‘Ra teeg-y y meng bãngr ye’
‘Ra teeg-y y meng bãngr ye’
“Teeg Zusoabã ne f sũur fãa la f ra teeg f meng bãngr ye.”—YEL. 3:5.
1, 2. a) Zu-loe-bʋs la d tõe n sege? b) D sã n wa tar zu-loeese, wall d rat n yãk yam n maan bũmbu, pa rẽ bɩ d wa n bee kʋɩɩbg taoore, ãnda la d segd n teege, la bõe yĩnga?
SAAM-BI-POAK yʋʋr sẽn boond t’a Sĩntiya * tʋʋmdã taoor soab basa a tʋmd-n-taas kẽer tʋʋma. Woto kɩtame t’a maand yɩɩre, n tẽed tɩ b na n wa basa yẽ me. B sã n bas-a tʋʋma, a maanda wãna? Wãn to la a na n tõogd n daad bũmb nins sẽn yaa tɩlae ne-a wã? Saam-bi-poak a to yʋʋr sẽn boond t’a Pamela rat n tɩ sõng n moona Rĩungã koɛɛg zĩig koe-moondbã sõor sẽn paoode, la a pa mi a sã n na n tõogame ye. Bi-bɩɩg a Sãmwɛll yẽ zu-loɛɛgã yaa toore. A sẽn wa n yaa bilfã, a ra minim n geta yoob yɛla. A Sãmwɛll yʋʋm yɩɩda 20 masã. A basa yoobã yɛl gesgo, la a mi n wa le rat n gesa yel-kãensã hal tɩ pa nana ne-a ye. Wãn to la a tõe n mao ne a zu-loɛɛgã?
2 Y sã n wa tar zu-loees wall y wa rat n yãk yam n maan bũmbu, pa rẽ bɩ y sã n wa be kʋɩɩbg taoore, ãnda la y segd n teege? Y teegda y meng bal bɩ, bɩ y ‘basda y yellã ne Zusoabã’? (Yɩɩl 55:23) Biiblã yeela woto: “Zusoabã geta nin-tɩrse, la bãmb tʋb wʋmda bãmb kelems b sẽn dat sõngr wakate.” (Yɩɩl 34:16) Dẽnd sɩd tara yõod tɩ d teeg a Zeova ne d sũur fãa la d ra teeg d meng bãngr ye!—Yel. 3:5.
3. a) A Zeova teegr baooda bõe maanego? b) Bõe yĩng tɩ kẽer mi n bas a Zeova teegr n teeg b mense?
3 D wilgdame tɩ d teega a Zeova ne d sũur fãa, d sã n tũud a noyã n welgd d zu-loeesã. Bũmb d sẽn tõe n maand n wilgd rẽ yaa d sẽn na n pelgd d pʋg n pʋʋsd-a wakat fãa n kot-a sor-wilgri. La ne neb wʋsgo, yaa toog tɩ b teeg a Zeova zãng-zãnga. Wala makre, saam-bi-poak a ye yʋʋr sẽn boond t’a Lin yeela woto: “Mam maoa wʋsg n yaool n wa na n tõog n teeg a Zeova ne m sũurã fãa.” Bõe yĩnga? A paasa woto: “Mam ba wã ra pa be ne tõnd ye. M ma me ra pa get m yell ye. Rẽ kɩtame tɩ mam sɩng m meng yell gesg tɩ m ket n paoodẽ.” Woto fãa kɩtame tɩ yaa toog ne-a t’a teeg ned wall Wẽnnaam. Neb kẽer me minim wall bũmb toor-toor b sẽn tõog n maan tõe n wa kɩtame tɩ b bas a Zeova teegre, n teeg b mense. Wala makre, kãsem-soab minim yĩng tõe n wa kɩtame t’a sɩng tigingã yell ning manegr n pa reng n pʋʋs Wẽnnaam n kos sõngr ye.
4. Bõe yell la d na n gom sõs-kãngã pʋgẽ?
4 D sã n wa pʋʋs a Zeova n kos sõngre, a ratame tɩ d maan d sẽn tõe fãa n tũ a sor-wilgrã. La wãn to la d tõe n basd d yɛlã ne Wẽnnaam, la d maand d sẽn tõe fãa n welgd d zu-loeesã? D sã n wa rat n yãk yam n maan bũmbu, d segd n gũusa ne bõe? D sã n wa be kʋɩɩbg taoore, bõe yĩng tɩ d segd n pʋʋse? Sẽn na yɩl n leok sogs-kãensã, d na n goma Biiblã kibay kẽer yelle.
