Kell-y n tʋm-y tʋʋmdã ne yãgbo
Kell-y n tʋm-y tʋʋmdã ne yãgbo
“Moon Wẽnnaam koɛɛgã, la f nang pãng wakat fãa.”—2 TƖM. 4:2.
Y TÕE N WILGA A VÕOR BƖ?
․․․․․
Bõe yĩng tɩ pipi kiris-nebã moon koɛɛgã ne yãgbo?
․․․․․
Bõe n tõe n sõng-d tɩ d ket n moond koɛɛgã ne yãgbo?
․․․․․
Bõe yĩng tɩ yaa masã la koe-moonegã yaa tʋʋm-yãgdem n yɩɩd pĩndã?
1, 2. Biiblã sẽn yeel tɩ d “nang pãng” d koe-moonegã pʋgẽ wã wata ne sogs-bʋse?
NEB nins tʋʋmd sẽn yaa neb vɩɩm fãagrã nangda pãng b tʋʋmdã pʋgẽ, rat n yeel tɩ b tʋmd-a-la ne yãgbo. Wala makre, b sã n bool põmpie-rãmbã, b wata tao-tao, b sẽn mi tɩ tõe tɩ ned vɩɩm n be yell pʋgẽ wã yĩnga.
2 Tõnd sẽn yaa a Zeova Kaset rãmbã, d rat n sõnga nebã tɩ b paam fãagre. Rẽ n so tɩ d tʋmd d tʋʋmdã sẽn yaa Rĩungã koe-noog moonegã ne yãgbo. Yaa sɩd tɩ yaa tʋʋm-yãgdem, la d pa tʋmd-a n pa tagsdẽ ye. Woto wã, tʋm-tʋmd a Poll sẽn yeel tɩ d ‘moond Wẽnnaam koɛɛgã, la d nangd pãngã’ rat n yeelame tɩ bõe? (2 Tɩm. 4:2) Wãn to la d tõe n nang pãng koɛɛgã mooneg pʋgẽ, rat n yeel tɩ n moon-a ne yãgbo? La bõe yĩng tɩ d tʋʋmdã pʋd n yaa tʋʋm-yãgdem?
BÕE YĨNG TƖ KOE-MOONEGÃ YAA TƲƲM-YÃGDEM?
3. Rĩungã koɛɛgã sakr wall a zãgsg wata ne bõe?
3 Y sã n tags koe-noogã mooneg sẽn tõe n fãag nebã to-to wã yelle, yaa vẽeneg tɩ y na n dat n moond-a-la ne yãgbo. (Rom 10:13, 14) Wẽnnaam Gomdã yeta woto: “Mam sã n yeel nin-wẽng t’a na n kiime t’a bas a yel-wẽnã n sak m tõodã n maan neere, . . . a na n vɩɩmdame, a ka na n ki ye. Mam kõn le tẽeg a yel-wẽn nins a sẽn da maanã yell ye.” (Eze. 33:14-16) Sɩd me, Biiblã yeelame tɩ Rĩungã koe-moondb ‘na n fãaga b mens la neb nins sẽn kelgd-bã.’—1 Tɩm. 4:16; Eze. 3:17-21.
4. Pipi kiris-nebã wakatẽ, bõe yĩng tɩ sɩdã kɩɩsg ra kɩt tɩ koe-moonegã yaa yãgb tʋʋmde?
4 Sẽn na yɩl n bãng a Poll sẽn sagl a Tɩmote t’a moon koɛɛgã ne yãgbã võore, d segd n karma d sõsgã vɛrse yẽgrã la vɛrse nins sẽn pʋgl-a wã. A Poll yeel-a-la woto: “Bɩ f moon Wẽnnaam koɛɛgã, la f nang pãng wakat fãa, nana wall toog pʋgẽ. Wilg nebã b kongre, la f lenge, la f sagl ne sũ-maasem wʋsgo, la f zãms nebã. Tɩ bõe, wakat n na n wa tɩ nebã ka rat n sak sɩd koɛɛgã ye. La bãmb mens ratem yĩnga, bãmb na n baoo karen-saam-dãmb wʋsg sẽn na n togs koɛɛg sẽn noom bãmb bala. Bãmb kõn le kelg sẽn yaa sɩd ye.” (2 Tɩm. 4:2-4) A Zezi ra pĩnd n togsame tɩ neb n da na n wa yik n lebg sɩdã kɩɩsdba. (Mat. 13:24, 25, 38) Sɩdã kɩɩsdb pukr sẽn da kolgã yĩnga, a Tɩmote ra segd n ‘moona koɛɛgã’ ne yãgb tigingã pʋgẽ menga, n sõng kiris-nebã tɩ b ra bas tɩ kɩɩsdbã ziri wã menes-b ye. Ra yaa yõor yelle. La rũndã-rũndã yẽ, yɛlã yaa wãn to?
