽn maand n dat n bels d taabã ne d tʋʋm la ne d no-goamã barka. D saagd n na n wa tɩ vɩɩmda saasẽ tɩ d na n wa vɩɩmda tẽngã zug me, a Poll sẽn da yeel bũmb ning a tẽed-n-taasã sẽn paam vʋʋsem sõngã zaeebã tõe n bels-d lame. A yeela woto: “Bɩ tõnd Zusoab a Zezi Kirist mengã, la tõnd Ba a Wẽnnaam sẽn nong tõndo, n belsd tõnd ne belsg sẽn kõn sa, bãmb nimbãan-zoeerã yĩnga, la b kõ tõnd saa-sõngã bels yãmb sũyã, la b kɩt tɩ y pɛlg yɩ kãn-kãe ne tʋʋm-sõng fãa la ne gom-sõng fãa.”—2 Tes. 2:16, 17, Kãab-paalgã Koe-noogo.
Y tẽrame bɩ?
• Tõnd tʋʋmdã pãng taa zĩ-bʋgo?
• Bõe la d tõe n maan n bels d tẽed-n-taasã?
• Bõe la Biiblã yet tɩ wilgdẽ t’a Zeova belsda a nin-buiidã?
[Zãmsgã sogsgã]
[Foto seb-neng 26]
Yãmb belsda sũ-sãoong rãmbã bɩ?
[Foto seb-neng 28]
Kom-bɩɩsã ne kãsembã fãa tõe n belsa neb a taabã