Zu-loɛɛg sã n wa kɩt tɩ d maand yɩɩre
5, 6. Rĩm a Senakeriib sẽn wa n dat n zab ne Zerizalɛmmã, a Ezekɩas manesem yɩɩ wãna?
5 Biiblã goma Zida rĩm a Ezekɩas yell n yeel woto: “Yẽ tũu Zusoabã n ka tol n bʋdg n bas bãmb ye. La yẽ saka tõod nins fãa Zusoabã sẽn da kõ a Moiizã.” A sɩd ra “teega Zusoab a Wẽnnaam.” (2 Rĩm 18:5, 6) Wakat n da zĩnd tɩ Asiri rĩm a Senakeriib ne a sodaasã zab n tõog Zida tẽns wʋsgo, n wa rat n zab ne Zerizalɛm. Woto kɩtame tɩ rĩm a Senakeriib tʋm a sodaasã Zerizalɛm, la a tʋm a Rabsake ne koe-taasdb a taab tɩ b tɩ yaal Zerizalɛm nin-buiidã la b yɛɛs-ba. A Ezekɩas manesem yɩɩ wãna? A kẽnga a Zeova roogẽ wã, n tɩ pʋʋs-a n yeel woto: “Zusoab a Wẽnnaam, bɩ y fãag tõnd bãmb nusẽ tɩ dũniyã rãmb fãa bãng tɩ yaa yãmb bal n yaa Wẽnnaam.”—2 Rĩm 19:14-19.
6 A Ezekɩas kosa a Zeova sõngre, la a maana bũmb me n na n welg yellã. Wala makre, nand t’a kẽng wẽnd-doogẽ wã, a yeela nin-buiidã tɩ b ra leok a Rabsake no-baoodmã ye. Sẽn paase, a tʋma neb tɩ b tɩ kos no-rɛɛs a Ezai saglse. (2 Rĩm 18:36; 19:1, 2) A leb n pa tol n maan bũmb a sẽn mi tɩ pa na n ta a Zeova yam ye. Wala makre, a pa bao Ezipt wall tẽns a taab sõngr ye. Rẽnd a Ezekɩas pa teeg a meng ye. A teega a Zeova. Rẽ poore, a Zeova kɩtame t’a malɛk a ye kʋ Asiri sodaas 185000, t’a Senakeriib ‘zoe n kuil’ Niniivi.—2 Rĩm 19:35, 36.
7. Bõe yĩng t’a Ann ne a Zonas fãa pʋʋsgã tõe n keng d raoodo?
7 Levi ned a Ɛlkana pag a Ann ra wa n data biig n pa tõe n paame, n da maand yɩɩr wʋsgo. La a teega a Zeova, n pʋʋs-a n wilg-a a zu-loɛɛgã. (1 Sãm. 1:9-11, 18) A Zeova no-rɛɛs a Zonas ra wa n tõdga a noore, t’a kɩt tɩ zĩm-bedr vol-a. La a Zonas pʋʋs-a lame n yeel woto: “Zusoaba, mam da pʋʋsa yãmb m toogã pʋgẽ, la yãmb leoka maam. Mam da zĩnda kɩɩm-kulg n bool yãmb tɩ y wa sõng-ma, la yãmb wʋma m goamã.” (Zon. 2:2, 3, 11) D sẽn mi tɩ baa d zu-loɛɛg sẽn wat ne yɩɩr to-to, d tõe n pʋʋsa a Zeova n kos a sõngrã, sɩd kengda d raood wʋsgo!—Karm-y Yɩɩl Sõamyã 55:2, 17.
8, 9. A Ezekɩas ne a Ann la Zonas fãa pʋʋsgã wilgdame tɩ bõe n da pak-b n yɩɩda, la rẽ kõta tõnd yam bʋgo?
8 A Ezekɩas ne a Ann la a Zonas fãa mak-sõngã sõngd-d lame tɩ d bãng d sẽn segd n pʋʋs n kos bũmb ninga, d sã n wa be zu-loees pʋgẽ. Baa ne b tãabã fãa zu-loees sẽn da namsd-bã, b pʋʋsgã wilgdame tɩ sẽn da pak-b ned kam fãa wã pa a we n paam a meng ne a zu-loɛɛgã bal ye. Sẽn da pak-b n yɩɩd yaa Wẽnnaam yʋʋrã waoogre, la a raabã maanego. A Ezekɩas sũur sãama b sẽn da paoogd Wẽnnaam yʋʋrã. A Ann pʋlmame t’a na n kõo Wẽnnaam bi-ribl ning a sẽn da sɩng n dat ne a sũur fãa wã, t’a tʋm sẽk-roogẽ wã Silo. A Zonas me yeela woto: “Bũmb ning mam sẽn pʋlem yãmbã, m na n dolame.”—Zon. 2:10.
