Vʋʋsem sõngã wilga neb sor pipi kiris-nebã wakatẽ la rũndã-rũndã me

“Yaa sɩɩg sõng a yembr bal n maand bõn-kãense.”—1 KOR. 12:11.

1. Bõe yell la d na n gom sõs-kãngã pʋgẽ?

YƲƲMD 33 Pãntekotã raare, bõn-kãsems n maane. Yaa baraar la Wẽnnaam pʋdg a vʋʋsem sõngã a nin-buiidã zugu! (Tʋʋ. 2:1-4) Woto waa ne toeen-kãseng manesem ning a Zeova sẽn tar ne a nin-buiidã pʋgẽ. Sõsg ning sẽn loogã sõng-d lame tɩ d bãng tɩ Wẽnnaam tũnuga ne a vʋʋsem sõngã n sõng pĩnd wẽndẽ wẽn-tũudb tɩ b tõog n tʋm tʋʋm-kãsemse. La welg-bʋg n be Wẽnnaam sẽn tũnug ne a vʋʋsem sõngã to-to n sõng a nin-buiid nins sẽn zĩnd nand tɩ Kiristã rogã, la a sẽn sõng a Zezi pipi karen-biisã sʋka? La wãn to la Wẽnnaam vʋʋsem sõngã sẽn wilgd kiris-nebã sor rũndã-rũndã wã nafd-ba? Yaa sogs-kãensã la d na n leok sõs-kãngã pʋgẽ.

A Zeova “tʋm-tʋmd-poaka”

2. Wãn to la a Maari yã vʋʋsem sõngã tʋʋmde?

² Wẽnnaam sẽn wa n na n pʋgd a vʋʋsem  sõngã neb zug yĩngr-doog a ye pʋgẽ Zerizalɛmmã t’a Maari ra bee be. (Tʋʋ. 1:13, 14) La sẽn deng rẽ, a ra sɩng n miime t’a Zeova tõe n tũnuga ne a vʋʋsem sõngã n maan bõn-kãsemse. Yʋʋm pis-tã la zak sẽn deng rẽ, a Zeova rɩka a Biigã vɩɩm saasẽ n ning a Maari pʋgẽ wã tẽngã zugu. Baa a Maari sẽn da pa mi raoã, a rɩka pʋga. A pʋgã ‘yii sɩɩg-sõng nengẽ.’—Mat. 1:20, Kãab-paalgã Koe-noogo.

3, 4. Manesem bʋg la a Maari tall-yã, la wãn to la d tõe n dɩk a togs-n-taare?

³ Bõe yĩng t’a Maari wa paam zu-zẽkr sẽn ka to woto? Malɛkã sẽn wa n yeel a Maari t’a na n doga Wẽnnaam Bi-riblã, a leokame: “Mam yaa Zusoabã tʋm-tʋmd-poaka. Bɩ y kɩt t’a yɩ woto ne maam wa yãmb sẽn yeelã.” (Luk 1:38) A Maari sẽn yeelã wilgame t’a tara yam-sõngo. A sẽn sak zĩig pʋgẽ wã wilgame t’a ra sɩng n sakda Wẽnnaam daabã. A pa yals n na n bao n bãng a pʋgã rɩkr sẽn na n kɩt tɩ nebã tags to-to, wall a yɛɛs a Zozɛf na n wa pa sak n kẽ kãadem ne-a ye. A Maari sẽn yeel tɩ yẽ yaa a Zeova tʋm-tʋmd-poakã wilgdame t’a ra teega a Zeova sẽn yaa a Zusoabã zãng-zãnga.

⁴ Y mi n wa getame tɩ tʋʋm nins b sẽn kõ-y Wẽnnaam tũudmã pʋgẽ wã yɩɩda y pãng bɩ? Yɩta sõma tɩ tõnd ned kam fãa sok a meng woto: ‘Rẽ yĩnga m kɩsa sɩd t’a Zeova na n gesame tɩ bũmba fãa maan tɩ zems ne a raabã bɩ? Rẽ yĩngã m tara yam-sõng bɩ?’ Bãng-y tɩ Wẽnnaam kõta a vʋʋsem sõngã neb nins sẽn teeg-a ne b sũy fãa la b sakd a naamã sẽn ka to wã.—Tʋʋ. 5:32.

