A Abrahaam yɩɩ ned sẽn tall raoodo

Daar a yembre, a Abrahaam ne a zakã rãmb la a tʋm-tʋmdbã fãa segla b mens n na n kẽng Kanaã. (Sɩngre 12:1-5) A Abrahaam yãame tɩ yɩl n tõog n ges neb kʋʋngã sẽn pʋgd-a wã yell pa nana ye. A ra na n maana wãn n tõog n ges b fãa yelle, b sã n wa tɩ be tẽn-sãangẽ wã? B sã n da kell n pa Uur sẽn yaa tẽng sẽn tar yam-maasã, n sakd kood tɩ koom me beẽ wã, ra na n yɩɩ nana ne-a t’a ges a nebã yelle. La a sã n ta Kanaã tɩ bãag yõk-a, bɩ a sã n wa maan kaalem, ãnd n na n ges a zakã rãmb yelle? Baa a Abrahaam sã n da maanda yɩɩr ne woto fãa, a pa bas tɩ rẽ koms a raood ye. A yãka yam n na n kell n sak Wẽnnaam sẽn yeelã, baa sẽn wa n yaa a soab fãa. Woto sɩd yaa raood tɛkẽ!

NED SẼN TAR RAOOD YAA WÃN-WÃNA? Ned sẽn tar raood yaa ned sẽn pa zoet rabeem, baa wa n yaa toogo, a kengda a sũuri. Pa rat n yeel tɩ rabeem zɩ n yõk-a ye. La baa rabeem sã n yõk-a, a maanda a sẽn segd n maanã.

WÃN-TO LA A ABRAHAAM WILG T’A TARA RAOODO? A Abrahaam sakame n yɩ toor ne neb a taabã. Tẽng ning pʋgẽ a Abrahaam sẽn zĩndẽ n bɩ wã, neb wʋsg pʋʋsda bõn-naandse, la wẽnd dãmb ka tɛka. Baa ne rẽ, a pa zoe nebã nif n pa maan sẽn segdã ye. A Abrahaam sakame n yɩ toor ne neb a taabã. Yaa a Zeova a ye tãa, sẽn yaa “Wẽnnaam sẽn-ka-to” wã la a tũ-yã.—Sɩngre 14:21, 22.

A Zeova tũub n da pak a Abrahaam n yɩɩd arzɛkã paoongo. A sak n basa naar vɩɩmã Uuri, n yik n kẽng rasempʋɩɩgẽ wã la a kɩs sɩd t’a Zeova na n gesa a yelle. Tõeeme tɩ kaoosg zugẽ, a Abrahaam wa n tagsda bõn-sõma kẽer a sẽn bas Uurã yelle. La a ra kɩsa sɩd t’a Zeova na n gesame tɩ yẽ ne a zakã rãmb paam bũmb nins sẽn yaa tɩlae ne-bã. A Abrahaam sẽn kɩs sɩd tɩ yaa a Zeova la sẽn ka-a to wã, a tõog n talla raood n sak a noyã fãa.

A ABRAHAAM KIBARÃ WILGDA TÕND BÕE? Tõnd me sã n tall raood n sak a Zeova baa neb a taabã pa maand rẽ, d rɩkda a Abrahaam togs-n-taare. Biiblã yetame tɩ neb nins sẽn na n kell n sak a Zeova wã zo-rãmb bɩ b roagdb tõe n nams-b lame. (Zã 15:20) D sã n kɩs sɩd ne bũmb ning d sẽn bãng a Zeova zugã, d wilgda nebã d sẽn tẽed bũmb ninsã ne waoogre.—1 Pɩɛɛr 3:15.

 D leb n tõe n kɩsa sɩd tɩ Wẽnnaam sẽn kãab t’a na n gesa neb nins sẽn teeg-a wã yellã na n pidame. Woto kõta tõnd raood tɩ d lʋɩɩs a Zeova tũubã taoore. (Matɩe 6:33) D ges zak a ye neb sẽn maan rẽ to-to.

Rao a ye yʋʋr sẽn boond t’a Doug ne a pag a Becky sẽn tar kom-dibli a yiib wa n dat n yik n kẽnga tẽng Biiblã koɛɛg moondb sẽn da pa waoogẽ. B rɩɩ kibay la b pʋʋs a Zeova, rẽ poore b segla b mens n na n looge. A Doug yeela woto: “Yɩl n yik ne f zak rãmb n sag teed n toeem tẽng n yaool n pa mi sẽn na n tɩ yɩ to-to sɩd baooda raoodo. La tõnd sẽn wa n na n dɩk sardã, d reng n sõsa a Abrahaam ne a Saara kibarã zugu. D sẽn tags b sẽn da teeg a Zeova to-to wã, la a sẽn ges b yell wakat fãa wã, sõnga tõnd wʋsgo.”