5, 6. Tags-bʋs la neb nins d sẽn segd koe-moonegã sasa wã wʋsg tara?
5 Rũndã-rũndã, sɩdã kɩɩsdb sõor tara paasgo, hal tɩ b be zĩig zãnga. (2 Tes. 2:3, 8) Zãms-bʋs la b tar n salemd nebã tʋba? Tẽns wʋsg pʋsẽ, sẽn tẽed-b tɩ bũmba fãa wa n bee woto tɩ pa tũ ne naand sababã zãmsda nebã tẽeb-kãng ne b sũy fãa, wa ned sẽn kɩs sɩd ne a tũudum sẽn maand to-to wã. Baa sẽn yaa siãnsã la b wae n tũnugd ne n gomd tẽeb-kãng yell la b tɛɛnd-a wã, a tolg n lebga wa tũudum, n toeemd nebã sẽn tar tagsg ning Wẽnnaam la b taabã zugã. Zãmsg a to me la wʋsg nonga. B yetame tɩ tõnd yell pa pak Wẽnnaam, la tɩ rẽ kɩtame t’a yell pa segd n pak tõnd me ye. Bõe yĩng tɩ neb milyõ-rãmb nong n kelgd zãms-kãensã sẽn kɩtd tɩ b gõe Wẽnnaam daabã maaneg wɛɛngẽ wã? Yaa tɩ zãms-kãensã fãa kɩtdame tɩ b tagsdẽ tɩ b tõe n maana b sẽn dat fãa. Bala, b kɩtdame tɩ nebã tagsdẽ tɩ Wẽnd sẽn na n kao b bʋʋd kae ye. Woto sɩd yaa koɛɛg sẽn salemd neb wʋsg tʋba.—Karm-y Yɩɩl Sõamyã 10:4.
6 La b salemda nebã tʋb ne manesem a to me. Neb nins sẽn kẽnd wẽnd-dotẽ wã kẽer tʋllame tɩ b karen-saam-dãmbã yet-b woto: “Baa yãmb sẽn maand fãa, Wẽnnaam nong-y lame.” Prɛtr-dãmbã la pastɛɛr-dãmbã salemda kẽer tʋba, b sẽn kɩtd tɩ b tẽed tɩ mees-rãmbã kẽnd la tigã maanego, n paas imaaz-rãmbã tallg la b pʋʋsg tõe n kɩtame tɩ b paam Wẽnnaam barka. Tõe tɩ nin-kãensã pa mi tɩ b vɩɩmã bee yell pʋgẽ ye. (Yɩɩl 115:4-8) La d sã n tõog n nek-b Wẽnnaam daabã maaneg wɛɛngẽ tɩ b wʋm Biiblã koɛɛg võore, b tõe n dɩɩ Wẽnnaam Rĩungã nafa.
MOON KOƐƐGÃ NE YÃGBÃ RAT N YEELAME TƖ BÕE?
7. Wãn to la d tõe n wilg tɩ d miime tɩ moonegã yaa tʋʋm-yãgdem?
7 Logtor sã n maand woperasɩõ, a segd n ninga a yamã fãa a tʋʋmdã pʋgẽ, bala yaa yõor yelle. D moonegã sasa, d tõe n wilgame tɩ d tʋmda ne yãgbo, d sẽn na n ning d yamã fãa moonegã pʋgẽ. Woto rat n yeelame tɩ d na n tagsda bũmb nins yell d sẽn na n sõs ne nebã, wall sogsg d sẽn tõe n soke, bɩ kibay d sẽn na n taas-b tɩ b tʋlg n kelge. Sẽn paase, d sẽn mi tɩ moonegã yaa tʋʋm-yãgdmã, d segd n sigla d sẽkã n tõogd n kẽnd nebã nengẽ wakat ning b sẽn na n sak n kelg-dã.—Rom 1:15, 16; 1 Tɩm. 4:16.