9 D sã n wa tar zu-loɛɛg n pʋʋsd n kot sõngre, yɩta sõma tɩ d tags bũmb nins tõnd sẽn pʋʋsd n kotẽ wã yell neere. Rẽ yĩnga sẽn pak tõndã yaa d we n paam d meng ne d zu-loɛɛgã bɩ, bɩ d ningda a Zeova la a raabã d yamẽ? Zu-loɛɛg sã n wa namsd-do, d tõe n maanda yɩɩr wʋsg hal t’a Zeova raabã pidsg la a tũudmã yell pa le pak-d ye. D sã n wa pʋʋsd a Zeova n kot sõngre, d segd n tẽeg n kosame t’a kɩt t’a yʋʋrã paam waoogre, la t’a wilg tɩ yẽ n segd n yɩ yĩngr la tẽng naaba. D sã n maan woto, na n sõng-d lame tɩ baa d yellã sã n wa pa baas wa d sẽn da ratã, bɩ d kell n tall yam-sõngo. Wakat kẽere, a Zeova tõe n leoka d pʋʋsgo, n kõ-d pãng sẽn na yɩl tɩ d tõog n yals kãn-kae zu-loɛɛg taoore.—Karm-y Ezai 40:29; Yɩɩl Sõamyã 121:1, 2.
D sã n wa segd n yãk yam n maan bũmbu
10, 11. A Zozafat sẽn da wa n seg zu-loɛɛgã, bõe la a maan-yã?
10 Y sã n wa segd n yak yam n maan bũmb sẽn tar yõod wʋsgo, y maanda wãna? Rẽ yĩnga y rengd n yãka y sẽn datã n yaool n kos a Zeova t’a ning y yam-yãkrã bark bɩ? Bãng n yãk yam tɩ zemsã wɛɛngẽ, Zida rĩm a Zozafat kõo tõnd mak-sõngo. Moaab ne Amõ nebã ra wa n dat n zaba ne Zida. La Zida nebã pãng ra pa ta-b ye. Bõe la a Zozafat ra na n maane?
11 Biiblã yeelame tɩ “rabeem yõka a Zozafat t’a yãk yam n na n bao Zusoabã.” A kɩtame tɩ Zida nebã fãa loe noore, la a tigim-b sẽn na yɩl tɩ b naag taab n “bao Zusoabã sõngre.” Rẽ poore, a yalsa Zida la Zerizalɛm nebã sʋk n pʋʋse. A wa n yeela woto: “Tõnd Wẽnnaam, bɩ y sɩbg bãmba, tɩ bõe, tõnd ka tar pãng sẽn na n tõog zãma-kãsen-kãngã sẽn wat n na n zab ne tõndã ye. Tõnd ka mi d sẽn na n maan bũmb ning ye, d geta yãmb bala.” Wẽnnaam a Zeova wʋma a Zozafat pʋʋsgã, n maan yel-solemd n fãag-ba. (2 Kib. 20:3-12, 17) D sã n wa segd n yãk yam n maan bũmbu, sẽn yɩɩd fãa bũmb sẽn tõe n maneg wall sãam zood ning d sẽn tar ne a Zeova wã, d segd n teeg-a lame, la d ra teeg d meng bãngr ye.
12, 13. D sã n wa rat n yãk yam n maan bũmbu, yam-bʋg la rĩm a Davɩɩd mak-sõngã kõt-do?
12 La d sã n wa tar zu-loɛɛg tɩ wõnd a welgr pa toog ne-do, wala makre, d sã n zoe n sega a buudu, d segd n maana wãna? Rĩm a Davɩɩd kõ-d-la mak-sõng rẽ wɛɛngẽ. Amalɛk nebã sẽn da wa n zab n tõog Ziklag n yõg a Davɩɩd pagbã ne a kambã n paas a sodaasã zags rãmbã n tall n loogã, a Davɩɩd pʋʋsa a Zeova n sok-a woto: “M babs-b bɩ? M na n paam-b lame?” T’a Zeova leoke: “Babs bãmb n tɩ reeg neb nins b sẽn yõgã.” A Davɩɩd sakame n kẽnge, n tõog n deeg “bũmb nins fãa Amalɛk nebã sẽn da wʋkã.”—1 Sãm. 30:7-9, 18-20.
