Bõe yĩng tɩ d rat vʋʋsem sõngã sor-wilgri?
Bõe yĩng tɩ d rat vʋʋsem sõngã sor-wilgri?
“Yãmb yaa mam Wẽnnaam. Bɩ yãmb sɩɩgã sẽn yaa sõngã yãag maam.”—YƖƖL 143:10.
1. Rɩk-y makr n wilg tɩ f sã n dat n kẽng zĩig f sẽn nan zɩ n kẽnge, yɩta sõma tɩ ned sẽn mi zĩigã sõma wilg-f sore.
TAGS-Y n ges-y wa yãmb sẽn na n dat n kẽng zĩig y sẽn da nan zɩ n kẽnge, tɩ ned y sẽn kɩs sɩd t’a zoe n kẽnga be yãagd-yã. A soabã sã n sɩd mii sorã sõma, a na n tall-y lame tɩ y ta. Y sã n tũ a sor-wilgrã, y pa na n menem ye.
2, 3. a) Pãn-bʋg sẽn yaa kãseng la a Zeova tall n tʋm yʋʋm ka tɛk sẽn looge? b) Bõe n kɩt tɩ d miẽ tɩ Wẽnnaam vʋʋsem sõngã tõe n wilg-d-la sore?
2 La sor-wilgd a to n be n tar yõod n yɩɩda. Yaa bʋgo? Yaa pãng ning yell b sẽn gomd Biiblã pipi vɛrse rãmb a yiibã pʋgẽ wã. Sɩngr sebrã goma bũmb nins a Zeova sẽn naan yʋʋm ka tɛk sẽn loogã yelle, n yeel woto: “Hal sɩngr wakate, Wẽnnaam naana saasã la tẽngã.” La d miime tɩ yaa ne pãn-kãseng maasem la a naan bũmba fãa, bala, kibarã paasa woto: “Wẽnnaam sɩɩgã ra fugda koom zugu.” (Sɩng. 1:1, 2) Yaa pãn-bʋg la Wẽnnaam tall n tʋme? Yaa a vʋʋsem sõngã. Ninsaalbã la bũmb a taabã fãa sẽn be wã yaa a Zeova n naan-b ne a vʋʋsem sõngã maasem.—Zoob 33:4; Yɩɩl 104:30.
3 D miime t’a Zeova talla a vʋʋsem sõngã n naan tõndo. La rẽ yĩnga vʋʋsem sõngã tõe n naf-d-la d vɩɩmã zĩis a taab pʋsẽ bɩ? Wẽnnaam Bi-ribl a Zezi wilgame tɩ tõeeme, bala a yeela a karen-biisã tɩ ‘sɩɩgã na n yãag-b-la sɩdã fãa pʋgẽ.’ (Zã 16:13) Sɩ-kãng yaa bõe, la bõe yĩng tɩ d segd n bas t’a wilgd-d sore?
Vʋʋsem sõngã sẽn yaa bũmb ningã
4, 5. a) Tags-bʋg sẽn pa zems la neb nins sẽn tẽed tɩ Wẽnnaam yaa mens a tãabã tar vʋʋsem sõngã zugu? b) Wãn to la y tõe n bilg vʋʋsem sõngã sẽn yaa bũmb ningã?
4 Tõe tɩ neb wʋsg y sẽn segd koe-moonegã sasa sẽn tẽed tɩ vʋʋsem sõngã yaa bũmb ningã pa zems ne Biiblã sẽn yetã ye. Sẽn tẽed-b tɩ Wẽnnaam yaa mens a tãabã tudgame n tẽed tɩ vʋʋsem sõngã yaa neda, la t’a zema Wẽnnaam sẽn yaa d Ba wã. (1 Kor. 8:6) La yaa vẽeneg tɩ Biiblã pa wilgd tɩ Wẽnnaam yaa mens a tãab ye.
5 Sã n yaa rẽ, vʋʋsem sõngã yaa bõe? Yaa hebre wã gom-bil ning sẽn yaa “ruah” wã la b sẽn lebg Sɩngr 1:2 pʋgẽ tɩ “sɩɩgã.” B tõe n lebg-a lame me tɩ “sobgo.” (Sɩng. 8:1) Baa d sẽn pa tõe n yã sobgã, d nee bũmb nins a sẽn maandã. Yaa woto me ne vʋʋsem sõngã. D pa tõe n yã-a, la a tõe n kɩtame tɩ bũmb maane. Vʋʋsem sõngã pa ned ye. A yaa pãng sẽn yit Wẽnnaam nengẽ. Yaa pãn-kãng la Wẽnnaam tũnugd n kɩtdẽ tɩ ninsaalbã la bũmb a taab maand a raabã. Rẽ yĩnga, yaa toog tɩ d sak n tẽ tɩ pãn-kãseng a woto sɩd yita Wẽnnaam sẽn yaa Sẽn-tõeyã-a-fãa wã nengẽ bɩ? Ayo!—Karm-y Ezai 40:12, 13.
