Yaa Wẽnnaam n sɩbgd tõnd bɩ?

Tẽn-digimdg kãsengã ne tsunami wã sẽn zĩnd Zapõ yʋʋmd 2011 tʋʋlg kiuugã pʋgẽ wã, b goosneemã ned a ye yeela woto: “Mam kʋmda sabaabã sẽn paam-b rãmbã yaa sɩda, la m tagsdame tɩ yaa ‘tembatsu’ la woto,” rat n yeel tɩ sɩbgr sẽn yit Wẽnd nengẽ.

Tẽn-digimdg kãsengã sẽn zĩnd Haiti yʋʋmd 2010 yʋʋm-vẽkr kiuugã pʋgẽ n kʋ neb sẽn yɩɩd 220000 wã, pastɛɛr a ye sẽn nong n gomd tele wã pʋgẽ yeelame tɩ yaa nebã “sẽn maan kaool ne a Sʋɩtãanã,” n yaool n segd n “lebg n bao Wẽnnaamã.”

Manila sẽn be Filipin tẽngẽ wã, neb kʋʋng n wẽdg taab n tab taab tɩ neb 79 ki, tɩ katolik rãmbã prɛtr a ye yeel woto: “Wẽnnaam n maan woto sẽn na yɩl tɩ d yamã puk tɩ d maan sẽn segde.” Beenẽ zʋrnall a ye yeelame tɩ “neb 100 sʋka, bãmb 21 n tẽed tɩ yaa Wẽnnaam n wat ne seb-bɛdã, sa-bɛdã la sabaab-wẽns a taabã n na n wilg a sũ-puugr” ne bãmb tẽngã nebã.

BAA pĩnd wẽndẽ, neb n da tẽed tɩ yaa Wẽnnaam n wat ne sabaab rãmbã n na n sɩbg nin-wẽnsã. Yʋʋmd 1755, Lisbon sẽn be Portugallã yõka bugum. Tẽn-digimdg ne tsunami me n zĩnd be. Yel-be-kãensã kʋʋ neb 60000, tɩ bãngd a ye yʋʋr sẽn boond t’a Voltaire sok tɩ: “Woto rat n yeelame tɩ yel-wẽnã waooga Lisbon n yɩɩd Paari sẽn pid ne tʋʋm-dẽgdã bɩ?” Sɩd me, neb milyõ rãmb n sokd b mens sã n pa Wẽnnaam n tũnugd ne sabaab-wẽnsã n na n sɩbg nebã. Tẽns wʋsg pʋgẽ, nebã yetame tɩ sabaab-wẽnsã yaa Wẽnd tʋʋmde.

Rẽ fãa kɩtame tɩ yaa sõma tɩ d sok d mens woto: Sɩd yaa Wẽnnaam n wat ne sabaab-wẽnsã sẽn na yɩl n sɩbg nebã bɩ? Sabaab-wẽnsã sẽn lebg wʋsg yʋʋmã noorã yaa sɩbgr sẽn yit Wẽnnaam nengẽ bɩ?

Sẽn na yɩl n wilg tɩ yaa Wẽnnaam n wat ne sabaab-wẽnsã, neb kẽer togsda Biiblã kibay sẽn wilgd Wẽnnaam sẽn kɩt tɩ koom la bugum kʋ neba, la a kɩt tɩ tẽngã pãrg n vel neba. (Sɩngre 7:17-22; 18:20; 19:24, 25; Sõdbo 16:31-35) D sã n tags Biiblã kiba-kãensã zug neere, d yãta bũmb a tãab sẽn wilgd tɩ Wẽnnaam sẽn maanã yaa toor ne rũndã-rũndã sabaab-wẽnsã. Pipi, Wẽnnaam reng n keooga nebã. Yiib-n-soaba, a pa naag nin-tɩrsã n sãam ye. Yaa neb nins sẽn pa rat n tekã, bɩ sẽn pa kelg-b keoogrã bal la a sãam-yã. Tãab-n-soaba, Wẽnnaam reng n wilga nin-tɩrsã b sẽn na n maan to-to n põse.—Sɩngre 7:1, 23; 19:15-17; Sõdbo 16:23-27.

Kaset pa be sẽn wilgd tɩ sabaab nins sẽn yãgsd neb milyõ rãmb yõy rũndã-rũndã wã yaa Wẽnnaam n wat ne ye. La bõe la d tõe n maan tɩ sõng-d sabaab wakate? Wakat n na n wa zĩnd tɩ sabaab-wẽns pa le nams ned bɩ? Sõss nins sẽn pʋgdã leokda sogs-kãensã.