D sẽn tõe n maan tɩ sõng-do

Sẽn mik tɩ sabaab-wẽnsã tara paasg la b sãamd neb wʋsg vɩɩmã, bõe la ned tõe n maan tɩ sõng-a? Bɩ d ges bũmb kẽere.

Gil-y zĩis nins sabaab sẽn tõe n zĩndẽ wã. Biiblã yetame tɩ yam soab “yãta toog n gil n looge. La sẽn ka mi-a a sẽn dabdẽ kẽngda taoor n paamd sɩbgre.” (Yelbũna 22:3) Sagl-kãngã tũub sɩd tõe n sõnga ned t’a põs sabaabo. B sã n deng n keoog tɩ tãng n na n pusgi, wall sa-kẽeng n na n ni, pa rẽ bɩ seb-kẽeng n wate, sẽn be-b be wã segd n toeema zĩig tɩ rẽ la yam tʋʋmde. Ninsaal yõorã yɩɩda zak la teed buud fãa.

Neb kẽer sã n bãng tɩ b sẽn dat n tɩ zĩndẽ wã sabaab-wẽns n nong n maand be, b tõe n toeema yam. Ned a yembr yeela woto: “Tẽngã gill zugu, zĩis nins sabaab-wẽnsã sẽn tõe n zĩndã pa waoog ye. Yaa zĩis a wãn bala. La na n yɩɩ zĩ-kãens la sabaab-wẽns sẽn tar pãng wʋsg na n wa zĩndi.” Sɩd me sabaab rãmbã nong n maanda tẽns nins sẽn be mogrã noorã, bɩ zĩis nins b sẽn wilg tɩ tẽngã tõe n digimda nana-nana wã. Yãmb sã n tõe bɩ y ra tɩ vɩɩmd zĩ-kãensã ye. Y sã n vɩɩ be me bɩ y yik n kẽng zĩig a to. Woto tõe n sõng-y lame tɩ y gil sabaab-wẽnsã.

Segl-y y menga. Baa ne y sẽn maand to-to fãa n na n kogl y menga, sabaab-wẽng tõe n wa ling-y lame. La sã n mikame tɩ y reng n segla y menga, na n sõng-y-la wʋsgo. Woto me zemsa ne Yelbũn 22:3 sẽn sagend tõnd tɩ d maanã. Reng-y n bao-y korg n ning bũmb nins sẽn yaa tɩlae ne-yã. Sebr a yembr sagenda nebã tɩ kor-kãng pʋgẽ bɩ b ning koom bidõ, noad tɩɩm la tɩt a taaba, torse, buuzi rãmba, alimɛtse, wɩɩga, rɩ-koeemse, la sɛb nins sẽn tar yõodã. Segdame tɩ yãmb ne y zakã rãmb sõse, n bãng sabaab nins sẽn tõe n wa yãmb babgẽ wã, la y sẽn tõe n maanega.

Tall-y zood sõma ne Wẽnnaam. Bala, sẽn wa n yaa zu-loɛɛg ning fãa la d tara, tõe n sõng-d-la wʋsgo. Biiblã pʋgẽ, b boonda Wẽnnaam tɩ ‘nimbãan-zoeer Ba la belsg fãa Wẽnnaam sẽn belsd tõnd d toog fãa pʋgẽ.’ Vɛrse a to me yetame t’a yaa “Wẽnnaam sẽn belsd sũ-sãoong rãmbã.”—2 Korẽnt dãmba 1:3, 4; 7:6.