8. Bãng tɩ tʋʋmd yaa tʋʋm-yãgdmã baooda bõe maanego?
8 Bãng tɩ tʋʋmd yaa tʋʋm-yãgdmã rat n yeelame me tɩ d reng n maan bũmb ning sẽn tar yõod n yɩɩdã. (Karm-y Sɩngr 19:15.) Wala makre, tags-y n ges-y y sẽn na n kẽng logtor nengẽ t’a ges-yã, n bas n yeel-y woto: “Yãmb tara bãag d sẽn segd n tɩp tao-tao. Ka la kiuug a ye pʋgẽ, y segd n maana bũmbu.” Yaa vẽeneg tɩ y pa na n yɩ tao-tao n yi n loog ye. Y na n maaga y yĩng n kelg a sẽn na n wilg bũmb ning y sẽn segd n maanã, n kuil n tɩ tags sõma n yãk y sẽn na n maanega.
9. Bõe yĩng tɩ d tõe n yeel t’a Poll sẽn wa n be Efɛɛzã, a moona koɛɛgã ne yãgbo?
9 A Poll goma a sẽn moon koe-noogã to-to Aazi soolmẽ wã yell ne Efɛɛz tigingã kãsem-dãmbã. A sẽn yeel-b bũmb ningã sõngd-d lame tɩ d bãng a sẽn da get moonegã wa tʋʋm-yãgdem to-to wã. (Karm-y Tʋʋm 20:18-21.) Wõnda a sẽn ta be wã tɛka, a ra moonda koe-noogã wʋsg zak-zaka. Sẽn paase, yʋʋm a yiib tõre, a ra maana na-kẽndre, ‘n zãmsd karen-biisã a Tiranus lekoll doog pʋgẽ daar fãa.’ (Tʋʋ. 19:1, 8-10) Vẽenega, a Poll da wilgda daar fãa t’a miime tɩ koe-moonegã yaa tʋʋm-yãgdem. B sẽn sagend-d tɩ d moond ne yãgbã pa sẽn na yɩl tɩ d tags tɩ tʋʋmdã yɩɩda d pãng ye. La koɛɛgã mooneg n segd n pak tõnd n yɩɩda.
10. Bõe yĩng tɩ Biiblã Zãmsdb sẽn moon koɛɛgã ne yãgbã noom tõndo?
10 Yʋʋmd 1914 soabã sẽn wa n kolgã, Biiblã Zãmsdb sõor sẽn da yaa bilfã sɩnga koe-noogã moonego. B mak-sõngã sõngda tõnd tɩ d wʋm moon ne yãgbã sẽn dat n yɛɛlga. Baa b sõorã sẽn da zems tus a wãn balã, b ra miime tɩ b wakatã pa reem wakate, n da moond Rĩungã koɛɛg ne yẽesem. B gʋlsa sõss n kɩt tɩ b yiis sẽn yɩɩd zʋrnall-dãmb 2000 pʋsẽ. B maana filim buud sẽn da yaa imaaz-rãmb sẽn yit n pʋgd taab me, n da boond-a tɩ “ Photo-Drame de la Création. ” Woto kɩtame tɩ b tõog n taas neb milyõ-rãmb koe-noogã. Nin-kãensã sã n da pa bãng tɩ koe-moonegã yaa tʋʋm-yãgdem, tõnd sʋka, neb a wãn n da na n wʋm Rĩungã koɛɛgã?—Karm-y Yɩɩl Sõamyã 119:60.
