3 Wẽnnaam yaa sũ-dokr soaba—Yaa sɩd bɩ?

Tõe tɩ y wʋma b sẽn yet tɩ: “Wẽnnaam gʋlsda nebã yel-wẽnã, tɩ b kũumã poor bɩ a kẽes-b bugum-yir n sɩbg-b wakat fãa.”

“Wẽnnaam tũnugda ne sabaab-wẽnsã n sɩbgd nin-wẽnsã.”

Biiblã sẽn yete: Biiblã yeta 2 Pɩɛɛr 3:9 pʋgẽ t’a Zeova ‘ka rat tɩ ned baa a ye sãame,’ la t’a ‘ratame tɩ nebã fãa yam tek tɩ b kos sugri.’ A sẽn get n yɩɩdã pa tõnd yel-wẽnã ye. Yaa tõnd tʋʋm-sõma wã. Wẽnnaam “nif geta dũniyã zĩiga fãa n dat n sõng neb nins sẽn dat Wẽnnaam ne b sũyã fãa wã.”—2 Kibaya 16:9.

Biiblã pa yet tɩ Wẽnnaam sɩbgda nebã bugum-yir ye. A pʋd n pa tõe n sak n maan a buud ye. Nin-wẽnsã sɩbgr na n yɩɩ kũum. (Zeremi 7:31; Rom dãmba 6:23) Sabaab-wẽnsã pa tũusd neb ye. Dẽnd b pa yit Wẽnnaam nengẽ ye. Yaa zu-beed sẽn lingd ned buud fãa.—Koɛɛg Soaba 9:11.

Sɩdã bãngr sẽn na n sõng yãmb to-to: D sã n bãng tɩ Wẽnnaam “kõta sugri,” la t’a pa yãgd n ning ned taale, tõe n kɩtame tɩ d nong-a. (Yɩɩl Sõamyã 86:5) D pa segd n tũ Wẽnnaam d sẽn dat t’a kõ tõnd d beegr sugri, bɩ d sẽn yɛɛsd t’a na n wa sɩbg-d yĩng ye. D segd n tũu a Zeova d sẽn nong-a wã yĩnga. Rẽ na n kɩtame tɩ d maan d sẽn tõe fãa sẽn na yɩl n ta a yam.—Matɩe 22:36-38; 1 Zã 5:3.

Yaa sɩd tɩ Wẽnnaam ratame tɩ nebã tek yam n maan sẽn yaa sõma, la a miime tɩ neb wʋsg pa na n maan woto ye. Wẽnnaam sã n bas n pa sãam neb nins sẽn maand wẽng n pa rat n tekã, a na n yɩɩ wa tẽng naab sẽn yiis noy, n yaool n pa sɩbgd neb nins sẽn pa tũudã, tɩ rẽ kɩt tɩ tʋʋm-kɛgã la namsgã tar paasg bala. (Koɛɛg Soaba 8:11) D sẽn mi tɩ Wẽnnaam pa na n kell n bas tɩ wẽnemã zĩnd wakat fãa wã, kɩtame tɩ d tõe n kɩs sɩd tɩ beoog-daarã na n yɩɩ neere. Wẽnnaam yeelame t’a na n wa menesa sẽn maand-b wẽng n pa rat n tekã, tɩ nin-tɩrsã paam n vɩɩmd wakat sẽn kõn sa tẽngã zug wa a sẽn da ratã.—Yɩɩl Sõamyã 37:10, 11, 29. *

[Tẽngr note]

[Goam sẽn tar pãnga, seb-neng a 6]

Wẽnnaam datame tɩ d tũ-a d sẽn yɛɛsd t’a na n wa sɩbg-d lame yĩng bɩ?

[Foto soaadba, seb-neng a 6

Engravings by Doré