Sogsg piig b sẽn leoke

1 Pipi yel-wẽndã yɩɩ a Ãdem ne a Hawa sẽn kẽ ne taab bɩ?

▪ Leoorã: Neb wʋsg tagsdame tɩ tɩɩgã bil a Ãdem ne a Hawa sẽn da pa segd n dɩ wã rat n yeelame tɩ b ra pa segd n kẽ ne taab ye. La Biiblã pa yet woto ye.

Tags-y n ges-y: Nand tɩ Wẽnnaam naan a Hawa, a ra zoe n yeela a Ãdem t’a “ra sak n yãk sõma ne wẽng bãngr tɩɩgã biis n dɩ ye.” (Sɩngre 2:15-18) Sẽn mik t’a Ãdem da nan yaa a ye wã, d pa tõe n tags tɩ no-kãngã ra rat n yeelame t’a pa segd n kẽ ne a Hawa ye. Sẽn paase, Wẽnnaam yeela a Ãdem ne a Hawa vẽeneg “tɩ b rog kamb n pid dũniyã.” (Sɩngre 1:28) Yɩl n tõog n dog kamb wa Wẽnnaam sẽn yeelã, yaa tɩlae tɩ b kẽ ne taaba. La rẽ yĩnga, Wẽnnaam na sɩbg-ba, b sẽn kẽ ne taab n na n pids a noorã yĩng sɩda?—1 Zã 4:8.

Sẽn paase, a Hawa yãka tɩɩgã biis Wẽnnaam sẽn yeel tɩ b ra rɩ wã n dɩ a Ãdem sẽn da pa be ne-a sasa. Rẽ poore “a yãkame n kõ a sɩdã me sẽn be ne yẽ wã t’a rɩ.”—Sɩngre 3:6.

Sẽn na n baase, a Ãdem ne a Hawa sẽn kẽ ne taab n dog kambã, Wẽnnaam pa zab-b ye. (Sɩngre 4:1, 2) Dẽnd yaa vẽeneg tɩ tɩɩgã bil a Ãdem ne a Hawa sẽn da pa segd n dɩ wã ra pa rat n yeel tɩ b pa segd n kẽ ne taab ye. Ra yaa tɩɩg sɩd-sɩd bila, b sẽn da pa segd n dɩ.

2 Biiblã gɩdga pag ne rao lagengã bɩ?

▪ Leoorã: Biiblã pipi sebrã pʋgẽ, b wilgdame tɩ sɩngrẽ wã, Wẽnnaam naana “daoa la paga.” Rẽ poore, a yeelame t’a sẽn naanã fãa “yaa sõma wʋsgo.” (Sɩngre 1:27, 31) Kaoosg zugẽ, Wẽnnaam kɩtame tɩ b yeel pʋg-sɩdbã Biiblã pʋgẽ woto: “Maan sũ-noog ne f pag ninga fo sẽn peeg f bi-bɩɩlem wakatã . . . Nong yẽ a ye bala.” (Yelbũna 5:18, 19) Rẽ yĩnga Biiblã gom-kãensã pa wilgd tɩ pag ne rao lagengã pa gɩdg sɩda?

 Wẽnnaam naana poglmã ne raoolmã tɩ pag ne a sɩd tõe n kẽ ne taab n dog kamba. La a sẽn naan poglmã ne raoolmã to-to wã me kɩtame tɩ lagengã kõt pag ne a sɩd sũ-noog buudu, n wilgd tɩ b nonga taab wʋsgo. Pag ne rao lagengã tõe n kɩtame tɩ pag ne a sɩd paam n pids b tʋlsem.

3 Rao ne pag sã n vɩ ne taab n yaool n pa kẽ kãadem, yaa wẽng bɩ?

▪ Leoorã: Biiblã wilgda vẽeneg tɩ ‘Wẽnnaam na n kaoo nin-yoaadbã bʋʋdo.’ (Hebre dãmba 13:4) Gɛrk gom-bil ning b sẽn lebg moorã Biiblã pʋgẽ tɩ “yoobã” yaa porneia. La porneia wã võor yalmame. Yaa neb a yiib sẽn pa kẽ kãadem ne taab n yaool n gãe taab wall b tar b raoolmã bɩ b poglmã n maand sẽn pa segd buud fãa. * Woto yĩnga, Wẽnnaam nifẽ, rao ne pag sã n vɩ ne taab n yaool n pa kẽ kãadem, yaa wẽnga, baa b sã n tagsdẽ tɩ b na n wa kẽeme.