DA YĨM-Y TƖ TƲƲMDÃ YAA TƲƲM-YÃGDEM YE
11. Bõe yĩng tɩ neb kẽer pa le moond koɛɛgã ne yãgbo?
11 Tiisg tõe n kɩtame tɩ ned wa pa le tagsdẽ tɩ koɛɛgã mooneg yaa tʋʋm-yãgdem ye. A Sʋɩtãan tũnugda ne a dũniyã n dat n tiis tõnd a Zeova tʋʋmdã pʋgẽ, n modgd sẽn na yɩl tɩ d bas tɩ d mens tʋʋma, la bũmb a taab sẽn pa tar yõod rɩ d sẽkã zãnga. (1 Pɩɛ. 5:8; 1 Zã 2:15-17) Neb kẽer sẽn da lʋɩɩsd a Zeova tʋʋmdã taoor wa n pa le get-a wa tʋʋm-yãgdem ye. Wala makre, pipi kiris-nebã wakatẽ, a Demas yɩɩ a Poll ‘tʋmd-n-taaga,’ la a wa n basame tɩ dũniyã yɛl tiis-a. A ra tog n kell n paa ne a Poll n keng a raood wakat kãng sẽn da pa nana ne-a wã. La a bas-a lame n looge.—File. 23, 24; 2 Tɩm. 4:10.
12. Bõe la d tar weer n tõe n maan rũndã-rũndã, la bõe la d na n paam weer n maan beoog-daare?
12 D sã n dat n kell n tʋmd Wẽnnaam tʋʋmdã ne yãgbo, d segd n zãaga d mens ne bũmb ning fãa sẽn tõe n tiis-dã. D segd n maana d sẽn tõe fãa n wa tõog “n paam vɩɩm sẽn yaa sɩdã.” (1 Tɩm. 6:18, 19) Yaa vẽeneg tɩ y kɩsa sɩd tɩ Wẽnnaam Rĩungã naam dɩɩb sasa, d sẽn na n paam n vɩɩmd tẽngã zug wakat sẽn kõn sa yĩngã, d na n paama weer n maan bũmb wʋsg n noog d sũuri. La yaa tõnd wakatã bal la d tar weer n tõe n sõng nebã tɩ b wa paam n põs Armagedõ sasa.
13. Bõe n tõe n sõng-d tɩ d ket n moond koɛɛgã ne yãgbo?
13 Sẽn mik tɩ nebã fãa la bal gõee a Zeova raabã maaneg wɛɛngẽ wã, bõe n tõe n sõng-d tɩ d ket n moond koɛɛgã ne yãgbo? D tõe n tẽegame tɩ wakat n zĩnd tɩ tõnd me ra gõe lik pʋgẽ. La wa a Poll sẽn wilgã, b neka tõnd tɩ Kiristã vẽneg-do. Masã, tõnd me paam n tõe n vẽnega d taaba. (Karm-y Efɛɛz rãmb 5:14.) A Poll sẽn wilg rẽ wã poore, a yeela woto: ’Bɩ y gũus ne yãmb kẽnd neer tɩ zems ne bũmb fãa zãng wa yam dãmba, la ka wa yalemb ye. Bɩ y maan yãmb sẽn tõe tɛk wakat fãa, tɩ bõe, masã yaa wẽng wakate.’ (Ef. 5:15, 16) D sẽn vɩ dũni-kãngã sẽn yaa wẽngã pʋgẽ wã yĩnga, tara yõod tɩ d maand d “sẽn tõe tɛk wakat fãa,” n paamd sẽk n tʋmd tʋʋm sẽn tõe n kɩt tɩ d ra gũs Wẽnnaam daabã maanegã wɛɛngẽ ye.
TÕND WAKATÃ PA REEM WAKAT YE
14-16. Bõe yĩng tɩ yaa masã la koe-moonegã yaa tʋʋm-yãgdem n yɩɩd pĩndã?
14 Kiris-nebã koe-moonegã sɩng n yaa tʋʋm-yãgdem, la rũndã-rũndã la a yaa tʋʋm-yãgdem n yɩɩda. Yʋʋmd 1914 tɛka, bũmb toor-toor n maand tẽngã zugu, tɩ yaa wa Wẽnnaam Gomdã sẽn da pĩnd n togsã bal kɛpɩ. (Mat. 24:3-51) Ninsaalbã vɩɩm zɩ n zĩnd yell pʋgẽ wa masã ye. Baa tẽns nins sẽn tar pãng wʋsgã sẽn zems taab n yeel tɩ b pa na n le zab taabã, b ket n tara na maan bõmb nikleɛɛr-dãmb 2000 b sẽn tõe n lob wakat buud fãa. Naoor wʋsgo, goosneema-rãmb n wilg tɩ b nikleɛɛr zab-teed n “meneme.” Zab-te-kãens kẽer tõe n lʋɩɩ teerorist-rãmb nusẽ bɩ? Sãnda yetame tɩ zabr teerorist sẽn sɩng tõe n yɩɩ sabab tɩ ninsaalbã fãa ki. La pa zabã bal n kɩt tɩ ninsaalbã vɩɩm be yell pʋgẽ ye.