6. Bõe la a Davɩɩd kos a Zeova?
6 Rẽ yĩnga a Zeova ket n tõe n tũnuga ne a vʋʋsem sõngã n wilg-d sor bɩ? A pʋlma yɩɩl-gʋlsd a Davɩɩd woto: “Mam na n zãmsa foom n wilg foom sor ning fo sẽn tog n tũ. Mam nif geta foom, la mam yaa fo sagenda.” (Yɩɩl 32:8) La rẽ yĩnga a Davɩɩd da rata woto bɩ? N-ye, bala, a kosa a Zeova woto: “Bɩ y zãms maam tɩ m maan sẽn tat yãmb yam, tɩ bõe, yãmb yaa mam Wẽnnaam. Bɩ yãmb sɩɩgã sẽn yaa sõngã yãag maam.” (Yɩɩl 143:10) Tõnd me segd n baooda vʋʋsem sõngã sor-wilgr ne d sũurã fãa. Bõe yĩnga? D na n goma bʋʋm a naas yelle.
D pa tõe n bãng d sor d toor ye
7, 8. a) Bõe yĩng tɩ d pa tõe n bãng d sor dũni-kãngã pʋgẽ? b) Rɩk-y makr n wilg bʋʋm ning sẽn kɩt tɩ d pa tõe n bãng sor d toor dũni-kãngã pʋgẽ wã.
7 Pipi bʋʋm sẽn kɩt tɩ d segd n bas tɩ vʋʋsem sõngã wilgd-d sorã, yaa tɩ tõnd pa tõe n bãng d sor d toor ye. A Zeova pa kõ tõnd tõog tɩ d tõe n maan dẽ ye. Sẽn paase, d yaa koangdba. Rẽ kɩtame tɩ d sã n mak d toor n na n bao n bãng d sẽn segd n vɩɩmd to-to tɩ zemsã bɩ d wae n tudgdẽ. Biiblã yeela woto: “Yaa Zusoabã n wilgd ned sore. Ninsaal na n yɩɩ wãn n bãng a sore?” (Yel. 20:24) Bõe yĩnga? A Zeova wilga a Zeremi bũmb ning sẽn kɩt tɩ yaa woto wã, n yeele: “Ninsaal sũur tara ziri n yɩɩd bũmb fãa, la a yaa wẽng wʋsgo. Yaa ãnda n tõe n bãng-a?”—Zer. 17:9; Mat. 15:19.
8 Tags-y n ges-y wa ned sẽn na n dat n tog sore, n segd n pɩʋʋg we-raoog wall rasempʋɩ-kãseng a sẽn zɩ n pɩʋʋge. A sã n dɩk sorã n pa bao ned sẽn mi zĩigã sõma t’a yãag-a, rẽ yĩnga na yɩ yam tʋʋmd sɩda? A sẽn pa mi a sẽn tõe n maan to-to n gil zu-loees nins a sẽn tõe n seg weoogã pʋgẽ wã, la a pa mi a sẽn na n maan to-to n ta a sẽn datẽ wã n pa menemã, a sã n sɩd pa paam yãagre, tõe n tũu ne a yõore. Woto me, ned sã n tagsdẽ t’a pa rat Wẽnnaam sor-wilgr dũni-kãngã sẽn yaa wẽngã pʋgẽ, a na n paama yelle. Bũmb d sẽn tõe n maan n tõog n vɩɩmd dũni-kãngã pʋgẽ tɩ zems yaa d sẽn na n pʋʋsd a Zeova, n kot bũmb ning a Davɩɩd sẽn da kosã. A ra kosa woto: “Zusoaba, kɩt-y tɩ mam bãng yãmb soayã. Bɩ y zãms maam tɩ m tũ yãmba.” (Yɩɩl 25:4; 23:3) Wãn to la d tõe n paam sor-wilgr-kãnga?