Vʋʋsem sõngã sõnga a Pɩɛɛre

5. Nand tɩ yʋʋmd 33 Pãntekotã ta, wãn to la vʋʋsem sõngã sõng a Pɩɛɛre?

⁵ Tʋm-tʋmd a Pɩɛɛr me yãa vʋʋsem sõngã tʋʋm-kãsems wa a Maari tɩ yʋʋmd 33 Pãntekotã nan pa ta ye. A Zezi ra kõo a Pɩɛɛr ne tʋm-tʋmdb a taabã zĩn-dãmb rigb tõogo. (Mark 3:14-16) La baa ne Biiblã sẽn pa wilg a Pɩɛɛr sã n sɩd riga zĩn-dãmbã, wõnda a maana rẽ. Sẽn paase, a Zezi sẽn wa n yeel a Pɩɛɛr Galile mogrẽ wã t’a kẽn koomã zug n babs-a wã, a tõog n maana rẽ ne vʋʋsem sõngã sõngre. (Karm-y Matɩe 14:25-29.) Dẽnd yaa vẽeneg tɩ yaa a Pɩɛɛr sẽn da teeg vʋʋsem sõngã la a sẽn tõog n maan bõn-kãsemsã. Rẽ poor bilfu, vʋʋsem sõngã kõo a Pɩɛɛr ne karen-biis a taabã pãng tɩ b tõog n maan yɛl a taaba.

6. Bõe la vʋʋsem sõngã sõng a Pɩɛɛr t’a maan Pãntekotã sasa la rẽ poore?

⁶ Yʋʋmd 33 Pãntekot kibsã sasa, vʋʋsem sõngã sõnga a Pɩɛɛr ne neb a taab tɩ b tõog n gom ne sãambã sẽn da wa kibsã Zerizalɛmmã b buud-goamã pʋsẽ. Dẽ poore, a Pɩɛɛr yik n yalsame n sõs ne kʋʋngã. (Tʋʋ. 2:14-36) Nin-kãngã ra mi n zoeta rabeem wall a ra mi n gom n pa yals n tags ye. La rẽ tɛka, a paama raood n moon koɛɛgã ne yẽesem, baa b sẽn da yaand-b la b namsd-b b tẽebã yĩngã. (Tʋʋ. 4:18-20, 31) Vʋʋsem sõngã vẽeneg-a lame t’a bãng yell sẽn solge. (Tʋʋ. 5:8, 9) A sõng-a lame meng t’a vʋʋg kũum.—Tʋʋ. 9:40.

7. A Zezi zãms-bʋs võor la a Pɩɛɛr pa wʋm tɩ sã n pa a zaeebã poor bala?

⁷ Baa sẽn deng Pãntekotã, a Pɩɛɛr wʋma bũmb nins a Zezi sẽn zãms-a wã kẽer võore. (Mat. 16:16, 17; Zã 6:68) La sãnda võor la a ra pa wʋmde. Wala makre, a ra pa mi t’a Zezi kũumã poore, a na n vʋʋga rasem a tãab-n-soabã daar n lebg malɛk ye. A ra pa mi me tɩ Wẽnnaam Rĩungã na n zĩnda saasẽ ye. (Zã 20:6-10; Tʋʋ. 1:6) A Pɩɛɛr da pa tagsd tɩ ninsaalb n da na n wa vʋʋg n lebg wa malɛgs n tɩ rɩ naam saasẽ ye. Yaa a mengã sẽn wa n paam vʋʋsem sõngã zaeeb n na n wa tɩ vɩɩmd saasẽ wã la a yaool n wʋm a Zezi zãms-kãensã võore.

8. Sẽn paam-b vʋʋsem sõng zaeebã la “piis a taabã” fãa tõe n wʋma bõe võore?

 ⁸ A Zezi karen-biisã sẽn paam vʋʋsem sõngã zaeebã, b tõogame n wʋm zãmsg toor-toor b sẽn da pa wʋmd võore. Vʋʋsem sõngã vẽnega neb nins sẽn gʋls Biiblã babg ning b sẽn gʋls ne gɛrkã, tɩ b gʋls bũmb wʋsg sẽn sõngd tõnd tɩ d bãngd a Zeova raabã sõma n paasdẽ. (Ef. 3:8-11, 18) Rũndã-rũndã, sẽn paam-b vʋʋsem sõng zaeebã ne a Zezi “piis a taabã” fãa tõe n zãmsa bõn-kãens la b wʋm b võore. (Zã 10:16) Y sẽn paam tɩ vʋʋsem sõngã kɩt tɩ d tõe n wʋm Wẽnnaam Gomdã võorã pa noom-y sɩda?