15 Yʋʋmd 2009 soabã pʋgẽ, sebr a ye yiisdb (The Lancet) ne Lõndr inivɛrsite a ye rãmb yeela woto: “Yʋʋmd 2000 soabã loogr poore, dũniyã gill zugu, yaa tẽn-gãongã wɩngr n kɩt tɩ ninsaalbã yĩnsã laafɩ wã be yell pʋgẽ n yɩɩda. Tẽn-gãongã wɩngrã sẽn wat ne zu-loees nins laafɩ wã wɛɛngẽ wã na n paama ninsaalbã fãa la bal yʋʋm nins sẽn pʋgdã pʋsẽ, tɩ neb milyaar-dãmb vɩɩm la b laafɩ na n maneg n zĩnd yell pʋgẽ.” Mogrã koom sẽn paasdã, warã, sa-bɛdã, bã-longdsã, seb-bɛdã la zab nins tẽnsã sẽn mi n zabd taab tẽn-gãongã laogã sẽn tar boogrã poorã tõe n sãamã tẽngã zĩis wʋsgo. Vẽenega, zabã la sabab-wẽnsã kɩtame tɩ ninsaalbã vɩɩm be yell pʋgẽ.
16 Tõe tɩ neb kẽer tagsdame tɩ yaa zabr b sẽn na n wa zab ne nikleɛɛr zab-teedo, n na n pids bãngr-gomd ning a Zezi sẽn da togs yaoolem dayã wɛɛngẽ wã. La neb wʋsg pa wʋmd a Zezi bãngr-gomdã võor ye. Hal na maan yʋʋm wʋsgo, d nee yɛl sẽn wilgd tɩ Kiristã reega a naamã, la tɩ dũni-kãngã saabã ta n saame. (Mat. 24:3) Yaa masã la d ne bũmb nins a Zezi sẽn togs a bãngr-gomdã pʋgẽ wã vẽeneg-vẽeneg n yɩɩda. Yaa wakat nebã sẽn segd n nek Wẽnnaam daabã maaneg wɛɛngẽ. Tõnd koe-noogã tõe n sõng-b lame tɩ b neke.
17, 18. a) D sẽn mi tɩ d vɩɩ yaoolem wakatã kɩtame tɩ d maand bõe? b) Bõe n tõe n kɩt tɩ neb kẽer wa toeem n dat n kelg Rĩungã koɛɛgã?
17 Wakat ning d sẽn tar n na n wilg a Zeova d nonglmã la d baas koe-moonegã tʋʋmd a sẽn bobl-d yaoolem dayã pʋgẽ wã keta bilfu. A Poll sẽn yeel Rom kiris-nebã bũmb ningã tara yõod ne tõnd rũndã-rũndã n yɩɩda. A yeel-b-la woto: “Yãoã yaa bõn-kãseng n yɩɩda, yãmb sẽn bãng tõnd sẽn be wakat ningã yĩnga. Wakat taame tɩ yãmb tog n nek n bas gõeem. Tɩ bõe, masã, tõnd fãagr kolgame n yɩɩd tõnd sẽn da tẽ wakatã.”—Rom 13:11.
18 Bũmb nins b sẽn pĩnd n togs tɩ na n zĩnda yaoolem wakatã sẽn be rũndã-rũndã wã tõe n kɩtame tɩ nebã bãng tɩ b segd n baoa Wẽnnaam zoodo. Neb kẽer sã n tagsd goosneema-rãmbã sẽn pa tõog n welg ninsaalbã zu-loeesã yelle, b wat n dat n kelga Rĩungã koɛɛgã. Makre, b pa tõog n menes ligdã zu-loeesã, nikleɛɛr zab-teedã sẽn wat ne rabeem ningã, nen-kɛglem tʋʋmã wall tẽn-gãongã la pemsmã rẽgengã ye. Sãnda yaa b zakã pʋgẽ zu-loɛɛga, wala makre, bãaga, kãadem kaoob wall b ned kaalem n kɩtd tɩ b sɩng koɛɛgã kelgre. Dẽnd d sã n moond koɛɛgã, d paamd n sõngda nin-kãens buudã.