13 Amalɛk nebã sẽn zab ne Ziklagã poor bilfu, Filisti nebã waame n na n zab ne Israɛll nebã. La a Davɩɩd le soka Wẽnnaam a sẽn segd n maanega, tɩ Wẽnnaam leok-a t’a ‘kẽng t’a na sõng-a t’a tõoge.’ (2 Sãm. 5:18, 19) Dẽ poor bilfu, Filisti nebã le wa n na n zaba ne a Davɩɩde. So-kãngã, a Davɩɩd ra na n maana wãna? A ra na n tagsame tɩ yell a woto buud sẽn zoe n paam-a naoor a yiibã, a segd n tɩ zaba ne Wẽnnaam bɛɛbã bɩ, bɩ a na n baoa a Zeova sor-wilgri? A Davɩɩd pa teeg bũmb ning a sẽn tõog n maan pĩndã ye. A le pʋʋsa a Zeova n kos-a sõngre. Ad a Davɩɩd sũur segd n yɩɩ noog a sẽn maan woto wã! Bala so-kãngã, Wẽnnaam leoorã yɩɩ toore. (2 Sãm. 5:22, 23) D tõe n tagsame tɩ zu-loees kẽer welgr pa toogo, la d segd n gũusame n da wa teeg d menga, d sẽn zoe n tõog n welg b buud yĩng ye.—Karm-y Yelbũn 20:24.
14. Sagl-bʋg la a Zozue ne a Gabaõ nebã kibarã kõt-do?
14 D fãa yaa koangdba. Woto kɩtame tɩ baa tigingã kãsem-dãmb nins sẽn tar minim wʋsgã pa segd n yĩm tɩ b sã n wa rat n yãk yam n maan bũmbu, b segd n kosa a Zeova sor-wilgr ye. Wala makre, tẽeg-y bũmb ning sẽn paam a Zozue ne Israɛll kãsem-dãmbã, Gabaõ nebã sẽn da wa n maan sɩlem sẽn na yɩl t’a Zozue ra zab ne-bã. Gabaõ nebã maana wa b yita tẽn-zãrgẽ, t’a Zozue ne Israɛll kãsem-dãmbã sak n maan kaool ne-ba, n pa reng n kos a Zeova sor-wilgr ye. Baa a Zeova sẽn pa kɩt tɩ b sãam kaoolã, a kɩtame tɩ b gʋls kibarã Biiblã pʋgẽ tõnd sõngr yĩnga.—Zoz. 9:3-6, 14, 15.
D sã n wa be kʋɩɩbg taoore
15. Sẽn na yɩl tɩ kʋɩɩbg ra tõog-do, bõe yĩng tɩ yaa tɩlae tɩ d pʋʋse?
15 “Yel-wẽnã tõog” sẽn be d yĩnsã wilẽ wã yĩnga, d segd n maanda d sẽn tõe fãa n maood ne d tʋls-wẽnsã. (Rom 7:21-25) La d tõe n tõogame. Wãn to? A Zezi wilga a karen-biisã tɩ sẽn na yɩl tɩ kʋɩɩbg ra tõog-ba, b segd n pʋʋsame. (Karm-y Luk 22:40.) La d sã n wa pʋʋs tʋls-wẽng poorẽ t’a pa looge, d segd n ket n kota Wẽnnaam yam sẽn na yɩl n bãng n mao ne kʋɩɩbgã, bala Wẽnnaam ‘kõta nebã fãa ne yamleoog n ka lengd-b’ ye. (Zak 1:5) A Zak goma bũmb a to me sẽn tõe n sõng-d tɩ d mao ne tʋls-wẽnsã yelle. A yeelame tɩ ned tẽeb sã n komse, a tõe n ‘boola Wẽnnaam tẽedbã kãsem dãmbã tɩ b tik a soab ne kaam ne Zusoabã yʋʋr n pʋʋs Wẽnnaam a yĩnga, la tɩ tẽeb pʋʋsg na maag-a.’—Zak 5:14, 15.
16, 17. Sẽn na yɩl tɩ kʋɩɩbg ra tõog-do, wakat bʋg la d segd n pʋʋs tɩ naf-d n yɩɩda?