A Poll ‘pida ne vʋʋsem sõngo’

9. Bõe la vʋʋsem sõngã sõng a Poll t’a maane?

⁹ Yʋʋmd 33 Pãntekotã loogr poore, sẽn wa n zems yʋʋmd la kiis a wãn woto, ned a to me n paam tɩ Wẽnnaam zae-a ne a vʋʋsem sõngã. Yaa a Soll b sẽn da boond me t’a Pollã. Vʋʋsem sõngã sẽn kɩt t’a maan bũmb ninsã nafda tõnd rũndã-rũndã. Tʋm-tʋmd a Poll gʋlsa Biiblã sɛb 14. Sẽn paase, wa vʋʋsem sõngã sẽn sõng a Pɩɛɛr to-to wã, a sõnga a Poll t’a bãng tɩ ninsaalb n na n wa kẽng saasẽ n tɩ vɩ n pa le tõe n ki tɩ b gomd põogr ye. A gʋlsame n wilg rẽ vẽenega. Ne vʋʋsem sõngã maasem, a Poll maaga bãase, n dig zĩn-dãmba, la a vʋʋg kũum menga! La vʋʋsem sõngã kõo a Poll pãng t’a tõog n maan bũmb yõod sẽn yɩɩd rẽ, bũmb tõnd me sẽn paamd pãng n maandẽ. La tõnd nengẽ wã, d pa paamd-a ne yel-solemd ye.

10. Wãn to la vʋʋsem sõngã sõng a Poll t’a tõog n moone?

¹⁰ Daar a yembre, a Poll ‘pida ne sɩɩg sõngo,’ n kɩɩs Wẽnnaam bɛ a ye goam ne raoodo. Yɩɩ Sipr guvɛrneerã taoore. Guvɛrneerã sẽn kelg a Poll goamã, kẽ-a lame t’a sak sɩdã. Biiblã wilgame tɩ “Zusoabã kareng yɛɛsa yẽnda.” (Tʋʋ. 13:8-12) Vẽenega, a Poll da miime tɩ yɩl n tõog n taas nebã sɩdã ne raoodo, d rata vʋʋsem sõngã sõngre. (Mat. 10:20) A wa n kosa Efɛɛz tigingã neb tɩ b pʋʋs Wẽnnaam a yĩng t’a tõog n “gom ne daoodo.”—Ef. 6:18-20.

11. Wãn to la vʋʋsem sõngã wilg a Poll sore?

¹¹ Vʋʋsem sõngã sõnga a Poll t’a moon koɛɛgã, la wakat ninga, a gɩdg-a lame t’a ra moon tẽns kẽer pʋsẽ ye. A Poll misioneeremdã so-togsã pʋsẽ, Wẽnnaam vʋʋsem sõngã wilg-a-la sore. (Tʋʋ. 13:2; karm-y Tʋʋm 16:6-10.) A Zeova ket n tũnugda ne a vʋʋsem sõngã n wilgd koe-moondbã sor b tʋʋmdã pʋgẽ. Neb nins fãa sẽn maand a Zeova raabã modgda wa a Polle, n moond koɛɛgã ne raood la yẽesem. Wẽnnaam sẽn wilgd a nin-buiidã sor to-to rũndã-rũndã wã yaa toor ne a sẽn da maan ne a Pollã. La baa ne rẽ, d tõe n kɩsa sɩd t’a ket n tũnugda ne a vʋʋsem sõngã n ‘boond’ sẽn baood-b sɩdã ne pʋ-peelmã.—Zã 6:44.

Vʋʋsem sõngã ‘tʋʋm yaa toor-toore’

12-14. Vʋʋsem sõngã sẽn tʋmd to-to nebã zutã yaa a ye bɩ? Wilg-y y leoorã võore.

¹² A Zeova ninga pipi kiris-nebã sẽn paam zaeebã barka. Rẽ yĩnga kibay nins sẽn gomd rẽ yellã kareng nafda tõnd rũndã-rũndã bɩ? Vẽenega! Tẽeg-y-yã a Poll sẽn yeel bũmb  ning kũun toor-toorã vʋʋsem sõngã sẽn da kõtã wɛɛngẽ wã. Wẽnnaam vẽneg-a lame t’a yeel Korẽnt tigingã neb woto: ‘Kũun beeme n yaa toor-toore, la yaa sɩɩg sõng a yembre. Sõngr tʋʋmã beeme n yaa toor-toore, la yaa Zusoab a yembre. La tʋʋm beeme n yaa toor-toore, la Wẽnnaam a yembr n tʋmd fãa pʋse. La yaa sɩɩg sõng a yembr bal n maand bõn-kãens n kõt ned kam fãa sẽn zems bãmb meng raabo.’ (1 Kor. 12:4-6, 11) Woto wilgdame tɩ vʋʋsem sõngã tõe n sõnga Wẽnnaam nin-buiidã ne manesem toor-toor bʋʋm takɩ yĩnga. Sɩd me, vʋʋsem sõngã sõngda Kiristã “bãg-bila” ne a “piis a taabã” fãa. (Luk 12:32, MN; Zã 10:16) La baasgo, pa wakat fãa la a sõngd tigingã ned kam fãa ne manesem yɛng ye.