Baa rao ne pag sã n nong taab wʋsgo, Wẽnnaam datame tɩ b kẽ kãadem n yaool n kẽed ne taaba. Yaa Wẽnnaam n naan ninsaal n kɩt t’a tõe n nong a to. Wẽnnaam nonglmã yɩɩda bũmb fãa. Dẽnd a sẽn yeel tɩ yaa sẽn kẽ-b kãadmã bal n tar sor n na n lagemd taabã, pa zaalem yĩng ye. Sõsg ning sẽn sɩngd seb-neng a 8 wã wilgda bʋʋmã.

4 Rao tõe n talla sẽn yɩɩd pag a ye bɩ?

▪ Leoorã: Wakat n zĩnd tɩ Wẽnnaam bas tɩ rap tall pagb wʋsgo. (Sɩngre 4:19; 16:1-4; 29:18–30:24) La pa Wẽnnaam n lugl kãadem kõom ne pagb wʋsgã ye. A naana pag a ye bal n kõ a Ãdem.

Wẽnnaam kɩtame t’a Zezi Kirist lebg n tẽeg nebã t’a sɩng n datame tɩ rao tall pag a ye. (Zã 8:28) Nebã sẽn sok a Zezi bũmb kãadmã wɛɛngẽ, a yeel-b-la woto: “Naandã naana bãmb dao la pag hal sɩngrẽ, la . . . bãmb yeelame: ‘A yaa woto yĩnga dao na bas a ba ne a ma n zĩnd ne a paga, la bãmb b yiibã fãa na n yɩɩ yĩng a yembre.’”—Matɩe 19:4, 5.

 Wẽnnaam wa n kɩtame t’a Zezi karen-biig a ye me yeel woto: “Bɩ rao fãa paam a meng paga, la bɩ pag fãa paam a meng sɩda.” (1 Korẽnt dãmba 7:2) Biiblã leb n yetame tɩ b sã n na n bobl rao tʋʋmd kiris-neb tigingã pʋgẽ, a sã n kẽe kãadem, a tog n tara “pag a yembre.”—1 Tɩmote 3:2, 12.

5 Rogmã yaagr tɩtã gɩdgame bɩ?

▪ Leoorã: A Zezi pa yeel a karen-biisã tɩ b rog kamb bɩ b ra rog ye. A karen-biig baa a ye me pa yeel nebã tɩ b segd n doga kamb bɩ b pa segd ye. Biiblã pa tol n yeel tɩ rogmã yaagr gɩdgame ye.

Pag ne a sɩd tara sor n na n ges b sã n na n doga kamb bɩ b pa na n doge. Sã n mikame tɩ b na n dogame, b tara sor n na n yãk kambã sõor la b sẽn dat tɩ b rogmã yaag to-to. Pag ne a sɩd sã n na n bao tɩɩm n yaag rogmã, bee ne bãmba. La b segd n gũusame tɩ ra yɩ tɩɩm sẽn basd tɩ pʋgã kẽ t’a sãam-a ye. * Ned pa segd n kao a to bʋʋd rogmã yaagr wɛɛngẽ ye.—Rom dãmba 14:4, 10-13.

6 Pʋg yiisg yaa wẽng bɩ?

▪ Leoorã: Vɩɩmã yaa sõng Wẽnnaam nifẽ. Baa biig sẽn ket a ma pʋgẽ zoe n yaa yõor Wẽnnaam nifẽ. (Yɩɩl Sõamyã 139:16) Wẽnnaam ra yeelame tɩ ned sã n maan tɩ biig sẽn be a ma pʋgẽ ki, a soab tara taale. Woto wilgdame tɩ sã n yaa ne Wẽnnaam, ned sã n kɩt tɩ pʋg sãame, yaa nin-kʋʋre.—Yikri 20:13; 21:22, 23, Sebr Sõngo.

La biig rogem sasa tɩ logtoɛɛmbã sã n yeel tɩ na n tũu ne pagã wall biigã yõore, b maanda wãna? Sã n yaa woto, yaa pagã ne a sɩdã n na n yãk b sã n na n kɩtame tɩ yɩ pagã bɩ biigã n na n põse. *

7 Biiblã gɩdga kãadem kaoob bɩ?

▪ Leoorã: Biiblã wilgdame tɩ ned tõe n kaoa a kãadem. La a Zezi wilgame tɩ yaa bʋʋm a ye bal n kõt ned sor t’a kao a kãadem. A yeelame tɩ ‘ned sã n bas a pag tɩ ka yoob yĩnga, n dɩk a to a maanda yoobo.’—Matɩe 19:9.

