5 Tũudmã fãa tata Wẽnnaam yam—Yaa sɩd bɩ?
5 Tũudmã fãa tata Wẽnnaam yam—Yaa sɩd bɩ?
Tõe tɩ y wʋma b sẽn yet tɩ: “Tũudmã fãa yaa a ye. Yaa ninsaalbã bal n welgd-ba. Fo sẽn be tũudum ning fãa pʋgẽ, yaa sõma.”
Biiblã sẽn yete: D segd n tũu Wẽnnaam ne pʋ-peelem, n da soosd n maand a sẽn kis ye. A Zezi wilga a wakatẽ tũudmã taoor dãmb bũmb ning sẽn kɩt tɩ b tũudmã pa le tat Wẽnnaam yamã. A yeel-b-la woto: “Zãmb dãmba, a Ezai sɩd da togsa bãngr-goam ne yãmb yelle, a wa sẽn gʋlsã: ‘Nin-kãens waoogda maam ne b no-bɩmse, la b sũyã zãra ne maam.’” (Mark 7:6) La pʋ-peelmã bal pa sek na kɩt tɩ d tũudmã ta Wẽnnaam yam ye.
A Zezi sɩd wilgame tɩ pʋ-peelmã bal pa sek ye. Sẽn na yɩl n wilg rẽ, a puka bũmb tũudmã taoor dãmb ne b poorẽ dãmbã sẽn da maand tɩ pa segde. A togs-b lame tɩ Wẽnnaam yeelame tɩ bãmb sẽn waoogd yẽ wã yaa zaalem, la tɩ b zãmsda nebã kareng sẽn yaa ninsaalb tõod bala. (Mark 7:7) B tũudmã ra “yaa zaalem,” bala b ra lʋɩɩsa ninsaalb tõod la b rog-n-migs taoore.
Biiblã pa wilgd tɩ tũudmã fãa yaa sõma ye. A wilgdame tɩ yaa a ye bal n tat Wẽnnaam yam. Matɩe 7:13, 14 yeta woto: “Bɩ y kẽ zak noor sẽn yaa sẽkã. Tɩ bõe, zak noor sẽn yaa yalengã la sor sẽn yaa yalengã rabda sãoong zĩigẽ, la neb wʋsg kẽeda beenẽ. La zak noor sẽn yaa sẽkã la sor sẽn yaa bãanegã rabda vɩɩm zĩigẽ, la a yãt-b yaa bilfu.”
Sɩdã bãngr sẽn na n sõng yãmb to-to: Mams-y n ges-y yãmb sẽn dat n naag neb n zoe, tɩ sẽn deng-a taoorã na n paam kũuni, tɩ y rɩk kiis n segl y menga. Zoeesã raare, yãmb n yɩ pipi. La mikame tɩ noor la y kɩɩs n pa bãnge, tɩ rẽ kɩt tɩ b pa tõe n kõ yãmb kũunã ye. Y na n neeme tɩ y modgrã fãa yaa zaalem. Tõe n yɩɩ woto me d tũudmã wɛɛngẽ.
Tʋm-tʋmd a Poll maka tũudmã ne zoeese, n yeel woto: “Ned sã n zoet zoeese, a sã n ka sak b sẽn togsã fãa, a ka paamd kũun ye.” (2 Tɩmote 2:5) D sã n dat tɩ d sẽn tũud Wẽnnaam to-to wã ta a yam, yaa tɩlae tɩ d sak a “sẽn togsã fãa.” Zoeesã pʋgẽ, ned pa tõe n maan wa a sẽn dat la a le paam kũunã ye. Tõnd me pa tõe n tũud Wẽnnaam wa d sẽn dat ye.
D sã n dat tɩ d tũudmã ta Wẽnnaam yam, d segd n gũusame t’a ra naag ne bũmb b sẽn yet Wẽnnaam zug tɩ yaa ziri ye. A Zezi yeelame tɩ: ‘Wẽnnaam waoogdbã na waoog Ba a Wẽnnaam ne b sɩɩse, la ne sɩda.’ (Zã 4:23) Yaa Biiblã sẽn yaa Wẽnnaam Gomdã n tõe n sõng-d tɩ d bãng tũudum ning sẽn tat Wẽnnaam yam.—Zã 17:17. *
[Tẽngr note]
^ sull 8 Y sã n dat n bãng bũmb a taab sẽn wilgd tũudum ning sẽn tat Wẽnnaam yamã, bɩ y karem Biiblã sɩd yetame tɩ bõe? sebrã sak 15 wã.
[Goam sẽn tar pãnga, seb-neng a 8]
Tũudmã fãa pʋgẽ, b zãmsda nebã tɩ b tũ Wẽnd wa a sẽn dat to-to wã bɩ?