16 Yaa sɩd tɩ sẽn na yɩl tɩ kʋɩɩbg ra tõog-do, yaa tɩlae tɩ d pʋʋse, la d tog n bãnga wakat ning d sẽn segd n pʋʋsã. Tẽeg-y bi-bɩɩg ning yell b sẽn gomd Yelbũn 7:6-23 pʋgẽ wã. Daar a yembre, a tũu sor zĩ-sobd wakate, n yaool n da miẽ tɩ pʋg-yoodr n be be. Pʋg-yoodrã boola bi-bɩɩgã t’a wa tɩ b kuli, t’a pa tõog n mao ne makrã ye. Woto kɩtame t’a pʋg-a wa naaf b sẽn tar n debd kodgre. Sɩnga wãn tɩ bi-bɩɩgã wa tɩ tũud so-kãngã? Biiblã sẽn yeel t’a “ka tar yamã,” rat n yeel t’a pa tar minimã, tõe t’a ra maooda ne tʋls-wẽnse. (Yel. 7:7) Yaa wakat bʋg la bi-bɩɩgã ra segd n pʋʋs tɩ naf-a n yɩɩda? Yaa sɩd tɩ pagã sẽn da wa n gomd ne-a wã, a ra tõe n pʋʋsa sasa buud fãa tɩ sõng-a. La sasa ning a sẽn da segd n pʋʋs tɩ naf-a n yɩɩd yaa a sẽn wa n dat n dɩk so-kãngã.
17 Rũndã-rũndã, rao tõe n maooda sẽn na yɩl n da ges yoob yɛl ye. La a sã n pak ẽntɛrnetã n dat n kẽ zĩig a sẽn mi tɩ fot rãmb wall filim dãmb sẽn wilgd yoob yɛl n be be yẽ? Woto maaneg ne bi-bɩɩg ning yell Yelbũn sak a 7 soabã sẽn gomdã sẽn maanã fãa yaa a ye. Ad rẽ maaneg sɩd yaa yell tɛkẽ! Ned sã n dat n tõog n da ges yoob yɛla, nand t’a pak ẽntɛrnetã, a segd n pʋʋsa a Zeova n kos-a sõngre.
18, 19. a) Bõe yĩng tɩ yɩl n tõog n mao ne kʋɩɩbg pa nana ne-do, la wãn to la d tõe n tõoge? b) Y yãka yam n na n maand bõe?
18 Yɩl n tõog n mao ne kʋɩɩbg wall minim-wẽns pa nana ye. Sɩd me, tʋm-tʋmd a Poll yeela woto: “Yĩngã ratem zabda ne sɩɩg sõngo, la sɩɩg sõng zabda ne yĩngã ratem.” Woto kɩtame tɩ tõnd pa ‘tõe n maan d sẽn dat ye.’ (Gal. 5:17) Yɩl n tõog maoorã, segdame tɩ tags-wẽns sã n wa kẽ d sũurẽ wall d wa n bee kʋɩɩbg taoore, bɩ d yɩ tao-tao n pʋʋs ne d sũur fãa. Rẽ poore, d segd n maoa d pãng tɛk n da maan wẽng ye. Tẽeg-y tɩ “yãmb nan ka paam makr baa a yembr sẽn nan ka mak ninsaal ye.” Sẽn paase, ne a Zeova sõngre, d tõe n kell n sak-a-la ne d sũur fãa.—1 Kor. 10:13.
19 D sã n wa tar zu-loɛɛga, wall d segd n yãka yam n maan bũmb tɩ pa nana ne-do, pa rẽ bɩ d wa n bee kʋɩɩbg taoore, pʋʋsgã sẽn yaa kũun sẽn ka to a Zeova sẽn kõ-dã tõe n sõng-d lame. Ne pʋʋsgã maasem, d wilgda a Zeova tɩ d teeg-a lame. D segdame me n ket n kot Wẽnnaam t’a tũnugd ne a vʋʋsem sõngã n wilgd-d sor la a kõt-d pãnga. (Luk 11:9-13) Bɩ tõnd ned kam fãa ket n teegd a Zeova la a ra teegd a meng bãngr ye.
[Tẽngr note]
^ sull 1 D toeema yʋyã.
Y tẽrame bɩ?
• Teeg a Zeova wã wɛɛngẽ, mak-sõng bʋg la a Ezekɩas ne a Ann la Zonas fãa kõ tõndo?
• Wãn to la a Davɩɩd ne a Zozue fãa kibarã wilgd tɩ d sã n wa rat n yãk yam n maan bũmbu, d segd n gũusame?
• Sẽn na yɩl tɩ kʋɩɩbg ra tõog-do, wakat bʋg la d segd n pʋʋse?
[Zãmsgã sogsgã]
[Foto seb-neng 13]
Sẽn na yɩl tɩ kʋɩɩbg ra tõog-do, wakat bʋg la d segd n pʋʋs tɩ naf-d n yɩɩda?