Wẽnnaam kisa neb sẽn maand sɩlem n kaood b kãadem. A na n sɩbga neb nins sẽn basd b pag bɩ b sɩd bʋʋm faad yĩngã, sẽn yɩɩd fãa sã n mik tɩ yaa sẽn na yɩl n paam n kẽ kãadem ne ned a to.—Malaki 2:13-16; Mark 10:9.

8 Wẽnnaam tagsg yaa wãn ne rao ne rao la pag ne pag sẽn gãe taaba?

 ▪ Leoorã: Biiblã wilgda vẽeneg tɩ rap bɩ pagb sẽn gãe taabã yaa tʋʋm-dẽgd Wẽnnaam sẽn kisi. (Rom dãmba 1:26, 27; Galat dãmba 5:19-21) Baa Biiblã sẽn wilgd tɩ Wẽnnaam kisa tʋʋm-dẽgd a woto buudã, d miime me tɩ “Wẽnnaam nonga dũniyã hal tɩ b kõ b Biigã sẽn ka to, tɩ ned ninga fãa sẽn tẽed bãmb kõn sãam ye, la a na paam vɩɩm sẽn ka sɛta.”—Zã 3:16.

Baa kiris-neb hakɩkã sẽn kis tʋʋm-dẽgd a woto neb kẽer sẽn maandã, b maanda nebã buud fãa neere. (Matɩe 7:12) Wẽnnaam datame tɩ d “waoog nebã fãa.” Woto yĩnga, kiris-neb hakɩkã pa kisgd neda, baa sẽn tʋmd-b tʋʋm-dẽgd a woto wã ye.—1 Pɩɛɛr 2:17.

9 Ned sã n tũnugd ne selilɛɛr bɩ ẽntɛrnetã n maand bũmb sẽn pidsd pag ne rao lageng tʋlsem, yaa wẽng bɩ?

▪ Leoorã: Neb kẽer boonda taab ne selilɛɛr n gomd gom-dẽgdo, sẽn na yɩl n pids pag ne rao lageng tʋlsem. Kẽer me yaa mesaaz rãmb bɩ fot rãmb sẽn wat ne pag ne rao lageng tʋlsem la b toond taaba. Sãnda me yaa ẽntɛrnetã la b tũnugd n tʋmd tʋʋm-dẽgd ne taaba.

Biiblã pa gomd tʋʋm-kãensã yell ye. La a yetame: “Yoob ne dẽgd fãa la zoe-bõne, bɩ y ra sak n pʋd bõn-kãens yãmb sʋk ye, a wa sẽn zems Wẽnnaam neba. Da gom sẽn ka sõma la zɩlem beedo, la kʋʋsem goam ye.” (Efɛɛz rãmba 5:3, 4) Ned sã n tũnugd ne selilɛɛr bɩ ẽntɛrnetã n tʋmd tʋʋm-dẽgd a woto, a wat n tara tags-kɛg pag ne rao lagengã zugu. Kɩtdame me tɩ nebã pidsd pag ne rao lagengã tʋlsmã, n yaool n pa kẽ kãadem ye. Leb n kɩtdame tɩ nebã pa tõogd n yõkd b mens pag ne rao lagengã tʋlsmã wɛɛngẽ ye. Pʋd n kɩtdame tɩ b pidsd tʋlsem kãngã yaar-yaare.

10 Wẽnnaam tagsg yaa wãn ne ned sẽn salemd a raoolem bɩ a poglem?

▪ Leoorã: Neb kẽer salemda b raoolmã bɩ b poglmã sẽn na yɩl n pids pag ne rao lageng tʋlsem. Biiblã pa gomd yel-kãngã yell vẽeneg ye. La a yeta kiris-nebã woto: ‘Bɩ y kɩɩs y yĩngã ratem dũniyã zug ka, sẽn yaa yoobo la rẽgdo la wẽng ratem.’—Kolos rãmba 3:5.

Ned sẽn maand woto wat n geta neb a taabã wa bũmb a sẽn tõe n tall n pids a yĩngã ratem bala. Biiblã yeta tõnd vẽeneg tɩ ned sã n modgd n dat n bas minim kãngã, Wẽnnaam tõe n kõ-a-la “pãn-kãseng” t’a tõoge.—2 Korẽnt dãmba 4:7; Filip rãmba 4:13.

[Tẽngr not rãmbã]