9. Wa seb-neng 19 fotã sẽn wilgdã, wãn to la Wẽnnaam vʋʋsem sõngã tõe n wilg-d sor sõma?
9 D sã n yaa sik-m-mens rãmb la d sakd n teegd a Zeova, a na n kõt-d-la a vʋʋsem sõngã tɩ wilgd-d sore. Wãn to la pãn-kãng na n sõng-do? A Zezi yeela a karen-biisã woto: “Sõngdã sẽn yaa sɩɩg sõng m Ba sẽn na n tʋm ne mam yʋʋrã na n zãmsa yãmb bũmb fãa. La b na n tẽega yãmb bũmb nins fãa mam sẽn da togs yãmbã.” (Zã 14:26) A Zezi sẽn wilg nebã bũmb ninsã bee Wẽnnaam Gomdã pʋgẽ. D sã n zãmsd Wẽnnaam Gomdã wakat fãa, la d kot Wẽnnaam sõngre, vʋʋsem sõngã na n sõng-d lame tɩ d wʋm a yel-zulumsã võore, tɩ kɩt tɩ d tõogd n sakd-a. (1 Kor. 2:10) Sẽn paase, yell sã n wa tiig n paam-do, Wẽnnaam vʋʋsem sõngã na n sõng-d lame tɩ d bãng d sẽn segd n maanega. A na n sõng-d lame tɩ d tẽeg Biiblã noy d sẽn zoe n zãmse, la a sõng-d me tɩ d bãng d sẽn tõe n tũ no-kãens to-to n tõog n yãk yam tɩ zemse.
Vʋʋsem sõngã wilga a Zezi sore
10, 11. Bõe la a Zezi ra rata, la wãn to la vʋʋsem sõngã sõng-a?
10 Bʋʋm a yiib-n-soab sẽn kɩt tɩ d segd n bas tɩ vʋʋsem sõngã wilgd-d sorã yaa tɩ Wẽnnaam tũnuga ne-a n wilg a Bi-riblã sore. Nand tɩ Wẽnnaam Bi-ribl-yendã wa tẽngã zugu, a ra miime t’a na n paama vʋʋsem sõngã sõngre. A ra mii bãngr-gomd ning sẽn da gom a yelle, n yeel woto wã: “Zusoabã sɩɩgã na n paa bãmb zugu, yaa yam ne yẽesem sɩɩga, la saglg ne pãng sɩɩga, la bãngr la Zusoabã zoees sɩɩga.” (Ezai 11:2) A Zezi ra miime tɩ vɩɩmã pa na n yɩ nana ne-a tẽngã zug ye. Ad a sɩd ra segd n data ne a sũur fãa, n wa paam Wẽnnaam vʋʋsem sõngã sõngre!
11 A Zeova pidsa a gomdã. A Luk evãnzillã pʋgẽ, a wilga bũmb sẽn maan a Zezi lisgã poor bilf bal n yeel woto: “A Zezi sẽn pid ne sɩɩg sõngo, b yii Zʋrdẽ kʋɩlgã, la sɩɩg sõng talla bãmb tɩ b kẽng weoogẽ.” (Luk 4:1) A Zezi tɩ loeya noor n da pʋʋsdẽ la a bʋgsdẽ. Wõnda wakat kãnga, a Zeova wilga a Bi-riblã bũmb nins a sẽn segd n maanã, la a wilg-a bũmb nins sẽn da gũud-a wã. Wẽnnaam vʋʋsem sõngã ra tʋmda a Zezi sũurã la a yamã pʋgẽ, t’a tagsa wã la a yam-yãkr fãa ra zemsdẽ. Rẽ kɩtame t’a ra mi a Ba wã raab wakat fãa, n maand rẽ.
12. Bõe yĩng tɩ d segd n kot Wẽnnaam a vʋʋsem sõngã?
12 A Zezi sẽn da mi vʋʋsem sõngã sẽn da nafd-a to-to wã, a wilga a karen-biisã tɩ b segd n pʋʋsda Wẽnnaam n kot vʋʋsem sõngã, la b tũud a sor-wilgrã. (Karm-y Luk 11:9-13.) Bõe yĩng tɩ d segd n kot Wẽnnaam a vʋʋsem sõngã? Bala, a tõe n sõng-d lame tɩ d toeem d tagsa wã tɩ wõneg Kiristã tagsgo. (Rom 12:2; 1 Kor. 2:16) D sã n basdẽ tɩ vʋʋsem sõngã wilgd-d sore, d na n tagsda wa Kiristã la d rɩkd a togs-n-taare.—1 Pɩɛ. 2:21.