A Doug ne a pagã sẽn maan woto wã poore, ad raoã sẽn yeele: “D paama bark wʋsgo. Bala d vɩɩmã lebga nana n yɩɩda. Daar fãa tõnd zakã rãmb bee ne taab n moond Wẽnnaam koɛɛgã, n sõsd ne taab la d reemdẽ. D sũ-noogã pa tõe n bãng n bilg ye.”

Yaa sɩd tɩ pa nebã fãa n tõe n maan woto ye. La d fãa tõe n dɩka a Abrahaam togs-n-taare, d sẽn na n lʋɩɩs Wẽnnaam tũubã taoore, n kɩs sɩd t’a na n sõng-d lame. Tõnd sã n maan woto, wa Biiblã sẽn yeelã, d na n tõog n yeela ne daood yaa: “Zusoabã yaa mam sõangda, mam kõn zoe rabeem ye.”—Hebre dãmba 13:5, 6.

[Zĩ-gũbri/Foto seb-neng a 7]

A yɩɩ wẽn-zoɛta, la pʋg-sõngo

A Saara sɩdã yɩɩ rao sẽn tall tẽeb hakɩka. La a Saara me yɩɩ wẽn-zoɛt sẽn kõ mak-sõngo. Biiblã yeta naoor a tãab fãa t’a Saara kõo pagb nins sẽn zoet Wẽnnaamã mak-sõng tɩ b segd n tũ. (Ezai 51:1, 2; Hebre dãmba 11:11; 1 Pɩɛɛr 3:3-6) Yaa sɩd tɩ Biiblã pa tolg n gomd a Saara yell wʋsg ye. La seka d na bãng t’a yɩɩ pʋg-sõngo.

Wala makre, a Saara manesem yɩɩ wãna, a Abrahaam sẽn wa n togs-a tɩ Wẽnnaam yeelame tɩ b yik n bas Uur tẽngã? A maana yɩɩr a sẽn da pa mi b sẽn na n kẽngẽ, la b yikrã võorã bɩ? A maana yɩɩr ne b sẽn na n maan to-to n tõog n ges b zakã rãmb yellã bɩ? A sẽn na n bas a zo-rãmb la a buudã neba, n pa mi a sã n na n le yã-b lame wã kɩtame t’a sãam a sũur wʋsg bɩ? Yaa vẽeneg t’a tagsa woto fãa yelle, la a sakame n looge, n kɩs sɩd t’a Zeova na n ning-a-la bark a sakrã yĩnga.—Tʋʋma 7:2, 3.

A Saara yɩɩ wẽn-sakda, la a yɩɩ pʋg-sõng me. A pa maan gees-gees ne a sɩdã b zakã yell gesg pʋgẽ ye. A maana a sẽn tõe fãa, n da waoogd a sɩdã, la a sõngd-a. A sẽn maan woto wã, a wilgame t’a tara zʋg-sõma, tɩ rẽ kɩt t’a sɩd yaa mak-sõngo.—1 Pɩɛɛr 3:1-6.

Wãn to la a Saarã makrã tõe n sõng pagbã? Pag a ye yʋʋr sẽn yaa a Jill, sẽn kẽ kãadem sẽn yɩɩd yʋʋm 30 yeela woto: “A Saara kibarã sõnga maam tɩ m bãng tɩ m segd n togsda m sɩdã m sẽn tagsde, la m da maand rabeem ye.” A paasa woto: “La sẽn yaa yẽ la zakã soabã, yẽ n na n baas n yãk d sẽn na n maanegã. Rẽ poore, m segd n maana m sẽn tõe fãa t’a sẽn yãk bũmb ningã tõoge.”

A Saara kibarã pʋgẽ, tõe tɩ bũmb sẽn na n yɩ yãmb noog n yɩɩd yaa tɩ baa a sẽn yɩ pʋg-neerã, a pa bas tɩ rẽ kɩt t’a wuk a meng ye. (Sɩngre 12:10-13) A sika a meng n sõng a sɩdã nana la toog pʋgẽ. Hakɩka, a Abrahaam ne a Saara yɩɩ pag ne a sɩd sẽn yɩ wẽn-sakdba, sik-m-mens rãmba, la b ra nong taab wʋsgo. Rẽ kɩtame tɩ b zĩid-n-taarã ra sɩd noom b ned kam fãa.