¹³ Wala makre, yaa vʋʋsem sõngã n yãkd kãsem-dãmbã. (Tʋʋ. 20:28) La pa sẽn paam-b zaeebã fãa n yaa kãsem-dãmb ye. Woto wilgda bõe? Wilgdame tɩ vʋʋsem sõngã sɩd pa sõngd tigingã neb ne manesem yɛng ye.

¹⁴ Yaa vʋʋsem sõngã n kɩt tɩ sẽn paam-b zaeebã lebg “Wẽnnaam kambã.” Yaa ne vʋʋsem sõng-kãng maasem me la a Zeova vʋʋg a Bi-riblã t’a leb saasẽ. (Karm-y Rom dãmb 8:11, 15.) Leb n yaa ne vʋʋsem sõngã maasem la a Zeova naan ãndũniyã. (Sɩng. 1:1-3) A Zeova tũnuga ne vʋʋsem sõng-kãng n kõ a Bezalɛll minim t’a tõog n ti sɛk-roogã, n kõ a Samsõ pãn-kãseng t’a tõog n tʋm pãng tʋʋm ned a to sẽn pa tõe n tʋme, la a sõng a Pɩɛɛr t’a tõog n kẽn koom zugu. Dẽnd paam vʋʋsem sõngã yaa toor ne paam tɩ Wẽnnaam zae-f ne a vʋʋsem sõngã. Zaeebã yaa vʋʋsem sõngã sẽn tʋmd ned zug ne manesem sẽn yaa toor zalle. Yaa Wẽnnaam n yãkd neb nins a sẽn zaeed ne a vʋʋsem sõngã.

15. Wẽnnaam na n ket n zaeeda neb ne a vʋʋsem sõngã wakat fãa bɩ? Bõe yĩng tɩ y yet woto?

¹⁵ Wẽnnaam ra sɩng n tũnugda ne a vʋʋsem sõngã n sõngd a nin-buiidã ne manesem toor-toore, hal na maan yʋʋm tusa nand t’a tall-a n zae neba. Yaa yʋʋmd 33 Pãntekotã tɛk la a sɩng neb zaeebo, la a pa na n maan woto wakat fãa yĩng ye. Baa Wẽnnaam sẽn pa na n le wa zaeed neb ne a vʋʋsem sõngã, a na n ket n kõta a nin-buiidã a vʋʋsem sõngã tɩ b tõogd n maand a raabã wakat sẽn kõn sa yĩnga.

16. Bõe la vʋʋsem sõngã sõngd Wẽnnaam nin-buiidã tɩ b maand rũndã-rũndã?

¹⁶ Rũndã-rũndã, vʋʋsem sõngã sõngda a Zeova nin-buiidã tɩ b maand bũmbu. Wilgr 22:17 wã yeta woto: “Sɩɩg sõng ne pʋg-paalã yetame tɩ yaa: ‘Wa-y-yã.’ La ned ninga sẽn wʋmd-a, bɩ yẽ yeele: ‘Wa-y-yã.’ La ko-yũud sẽn tar a soaba, bɩ a wa. La ned ning sẽn data, bɩ a reeg vɩɩm koom zaalem.” Rũndã-rũndã, ne Wẽnnaam vʋʋsem sõngã sõngre, kiris-nebã boonda ‘neb nins fãa sẽn datã’ tɩ b wa reeg vɩɩm koomã. Yaa sẽn paam-b zaeebã n lʋɩt tʋʋm-kãng taoore, tɩ piis a taabã sõngd-ba. Yaa vʋʋsem sõng-yɛngã n sõngd sul-kãensã b yiibã fãa tɩ b tʋmd tʋʋmdã. B ned kam fãa reega lisg “ne Ba la Biiga, la sɩɩg sõng yʋʋre,” n wilg t’a rɩka a meng n kõ Wẽnnaam. (Mat. 28:19) Sẽn paase, b fãa sakda vʋʋsem sõngã sor-wilgr n baood zʋg-sõma nins a sẽn kõtã. (Gal. 5:22, 23) Piis a taabã sakda vʋʋsem sõngã sõngr wa sẽn paam-b zaeebã. Rẽ kɩtdame tɩ b maand b sẽn tõe fãa n yaa yɩlem a Zeova nifẽ.—2 Kor. 7:1; Wil. 7:9, 14.