Hakɩka, Wẽnnaam mii neb nins sẽn tũud-a wã zu-loeesã hal sõma. A nonga nebã, la a le wilgd-b-la b sẽn tõe n maan n keng b pelse. (1 Zã 4:8) Wala makre, pʋʋsgã tõe n sõng-d-la zu-loɛɛg buud fãa pʋgẽ. La pa d sẽn na n pʋʋsd n kotẽ tɩ Wẽnnaam maan yel-solemd ye. Yaa d sẽn  na n pʋʋs n kos a vʋʋsem sõngã. Yel-beed sã n paam neda, vʋʋsem sõngã tõe n kɩtame t’a tẽeg Biiblã vɛrse rãmb sẽn tõe n bels-a. Sẽn tũud-b Wẽnnaamã tõe n sɩd yeela wa Israyɛll rĩm a Davɩɩd. A yeela woto: “Baa mam sã n kẽnd tãn-long sẽn yaa lik pʋgẽ, mam kõn zoe bõn-wẽng rabeem ye; tɩ bõe, yãmb bee ne maam. Yãmb gʋlg ne y dasaar belsda maam.”—Yɩɩl Sõamyã 23:4.

Kiris-nebã sõngda b tẽed-n-taasã. Pipi kiris-nebã wakatẽ, no-rɛɛs a Agabus yikame n wilg “tɩ kom kãseng n na n wa dũniyã tɛk fãa.” La sɩd “waa a Sezaar Kolood zãmaanẽ.” Komã namsa a Zezi karen-biis nins sẽn be Zide wã wʋsgo. Bõe la karen-biis nins sẽn be zĩis a taabã maan-yã? Biiblã yeta woto: “Karen-biisã yeelame tɩ ned kam fãa yãk a sẽn tarã, sẽn zems yẽ pãng tɛka, n tʋm sõngr ba-biisã sẽn be Zide soolmã nengẽ.” (Tʋʋma 11:28, 29) Kiris-nebã sɩd sakame n maan woto, n sõng b tẽed-n-taasã.

Rũndã-rũndã me, yel-beed sã n paam a Zeova Kaset rãmba, b tẽed-n-taasã sõngd-b-la woto. Zĩig fãa, nebã miime t’a Zeova Kaset rãmbã sõngda taaba. Wala makre, yʋʋmd 2010 wao-fugdg kiuug rasem 27 wã, tẽngã sẽn digimd Sili wã, tao-tao bala, a Zeova Kaset rãmb n tɩ sõng b tẽed-n-taase. Tsunami wã sẽn zĩnd sabaab-kãng sasa wã kãaga a Karla zakã. Ad a sẽn yeele: “D sẽn yã d tẽed-n-taasã sẽn yi zĩis a taab n wa vẽkembeoogã bal n na n sõng-dã, kõ-d-la belsgo, la keng d pelse. Yaa vẽeneg tɩ yaa a Zeova n bels-do, a sẽn kɩt tɩ nin-kãensã wa maan-d neer woto wã. Sɩd yɩɩ nonglem la koglg tɛkẽ!” Pʋg-kãngã yaab-raoog sẽn pa a Zeova Kaset soab yãa sõngrã. A yeela woto: “Hal yʋʋm ka tɛkã, m zɩ n yã m wẽnd-doogã neb sẽn maan a buud ye.” Ra-kãngã sẽn yã bũmb ningã kɩtame t’a yeel a Zeova Kaset rãmbã t’a ratame tɩ b wa zãms-a Biiblã.

D sã n be neb nins sẽn nong Wẽnnaamã sʋka, tõe n sõng-d-la wʋsg yel-beed sasa. La rẽ yĩnga, wakat n na n wa zĩnd tɩ sabaab-wẽns pa na n le nams nebã baa bilf bɩ? Bɩ d ges Biiblã sẽn yet bũmb ninga.

[Foto seb-neng a 6]

Bao-y korg n ning bũmb nins sẽn yaa tɩlae ne-yã

[Foto seb-neng a 7]

Pʋʋs-y n kos-y vʋʋsem sõngã, tɩ tõe n sõng-y-la zu-loɛɛg buud fãa pʋgẽ

[Foto seb-neng a 7]

A Zeova Kaset rãmbã sõngda taab yel-beed sasa

[Foto seb-neng a 7]

“Sɩd yɩɩ nonglem la koglg tɛkẽ!”