A Sʋɩtãan sẽn dat yaa a menes-do
13. Dũniyã yamã yaa bõe, la bõe la a kɩtd tɩ nebã maandẽ?
13 Bʋʋm a tãab-n-soab sẽn kɩt tɩ d segd n tʋlg tɩ Wẽnnaam vʋʋsem sõngã wilgd-d sorã yaa tɩ sã n pa tũ ne a sõngre, yam ning sẽn so dũniyã neb rũndã-rũndã wã tõe n menes-d lame. Yaa yam-kãng sẽn tar pãng wʋsgã n tusd nebã tɩ b maand bũmb toor-toor sẽn pa zems ne vʋʋsem sõngã sor-wilgrã. A pa sõngd ned t’a tagsgã wõneg Kiristã rẽnd ye. A kɩtdame t’a soabã tagsa wã la a tʋʋmã wõnd dũniyã naab a Sʋɩtãan rẽndã. (Karm-y Efɛɛz rãmb 2:1-3; Tɩt 3:3.) Ned sã n bas tɩ dũniyã yam soog-a t’a sɩng yĩngã ratem sakre, wata ne bi-wẽnse. Ned a woto pa tõe n paam Wẽnnaam soolmã ye.—Gal. 5:19-21.
14, 15. Wãn to la d tõe tɩ dũniyã yam ra soog-do?
14 A Zeova kõta tõnd bũmb nins fãa d sẽn segd n paam n tõog tɩ dũniyã yam ra kẽ-dã. Tʋm-tʋmd a Poll yeelame tɩ d mao n “paam daood Zusoabã tũudum pʋgẽ n deeg bãmb pãn-kãsengã . . . n tõog wẽng wakate.” (Ef. 6:10, 13) A Zeova tũnugda ne a vʋʋsem sõngã n kõt tõnd pãnga, t’a Sʋɩtãan sẽn maood n dat n belg-dã ra tõog-d ye. (Wil. 12:9) Dũniyã yamã sẽn yaa wẽngã tara pãng hal tɩ d pa tõe t’a ra tol n kẽ-d baa bilf ye. La d tõe n maoome t’a ra soog-d ye. Sẽn paase, vʋʋsem sõngã sẽn sõngd tõndã pãng yɩɩd-a lame.
15 Tʋm-tʋmd a Pɩɛɛr goma neb nins sẽn da bas sɩdã yẽ wakatẽ wã yelle, n yeel woto: “Bãmb budgame n bas so-tɩrgã.” (2 Pɩɛ. 2:15) Tõnd pa “reeg dũniyã sɩɩg ye, tõnd deega sɩɩg sõng sẽn yit Wẽnnaam nengẽ,” tɩ kɩt tɩ d tõe n tall mi-beoog wʋsg rẽ yĩnga. (1 Kor. 2:12) A Zeova maanda bũmb toor-toor sẽn na yɩl tɩ zood ning d sẽn tar ne-a wã kell n tall pãngã. D sã n dɩt bõn-kãens yõod la d basdẽ tɩ vʋʋsem sõngã wilgd-d sore, d na n tõogd n maanda sẽn yaa tɩrga, n da sakd n tũud dũni-kãngã yamã ye.—Gal. 5:16.
Vʋʋsem sõngã kõt-d-la zʋg-sõma
16. Zʋg-sõma bʋs la vʋʋsem sõngã tõe n sõng-d tɩ d paame?
16 Bʋʋm a naas-n-soab sẽn kɩt tɩ d segd n tʋlg tɩ Wẽnnaam vʋʋsem sõngã wilgd-d sorã yaa t’a kõta neb nins sẽn sakd-a wã zʋg-sõma. (Karm-y Galat dãmb 5:22, 23.) Sãmbg sẽn ka be, d fãa ratame n yɩ neb sẽn nong d taaba, sẽn tar sũ-noogo, la sẽn nong laafɩ. Tõnd ned kam fãa ratame n yɩ sũ-mar soaba, maan-neer soab la sũ-maasem soaba. Sẽn paase, d sã n tar tẽeb sẽn tar pãnga, n tar sũ-bʋgsem la yõk-m-menga, nafd-d-la wʋsgo. Wẽnnaam vʋʋsem sõngã kõt-d-la zʋg-sõma sẽn nafd tõndo, la nafd d zagsã rãmb la d tigimsã neba. Yɩl n ket n wilgdẽ tɩ d tara zʋg-sõma kãensã, d segd n modgda wakat fãa, bala, d pa tõe n paam-b tɩ seke, d pa tõe me n wilg tɩ d tar-b lame tɩ sek ye.