B WILGDAME TƖ B TƲMDA NE YÃGBO
19, 20. Wãn to la kiris-neb wʋsg sẽn bãng tɩ koe-moonegã yaa tʋʋm-yãgdmã toeem b yɛla?
19 Kiris-neb wʋsg sẽn mi tɩ koe-moonegã yaa tʋʋm-yãgdmã yĩnga, b toeema b yɛl kẽere, n tõog n paas b koe-moonegã. Wala makre, Ekoatɛɛr tẽngã pʋgẽ, bi-bɩɩg a yembr ne a pag n kẽng yʋʋmd 2006 daar a ye tigs-kãsengã. Tigs-kãsen-kãng gom-zugã ra yeta woto: “Tall-y nif sẽn yaa sõma.” B sẽn kelg sõssã poore, b yãka yam n na n bas yɛl kẽer baoobo. B baoa sebr n gʋls bũmb nins b sẽn tar tɩ pa tɩlae ne-bã. Sẽn wa n na n ta kiis a tãabã tɩ b yii roog ning pʋgẽ b sẽn da be wã sẽn da tar pʋs a tã wã, n tɩ rɩk roog sẽn tar ro-pʋg a yembre, n koos b teed kẽer la b yao b sama fãa. Pa yã n kaoos la b lebg sõngr so-pakdb ye. B kelga b tigims sull yel-gɛtã saglg me, n tɩ sõngd tiging koe-moondb sẽn pa waooge.
20 Amerikdinoor saam-biig a ye yeela woto: “Maam ne m pagã sẽn wa n kẽnd yʋʋmd 2006 soabã tigs-kãseng a ye tɩ d sẽn deeg lisgã taa yʋʋm 30. D sẽn wa n yi tigs-kãsengã n kuiisẽ wã, d ra sõsda ne taab n dat n bãng d sẽn tõe n maan to-to n tũ b sẽn sagend-d tɩ d ra gĩd d vɩɩmã ne bũmb wʋsgã. (Mat. 6:19-22) D ra tara zags a tã, parsɛll-vɩʋʋgo, mobila ligd sẽn toe, batayo-bila, la mobill sẽn yaa wa roogo. D sẽn tags tɩ tõe tɩ d pa maand wa kiris-neb sẽn yaa yam dãmba, d yãka yam n dat n wa lebg wakat fãa so-pakdba. Yʋʋmd 2008 wã pʋgẽ, d lebga wakat fãa so-pakdb wa d bi-puglã. D sẽn da paam n naagd d saam-biisã n moond wakat fãa wã sɩd ra kõt-d-la su-noogo! D tõog n tɩ sõng n moona zĩis b sẽn da pa moond wʋsgo. Sẽn paase, d sẽn da tʋmd a Zeova tʋʋmdã wʋsgã paasa zood ning d sẽn tar ne-a wã pãnga. Sẽn da kõt sũ-noog n yɩɩd yaa d sẽn da paamd n yãt nebã sũy sẽn yaa noog to-to, b sẽn wat n kelgd Wẽnnaam Gomdã la b wʋmd a võorã.”
21. Bõe yĩng tɩ d moond koɛɛgã ne yãgbo?
21 D miime tɩ Wẽnnaam na n menesa dũni-kãngã “bʋʋd kaoob la wẽn-kɩɩsdbã sãoong daar” sẽn wat ka la bilfã sasa. (2 Pɩɛ. 3:7) D sẽn mi Wẽnnaam Gomdã sẽn yet bũmb ningã kɩtame tɩ d moond ne yẽesem, n wilgdẽ tɩ to-kãseng n wate, la tɩ rẽ poore, dũni-paalg n na n pʋgle. D ket n miime tɩ koe-moonegã yaa tʋʋm-yãgdem, n wilgd nebã saagr hakɩk ning sẽn be beoog-daar yĩngã. D sẽn kẽesd d meng tʋʋm-kãngã sẽn yaa tʋʋm-yãgdem pʋgẽ ne d sũur fãa wã, d wilgdame tɩ d nonga Wẽnnaam la d taabã.
[Zãmsgã sogsgã]