Ket-y n kot-y Wẽnnaam a vʋʋsem sõngã

17. Wãn to la y tõe n wilg tɩ y tara Wẽnnaam vʋʋsem sõngã?

¹⁷ Y saagdame n na n wa tɩ vɩɩmd saasẽ wakat sẽn kõn sa tɩ yaa tẽngã zug la y na n wa vɩɩmd me, a Zeova tõe n kõ-y-la “pãn-kãseng” tɩ y tõog n kell n sak-a n wa paam y keoorã. (2 Kor. 4:7) Y sẽn moond koe-noogã ne yẽesmã tõe n kɩtame tɩ nebã yaand-y-yã.  La y sã n kell n pa bas moonegã, y wilgdame tɩ y tara vʋʋsem sõngã. Tẽeg-y me tɩ b sã n ‘gomd yãmb wẽng Kirist yʋʋrã yĩnga, bark bee yãmb zutu, tɩ bõe, Wẽnnaam sɩɩg sẽn yaa waoogr sɩɩgã bee yãmb zutu.’—1 Pɩɛ. 4:14.

18, 19. Wãn to la a Zeova na n kell n sõng-y ne a vʋʋsem sõngã maasem, la y yãka yam n na n maand bõe?

¹⁸ Wẽnnaam kõta a vʋʋsem sõngã neb nins sẽn kot-a ne pʋ-peelmã. Vʋʋsem sõngã tõe n sõng-y lame tɩ y paam koe-moonegã minim, la a kɩt me tɩ y tʋll n tʋm Wẽnnaam tʋʋmdã ne y sũur fãa. Sɩd me, a Poll yeela woto: “Yaa Wẽnnaam n tʋmd yãmb pʋsẽ tɩ yãmb yãke, la y maan bãmb yam sõma.” Vʋʋsem sõngã sõngre, n paas yãmb sẽn maand y sẽn tõe fãa n na n ‘tall vɩɩm koɛɛgã kãn-kãeyã’ na n kɩtame tɩ y ket n ‘maand bũmb nins sẽn zems yãmb fãagrã ne rabeem la rigbu.’—Fil. 2:12, 13, 16.

¹⁹ Woto yĩnga, bɩ y tʋmd tʋʋmd ning fãa b sẽn kõ-y ne y sũurã fãa, la y kot a Zeova sõngre, n kɩs sɩd tɩ vʋʋsem sõngã tõe n sõng-y lame tɩ y paamd minim n paasdẽ. (Zak 1:5) Wẽnnaam na n sõng-y lame tɩ y tõog n wʋm a Gomdã võore, tɩ y tõog n yals kãn-kãe zu-loees taoore, la y tõog n moon koe-noogã. A Zezi yeela woto: “Bɩ y kos tɩ b na kõ-yã, bɩ y bao tɩ y na yã, bɩ y wẽ kʋɩleng tɩ b na pak n kõ-yã.” (Luk 11:9, 13) Vʋʋsem sõngã naaga bũmb nins y sẽn tõe n kos tɩ b kõ-yã sʋka. Woto yĩnga, bɩ y ket n kot a Zeova t’a sõng-y tɩ y tõog n dɩkd pĩnd wẽndẽ la rũndã-rũndã wẽn-tũudbã togs-n-taare, n basdẽ tɩ vʋʋsem sõngã wilgd-y sore.

Y tõe n wilga a võor bɩ?

• Wãn to la d tõe n dɩk a Maari naoor n paam barka?

• Wãn to la vʋʋsem sõngã wilg a Poll sore?

• Rũndã-rũndã, wãn to la vʋʋsem sõngã wilgd Wẽnnaam nin-buiidã sore?

[Zãmsgã sogsgã]

[Foto seb-neng 26]

Wẽnnaam vʋʋsem sõngã kõo a Poll raood t’a tõog n kɩɩs baga

[Foto seb-neng 28]

Rũndã-rũndã, vʋʋsem sõngã sõngda sẽn paam-b zaeebã ne piis a taabã fãa