17. Bõe la d tõe n maan n paam zʋg-sõma nins vʋʋsem sõngã sẽn kõtã?
17 Yɩta sõma tɩ d ned kam fãa sok a meng woto: “Rẽ yĩnga mam no-goamã la m tʋʋm-tʋmdɩ wã wilgdame tɩ m sakda vʋʋsem sõngã sor-wilgri, la tɩ m tara zʋg-sõma nins a sẽn kõtã bɩ?” (2 Kor. 13:5; Gal. 5:25) Rẽ poore, d sã n mik tɩ zʋg-sõma kãens kẽer la d pa tare, d segd n maneg n saka vʋʋsem sõngã n tõog n paam-ba. Rat n yeel tɩ d segd n baood n bãngda Biiblã sẽn yet bũmb ning zʋg-sõma nins a sẽn kõtã zugu, la d zãmsd tʋm-tʋmdã sɛb nins sẽn gomd zʋg-sõma kãens yellã. Rẽ na n kɩtame tɩ d bãng d sẽn tõe n maand to-to daar fãa n wilgdẽ tɩ d tara zʋg-sõma kãense. * D sã n ne Wẽnnaam vʋʋsem sõngã sõngr sẽn nafd tõnd mengã la d tẽed-n-taasã to-to wã, d yãtame tɩ d sɩd rata a sor-wilgri.
Yãmb basdame tɩ vʋʋsem sõngã
wilgd-y sor bɩ?
18. Vʋʋsem sõngã sor-wilgrã sakr wɛɛngẽ, mak-sõng bʋg la a Zezi kõ tõndo?
18 Biiblã wilgd-d lame t’a Zezi sẽn da wa n be tẽng zugã, Wẽnnaam vʋʋsem sõngã kõ-a-la pãn-kãsenga. A Zezi ra tʋlla a sõngr ne a sũur fãa. Sẽn paase, vʋʋsem sõngã sã n da wilg-a sore, a sakdame n tũ. (Mark 1:12, 13; Luk 4:14) Yãmb me maanda woto bɩ?
19. D sã n dat tɩ vʋʋsem sõngã wilgd-d sore, bõe la d segd n maane?
19 Rũndã-rũndã, Wẽnnaam vʋʋsem sõngã ket n sõngda neb nins sẽn dat a sor-wilgrã. Wãn to la y tõe n basdẽ t’a wilgd-y sore? Yaa y sẽn na n pʋʋsd a Zeova n kot-a a vʋʋsem sõngã, la y kot-a t’a sõng-y tɩ y sak a sor-wilgrã. (Karm-y Efɛɛz rãmb 3:14-16.) Zãmsd-y Biiblã sẽn yaa Wẽnnaam Gomdã a sẽn tũnug ne a vʋʋsem sõngã n kɩt tɩ b gʋlsã, n wilg tɩ y sɩd tʋllame tɩ vʋʋsem sõngã sõngd-yã. (2 Tɩm. 3:16, 17) Sakd-y sagls nins sẽn be a pʋgẽ wã tɩ wilgdẽ tɩ y sakda vʋʋsem sõngã sor-wilgrã. Y sã n maand woto fãa, y wilgdame tɩ y kɩsa sɩd tɩ dũni-kãngã pʋgẽ, a Zeova tõe n wilg-y-la sor tɩ zemse.
[Tẽngr note]
^ sull 17 Y sã n dat n bãng sɛb sẽn gomd zʋg-sõma nins vʋʋsem sõngã sẽn kõtã yell bɩ y ges Index des Publications Watch Tower. Sɩng-y zĩig ning b sẽn gʋls tɩ Fruit de l’esprit de Dieu wã tɛk gẽesgo, n bao liste par facette n ges be tẽngre.
Y tẽrame bɩ?
• Wãn to la vʋʋsem sõngã tõe n naf-do?
• Bʋʋm a naas n kɩt tɩ d segd n bas tɩ Wẽnnaam vʋʋsem sõngã wilgd-d sore. Bãmb la bʋse?
• Bõe la d tõe n maan n paam tɩ vʋʋsem sõngã wilgd-d sore?
[Zãmsgã sogsgã]
[Foto seb-neng 17]
A Zezi sẽn da wa n be tẽng zugã, Wẽnnaam vʋʋsem sõngã wilg-a-la sore
[Foto seb-neng 19]
Wẽnnaam vʋʋsem sõngã tʋmda b yamã la b sũyã pʋsẽ, n wilgd-b sore
